• Gʼuiˬ sha leuˆ shehˍ hpaˇ hpehꞈ ve. ‘Ngaˬ ve jawˇ mawˇ htaꞈ ngaˬ teh taˍ peuˬ. Chaw ceuˬ hkʼa peu˗eˬ ngaˬ nawˬ htaꞈ piˇ laˇ leh, miˬ guiˬ hkʼa peu˗eˬ nawˬ ve hpehꞈ la tuˬ yoˬ.’—Chiˇ mvuh ve 2:6, 8.

• Jawˇmawˇ Daˍviˆ ve awˬ ceuˬ awˬ hkʼaˇ geh laˬ tuˬ yoˬ. ‘Ngaˬ hui awˬ pon yaˇ ehˉ teˇ gʼaˇ paw la peuˬ. Yaˇ paˍ teˇ gʼaˇ ngaˬ hui htaꞈ peꞈ laˇ peuˬ. Yawˇ ve kanˇ paˆ shaˬ te shaˬ uiˍ la leh, yawˇ ve mvuhˇ miˬ lehˬ, hkʼaˬ htaˆ kaꞈ gawˬ lehˍ cawˬ tuˬ yoˬ. Yawˇ lehˬ, Daˍviˆ ve awˬ ceuˬ awˬ hkʼaˇ teˇ gʼaˇ hkʼa shuˍ mvuhˇ miˬ htaꞈ uˉ peunˍ tuˬ yoˬ.’—Iˉsaˍyaˆ 9:6, 7.

• Behˍlehˍhehnˍ venˇ lo paw la ve. ‘Behˍlehˍhehnˍ venˇ lo uˉ peunˍ tuˬ ve chaw teˇ gʼaˇ ngaˬ tawˆ la piˇ tuˬ yoˬ. Miˬ guiˬ hkʼoˆ chehˇ ve chaw hkʼa peu˗eˬ, yawˇ hkʼaˬ ma uiˍ jaˇ mvuh jaˇ ve htaꞈ gʼa mawˬ gʼa shiˍ tuˬ yoˬ.’—Miˆhkaˍ 5:2, 4.

• Shawˍ baˬ leh tiˇ pehˍ piˇ ve. ‘Ngaˬ hui yawˇ htaꞈ teꞈ chiˉ awˬ hpfuhˇ maˇ cawˬ ve chaw hkʼe shawˍ baˬ taˍ ve yoˬ. Yawˇ lehˬ ngaˬ hui ve venˇ baˆ teˇ hpaˍ htaꞈ pa taw gʼa naˬ gʼa gawˬ leh, shu jawꞈ ve htaꞈ gʼa hkanˍ ve yoˬ.’—Iˉsaˍyaˆ 53:3, 5.

• Kʼawꞈ teꞈ tu la leh awˬ meꞈ awˬ hponˇ gʼa ve. ‘Suh ve kanˇ paˆ awˬ hawˉ lo nawˬ ngaˬ htaꞈ ponˬ laˇ ve yoˬ. Ngaˬ nawˬ ve kanˉ htaꞈ te taˍ peuˬ ve pa taw, nawˬ ngaˬ htaꞈ suh mvuhˇ miˬ hkʼaw maˇ baˬ taˉ laˇ taˬ. Nawˬ ngaˬ htaꞈ ha lehˬ tuˬ biˇ la piˇ leh, co co taiˍ taiˍ dawˇ sha tuˬ piˇ laˇ ve yoˬ.’—Chiˇ mvuh ve 16:10, 11.

Teˇ co˗e peuˬ teˇ co˗e chaw teˇ gʼaˇ uˉ peunˍ la tuˬ ve htaꞈ caˉ daꞈ ve, awˬ lawn kʼoˆ taˍ ve cawˇ daꞈ ve oˇ ve lehˬ Yeˍsuˆ htaꞈ yoˬ. Mvuhˇ naw ma tcuh yaˇ Yeˍsuˆ ve awˬ e Maˍriˆ htaꞈ kʼoˆ piˇ ve, ‘Gʼuiˬ sha lehˬ, yaˇ paˍ oˇ ve htaꞈ yawˇ awˬ pa Daˍviˆ ve kʼaw jaw piˇ tuˬ yoˬ. Yawˇ hkunˉ hawˉ hkanˇ te ve teˇ ceuˬ lehˬ, awˬ leh meuˇ maˇ cawˬ.’—Luˉkaꞈ 1:31-33.

Yeˍsuˆ miˬ guiˬ hkʼoˆ chehˇ htaˇ maˇ gʼa uˉ peunˍ jaw. Yaꞈ hkʼaˇ, yawˇ Gʼuiˬ sha ve mvuhˇ miˬ hkʼaw Jawˇmawˇ hpehꞈ leh mvuhˇ naw ma hkʼoˆ uˉ peunˍ chehˇ ve yoˬ. Yawˇ Jawˇmawˇ te ve keunˍ jaˇ tuˬ aˬ htoꞈ ma te piˇ ve le? Yawˇ miˬ guiˬ hkʼoˆ chehˇ htaˇ te jaw ve awˬ ceuˬ htaꞈ dawˇ nyi sheˍ.

•   Yeˍsuˆ chaw yaˇ htaꞈ dawˇ haˍ ve. Hawˉ hkʼaˆ, yaˇ miˇ, yaˇ ehˉ chaw mawˇ yawˇ hui hkʼaˬ hkʼe ve chaw hpehꞈ ve htawˇ maˇ kʼoˆ Yeˍsuˆ ga piˇ ve yoˬ. (Maꞈhtehˍ 9:36; Maˍkuˆ 10:16) Hkiˬ tuꞈ paˍ teˇ gʼaˇ yawˇ htaꞈ lawˬ hkawˉ leh kʼoˆ ve, “nawˬ te gaˇ ve kʼo, ngaˬ htaꞈ daꞈ la kehˬ la tuˬ nawˬ te hpehꞈ ve yoˬ.” Yeˍsuˆ yawˇ htaꞈ ha kʼaˉ leh gu na˗e piˇ ve yoˬ.—Maˍkuˆ 1:40-42.

• Gʼuiˬ sha dawˇ cawˇ ve awˬ ceuˬ htaꞈ ngaˬ hui te tuˬ Yeˍsuˆ maˍ laˇ ve. Yawˇ kʼoˆ ve, “nawˬ hui lehˬ Gʼuiˬ sha ve awˬ ceˬ kaꞈ, hpu shi mawˇ jeˬ ve awˬ ceˬ kaꞈ, teˇ pawˆ tiˉ teˇ geh te maˇ gʼa.” Yawˇ kʼawꞈ maˍ laˇ sheˍ ve, shu ngaˬ hui htaꞈ hkʼaˬ hkʼe te laˇ tcuh gaˇ ve kʼo, ngaˬ hui shu htaꞈ oˇ hkʼe gʼa te piˇ ve yoˬ. Maˍ laˇ hkawˇ chi ve lehˬ a yeˇ uiˍ ve awˬ liˇ tawˇ hkawˇ hpehꞈ ve yoˬ. Chi hkʼoˆ kaꞈ, Gʼuiˬ sha lehˬ ngaˬ hui te ve awˬ ceuˬ htaꞈ a yeˇ yuˬ ve ceh maˇ heˆ. Gʼuiˬ sha ngaˬ hui ve te hkʼaˇ dawˇ hkʼaˇ htaꞈ a yeˇ yuˬ laˇ sheˍ ve tehꞈ maˍ laˇ ve yoˬ. Hkʼe te leh, ngaˬ hui nyi ma hkʼaw cawˬ ve awˬ ceuˬ htaꞈ gʼa yuˬ tiˍ ve yoˬ. (Maꞈhtehˍ 5:28; 6:24; 7:12) Yeˍsuˆ kʼawꞈ kʼoˆ sheˍ ve, Gʼuiˬ sha aˬ htoꞈ ma loˍ ve htaꞈ ngaˬ hui gʼa henˇ leh gʼaꞈ te ve pa taw awˬ tehˬ awˬ na ha lehˬ gʼa ve yoˬ.—Luˉkaꞈ 11:28.

• Haꞈ pehnˇ ve awˬ lawn Yeˍsuˆ maˍ laˇ ve. Yeˍsuˆ kʼoˆ ve leh te ve kanˇ paˆ cawˬ ve pa taw, shu na gaˇ tuˬ te piˇ ve yoˬ. ‘yawˇ maˍ ve tawˇ hkawˇ teˇ hpaˍ htaꞈ chaw awˬ moˍ lonˉ anˇ jaˇ ve yoˬ. Awˬ lawn kʼo, kanˇ paˆ cawˬ paˍ hkʼe yawˇ maˍ piˇ ve yoˬ.’ (Maꞈhtehˍ 7:28, 29) Yawˇ kʼoˆ ve, ‘nawˬ hui ve canˇ paˍ teˇ hpaˍ htaꞈ haꞈ˗oꞈ.’ Yeˍsuˆ suhˆ hkuiˉ daw hkʼoˆ chehˇ htaˇ kaꞈ bon lawˬ leh kʼoˆ ve, “A pa˗oˬ, yawˇ hui ve venˇ baˆ htaꞈ hpehˇ hkʼa˗o. Awˬ lawn kʼo, yawˇ hui hkʼaˬ hkʼe te ve htaꞈ yawˇ hui maˇ shiˍ.”—Maꞈhtehˍ 5:44; Luˉkaꞈ 23:34.

Yeˍsuˆ lehˬ miˬ guiˬ hkʼoˆ uˉ peunˍ tuˬ keunˍ jaˇ. Awˬ lawn kʼo, yawˇ ha kʼaˉ puiˉ leh teˇ gʼaˇ le le htaꞈ ga piˇ gʼa ve yoˬ. Leh yawˇ hkʼaˬ htaˆ tanˬ uˉ peunˍ tuˬ le?