Peuˬ taˉ ve teˇ lawn hkʼaw Yeˍsuˆ ka tiꞈ te taˍ ve htaꞈ kʼoˆ ve yoˬ. Mvuhˇ naw ma hkʼoˆ Gʼuiˬ sha ve mvuhˇ miˬ teh leh yawˇ ve mvuhˇ miˬ hkʼaw Yeˍsuˆ htaꞈ Jawˇmawˇ te tcuh ve tehꞈ ka tiꞈ chi shiˍ tcuh laˇ ve yoˬ.

Liꞈ hpu hkʼaw kʼoˆ ve, Yeˍsuˆ kanˇ paˆ gʼa htaˇ yawˇ Saˍtanˍ leh neˇ teˇ hpaˍ htaꞈ miˬ guiˬ hkʼoˆ lo gʼaꞈ ce piˇ ve yoˬ. Chi teˇ hkui yawˇ hui shoꞈ shaꞈ ve miˬ guiˬ hkʼoˆ lo ceh te piˇ gʼa ve yoˬ. Awˬ hkʼaˇ chi ve kaꞈ teˇ hkʼaˇ 1914 hkʼawꞈ htaˇ, miˬ guiˬ hkʼoˆ lo shoꞈ shaꞈ ve cawˬ maˇ jaˇ.—Hpeuꞈ maˍ ve 12:7, 9.

Miˬ guiˬ hkʼoˆ lo gʼaˇ hteꞈ shoꞈ shaꞈ jaˇ ve htawˇ, Gʼuiˬ sha ve mvuhˇ miˬ hkʼaw ve Jawˇmawˇ Yeˍsuˆ chaw yaˇ htaꞈ ga tuˬ laiˉ ceuˬ te ve yoˬ. Laiˉ lanˬ gʼaˇ Liꞈ hpu hkʼaw ve awˬ liˇ awˬ hkʼaˇ gʼa henˇ leh a shaꞈ teꞈ kuiˬ hkʼaw yuˬ yehˇ tuˬ miˬ guiˬ hkʼoˆ Liꞈ hpu maˍ ve kanˉ yawˇ cawˬ tcuh laˇ ve yoˬ. Laiˉ lanˬ gʼaˇ kanˉ te ve hpawˇ cawˇ ve htaꞈ dawˇ tuˬ gʼa henˇ ve, yehˬ kʼa hkʼaw a shaꞈ te hkʼaˇ daꞈ la tuˬ te ve, caˇ lawꞈ dawˬ lawꞈ te leh hpu shi mawˇ jeˬ ve awˬ ceˬ maˇ te. Chi teˇ hkui kaꞈ yawˇ hui a shu yawˇ awˬ to awˬ bon cawˬ tuˬ gʼa henˇ leh awˬ gʼaˇ gʼa ve yoˬ. Gʼuiˬ sha yawˇ ve mvuhˇ miˬ yaˇ hpehꞈ tcuh gaˇ ve hkʼe, yawˇ hui htaꞈ ga piˇ tuˬ yoˬ.

Yeˍsuˆ mvuhˇ naw ma hkʼoˆ uˉ peunˍ˗oˬ ve htawˇ, miˬ guiˬ hkʼoˆ chaw yaˇ uˉ peunˍ chehˇ sheˍ ve yoˬ. Gʼuiˬ sha Yeˍsuˆ htaꞈ kʼoˆ piˇ ve, “nawˬ ve canˇ paˍ teˇ hpaˍ htaꞈ uˉ peunˍ chehˇ˗oˆ.” (Chiˇ mvuh ve 110:2) Maˇ maw ve awˬ yanˇ Yeˍsuˆ canˇ paˍ hkʼa peu˗eˬ htaꞈ te luˬ leh Gʼuiˬ sha hkawˇ na ve chaw htaꞈ shoꞈ shaꞈ ve maˇ gʼa hpuˇ tuˬ ga piˇ tuˬ yoˬ.

Oˇ ve teˇ yanˇ Gʼuiˬ sha ve mvuhˇ miˬ awˬ ceuˬ chi teˇ hpaˍ htaꞈ te tuˬ yoˬ.

• Maˇ heˆ heˆ ve bon liˇ htaꞈ te luˬ ve. Bon liˇ teˇ hpaˍ chaw yaˇ htaꞈ laiˉ hinˉ hkʼawꞈ heˍ leh fawˉ mehˍ ve maˇ kʼawꞈ cawˬ tcuh˗o. Liꞈ hpu hkʼaw maˇ heˆ heˆ ve bon liˇ htaꞈ meh maˬ lanˉ lonˉ tehꞈ kʼoˆ ve yoˬ. Maˇ heˆ heˆ ve bon liˇ htaꞈ te luˬ ve pa taw laiˉ gʼaˇ cheˆ˗ehꞈ kʼai ve yoˬ.—Hpeuꞈ maˍ ve 17:15, 16.

• Chaw yaˇ uˉ peunˍ ve htaꞈ te luˬ ve. Gʼuiˬ sha ve mvuhˇ miˬ lehˬ chaw yaˇ uˉ peunˍ ve hkʼa peu˗eˬ htaꞈ te luˬ tuˬ yoˬ.—Hpeuꞈ maˍ ve 19:15, 17, 18.

• Haiˬ ve chaw htaꞈ te luˬ ve. Haiˬ ve chaw leh Gʼuiˬ sha uˉ peunˍ ve awˬ hawˉ lo maˇ chehˇ ve chaw htaꞈ aˬ htoꞈ ma hpehꞈ la tuˬ ve le? “Haiˬ ve chaw teˇ hpaˍ htaꞈ mvuhˇ miˬ hkʼaw gʼawˬ tawˆ” tuˬ yoˬ.—Tawˇ naˉ ve 2:22.

• Saˍtanˍ leh neˇ teˇ hpaˍ htaꞈ te luˬ ve. Saˍtanˍ leh neˇ teˇ hpaˍ chaw ceuˬ teˇ hpaˍ htaꞈ maˇ gʼa “heˍ yuˬ beˬ yuˬ.”—Hpeuꞈ maˍ ve 20:3, 10.

Gʼuiˬ sha ve mvuhˇ miˬ awˬ hawˉ lo chehˇ ve chaw awˬ ceuˬ chi teˇ hpaˍ htaꞈ awˬ bon hkʼaˬ hkʼe gʼa tuˬ le?

Mvuhˇ naw ma hkʼoˆ Gʼuiˬ sha ve mvuhˇ miˬ hkʼaw ve Jawˇmawˇ Yeˍsuˆ lehˬ, chaw yaˇ uˉ peunˍ ve te gʼa ve aꞈ kehˉ yawˇ daꞈ ve awˬ ceuˬ te laˇ maˇ jaˇ tuˬ yoˬ. Miˬ guiˬ hkʼoˆ ve chaw 144,000 gʼaˇ htaꞈ leuˆ yuˬ leh mvuhˇ naw ma hkʼoˆ yawˇ geh teˇ geh uˉ peunˍ tcuh ve yoˬ. (Hpeuꞈ maˍ ve 5:9, 10; 14:1, 3) Yeˍsuˆ lehˬ Gʼuiˬ sha ve a loˍ miˬ guiˬ hkʼoˆ biˇ la tuˬ kaꞈ yawˇ te tuˬ yoˬ. Gʼuiˬ sha ve mvuhˇ miˬ chaw teˇ gʼaˇ le le awˬ pon aˬ htoꞈ ma te tuˬ le?

• Naˬ ve gawˬ ve leh suh ve maˇ kʼawꞈ cawˬ tcuh. Ngaˬ hui htaꞈ kʼoˆ laˇ ve, “mvuhˇ miˬ hkʼaw chehˇ taˍ ve chaw teˇ hpaˍ lehˬ, naˬ ve gawˬ ve htaꞈ pa taw teˇ pawˆ kaꞈ gʼa kʼawꞈ hkʼanˇ tuˬ ve maˇ heˆ.” Leh “suh ve teˇ ceuˬ maˇ kʼawꞈ cawˬ.”—Iˉsaˍyaˆ 33:24; Hpeuꞈ maˍ ve 21:4.

• Awˬ tehˬ ha lehˬ ve cawˬ leh kawˆ ve maˇ cawˬ tuˬ te laˇ tuˬ yoˬ. ‘yawˇ hui htaꞈ gawˬ lehˍ chehˇ tcuh piˇ tuˬ yoˬ.’ Leh “a shu yawˇ ve a pehˉ meuˇ hko leh maˉ nawˆ hko hkʼaw lo gawˬ lehˍ gʼa chehˇ leh, chaw teˇ gʼaˇ kaꞈ yawˇ hui htaꞈ kawˆ tuˬ te piˇ tuˬ ve maˇ heˆ.”—Iˉsaˍyaˆ 54:13; Miˆhkaˍ 4:4.

• Teˇ gʼaˇ le le kanˉ te leh ha lehˬ ve. “Yawˇ hui lehˬ, a shu yawˇ te taˍ ve kanˉ awˬ hkʼaw lo gʼa ha lehˬ chehˇ tuˬ yoˬ. Yawˇ hui hkʼa te ve kanˉ teˇ ceuˬ le le uiˍ la daꞈ la” tuˬ yoˬ.—Iˉsaˍyaˆ 65:22, 23.

• Miˬ guiˬ htaꞈ daꞈ la tuˬ te ve. “Hteunˍ lonˉ teˇ hpaˍ ha lehˬ leh, suhˉ veˆ teˇ hpaˍ lehˬ, gawˬ cu gawˬ pehˆ ve mvuhˇ miˬ hkʼaw veˆ tawˆ la tuˬ yoˬ.”—Iˉsaˍyaˆ 35:1.

• Co co taiˍ taiˍ a shaꞈ gʼa tuˬ chaw yaˇ hkʼaˬ hkʼe gʼa te cawˇ ve maˍ piˇ ve. “Co tiꞈ ha tiꞈ teˇ ceuˬ lehˬ, awˬ tehˬ awˬ na ve Gʼuiˬ sha nawˬ teˇ gʼaˇ tiˉ htaꞈ maˇ kʼoˆ, nawˬ peu laˇ ve Yeˍsuˆ Hkriꞈ htaꞈ maˇ kʼoˆ, yawˇ hui shiˍ ve teˇ ceuˬ hpehꞈ ve yoˬ.”—Yoˇhanˬ 17:3.

Gʼuiˬ sha nawˬ htaꞈ daꞈ ve awˬ ceuˬ chi teˇ hpaˍ gʼa tcuh gaˇ ve yoˬ. (Iˉsaˍyaˆ 48:18) Awˬ gʼuˇ suhˍ hpawˇ daꞈ jaˇ ve a shaꞈ cawˬ tuˬ, nawˬ chi teˇ hkui aˬ htoꞈ ma gʼa te cawˇ ve awˬ gʼuˇ suhˍ teˇ lawn hkʼaw kʼoˆ maˍ laˇ tuˬ yoˬ.