Chi ve hkʼa shuˍ shuˍ, maˇ maw ve awˬ yanˇ ngaˬ hui teˇ gʼaˇ le le “mvuhˇ yeˬ mvuhˇ haw lonˉ” gʼa hpuˇ tuˬ yoˬ. Yeˍsuˆ kʼoˆ ve, ‘tuꞈ jaˇ hkanˍ jaˇ ve hpehꞈ la tuˬ yoˬ.’ (Maꞈhtehˍ 24:21) Tuꞈ jaˇ hkanˍ jaˇ ve chi htaꞈ ngaˬ hui ponˬ tuˬ te maˇ gʼa. Yaꞈ hkʼaˇ, oˇ ve teˇ yanˇ ngaˬ hui htaꞈ kawˆ tuˬ maˇ gʼa heuˆ la tuˬ teˇ ceuˬ ceuˬ te gʼa ve yoˬ. Ngaˬ hui aˬ htoꞈ ma te gʼa ve le?

Hkʼaw pui hkʼoˆ lo Yeˍsuˆ bon maˍ leh kʼoˆ ve, “Gʼuiˬ sha ve mvuhˇ miˬ leh yawˇ ve hteˇ ve cawˇ ve teˇ ceuˬ htaꞈ awˉ lawˉ ca˗o.” (Maꞈhtehˍ 6:33) Chi ve ngaˬ hui hkʼaˬ hkʼe te gʼa tuˬ le?

Gʼuiˬ sha ve mvuhˇ miˬ uˉ peunˍ ve ngaˬ hui a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ ve. Chi ve tcuhˉ kuiˬ lehˬ Gʼuiˬ sha ve mvuhˇ miˬ ngaˬ hui awˬ pon teˇ ceuˬ le aꞈ kehˉ a yeˇ uiˍ jaˇ ve tehꞈ kʼoˆ gaˇ ve yoˬ. (Maꞈhtehˍ 6:25, 32, 33) Aˬ htoꞈ ma pa taw le? Chaw yaˇ lehˬ shoꞈ shaꞈ ve teˇ hpaˍ gu gaˇ ve htawˇ te maˇ gʼa. Gʼuiˬ sha ve mvuhˇ miˬ ceh tiˉ gu gʼa ve yoˬ.

Gʼuiˬ sha ve mvuhˇ miˬ hteˇ ve cawˇ ve ceh tiˉ ngaˬ hui a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ ve. Chi ve tcuhˉ kuiˬ lehˬ, Gʼuiˬ sha ve awˬ liˇ awˬ hkʼaˇ hteˇ ve cawˇ ve ngaˬ hui te gʼa ve hkʼe te ve htaꞈ kʼoˆ gaˇ ve yoˬ. Aˬ htoꞈ ma pa taw le? Aˬ htoꞈ ma cawˇ ve maˇ cawˇ ve ngaˬ hui hkʼaˇ ngaˬ hui dawˇ cheˆ ve kʼo, ngaˬ hui dawˇ cheˆ ve maˇ cawˇ leh heuˆ la kuiˬ cawˬ la ve pa taw yoˬ. (Tawˇ naˉ ve 16:25) Yaꞈ hkʼaˇ, ngaˬ hui Gʼuiˬ sha ve awˬ liˇ awˬ hkʼaˇ htaꞈ gʼaꞈ te ve kʼo, Gʼuiˬ sha nyi hkʼaˇ suh leh ngaˬ hui awˬ pon kaꞈ awˬ bon cawˬ ve yoˬ.—Iˉsaˍyaˆ 48:17, 18.

Gʼuiˬ sha uˉ peunˍ ve leh Gʼuiˬ sha ve hteˇ ve cawˇ ve ngaˬ hui a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ cawˇ ve yoˬ. Chaw teˇ hpaˍ hpaˍ hpu chi ma ma cawˬ ve kʼo, yawˇ hui a shaꞈ teꞈ kuiˬ hkʼaw kawˆ tuˬ maˇ cawˬ tehꞈ dawˇ ve chaw hui htaꞈ Yeˍsuˆ shaˍ tiꞈ piˇ ve yoˬ. Hkʼe te leh, chaw teˇ hpaˍ kanˉ te ve htaꞈ ceh tiˉ a yeˇ yuˬ leh yehˬ kʼa htaꞈ nyi haꞈ shaˉ tuˬ leh  Gʼuiˬ sha ve mvuhˇ miˬ htaꞈ dawˇ nyi tuˬ awˬ yanˇ maˇ cawˬ.—Maꞈhtehˍ 6:19-21, 25-32.

Hkʼaˬ hkʼe hpehꞈ ve htawˇ Yeˍsuˆ ka tiꞈ te taˍ laˇ ve, Gʼuiˬ sha ve mvuhˇ miˬ hpawˇ chehˇ ve chaw lehˬ, loˍ ve awˬ ceuˬ cawˬ tuˬ yoˬ. Chi teˇ hkui kaꞈ ngaˬ hui a shaꞈ teꞈ kuiˬ hkʼaw awˬ bon gʼa leh awˬ gʼuˇ suhˍ hpawˇ Gʼuiˬ sha ve mvuhˇ miˬ ngaˬ hui htaꞈ awˬ bon maˇ maˇ peꞈ laˇ tuˬ yoˬ.—Maꞈhtehˍ 6:33.

Awˉ lawˉ peuˇ ve Yeˍsuˆ ve awˬ laꞈ gʼawˇ Gʼuiˬ sha ve mvuhˇ miˬ leh yawˇ ve hteˇ ve cawˇ ve a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ ve htawˇ, yawˇ hui a shaꞈ teꞈ kuiˬ hkʼaw naˬ ve gawˬ ve leh tuꞈ ve hkanˍ ve gʼa hpuˇ chehˇ sheˍ. Yawˇ hui chi hkʼe gʼa hpuˇ ve htawˇ, haꞈ shaˉ piˇ ve htaꞈ gʼa sheˍ ve yoˬ. Hkʼaˬ hkʼe haꞈ shaˉ piˇ ve le?

Yawˇ hui Gʼuiˬ sha ve hteˇ ve cawˇ ve awˬ hkʼaˇ suh gʼaꞈ te ve yoˬ. Hkʼe te leh, shoꞈ shaꞈ ve Gʼuiˬ sha hkawˇ maˇ na yuˬ ve chaw teˇ hpaˍ gʼa hpuˇ ve hkʼe, yawˇ hui maˇ gʼa hpuˇ tuˬ chi haꞈ shaˉ piˇ ve yoˬ. Gʼuiˬ sha ve mvuhˇ miˬ htaꞈ yawˇ hui yonˍ ve pa taw, yawˇ hui shoꞈ shaꞈ ve teˇ hpaˍ htaꞈ yeunˇ hkanˍ gʼaˇ tuˬ ga piˇ ve yoˬ. Yawˇ hui shoꞈ shaꞈ ve htaꞈ gu gʼa tuˬ yawˇ hui cawˬ taˍ ve awˬ gʼaˇ aꞈ kehˉ Gʼuiˬ sha kʼawꞈ piˇ ve yoˬ.—2 Kawˇrenˍhtuˆ 4:7-9.

Awˉ lawˉ peuˇ ve Hkriꞈ yaˇ Yeˍsuˆ shaˍ tiꞈ piˇ ve htaꞈ na yuˬ ve yoˬ. Yawˇ hui a shaꞈ teꞈ kuiˬ hkʼaw Gʼuiˬ sha ve mvuhˇ miˬ a yeˇ uiˍ jaˇ tehꞈ shawˍ leh yawˇ hui shiˍ taˍ kuiˬ teˇ kaˬ le le lo ha lehˬ ve bon hkawˇ maˍ kʼai ve yoˬ. (Kawˇlawˇsehˇ 1:23) Chi beuꞈ teˇ co˗e chi hkʼe te chehˇ ve a shu cawˬ ve le?

Cawˬ ve yoˬ. Maˇ maw ve awˬ yanˇ miˬ guiˬ chi haiˬ jaˇ ve htaꞈ Gʼuiˬ sha ve mvuhˇ miˬ te luˬ tuˬ yoˬ tehꞈ Yaˬhoˉvaˬ ve Shaˉhkiˆhkanˍ ve chaw shiˍ ve yoˬ. Yeˍsuˆ kʼoˆ ve, “chaw ceuˬ hkʼa peu˗eˬ awˬ pon shaˉ hkiˆ hpehꞈ tuˬ, Gʼuiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ chi, miˬ guiˬ hkʼoˆ teˇ kaˬ le le lo ca maˍ piˇ tuˬ yoˬ. Oˇ ve hkʼawꞈ nawˉ, awˬ leh meuˇ gaˬ la tuˬ yoˬ.” Chi ve teˇ tawn hkʼe yawˇ hui gʼaꞈ te chehˇ ve yoˬ.—Maꞈhtehˍ 24:14.

Nawˬ ha lehˬ ve bon hkawˇ gʼa kaˇ htaˇ hkʼaˬ hkʼe te tuˬ le? Maˍkeˍdawˇniˆ mvuhˇ miˬ Beˍriˆ venˇ chaw hkʼe nawˬ te tuˬ ngaˬ hui awˬ gʼaˇ peꞈ laˇ gaˇ ve yoˬ. Gʼuiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ Pawˇluꞈ maˍ piˇ ve htaꞈ yawˇ hui gʼa kaˇ htaˇ, yawˇ hui ha lehˬ ha kʼa haꞈ yuˬ leh “henˇ gaˇ” ve yoˬ. Peuˬ leh yawˇ hui gʼa kaˇ leh henˇ taˍ ve htaꞈ gʼaꞈ te tuˬ “teˇ nyi le le Liꞈ hpu htaꞈ hkʼa dehꞈ gʼaw nyi chehˇ ve yoˬ.”—Tcuh yaˇ 17:11, 12.

Nawˬ kaꞈ chi hkʼa shuˍ shuˍ te gʼa ve yoˬ. Gʼuiˬ sha ve mvuhˇ miˬ uˉ peunˍ ve leh yawˇ ve hteˇ ve cawˇ ve nawˬ ve a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ ve kʼo, chi teˇ hkui kaꞈ nawˬ gʼaˇ va kuiˬ cawˬ leh haꞈ shaˉ laˇ ve htaꞈ gʼa tuˬ yoˬ. Awˬ gʼuˇ suhˍ hpawˇ nawˬ co co taiˍ taiˍ dawˇ sha gawˬ lehˍ ve cawˬ leh kawˆ ve maˇ cawˬ tuˬ yoˬ.