Yeˍsuˆ kʼoˆ ve, “mvuhˇ miˬ teˇ peˆ leh teˇ peˆ yaꞈ daꞈ jiˆ daꞈ tuˬ yoˬ. Miˬ gʼaˇ hteꞈ hiˆ ve, chehˇ kuiˬ teˇ kaˬ peuˬ teˇ kaˬ awˬ hkʼaw lo meuꞈ ve kaˆ ve leh naˬ beuˬ gaˬ la tuˬ yoˬ.” (Luˉkaꞈ 21:10, 11) Awˬ heˆ chi teˇ hpaˍ htaꞈ gʼa mawˬ htaˇ, “Gʼuiˬ sha ve mvuhˇ miˬ lehˬ awˬ paˇ lo gaˬ la peuˬ.” Yaꞈ hkʼaˇ, awˬ heˆ chi ve miˬ guiˬ hkʼa peu˗eˬ hkʼoˆ teˇ yanˇ ceh tiˉ hpehꞈ la tuˬ ve laˇ? Teˇ geh nyi sheˍ.

1. MAꞈ BAWˆ DAꞈ VE

1914 hkʼawꞈ htaˇ, maꞈ lonˉ hpehꞈ la ve yoˬ. Maꞈ chi hkʼe ve maˇ hpehꞈ la jaw sheˍ. Teˇ co˗e peuˬ teˇ co˗e chaˬ nyi tehˆ nyi paˍ kʼoˆ ve, 1914 hkʼawꞈ htaˇ maꞈ bawˆ daꞈ ve awˬ hkʼaˇ awˬ suhˉ pa jaˇ. Awˬ lawn kʼo, maꞈ chi teˇ pawˆ lehˬ miˬ guiˬ hkʼoˆ laiˉ mvuhˇ miˬ bawˆ daꞈ ve yoˬ. Maꞈ chi lehˬ htehˆ kaˇ lonˉ, caꞈ poˍ hkʼaw aˬ miˍ shiˍ hpehˇ ce ve, caꞈ naˆ, maˇ daꞈ ve awˬ shaˉ hpehˇ ve, leh awˬ nu ve hehnˇ jaˇ ve laꞈ caˉ teˇ hpaˍ kaꞈ cawˬ maˇ jaˇ. Chi teˇ pawˆ hkʼe leˇ teˇ pawˆ˗ehꞈ kaꞈ maˇ hpehꞈ jaw. Peuˬ leh maꞈ lonˉ 2 pawˆ teˇ pawˆ kʼawꞈ hpehꞈ la ve yoˬ. Maꞈ lonˉ 2 pawˆ teˇ pawˆ htaˇ yawˇ hui aˬ miˍ shiˍ lonˉ te leh maꞈ bawˆ ve hkʼaw awˉ lawˉ teˇ pawˆ yehˇ ve yoˬ. 1914 tanˬ leh chaw yaˇ lehˬ maꞈ bawˆ ve teˇ kaˬ maˇ heˆ kʼo, teˇ kaˬ hkʼaˬ htaˆ kaꞈ bawˆ daꞈ chehˇ ve yoˬ. Maꞈ bawˆ daꞈ ve pa taw chaw yaˇ laiˉ lanˬ gʼaˇ gʼa suh˗e ve yoˬ.

2. MIˬ HIˆ VE

Liꞈ kʼoˆ teˇ kʼoˆ hkʼaw kʼoˆ ve, teˇ hkʼawꞈ le le miˬ hiˆ ve aˬ laˬ hkʼe 100 pawˆ “jawˬ gʼa ve yoˬ.” Aˍmeˬriˆkaꞈ mvuhˇ miˬ hkʼaw miˬ guiˬ hpawˇ chaˬ nyi tehˆ nyi paˍ kʼoˆ ve, “1900 hkʼawꞈ tanˬ leh miˬ hiˆ ve awˬ lawn bvuhꞈ keu ve chaˬ nyi˗oˬ htaˇ, teˇ hkʼawꞈ le le miˬ hiˆ hehnˇ jaˇ ve aˬ laˬ hkʼe 16 pawˆ cawˬ ve yoˬ.” Chaw teˇ hpaˍ dawˇ ve miˬ hiˆ ve hkʼe taw maˇ cawˬ˗o. Yaꞈ hkʼaˇ, tehˆ nyi tuˬ awˬ hkʼeun daꞈ ve pa taw, hkʼa dehꞈ tehˆ nyi gʼa ve yoˬ. Miˬ hiˆ hehnˇ jaˇ ve pa taw, laiˉ gʼaˇ tuꞈ ve hkanˍ ve gʼa hpuˇ leh oˇ htaˇ aꞈ kehˉ suh maˇ jaˇ ve yoˬ.

 3. MEUꞈ VE KAˆ VE

Miˬ guiˬ hkʼoˆ meuꞈ ve kaˆ ve lehˬ, maꞈ bawˆ daꞈ ve, heˍ caˇ ve, tanˇ kaˬ hpawˇ maˇ daꞈ ve, muiˬ caˇ vaˇ caˇ hpawˇ awˬ hpfuhˇ maˇ daꞈ ve, mvuhˇ yeˬ mvuhˇ haw lonˉ laˬ htaˇ ngaˬ hui hkʼa dehꞈ maˇ gʼa gu hehnˇ taˍ ve, chi ve teˇ hpaˍ htaꞈ pa taw yoˬ. 2018 hkʼawꞈ htaˇ, caˇ tuˬ dawˬ tuˬ hpawˇ awˬ lawn sha tanˇ kʼoˆ laˇ ve, “miˬ guiˬ chi hkʼoˆ hiˉ lanˬ nyiˇ chi teˇ gʼaˇ chaw yaˇ caˇ tuˬ maˇ lawꞈ ve yoˬ. Yaꞈ hkʼaˇ, awˬ moˍ chi ve hkʼaw teˇ lanˬ nyiˇ chi awˇ gʼaˇ caˇ tuˬ maˇ gʼa caˇ.” Caˇ tuˬ maˇ gʼa caˇ ve pa taw yaˇ ehˉ aˬ laˬ hkʼe 3,100,000 gʼaˇ teˇ hkʼawꞈ le le suh˗e ve yoˬ. 2011 hkʼawꞈ hkʼaw ve yaˇ ehˉ suh˗e ve hkʼa peu˗eˬ 45 peun˗sehn caˇ tuˬ maˇ lawꞈ ve pa taw suh˗e ve yoˬ.

4. NAˬ BEUˬ A NAˍ

Miˬ guiˬ hpawˇ ve chehˇ sha cawˬ sha hpawˇ ve kanˉ hkʼaˇ kʼoˆ ve, “2000 hkʼawꞈ htaˇ tanˬ leh naˬ beuꞈ a naˍ hehnˇ jaˇ. Oˇ htaˇ hpehꞈ jaw ve a naˍ kaꞈ teˇ pawˆ kʼawꞈ hpehꞈ la ve yoˬ. Goˇ peˬ awˬ nyi te ve a naˍ, oˉ kʼoˍ naˬ leh awˬ to suhˉ˗ehˍ kʼai ve a naˍ, laꞈ shiˍ kʼuˉ hkui shiˍ kʼuˉ naˆ˗ehˍ kʼai ve a naˍ, leh a naˍ awˬ suhˉ teˇ hpaˍ cawˬ la ve yoˬ. Sha a naˍ, ciˬ yehˇ lonˉ a naˍ, mui a naˍ, e˗bo˗laˇ a naˍ, siˆkaˇ a naˍ,” leh cawˬ la gehˇ sheˍ ve lehˬ a naˍ 19 yoˬ. Saˍ laꞈ gʼonˍ cuˇ yiˍ cawˬ leh naˆ tsuhˇ laiˉ ceuˬ te tawˆ gʼa ve htawˇ, a naˍ htaꞈ gu na˗e tuˬ awˬ hkʼaˇ ca maˇ gʼa sheˍ.

5. MIˬ GUIˬ HKʼOˆ TEˇ KAˬ LE LE HTO TOˇ VE KANˉ

Yeˍsuˆ awˬ gʼuˇ suhˍ htaˇ kaꞈ kʼoˆ laˇ taˍ ve, ka tiꞈ teˇ ceuˬ cawˬ sheˍ ve yoˬ. Oˇ ve lehˬ, “chaw ceuˬ hkʼa peu˗eˬ awˬ pon shaˉ hkiˆ hpehꞈ tuˬ, Gʼuiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ chi, miˬ guiˬ hkʼoˆ teˇ kaˬ le le lo ca maˍ piˇ tuˬ yoˬ. Oˇ ve hkʼawꞈ nawˉ, awˬ leh meuˇ gaˬ la tuˬ yoˬ.” (Maꞈhtehˍ 24:14) Miˬ guiˬ chi hkʼoˆ shoꞈ shaꞈ ve gʼaˇ hteꞈ cawˬ maˇ la ve pa taw, 240 mvuhˇ miˬ hkʼaw teˇ hinˉ chaw ceuˬ tawˇ hkawˇ hpaˆ, hiˉ lanˬ gʼaˇ hpaˆ Gʼuiˬ sha ve mvuhˇ miˬ daꞈ ve awˬ lawn sha tanˇ teˇ chaw ceuˬ le le htaꞈ hto maˍ piˇ chehˇ ve yoˬ. Chi hkʼe ve teˇ co˗e peuˬ teˇ co˗e kaꞈ maˇ hpehꞈ jaw sheˍ.

Yeˍsuˆ kʼoˆ taˍ ve awˬ heˆ teˇ hpaˍ chi teˇ hkui awˬ tehˬ hpehꞈ la chehˇ ve yoˬ. Aˬ htoꞈ ma te ngaˬ hui awˬ lawn chi htaꞈ a yeˇ yuˬ cawˇ ve le? Awˬ lawn kʼo Yeˍsuˆ kʼoˆ ve, “awˬ ceuˬ chi teˇ hpaˍ hpehꞈ la chehˇ ve htaꞈ nawˬ hui gʼa mawˬ ve teˇ yanˇ, Gʼuiˬ sha ve mvuhˇ miˬ lehˬ awˬ paˇ lo gaˬ la peuˬ.”—Luˉkaꞈ 21:31.

Yeˍsuˆ kʼoˆ taˍ ve ka tiꞈ leh Liꞈ hpu hkʼaw ve awˬ yanˇ htaꞈ shawˍ nyi ve teˇ yanˇ, Gʼuiˬ sha lehˬ 1914. a hkʼawꞈ htaˇ kaꞈ mvuhˇ naw ma hkʼoˆ yawˇ ve mvuhˇ miˬ teh˗oˬ ve tehꞈ ngaˬ hui na gʼa tuˬ ga laˇ ve yoˬ. Oˇ ve teˇ yanˇ Gʼuiˬ sha yawˇ ve Yaˇ paˍ Yeˍsuˆ Hkriꞈ htaꞈ Jawˇmawˇ te tcuh˗oˬ ve yoˬ. (Chiˇ mvuh ve 2:2, 4, 6-9) Maˇ maw kʼo, Gʼuiˬ sha ve mvuhˇ miˬ, miˬ guiˬ hkʼoˆ ca uˉ peunˍ la tuˬ yoˬ. Mvuhˇ miˬ chi ve lehˬ chaw yaˇ uˉ peunˍ ve hkʼa peu˗eˬ htaꞈ te luˬ leh chaw yaˇ co co taiˍ taiˍ chehˇ gʼa tuˬ miˬ guiˬ chi htaꞈ daꞈ jaˇ ve hko hpehꞈ la tcuh tuˬ yoˬ.

Maˇ maw ve awˬ yanˇ Yeˍsuˆ ve bon lawˬ hkawˇ hkʼaw ve awˬ tehˬ hpehꞈ la tuˬ yoˬ. Oˇ kaˬ lo kʼoˆ ve, “nawˬ ve mvuhˇ miˬ gaˬ la piˇ˗oˆ. Mvuhˇ naw ma hkʼoˆ lo nawˬ ve a loˍ biˇ ve hkʼe, miˬ guiˬ hkʼoˆ htaꞈ htawˇ biˇ la piˇ˗oˆ.” (Maꞈhtehˍ 6:10) Gʼuiˬ sha ve mvuhˇ miˬ 1914 hkʼawꞈ htaˇ tanˬ leh aˬ htoꞈ ma te kʼai peuˬ˗oˬ ve le? Mvuhˇ miˬ chi ve chaw yaˇ uˉ peunˍ ve hkʼa peu˗eˬ ve awˬ tan ca uˉ peunˍ la htaˇ, ngaˬ hui ve a shaꞈ teꞈ hkʼaˇ hkʼaˬ hkʼe hpehꞈ tuˬ le?