1-2. Tawˇ naˉ ve liꞈ 4:25 hkʼaw beˆ maˍ laˇ taˍ ve htaꞈ ngaˬ hui hkʼaˬ hkʼe gʼaꞈ te gʼa tuˬ le? Tawˇ pa haˉ kʼoˆ maˍ laˇ sheˍ.

 Awˬ lawn chi teˇ hpaˍ htaꞈ dawˇ nyi sheˍ. Awˬ viˉ awˬ nyi a shaꞈ maˇ˗oˬ ve yaˇ miˇ teˇ gʼaˇ, yawˇ yaˇ nehˬ htaˇ ve awˬ yanˇ htaꞈ dawˇ nawˇ ve yoˬ. Chi teˇ hkui yawˇ laiˉ ceuˬ hpawˇ tuꞈ ve htawˇ, Yaˬhoˉvaˬ ve kanˉ te gʼa ve hkʼe te chehˇ ve yoˬ. Teˇ nyi le le miˬ guiˬ awˬ suhˉ hkʼaw yawˇ ve yehˬ kʼa leh awˬ chawˇ geh gʼa chehˇ tuˬ ve awˬ han htaꞈ dawˇ mawˬ ve yoˬ. (1 Kawˇrenˍhtuˆ 15:58) Hkriꞈ yaˇ awˬ moˍ hkʼaw ve awˬ chawˇ yawˇ htaꞈ maˇ daꞈ ve te piˇ ve pa taw, awˬ viˉ awˬ nyi yaˇ miˇ teˇ gʼaˇ nyi ma naˬ jaˇ. Yaꞈ hkʼaˇ, yawˇ awˬ lawn chi ve htaꞈ maˇ kʼawꞈ dawˇ nyi˗o. (Kawˇlawˇsehˇ 3:13) Awˬ viˉ awˬ nyi hawˉ hkʼaˆ teˇ gʼaˇ yawˇ te yaꞈ jaw ve htaꞈ tawnˇ gʼa ve yoˬ. Chi teˇ hkui yawˇ Yaˬhoˉvaˬ htaꞈ ka tiꞈ yeˬ gʼa tuˬ, te gʼa ve hkʼe teˇ ceuˬ le le te ve yoˬ.—Chiˇ mvuh ve 51:10.

² Chi ve 3 gʼaˇ aˬ htoꞈ ma shuˍ daꞈ ve le? Teˇ gʼaˇ le le peuˬ taˉ ve awˬ lawn htaꞈ tawnˇ gʼa ve yoˬ. Yaꞈ hkʼaˇ, yawˇ hui awˬ lawn oˇ ve htaꞈ maˇ kʼawꞈ dawˇ nyi˗o. Yawˇ hui “awˬ gʼuˇ suhˍ hteˇ lehˍ nyi peu” ve yoˬ.—Tawˇ naˉ ve 4:25 gʼaw sheˍ.

3. Aˬ htoꞈ ma te ngaˬ hui “awˬ gʼuˇ suhˍ hteˇ lehˍ nyi peu” cawˇ ve le?

³ Aˬ htoꞈ ma te ngaˬ hui “awˬ gʼuˇ suhˍ hteˇ lehˍ nyi peu” ve a yeˇ uiˍ jaˇ ve le? Awˬ hkʼawꞈ nawˉ hpawˇ tiˉ hpfuhˆ nyi ve kʼo, yaꞈ kʼaw hteˇ lehˍ maˇ kʼai la ve yoˬ. Ngaˬ hui kaꞈ peuˬ taˉ ve awˬ lawn htaꞈ tiˉ dawˇ nyi ve kʼo, Yaˬhoˉvaˬ ve kanˉ hkʼa dehꞈ te maˇ gʼa la ve yoˬ. —Luˉkaꞈ 9:62.

4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁴ Awˬ lawn chi ve hkʼaw ngaˬ hui peuˬ taˉ ve htaꞈ tiˉ maˇ kʼawꞈ dawˇ nyi tuˬ shaˍ tiꞈ te cawˇ ve 3 hkʼaˇ htaꞈ teˇ geh henˇ tuˬ yoˬ. (1) Peuˬ taˉ ve awˬ yanˇ htaꞈ dawˇ nawˇ ve (2) hkʼaˬ htaˆ kaꞈ beuꞈ ve (3) nyi ma luˬ jaˇ ve yoˬ. Peuˬ taˉ ve awˬ ceuˬ teˇ hpaˍ htaꞈ maˇ gʼa dawˇ nyi tuˬ, Liꞈ hpu hkʼaw  ve awˬ liˇ awˬ hkʼaˇ ngaˬ hui htaꞈ hkʼaˬ hkʼe ga laˇ ve teˇ geh henˇ tuˬ yoˬ. Yaꞈ hkʼaˇ, “ponˬ laˬ peuˬ ve awˬ ceuˬ” htaꞈ leunˇ baˬ taˉ leh awˬ gʼuˇ suhˍ hpawˇ ve awˬ ceuˬ htaꞈ “gʼaˇ hteꞈ laꞈ sheh che yuˬ chehˇ ve yoˬ.”—Hpiˇliˇpiˆ 3:14.

5. Cuˇ yiˍ piˇ ve liꞈ 7:10 hkʼaw ngaˬ hui aˬ htoꞈ ma htaꞈ maˇ dawˇ nyi tuˬ shaˍ tiꞈ peꞈ laˇ ve le?

⁵ Cuˇ yiˍ piˇ ve liꞈ 7:10 gʼaw sheˍ. Liꞈ hpu chi teˇ tawn hkʼaw ‘ponˬ taˉ peuˬ ve awˬ yanˇ daꞈ ve’ htaꞈ dawˇ nyi ve lehˬ, yaꞈ ve tehꞈ maˇ gʼa kʼoˆ laˇ taˍ. Awˬ lawn kʼo, tawnˇ gʼa puiˉ ve lehˬ Yaˬhoˉvaˬ geh gʼa ve laꞈ shawnˍ hpehꞈ ve yoˬ. Yaꞈ hkʼaˇ, chi teˇ tawn hkʼaw kʼoˆ ve, “ponˬ taˉ peuˬ ve awˬ yanˇ lehˬ, aˬ htoꞈ ma pa taw chi beuꞈ ve awˬ yanˇ aꞈ kehˉ daꞈ ve le, tehꞈ taˇ ca na nyi toˇ.” Chi htaꞈ pa taw, peuˬ taˉ ve awˬ yanˇ leh chi teˇ hkui ve awˬ yanˇ a shaꞈ teꞈ hkʼaˇ maˇ tehˆ daꞈ tuˬ shaˍ tiꞈ te cawˇ ve yoˬ. Aˬ htoꞈ ma te ngaˬ hui ve a shaꞈ teꞈ hkʼaˇ maˇ daꞈ ve le? Chi hkʼe na ve lehˬ “cuˇ yiˍ cawˬ ve na nyi hkawˇ maˇ heˆ.”

6. Peuˬ taˉ ve awˬ yanˇ chi teˇ hkui aꞈ kehˉ daꞈ ve tehꞈ dawˇ ve lehˬ, aˬ htoꞈ ma te cuˇ yiˍ maˇ cawˬ ve le?

⁶ Peuˬ taˉ ve awˬ yanˇ lehˬ chi teˇ hkui aꞈ kehˉ daꞈ ve tehꞈ dawˇ ve aˬ htoꞈ ma te cuˇ yiˍ maˇ cawˬ ve le? Awˬ lawn kʼo, oˇ htaˇ ve a shaꞈ teꞈ kuiˬ hkʼaw daꞈ ve awˬ ceuˬ htaꞈ tiˉ dawˇ nyi ve kʼo, maˇ daꞈ ve awˬ ceuˬ htaꞈ leunˇ tuˬ te laˇ ve yoˬ. Iˉsaˍreˍlaˆ chaw ve awˬ lawn htaꞈ teˇ geh nyi sheˍ. Iˉsaˍreˍlaˆ chaw Eˇjiˇtuꞈ mvuhˇ miˬ lo teˇ hkui tiˉ tawˆ la sheˬ ve htawˇ, yawˇ hui Eˇjiˇtuꞈ mvuhˇ miˬ hkʼaw tuꞈ ve hkanˍ ve gʼa hpuˇ ve htaꞈ leunˇ kʼai ve yoˬ. Yawˇ hui dawˇ cawˇ ve caˇ tuˬ htaꞈ ceh dawˇ nawˇ ve yoˬ. Yawˇ hui kʼoˆ ve, “ngaˬ hui shaˍ gʼa caˇ ve kʼo hkʼaˬ ma daꞈ tuˬ le. Eˇjiˇtuꞈ mvuhˇ miˬ hkʼaw chehˇ htaˇ, ngaˬ hui ngaˇ shaˍ caˇ gaˇ ve hkʼe gʼa caˇ ve yoˬ. Teꞈ chiˉ awˬ hpuˇ kaꞈ maˇ peuˬ. Aˉ hpehˇ shiˍ, aˉ hpehˇ bvuhꞈ shiˍ, teh hkanˉ shiˍ, shuˍ hpu nuˬ, shuˍ hpu nyi chi teˇ hpaˍ htaꞈ dawˇ nawˇ jaˇ ve yoˬ!” (Heh puiˉ hkʼaw 11:5) “Teꞈ chiˉ awˬ hpfuhˇ kaꞈ maˇ peuˬ” ve maˇ heˆ leh teꞈ chiˉ maˇ gʼa te kaꞈ caˇ tuˬ oˇ ve teˇ hpaˍ htaꞈ gʼa ve awˬ tehˬ laˇ? Awˬ tehˬ kʼo, yawˇ hui caˇ tuˬ oˇ ve teˇ hpaˍ htaꞈ gʼa ve lehˬ gʼa tuꞈ gʼa hkanˍ ve yoˬ. Yawˇ hui shu ceˬ te leh shu fawˉ mehˍ piˇ ve htaꞈ gʼa hpuˇ ve yoˬ. (Tawˆ kʼai ve 1:13, 14; 3:6-9) Yawˇ hui aˬ htoꞈ ma htaꞈ gʼa yeunˇ hkanˍ ve htaꞈ leunˇ kʼai ve yoˬ. Yawˇ hui Yaˬhoˉvaˬ te piˇ ve daꞈ jaˇ ve awˬ ceuˬ teˇ hpaˍ htaꞈ dawˇ nyi cawˇ ve htawˇ, peuˬ taˉ  ve htaꞈ tiˉ dawˇ nyi ve yoˬ. Yawˇ hui chi hkʼe dawˇ ve Yaˬhoˉvaˬ nyi hkʼaˇ maˇ suh.—Heh puiˉ hkʼaw 11:10.

7. Awˬ viˉ awˬ nyi yaˇ miˇ teˇ gʼaˇ peuˬ taˉ ve htaꞈ tiˉ maˇ gʼa dawˇ nyi tuˬ aˬ htoꞈ ma ga piˇ ve le?

⁷ Peuˬ taˉ ve awˬ yanˇ htaꞈ ngaˬ hui maˇ gʼa dawˇ nyi tuˬ, aˬ htoꞈ ma ga laˇ ve le? Awˬ viˉ awˬ nyi yaˇ miˇ teˇ gʼaˇ ve awˬ lawn htaꞈ teˇ geh nyi sheˍ. Yawˇ 1945 hkʼawꞈ htaˇ, Buˆlinˍ Beˍteˍlaˆ hkʼaw kanˉ tanˬ te ve yoˬ. Peuˬ hkʼawꞈ nawˉ Beˍteˍlaˆ hkʼaw kanˉ te chehˇ ve awˬ viˉ awˬ nyi teˇ gʼaˇ htaꞈ heuˆ daꞈ ve yoˬ. Leh yawˇ huiˉ maˬ Beˍteˍlaˆ hkʼaw kanˉ laiˉ hkʼawꞈ te ve yoˬ. Yaꞈ hkʼaˇ, 1976 hkʼawꞈ gaˬ leh yawˇ ve awˬ hpawˇ naˬ jaˇ. Yawˇ kʼoˆ ve, yawˇ ve awˬ hpawˇ hkʼaˬ maw maˇ gʼa chehˇ˗oˬ ve tehꞈ shiˍ htaˇ, awˬ hpawˇ maˇ chehˇ htaˇ kaꞈ yawˇ a shaꞈ teꞈ chehˇ gʼa tuˬ awˬ hkʼaˇ beˆ maˍ piˇ ve yoˬ. Awˬ hpawˇ awˬ miˇ ma htaꞈ kʼoˆ piˇ ve, “ngaˬ huiˉ maˬ heuˆ daꞈ ve ha lehˬ jaˇ. Laiˉ gʼaˇ chi hkʼe maˇ gʼa hpuˇ jaw taˬ.” Leh awˬ hpawˇ kʼawꞈ kʼoˆ ve, “nawˬ peuˬ taˉ ve awˬ lawn htaꞈ tawnˇ gʼa ve htawˇ, oˇ ve htaꞈ tiˉ taˇ dawˇ nyi. Awˬ yanˇ ponˬ kʼai htaˇ daꞈ la tuˬ yoˬ. A shu yawˇ awˬ to htaꞈ chaꞈ naˬ ve taˇ te. Nawˬ pyawˍ ve awˬ ceuˬ htaꞈ ha lehˬ leh caˉ leh Gʼuiˬ sha ve kanˉ te ve kʼo, tawnˇ gʼa ve awˬ ceuˬ htaꞈ ha lehˬ ve lehˬ, Gʼuiˬ sha geh gʼa ve awˬ bon teˇ ceuˬ hpehꞈ ve yoˬ.” Beˆ maˍ laˇ hkawˇ chi daꞈ jaˇ ve maˇ heˆ laˇ?

8. Peuˬ taˉ ve htaꞈ tiˉ maˇ dawˇ nyi ve awˬ viˉ awˬ nyi chi teˇ gʼaˇ htaꞈ hkʼaˬ hkʼe ga piˇ ve le?

⁸ Awˬ viˉ awˬ nyi yaˇ miˇ chi teˇ gʼaˇ awˬ hpawˇ beˆ maˍ piˇ ve htaꞈ gʼaꞈ te ve yoˬ. Yawˇ 92 hkʼawꞈ hkʼa gaˬ Yaˬhoˉvaˬ ve kanˉ ka tiꞈ yeˬ ve hkʼaw te ve yoˬ. Yawˇ maˇ suh sheˍ htaˇ kʼoˆ ve, “peuˬ taˉ ve 63 hkʼawꞈ Yaˬhoˉvaˬ ve kanˉ awˬ yanˇ hkʼa biˇ te ve htaꞈ dawˇ nyi htaˇ, a shaꞈ teꞈ hkʼaˇ nyi hkʼaˇ suh jaˇ leh ha lehˬ jaˇ ve tehꞈ ngaˬ kʼoˆ gʼa ve yoˬ.” Aˬ htoꞈ ma te yawˇ chi hkʼe kʼoˆ gʼa ve le? Yawˇ kʼawꞈ kʼoˆ ve, “miˬ guiˬ awˬ suhˉ hkʼaw awˬ viˉ awˬ nyi teˇ gʼaˇ le le geh gʼa chehˇ ve dawˇ law kuiˬ lehˬ, daꞈ jaˇ ve awˬ ceuˬ hpehꞈ ve yoˬ. Hpanˍ shehˍ hpaˇ uiˍ jaˇ mvuh jaˇ ve Yaˬhoˉvaˬ leh yawˇ teˇ gʼaˇ ceh tiˉ co co taiˍ taiˍ teꞈ chehˇ ve Gʼuiˬ sha ve kanˉ gʼa te ve yoˬ.” * Yawˇ “awˬ gʼuˇ suhˍ hteˇ lehˍ nyi peu” ve chaw awˬ pon daꞈ jaˇ ve henˇ tuˬ hpehꞈ ve yoˬ.

9. Oˉ kʼoˍ pui ve liꞈ 19:18 hkʼaw kʼoˆ taˍ ve hkʼe, ngaˬ hui venˇ baˆ hpehˇ piˇ gʼa tuˬ haˍ jaˇ ve hkʼaˬ hkʼe htaˇ le?

⁹ Oˉ kʼoˍ pui ve liꞈ 19:18 gʼaw sheˍ. Ngaˬ hui htaꞈ nyi ma naˬ tuˬ te laˇ ve, awˬ viˉ awˬ nyi, awˬ chawˇ, leh awˬ suhˍ awˬ shaˍ hpawˇ ve awˬ viˉ awˬ nyi hpehꞈ ve kʼo, yawˇ hui htaꞈ venˇ baˆ hpehˇ piˇ tuˬ haˍ jaˇ ve yoˬ hehˉ. Tawˇ pa haˉ te kʼo, awˬ viˉ awˬ nyi teˇ gʼaˇ, awˬ nu ve awˬ viˉ awˬ nyi teˇ gʼaˇ yawˇ ve hpu hkʼawˇ ve tehꞈ she pfuhˍ piˇ ve yoˬ. Yaꞈ hkʼaˇ, yawˇ dawˇ yaꞈ ve tehꞈ hkʼawꞈ nawˉ htaˇ shiˍ la ve yoˬ. Hkʼe te leh, yawˇ lawˬ hkawˉ piˇ ve yoˬ. Yaꞈ hkʼaˇ, awˬ viˉ awˬ nyi oˇ ve teˇ gʼaˇ beuꞈ chehˇ sheˍ. Leh awˬ lawn oˇ ve htaꞈ tiˉ dawˇ nyi chehˇ sheˍ ve yoˬ. Nawˬ chi hkʼe dawˇ jaw˗aw laˇ? Ngaˬ hui awˬ viˉ awˬ nyi oˇ ve teˇ gʼaˇ hkʼe leˇ maˇ gʼa hpuˇ jaw ve htawˇ, ngaˬ hui htaꞈ nyi ma naˬ tuˬ te laˇ ve awˬ viˉ awˬ nyi htaꞈ venˇ baˆ maˇ hpehˇ piˇ gʼa taˍ tehꞈ dawˇ jaw ve yoˬ hehˉ.

10. Ngaˬ hui beuꞈ chehˇ sheˍ ve kʼo aˬ htoꞈ ma ga laˇ gʼa ve le?

¹⁰ Ngaˬ hui shu htaꞈ beuꞈ chehˇ sheˍ ve kʼo, aˬ htoꞈ ma ga laˇ gʼa ve le? Ngaˬ hui htaꞈ ga laˇ ve teˇ ceuˬ lehˬ, Yaˬhoˉvaˬ teˇ ceuˬ le le htaꞈ mawˬ ve tehꞈ tawnˇ taˍ sheˍ. Ngaˬ hui aˬ htoꞈ ma gʼa hpuˇ ve yawˇ shiˍ ve yoˬ. Shu ngaˬ hui htaꞈ maˇ daꞈ ve te laˇ ve kaꞈ shiˍ ve yoˬ. (Heˍbrehˇ 4:13) Ngaˬ hui nyi ma naˬ htaˇ, Gʼuiˬ sha kaꞈ nyi ma naˬ ve yoˬ. (Iˉsaˍyaˆ 63:9) Ngaˬ hui gʼa hpuˇ ve maˇ hteˇ maˇ cawˇ ve awˬ ceuˬ hkʼa peu˗eˬ, Gʼuiˬ sha yawˇ yuˬ baˬ laˇ tuˬ tehꞈ ka tiꞈ te taˍ ve yoˬ.—Hpeuꞈ maˍ ve 21:3, 4.

11. Ngaˬ hui venˇ baˆ hpehˇ piˇ leh awˬ lawn oˇ ve htaꞈ maˇ tawnˇ taˍ ve kʼo, ngaˬ hui aˬ htoꞈ ma awˬ bon gʼa tuˬ le?

¹¹ Teˇ ceuˬ lehˬ ngaˬ hui shu htaꞈ venˇ baˆ hpehˇ piˇ leh maˇ kʼawꞈ tawnˇ taˍ ve kʼo, ngaˬ hui kaꞈ awˬ bon gʼa ve yoˬ. Awˬ ceuˬ chi ve lehˬ, awˬ viˉ awˬ nyi yaˇ miˇ oˇ ve teˇ gʼaˇ na gʼa la ve yoˬ. Awˬ leh meuˇ htaˇ awˬ viˉ awˬ nyi htaꞈ venˇ baˆ hpehˇ piˇ gʼa leh, awˬ lawn oˇ ve htaꞈ maˇ kʼawꞈ tawnˇ taˍ˗o. Ngaˬ hui shu htaꞈ venˇ baˆ hpehˇ piˇ ve kʼo, Yaˬhoˉvaˬ kaꞈ ngaˬ hui htaꞈ venˇ baˆ hpehˇ laˇ tuˬ yoˬ tehꞈ yawˇ na gʼa ve yoˬ. (Maꞈhtehˍ 6:14) Awˬ viˉ awˬ nyi te laˇ ve yaꞈ ve tehꞈ yawˇ shiˍ ve yoˬ. Yaꞈ hkʼaˇ, yawˇ venˇ baˆ hpehˇ piˇ leh awˬ lawn oˇ ve htaꞈ maˇ kʼawꞈ tawnˇ taˍ˗o. Chi ve lehˬ awˬ viˉ awˬ nyi yaˇ miˇ ha lehˬ jaˇ tuˬ te piˇ leh, yawˇ Yaˬhoˉvaˬ ve kanˉ te ve htaꞈ a yeˇ yuˬ jaˇ.

12. 1 Yoˇhanˬ liꞈ 3:19, 20 ngaˬ hui htaꞈ aˬ htoꞈ ma maˍ laˇ ve le?

¹² 1 Yoˇhanˬ liꞈ 3:19, 20 gʼaw sheˍ. Laiˉ pawˆ kʼo, ngaˬ hui nyi ma luˬ ve yoˬ. Tawˇ pa haˉ te kʼo, chaw teˇ hpaˍ awˬ tehˬ ve htaꞈ maˇ shiˍ sheˍ htaˇ te yaꞈ jaw ve htaꞈ nyi ma luˬ ve yoˬ. Teˇ hpaˍ kʼo, Baˆtiˆsaˬ haꞈ yuˬ peuˬ hkʼawꞈ nawˉ te yaꞈ ve htaꞈ nyi ma luˬ ve yoˬ. (Roˉmaꞈ 3:23) Ngaˬ hui daꞈ ve awˬ ceuˬ htaꞈ te ve htawˇ, “laiˉ ceuˬ te yaꞈ” jaw ve yoˬ. (Yaˍkoˆ 3:2; Roˉmaꞈ 7:21-23) Ngaˬ hui nyi ma luˬ ve htaꞈ maˇ dawˇ cawˇ taˬ. Yaꞈ hkʼaˇ, chi hkʼe dawˇ ve lehˬ ngaˬ hui awˬ pon awˬ bon cawˬ ve yoˬ. Awˬ lawn kʼo, ngaˬ hui te hkʼaˇ dawˇ hkʼaˇ pa leh maˇ te yaꞈ tuˬ ga laˇ ve yoˬ.—Heˍbrehˇ 12:12, 13.

13. Aˬ htoꞈ ma te ngaˬ hui nyi ma maˇ luˬ jaˇ cawˇ ve le?

¹³ Teˇ pawˆ pawˆ kʼo, ngaˬ hui kaꞈ nyi ma luˬ jaˇ. Ngaˬ hui venˇ baˆ dawˇ hpfuhˆ˗oˬ ve kaꞈ nyi ma luˬ chehˇ sheˍ ve yoˬ. Leh Yaˬhoˉvaˬ ngaˬ hui htaꞈ venˇ baˆ hpehˇ laˇ˗oˬ ve tehꞈ hpeuꞈ maw laˇ ve htawˇ nyi ma luˬ chehˇ sheˍ ve kʼo kawˆ tuˬ cawˬ ve yoˬ. (Chiˇ mvuh ve 31:10; 38:3, 4) Aˬ htoꞈ ma pa taw le? Awˬ viˉ awˬ nyi yaˇ miˇ teˇ gʼaˇ yawˇ te yaꞈ jaw ve awˬ ceuˬ htaꞈ nyi ma luˬ ve htaꞈ teˇ geh nyi sheˍ. Yawˇ kʼoˆ ve, “ngaˬ Yaˬhoˉvaˬ ve kanˉ hkʼe taw taw te tuˬ maˇ loˍ tehꞈ dawˇ ve yoˬ. Awˬ lawn kʼo, ngaˬ awˬ pon awˬ yanˇ maˇ cawˬ˗o.” Ngaˬ hui kaꞈ awˬ viˉ awˬ nyi yaˇ miˇ chi teˇ gʼaˇ hkʼe dawˇ puiˉ ve yoˬ. Yaꞈ hkʼaˇ, ngaˬ hui nyi ma luˬ jaˇ ve maˇ te cawˇ. Yaˬhoˉvaˬ ngaˬ hui awˬ to htaꞈ dawˇ law chehˇ sheˍ ve htawˇ, ngaˬ hui awˬ to htaꞈ maˇ dawˇ law˗o ve kʼo, Saˍtanˍ ha lehˬ jaˇ tuˬ yoˬ.—2 Kawˇrenˍhtuˆ 2:5-7, 11 htaꞈ tehˆ daꞈ sheˍ.

14. Yaˬhoˉvaˬ ngaˬ hui htaꞈ dawˇ law chehˇ sheˍ ve tehꞈ ngaˬ hui hkʼaˬ hkʼe te yonˍ gʼa ve le?

¹⁴ Ngaˬ hui htawˇ dawˇ nawˬ dawˇ cawˬ ve, ‘Yaˬhoˉvaˬ ngaˬ htaꞈ dawˇ law chehˇ sheˍ ve tehꞈ ngaˬ hkʼaˬ hkʼe te yonˍ gʼa ve le?’ Nawˬ chi hkʼe na nyi ve kʼo Yaˬhoˉvaˬ nawˬ htaꞈ venˇ baˆ hpehˇ laˇ gʼa ve tehꞈ hpeuꞈ maw laˇ ve yoˬ. Yaˬhoˉvaˬ nawˬ htaꞈ venˇ baˆ hpehˇ laˇ˗oˬ ve tehꞈ shiˍ ve yoˬ. Peuˬ laˬ ve laiˉ hkʼawꞈ  htaˇ, Shaw nyi kuiˬ Taꞈ yehˬ hkʼaw kʼoˆ ve, “ngaˬ hui laiˉ pawˆ te yaꞈ jaw ve htawˇ, ngaˬ hui ve te hkʼaˇ dawˇ hkʼaˇ maˇ daꞈ ve cawˬ jaw ve htaꞈ kʼawꞈ te tuˬ te laˇ ve yoˬ. . . . Awˬ gʼaˇ taˇ nuˇ sheˍ! Uiˍ jaˇ ve venˇ baˆ htaꞈ te leh maˇ hpehˇ laˇ gʼa taˬ tehꞈ nawˬ taˇ dawˇ. Chi lehˬ, Saˍtanˍ nawˬ htaꞈ dawˇ tcuh gaˇ ve awˬ hkʼaˇ hpehꞈ ve yoˬ. Nawˬ te yaꞈ htaˇ nyi ma luˬ ve lehˬ, nawˬ maˇ daꞈ ve chaw hpehꞈ ve tehꞈ kʼoˆ gaˇ ve maˇ heˆ. Yaˬhoˉvaˬ nawˬ htaꞈ venˇ baˆ hpehˇ laˇ gʼa ve yoˬ. Gʼuiˬ sha nawˬ htaꞈ venˇ baˆ hpehˇ laˇ tuˬ, nawˬ awˬ to htaꞈ daꞈ ve hpawˇ dawˇ gʼa tuˬ leh teˇ pawˆ maˇ kʼawꞈ te yaꞈ tuˬ nyi ma nuˇ nehˬ leh bon lawˬ tcuhˉ taˍ˗oˆ. Tuꞈ ve hkanˍ ve gʼa hpuˇ ve teˇ pawˆ le le yaˇ awˬ pa geh ga laˇ tuˬ lawˬ ve hkʼe, ngaˬ hui kaꞈ shoꞈ shaꞈ ve hkʼaˬ nyiˇ pawˆ gʼa hpuˇ ve htawˇ, Yaˬhoˉ vaˬ ga laˇ tuˬ lawˬ sheˍ. Aw lawn kʼo, Yaˬhoˉvaˬ lehˬ haꞈ pehnˇ uiˍ jaˇ.” *

15-16. Chaw teˇ hpaˍ hpaˍ Yaˬhoˉvaˬ yawˇ htaꞈ dawˇ law chehˇ sheˍ ve tehꞈ shiˍ la htaˇ hkʼaˬ hkʼe dawˇ ve le?

¹⁵ Yaˬhoˉvaˬ ve chaw yawˇ yawˇ hui htaꞈ dawˇ law chehˇ sheˍ ve tehꞈ shiˍ ve pa taw, yawˇ hui awˬ gʼaˇ gʼa ve yoˬ. Tawˇ pa haˉ te kʼo, awˬ viˉ awˬ nyi hawˉ hkʼaˆ teˇ gʼaˇ “Liꞈ hpu a shaꞈ htaꞈ pa gʼa ve” hkʼaw cawˬ ve yaˇ miˇ teˇ gʼaˇ ve awˬ lawn gʼa gʼaw ve htaꞈ dawˇ cawˇ jaˇ. Awˬ viˉ awˬ nyi yaˇ miˇ chi teˇ gʼaˇ kʼoˆ ve, yawˇ shoꞈ shaꞈ ve laiˉ ceuˬ gʼa hpuˇ ve pa taw Yaˬhoˉvaˬ yawˇ htaꞈ haꞈ ve tehꞈ yawˇ awˬ pon kʼo yonˍ gʼa tuˬ haˍ jaˇ. Leh yawˇ Baˆtiˆsaˍ haꞈ yuˬ ve laiˉ hkʼawꞈ gaˬ˗oˬ ve htawˇ, chi hkʼe ve dawˇ hkʼaˇ htaꞈ gʼa tawˍ daꞈ chehˇ sheˍ. Yaꞈ hkʼaˇ, yawˇ htaiˍ hkʼawꞈ ve awˬ hpfuhˇ htaꞈ hkʼa dehꞈ dawˇ nyi ve pa taw, Yaˬhoˉvaˬ yawˇ htaꞈ haꞈ ve tehꞈ hkʼa dehꞈ yonˍ gʼa ve yoˬ. *

¹⁶ Awˬ lawn chi ve awˬ viˉ awˬ nyi hawˉ hkʼaˆ chi teˇ gʼaˇ htaꞈ hkʼaˬ hkʼe ga piˇ ve le? Yawˇ kʼoˆ ve, “yaˇ nehˬ hpehꞈ htaˇ, awˬ ku nyi ve awˬ han nyi ve dawˇ cawˇ jaˇ. Maˇ maw ve awˬ yanˇ htaˇ, ngaˬ teˇ pawˆ kʼawꞈ nyi ve yoˬ. Ga laˇ tuˬ nyi haꞈ shaˉ paˍ geh ngaˬ ca yaw daꞈ˗e ve yoˬ. Leh ngaˬ kaꞈ awˬ ku nyi ve awˬ han maˇ kʼawꞈ nyi˗o. Gʼuiˬ sha lehˬ haꞈ pehnˇ uiˍ jaˇ leh hkʼaˬ htaˆ kaꞈ ha kʼaˉ puiˉ jaˇ ve tehꞈ, ngaˬ yonˍ gʼa tuˬ nyi haꞈ shaˉ paˍ ga laˇ ve yoˬ. Ngaˬ hkʼe ve chaw htaꞈ Yaˬhoˉvaˬ haꞈ laˇ ve, hpehꞈ kʼai maˇ gʼa taˬ tehꞈ laiˉ pawˆ ngaˬ htawˇ dawˇ nawˬ dawˇ cawˬ ve yoˬ. Awˬ viˉ awˬ nyi chi teˇ gʼaˇ ve awˬ lawn ngaˬ dawˇ nyi htaˇ, ngaˬ htaꞈ ga laˇ jaˇ. Gʼuiˬ sha ngaˬ htaꞈ venˇ baˆ maˇ hpehˇ laˇ gʼa taˬ tehꞈ ngaˬ dawˇ htaˇ, Gʼuiˬ sha ve Yaˇ hpu Yeˍsuˆ htaiˍ hkʼawꞈ laˇ ve awˬ hpfuhˇ ngaˬ ve venˇ  baˆ htaꞈ hoˆ peh maˇ gʼa taˬ tehꞈ, ngaˬ kʼoˆ chehˇ ve hkʼe hpehꞈ ve yoˬ. Ngaˬ awˬ hpfuhˇ maˇ cawˬ tehꞈ dawˇ htaˇ, hpehꞈ laˬ jaw ve awˬ lawn chi ngaˬ gʼaw leh hkʼa dehꞈ dawˇ nyi ve yoˬ.”

17. Tcuh yaˇ Pawˇluꞈ te yaꞈ jaw ve awˬ ceuˬ htaꞈ nyi ma luˬ jaˇ tuˬ maˇ te piˇ ve aˬ htoꞈ ma le?

¹⁷ Hpehꞈ laˬ jaw ve awˬ lawn chi teˇ hpaˍ, ngaˬ hui tcuh yaˇ Pawˇluꞈ htaꞈ dawˇ nawˇ tuˬ te laˇ ve yoˬ. Yawˇ Hkriꞈ yaˇ maˇ hpehꞈ sheˍ htaˇ, yawˇ haiˬ jaˇ ve laiˉ ceuˬ te jaw ve yoˬ. Pawˇluꞈ yawˇ te jaw ve awˬ ceuˬ htaꞈ tawnˇ gʼa ve htawˇ, awˬ ceuˬ oˇ ve htaꞈ tiˉ maˇ tawnˇ taˬ. (1 Tiˆmoˉseˍ 1:12-15) Htaiˍ hkʼawꞈ ve awˬ hpfuhˇ chi lehˬ Yaˬhoˉvaˬ yawˇ htaꞈ peꞈ laˇ ve laꞈ shawnˍ hkʼe hpehꞈ ve tehꞈ yawˇ yonˍ ve yoˬ. (Gaˍlaˍtiˆ 2:20) Chi htaꞈ pa taw, Pawˇluꞈ te yaꞈ jaw ve awˬ ceuˬ htaꞈ nyi ma luˬ jaˇ ve tehꞈ maˇ dawˇ. Yaꞈ hkʼaˇ, yawˇ Yaˬhoˉvaˬ ve kanˉ te gʼa ve hkʼaw gʼaˇ hteꞈ te tuˬ dawˇ nyi ve yoˬ.

18. Awˬ lawn chi ve hkʼaw ngaˬ hui aˬ htoꞈ ma gʼa henˇ ve le?

¹⁸ Awˬ lawn chi ve hkʼaw ngaˬ hui aˬ htoꞈ ma gʼa henˇ ve le? (1) Tawnˇ gʼa puiˉ ve lehˬ, Yaˬhoˉvaˬ geh gʼa ve laꞈ shawnˍ hpehꞈ ve yoˬ. Yaꞈ hkʼaˇ, ngaˬ hui ve a shaꞈ teꞈ hkʼaˇ hkʼaˬ hkʼe taw daꞈ jaw ve htawˇ, miˬ guiˬ awˬ suhˉ hkʼaw chi aꞈ kehˉ daꞈ tuˬ yoˬ. (2) Shu ngaˬ hui htaꞈ nyi ma naˬ tuˬ te laˇ ve htawˇ, ngaˬ hui venˇ baˆ hpehˇ piˇ ve kʼo, Yaˬhoˉvaˬ ve kanˉ htaꞈ ceh tiˉ te tuˬ dawˇ nyi gʼa ve yoˬ. (3) Peuˬ taˉ ve awˬ ceuˬ htaꞈ ceh tiˉ nyi ma luˬ jaˇ ve kʼo, ngaˬ hui Yaˬhoˉvaˬ ve kanˉ ha lehˬ ve hkʼaw te gʼa tuˬ haˍ jaˇ. Chi htaꞈ pa taw Pawˇluꞈ hkʼa shuˍ, Yaˬhoˉvaˬ ngaˬ hui htaꞈ venˇ baˆ hpehˇ laˇ˗oˬ ve tehꞈ ngaˬ hui kaꞈ gʼa yonˍ ve yoˬ.

19. Miˬ guiˬ awˬ suhˉ hkʼaw gaˬ kʼo ngaˬ hui htaꞈ nyi ma naˬ tuˬ te laˇ jaw ve maˇ kʼawꞈ dawˇ nawˇ tuˬ tehꞈ hkʼaˬ hkʼe te shiˍ ve le?

¹⁹ Ngaˬ hui miˬ guiˬ awˬ suhˉ hkʼaw gʼa chehˇ leh co co taiˍ taiˍ a shaꞈ gʼa tuˬ a hkaw˗anˬ cawˬ ve yoˬ. Leh oˇ ve teˇ yanˇ ngaˬ hui htaꞈ nyi ma naˬ tuˬ te laˇ jaw ve htaꞈ maˇ kʼawꞈ dawˇ nawˇ˗o. Liꞈ hpu hkʼaw kʼoˆ ve, “ponˬ laˬ peuˬ ve awˬ ceuˬ teˇ hpaˍ htaꞈ kʼawꞈ dawˇ nawˇ tuˬ ve maˇ heˆ.” (Iˉsaˍyaˆ 65:17) Dawˇ nyi sheˍ. Chi teˇ hkui ngaˬ hui Yaˬhoˉvaˬ ve kanˉ te chehˇ ve htawˇ mawˇ la chehˇ ve yoˬ. Yaꞈ hkʼaˇ miˬ guiˬ awˬ suhˉ hkʼaw ngaˬ hui yaˇ nehˬ kʼawꞈ hpehꞈ la tuˬ yoˬ. (Yawˇbaˆ 33:25) Chi htaꞈ pa taw, ngaˬ hui peuˬ taˉ ve htaꞈ tiˉ maˇ dawˇ nyi leh awˬ gʼuˇ suhˍ hteˇ lehˍ nyi peu˗o. Leh miˬ guiˬ awˬ suhˉ hkʼaw ngaˬ hui gʼa chehˇ tuˬ, chi teˇ hkui te gʼa ve hkʼe teˇ ceuˬ le le te sheˍ.