1. Maꞈhtehˍ liꞈ 28:18-20 hkʼaw kʼoˆ taˍ ve hkʼe, Yeˍsuˆ awˬ laꞈ gʼawˇ hui htaꞈ aˬ htoꞈ ma te tuˬ kʼoˆ piˇ ve le?

 Yeˍsuˆ teꞈ tu la peuˬ hkʼawꞈ nawˉ, awˬ laꞈ gʼawˇ teˇ hpaˍ Gaˍliˍlehˇ mvuhˇ miˬ hkʼaw hpawnˬ daꞈ la ve htaꞈ yawˇ gʼa mawˬ daꞈ ve yoˬ. Yawˇ yawˇ hui htaꞈ a yeˇ uiˍ ve awˬ lawn kʼoˆ piˇ tuˬ cawˬ ve yoˬ. Yawˇ ve tawˇ hkawˇ Maꞈhtehˍ liꞈ 28:18-20 hkʼaw cawˬ ve yoˬ.—Gʼaw sheˍ.

2. Awˬ lawn chi ve hkʼaw aˬ htoꞈ ma ve na hkawˇ htaꞈ ngaˬ hui teˇ geh henˇ tuˬ le?

² Chi beuꞈ teˇ co˗e Gʼuiˬ sha ve kanˉ te ve chaw htawˇ, Yeˍsuˆ ve tawˇ hkawˇ awˬ laꞈ gʼawˇ hpehꞈ la tuˬ ca te˗oˆ tehꞈ kʼoˆ laˇ ve htaꞈ gʼaꞈ te cawˇ ve yoˬ. Chi htaꞈ pa taw, Yeˍsuˆ ngaˬ hui htaꞈ peꞈ laˇ ve tawˇ hkawˇ htaꞈ caˉ daꞈ ve na hkawˇ 3 maˬ htaꞈ teˇ geh henˇ tuˬ yoˬ. (1) Gʼuiˬ sha lehˬ Liꞈ hpu henˇ ve chaw htaꞈ aˬ htoꞈ ma te tcuh gaˇ ve maˍ piˇ ve awˬ hkʼoˆ kaꞈ, ngaˬ hui aˬ htoꞈ ma gʼa te cawˇ sheˍ ve le? (2) Hkriꞈ yaˇ awˬ moˍ hkʼaw ve chaw teˇ gʼaˇ le le, Liꞈ hpu henˇ ve chaw uiˍ la mvuh la gʼa tuˬ hkʼaˬ hkʼe ga piˇ gʼa ve le? (3) Maˇ hto toˇ˗o ve chaw shu awˬ laꞈ gʼawˇ hpehꞈ la tuˬ maˍ piˇ ve kanˉ htaꞈ teˇ pawˆ kʼawꞈ te la tuˬ, ngaˬ hui hkʼaˬ hkʼe ga piˇ gʼa tuˬ le?

3. Yeˍsuˆ ve tawˇ hkawˇ hkʼa tawˍ lehˆ hkʼaˬ hkʼe kʼoˆ taˍ ve le?

³ Yeˍsuˆ ve tawˇ hkawˇ hkʼa tawˍ lehˆ kʼoˆ taˍ ve yoˬ. Yawˇ kʼoˆ ve awˬ ceuˬ htaꞈ caˉ daꞈ ve, chaw yaˇ htaꞈ ngaˬ hui gʼa maˍ piˇ ve yoˬ. Yaꞈ hkʼaˇ, ngaˬ hui a yeˇ hkʼa dehꞈ yuˬ cawˇ ve teˇ lawn cawˬ ve yoˬ. ‘Ngaˬ nawˬ hui htaꞈ piˇ taˍ ve tawˇ hkawˇ hkʼa peu˗eˬ yawˇ hui htaꞈ maˍ piˇ˗oˆ’ tehꞈ Yeˍsuˆ maˇ gʼa kʼoˆ laˇ. Yaꞈ hkʼaˇ, “ngaˬ nawˬ hui htaꞈ piˇ taˍ ve tawˇ hkawˇ hkʼa peu˗eˬ na yuˬ leh te tuˬ, yawˇ hui htaꞈ maˍ piˇ˗oˆ” tehꞈ kʼoˆ laˇ ve yoˬ. Tawˇ chi ve htaꞈ na yuˬ tuˬ Liꞈ hpu henˇ ve chaw htaꞈ maˍ piˇ htaˇ,  aˬ htoꞈ ma gʼa te cawˇ ve ngaˬ hui maˍ piˇ ve ceh maˇ heˆ. Yaꞈ hkʼaˇ, yawˇ chi hkʼe leˇ hkʼaˬ hkʼe te gʼa tuˬ, ngaˬ hui gʼa ga piˇ cawˇ ve yoˬ. (Tcuh yaˇ 8:31) Hkʼe kʼo aˬ htoꞈ ma te awˬ lawn chi a yeˇ uiˍ jaˇ ve le?

4. Yeˍsuˆ kʼoˆ taˍ ve htaꞈ Liꞈ hpu henˇ ve chaw hkʼaˬ hkʼe te gʼaꞈ te gʼa tuˬ le? Tawˇ pa haˉ kʼoˆ maˍ laˇ sheˍ.

⁴ Yeˍsuˆ kʼoˆ taˍ ve awˬ ceuˬ shu gʼaꞈ te gʼa tuˬ, ngaˬ hui hkʼaˬ hkʼe maˍ piˇ cawˇ ve le? Kaˇ gʼaꞈ tuˬ awˬ hkʼaˇ maˍ ve chaw ve tawˇ pa haˉ htaꞈ teˇ geh nyi sheˍ. Henˇ ve chaw mvuhˇ miˬ ve awˬ liˇ awˬ hkʼaˇ htaꞈ gʼaꞈ te tuˬ, awˉ lawˉ htaˇ mvuhˇ miˬ ve awˬ liˇ awˬ hkʼaˇ hkʼaˬ hkʼe kʼoˆ taˍ ve maˍ piˇ ve yoˬ. Yaꞈ hkʼaˇ, chi hkʼe ceh maˇ lawꞈ. Peuˬ hkʼawꞈ nawˉ henˇ ve chaw htaꞈ kaˇ yaꞈ kʼaw lonˉ lo gʼaꞈ kʼai tcuh leh, yawˇ kaꞈ awˬ paˇ lo mui taˍ leh henˇ taˍ ve htaꞈ hkʼaˬ hkʼe te hkʼa dehꞈ yuˬ yehˇ gʼa tuˬ, yawˇ kʼoˆ maˍ piˇ ve yoˬ. Awˬ lawn chi ngaˬ hui htaꞈ hkʼaˬ hkʼe maˍ laˇ ve le?

5. (a) Yoˇhanˬ liꞈ 14:15 leh 1 Yoˇhanˬ liꞈ 2:3 hkʼaw kʼoˆ taˍ ve hkʼe, ngaˬ hui Liꞈ hpu henˇ ve chaw htaꞈ aˬ htoꞈ ma te tuˬ maˍ piˇ cawˇ ve le? (b) Liꞈ hpu henˇ ve chaw chi hkʼe te gʼa tuˬ, ngaˬ hui ga piˇ gʼa ve aˬ htoꞈ ma ve awˬ hkʼaˇ cawˬ sheˍ ve le?

⁵ Liꞈ hpu henˇ ve chaw htaꞈ ngaˬ hui maˍ piˇ htaˇ, Gʼuiˬ sha yawˇ htaꞈ aˬ htoꞈ ma te tcuh gaˇ ve ngaˬ hui maˍ piˇ ve yoˬ. Yaꞈ hkʼaˇ, chi hkʼe ceh maˇ lawꞈ. Gʼa henˇ taˍ ve awˬ ceuˬ htaꞈ yawˇ ve a shaꞈ teꞈ kuiˬ hkʼaw hkʼaˬ hkʼe te yuˬ yehˇ gʼa tuˬ awˬ hkʼaˇ kaꞈ gʼa maˍ piˇ ve yoˬ. (Yoˇhanˬ 14:15; 1 Yoˇhanˬ 2:3 gʼaw sheˍ.) Ngaˬ hui te maˍ piˇ ve kaꞈ teˇ hkʼaˇ, Liꞈ hpu henˇ ve chaw htaꞈ ga piˇ gʼa ve yoˬ. Ngaˬ hui daꞈ ve te hkʼaˇ dawˇ hkʼaˇ htaꞈ yawˇ gʼa mawˬ htaˇ, yawˇ gʼa henˇ taˍ ve awˬ liˇ awˬ hkʼaˇ liꞈ henˇ kuiˬ, kanˉ te kuiˬ, maˇ heˆ leh gʼaˇ jehˇ htaˇ yuˬ yehˇ gʼa ve yoˬ. Liꞈ hpu hkʼaw ve awˬ liˇ awˬ hkʼaˇ htaꞈ ngaˬ hui yuˬ yehˇ htaˇ, ngaˬ hui htaꞈ haꞈ shaˉ laˇ leh cuˇ yiˍ cawˬ ve hkʼaw dawˇ cheˆ gʼa tuˬ hkʼaˬ hkʼe ga laˇ gʼa ve yawˇ htaꞈ kʼoˆ maˍ piˇ sheˍ. Chi hkʼoˆ kaꞈ, Liꞈ hpu henˇ ve chaw geh bon teˇ geh lawˬ sheˍ. Yaˬhoˉvaˬ ve daꞈ kehˬ ve awˬ ha hpu yawˇ htaꞈ beˆ maˍ piˇ tuˬ lawˬ sheˍ.—Yoˇhanˬ 16:13.

6. Liꞈ hpu henˇ ve chaw Yeˍsuˆ kʼoˆ taˍ ve htaꞈ gʼaꞈ te tuˬ, ngaˬ hui hkʼaˬ hkʼe te cawˇ sheˍ ve le?

⁶ Liꞈ hpu henˇ ve chaw Yeˍsuˆ kʼoˆ taˍ ve htaꞈ gʼaꞈ te tuˬ, ngaˬ hui hkʼaˬ hkʼe te cawˇ sheˍ ve le? Yawˇ kaꞈ shu awˬ laꞈ gʼawˇ hpehꞈ la tuˬ maˍ piˇ ve kanˉ te gaˇ tuˬ, ngaˬ hui gʼa ga piˇ ve yoˬ. Liꞈ hpu henˇ ve chaw teˇ gʼaˇ gʼaˇ kʼo hto toˇ˗e ve htaꞈ kawˆ ve yoˬ. Hkʼe te leh, yawˇ Liꞈ hpu hkʼaw awˬ tehˬ ve htaꞈ hkʼa dehꞈ shiˍ tuˬ ngaˬ hui gʼa yeunˇ hkanˍ ve yoˬ. Awˬ lawn chi ve yawˇ ve nyi ma hkʼaw gaˬ htaˇ, hto toˇ gaˇ tuˬ te piˇ ve yoˬ. Liꞈ hpu henˇ ve chaw daꞈ ve awˬ lawn sha tanˇ shu htaꞈ hto piˇ gaˇ tuˬ, ngaˬ hui hkʼaˬ hkʼe ga piˇ gʼa sheˍ ve le?

7. Liꞈ hpu henˇ ve chaw daꞈ ve awˬ lawn sha tanˇ shu htaꞈ kʼoˆ maˍ piˇ gaˇ tuˬ, ngaˬ hui hkʼaˬ hkʼe ga piˇ gʼa ve le?

⁷ Nawˬ geh Liꞈ hpu henˇ chehˇ ve chaw htaꞈ, “Liꞈ hpu hkʼaw nawˬ gʼa henˇ taˍ ve awˬ ceuˬ teˇ hpaˍ htaꞈ yuˬ yehˇ htaˇ, nawˬ ve a shaꞈ teꞈ hkʼaˇ hkʼaˬ hkʼe daꞈ la ve le? Shu kaꞈ awˬ lawn chi hkʼe ve gʼa kaˇ cawˇ ve tehꞈ nawˬ dawˇ˗aw laˇ? Leh yawˇ hui awˬ lawn chi hkʼe ve gʼa kaˇ tuˬ, nawˬ hkʼaˬ hkʼe ga piˇ gʼa tuˬ le?” tehꞈ na piˇ gʼa ve yoˬ. (Tawˇ naˉ ve 3:27; Maꞈhtehˍ 9:37, 38) Awˬ viˉ awˬ nyi, awˬ chawˇ, leh kanˉ teˇ geh te ve chaw, yawˇ hui dawˇ cawˇ tuˬ, maˍ piˇ tuˬ ve laꞈ caˉ hkʼaw cawˬ ve liꞈ kʼoˆ ehˉ teˇ hpaˍ Liꞈ hpu henˇ ve chaw htaꞈ maˍ piˇ gʼa ve yoˬ. Leh liꞈ kʼoˆ ehˉ chi ve teˇ hpaˍ Liꞈ hpu henˇ ve chaw htaꞈ piˇ leh shu nyi ma pfuhˇ tuˬ te piˇ gʼa ve, yawˇ hkʼaˬ hkʼe kʼoˆ maˍ piˇ gʼa tuˬ teˇ geh te jawˬ sheˍ. Yawˇ Baˆtiˆsaˬ maˇ haꞈ yuˬ sheˍ ve hto toˇ ve chaw hpehꞈ˗oˬ htaˇ, ngaˬ hui yawˇ geh teˇ geh hto toˇ˗e sheˍ.—Cuˇ yiˍ piˇ ve 4:9, 10; Luˉkaꞈ 6:40.

8. Aˬ htoꞈ ma te Liꞈ hpu henˇ ve chaw Yaˬhoˉvaˬ leh awˬ nu ve chaw htaꞈ haꞈ cawˇ ve le? (Awˇ ceˍ awˇ fa “ Liꞈ hpu henˇ ve chaw Gʼuiˬ sha htaꞈ haꞈ maˇ la tuˬ ga piˇ ve awˬ hkʼaˇ” htaꞈ nyi sheˍ.)

⁸ Shu Yeˍsuˆ “piˇ taˍ ve tawˇ hkawˇ hkʼa peu˗eˬ” htaꞈ na yuˬ leh te tuˬ maˍ piˇ˗oˆ tehꞈ kʼoˆ laˇ ve htaꞈ ngaˬ hui tawnˇ taˍ sheˍ. Chi lehˬ Gʼuiˬ sha htaꞈ haꞈ leh shu htaꞈ kaꞈ haꞈ ve, chi ve 2 hkawˇ lehˬ a yeˇ uiˍ jaˇ. (Maꞈhtehˍ 22:37-39) Liꞈ hpu henˇ ve chaw chi ve 2 hkawˇ htaꞈ gʼaꞈ te tuˬ ga piˇ ve kʼo, ngaˬ hui yawˇ hto toˇ gaˇ tuˬ ga piˇ ve yoˬ. Aˬ htoꞈ ma pa taw le? Awˬ lawn kʼo, yawˇ Gʼuiˬ sha leh awˬ chawˇ awˬ paˆ htaꞈ haꞈ ve kʼo, yawˇ hto toˇ˗e gaˇ tuˬ yoˬ. Liꞈ hpu henˇ ve chaw teˇ gʼaˇ gʼaˇ awˬ pon kʼo hto toˇ˗e ve lehˬ kawˆ  tuˬ hkʼe hpehꞈ ve yoˬ. Yaꞈ hkʼaˇ, yawˇ kawˆ ve htaꞈ Yaˬhoˉvaˬ ga laˇ leh awˬ meu˗eˇ awˬ meu˗eˇ maˇ kawˆ tuˬ, yawˇ yonˍ gʼa tuˬ ngaˬ hui ga piˇ gʼa ve yoˬ. (Chiˇ mvuh ve 18:1-3; Tawˇ naˉ ve 29:25) Liꞈ hpu henˇ ve chaw Yaˬhoˉvaˬ htaꞈ hkʼa dehꞈ haꞈ tuˬ ga piˇ ve, awˇ ceˍ awˇ fa chi ve hkʼaw ngaˬ hui hkʼaˬ hkʼe te tuˬ awˬ hkʼaˇ shiˍ tuˬ ga laˇ ve yoˬ. Liꞈ hpu henˇ ve chaw Gʼuiˬ sha leh awˬ nu ve chaw htaꞈ hkʼa dehꞈ haꞈ tuˬ, Hkriꞈ yaˇ awˬ moˍ hkʼaw ve awˬ viˉ awˬ nyi hkʼaˬ hkʼe te gʼa sheˍ ve le?

9. Kaˇ gʼaꞈ tuˬ henˇ ve chaw aˬ htoꞈ ma htaꞈ henˇ yuˬ gʼa ve le?

⁹ Kaˇ gʼaꞈ tuˬ awˬ hkʼaˇ henˇ ve chaw htaꞈ teˇ pawˆ kʼawꞈ dawˇ nyi sheˍ. Yawˇ htaꞈ maˍ piˇ ve chaw geh yaꞈ kʼaw lonˉ lo kaˇ gʼaꞈ kʼai htaˇ, yawˇ aˬ htoꞈ ma htaꞈ henˇ yuˬ gʼa ve le? Kaˇ gʼaꞈ ve chaw, maˍ piˇ ve chaw hkawˇ na leh shu kaˇ hkʼa dehꞈ gʼaꞈ gʼa ve htaꞈ gʼa nyi ve yoˬ. Tawˇ pa haˉ te kʼo, nyi ma daꞈ ve chaw teˇ gʼaˇ yawˇ gʼuˇ suhˍ lo, awˬ nu ve chaw teˇ gʼaˇ kaˇ haˆ kʼai gaˇ ve htaꞈ, kaˇ yaꞈ kʼaw teˇ paˉ jaw piˇ ve htaꞈ, maˍ piˇ ve chaw yawˇ shiˍ tuˬ beˆ maˍ piˇ ve yoˬ. Leh awˬ nu ve teˇ gʼaˇ kaˇ gʼaꞈ ve mehˆ maˇ gʼa hkehˇ tuˬ aˬ miˍ maˇ hehnˇ ve htaꞈ ba ve beˆ maˍ piˇ ve yoˬ. Leh henˇ ve chaw kaꞈ gʼaꞈ te tuˬ kʼoˆ maˍ piˇ ve yoˬ. Yawˇ awˬ tehˬ tehˬ kaˇ gʼaꞈ htaˇ hkʼaˬ hkʼe te tuˬ, awˬ nu ve chaw ve awˬ lawn beˆ maˍ piˇ ve yoˬ.

10. Liꞈ hpu henˇ ve chaw uiˍ la mvuh la tuˬ aˬ htoꞈ ma ga piˇ gʼa tuˬ le?

¹⁰ Chi ve hkʼa shuˍ shuˍ, Liꞈ hpu henˇ ve chaw Yaˬhoˉvaˬ ve kanˉ tanˬ te˗a yoˬ te htaˇ, Liꞈ hpu maˍ ve chaw htaꞈ ceh henˇ yuˬ ve maˇ heˆ. Yawˇ awˬ nu ve awˬ viˉ awˬ nyi daꞈ ve awˬ lawn htaꞈ kaꞈ henˇ yuˬ gʼa ve yoˬ. Hkʼe kʼo, Liꞈ hpu henˇ ve chaw uiˍ la mvuh la tuˬ aˬ htoꞈ ma ga piˇ gʼa ve le? Yawˇ hpawnˬ daꞈ kuiˬ hkʼaw kʼai ve yoˬ. Aˬ htoꞈ ma te chi hkʼe hpehꞈ ve le? Hpawnˬ daꞈ kuiˬ hkʼaw maˍ ve awˬ lawn htaꞈ pa taw, yawˇ Liꞈ hpu hkʼaw ve cuˇ yiˍ shiˍ la tuˬ, yawˇ yonˍ hkʼaˇ uiˍ la mvuh la tuˬ, leh Yaˬhoˉvaˬ htaꞈ haꞈ maˇ la tuˬ ga piˇ ve yoˬ. (Tcuh yaˇ 15:30-32) Chi hkʼoˆ kaꞈ, Liꞈ hpu henˇ ve chaw htaꞈ shuˍ daꞈ ve Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ shiˍ tuˬ, Liꞈ hpu maˍ ve chaw yawˇ htaꞈ kʼoˆ maˍ piˇ gʼa ve yoˬ. Leh Liꞈ hpu henˇ ve chaw Hkriꞈ yaˇ awˬ moˍ hkʼaw awˬ viˉ awˬ nyi daꞈ ve awˬ lawn kaꞈ mawˬ tuˬ yoˬ. Teˇ lawn lawn htaꞈ teˇ geh nyi sheˍ.

11. Liꞈ hpu henˇ ve chaw Hkriꞈ yaˇ awˬ moˍ hkʼaw a shu ve awˬ lawn htaꞈ gʼa mawˬ ve le? Chi yawˇ awˬ bon hkʼaˬ hkʼe gʼa ve le?

¹¹ Awˬ viˉ awˬ nyi mehˇ chawˇ ma yaˇ htaꞈ hpawnˬ daꞈ kuiˬ lo coˇ caˇ leh shiˍ laˬ ve htaꞈ, Liꞈ hpu henˇ ve chaw mehˇ chawˇ ma gʼa mawˬ ve yoˬ. Chi yawˇ dawˇ cawˇ tuˬ te piˇ ve yoˬ. Liꞈ hpu henˇ ve chaw awˬ nu ve teˇ gʼaˇ yawˇ coˇ caˇ leh shuˉ tawˍ ve htawˇ, maˇ tawˍ gʼaˇ sheˍ. Leh yawˇ hkʼa shuˍ awˬ viˉ awˬ nyi teˇ gʼaˇ shuˉ yeꞈ caˆ jaw ve htaꞈ shiˍ daꞈ ve yoˬ. Leh awˬ viˉ awˬ nyi chi ve teˇ gʼaˇ yawˇ Yaˬhoˉvaˬ htaꞈ haꞈ maˇ la htaˇ, yawˇ Yaˬhoˉvaˬ ve tawˇ hkawˇ gʼaꞈ te gʼa tuˬ ga laˇ ve tehꞈ kʼoˆ maˍ piˇ ve yoˬ. Leh chi yawˇ shuˉ tawˍ gʼaˇ tuˬ ga piˇ ve yoˬ. (2 Kawˇrenˍhtuˆ 7:1; Hpiˇliˇpiˆ 4:13) Peuˬ hkʼawꞈ nawˉ, awˬ viˉ awˬ nyi yawˇ hkʼaˬ hkʼe te shuˉ tawˍ gʼaˇ ve awˬ lawn kʼoˆ maˍ piˇ ve yoˬ. Yawˇ kʼoˆ ve, “ngaˬ te gʼa ve kʼo, nawˬ kaꞈ te gʼa tuˬ yoˬ.” Liꞈ hpu henˇ ve chaw chi hkʼe gʼa kaˇ htaˇ, awˬ gʼaˇ gʼa jaˇ leh yawˇ kaꞈ awˬ tehˬ awˬ na shuˉ tawˍ gʼaˇ tuˬ yoˬ tehꞈ yonˍ gʼa ve yoˬ. Liꞈ hpu henˇ ve chaw yaˇ miˇ haˉ teˇ gʼaˇ, awˬ viˉ awˬ nyi yaˇ miˇ haˉ teˇ gʼaˇ Shaˉhkiˆhkanˍ ve chaw hpehꞈ ve a shaꞈ teꞈ hkʼaˇ ha lehˬ jaˇ ve htaꞈ yawˇ nyi chehˇ ve yoˬ. Aˬ htoꞈ ma te awˬ viˉ awˬ nyi yaˇ miˇ chi hkʼe taw taw ha lehˬ ve yawˇ shiˍ gaˇ ve yoˬ.

12. Hkriꞈ yaˇ awˬ moˍ hkʼaw ve chaw teˇ gʼaˇ le le, Liꞈ hpu henˇ ve chaw htaꞈ ga piˇ tuˬ awˬ vuiˬ cawˬ ve tehꞈ, aˬ htoꞈ ma te ngaˬ hui kʼoˆ gʼa ve le?

¹² Liꞈ hpu henˇ ve chaw awˬ viˉ awˬ nyi laiˉ gʼaˇ Yaˬhoˉvaˬ ve kanˉ ka tiꞈ yeˬ ve hkʼaw te ve htaꞈ yawˇ gʼa shiˍ daꞈ htaˇ, yawˇ kaꞈ awˬ viˉ awˬ nyi hpehꞈ laˬ jaw ve awˬ lawn htaꞈ henˇ yuˬ ve yoˬ. Leh Yeˍsuˆ ve tawˇ hkawˇ Gʼuiˬ sha htaꞈ haꞈ ve leh awˬ nu ve chaw htaꞈ haꞈ ve hkʼaˬ hkʼe kʼoˆ gaˇ ve yawˇ shiˍ la ve yoˬ. (Yoˇhanˬ 13:35; 1 Tiˆmoˉseˍ 4:12) Awˬ gʼuˇ suhˍ htaˇ ngaˬ hui kʼoˆ kʼai peuˬ ve hkʼa shuˍ, Liꞈ hpu henˇ ve chaw lehˬ awˬ viˉ awˬ nyi hkʼa shuˍ awˬ lawn cawˬ ve chaw htaꞈ henˇ yuˬ gʼa ve yoˬ. Leh yawˇ kaꞈ Yeˍsuˆ ve awˬ laꞈ gʼawˇ hpehꞈ la gʼa tuˬ pa gʼa ve tehꞈ kʼoˆ ve yoˬ. (Bon maˍ ve 30:11) Hkriꞈ yaˇ awˬ moˍ hkʼaw ve awˬ viˉ awˬ nyi hkʼa peu˗eˬ, Liꞈ hpu henˇ ve chaw uiˍ la mvuh la tuˬ ga piˇ gʼa ve tehꞈ, ngaˬ hui hkʼa tawˍ lehˆ  gʼa mawˬ ve yoˬ. (Maꞈhtehˍ 5:16) Hkʼe kʼo nawˬ˗ehꞈ, ngaˬ hui geh hpawnˬ daꞈ la chehˇ ve, Liꞈ hpu henˇ ve chaw htaꞈ hkʼaˬ hkʼe te ga piˇ gʼa tuˬ le?

13-14. Tcuh yaˇ hui nyi ma luˬ ve htaꞈ Yeˍsuˆ hkʼaˬ hkʼe te piˇ ve le?

¹³ Shu awˬ laꞈ gʼawˇ hpehꞈ la gʼa tuˬ maˍ piˇ ve, Yeˍsuˆ kʼoˆ laˇ ve tawˇ hkawˇ htaꞈ, awˬ viˉ awˬ nyi maˇ hto toˇ˗o ve chaw kʼawꞈ te la tuˬ ngaˬ hui ga piˇ gaˇ ve yoˬ. Ngaˬ hui chi hkʼe te gʼa tuˬ, tcuh yaˇ hui nyi ma luˬ ve htaꞈ Yeˍsuˆ hkʼaˬ hkʼe ga piˇ ve teˇ geh nyi sheˍ.

¹⁴ Yeˍsuˆ maˇ suh sheˍ htaˇ, “awˬ laꞈ gʼawˇ hkʼa peu˗eˬ yawˇ htaꞈ baˬ taˉ leh hpaw˗e ve yoˬ.” (Maˍkuˆ 14:50; Yoˇhanˬ 16:32) Yeˍsuˆ yawˇ hui htaꞈ hkʼaˬ hkʼe te piˇ ve le? Yawˇ kʼawꞈ te tu la peuˬ hkʼawꞈ nawˉ maˇ maw sheˍ htaˇ, yawˇ awˬ laꞈ gʼawˇ teˇ hpaˍ hpaˍ htaꞈ kʼoˆ piˇ ve, ‘taˇ kawˆ. Ngaˬ ve awˬ viˉ awˬ nyi teˇ hpaˍ htaꞈ [ngaˬ kʼawꞈ teꞈ tu la peuˬ ve awˬ lawn] ca hto piˇ˗oˆ.’ (Maꞈhtehˍ 28:10) Yeˍsuˆ tcuh yaˇ hui htaꞈ dawˇ law chehˇ sheˍ ve tehꞈ ngaˬ hui gʼa mawˬ ve yoˬ. Yawˇ hui Yeˍsuˆ htaꞈ baˬ taˉ ve htawˇ, yawˇ hui htaꞈ “ngaˬ ve awˬ viˉ awˬ nyi” tehꞈ kuˬ piˇ ve yoˬ. Yaˬhoˉvaˬ hkʼa shuˍ Yeˍsuˆ ha kʼaˉ puiˉ leh venˇ baˆ hpehˇ piˇ puiˉ ve yoˬ.—2 Jawˇmawˇ 13:23.

15. Awˬ viˉ awˬ nyi maˇ hto toˇ˗o ve chaw htaꞈ ngaˬ hui hkʼaˬ hkʼe dawˇ ve le?

¹⁵ Awˬ viˉ awˬ nyi maˇ hto toˇ˗o ve chaw htaꞈ ngaˬ hui dawˇ nawˇ leh dawˇ haˍ ve yoˬ. Yawˇ hui ngaˬ hui ve awˬ viˉ awˬ nyi hpehꞈ sheˍ leh ngaˬ hui yawˇ hui htaꞈ haꞈ jaˇ. Yawˇ hui Yaˬhoˉvaˬ awˬ pon kanˉ te hkeuꞈ ve leh yawˇ htaꞈ haꞈ ve ngaˬ hui tawnˇ gʼa sheˍ. Teˇ hpaˍ kʼo, chi hkʼe laiˉ chi hkʼawꞈ te ve yoˬ. (Heˍbrehˇ 6:10) Ngaˬ hui yawˇ hui htaꞈ dawˇ nawˇ jaˇ. (Luˉkaꞈ 15:4-7) Ngaˬ hui Yeˍsuˆ ve awˬ lawn htaꞈ henˇ yuˬ leh yawˇ hui htaꞈ awˬ tehˬ awˬ na haꞈ leh dawˇ haˍ ve tehꞈ hpeuꞈ maw piˇ gaˇ ve yoˬ. Chi ve ngaˬ hui hkʼaˬ hkʼe te gʼa tuˬ le?

16. Awˬ viˉ awˬ nyi maˇ hto toˇ˗o ve chaw htaꞈ ngaˬ hui dawˇ haˍ ve tehꞈ hkʼaˬ hkʼe te hpeuꞈ maw piˇ gʼa tuˬ le?

¹⁶ Yawˇ hui hpawnˬ daꞈ la tuˬ jehˬ piˇ sheˍ. Yeˍsuˆ tcuh yaˇ hui nyi ma luˬ ve htaꞈ ga piˇ ve teˇ hkʼaˇ lehˬ, yawˇ hui hpawnˬ daꞈ la tuˬ jehˬ piˇ ve yoˬ. (Maꞈhtehˍ 28:10; 1 Kawˇrenˍhtuˆ 15:6) Chi ve hkʼa shuˍ shuˍ, awˬ viˉ awˬ nyi maˇ hto toˇ˗o ve chaw maˇ hpawnˬ daꞈ la sheˍ ve kʼo, yawˇ hui htaꞈ nuˇ nehˬ ve hkʼaw tawˇ yaw piˇ leh hpawnˬ daꞈ la tuˬ jehˬ piˇ sheˍ. Yaꞈ hkʼaˇ, yawˇ hui ngaˬ hui geh hpawnˬ daꞈ la tuˬ, laiˉ pawˆ gʼa jehˬ piˇ ve tehꞈ ngaˬ hui shiˍ cawˇ ve yoˬ. Awˬ laꞈ gʼawˇ Yeˍsuˆ kuˬ piˇ ve htaꞈ haꞈ yuˬ ve, yawˇ ha lehˬ jaˇ ve yoˬ.—Maꞈhtehˍ liꞈ 28:16 leh Luˉkaꞈ liꞈ 15:6 htaꞈ tehˆ daꞈ sheˍ.

17. Awˬ viˉ awˬ nyi maˇ hto toˇ˗o ve chaw kʼawꞈ hpawnˬ daꞈ la htaˇ, ngaˬ hui hkʼaˬ hkʼe te piˇ cawˇ ve le?

¹⁷ Yawˇ hui htaꞈ ha lehˬ ve hkʼaw haꞈ yuˬ piˇ sheˍ. Awˬ laꞈ gʼawˇ hui Yeˍsuˆ htaꞈ ca mawˬ daꞈ la htaˇ, Yeˍsuˆ yawˇ hui htaꞈ nyi ma sha tuˬ te piˇ leh yawˇ hui geh awˉ lawˉ tawˇ ca yaw˗e ve yoˬ. (Maꞈhtehˍ 28:18) Awˬ viˉ awˬ nyi maˇ hto toˇ˗o chaw ngaˬ hui geh kʼawꞈ hpawnˬ daꞈ la htaˇ, ngaˬ hui hkʼaˬ hkʼe te tuˬ le? Ngaˬ hui yawˇ hui htaꞈ tawˇ ca yaw piˇ leh yawˇ hui htaꞈ ha lehˬ ve hkʼaw haꞈ yuˬ piˇ sheˍ. Awˉ lawˉ htaˇ ngaˬ hui tawˇ hkʼaˬ hkʼe yaw piˇ tuˬ maˇ shiˍ ve pa taw, htawˇ dawˇ nawˬ dawˇ cawˬ ve yoˬ hehˉ. Awˬ tehˬ kʼo, ngaˬ hui yawˇ hui htaꞈ gʼa mawˬ daꞈ ve ha lehˬ jaˇ tehꞈ kʼoˆ piˇ gʼa ve yoˬ. Yawˇ hui yaꞈ taw leh htawˇ dawˇ nawˬ dawˇ cawˬ tuˬ ngaˬ hui maˇ te piˇ cawˇ.

18. Awˬ viˉ awˬ nyi maˇ hto toˇ˗o ve chaw htaꞈ ngaˬ hui hkʼaˬ hkʼe te awˬ gʼaˇ piˇ gʼa tuˬ le?

¹⁸ Yawˇ hui htaꞈ awˬ gʼaˇ piˇ sheˍ. Miˬ guiˬ chi hkʼoˆ teˇ kaˬ le le bon maˍ kʼai tuˬ, Yeˍsuˆ kʼoˆ piˇ ve htaꞈ yawˇ hui te maˇ gʼa taˬ tehꞈ dawˇ ve yoˬ. Yaꞈ hkʼaˇ, yawˇ yawˇ hui htaꞈ kʼoˆ piˇ ve, “ngaˬ nawˬ hui geh hkʼaˬ htaˆ kaꞈ chehˇ tuˬ yoˬ” tehꞈ awˬ gʼaˇ piˇ ve yoˬ. (Maꞈhtehˍ 28:20) Chi hkʼe te ve lehˬ, Yeˍsuˆ awˬ laꞈ gʼawˇ hui htaꞈ ga piˇ gʼa˗aw laˇ? Ga piˇ gʼa jaˇ. Peuˬ hkʼawꞈ nawˉ maˇ maw awˬ laꞈ gʼawˇ hui kaꞈ “maˍ piˇ leh bon maˍ tcuhˉ taˍ ve yoˬ.” (Tcuh yaˇ 5:42) Awˬ viˉ awˬ nyi maˇ hto toˇ˗o ve chaw kaꞈ awˬ gʼaˇ gʼa tuˬ loˍ ve yoˬ. Yawˇ hui kʼawꞈ hto toˇ tuˬ ve htaꞈ kawˆ ve yoˬ hehˉ. Yaꞈ hkʼaˇ, yawˇ hui kanˉ chi ve htaꞈ teˇ gʼaˇ tiˉ te ve maˇ heˆ tehꞈ, ngaˬ hui awˬ gʼaˇ piˇ gʼa ve yoˬ. Yawˇ hui hkʼaˬ hkʼe htaˇ kʼai gʼa tuˬ gu hehnˇ˗oˬ  ve kʼo, ngaˬ hui kaꞈ teˇ geh kʼai cawˇ ve yoˬ. Yawˇ hui kʼawꞈ hto toˇ la tuˬ ngaˬ hui ga piˇ ve kʼo, yawˇ hui ha lehˬ jaˇ leh ngaˬ hui htaꞈ awˬ bon uiˍ jaˇ kʼoˆ laˇ tuˬ yoˬ. Yawˇ hui ngaˬ hui ve awˬ viˉ awˬ nyi hpehꞈ sheˍ ve tehꞈ dawˇ ve kʼo, yawˇ hui awˬ gʼaˇ gʼa leh kʼawꞈ hto toˇ la tuˬ ga piˇ ve yoˬ. Hkriꞈ yaˇ awˬ moˍ hkʼaw ve chaw hkʼa peu˗eˬ kaꞈ ha lehˬ jaˇ tuˬ yoˬ.

19. Ngaˬ hui aˬ htoꞈ ma te tuˬ coˇ caˇ cawˇ ve le? Leh aˬ htoꞈ ma pa taw le?

¹⁹ Shu awˬ laꞈ gʼawˇ hpehꞈ la tuˬ maˍ piˇ ve kanˉ ngaˬ hui hkʼaˬ hkʼe htaˇ hkʼa gaˬ te tuˬ le? Miˬ guiˬ chi awˬ yanˇ leh htaˇ hkʼa gaˬ kanˉ chi ngaˬ hui te tuˬ yoˬ. (Maꞈhtehˍ 28:20) Yaꞈ hkʼaˇ, ngaˬ hui Yeˍsuˆ piˇ taˉ laˇ ve tawˇ hkawˇ htaꞈ peuˬ htaˇ hkʼa gaˬ te gʼa˗aw laˇ? Ngaˬ hui chi hkʼe te gaˇ ve yoˬ. “Co tiꞈ ha tiꞈ htaꞈ gʼa tuˬ awˬ pon hkʼa fuiˍ taˍ ve chaw hui lehˬ yonˍ la” tuˬ ga piˇ ve, ngaˬ hui ve awˬ yanˇ, awˬ gʼaˇ, leh ngaˬ hui te gʼa ve teˇ ceuˬ le le ha lehˬ leh te gaˇ ve yoˬ. (Tcuh yaˇ 13:48) Chi hkʼe te ve kʼo, ngaˬ hui kaꞈ Yeˍsuˆ ve awˬ lawn htaꞈ henˇ yuˬ chehˇ ve yoˬ. Yawˇ kʼoˆ jaw ve hkʼa shuˍ “ngaˬ htaꞈ peu laˇ shehˍ hpaˇ ve a loˍ htaꞈ te leh, yawˇ ve kanˉ htaꞈ te peuˬ tuˬ ve lehˬ, ngaˬ ve caˇ tuˬ hpehꞈ ve yoˬ.” (Yoˇhanˬ 4:34; 17:4) Ngaˬ hui chi hkʼe te tuˬ coˇ caˇ ve yoˬ. Gʼuiˬ sha piˇ taˉ laˇ ve kanˉ htaꞈ ngaˬ hui peuˬ htaˇ hkʼa gaˬ te gaˇ ve yoˬ. (Yoˇhanˬ 20:21) Awˬ nu ve chaw leh awˬ viˉ awˬ nyi maˇ hto toˇ˗o ve chaw, ngaˬ hui geh Gʼuiˬ sha ve kanˉ kʼawꞈ te la tcuh gaˇ ve yoˬ. Chi ve caˉ leh teˇ geh te tuˬ yeunˇ hkanˍ sheˍ.—Maꞈhtehˍ 24:13.

20. Hpiˇliˇpiˆ liꞈ 4:13 hkʼaw kʼoˆ taˍ ve hkʼe, Yeˍsuˆ piˇ taˉ laˇ ve tawˇ hkawˇ htaꞈ ngaˬ hui te peuˬ tuˬ yoˬ tehꞈ hkʼaˬ hkʼe te yonˍ gʼa ve le?

²⁰ Yeˍsuˆ piˇ taˉ laˇ ve tawˇ hkawˇ ngaˬ hui gʼaꞈ te tuˬ maˇ sha ve htawˇ, kanˉ chi ve ngaˬ hui tiˉ te ve maˇ heˆ. Yeˍsuˆ ngaˬ hui geh hkʼaˬ htaˆ kaꞈ chehˇ tuˬ yoˬ tehꞈ ka tiꞈ te taˍ laˇ ve yoˬ. Shu awˬ laꞈ gʼawˇ hpehꞈ la tuˬ maˍ piˇ htaˇ, ngaˬ hui “Gʼuiˬ sha ve kanˉ te shehˍ hpaˇ hpehꞈ” leh kanˉ chi ve “Hkriꞈ awˬ hkʼaw lo ngaˬ hui nyi ma pfuhˇ leh hteˇ lehˍ maˍ ve yoˬ.” (1 Kawˇrenˍhtuˆ 3:9; 2 Kawˇrenˍhtuˆ 2:17) Yaˬhoˉvaˬ leh Yeˍsuˆ ngaˬ hui kanˉ chi ve peuˬ htaˇ hkʼa gaˬ te gʼa tuˬ, ga laˇ ve tehꞈ ngaˬ hui yonˍ gʼa ve yoˬ. Kanˉ chi daꞈ jaˇ ve awˬ vuiˬ hpehꞈ leh ngaˬ hui gʼa te ve ha lehˬ jaˇ leh shu kaꞈ ngaˬ hui geh teˇ geh te la tuˬ ga piˇ gaˇ ve yoˬ.—Hpiˇliˇpiˆ 4:13 gʼaw sheˍ.