1-2. (a) Chi teˇ lawn hkʼaw ngaˬ hui aˬ htoꞈ ma ve na hkawˇ htaꞈ henˇ tuˬ le? (b) Yaˬhoˉvaˬ ngaˬ hui htaꞈ awˬ tehˬ ga laˇ gaˇ ve hkʼaˬ hkʼe htaˇ le?

 Ngaˬ hui a shaꞈ teꞈ kuiˬ hkʼaw shoꞈ shaꞈ ve htaꞈ yeunˇ hkanˍ gʼaˇ leh yawˇ ve kanˉ te ve hkʼaw ha lehˬ ve cawˬ tuˬ Yaˬhoˉvaˬ ga laˇ gaˇ ve yoˬ. Yaˬhoˉvaˬ ngaˬ hui htaꞈ hkʼaˬ hkʼe ga laˇ ve le? Ngaˬ hui awˬ bon gʼa tuˬ hkʼaˬ hkʼe te cawˇ ve le? Na hkawˇ chi teˇ hpaˍ chi teˇ lawn hkʼaw hkʼawꞈ laˇ tuˬ yoˬ. Awˉ lawˉ htaˇ ngaˬ hui na hkawˇ teˇ maˬ htaꞈ caˉ daꞈ ve teˇ geh nyi sheˍ. Chi lehˬ Yaˬhoˉvaˬ ngaˬ hui htaꞈ awˬ tehˬ ga laˇ gaˇ˗aw laˇ?

² Na hkawˇ chi htaꞈ hkʼawꞈ laˇ gʼa tuˬ, Pawˇluꞈ Heˍbrehˇ chaw Hkriꞈ yaˇ htaꞈ liꞈ bvuhꞈ piˇ ve hkʼaw ngaˬ hui mawˬ gʼa tuˬ yoˬ. Pawˇluꞈ kʼoˆ ve, “Jawˇ mawˇ Gʼuiˬ sha lehˬ, ngaˬ htaꞈ ga laˇ shehˍ hpaˇ hpehꞈ leh, ngaˬ teꞈ chiˉ kawˆ tuˬ maˇ cawˬ. Chaw yaˇ ngaˬ htaꞈ aˬ htoꞈ ma te laˇ hpehꞈ tuˬ le?” (Heˍbrehˇ 13:6) Liꞈ hpu htaꞈ caˉ daꞈ ve liꞈ kʼoˆ teˇ hpaˍ hkʼaw kʼoˆ ve, “ga laˇ shehˍ hpaˇ” tehꞈ kʼoˆ ve lehˬ, ga laˇ tuˬ loˍ ve chaw htaꞈ haˆ ga piˇ ve htaꞈ kʼoˆ gaˇ ve yoˬ. Yaˬhoˉvaˬ chi hkʼe te chehˇ ve htaꞈ nawˬ dawˇ nyi sheˍ. Tuꞈ hkanˍ jaˇ ve chaw htaꞈ yawˇ ga piˇ gaˇ jaˇ ve yoˬ. Leh yawˇ ngaˬ hui geh chehˇ ve kʼo, ngaˬ hui tuꞈ ve hkanˍ ve htaꞈ yeunˇ hkanˍ gʼaˇ leh ha lehˬ ve cawˬ gʼa sheˍ ve yoˬ.

3. Ngaˬ hui tuꞈ ve hkanˍ ve htaꞈ yeunˇ hkanˍ gʼaˇ leh ha lehˬ ve cawˬ gʼa sheˍ ve Yaˬhoˉvaˬ ga laˇ ve 3 hkʼaˇ aˬ htoꞈ ma cawˬ ve le?

³ Ngaˬ hui yeunˇ hkanˍ gʼaˇ leh ha lehˬ ve cawˬ gʼa sheˍ ve Yaˬhoˉvaˬ ga laˇ ve aˬ htoꞈ ma awˬ hkʼaˇ cawˬ sheˍ ve le? Ngaˬ hui Iˉsaˍyaˆ liꞈ hkʼaw teˇ geh nyi sheˍ. Aˬ htoꞈ ma te ngaˬ hui Liꞈ hpu chi teˇ tawn hkʼaw nyi cawˇ ve le? Awˬ lawn kʼo, Iˉsaˍyaˆ htaꞈ Gʼuiˬ sha ve awˬ ha hpu dawˇ pawnˍ piˇ leh tcuh kaˍ paˍ ve tawˇ hkawˇ laiˉ tawn bvuhꞈ tcuh taˍ ve pa taw, chi beuꞈ teˇ co˗e Gʼuiˬ sha ve kanˉ te ve chaw awˬ pon yehˇ gʼa ve yoˬ. Chi hkʼoˆ kaꞈ, Iˉsaˍyaˆ lehˬ Yaˬhoˉvaˬ ve awˬ lawn hkʼa sha sha˗ehˬ na gʼa tuˬ kʼoˆ ve yoˬ. Iˉsaˍyaˆ liꞈ kaˇ nanˉ uiˍ 30 hkʼaw teˇ geh nyi sheˍ. Chi ve hkʼaw Yaˬhoˉvaˬ yawˇ ve chaw htaꞈ ga piˇ ve, Iˉsaˍyaˆ tawˇ pa haˉ tehˆ maˍ laˇ taˍ ve 3 hkʼaˇ htaꞈ teˇ geh nyi sheˍ. (1) Yaˬhoˉvaˬ ngaˬ hui ve bon  lawˬ hkawˇ htaꞈ hkʼa dehꞈ na leh hkʼawꞈ laˇ ve yoˬ. (2) Yawˇ ngaˬ hui htaꞈ beˆ maˍ laˇ ve, leh (3) chi teˇ hkui leh awˬ gʼuˇ suhˍ hpawˇ yawˇ ngaˬ hui htaꞈ awˬ bon naꞈ laˇ leh daꞈ ve awˬ ceuˬ peꞈ laˇ tuˬ yoˬ. Chi ve teˇ lawn hkʼaw 3 hkʼaˇ htaꞈ teˇ geh henˇ tuˬ yoˬ.

4. (a) Yaˬhoˉvaˬ lehˬ Iˉsaˍyaˆ ve awˬ co˗e htaˇ ve Iˉsaˍreˍlaˆ chaw htaꞈ hkʼaˬ hkʼe kʼoˆ ve le? Leh yawˇ hui htaꞈ aˬ htoꞈ ma gʼa hpuˇ tcuh ve le? (b) Yaˬhoˉvaˬ lehˬ ka tiꞈ yeˬ ve Iˉsaˍreˍlaˆ chaw hui htaꞈ dawˇ law kuiˬ aˬ htoꞈ ma piˇ ve le? (Iˉsaˍyaˆ 30:18, 19)

⁴ Iˉsaˍyaˆ liꞈ kaˇ nanˉ uiˍ 30 awˉ lawˉ teˇ tawn hkʼaw Yaˬhoˉvaˬ Iˉsaˍreˍlaˆ chaw hui htaꞈ kʼoˆ ve, yawˇ hui ve awˬ yaˇ awˬ duˬ lehˬ nyi ma heh jaˇ ve chaw hpehꞈ leh yawˇ hui te ve awˬ ceuˬ lehˬ “venˇ baˆ teˇ ceuˬ peuˬ teˇ ceuˬ te chehˇ ve yoˬ.” Leh Yaˬhoˉvaˬ kʼawꞈ kʼoˆ sheˍ ve, “yawˇ hui lehˬ, hkʼaˬ htaˆ kaꞈ Gʼuiˬ sha htaꞈ kʼawꞈ hpfuhˆ leh, yawˇ maˍ piˇ ve tawˇ hkawˇ teˇ hpaˍ htaꞈ maˇ na yuˬ puiˉ ve yoˬ.” (Iˉsaˍyaˆ 30:1, 9) Iˉsaˍreˍlaˆ chaw chi teˇ hpaˍ lehˬ Yaˬhoˉvaˬ ve hkawˇ maˇ na yuˬ ve yoˬ. Iˉsaˍyaˆ awˬ gʼuˇ suhˍ htaˇ kaꞈ kʼoˆ taˍ ve, Gʼuiˬ sha yawˇ hui htaꞈ luˬ ve sheˆ ve gʼa hpuˇ tcuh tuˬ yoˬ. (Iˉsaˍyaˆ 30:5, 17; Yeˍraˍmiˆ 25:8-11) Yawˇ hui htaꞈ Baˍbuˍlonˍ mvuhˇ miˬ lo shu ve awˬ ceˬ te tuˬ hpeh kʼai htaˇ, chi ve awˬ tehˬ hpehꞈ la ve yoˬ. Chi hkʼe hpehꞈ ve htawˇ, Iˉsaˍreˍlaˆ chaw teˇ hpaˍ Yaˬhoˉvaˬ htaꞈ ka tiꞈ yeˬ chehˇ sheˍ ve yoˬ. Iˉsaˍyaˆ kʼoˆ taˍ ve tawˇ hkawˇ Iˉsaˍreˍlaˆ chaw teˇ hpaˍ htaꞈ dawˇ law kuiˬ piˇ sheˍ ve yoˬ. Iˉsaˍyaˆ kʼoˆ ve, teˇ nyi kʼo Iˉsaˍreˍlaˆ chaw yawˇ hui paw kuiˬ Yeˍruˆsaˍlehnˍ venˇ lo Gʼuiˬ sha yawˇ hui htaꞈ kʼawꞈ˗e tcuh tuˬ yoˬ. Chi lehˬ Gʼuiˬ sha ka tiꞈ te taˍ ve htaꞈ haꞈ shaˉ ve yoˬ. (Iˉsaˍyaˆ 30:18, 19 gʼaw sheˍ.) Yaꞈ hkʼaˇ, Gʼuiˬ sha yawˇ hui htaꞈ laꞈ haˉ ponˬ piˇ ve maˇ heˆ. Yaˬhoˉvaˬ kʼoˆ ve, ‘Gʼuiˬ sha lehˬ yawˇ hui htaꞈ ha kʼaˉ ve nyi ma cawˬ chehˇ sheˍ leh nawˬ hui htaꞈ ga laˇ tuˬ gu taˍ hehnˇ taˍ ve yoˬ.’ Ka tiꞈ yeˬ ve Iˉsaˍreˍlaˆ chaw shu ve awˬ ceˬ te chehˇ ve htaꞈ ponˬ piˇ tuˬ, laiˉ hkʼawꞈ cawˬ sheˍ ve tehꞈ shiˍ tuˬ te piˇ ve yoˬ. Awˬ tehˬ kʼo, Baˍbuˍlonˍ venˇ lo shu ve awˬ ceˬ 70 hkʼawꞈ hpaˆ te peuˬ hkʼawꞈ nawˉ, Yeˍruˆsaˍlehnˍ venˇ lo gʼa kʼawꞈ˗e ve yoˬ. (Iˉsaˍyaˆ 10:21; Yeˍraˍmiˆ 29:10) Yawˇ hui a shu yawˇ ve chehˇ kuiˬ lo gʼa kʼawꞈ˗e htaˇ, shu ceˬ te htaˇ mehˆ gʼuiˬ yaꞈ la ve lehˬ, yawˇ hui gʼa kʼawꞈ˗e htaˇ ha lehˬ jaˇ leh mehˆ gʼuiˬ yaꞈ la ve yoˬ.

5. Iˉsaˍyaˆ liꞈ 30:19 hkʼaw ngaˬ hui htaꞈ aˬ htoꞈ ma htawˆ hkanˍ laˇ ve le?

⁵ Chi beuꞈ teˇ co˗e ngaˬ hui kaꞈ Iˉsaˍyaˆ kʼoˆ ve tawˇ hkawˇ htaꞈ awˬ gʼaˇ gʼa ve yoˬ. Oˇ kaˬ lo kʼoˆ ve, ‘nawˬ yawˇ htaꞈ kuˬ ve kʼo, yawˇ nawˬ hui htaꞈ kʼawꞈ yaw hkʼawꞈ laˇ tuˬ yoˬ.’ (Iˉsaˍyaˆ 30:19) Iˉsaˍyaˆ ngaˬ hui htaꞈ htawˆ hkanˍ laˇ ve, ngaˬ hui Yaˬhoˉvaˬ geh ga laˇ tuˬ lawˬ htaˇ, yawˇ ga laˇ tuˬ yoˬ. Iˉsaˍyaˆ kʼawꞈ kʼoˆ sheˍ ve, ‘yawˇ nawˬ hui htaꞈ laꞈ haˉ hkʼawꞈ laˇ tuˬ yoˬ.’ Tawˇ hkawˇ chi ve ngaˬ hui htaꞈ ka tiꞈ te laˇ ve, ngaˬ hui ve Awˬ pa Yaˬhoˉvaˬ lehˬ yawˇ ga laˇ tuˬ lawˬ ve chaw htaꞈ yawˇ ga piˇ leh yawˇ hui htaꞈ awˬ tehˬ ga piˇ ve yoˬ. Chi hkʼe shiˍ htaˇ ngaˬ hui yeunˇ hkanˍ gʼaˇ leh ha lehˬ ve cawˬ tuˬ te laˇ ve yoˬ.

6. Gʼuiˬ sha ngaˬ hui teˇ gʼaˇ leh teˇ gʼaˇ ve bon lawˬ hkawˇ htaꞈ na chehˇ ve tehꞈ Iˉsaˍyaˆ kʼoˆ ve tawˇ hkawˇ hkʼaˬ hkʼe hpeuꞈ maw laˇ ve le?

⁶ Chi teˇ tawn hkʼaw ngaˬ hui bon lawˬ ve htaꞈ aˬ htoꞈ ma ka tiꞈ te laˇ sheˍ ve le? Yaˬhoˉvaˬ lehˬ ngaˬ hui teˇ gʼaˇ leh teˇ gʼaˇ ve bon lawˬ hkawˇ htaꞈ hkʼa dehꞈ na chehˇ ve yoˬ. Aˬ htoꞈ ma te ngaˬ hui chi hkʼe kʼoˆ gʼa ve le? Iˉsaˍyaˆ liꞈ 30 awˉ lawˉ teˇ tawn hkʼaw “yawˇ hui” leh “nawˬ hui” tehꞈ kʼoˆ ve tawˇ hkawˇ cawˬ ve yoˬ. Chi lehˬ Yaˬhoˉvaˬ oˇ kaˬ lo chehˇ ve chaw hkʼa peu˗eˬ htaꞈ kʼoˆ piˇ ve yoˬ. Yaꞈ hkʼaˇ, kaˇ nanˉ ehˉ 30 hkʼaw “nawˬ” tehꞈ kʼoˆ ve lehˬ, teˇ gʼaˇ leh teˇ gʼaˇ htaꞈ kʼoˆ piˇ ve yoˬ. Chi teˇ tawn hkʼaw kʼoˆ ve, ‘nawˬ lehˬ teˇ pawˆ kaꞈ gʼa kʼawꞈ hawˬ tuˬ ve maˇ heˆ. Nawˬ yawˇ htaꞈ kuˬ ve kʼo, yawˇ nawˬ htaꞈ kʼawꞈ yaw hkʼawꞈ laˇ tuˬ yoˬ.’ Ngaˬ hui htaꞈ haꞈ ve Awˬ pa Yaˬhoˉvaˬ lehˬ yawˇ ve yaˇ paˍ yaˇ miˇ awˬ gʼaˇ nuˇ chehˇ ve chaw htaꞈ “aˬ htoꞈ ma te nawˬ ve awˬ viˉ awˬ nyi hkʼe awˬ gʼaˇ maˇ hehnˇ ve le” tehꞈ maˇ gʼa kʼoˆ piˇ. Chi hkʼe kʼoˆ piˇ ve aꞈ kehˉ, Gʼuiˬ sha lehˬ ngaˬ hui teˇ gʼaˇ leh teˇ gʼaˇ htaꞈ a yeˇ yuˬ laˇ leh ngaˬ hui bon lawˬ ve yawˇ awˬ pon a yeˇ uiˍ jaˇ ve tehꞈ shawˍ ve yoˬ.—Chiˇ mvuh ve 116:1; Iˉsaˍyaˆ 57:15.

7. Ngaˬ hui bon hkʼaˬ htaˆ kaꞈ lawˬ cawˇ ve tehꞈ Iˉsaˍyaˆ leh Yeˍsuˆ hkʼaˬ hkʼe kʼoˆ ve le?

⁷ Ngaˬ hui dawˇ haˍ ve awˬ ceuˬ bon lawˬ htaˇ  Yaˬhoˉvaˬ htaꞈ kʼoˆ piˇ ve kʼo, ngaˬ hui htaꞈ laꞈ haˉ hkʼawꞈ laˇ ve awˬ hkʼaˇ lehˬ, ngaˬ hui awˬ gʼaˇ cawˬ leh yeunˇ hkanˍ gʼaˇ tuˬ ga laˇ ve yoˬ. Yaꞈ hkʼaˇ, shoꞈ shaꞈ ve awˬ lawn ngaˬ hui gʼa hpuˇ ve laꞈ haˉ maˇ gu gʼa ve kʼo˗ehꞈ? Ngaˬ hui awˬ gʼaˇ cawˬ leh yeunˇ hkanˍ gʼaˇ tuˬ Yaˬhoˉvaˬ ga laˇ tuˬ bon laiˉ pawˆ gʼa lawˬ cawˇ ve yoˬ. Yaˬhoˉvaˬ kaꞈ ngaˬ hui htaꞈ chi hkʼe lawˬ tcuh gaˇ ve yoˬ. Iˉsaˍyaˆ kʼoˆ ve, ‘Yaˬhoˉvaˬ htaꞈ gʼaˇ maˇ jehˇ tcuh gaˇ.’ (Iˉsaˍyaˆ 62:7) Chi teˇ tawn hkʼaˬ hkʼe kʼoˆ gaˇ ve le? Ngaˬ hui Yaˬhoˉvaˬ htaꞈ gʼaˇ maˇ jehˇ tcuh gaˇ ve pa taw, yawˇ geh hkʼaˬ htaˆ kaꞈ bon lawˬ cawˇ ve yoˬ. Iˉsaˍyaˆ kʼoˆ ve tawˇ hkawˇ, Luˉkaꞈ liꞈ 11:8-10, 13 hkʼaw Yeˍsuˆ tawˇ pa haˉ tehˆ maˍ laˇ taˍ ve htaꞈ dawˇ mawˬ ve yoˬ. Yeˍsuˆ lehˬ ngaˬ hui htaꞈ “lawˬ tcuhˉ taˍ” leh daꞈ kehˬ ve awˬ ha hpu gʼa tuˬ ca tcuhˉ taˍ tcuh gaˇ ve yoˬ. Chi hkʼoˆ kaꞈ, ngaˬ hui cawˇ ve hkʼaw dawˇ cheˆ gʼa tuˬ Yaˬhoˉvaˬ beˆ maˍ laˇ tcuh gʼa sheˍ ve yoˬ.

8. Iˉsaˍyaˆ liꞈ 30:20, 21 hkʼaw Iˉsaˍreˍlaˆ chaw awˬ pon awˬ tehˬ hkʼaˬ hkʼe hpehꞈ la ve le?

⁸ Iˉsaˍyaˆ liꞈ 30:20, 21 gʼaw sheˍ. Baˍbuˍlonˍ ve maꞈ yaˇ Yeˍruˆsaˍlehnˍ venˇ lo ca hoˆ la ve 1 hkʼawꞈ hpaˆ peuˬ hkʼawꞈ nawˉ, venˇ oˇ ve hkʼaw chehˇ ve chaw tuꞈ ve hkanˍ ve gʼa hpuˇ maw jaˇ ve pa taw, caˇ tuˬ leh iˉ kaˆ hkʼa dehꞈ maˇ cawˬ ve lehˬ a hkʼe leˇ ceh hpehꞈ ve yoˬ. Yaꞈ hkʼaˇ, kaˇ nanˉ ehˉ 20-21 hkʼaw kʼoˆ taˍ ve hkʼe, Yaˬhoˉvaˬ Iˉsaˍreˍlaˆ chaw chi teˇ hpaˍ htaꞈ ka tiꞈ te piˇ ve, yawˇ hui dawˇ hpfuhˆ leh nyi ma pa ve kʼo, Gʼuiˬ sha yawˇ hui htaꞈ ponˬ piˇ tuˬ yoˬ. Iˉsaˍyaˆ kʼoˆ ve, Yaˬhoˉvaˬ lehˬ ‘Uiˍ jaˇ mvuh jaˇ ve maˍ laˇ shehˍ hpaˇ’ hpehꞈ ve yoˬ. Leh yawˇ kʼawꞈ kʼoˆ sheˍ ve, yawˇ hui Gʼuiˬ sha htaꞈ oˉ kʼoˍ pui ve hkʼaw yawˇ haꞈ yuˬ laˇ tuˬ maˍ piˇ sheˍ ve yoˬ. Tcuh kaˍ paˍ tawˇ hkawˇ chi Iˉsaˍreˍlaˆ chaw Baˍbuˍlonˍ mvuhˇ miˬ lo shu ve awˬ ceˬ te leh hpehˇ piˇ htaˇ awˬ tehˬ hpehꞈ la ve yoˬ. Yaˬhoˉvaˬ lehˬ yawˇ hui awˬ pon Uiˍ jaˇ mvuh jaˇ ve maˍ piˇ shehˍ hpaˇ hpehꞈ leh, daꞈ kehˬ ve oˉ kʼoˍ pui kuiˬ kʼawꞈ gu te tuˬ yawˇ hui htaꞈ beˆ maˍ piˇ ve yoˬ. Ngaˬ hui htaꞈ beˆ maˍ laˇ shehˍ hpaˇ Yaˬhoˉvaˬ lehˬ Uiˍ jaˇ mvuh jaˇ ve pa taw, chi beuꞈ teˇ co˗e ngaˬ hui kaꞈ awˬ bon gʼa leh daꞈ ve awˬ ceuˬ maˇ maˇ gʼa ve yoˬ.

9. Chi beuꞈ teˇ co˗e Yaˬhoˉvaˬ ngaˬ hui htaꞈ beˆ maˍ laˇ ve awˉ lawˉ teˇ hkʼaˇ lehˬ aˬ htoꞈ ma le?

⁹ Ngaˬ hui liꞈ henˇ yaˇ hkʼe hpehꞈ leh Yaˬhoˉvaˬ 2 hkʼaˇ htaꞈ cuˇ leh ngaˬ hui htaꞈ maˍ laˇ ve awˬ lawn chi htaꞈ Iˉsaˍyaˆ tehˆ maˍ laˇ ve yoˬ. Iˉsaˍyaˆ kʼoˆ ve, awˉ lawˉ teˇ hkʼaˇ lehˬ ‘maˍ laˇ shehˍ hpaˇ chi htaꞈ nawˬ gʼa mawˬ tuˬ yoˬ.’ Uiˍ jaˇ mvuh jaˇ ve maˍ laˇ shehˍ hpaˇ chi lehˬ, yawˇ ve liꞈ henˇ yaˇ gʼuˇ suhˍ lo huˉ taˍ ve htaꞈ shuˍ ve ngaˬ hui dawˇ mawˬ ve yoˬ. Chi beuꞈ teˇ co˗e Yaˬhoˉvaˬ ngaˬ hui htaꞈ maˍ laˇ ve awˬ bon gʼa jaˇ. Yawˇ ngaˬ hui htaꞈ hkʼaˬ hkʼe maˍ laˇ ve le? Gʼuiˬ sha lehˬ yawˇ ve kanˉ hkʼaˇ htaꞈ cuˇ leh ngaˬ hui na gʼa tuˬ hkʼa tawˍ lehˆ beˆ maˍ laˇ taˍ ve yoˬ. Yaˬhoˉvaˬ ve kanˉ hkʼaˇ ngaˬ hui htaꞈ maˍ laˇ ve teˇ hpaˍ lehˬ, Hkriꞈ yaˇ awˬ moˍ hpawnˬ daꞈ ve, hpawnˬ daꞈ lonˉ hkʼaw, maˍ laˇ ve awˬ ceuˬ teˇ hpaˍ hkʼaw, JW awˬ han tawˆ kuiˬ hkʼaw, leh awˬ nu ve kaꞈ laiˉ ceuˬ cawˬ ve yoˬ. Chi ve lehˬ ngaˬ hui tuꞈ jaˇ  hkanˍ jaˇ ve gʼa hpuˇ htaˇ, ngaˬ hui yeunˇ hkanˍ gʼaˇ leh ha lehˬ ve cawˬ sheˍ ve yoˬ.

10. Ngaˬ hui hkʼawꞈ nawˉ hpawˇ lo ve awˬ hkawˇ htaꞈ hkʼaˬ hkʼe gʼa kaˇ ve le?

¹⁰ Yaˬhoˉvaˬ ngaˬ hui htaꞈ maˍ laˇ ve, 2 hkʼaˇ teˇ hkʼaˇ htaꞈ Iˉsaˍyaˆ kʼoˆ taˍ ve yoˬ. Yawˇ kʼoˆ ve, “nawˬ hkʼawꞈ nawˉ hpawˇ lo ve awˬ hkawˇ htaꞈ gʼa kaˇ tuˬ yoˬ.” Yaˬhoˉvaˬ lehˬ liꞈ henˇ yaˇ hkʼawꞈ nawˉ lo saˍ laꞈ juˇ kʼai chehˇ ve htaꞈ shuˍ ve tehꞈ Iˉsaˍyaˆ tehˆ maˍ laˇ taˍ ve yoˬ. Leh liꞈ henˇ yaˇ hkʼaˬ hpawˇ lo kʼai cawˇ ve htaꞈ shiˍ tuˬ beˆ maˍ piˇ chehˇ ve htaꞈ shuˍ ve yoˬ. Chi beuꞈ teˇ co˗e ngaˬ hui kaꞈ Yaˬhoˉvaˬ ve hkawˇ hkʼawꞈ nawˉ lo gʼa kaˇ chehˇ ve yoˬ. Liꞈ hpu lehˬ Gʼuiˬ sha ve awˬ ha hpu dawˇ pawnˍ piˇ leh bvuhꞈ tcuh taˍ ve cawˬ maw jaˇ˗oˬ. Chi htaꞈ pa taw, ngaˬ hui Liꞈ hpu gʼaw htaˇ, ngaˬ hui hkʼawꞈ nawˉ hpawˇ lo Yaˬhoˉvaˬ hkawˇ gʼa kaˇ chehˇ ve htaꞈ shuˍ ve yoˬ.—Iˉsaˍyaˆ 51:4.

11. Ngaˬ hui yeunˇ hkanˍ gʼaˇ leh ha lehˬ ve cawˬ tuˬ hkʼaˬ hkʼe gʼa te cawˇ ve le? Leh aˬ htoꞈ ma te ngaˬ hui chi hkʼe te cawˇ ve le?

¹¹ Liꞈ hpu leh Yaˬhoˉvaˬ ve kanˉ hkʼaˇ hkʼaw ve liꞈ ngaˬ hui awˬ pon awˬ bon cawˬ tuˬ hkʼaˬ hkʼe gʼa te cawˇ ve le? Iˉsaˍyaˆ kʼoˆ taˍ ve 2 hkʼaˇ htaꞈ teˇ geh nyi sheˍ. Awˉ lawˉ teˇ hkʼaˇ lehˬ ‘cawˇ ve yaꞈ kʼaw choˬ hpawˇ lo cawˬ ve yoˬ.’ 2 hkʼaˇ teˇ hkʼaˇ lehˬ ‘yaꞈ kʼaw chi htaꞈ juˇ kʼai sheˍ.’ (Iˉsaˍyaˆ 30:21) ‘Cawˇ ve’ yaꞈ kʼaw hkʼaˬ hpawˇ lo cawˬ ve htaꞈ shiˍ ve ceh maˇ lawꞈ. Ngaˬ hui yaꞈ kʼaw chi teˇ caˆ htaꞈ gʼa toˇ kʼai cawˇ ve yoˬ. Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve shiˍ tuˬ, Liꞈ hpu leh yawˇ ve kanˉ hkʼaˇ hkʼaw maˍ laˇ ve yoˬ. Yaꞈ hkʼaˇ, ngaˬ hui henˇ taˍ ve awˬ ceuˬ htaꞈ gʼaꞈ te cawˇ ve yoˬ. Ngaˬ hui chi ve 2 hkʼaˇ htaꞈ gʼaꞈ te ve kʼo, ngaˬ hui yeunˇ hkanˍ gʼaˇ leh Yaˬhoˉvaˬ ve kanˉ ha lehˬ ve hkʼaw te gʼa ve yoˬ. Chi hkʼoˆ kaꞈ, chi hkʼe te ve lehˬ Yaˬhoˉvaˬ awˬ bon naꞈ laˇ leh daꞈ ve awˬ ceuˬ peꞈ laˇ tuˬ yoˬ tehꞈ ngaˬ hui hkʼa dehꞈ yonˍ gʼa ve yoˬ.

12. Iˉsaˍyaˆ liꞈ 30:23-26 hkʼaw kʼoˆ taˍ ve hkʼe, Yaˬhoˉvaˬ lehˬ yawˇ ve chaw htaꞈ awˬ bon naꞈ piˇ leh daꞈ ve awˬ ceuˬ hkʼaˬ hkʼe piˇ ve le?

¹² Iˉsaˍyaˆ liꞈ 30:23-26 gʼaw sheˍ. Yuˇdaꞈ chaw Baˍbuˍlonˍ mvuhˇ miˬ lo shu ve awˬ ceˬ te ve kʼawꞈ la htaˇ, tcuh kaˍ paˍ ve tawˇ hkawˇ chi awˬ tehˬ hkʼaˬ hkʼe hpehꞈ la ve le? Yawˇ hui a shaꞈ teꞈ hkʼaˇ hkʼaw Yaˬhoˉvaˬ ve kanˉ te gʼa tuˬ, yawˇ yawˇ hui htaꞈ daꞈ ve awˬ ceuˬ laiˉ ceuˬ piˇ ve yoˬ. Leh Yaˬhoˉvaˬ yawˇ hui htaꞈ caˇ tuˬ maˇ maˇ piˇ ve awˬ hkʼoˆ kaꞈ, yawˇ hui yawˇ geh meuˆ daꞈ tuˬ leh daꞈ kehˬ ve oˉ kʼoˍ pui kuiˬ kʼawꞈ gu te tuˬ kaꞈ ga piˇ ve yoˬ. Chi teˇ pawˆ lehˬ yawˇ hui teˇ pawˆ le le aꞈ kehˉ daꞈ ve awˬ ceuˬ gʼa maˇ jaˇ ve yoˬ. Chi hkʼoˆ kaꞈ, kaˇ nanˉ ehˉ 26 hkʼaw Yaˬhoˉvaˬ yawˇ hui htaꞈ awˬ gʼeuˆ piˇ ve yoˬ. Chi kʼoˆ gaˇ ve lehˬ, Yaˬhoˉvaˬ ve tawˇ hkawˇ yawˇ hui hkʼa dehꞈ na gʼa tuˬ kaꞈ ga piˇ ve yoˬ. (Iˉsaˍyaˆ 60:2) Yawˇ hui htaꞈ awˬ bon naꞈ piˇ leh daꞈ ve awˬ ceuˬ piˇ ve chi lehˬ, yawˇ hui htaꞈ awˬ gʼaˇ cawˬ leh Yaˬhoˉvaˬ ve kanˉ ha lehˬ ha kʼa ve hkʼaw te gʼa tuˬ ga piˇ ve yoˬ. Awˬ lawn kʼo, yawˇ hui nyi ma daꞈ ve chaw hpehꞈ leh “ha lehˬ ha kʼa” cawˬ ve yoˬ.—Iˉsaˍyaˆ 65:14.

13. Tcuh kaˍ paˍ ve tawˇ hkawˇ daꞈ kehˬ ve oˉ kʼoˍ pui kuiˬ htaꞈ caˉ daꞈ ve kʼoˆ taˍ ve, chi beuꞈ teˇ co˗e awˬ tehˬ hkʼaˬ hkʼe hpehꞈ ve le?

 ¹³ Daꞈ kehˬ ve oˉ kʼoˍ pui kuiˬ kʼawꞈ gu te ve htaꞈ caˉ daꞈ ve tcuh kaˍ paˍ ve tawˇ hkawˇ chi beuꞈ teˇ co˗e ngaˬ hui htaꞈ awˬ tehˬ hpehꞈ la gʼa˗aw laˇ? Awˬ tehˬ hpehꞈ la gʼa ve yoˬ. 1919 hkʼawꞈ C.E. htaˇ, chaw laiˉ lanˬ gʼaˇ Uiˍ ve Baˍbuˍlonˍ hkʼaw awˬ ceˬ te chehˇ ve htaꞈ tawˆ la ve yoˬ. Chi lehˬ miˬ guiˬ hkʼoˆ lo ve maˇ heˆ heˆ ve bon liˇ hkʼa peu˗eˬ htaꞈ kʼoˆ gaˇ ve yoˬ. Chaw chi teˇ hpaˍ lehˬ co ha hpawˇ ve awˬ viˉ awˬ nyi hkʼaw chehˇ la tuˬ shiˍ laˬ ve yoˬ. Chi lehˬ Yaˬhoˉvaˬ Iˉsaˍreˍlaˆ chaw htaꞈ ka tiꞈ te piˇ taˍ ve aꞈ kehˉ daꞈ ve yoˬ. (Iˉsaˍyaˆ 51:3; 66:8) Hkʼe kʼo, co ha hpawˇ ve awˬ viˉ awˬ nyi aˬ htoꞈ ma htaꞈ kʼoˆ gaˇ ve le?

14. Co ha hpawˇ ve awˬ viˉ awˬ nyi aˬ htoꞈ ma htaꞈ kʼoˆ gaˇ ve le? Leh chi beuꞈ teˇ co˗e oˇ kaˬ lo a shu kaꞈ gʼa chehˇ taˍ ve le? (Kʼawꞈ kʼoˆ maˍ taˍ ve hkʼaw nyi sheˍ.)

¹⁴ 1919 hkʼawꞈ C.E. htaˇ, leuˆ yuˬ taˍ ve chaw co ha hpawˇ ve awˬ viˉ awˬ nyi b geh gʼa chehˇ ve ha lehˬ jaˇ. Peuˬ hkʼawꞈ nawˉ “awˬ kaˍ awˬ nu yawˬ teˇ hpaˍ” yawˇ hui miˬ guiˬ hkʼoˆ lo co co taiˍ taiˍ dawˇ law kuiˬ cawˬ leh co ha hpawˇ ve awˬ viˉ awˬ nyi geh gʼa chehˇ ve htaꞈ kʼoˆ gaˇ ve yoˬ. Hkʼe te leh, Yaˬhoˉvaˬ geh awˬ bon gʼa leh daꞈ ve awˬ ceuˬ maˇ maˇ gʼa tuˬ yoˬ.—Yoˇhanˬ 10:16; Iˉsaˍyaˆ 25:6; 65:13.

15. Co ha hpawˇ ve awˬ viˉ awˬ nyi hkʼaˬ kaˬ lo chehˇ ve le?

¹⁵ Chi beuꞈ teˇ co˗e co ha hpawˇ ve awˬ viˉ awˬ nyi hkʼaˬ kaˬ lo chehˇ taˍ ve le? Yaˬhoˉvaˬ htaꞈ oˉ kʼoˍ pui ve chaw miˬ guiˬ chi hkʼoˆ teˇ kaˬ le le lo chehˇ taˍ ve yoˬ. Co ha hpawˇ ve awˬ viˉ awˬ nyi kaꞈ miˬ guiˬ chi hkʼoˆ teˇ kaˬ le le lo chehˇ taˍ ve yoˬ. Chi htaꞈ pa taw, ngaˬ hui hkʼaˬ kaˬ lo chehˇ ve htawˇ maˇ kʼoˆ, ngaˬ hui awˬ tehˬ oˉ kʼoˍ pui ve hpawˇ chehˇ ve kʼo, co ha hpawˇ ve awˬ viˉ awˬ nyi hkʼaw chehˇ taˍ ve yoˬ.

16. Co ha hpawˇ ve awˬ viˉ awˬ nyi hkʼaˬ htaˆ kaꞈ daꞈ ve tehꞈ ngaˬ hui mawˬ tuˬ hkʼaˬ hkʼe gʼa te cawˇ ve le?

¹⁶ Ngaˬ hui co ha hpawˇ ve awˬ viˉ awˬ nyi geh hkʼaˬ htaˆ kaꞈ chehˇ kʼai gʼa tuˬ, miˬ guiˬ hkʼoˆ teˇ kaˬ le le lo cawˬ ve Hkriꞈ yaˇ awˬ moˍ htaꞈ ngaˬ hui awˬ bon gʼa shiˍ ve yoˬ. Chi ve ngaˬ hui hkʼaˬ hkʼe te gʼa tuˬ le? Awˬ viˉ awˬ nyi yaꞈ ve awˬ ceuˬ htaꞈ maˇ nyi leh yawˇ hui te ve daꞈ ve awˬ ceuˬ htaꞈ nyi ve yoˬ. (Yoˇhanˬ 17:20, 21) Aˬ htoꞈ ma te awˬ lawn chi a yeˇ uiˍ jaˇ ve le? Tawˇ pa haˉ chi htaꞈ dawˇ nyi sheˍ. Ngaˬ hui heh puiˉ hkʼaw lo ca guiˇ˗e htaˇ, suhˆ cehˬ hawˆ cehˬ laiˉ ceuˬ ve htaꞈ mawˬ gaˇ ve maˇ heˆ laˇ? Chi ve hkʼa shuˍ shuˍ Hkriꞈ yaˇ awˬ moˍ hkʼaw ve awˬ  viˉ awˬ nyi kaꞈ peun daꞈ ve yoˬ. (Iˉsaˍyaˆ 44:4; 61:3) Ngaˬ hui heh puiˉ hkʼaw lo daꞈ ve awˬ ceuˬ htaꞈ nyi ve lehˬ, suhˆ cehˬ teˇ ceh le le ve awˬ kuiˉ hkʼaˬ kaˬ lo cawˬ ve htaꞈ ngaˬ hui nyi ve maˇ heˆ. Ngaˬ hui leh Hkriꞈ yaˇ awˬ moˍ hkʼaw ve awˬ viˉ awˬ nyi yaꞈ kuiˬ htaꞈ pa taw, miˬ guiˬ hkʼoˆ lo ve Hkriꞈ yaˇ awˬ moˍ teˇ moˍ teˇ tsuhꞈ tiˉ hpehꞈ ve daꞈ jaˇ ve chi htaꞈ nyi cha tuˬ taˇ te laˇ tcuh.

17. Hkriꞈ yaˇ awˬ moˍ hkʼaw cawˇ daꞈ hui daꞈ tuˬ ngaˬ hui teˇ gʼaˇ leh teˇ gʼaˇ hkʼaˬ hkʼe gʼa te cawˇ ve le?

¹⁷ Hkʼe kʼo, ngaˬ hui teˇ gʼaˇ leh teˇ gʼaˇ hkʼaˬ hkʼe gʼa te cawˇ ve le? Ngaˬ hui cawˇ daꞈ hui daꞈ tuˬ gʼa te cawˇ ve yoˬ. (Maꞈhtehˍ 5:9; Roˉmaꞈ 12:18) Ngaˬ hui teˇ pawˆ le le awˬ viˉ awˬ nyi geh cawˇ daꞈ hui daꞈ tuˬ awˉ lawˉ te ve kʼo, ngaˬ hui co ha hpawˇ ve awˬ viˉ awˬ nyi htaꞈ daꞈ ve awˬ ceuˬ te piˇ chehˇ sheˍ ve yoˬ. Awˬ tehˬ ve htaꞈ oˉ kʼoˍ pui la tuˬ co ha hpawˇ ve awˬ viˉ awˬ nyi htaꞈ Yaˬhoˉvaˬ gʼawˬ veu laˇ ve tehꞈ ngaˬ hui tawnˇ taˍ cawˇ ve yoˬ. (Yoˇhanˬ 6:44) Ngaˬ hui awˬ viˉ awˬ nyi geh teˇ moˍ teˇ tsuhꞈ tiˉ hpehꞈ ve htaꞈ Yaˬhoˉvaˬ awˬ hpfuhˇ hkʼaˆ jaˇ tehꞈ shawˍ ve htaꞈ yawˇ mawˬ htaˇ hkʼaˬ hkʼe taw ha lehˬ ve htaꞈ dawˇ nyi sheˍ!—Iˉsaˍyaˆ 26:3; Haˆgehˇ 2:7.

18. Ngaˬ hui aˬ htoꞈ ma awˬ lawn htaꞈ dawˇ nyi cawˇ ve le? Leh aˬ htoꞈ ma pa taw le?

¹⁸ Yaˬhoˉvaˬ lehˬ yawˇ ve kanˉ te ve chaw htaꞈ daꞈ ve awˬ ceuˬ maˇ maˇ piˇ ve yoˬ. Ngaˬ hui Gʼuiˬ sha gu teh taˍ laˇ ve awˬ ceuˬ htaꞈ awˬ bon gʼa gaˇ ve kʼo, hkʼaˬ hkʼe gʼa te cawˇ ve le? Ngaˬ hui Liꞈ hpu gʼaw leh hkʼa dehꞈ dawˇ nyi ve, leh Gʼuiˬ sha ve kanˉ hkʼaˇ hkʼaw ve liꞈ kaꞈ gʼaw ve yoˬ. Ngaˬ hui chi hkʼe te htaˇ, Hkriꞈ yaˇ ve te hkʼaˇ dawˇ hkʼaˇ cawˬ leh “awˬ viˉ awˬ nyi ha daꞈ ve hkʼe” cawˬ tuˬ te laˇ ve yoˬ. (Roˉmaꞈ 12:10) Chi teˇ hkui ngaˬ hui Yaˬhoˉvaˬ geh awˬ bon gʼa leh daꞈ ve awˬ ceuˬ aˬ htoꞈ ma gʼa ve htaꞈ dawˇ nyi htaˇ, ngaˬ hui yawˇ geh hkʼa dehꞈ meuˆ daꞈ maˇ la tuˬ te laˇ ve yoˬ. Leh awˬ gʼuˇ suhˍ hpawˇ yawˇ ngaˬ hui htaꞈ daꞈ ve awˬ ceuˬ peꞈ laˇ tuˬ ve htaꞈ dawˇ nyi htaˇ, dawˇ law kuiˬ chi ve lehˬ, ngaˬ hui ve a shaꞈ co co taiˍ taiˍ gʼa tuˬ leh Gʼuiˬ sha ve kanˉ hkʼa dehꞈ te gʼa tuˬ ga laˇ ve yoˬ. Chi ve hkʼa peu˗eˬ lehˬ ngaˬ hui Yaˬhoˉvaˬ ve kanˉ ha lehˬ ha kʼa ve hkʼaw te gʼa tuˬ ga laˇ ve yoˬ.

19. (a) Iˉsaˍyaˆ liꞈ 30:18 hkʼaw ngaˬ hui aˬ htoꞈ ma awˬ lawn htaꞈ yonˍ gʼa ve le? (b) Ngaˬ hui yeunˇ hkanˍ gʼaˇ leh ha lehˬ ve cawˬ tuˬ aˬ htoꞈ ma ga laˇ gʼa ve le?

¹⁹ Maˇ maw kʼo, Yaˬhoˉvaˬ lehˬ ngaˬ hui awˬ pon miˬ guiˬ chi hkʼoˆ lo maˇ daꞈ ve awˬ ceuˬ hkʼa peu˗eˬ htaꞈ te luˬ laˇ tuˬ yoˬ. (Iˉsaˍyaˆ 30:18) Hteˇ ve cawˇ ve Gʼuiˬ sha lehˬ, Saˍtanˍ uˉ peunˍ ve miˬ guiˬ htaꞈ yawˇ tinˍ taˍ ve awˬ nyi gaˬ ve kʼo, teˇ nyi ceh kaꞈ maˇ leuˉ kʼai tcuh ve tehꞈ ngaˬ hui hkʼa dehꞈ yonˍ gʼa ve yoˬ. (Iˉsaˍyaˆ 25:9) Yaˬhoˉvaˬ ponˬ laˇ tuˬ ve awˬ nyi htaꞈ ngaˬ hui yeunˇ hkanˍ leh law taˍ ve yoˬ. Awˬ yanˇ chi ve hkʼaw, bon lawˬ ve, Liꞈ hpu gʼaw leh hkʼa dehꞈ dawˇ nyi ve, yawˇ ngaˬ hui htaꞈ awˬ bon naꞈ laˇ leh daꞈ ve awˬ ceuˬ peꞈ laˇ ve htaꞈ dawˇ nyi ve, chi hkʼa peu˗eˬ htaꞈ ngaˬ hui awˬ hpfuhˇ shiˍ ve yoˬ. Chi hkʼe te ve lehˬ ngaˬ hui tuꞈ ve hkanˍ ve htaꞈ yeunˇ hkanˍ gʼaˇ tuˬ ga laˇ leh yawˇ htaꞈ oˉ kʼoˍ pui ve awˬ hkʼaw lo ngaˬ hui ha lehˬ ve yoˬ.