Awˬ viˉ awˬ nyi laiˉ gʼaˇ hpu ca tuˬ shu mvuhˇ miˬ lo ca chehˇ˗e ve yoˬ. Yaꞈ hkʼaˇ, yawˇ hui paw kuiˬ lo kʼoꞈ˗e tuˬ dawˇ cheˆ ve yoˬ. Aˬ htoꞈ ma pa taw yawˇ hui chi hkʼe te ve le? Awˬ lawn kʼo, yawˇ hui Yaˬhoˉvaˬ leh awˬ nu ve chaw htaꞈ haꞈ ve pa taw, hto toˇ ve chaw loˍ jaˇ kuiˬ awˬ ti lo ca chehˇ˗e ve yoˬ. (Maꞈhtehˍ 22:37-39) Yawˇ hui aˬ htoꞈ ma gʼa yuˬ tanˇ ve le? Yawˇ hui Yaˬhoˉvaˬ geh aˬ htoꞈ ma awˬ bon gʼa ve le? Aˍfaˍriˆkaˆ miˬ guiˬ mvuhˇ nyi hkehˬ hpawˇ Keˬmaˬronˇ mvuhˇ miˬ lo chehˇ ve awˬ viˉ awˬ nyi ve hpehꞈ laˬ jaw ve awˬ lawn htaꞈ teˇ geh nyi sheˍ.

1998 hkʼawꞈ htaˇ, O˗ne˗si˗muh Keˬmaˬronˇ mvuhˇ miˬ lo maˇ chehˇ leh, shu mvuhˇ miˬ lo 14 hkʼawꞈ ca chehˇ˗e ve yoˬ. Teˇ nyi htaˇ, yawˇ hpawnˬ daꞈ˗e leh bon maˍ hkawˇ hto toˇ ve htaꞈ caˉ daꞈ ve tawˇ pa haˉ tehˆ maˍ laˇ ve htaꞈ gʼa kaˇ ve yoˬ. Bon maˍ paˍ kʼoˆ ve, “ngaˬ hui leh awˬ chawˇ ngaˇ teˇ gʼaˇ teˇ kaˬ ca biˉ˗e ve kʼo, awˬ chawˇ ngaˬ hui aꞈ kehˉ ngaˇ gʼa maˇ jaˇ. Ngaˬ hui awˬ chawˇ geh ngaˇ teˇ geh maˇ ca biˉ˗e tuˬ laˇ?”

Tawˇ pa haˉ tehˆ maˍ laˇ ve chi htaꞈ gʼa kaˇ peuˬ hkʼawꞈ nawˉ, O˗ne˗si˗muh paw kuiˬ Keˬmaˬronˇ mvuhˇ miˬ lo Gʼuiˬ sha ve kanˉ hto toˇ ve htaꞈ caˉ daꞈ ve ca kʼawꞈ te tuˬ dawˇ taˍ ve yoˬ. Yawˇ Keˬmaˬronˇ mvuhˇ miˬ lo maˇ chehˇ ve maw jaˇ˗oˬ ve pa taw, yawˇ shu hkʼe te gʼa tuˬ naˬ htawˇ dawˇ nawˬ dawˇ cawˬ ve yoˬ. Hkʼe te leh yawˇ oˇ kaˬ lo 6 ha pa ca chehˇ˗e nyi sheˍ ve yoˬ. Leh 2012 hkʼawꞈ htaˇ, yawˇ oˇ kaˬ lo kʼoꞈ˗e ve yoˬ.

O˗ne˗si˗muh kʼoˆ ve, “haw jaˇ ve leh oˇ kaˬ lo chehˇ ve chaw hkʼe leˇ chehˇ gʼa tuˬ yawˇ gʼa pa ve yoˬ. Leh yawˇ hpawnˬ daꞈ kuiˬ yehˬ hkʼaw kaꞈ mui kuiˬ hehnˇ jaˇ ve htaꞈ gʼa mui ve yoˬ.” Yawˇ gʼuiˬ leh kʼoˆ ve, “hpawnˬ daꞈ kuiˬ hkʼaw ngaˬ hkʼa dehꞈ coˇ caˇ leh na htaˇ, mui kuiˬ nuˇ ve htaꞈ dawˇ nawˇ ve kaꞈ awˬ meu˗eˇ awˬ meu˗eˇ mehˉ kʼai ve yoˬ.”

2013 hkʼawꞈ htaˇ, O˗ne˗si˗muh lehˬ Che˗la˗di Hpaˉlanˍ mvuhˇ miˬ lo 9 hkʼawꞈ ca chehˇ˗e leh kʼawꞈ la ve htaꞈ mawˬ daꞈ leh heuˆ daꞈ ve yoˬ. Yawˇ hui a shaꞈ teꞈ kuiˬ hkʼaw Yaˬhoˉvaˬ ve kanˉ te ve htaꞈ a yeˇ uiˍ jaˇ tehꞈ shaw ve pa taw, yawˇ hui aˬ htoꞈ ma awˬ bon gʼa ve le? O˗ne˗si˗muh kʼoˆ ve, “ngaˬ huiˉ maˬ Gʼuiˬ sha ve mvuhˇ miˬ Hto toˇ ve chaw liꞈ henˇ yehˬ (SKE) lo gʼa kʼai leh Beˍteˍlaˆ hkʼaw kanˉ gʼa te ve yoˬ. A nyi hkʼawꞈ htaˇ ceh kaꞈ ngaˬ hui ve Hkriꞈ yaˇ awˬ moˍ hkʼaw Baˆtiˆsaˬ haꞈ yuˬ ve 20 gʼaˇ cawˬ ve yoˬ. Chi teˇ hkui ngaˬ ngaˇ ca kuiˬ awˬ ti cawˇ jaˇ kuiˬ lo laˬ ve tehꞈ dawˇ ve yoˬ.” (Maˍkuˆ 1:17, 18) Che˗la˗di kʼoˆ ve, “ngaˬ chi hkʼe taw taw awˬ bon gʼa tuˬ maˇ dawˇ nyi jaw.”

Cu˗diꞈ Aˍmeˬriˆkaꞈ mvuhˇ miˬ lo ca chehˇ˗e ve yoˬ. Yaꞈ hkʼaˇ, yawˇ Gʼuiˬ sha ve kanˉ maˇ maˇ te gaˇ ve yoˬ. Yawˇ kʼoˆ ve, “Keˬmaˬronˇ mvuhˇ miˬ lo ngaˬ ve yehˬ kʼa geh ca guiˇ la ve teˇ pawˆ le le leh, Aˍmeˬriˆkaꞈ mvuhˇ miˬ lo gʼa kʼoꞈ˗e ve awˬ nyi gaˬ htaˇ, ngaˬ geh Liꞈ hpu tanˬ henˇ chehˇ ve chaw htaꞈ dawˇ nawˇ ve pa taw hawˬ ve yoˬ.” Yaꞈ hkʼaˇ, Cu˗diꞈ Keˬmaˬronˇ mvuhˇ miˬ lo kʼawꞈ kʼawꞈ la cawˇ le naˬ, yawˇ hkʼa dehꞈ maˇ shiˍ sheˍ. Keˬmaˬronˇ mvuhˇ miˬ lo chehˇ ve awˬ pa htaꞈ haꞈ shaˉ tuˬ, yawˇ hpu gʼa ca ve pa taw, Cu˗diꞈ Aˍmeˬriˆkaꞈ mvuhˇ miˬ lo kanˉ te ve hpu gʼa maˇ jaˇ. Yaꞈ hkʼaˇ, yawˇ Yaˬhoˉvaˬ htaꞈ gʼaˇ va leh Keˬmaˬronˇ mvuhˇ miˬ lo kʼoꞈ˗e tuˬ dawˇ cheˆ ve yoˬ. Shu mvuhˇ  miˬ chehˇ htaˇ a shaꞈ teꞈ hkʼaˇ hpehꞈ sha jaˇ ve htaꞈ yawˇ dawˇ nawˇ ve yoˬ. Hkʼe te leh, yawˇ pa gʼa tuˬ Yaˬhoˉvaˬ ga laˇ tuˬ bon lawˬ ve yoˬ. Leh toˇ nyi shehˍ hpaˇ leh awˬ miˇ ma kaꞈ yawˇ htaꞈ awˬ gʼaˇ peꞈ piˇ jaˇ.

Cu˗diꞈ kʼoˆ ve, “3 hkʼawꞈ ve hkʼaw chaw 4 gʼaˇ htaꞈ Baˆtiˆsaˬ haꞈ yuˬ tuˬ ga piˇ ve ngaˬ ha lehˬ jaˇ.” Cu˗diꞈ Seh˗Hka˗hteu htaꞈ henˆ daꞈ ve yoˬ. Leh hkʼaˬ htaˆ kaꞈ tcuh pui ve gʼuˇ suhˍ peuˍ ve te ve yoˬ. Chi teˇ hkui yawˇ huiˉ maˬ teˇ ca toˇ nyi shehˍ hpaˇ te ve yoˬ. Hkʼe kʼo yawˇ ve awˬ pa hkʼaˬ hkʼe kʼai le? Cu˗diꞈ leh yawˇ ve yehˬ kʼa awˬ nu ve teˇ mvuhˇ miˬ hkʼaw awˬ pa naˬ ve htaꞈ hpu maˇ peuˬ leh a hkʼe leˇ shawˆ hpeꞈ laˇ ve naˆ tsuhˇ yehˬ htaꞈ mawˬ ve yoˬ. Shawˆ hpeꞈ ve chi teˇ pawˆ kaꞈ daꞈ jaˇ.

Awˬ viˉ awˬ nyi Viˆteuˇ Kaˬneˬdaˬ mvuhˇ miˬ lo ca chehˇ˗e ve yoˬ. Yaꞈ hkʼaˇ, liꞈ chi mvuh mvuh henˇ ve htaꞈ caˉ daꞈ ve Shaw nyi kuiˬ Taꞈ yehˬ hkʼaw kʼoˆ ve htaꞈ yawˇ gʼa gʼaw htaˇ, yawˇ liꞈ henˇ chehˇ ve awˬ lawn htaꞈ dawˇ nyi ve yoˬ. Yawˇ liꞈ chi mvuh mvuh maˇ henˇ tuˬ leuˆ yuˬ leh hkʼa maw maˇ gʼa henˇ ve kanˉ te ve hpawˇ ca henˇ˗e ve yoˬ. Yawˇ kʼoˆ ve, “chi hkʼe te htaˇ ngaˬ kanˉ haˆ haˆ gʼa te ve yoˬ. Leh ngaˬ te gaˇ ve maw jaˇ˗oˬ ve gʼuˇ suhˍ peuˍ ve gʼa te ve yoˬ.” Peuˬ hkʼawꞈ nawˉ, yawˇ Hkeh˗law˗li htaꞈ heuˆ daꞈ ve yoˬ. Yawˇ huiˉ maˬ Keˬmaˬronˇ mvuhˇ miˬ lo ca kʼawꞈ guiˇ la ve yoˬ. Oˇ ve teˇ yanˇ, yawˇ huiˉ maˬ Beˍteˍlaˆ lo ca guiˇ˗e ve yoˬ. Yawˇ huiˉ maˬ Keˬmaˬronˇ mvuhˇ miˬ lo Gʼuiˬ sha ve kanˉ ca kʼawꞈ te la tuˬ, awˬ viˉ awˬ nyi jehˬ piˇ ve yoˬ. Viˆteuˇ kʼoˆ ve, “ngaˬ hui a shaꞈ teꞈ hkʼaˇ caˇ lawꞈ dawˬ lawꞈ te˗oˬ ve pa taw, yawˇ hui jehˬ laˇ ve htaꞈ maˇ te gaˇ tehꞈ dawˇ ve awˬ nu ve awˬ hkʼaˇ maˇ cawˬ.” Hkeh˗law˗li maˇ chehˇ sha ve htawˇ, yawˇ hui Keˬmaˬronˇ mvuhˇ miˬ lo Gʼuiˬ sha ve kanˉ kʼawꞈ te tuˬ dawˇ cheˆ ve yoˬ.

Viˆteuˇ leh Hkeh˗law˗li hkʼaˬ htaˆ kaꞈ gʼuˇ suhˍ peuˍ ve te leh laiˉ gʼaˇ Liꞈ hpu hkʼaw awˬ tehˬ ve htaꞈ nyi ma pfuhˇ tuˬ ga piˇ ve yoˬ. Yawˇ hui kʼawꞈ la htaˇ hpu gʼawˆ teh˗a ve a chiˉ cawˬ ve pa taw, kanˉ maˇ te kaꞈ hpehꞈ ve yoˬ. Keˬmaˬronˇ mvuhˇ miˬ lo hkʼaˬ htaˆ kaꞈ gʼuˇ suhˍ peuˍ ve te gʼa tuˬ, yawˇ hui Kaˬneˬdaˬ mvuhˇ miˬ lo 2-3 ha pa kanˉ ca te ve yoˬ. Yawˇ huiˉ maˬ aˬ htoꞈ ma awˬ bon gʼa ve le? Yawˇ huiˉ maˬ Gʼuiˬ sha ve mvuhˇ miˬ Hto toˇ ve chaw liꞈ henˇ yehˬ (SKE) lo gʼa kʼai ve yoˬ. Hkʼaˬ htaˆ kaꞈ tcuh pui ve gʼuˇ suhˍ peuˍ ve gʼa te leh chi teˇ hkui Gʼuiˬ sha ve kanˉ hkʼaˇ yehˬ te ve hpawˇ kanˉ gʼa te ve yoˬ. Viˆteuˇ kʼoˆ ve, “ngaˬ hui a shaꞈ teꞈ hkʼaˇ hpehꞈ sha jaˇ ve htaꞈ baˬ taˉ ve pa taw, ngaˬ hui Yaˬhoˉvaˬ htaꞈ gʼaˇ hkʼa dehꞈ va la ve yoˬ. Gʼuiˬ sha ngaˬ hui htaꞈ awˬ tehˬ haꞈ shaˉ laˇ ve gʼa mawˬ ve yoˬ.”

2002 hkʼawꞈ htaˇ, awˬ viˉ awˬ nyi Aw˗len Jaˬmaˬniˬ mvuhˇ miˬ hkʼaw liꞈ tanˇ mvuh ve henˇ chehˇ ve yoˬ. Yaˇ nehˬ˗oˬ, Nawˬ ve a shaꞈ htaꞈ nawˬ hkʼaˬ hkʼe te tuˬ le? Chi ve yawˇ gʼa gʼaw htaˇ, chi yawˇ a shaꞈ teꞈ hkʼaˇ dawˇ teh ve awˬ suhˉ cawˬ tuˬ ga piˇ ve yoˬ. Leh 2006 hkʼawꞈ htaˇ, yawˇ MTS liꞈ henˇ yehˬ lo gʼa kʼai ve yoˬ. Leh yawˇ paw kuiˬ Keˬmaˬronˇ mvuhˇ miˬ lo Gʼuiˬ sha ve kanˉ te tuˬ awˬ vuiˬ gʼa ve yoˬ.

Aw˗len Keˬmaˬronˇ mvuhˇ miˬ lo kʼoꞈ˗e htaˇ, yawˇ awˬ yanˇ hkʼa biˇ maˇ te ve kanˉ gʼa ve yoˬ. Peuˬ hkʼawꞈ nawˉ, hpu gʼa maˇ jaˇ ve kanˉ kʼawꞈ gʼa ve yoˬ. Leh kanˉ chi ve yawˇ Gʼuiˬ sha ve kanˉ hkʼa dehꞈ te maˇ gʼa la ve htaꞈ htawˇ dawˇ nawˬ dawˇ cawˬ ve yoˬ. Yawˇ hkʼaˬ htaˆ kaꞈ tcuh pui ve gʼuˇ suhˍ peuˍ ve te tuˬ kuˬ piˇ htaˇ, yawˇ laꞈ haˉ haꞈ yuˬ ve yoˬ. Yawˇ ve paw leˬ shiˍ htaˇ, hpu yawˇ gʼa ve aꞈ kehˉ kʼawꞈ peꞈ laˇ˗a tehꞈ kʼoˆ piˇ ve yoˬ. Hkʼaˬ hkʼe hpehꞈ ve htawˇ, Aw˗len nyi ma maˇ pa. Yawˇ hkʼaˬ htaˆ kaꞈ tcuh pui ve gʼuˇ suhˍ peuˍ ve te ve yoˬ. Peuˬ hkʼawꞈ nawˇ, yawˇ Sa˗te˗fa˗neˍ Hpaˉlanˍ mvuhˇ miˬ lo laiˉ hkʼawꞈ chehˇ jaw ve htaꞈ heuˆ daꞈ ve yoˬ. Sa˗te˗fa˗neˍ Keˬmaˬronˇ mvuhˇ miˬ lo Gʼuiˬ sha ve kanˉ ca te htaˇ, aˬ htoꞈ ma gʼa hpuˇ ve le?

Sa˗te˗fa˗neˍ kʼoˆ ve, “ngaˬ Keˬmaˬronˇ mvuhˇ miˬ lo ca chehˇ la htaˇ, ngaˬ maˇ chehˇ sha puiˉ ve yoˬ. Yaꞈ hkʼaˇ, ngaˬ saˍ laꞈ gʼonˍ geh hkʼaˬ htaˆ kaꞈ kʼai ve yoˬ.  Leh daꞈ la ve yoˬ.” Yawˇ hui yeunˇ hkanˍ ve pa taw, awˬ bon maˇ maˇ gʼa ve yoˬ. Aw˗len kʼoˆ ve, “vuiˇ jaˇ ve Hkʼaw˗hte hkʼaˆ lo ngaˬ hui kʼai htaˇ, ngaˬ hui geh Liꞈ hpu henˇ gaˇ ve laiˉ gʼaˇ htaꞈ mawˬ daꞈ ve yoˬ. Peuˬ hkʼawꞈ nawˉ, tawˇ yaw tuˬ awˬ hkʼeun yehˇ leh yawˇ hui htaꞈ Liꞈ hpu maˍ piˇ ve yoˬ. Leh 2 gʼaˇ Baˆtiˆsaˬ haꞈ yuˬ leh awˬ viˉ awˬ nyi hpehꞈ la ve yoˬ. Leh oˇ kaˬ lo hpawnˬ daꞈ ve awˬ moˍ ehˉ teh ve yoˬ.” Sa˗te˗fa˗neˍ kʼoˆ ve, “shu uiˍ la mvuh la leh Yaˬhoˉvaˬ htaꞈ awˬ to chiˇ aꞈ piˇ tuˬ ga piˇ ve, chi hkʼe taw ha lehˬ ve teˇ ceuˬ kaꞈ maˇ cawˬ. Ngaˬ hui choˬ kaˬ lo Gʼuiˬ sha ve kanˉ te ve laiˉ pawˆ ha lehˬ jaˇ.” Chi teˇ hkui Aw˗len leh Sa˗te˗fa˗neˍ yawˇ huiˉ maˬ toˇ nyi nyi shehˍ hpaˇ te ve yoˬ.

Je˗se Iˉtaˬliˬ mvuhˇ miˬ lo saˍ laꞈ gʼonˍ henˇ chehˇ htaˇ, Baˆtiˆsaˬ haꞈ yuˬ ve yoˬ. Liꞈ hpu maˍ laˇ ve gʼuˇ suhˍ peuˍ ve teˇ ca htaꞈ yawˇ dawˇ cawˇ jaˇ. Awˬ lawn kʼo, yawˇ hui a shaꞈ teꞈ hkʼaˇ caˇ lawꞈ dawˬ lawꞈ te ve yoˬ. Yawˇ saˍ laꞈ gʼonˍ henˇ peuˬ la htaˇ, Gʼuiˬ sha ve kanˉ maˇ maˇ te gaˇ ve pa taw, hkʼaˬ htaˆ kaꞈ gʼuˇ suhˍ peuˍ ve te tuˬ liꞈ bvuhꞈ feu piˇ ve yoˬ.

Je˗se Keˬmaˬronˇ mvuhˇ miˬ lo Yaˬhoˉvaˬ ve kanˉ maˇ maˇ te gaˇ ve yoˬ. Yaꞈ hkʼaˇ, yawˇ dawˇ haˍ ve teˇ ceuˬ ceuˬ cawˬ ve yoˬ. Yawˇ kʼoˆ ve, “Keˬmaˬronˇ mvuhˇ miˬ lo kʼoꞈ˗e ve kʼo, Iˉtaˬliˬ mvuhˇ miˬ lo mvuhˇ miˬ yaˇ hpehꞈ tuˬ a hkaw˗anˬ htaꞈ baˬ taˉ ve yoˬ. Leh awˬ chawˇ leh awˬ viˉ awˬ nyi htaꞈ kaꞈ maˇ gʼa mawˬ daꞈ˗o.” Chi hkʼe hpehꞈ ve htawˇ, 2016 hkʼawꞈ Ha pa 5 maˬ htaˇ, yawˇ Keˬmaˬronˇ mvuhˇ miˬ lo kʼoꞈ˗e ve yoˬ. Peuˬ hkʼawꞈ nawˉ yawˇ Len˗oˆ htaꞈ mawˬ daꞈ leh heuˆ daꞈ ve yoˬ. Leh yawˇ hui htaꞈ Keˬmaˬronˇ mvuhˇ miˬ lo ve awˬ tsuhˆ peuˍ Aw˗yawˆ venˇ hto toˇ ve chaw loˍ jaˇ kuiˬ lo kʼai tuˬ beˆ maˍ piˇ ve yoˬ.

Aw˗yawˆ venˇ lo ve a shaꞈ teꞈ hkʼaˇ hkʼaˬ hkʼe kʼai ve le? Je˗se kʼoˆ ve, “laiˉ pawˆ kʼo, ngaˬ hui daˆ aˬ miˍ laiˉ shinˉ maˇ cawˬ ve paw taw, tawˇ yaw tuˬ awˬ hkʼeun kaꞈ yehˇ maˇ gʼa. Leh ngaˬ aˬ miˍ jeh leh awˍ kaꞈ gʼa te jawˬ ve yoˬ. Iˉ kaˆ gʼa yehˇ tuˬ mvuhˇ hpeuꞈ shu iˉ kaˆ maˇ hkʼo htaˇ gʼa hkʼo˗e ve yoˬ. Leh oˇ ve teˇ yanˇ caꞈ tuˬ leh daˆ miˉ kaꞈ gʼa yuˬ kʼai ve yoˬ.” Yawˇ hui chi hkʼe ve htaꞈ haꞈ yuˬ gʼa tuˬ aˬ htoꞈ ma ga piˇ ve le? Je˗se kʼoˆ ve, “ngaˬ hui yeunˇ hkanˍ gʼaˇ tuˬ daꞈ kehˬ ve awˬ ha hpu ga laˇ ve yoˬ. Ngaˬ hpawˇ ngaˬ huiˉ maˬ kaꞈ ga daꞈ leh awˬ gʼaˇ piˇ daꞈ ve yoˬ. Chi hkʼoˆ kaꞈ, awˬ chawˇ leh yehˬ kʼa hkʼaw ve chaw kaꞈ awˬ gʼaˇ peꞈ laˇ jaˇ. Leh laiˉ pawˆ kʼo hpu kaꞈ peꞈ laˇ ve yoˬ.”

Je˗se yawˇ paw kuiˬ mvuhˇ miˬ lo kʼoꞈ˗e leh Gʼuiˬ sha ve kanˉ ca te ve ha lehˬ˗aw laˇ? Yawˇ kʼoˆ ve, “awˬ tehˬ yoˬ, awˉ lawˉ htaˇ ngaˬ hui shoꞈ shaꞈ ve laiˉ ceuˬ gʼa hpuˇ leh awˬ gʼaˇ nuˇ ve htawˇ, ngaˬ huiˉ maˬ yeunˇ hkanˍ gʼaˇ ve yoˬ. Ngaˬ hui te ve awˬ ceuˬ cawˇ ve tehꞈ shiˍ ve yoˬ. Ngaˬ hui Yaˬhoˉvaˬ htaꞈ gʼaˇ va leh chi ngaˬ hui Yaˬhoˉvaˬ geh meuˆ daꞈ tuˬ te laˇ ve yoˬ.” Len˗oˆ leh Je˗se Gʼuiˬ sha ve mvuhˇ miˬ Hto toˇ ve chaw liꞈ henˇ yehˬ (SKE) lo gʼa kʼai ve yoˬ. Leh chi teˇ hkui hkʼaˬ htaˆ kaꞈ tcuh pui ve gʼuˇ suhˍ peuˍ ve teˇ tcuhˉ teˇ yanˇ te ve yoˬ.

Tuꞈ ve laiˉ ceuˬ gʼa hpuˇ ve htawˇ, ngaˇ ca gʼa tuˬ ngaˇ ca paˍ lehˬ gʼa haꞈ hanˉ ve yoˬ. Chi ve hkʼa shuˍ shuˍ, a shu yawˇ ve paw kuiˬ mvuhˇ miˬ lo chehˇ ve chaw awˬ tehˬ ve htaꞈ haꞈ yuˬ ve ga piˇ tuˬ, awˬ viˉ awˬ nyi chi ve teˇ hpaˍ a shaꞈ teꞈ kuiˬ hkʼaw haꞈ hanˉ jaˇ leh laiˉ ceuˬ yuˬ tanˇ ve yoˬ. Awˬ viˉ awˬ nyi chi teˇ hpaˍ kanˉ te hkeuꞈ leh Gʼuiˬ sha ve awˬ meh htaꞈ yawˇ hui haꞈ ve Gʼuiˬ sha maˇ leunˉ taˬ. (Neˍhaˍmiˆ 5:19; Heˍbrehˇ 6:10) Nawˬ shu mvuhˇ miˬ lo chehˇ leh a shu yawˇ ve mvuhˇ miˬ lo hto toˇ ve chaw loˍ jaˇ kuiˬ lo nawˬ kʼoꞈ˗e leh Gʼuiˬ sha ve kanˉ ca te hpehꞈ˗aw laˇ? Nawˬ chi hkʼe te ve kʼo, Yaˬhoˉvaˬ geh awˬ bon maˇ maˇ gʼa tuˬ yoˬ.—Tawˇ naˉ ve 10:22.