1. Teˇ gʼaˇ tiˉ chehˇ ve tehꞈ dawˇ ve maˇ heˆ leh a shaꞈ teꞈ kuiˬ hkʼaw shoꞈ shaꞈ ve laiˉ ceuˬ htaꞈ gʼa gu htaˇ, awˬ gʼaˇ gʼa tuˬ aˬ htoꞈ ma ga laˇ ve le? (Chiˇ mvuh ve 118:5-7)

 Nawˬ teˇ gʼaˇ tiˉ shoꞈ shaꞈ ve htaꞈ gʼa gu leh ga laˇ ve chaw maˇ cawˬ tehꞈ nawˬ dawˇ jaw˗aw laˇ? Laiˉ gʼaˇ kaꞈ chi hkʼe dawˇ jaw ve yoˬ. Yaˬhoˉvaˬ ve kanˉ te ve chaw htawˇ dawˇ jaw ve yoˬ. (1 Jawˇmawˇ 19:14) Nawˬ chi hkʼe dawˇ ve kʼo, Yaˬhoˉvaˬ kʼoˆ ve, “ngaˬ nawˬ htaꞈ hkʼaˬ htaˆ kaꞈ maˇ hpaˆ, hkʼaˬ htaˆ kaꞈ maˇ baˬ” tehꞈ ka tiꞈ te taˍ laˇ ve htaꞈ dawˇ nyi sheˍ. Chi htaꞈ pa taw, “[Yaˬhoˉvaˬ] lehˬ, ngaˬ htaꞈ ga laˇ shehˍ hpaˇ hpehꞈ leh, ngaˬ teꞈ chiˉ kawˆ tuˬ maˇ cawˬ” tehꞈ ngaˬ hui kʼoˆ gʼa ve yoˬ. (Heˍbrehˇ 13:5, 6) Aˬ laˬ hkʼe 61 hkʼawꞈ C.E htaˇ, awˬ lawn chi hkʼe ve tcuh yaˇ Pawˇluꞈ Yuˇdaꞈ venˇ lo ve Hkriꞈ yaˇ htaꞈ liꞈ bvuhꞈ piˇ jaw ve yoˬ. Yawˇ ve tawˇ hkawˇ ngaˬ hui htaꞈ Chiˇ mvuh ve liꞈ 118:5-7 hkʼaw cawˬ taˍ ve dawˇ nyi tuˬ te laˇ ve yoˬ.—Gʼaw sheˍ.

2. Awˬ lawn chi ve hkʼaw ngaˬ hui aˬ htoꞈ ma ve awˬ lawn htaꞈ henˇ tuˬ le? Leh aˬ htoꞈ ma pa taw le?

² Chiˇ mvuh ve liꞈ bvuhꞈ paˍ hkʼe Pawˇluꞈ kaꞈ Yaˬhoˉvaˬ ga laˇ ve tehꞈ shiˍ ve yoˬ. Pawˇluꞈ Heˍbrehˇ chaw awˬ viˉ awˬ nyi htaꞈ liꞈ maˇ bvuhꞈ piˇ sheˍ 2 hkʼawꞈ htaˇ, mvuhˇ haw lonˉ haw loꞈ kʼoˍ htaꞈ htinˍ ve teˇ yanˇ yawˇ ciˇ taˍ ve yoˬ. (Tcuh yaˇ 27:4, 15, 20) Kʼai ve chi teˇ pawˆ leh peuˬ laˬ htaˇ gʼa hpuˇ jaw ve awˬ lawn teˇ hpaˍ, Yaˬhoˉvaˬ laiˉ hkʼaˇ yehˇ leh Pawˇluꞈ htaꞈ ga piˇ ve yoˬ. Pawˇluꞈ htaꞈ ga piˇ ve 3 hkʼaˇ htaꞈ ngaˬ hui teˇ geh nyi sheˍ. (1) Yeˍsuˆ leh mvuhˇ naw ma tcuh yaˇ, (2) kanˇ paˆ cawˬ ve chaw, (3) leh awˬ viˉ awˬ nyi htaꞈ cuˇ ve yoˬ. Awˬ lawn chi ve teˇ hpaˍ htaꞈ teˇ geh nyi sheˍ. Yaˬhoˉvaˬ ga laˇ tuˬ ngaˬ hui lawˬ htaˇ, chi yawˇ ngaˬ hui htaꞈ ga laˇ gʼa ve tehꞈ yonˍ tuˬ te laˇ ve yoˬ.

3. Pawˇluꞈ aˬ htoꞈ ma dawˇ ve le? Leh aˬ htoꞈ ma pa taw le?

³ Pawˇluꞈ ga laˇ tuˬ htaꞈ loˍ ve yoˬ. Aˬ laˬ hkʼe 56 hkʼawꞈ C.E htaˇ,  chaw awˬ moˍ lonˉ Pawˇluꞈ htaꞈ Yeˍruˆsaˍlehnˍ venˇ jaˇ lo gʼawˬ kʼai leh tiˇ pehˍ gaˇ ve yoˬ. Shawˉ pawˍ gaˬ leh yawˇ htaꞈ jehˬ daꞈ shehˍ hpaˇ mehˆ gʼuˇ suhˍ lo shiˍ kʼai ve yoˬ. Oˇ ve teˇ yanˇ canˇ paˍ yawˇ htaꞈ gʼawˬ tzuhꞈ sheˬ˗a te ve yoˬ. (Tcuh yaˇ 21:30-32; 22:30; 23:6-10) ‘Leh ngaˬ chi ve htaꞈ hkʼaˬ hkʼe maw gʼa yeunˇ hkanˍ sheˍ ve le?’ tehꞈ Pawˇluꞈ dawˇ ve yoˬ.

4. Yaˬhoˉvaˬ lehˬ Yeˍsuˆ htaꞈ cuˇ leh Pawˇluꞈ htaꞈ hkʼaˬ hkʼe ga piˇ tcuh ve le?

⁴ Pawˇluꞈ ga laˇ ve htaꞈ hkʼaˬ hkʼe gʼa ve le? Oˇ ve teˇ haˉ lehˬ, “Jawˇmawˇ” Yeˍsuˆ Pawˇluꞈ paˇ lo huˉ taˍ leh kʼoˆ piˇ ve, “nyi ma taˇ luˬ. Yeˍruˆsaˍlehnˍ venˇ awˬ hkʼaw lo ngaˬ ve awˬ lawn nawˬ shaˉ hkiˆ hkanˍ peuˬ ve hkʼa shuˍ shuˍ Roˉmaꞈ venˇ awˬ hkʼaw lo htawˇ nawˬ shaˉ hkiˆ gʼa hkanˍ tuˬ yoˬ.” (Tcuh yaˇ 23:11) Chi lehˬ awˬ gʼaˇ gʼa tuˬ awˬ yanˇ cawˇ jaˇ! Pawˇluꞈ Yeˍruˆsaˍlehnˍ venˇ lo bon maˍ ve htaꞈ Yeˍsuˆ chiˇ mvuh piˇ ve yoˬ. Pawˇluꞈ Yeˍruˆsaˍlehnˍ venˇ lo gaˬ˗e leh oˇ kaˬ lo bon gʼa maˍ tuˬ Yeˍsuˆ ka tiꞈ te piˇ ve yoˬ. Chi hkʼe gʼa kaˇ htaˇ Pawˇluꞈ nyi ma sha jaˇ leh, yaˇ ehˉ awˬ pa kʼuˉ leh kawˆ tuˬ maˇ cawˬ ve hkʼe hpehꞈ ve tehꞈ Pawˇluꞈ dawˇ ve yoˬ.

5. Yaˬhoˉvaˬ mvuhˇ naw ma tcuh yaˇ htaꞈ cuˇ leh Pawˇluꞈ htaꞈ hkʼaˬ hkʼe ga piˇ ve le? (Awˬ htaꞈ hpawˇ ve awˬ han htaꞈ nyi sheˍ.)

⁵ Pawˇluꞈ aˬ htoꞈ ma htaꞈ gʼa hpuˇ sheˍ ve le? Yeˍruˆsaˍlehnˍ venˇ lo gʼa hpuˇ ve 2 hkʼawꞈ peuˬ hkʼawꞈ nawˉ, Pawˇluꞈ Iˉtaˬliˬ mvuhˇ miˬ lo haw loꞈ kʼoˍ ciˇ kʼai ve yoˬ. Yawˇ mvuhˇ haw lonˉ gʼa hpuˇ ve yoˬ. Mvuhˇ haw chi ve teˇ pawˆ hehnˇ jaˇ leh haw loꞈ kʼoˍ hkʼaw ve chaw hkʼa peu˗eˬ kawˆ jaˇ leh yawˇ hui gʼa suh˗e tuˬ yoˬ tehꞈ dawˇ ve yoˬ. Yaꞈ hkʼaˇ, Pawˇluꞈ maˇ kawˆ. Yawˇ teˇ gʼaˇ le le htaꞈ kʼoˆ piˇ ve, “ngaˬ htaꞈ uˉ peunˍ leh ngaˬ oˉ kʼoˍ pui ve Gʼuiˬ sha yawˇ ve mvuhˇ naw ma tcuh yaˇ teˇ gʼaˇ lehˬ, yaꞈ puiˉ haˉ ngaˬ awˬ paˇ lo huˉ taˍ leh kʼoˆ ve, Pawˇluꞈ˗oˬ, taˇ kawˆ, Hkunˉ hawˉ hkanˇ lonˉ Kehˉsaˍ mehˆ gʼuˇ suhˍ nawˬ gʼa tu huˉ tuˬ yoˬ. Nawˬ geh teˇ geh haw loꞈ kʼoˍ ciˇ taˍ ve chaw hkʼa peu˗eˬ htawˇ, Gʼuiˬ sha nawˬ htaꞈ peꞈ laˇ tuˬ yoˬ.” Chi awˬ gʼuˇ suhˍ htaˇ Yeˍsuˆ Pawˇluꞈ htaꞈ kʼoˆ piˇ jaw ve hkʼe, Yaˬhoˉvaˬ mvuhˇ naw ma tcuh yaˇ htaꞈ coˇ leh teˇ pawˆ kʼawꞈ kʼoˆ piˇ tcuh ve yoˬ. Awˬ leh meuˇ htaˇ Pawˇluꞈ kaꞈ Yaˬhoˉvaˬ ka tiꞈ te taˍ piˇ ve hkʼe Yeˍruˆsaˍlehnˍ venˇ lo gaˬ la ve yoˬ.—Tcuh yaˇ 27:20-25; 28:16.

6. Yeˍsuˆ ka tiꞈ te taˍ laˇ ve ngaˬ hui awˬ gʼaˇ gʼa tuˬ aˬ htoꞈ ma ga laˇ ve le? Leh aˬ htoꞈ ma pa taw le?

⁶ Ngaˬ hui ga laˇ ve htaꞈ hkʼaˬ hkʼe gʼa ve le? Pawˇluꞈ htaꞈ Yeˍsuˆ ga piˇ ve hkʼa shuˍ, Yeˍsuˆ kaꞈ ngaˬ hui htaꞈ ga laˇ tuˬ yoˬ. Tawˇ pa haˉ te kʼo, Yeˍsuˆ yawˇ awˬ hkʼaˇ suh gʼaꞈ yuˬ ve chaw teˇ gʼaˇ le le htaꞈ, ka tiꞈ te piˇ ve, “miˬ guiˬ chi awˬ yanˇ leh htaˇ hkʼa gaˬ, ngaˬ nawˬ hui geh hkʼaˬ htaˆ kaꞈ chehˇ tuˬ yoˬ.” (Maꞈhtehˍ 28:20) Yeˍsuˆ ve tawˇ hkawˇ chi ngaˬ hui awˬ gʼaˇ gʼa tuˬ ga laˇ jaˇ. Teˇ nyi nyi kʼo, ngaˬ hui shoꞈ shaꞈ ve gu gʼa tuˬ haˍ jaˇ ve gʼa hpuˇ ve yoˬ. Tawˇ pa haˉ te kʼo, ngaˬ hui haꞈ ve chaw suh ve, nyi ma luˬ ve lehˬ ngaˬ hui geh teˇ nyi nyiˇ nyi ceh tiˉ cawˬ ve maˇ heˆ ve pa taw, gu gʼa tuˬ haˍ jaˇ. Yaꞈ hkʼaˇ, ngaˬ hui laiˉ hkʼawꞈ nyi ma luˬ chehˇ sheˍ ve yoˬ hehˉ. A shaꞈ maˇ ve chaw kaꞈ teˇ nyi nyi kʼo shoꞈ shaꞈ ve gʼa hpuˇ  leh, chaw teˇ hpaˍ awˬ gʼaˇ nuˇ leh dawˇ maˇ ve a naˍ htaꞈ gʼa tawˍ daꞈ ve yoˬ. Hkʼaˬ hkʼe hpehꞈ ve htawˇ, ngaˬ hui a shaꞈ teꞈ kuiˬ hkʼaw shoꞈ shaꞈ ve gʼa hpuˇ jaˇ ve htawˇ, Yeˍsuˆ ngaˬ hui geh “hkʼaˬ htaˆ kaꞈ” chehˇ ve tehꞈ shiˍ ve pa taw, gu gʼa tuˬ awˬ gʼaˇ gʼa ve yoˬ.—Maꞈhtehˍ 11:28-30.

7. Hpeuꞈ maˍ ve liꞈ 14:6 hkʼaw kʼoˆ taˍ ve hkʼe, chi beuꞈ teˇ co˗e Yaˬhoˉvaˬ ngaˬ hui htaꞈ hkʼaˬ hkʼe ga laˇ chehˇ ve le?

⁷ Liꞈ hpu hkʼaw ngaˬ hui htaꞈ ka tiꞈ te taˍ laˇ ve, Yaˬhoˉvaˬ ngaˬ hui htaꞈ ga laˇ tuˬ mvuhˇ naw ma tcuh yaˇ htaꞈ yehˇ ve yoˬ. (Heˍbrehˇ 1:7, 14) Tawˇ pa haˉ te kʼo, “mvuhˇ miˬ teˇ peˆ le le htaꞈ maˇ kʼoˆ, awˬ ceuˬ awˬ hkʼaˇ teˇ ceuˬ le le htaꞈ maˇ kʼoˆ, tawˇ hkawˇ teˇ ceuˬ le le htaꞈ maˇ kʼoˆ” chaw yaˇ htaꞈ “Gʼuiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ” maˍ piˇ htaˇ, mvuhˇ naw ma tcuh yaˇ ngaˬ hui htaꞈ beˆ maˍ laˇ leh ga laˇ ve yoˬ.—Maꞈhtehˍ 24:13, 14; Hpeuꞈ maˍ ve 14:6 gʼaw sheˍ.

8. Pawˇluꞈ htaꞈ ga piˇ tuˬ Yaˬhoˉvaˬ jawˇ mawˇ Hpeˍliˆ htaꞈ hkʼaˬ hkʼe yehˇ ve le?

⁸ Pawˇluꞈ ga laˇ ve htaꞈ hkʼaˬ hkʼe gʼa ve le? 56 hkʼawꞈ C.E. htaˇ hpehꞈ jaw ve awˬ lawn htaꞈ teˇ pawˆ kʼawꞈ nyi sheˍ. Pawˇluꞈ Roˉmaꞈ venˇ lo gaˬ˗e tuˬ yoˬ tehꞈ Yeˍsuˆ yawˇ htaꞈ ka tiꞈ te piˇ ve yoˬ. Yaꞈ hkʼaˇ, Yuˇdaꞈ chaw laiˉ gʼaˇ Yeˍruˆsaˍlehnˍ venˇ lo chehˇ ve, Pawˇluꞈ htaꞈ te luˬ leh tiˇ pehˍ tuˬ awˬ hkʼaˇ gu chehˇ ve yoˬ. Roˉmaꞈ chaw maꞈ poˍ lonˉ Kaˍlawˇdiˆ Luˇsiˆ meh ve, yawˇ hui gu chehˇ ve awˬ hkʼaˇ htaꞈ shiˍ ve yoˬ. Yawˇ ve maꞈ moˍ lonˉ Pawˇluꞈ htaꞈ Kehˉsaˍriˆ venˇ lo shiˍ kʼai tcuh ve yoˬ. Chi ve lehˬ Yeˍruˆsaˍlehnˍ venˇ lo aˬ laˬ hkʼe 105 kiˇ loˇ vuiˇ daꞈ ve yoˬ. Oˇ kaˬ lo gaˬ˗e htaˇ, jawˇ mawˇ Hpeˍliˆ lehˬ, “Pawˇluꞈ htaꞈ Heˍroˆ ve hawˉ yehˬ awˬ hkʼaw lo haw taˍ tuˬ yawˇ tawˇ piˇ ve yoˬ.” Chi htaꞈ pa taw, Yuˇdaꞈ chaw Pawˇluꞈ htaꞈ tiˇ pehˍ gaˇ ve htawˇ teꞈ chiˉ te maˇ gʼa.—Tcuh yaˇ 23:12-35.

9. Jawˇmawˇ Hpeˍtuˆ Pawˇluꞈ htaꞈ hkʼaˬ hkʼe ga piˇ ve le?

⁹ Peuˬ hkʼawꞈ nawˉ 2 hkʼawꞈ 58 hkʼawꞈ C.E. htaˇ, Pawˇluꞈ Kehˉsaˍriˆ venˇ lo chehˇ sheˍ ve yoˬ. Oˇ ve teˇ yanˇ jawˇ mawˇ Hpeˍliˆ ve awˬ tan te tuˬ Hpeˍtuˆ laˬ ve yoˬ. Pawˇluꞈ htaꞈ Yeˍruˆsaˍlehnˍ venˇ lo suhˉ jehˬ tuˬ Yuˇdaꞈ chaw Hpeˍtuˆ geh lawˬ hkawˉ piˇ ve yoˬ. Yaꞈ hkʼaˇ, Hpeˍtuˆ maˇ te. Yuˇdaꞈ chaw chi hkʼe te ve lehˬ,“yaꞈ kʼaw kʼaˉ lo yawˇ hui naˆ taˍ leh Pawˇluꞈ htaꞈ tiˇ pehˍ tuˬ dawˇ taˍ ve” htaꞈ Hpeˍtuˆ shiˍ ve pa taw yoˬ.—Tcuh yaˇ 24:27–25:5.

10. Pawˇluꞈ jawˇ mawˇ lonˉ Kehˉsaˍ geh lawˬ hkawˉ htaˇ jawˇ mawˇ Hpeˍtuˆ hkʼaˬ hkʼe te ve le?

¹⁰ Peuˬ hkʼawꞈ nawˉ Pawˇluꞈ htaꞈ Kehˉsaˍriˆ venˇ lo suhˉ jehˬ piˇ ve yoˬ. Yaꞈ hkʼaˇ, Hpeˍtuˆ Yuˇdaꞈ chaw nyi ma cawˇ tuˬ te gaˇ ve yoˬ. Hkʼe te leh, yawˇ Pawˇluꞈ htaꞈ “awˬ lawn chi teˇ hpaˍ ngaˬ mehˆ gʼuˇ suhˍ suhˉ jehˬ tuˬ, nawˬ Yeˍruˆsaˍlehnˍ venˇ lo kʼai gaˇ laˇ tehꞈ na nyi ve yoˬ.” Pawˇluꞈ Yeˍruˆsaˍlehnˍ venˇ lo kʼai ve kʼo, shu tiˇ pehˍ laˇ tuˬ yoˬ tehꞈ yawˇ shiˍ ve yoˬ. Yawˇ Roˉmaꞈ venˇ lo gaˬ˗e htaˇ a shaꞈ gʼa teꞈ leh Gʼuiˬ sha ve kanˉ caˉ leh te gʼa tuˬ, hkʼaˬ hkʼe gʼa te cawˇ ve yawˇ shiˍ ve yoˬ. Hkʼe te leh Pawˇluꞈ kʼoˆ ve, “Jawˇmawˇ Kehˉsaˍ geh kʼai tuˬ ngaˬ lawˬ ve yoˬ.” Jawˇmawˇ Hpeˍtuˆ lehˬ, Jehˬ daꞈ shehˍ hpaˇ awˬ moˍ geh jehˬ daꞈ peuˬ hkʼawꞈ nawˉ, yawˇ Pawˇluꞈ htaꞈ kʼoˆ piˇ ve, “nawˬ jawˇ mawˇ Kehˉsaˍ geh kʼai tuˬ lawˬ ve pa taw, jawˇ mawˇ Kehˉsaˍ geh nawˬ gʼa kʼai tuˬ yoˬ.” Suhˉ jehˬ cheˆ piˇ ve chi teˇ pawˆ Pawˇluꞈ ve a shaꞈ htaꞈ ponˬ piˇ ve pa taw, yawˇ Roˉmaꞈ venˇ lo gaˬ˗e ve yoˬ. Hkʼe te leh Pawˇluꞈ chehˇ vuiˇ jaˇ ve pa taw canˇ paˍ yawˇ htaꞈ teꞈ chiˉ te maˇ gʼa.—Tcuh yaˇ 25:6-12.

11. Pawˇluꞈ Iˉsaˍyaˆ ve tawˇ hkawˇ htaꞈ yawˇ awˬ gʼaˇ gʼa tuˬ hkʼaˬ hkʼe dawˇ nyi ve le?

¹¹ Pawˇluꞈ Iˉtaˍliˍ mvuhˇ miˬ lo kʼai tuˬ law chehˇ htaˇ, tcuh kaˍ paˍ Iˉsaˍyaˆ Yaˬhoˉvaˬ htaꞈ tawˍ ve chaw ve awˬ lawn kʼoˆ ve, “nawˬ dawˇ taˍ ve hkʼe te˗o. Yaꞈ hkʼaˇ, nawˬ dawˇ taˍ ve hkʼe hpehꞈ la tuˬ ve maˇ heˆ. Nawˬ yaw gaˇ ve hkʼe yaw˗o. Yaꞈ hkʼaˇ, tawˇ oˇ ve teˇ hpaˍ lehˬ teꞈ chiˉ tcuhˉ kuiˬ cawˬ tuˬ ve maˇ heˆ. Awˬ lawn kʼo, Gʼuiˬ sha ngaˬ hui geh chehˇ taˍ ve” tehꞈ Pawˇluꞈ dawˇ nyi chehˇ ve yoˬ hehˉ. (Iˉsaˍyaˆ 8:10) Pawˇluꞈ lehˬ, Gʼuiˬ sha ga laˇ tuˬ tehꞈ shiˍ ve yoˬ. Chi lehˬ, yawˇ yonˍ yeˬ leh awˬ gʼuˇ suhˍ hpawˇ beˬ ve lawˇ ve gʼa hpuˇ htaˇ gu gʼa tuˬ ga piˇ ve yoˬ.

12. Yuˇluˆ Pawˇluꞈ htaꞈ hkʼaˬ hkʼe ga piˇ ve le? Leh awˬ lawn chi htaꞈ Pawˇluꞈ hkʼaˬ hkʼe dawˇ ve le?

 ¹² Pawˇluꞈ htawnˍ yaˇ hpehꞈ leh Iˉtaˍliˍ mvuhˇ miˬ lo kʼai chehˇ htaˇ, yawˇ htaꞈ Yuˇluˆ meh ve maꞈ poˍ htaꞈ chiˇ aꞈ piˇ ve yoˬ. Oˇ ve teˇ yanˇ Yuˇluˆ kanˇ paˆ cawˬ leh Pawˇluꞈ htaꞈ hkʼaˬ hkʼe te kaꞈ gʼa ve yoˬ. Leh yawˇ ve kanˇ paˆ htaꞈ hkʼaˬ hkʼe yehˇ ve le? Shawˉ pawˍ yawˇ hui iˉ kaˆ gʼuiˬ pfuhˍ lo taˆ˗e htaˇ “Pawˇluꞈ yawˇ ve awˬ chawˇ teˇ hpaˍ geh kʼai tuˬ leh awˬ chawˇ teˇ hpaˍ yawˇ htaꞈ haꞈ shaˉ tuˬ, Yuˇluˆ lehˬ yawˇ htaꞈ ha kʼaˉ leh a hkaw˗anˬ piˇ ve yoˬ.” Peuˬ hkʼawꞈ nawˉ, Yuˇluˆ Pawˇluꞈ htaꞈ ponˬ piˇ ve yoˬ. Yawˇ aˬ htoꞈ ma te ve le? Haw loꞈ kʼoˍ hkʼaw chehˇ ve htawnˍ yaˇ hkʼa peu˗eˬ htaꞈ maꞈ yaˇ hui tiˇ pehˍ tuˬ dawˇ chehˇ ve yoˬ. Yaꞈ hkʼaˇ, Yuˇluˆ yawˇ hui htaꞈ chi hkʼe maˇ te tcuh. Aˬ htoꞈ ma pa taw le? Hpehꞈ la ve chi teˇ pawˆ yawˇ “Pawˇluꞈ htaꞈ ponˬ piˇ gaˇ ve” htaꞈ pa taw yoˬ. Yaˬhoˉvaˬ maꞈ poˍ chi teˇ gʼaˇ htaꞈ yehˇ leh Pawˇluꞈ htaꞈ ga laˇ ve tehꞈ yawˇ yonˍ ve yoˬ.—Tcuh yaˇ 27:1-3, 42-44.

13. Yaˬhoˉvaˬ kanˇ paˆ cawˬ ve chaw htaꞈ hkʼaˬ hkʼe yehˇ ve le?

¹³ Ngaˬ hui ga laˇ ve htaꞈ hkʼaˬ hkʼe gʼa ve le? Kanˇ paˆ cawˬ ve chaw htaꞈ Yaˬhoˉvaˬ loˍ ve hkʼe gʼaꞈ te tuˬ, Yaˬhoˉvaˬ lehˬ yawˇ ve daꞈ kehˬ ve awˬ ha hpu htaꞈ yehˇ ve yoˬ. Jawˇmawˇ Sawˉlaꞈmonˍ kʼoˆ taˍ ve, “Gʼuiˬ sha lehˬ, iˉ kaˆ lawˬ htaꞈ yawˇ kʼai piˇ lawˬ gaˇ ve teˇ hpawˇ lo kʼai piˇ gʼa ve hkʼe, jawˇ mawˇ ve nyi ma htaꞈ htawˇ hkʼa sha sha˗ehˬ yuˬ hpfuhˆ piˇ gʼa ve yoˬ.” (Tawˇ naˉ ve 21:1) Chi teˇ tawn aˬ htoꞈ ma htaꞈ kʼoˆ gaˇ ve le? Chaw yaˇ iˉ kaˆ lawˬ yawˇ kʼai tcuh gaˇ kuiˬ lo kʼai tuˬ gʼuiˬ hkʼaˇ duˇ gʼa ve hkʼe, Yaˬhoˉvaˬ yawˇ ve a loˍ htaꞈ te biˇ tuˬ, kanˇ paˆ cawˬ ve chaw ve dawˇ hkʼaˇ htaꞈ pa piˇ leh yawˇ hui ve kanˇ paˆ htaꞈ yehˇ ve yoˬ. Chi htaꞈ pa taw, kanˇ paˆ cawˬ ve chaw hui Gʼuiˬ sha ve chaw htaꞈ awˬ bon cawˬ tuˬ dawˇ cheˆ piˇ gʼa ve yoˬ.—Eˇzaˍraˆ 7:21, 25, 26 htaꞈ tehˆ daꞈ sheˍ.

14. Tcuh yaˇ liꞈ 12:5 hkʼaw kʼoˆ taˍ ve hkʼe, ngaˬ hui a shu awˬ pon bon lawˬ piˇ gʼa ve le?

¹⁴ Ngaˬ hui aˬ htoꞈ ma te gʼa ve le? Kanˉ te leh Hkriꞈ yaˇ ve a shaꞈ teꞈ hkʼaˇ ngaˬ hui htaꞈ heuˆ la kuiˬ cawˬ ve awˬ lawn teˇ hpaˍ “hkunˉ hawˉ hkanˇ teˇ hpaˍ leh jawˇ mawˇ teˇ hpaˍ” dawˇ cheˆ htaˇ, ngaˬ hui yawˇ hui awˬ pon bon lawˬ piˇ gʼa ve yoˬ. (1 Tiˆmoˉseˍ 2:1, 2; Neˍhaˍmiˆ 1:11) Awˉ lawˉ peuˇ ve Hkriꞈ yaˇ hkʼa shuˍ, ngaˬ hui ve awˬ viˉ awˬ nyi htawnˍ hkʼaw chehˇ ve chaw awˬ pon Gʼuiˬ sha geh bon lawˬ piˇ gʼa ve yoˬ. (Tcuh yaˇ 12:5 gʼaw sheˍ; Heˍbrehˇ 13:3) Chi hkʼoˆ kaꞈ, awˬ viˉ awˬ nyi htawnˍ hkʼaw chehˇ taˍ ve chaw htaꞈ nyi haꞈ shaˉ ve chaw awˬ pon kaꞈ bon lawˬ piˇ gʼa ve yoˬ. Yuˇluˆ hkʼa shuˍ, yawˇ hui kaꞈ ngaˬ hui ve awˬ viˉ awˬ nyi htaꞈ “ha kʼaˉ” ve hkʼaw te piˇ tuˬ Yaˬhoˉvaˬ geh bon lawˬ piˇ gʼa ve yoˬ.—Tcuh yaˇ 27:3.

15-16. Yaˬhoˉvaˬ lehˬ Aˍriˍtaˍhkuˆ leh Luˉkaꞈ htaꞈ cuˇ leh Pawˇluꞈ htaꞈ hkʼaˬ hkʼe ga piˇ ve le?

¹⁵ Pawˇluꞈ ga laˇ ve htaꞈ hkʼaˬ hkʼe gʼa ve le?  Pawˇluꞈ Roˉmaꞈ venˇ lo kʼai ve awˬ yanˇ htaˇ, yawˇ htaꞈ laiˉ pawˆ ga piˇ tuˬ Yaˬhoˉvaˬ awˬ viˉ awˬ nyi htaꞈ yehˇ ve yoˬ. Teˇ lawn lawn htaꞈ teˇ geh nyi sheˍ.

¹⁶ Aˍriˍtaˍhkuˆ leh Luˉkaꞈ Pawˇluꞈ ve ka tiꞈ yeˬ ve awˬ chawˇ hpehꞈ ve yoˬ. Yawˇ huiˉ maˬ Pawˇluꞈ geh Roˉmaꞈ * venˇ lo kʼai tuˬ dawˇ cheˆ ve yoˬ. Yawˇ hui Roˉmaꞈ venˇ lo kʼai ve kawˆ tuˬ maˇ gʼa hpuˇ taˬ tehꞈ, Yeˍsuˆ yawˇ hui htaꞈ teˇ gʼaˇ tawˍ teˇ gʼaˇ ka tiꞈ te piˇ taˍ ve maˇ heˆ ve htawˇ, yawˇ huiˉ maˬ a shaꞈ tanˇ leh Pawˇluꞈ geh kʼai ve yoˬ. Yawˇ hui kawˆ tuˬ gʼa hpuˇ chehˇ htaˇ, Roˉmaꞈ venˇ lo gaˬ˗e tuˬ yoˬ tehꞈ shiˍ la ve yoˬ. Aˍriˍtaˍhkuˆ leh Luˉkaꞈ Kehˉsaˍriˆ venˇ lo haw loꞈ kʼoˍ ciˇ htaˇ, Yaˬhoˉvaˬ haꞈ hanˉ ve awˬ viˉ awˬ nyi chi 2 gʼaˇ htaꞈ yehˇ leh Pawˇluꞈ htaꞈ ga piˇ ve pa taw yawˇ bon lawˬ ve hkʼaw awˬ bon uiˍ jaˇ kʼoˆ piˇ ve yoˬ.—Tcuh yaˇ 27:1, 2, 20-25.

17. Yaˬhoˉvaˬ Pawˇluꞈ htaꞈ ga piˇ tuˬ awˬ viˉ awˬ nyi htaꞈ hkʼaˬ hkʼe yehˇ ve le?

¹⁷ Pawˇluꞈ yawˇ yaꞈ kʼaw kʼai htaˇ, awˬ viˉ awˬ nyi yawˇ htaꞈ laiˉ pawˆ ga piˇ ve yoˬ. Tawˇ pa haˉ te kʼo, Siˉdonˍ gʼuiˬ pfuhˍ lo gaˬ˗e htaˇ, Yuˇluˆ Pawˇluꞈ htaꞈ ‘yawˇ ve awˬ chawˇ teˇ hpaˍ geh kʼai leh yawˇ htaꞈ haꞈ shaˉ tuˬ a hkaw˗anˬ piˇ ve yoˬ.’ Peuˬ leh Pawˇtaˍyawˇliˆ venˇ lo Pawˇluꞈ yawˇ leh awˬ chawˇ 2 gʼaˇ htaꞈ “ngaˬ hui awˬ viˉ awˬ nyi teˇ hpaˍ htaꞈ mawˬ daꞈ leh, yawˇ hui geh suhˍ nyi chehˇ tuˬ ngaˬ hui htaꞈ lawˬ hkawˉ laˇ ve” tehꞈ kʼoˆ ve yoˬ. Pawˇluꞈ leh yawˇ ve awˬ chawˇ htaꞈ ga laˇ ve awˬ viˉ awˬ nyi htaꞈ yawˇ ve awˬ lawn kʼoˆ maˍ piˇ ve yoˬ hehˉ. Chi lehˬ awˬ viˉ awˬ nyi ha lehˬ jaˇ tuˬ te piˇ ve yoˬ. (Tcuh yaˇ 15:2, 3 htaꞈ tehˆ daꞈ sheˍ.) Pawˇluꞈ leh awˬ chawˇ awˬ gʼaˇ gʼa jaˇ. Peuˬ leh yawˇ hui kʼawꞈ kʼai ve yoˬ.

18. Aˬ htoꞈ ma te Pawˇluꞈ Gʼuiˬ sha ve bon htaꞈ chiˇ mvuh leh nyi ma awˬ gʼaˇ cawˬ la ve le?

¹⁸ Pawˇluꞈ Roˉmaꞈ venˇ hkʼaw loꞈ˗e htaˇ, peuˬ taˉ ve 3 hkʼawꞈ yawˇ Hkriꞈ yaˇ awˬ moˍ chi htaꞈ “laiˉ hkʼawꞈ nawˬ hui geh ngaˬ laˬ gaˇ jaˇ” liꞈ chi hkʼe bvuhꞈ piˇ ve htaꞈ dawˇ nawˇ ve yoˬ hehˉ. (Roˉmaꞈ 15:23) Yaꞈ hkʼaˇ, yawˇ choˬ kaˬ lo laˬ htaˇ htawnˍ yaˇ hpehꞈ leh laˬ tuˬ maˇ dawˇ. Awˬ viˉ awˬ nyi yaꞈ kʼaw hpuiˇ lo law taˍ leh yawˇ htaꞈ haꞈ yuˬ piˇ ve gʼa mawˬ htaˇ, Pawˇluꞈ hkʼaˬ hkʼe taw awˬ gʼaˇ gʼa ve htaꞈ dawˇ nyi sheˍ. “Pawˇluꞈ yawˇ hui htaꞈ gʼa mawˬ htaˇ, Gʼuiˬ sha ve bon htaꞈ chiˇ mvuh leh nyi ma awˬ gʼaˇ cawˬ  la ve yoˬ.” (Tcuh yaˇ 28:15) Pawˇluꞈ awˬ viˉ awˬ nyi htaꞈ gʼa mawˬ htaˇ, aˬ htoꞈ ma te Gʼuiˬ sha ve bon htaꞈ chiˇ mvuh ve le? Chi ve teˇ pawˆ kaꞈ Yaˬhoˉvaˬ awˬ viˉ awˬ nyi htaꞈ cuˇ leh yawˇ htaꞈ ga laˇ ve gʼa mawˬ ve yoˬ.

19. 1 Peˍtruˆ liꞈ 4:10 hkʼaw kʼoˆ taˍ ve hkʼe, awˬ viˉ awˬ nyi ga laˇ tuˬ loˍ htaˇ Yaˬhoˉvaˬ ngaˬ hui htaꞈ hkʼaˬ hkʼe yehˇ ve le?

¹⁹ Ngaˬ hui aˬ htoꞈ ma te gʼa ve le? Nawˬ ve Hkriꞈ yaˇ awˬ moˍ hkʼaw naˬ ve gawˬ ve maˇ heˆ leh shoꞈ shaꞈ ve awˬ lawn cawˬ ve pa taw, awˬ gʼaˇ nuˇ ve chaw cawˬ˗aw laˇ? Maˇ heˆ leh haꞈ ve chaw suh gehˇ sheˍ ve chaw cawˬ˗aw laˇ? Ga laˇ tuˬ loˍ ve chaw cawˬ ve tehꞈ ngaˬ hui shiˍ htaˇ, yawˇ htaꞈ ga piˇ gʼa tuˬ, ngaˬ hui tawˇ yaw leh teˇ ceuˬ ceuˬ daꞈ ve te piˇ tuˬ, Yaˬhoˉvaˬ ga laˇ tuˬ lawˬ gʼa ve yoˬ. Awˬ viˉ awˬ nyi awˬ gʼaˇ gʼa tuˬ loˍ htaˇ, chi yawˇ htaꞈ awˬ gʼaˇ piˇ gʼa ve yoˬ hehˉ. (1 Peˍtruˆ 4:10 gʼaw sheˍ.) * Ngaˬ hui ga piˇ ve chaw Yaˬhoˉvaˬ ka tiꞈ te taˍ ve “ngaˬ nawˬ htaꞈ hkʼaˬ htaˆ kaꞈ maˇ hpaˆ, hkʼaˬ htaˆ kaꞈ maˇ baˬ” tehꞈ kʼoˆ ve htaꞈ kʼawꞈ yonˍ la ve pa taw chi nawˬ htaꞈ ha lehˬ jaˇ tuˬ te laˇ ve yoˬ.

20. “Gʼuiˬ sha lehˬ, ngaˬ htaꞈ ga laˇ shehˍ hpaˇ hpehꞈ” ve tehꞈ aˬ htoꞈ ma te ngaˬ hui yonˍ ve hkʼaw kʼoˆ gʼa ve le?

²⁰ Pawˇluꞈ leh yawˇ ve awˬ chawˇ hkʼa shuˍ, mvuhˇ haw lonˉ gʼa hpuˇ ve hkʼe, ngaˬ hui a shaꞈ teꞈ kuiˬ hkʼaw kaꞈ shoꞈ shaꞈ ve gʼa hpuˇ ve yoˬ. Yaˬhoˉvaˬ ngaˬ hui geh chehˇ ve tehꞈ shiˍ ve pa taw, awˬ gʼaˇ gʼa ve yoˬ. Gʼuiˬ sha lehˬ, ngaˬ hui htaꞈ ga laˇ tuˬ Yeˍsuˆ leh mvuhˇ naw ma tcuh yaˇ htaꞈ yehˇ ve awˬ hkʼoˆ kaꞈ, kanˇ paˆ cawˬ ve chaw teˇ hpaˍ htaꞈ yawˇ ve a loˍ te piˇ tuˬ yehˇ gʼa ve yoˬ. Ngaˬ hui a shu yawˇ awˬ to gʼa hpuˇ jaw ve hkʼa shuˍ, Yaˬhoˉvaˬ ngaˬ hui htaꞈ ga laˇ tuˬ awˬ viˉ awˬ nyi htaꞈ daꞈ kehˬ ve awˬ ha hpu piˇ ve yoˬ. Chi htaꞈ pa taw, Pawˇluꞈ hkʼa shuˍ “Gʼuiˬ sha lehˬ, ngaˬ htaꞈ ga laˇ shehˍ hpaˇ hpehꞈ leh, ngaˬ teꞈ chiˉ kawˆ tuˬ maˇ cawˬ. Chaw yaˇ ngaˬ htaꞈ aˬ htoꞈ ma te laˇ hpehꞈ tuˬ le?” tehꞈ ngaˬ hui kaꞈ yonˍ ve hkʼaw kʼoˆ gʼa ve yoˬ.—Heˍbrehˇ 13:6.