1. Yaˬhoˉvaˬ lehˬ yawˇ ve kanˉ te ve chaw ve bon lawˬ hkawˇ htaꞈ hkʼaˬ hkʼe hkʼawꞈ piˇ ve le?

 A shu teˇ gʼaˇ Yaˬhoˉvaˬ ga laˇ tuˬ bon lawˬ ve kʼo, chaw oˇ ve teˇ gʼaˇ ve bon lawˬ hkawˇ htaꞈ hkʼawꞈ piˇ tuˬ Gʼuiˬ sha nawˬ htaꞈ kaꞈ cuˇ ve tehꞈ nawˬ shiˍ˗aˬ laˇ? Nyi haꞈ shaˉ paˍ, ga piˇ shehˍ hpaˇ, gʼuˇ suhˍ peuˍ ve chaw, maˇ heˆ leh hto toˇ ve chaw, nawˬ yaˇ ehˉ hpehꞈ ve, chaw mawˇ hpehꞈ ve, hawˉ hkʼaˆ hpehꞈ ve, yaˇ miˇ hpehꞈ ve htawˇ maˇ kʼoˆ, Gʼuiˬ sha nawˬ htaꞈ kaꞈ yehˇ tuˬ yoˬ. Ga laˇ tuˬ loˍ ve chaw htaꞈ ga piˇ tuˬ Yaˬhoˉvaˬ lehˬ, nyi haꞈ shaˉ paˍ leh yawˇ ve kanˉ te ve ka tiꞈ yeˬ ve chaw htaꞈ cuˇ leh awˬ gʼaˇ piˇ tcuh ve yoˬ. (Kawˇlawˇsehˇ 4:11) Ngaˬ hui chi hkʼe te tuˬ Yaˬhoˉvaˬ cuˇ ve kʼo, ngaˬ hui Yaˬhoˉvaˬ leh awˬ viˉ awˬ nyi htaꞈ ga piˇ tuˬ daꞈ jaˇ ve awˬ vuiˬ gʼa ve ha lehˬ jaˇ. Naˬ beuˬ a naˍ cawˬ ve awˬ yanˇ htaˇ leh awˬ viˉ awˬ nyi mvuhˇ yeˬ mvuhˇ haw lonˉ gʼa hpuˇ ve maˇ heˆ leh fawˉ ve mehˍ ve gʼa hpuˇ ve chaw htaꞈ ngaˬ hui kaꞈ ga piˇ gʼa ve yoˬ.

2. Naˬ beuˬ a naˍ cawˬ ve awˬ yanˇ htaˇ ngaˬ hui awˬ viˉ awˬ nyi htaꞈ ga piˇ tuˬ aˬ htoꞈ ma pa taw maˇ sha ve le?

² Naˬ beuˬ a naˍ cawˬ ve awˬ yanˇ htaˇ ngaˬ hui awˬ viˉ awˬ nyi htaꞈ ga piˇ tuˬ maˇ sha ve yoˬ. Tawˇ pa haˉ te kʼo, ngaˬ hui awˬ chawˇ geh ca guiˇ˗e gaˇ ve, maˇ heˆ leh awˬ viˉ awˬ nyi hpu hkʼa dehꞈ maˇ cawˬ ve chaw ngaˬ hui ve aˉ hkʼaw lo awˍ caˇ la tuˬ jehˬ piˇ gaˇ ve htawˇ, kawˆ tuˬ cawˬ ve pa taw ngaˬ hui te maˇ gʼa ve yoˬ. Ngaˬ hui awˬ nu ve chaw htaꞈ ga piˇ gaˇ ve htawˇ, ngaˬ hui hpu hkʼa dehꞈ maˇ cawˬ ve leh yehˬ kʼa hkʼaw ve chaw kaꞈ naˬ chehˇ ve yoˬ. Awˬ viˉ awˬ nyi htaꞈ ga piˇ tuˬ maˇ sha ve htawˇ, ngaˬ hui yawˇ hui htaꞈ ga piˇ gaˇ ve yoˬ. Ngaˬ hui te gʼa ve hkʼe te ve htaꞈ Yaˬhoˉvaˬ mawˬ htaˇ ha lehˬ jaˇ ve yoˬ. (Tawˇ naˉ ve 3:27; 19:17) Awˬ viˉ awˬ nyi htaꞈ ga piˇ tuˬ ngaˬ hui aˬ htoꞈ ma te gʼa ve, chi teˇ hkui teˇ geh nyi sheˍ.

3. Deh˗siˇ chehˇ ve Hkriꞈ yaˇ awˬ moˍ hkʼaw nyi haꞈ shaˉ paˍ ve awˬ lawn ngaˬ hui htaꞈ aˬ htoꞈ ma maˍ laˇ ve le? (Yeˍraˍmiˆ 23:4)

³ Nyi haꞈ shaˉ paˍ te gʼa ve awˬ ceuˬ. Nawˬ nyi haꞈ shaˉ paˍ hpehꞈ ve kʼo,  awˬ viˉ awˬ nyi teˇ gʼaˇ le le htaꞈ shiˍ daꞈ tuˬ coˇ caˇ leh yawˇ hui geh meuˆ daꞈ sheˍ. (Yeˍraˍmiˆ 23:4 gʼaw sheˍ.) Peuˬ taˉ ve teˇ lawn hkʼaw awˬ viˉ awˬ nyi yaˇ miˇ Deh˗siˇ kʼoˆ ve, “chi awˬ gʼuˇ suhˍ htaˇ nyi haꞈ shaˉ paˍ awˬ moˍ ehˉ hkʼaw ve ngaˬ leh awˬ viˉ awˬ nyi geh hkʼaˬ htaˆ kaꞈ hto toˇ ve yoˬ. Leh ngaˬ hui laiˉ ceuˬ teˇ geh te ve yoˬ.” b Yawˇ hui chi hkʼe te ve pa taw, Deh˗siˇ ve yehˬ kʼa hkʼaw ve chaw a naˍ 19 nehˉ leh gʼa suh˗e ve pa taw nyi haꞈ shaˉ paˍ yawˇ htaꞈ ga piˇ tuˬ sha ve yoˬ.

4. Aˬ htoꞈ ma te nyi haꞈ shaˉ paˍ Deh˗siˇ htaꞈ ga piˇ gʼa ve le? Awˬ lawn chi ngaˬ hui htaꞈ aˬ htoꞈ ma maˍ laˇ ve le?

⁴ Deh˗siˇ kʼoˆ ve, “ngaˬ nyi haꞈ shaˉ paˍ hui geh meuˆ daꞈ ve yoˬ. Ngaˬ hkʼaˬ hkʼe dawˇ ve leh aˬ htoꞈ ma ve awˬ lawn htaꞈ dawˇ haˍ ve yawˇ hui htaꞈ kʼoˆ maˍ piˇ haˆ ve yoˬ.” Nyi haꞈ shaˉ paˍ awˬ pon henˇ yuˬ tuˬ aˬ htoꞈ ma le? Naˬ beuˬ a naˍ maˇ cawˬ sheˍ htaˇ kaꞈ awˬ viˉ awˬ nyi htaꞈ awˬ gʼaˇ piˇ ve yoˬ. Awˬ viˉ awˬ nyi geh meuˆ daꞈ leh awˬ chawˇ te ve yoˬ. Naˬ beuˬ a naˍ cawˬ htaˇ nawˬ awˬ viˉ awˬ nyi geh ca guiˇ˗e maˇ gʼa ve kʼo, awˬ nu ve awˬ hkʼaˇ htaꞈ cuˇ leh yawˇ hui geh caˉ daꞈ sheˍ. Deh˗siˇ kʼoˆ ve, “nyi haꞈ shaˉ paˍ ngaˬ htaꞈ awˬ gʼaˇ peꞈ laˇ tuˬ teˇ nyi ve hkʼaw ngaˬ geh awˬ hkʼeun hkʼaw laiˉ pawˆ te laˬ leh liꞈ kaꞈ bvuhꞈ laˬ ve yoˬ. Liꞈ hpu awˬ tawn oˇ ve teˇ hpaˍ htaꞈ ngaˬ hkʼa dehꞈ shiˍ ve htawˇ, yawˇ hui awˬ hkʼeun hkʼaw bvuhꞈ feu laˇ ve Liꞈ hpu awˬ tawn ngaˬ awˬ gʼaˇ gʼa jaˇ.”

5. Awˬ viˉ awˬ nyi aˬ htoꞈ ma loˍ ve nyi haꞈ shaˉ paˍ hkʼaˬ hkʼe te shiˍ gʼa tuˬ le?

⁵ Awˬ viˉ awˬ nyi aˬ htoꞈ ma loˍ ve nawˬ hkʼaˬ hkʼe te shiˍ gʼa tuˬ le? Shiˍ gʼa ve awˬ hkʼaˇ lehˬ, yawˇ hui nyi ma maˇ sha tuˬ taˇ na piˇ. (Tawˇ naˉ ve 20:5) Awˬ viˉ awˬ nyi caˇ tuˬ cawˬ˗aw laˇ? Naˆ tsuhˇ leh awˬ nu ve loˍ ve awˬ ceuˬ cawˬ˗aw laˇ? Yawˇ hui kanˉ maˇ gʼa te˗oˬ ve maˇ heˆ leh chehˇ kuiˬ yehˬ cawˬ˗aw laˇ? Yawˇ hui htaꞈ mvuhˇ miˬ hpawˇ ve ga laˇ ve gʼa tuˬ, nawˬ htaꞈ ga laˇ tcuh gaˇ ve kʼo˗ehꞈ? Awˬ viˉ awˬ nyi laiˉ gʼaˇ Deh˗siˇ loˍ ve awˬ ceuˬ ga piˇ ve yoˬ. Yaꞈ hkʼaˇ, yawˇ tuꞈ ve hkanˍ ve htaꞈ ga piˇ gʼa jaˇ ve lehˬ, yawˇ co ha hpawˇ ve yonˍ hkʼaˇ yonˍ yeˬ tuˬ nyi haꞈ shaˉ paˍ yawˇ htaꞈ ga piˇ ve yoˬ. Yawˇ hui haꞈ pehnˇ ve tehꞈ hpeuꞈ maw piˇ ve lehˬ, Liꞈ hpu htaꞈ cuˇ leh awˬ gʼaˇ piˇ ve yoˬ. Deh˗siˇ kʼoˆ ve, “nyi haꞈ shaˉ paˍ laiˉ gʼaˇ ngaˬ geh bon teˇ geh lawˬ ve yoˬ. Yawˇ hui bon lawˬ htaˇ aˬ htoꞈ ma kʼoˆ lawˬ ve ngaˬ hkʼa dehꞈ maˇ tawnˇ gʼa ve htawˇ, oˇ ve teˇ yanˇ ngaˬ hkʼaˬ hkʼe dawˇ ve htaꞈ hkʼa dehꞈ tawnˇ gʼa ve yoˬ. ‘Nawˬ teˇ gʼaˇ tiˉ chehˇ ve maˇ heˆ. Ngaˬ nawˬ geh chehˇ ve yoˬ’ tehꞈ Yaˬhoˉvaˬ ngaˬ htaꞈ kʼoˆ laˇ chehˇ ve hkʼe shuˍ ve yoˬ.”—Iˉsaˍyaˆ 41:10, 13.

6. Hkriꞈ yaˇ awˬ moˍ hkʼaw ve awˬ viˉ awˬ nyi teˇ gʼaˇ leh teˇ gʼaˇ hkʼaˬ hkʼe ga daꞈ gʼa tuˬ le? (Awˬ han htaꞈ nyi sheˍ.)

⁶ Awˬ viˉ awˬ nyi te gʼa ve awˬ ceuˬ. Nyi haꞈ shaˉ paˍ lehˬ awˬ viˉ awˬ nyi htaꞈ awˬ gʼaˇ piˇ ve a yeˇ uiˍ jaˇ tehꞈ ngaˬ hui shiˍ ve yoˬ. Yaꞈ hkʼaˇ, Yaˬhoˉvaˬ lehˬ ngaˬ hui teˇ gʼaˇ le le awˬ gʼaˇ piˇ daꞈ leh ga daꞈ tcuh gaˇ ve yoˬ. (Gaˍlaˍtiˆ 6:10) Awˬ viˉ awˬ nyi naˬ chehˇ htaˇ ngaˬ  hui yawˇ htaꞈ haꞈ ve tehꞈ hpeuꞈ maw piˇ tuˬ, teˇ ceuˬ ceuˬ piˇ ve kʼo yawˇ awˬ gʼaˇ gʼa jaˇ tuˬ yoˬ. Yaˇ ehˉ teˇ hpaˍ awˬ pon kʼo awˬ viˉ awˬ nyi htaꞈ awˬ gʼaˇ piˇ tuˬ, liꞈ chi suhˉ˗ehˬ bvuhꞈ piˇ ve maˇ heˆ leh awˬ han shawehˇ piˇ kaꞈ gʼa ve yoˬ. Yaˇ nehˬ teˇ hpaˍ kʼo awˬ viˉ awˬ nyi awˬ pon loˍ ve awˬ ceuˬ te piˇ ve maˇ heˆ leh mawˇ ca vuiˬ piˇ kaꞈ gʼa ve yoˬ. Awˬ viˉ awˬ nyi hkʼaˬ ve teˇ gʼaˇ htawˇ maˇ kʼoˆ, naˬ ve kʼo caˇ tuˬ te leh ca yuˬ piˇ gʼa ve yoˬ. Naˬ beuˬ a naˍ cawˬ ve awˬ yanˇ htaˇ, Hkriꞈ yaˇ awˬ moˍ hkʼaw ve chaw teˇ gʼaˇ le le kaꞈ awˬ gʼaˇ gʼa gaˇ ve yoˬ. Hpawnˬ daꞈ ve teˇ gʼaˇ leh teˇ gʼaˇ mawˬ daꞈ ve maˇ heˆ leh awn˗laiˉ hkʼaw te ve htawˇ, hpehˇ peuˬ hkʼawꞈ nawˉ awˬ viˉ awˬ nyi geh tawˇ a ciˉ yaw daꞈ ve kʼo, yawˇ hui ha lehˬ jaˇ tuˬ yoˬ. Nyi haꞈ shaˉ paˍ kaꞈ awˬ gʼaˇ gʼa gaˇ ve yoˬ. Naˬ beuˬ a naˍ cawˬ ve awˬ yanˇ htaˇ nyi haꞈ shaˉ paˍ kanˉ maˇ jaˇ ve htaꞈ awˬ viˉ awˬ nyi teˇ hpaˍ liꞈ chi suhˉ˗ehˬ bvuhꞈ leh awˬ bon uiˍ jaˇ tehꞈ kʼoˆ piˇ ve yoˬ. Ngaˬ hui “teˇ gʼaˇ leh teˇ gʼaˇ awˬ gʼaˇ piˇ daꞈ leh, teˇ gʼaˇ leh teˇ gʼaˇ uiˍ la yeˬ la tuˬ te daꞈ” ve kʼo, Hkriꞈ yaˇ awˬ moˍ hkʼaw ve chaw teˇ gʼaˇ le le ha lehˬ jaˇ tuˬ yoˬ!—1 Hteˇsaˍlawˇniˆ 5:11.

7. Mvuhˇ yeˬ mvuhˇ haw lonˉ ngaˬ hui ve a shaꞈ teꞈ hkʼaˇ hkʼaˬ hkʼe hpehꞈ tuˬ te laˇ ve le?

⁷ Mvuhˇ yeˬ mvuhˇ haw lonˉ ngaˬ hui ve a shaꞈ teꞈ hkʼaˇ hkʼaw mehˆ teˇ miꞈ tiˉ luˬ kʼai tuˬ te laˇ ve yoˬ. Laiˉ gʼaˇ teꞈ chiˉ maˇ leuˉ˗oˬ ve, yehˬ paˆ˗e ve, maˇ heˆ leh yawˇ hui haꞈ ve chaw suh˗e ve yoˬ. Ngaˬ hui ve awˬ viˉ awˬ nyi kaꞈ chi hkʼe gʼa hpuˇ ve yoˬ. Leh yawˇ hui htaꞈ ga piˇ tuˬ ngaˬ hui hkʼaˬ hkʼe te gʼa ve le?

8. Mvuhˇ yeˬ mvuhˇ haw lonˉ maˇ hpehꞈ la sheˍ htaˇ nyi haꞈ shaˉ paˍ leh yehˬ shehˍ hpaˇ hkʼaˬ hkʼe te gʼa ve le?

⁸ Nyi haꞈ shaˉ paˍ te gʼa ve awˬ ceuˬ. Nyi haꞈ shaˉ paˍ hpehꞈ ve chaw˗oˬ, mvuhˇ yeˬ mvuhˇ haw lonˉ maˇ hpehꞈ la sheˍ htaˇ, awˬ viˉ awˬ nyi gu hehnˇ taˍ tuˬ ga piˇ sheˍ. Hkriꞈ yaˇ awˬ moˍ hkʼaw ve chaw teˇ gʼaˇ le le kawˆ ve maˇ cawˬ tuˬ leh nyi haꞈ shaˉ paˍ htaꞈ caˉ daꞈ gʼa tuˬ hkʼaˬ hkʼe gʼa te cawˇ ve htaꞈ shiˍ tuˬ te sheˍ. Peuˬ taˉ ve teˇ lawn hkʼaw ve Ma˗ga˗lehˆ kʼawꞈ kʼoˆ ve, “Hkriꞈ yaˇ awˬ moˍ loˍ ve awˬ ceuˬ sheh kʼai htaˇ, heh puiˉ hkʼaw lo aˍ miˬ toꞈ chehˇ sheˍ ve tehꞈ nyi haꞈ shaˉ paˍ ngaˬ hui htaꞈ shaˍ tiꞈ piˇ laˇ ve yoˬ. Yawˇ hui kʼoˆ ve, mvuhˇ miˬ kanˉ te paˍ ngaˬ hui htaꞈ hpaw˗e tehꞈ kʼoˆ laˇ ve maˇ heˆ leh aˍ miˬ gʼaˇ hteꞈ toꞈ laˬ ve htaꞈ ngaˬ hui mawˬ htaˇ haˆ gʼa hpaw˗e cawˇ ve yoˬ.” Beˆ maˍ laˇ ve chi awˬ yanˇ htaꞈ cawˇ daꞈ jaˇ. Awˬ lawn kʼo, 5 shinˉ peuˬ hkʼawꞈ nawˉ, heh puiˉ hkʼaw lo aˍ miˬ toꞈ ve hehnˇ jaˇ. Chi hkʼoˆ kaꞈ, chi hkʼe gʼa hpuˇ htaˇ yehˬ kʼa hkʼaw ve chaw teˇ gʼaˇ leh teˇ gʼaˇ aˬ htoꞈ ma te tuˬ, yehˬ kʼa hkʼaw oˉ kʼoˍ pui htaˇ yaw daꞈ cawˇ ve yoˬ. Nawˬ leh yaˇ hkʼa dehꞈ gu hehnˇ taˍ ve kʼo, heh puiˉ hkʼaw lo aˍ miˬ toꞈ laˬ ve gʼa hpuˇ htaˇ hkʼe taw maˇ dawˇ haˍ jaˇ leh nyi ma gawˬ lehˍ cawˬ ve yoˬ.

9. Heh puiˉ hkʼaw lo aˍ miˬ toꞈ laˬ ve htaꞈ maˇ gʼa hpuˇ sheˍ htaˇ leh gʼa hpuˇ peuˬ hkʼawꞈ nawˉ nyi haꞈ shaˉ paˍ aˬ htoꞈ ma te cawˇ ve le?

⁹ Hto toˇ ve awˬ moˍ ehˉ hkʼaw nawˬ nyi haꞈ shaˉ paˍ hpehꞈ ve kʼo, heh puiˉ hkʼaw lo aˍ miˬ toꞈ laˬ ve gʼa hpuˇ htaˇ, awˬ viˉ awˬ nyi htaꞈ laꞈ haˉ caˉ daꞈ gʼa tuˬ nawˬ yawˇ hui ve tawˇ yaw tuˬ nanˍ baꞈ leh chehˇ kuiˬ nanˍ baꞈ gʼa cawˬ ve yoˬ. Hpehꞈ la peuˬ hkʼawꞈ nawˉ yawˇ hui ve tawˇ yaw tuˬ nanˍ baꞈ leh chehˇ kuiˬ nanˍ baꞈ ca ve taˇ te. Mvuhˇ yeˬ mvuhˇ haw lonˉ gʼa hpuˇ htaˇ, teˇ gʼaˇ leh teˇ gʼaˇ loˍ ve htaꞈ ga piˇ tuˬ nawˬ hto toˇ ve chaw teˇ gʼaˇ le le htaꞈ caˉ daꞈ gʼa tuˬ te cawˇ ve yoˬ. Leh nyi haꞈ shaˉ paˍ awˬ moˍ hkʼaw caˉ daꞈ paˍ htaꞈ awˬ lawn awˬ tanˇ shiˍ tcuh piˇ sheˍ. Peuˬ hkʼawꞈ nawˉ yawˇ kaꞈ toˇ nyi shehˍ hpaˇ htaꞈ caˉ daꞈ tuˬ yoˬ. Nyi haꞈ shaˉ paˍ teˇ geh hkʼa dehꞈ ga daꞈ ve kʼo, yawˇ hui awˬ viˉ awˬ nyi htaꞈ ga piˇ gʼa jaˇ tuˬ yoˬ. Ma˗ga˗lehˆ ve awˬ lawn htaꞈ dawˇ nyi sheˍ. Heh puiˉ hkʼaw lo aˍ miˬ toꞈ laˬ ve peuˬ hkʼawꞈ nawˉ toˇ nyi shehˍ hpaˇ lehˬ, Hkriꞈ yaˇ awˬ moˍ hkʼaw nyi haꞈ shaˉ paˍ teˇ gʼaˇ leh teˇ gʼaˇ htaꞈ caˉ daꞈ tuˬ 36 naˍ riˍ awˬ yanˇ yehˇ ve pa taw maˇ gʼa zuhꞈ. Yawˇ hui lehˬ awˬ viˉ awˬ nyi 450 gʼaˇ chehˇ kuiˬ cawˬ tuˬ ga piˇ ve yoˬ.—2 Kawˇrenˍhtuˆ 11:27.

10. Nyi haꞈ shaˉ paˍ lehˬ awˬ viˉ awˬ nyi htaꞈ awˬ gʼaˇ piˇ ve aˬ htoꞈ ma te a yeˇ uiˍ jaˇ tehꞈ shawˍ cawˇ ve le? (Yoˇhanˬ 21:15)

¹⁰ Chi hkʼoˆ kaꞈ, nyi haꞈ shaˉ paˍ lehˬ awˬ viˉ awˬ nyi htaꞈ awˬ gʼaˇ gʼa piˇ cawˇ ve yoˬ. Yawˇ hui awˬ viˉ awˬ nyi htaꞈ awˬ gʼaˇ piˇ tuˬ Liꞈ hpu htaꞈ cuˇ leh awˬ viˉ awˬ nyi dawˇ haˍ ve htaꞈ yeunˇ hkanˍ gʼaˇ tuˬ ga piˇ ve yoˬ. (1 Peˍtruˆ 5:2) Mvuhˇ yeˬ mvuhˇ haw lonˉ gʼa hpuˇ htaˇ, awˬ viˉ awˬ nyi teˇ gʼaˇ le le kawˆ tuˬ maˇ cawˬ ve, caˇ tuˬ cawˬ ve, aˉ poꞈ veuꞈ kʼaˇ leh haˉ kuiˬ cawˬ ve, tehꞈ nyi  haꞈ shaˉ paˍ gʼa ga piˇ cawˇ ve yoˬ. Yaꞈ hkʼaˇ, laiˉ ha pa peuˬ hkʼawꞈ nawˉ, awˬ viˉ awˬ nyi lehˬ Liꞈ hpu hkʼaw ve awˬ gʼaˇ peꞈ laˇ tuˬ loˍ leh yawˇ hui dawˇ haˍ ve htaꞈ yeunˇ hkanˍ gʼaˇ tuˬ ga laˇ tuˬ kaꞈ loˍ ve yoˬ. (Yoˇhanˬ 21:15 gʼaw sheˍ.) Awˬ tcuhˆ puiˍ lo ve kawˍmiˍtiˍ hkʼaw kanˉ te chehˇ ve Heh˗lo lehˬ awˬ viˉ awˬ nyi mvuhˇ yeˬ mvuhˇ haw lonˉ gʼa hpuˇ chehˇ ve chaw htaꞈ ga piˇ tuˬ kʼai ve yoˬ. Yawˇ kʼoˆ ve, “chi awˬ yanˇ gʼa yehˇ ve yoˬ. Yawˇ hui ve a shaꞈ teꞈ hkʼaˇ hkʼaw awˉ lawˉ htaˇ hkʼe leˇ awˬ meu˗eˇ awˬ meu˗eˇ hpehꞈ la˗oˬ ve htawˇ, yawˇ hui haꞈ ve chaw suh˗e ve, mawˇ jeˬ luˬ kʼai ve, leh yawˇ hui gʼa hpuˇ ve awˬ ceuˬ htaꞈ maˇ leunˇ gʼa sheˍ ve tehꞈ kʼoˆ ve yoˬ. Maˇ maw maˇ maw kʼo yawˇ hui dawˇ haˍ ve leh nyi ma luˬ ve cawˬ sheˍ ve yoˬ. Yaꞈ hkʼaˇ, yawˇ hui yonˍ hkʼaˇ maˇ yonˍ yeˬ ve tehꞈ kʼoˆ gaˇ ve maˇ heˆ.”

11. Mvuhˇ yeˬ mvuhˇ haw lonˉ gʼa hpuˇ ve yehˬ kʼa htaꞈ caˉ leh hkʼaˬ hkʼe ga piˇ cawˇ ve le?

¹¹ Liꞈ hpu hkʼaw “hawˬ ve chaw hui geh teˇ geh hawˬ˗oꞈ” tehꞈ kʼoˆ ve htaꞈ nyi haꞈ shaˉ paˍ yuˬ yehˇ ve yoˬ. (Roˉmaꞈ 12:15) Mvuhˇ yeˬ mvuhˇ haw lonˉ gʼa hpuˇ ve awˬ viˉ awˬ nyi lehˬ, Yaˬhoˉvaˬ leh awˬ viˉ awˬ nyi hkʼaˬ htaˆ kaꞈ yawˇ hui htaꞈ haꞈ ve tehꞈ yonˍ gʼa tuˬ nyi haꞈ shaˉ paˍ gʼa ga piˇ ve yoˬ. Mvuhˇ yeˬ mvuhˇ haw lonˉ gʼa hpuˇ ve teˇ yehˬ kʼa leh teˇ yehˬ kʼa Hkriꞈ yaˇ ve awˬ vuiˬ te gʼa tuˬ nyi haꞈ shaˉ paˍ gʼa ga piˇ ve yoˬ. Tawˇ pa haˉ te kʼo, bon lawˬ ve, a shu yawˇ hkʼaˇ yawˇ Liꞈ hpu henˇ ve, hpawnˬ daꞈ˗e ve leh hto toˇ ve, chi teˇ hpaˍ te gʼa tuˬ gʼa ga piˇ ve yoˬ. Chi hkʼoˆ kaꞈ, mvuhˇ yeˬ mvuhˇ haw lonˉ teˇ ceuˬ le le htaꞈ te luˬ laˇ maˇ gʼa ve tehꞈ yaˇ gʼa shiˍ tuˬ, awˬ pa awˬ e yaˇ htaꞈ maˍ piˇ tuˬ nyi haꞈ shaˉ paˍ beˆ maˍ piˇ ve yoˬ. Tawˇ pa haˉ te kʼo, awˬ pa awˬ e lehˬ yaˇ teˇ hpaˍ Yaˬhoˉvaˬ yawˇ hui ve awˬ chawˇ hpehꞈ leh, yawˇ hkʼaˬ htaˆ kaꞈ yawˇ hui geh chehˇ ve tehꞈ shiˍ tuˬ kʼoˆ piˇ ve yoˬ. Awˬ pa awˬ e yaˇ teˇ hpaˍ htaꞈ kʼoˆ piˇ ve, yawˇ hui awˬ viˉ awˬ nyi haꞈ daꞈ ve leh ga daꞈ ve awˬ moˍ hkʼaw gʼa chehˇ ve daꞈ jaˇ.—1 Peˍtruˆ 2:17.

12. Mvuhˇ yeˬ mvuhˇ haw lonˉ gʼa hpuˇ ve chaw htaꞈ awˬ viˉ awˬ nyi aˬ htoꞈ ma ga piˇ gʼa ve le? (Awˬ han htaꞈ nyi sheˍ.)

¹² Awˬ viˉ awˬ nyi te gʼa ve awˬ ceuˬ. Nawˬ chehˇ kuiˬ maˇ vuiˇ maˇ neˇ kuiˬ lo mvuhˇ yeˬ mvuhˇ haw lonˉ gʼa hpuˇ ve kʼo, nawˬ aˬ htoꞈ ma ga piˇ gʼa ve nyi haꞈ shaˉ paˍ htaꞈ na nyi piˇ gʼa ve yoˬ. Awˬ viˉ awˬ nyi mvuhˇ yeˬ mvuhˇ haw lonˉ gʼa hpuˇ ve chaw htaꞈ yawˇ hui teˇ hkui teˇ yanˇ nawˬ ve yehˬ lo haˉ la tuˬ kʼoˆ piˇ ve maˇ heˆ leh mvuhˇ yeˬ mvuhˇ haw hpawˇ ga piˇ ve awˬ viˉ awˬ nyi htaꞈ kaꞈ haˉ la tuˬ kʼoˆ piˇ gʼa ve yoˬ. Leh awˬ viˉ awˬ nyi mvuhˇ yeˬ mvuhˇ haw lonˉ gʼa hpuˇ ve chaw htaꞈ caˇ tuˬ maˇ heˆ leh loˍ ve awˬ ceuˬ kaꞈ piˇ gʼa ve yoˬ. Yaꞈ hkʼaˇ, vuiˇ jaˇ kuiˬ lo mvuhˇ yeˬ mvuhˇ haw lonˉ gʼa hpuˇ leh nawˬ ga piˇ maˇ gʼa ve kʼo, nawˬ yawˇ hui awˬ pon bon lawˬ piˇ gʼa ve yoˬ. (2 Kawˇrenˍhtuˆ 1:8-11) Leh miˬ guiˬ hkʼa peu˗eˬ hkʼoˆ kanˉ awˬ pon nawˬ hpu tanˇ tanˇ piˇ gʼa ve yoˬ. (2 Kawˇrenˍhtuˆ 8:2-5) Maˇ heˆ leh mvuhˇ yeˬ mvuhˇ haw lonˉ gʼa hpuˇ ve awˬ ti lo nawˬ kʼai gʼa ve kʼo, awˬ lawn chi htaꞈ caˉ daꞈ ve nyi haꞈ shaˉ paˍ htaꞈ na piˇ sheˍ. Nawˬ te gʼa ve hkʼe hkʼa dehꞈ ga piˇ gʼa tuˬ, nawˬ gʼa kʼai ve kʼo awˬ lawn awˉ lawˉ gʼa henˇ sheˍ ve yoˬ.

13. Ngaˬ hui ve kanˉ htaꞈ tawˍ laˇ ve mvuhˇ miˬ hkʼaw awˬ viˉ awˬ nyi gʼa chehˇ ve kʼo, shoꞈ shaꞈ ve aˬ htoꞈ ma gʼa hpuˇ ve le?

¹³ Ngaˬ hui ve kanˉ htaꞈ tawˍ laˇ ve mvuhˇ miˬ hkʼaw awˬ viˉ awˬ nyi chehˇ ve chaw htaꞈ fawˉ mehˍ piˇ jaˇ leh yawˇ hui ve a shaꞈ teꞈ hkʼaˇ shoꞈ shaꞈ jaˇ tuˬ te piˇ ve yoˬ. Chi hkʼoˆ kaꞈ, hpu hpawˇ, naˬ ve, leh yawˇ hui haꞈ ve chaw suh˗e ve, chi ve teˇ hpaˍ gʼa hpuˇ ve yoˬ. Yaꞈ hkʼaˇ, ngaˬ hui ve kanˉ htaꞈ tawˍ laˇ ve mvuhˇ miˬ hkʼaw yawˇ hui gʼa chehˇ ve kʼo, nyi haꞈ shaˉ paˍ lehˬ awˬ viˉ awˬ nyi htaꞈ awˬ gʼaˇ ca piˇ˗e tuˬ kʼai maˇ gʼa. Peuˬ taˉ ve teˇ lawn hkʼaw nyi haꞈ shaˉ paˍ A˗deˬ kaꞈ chi hkʼe gʼa hpuˇ ve yoˬ. Yawˇ geh hto toˇ ve awˬ moˍ ehˉ hkʼaw chehˇ ve awˬ viˉ awˬ nyi yaˇ miˇ teˇ gʼaˇ hpu yehˇ tuˬ maˇ cawˬ ve yoˬ. Yawˇ kaˇ hpawˇ caˉ daꞈ ve maˇ dawˇ maˇ gaˇ gʼa hpuˇ leh laiˉ pawˆ gʼa shawˆ hpeꞈ ve pa taw kanˉ te maˇ gʼa ve yoˬ. Yawˇ lehˬ ngaˬ hui ve kanˉ htaꞈ tawˍ laˇ ve mvuhˇ miˬ hkʼaw gʼa chehˇ ve htawˇ, a naˍ 19 ve awˬ yanˇ htaˇ, awˬ viˉ awˬ nyi coˇ caˇ leh yawˇ htaꞈ ga piˇ ve yoˬ. Yawˇ aˬ htoꞈ ma loˍ ve Yaˬhoˉvaˬ shiˍ leh nyi haꞈ shaˉ piˇ ve yoˬ.

14. Nyi haꞈ shaˉ paˍ lehˬ Yaˬhoˉvaˬ htaꞈ gʼaˇ va ve tehꞈ daꞈ ve henˇ tuˬ hkʼaˬ hkʼe hpehꞈ ve le?

¹⁴ Nyi haꞈ shaˉ paˍ te gʼa ve awˬ ceuˬ. Awˬ viˉ awˬ nyi A˗deˬ lehˬ Yaˬhoˉvaˬ ga laˇ tuˬ bon lawˬ leh yawˇ te gʼa ve awˬ ceuˬ htaꞈ coˇ caˇ leh te ve yoˬ. Leh Yaˬhoˉvaˬ yawˇ ve bon lawˬ hkawˇ htaꞈ hkʼaˬ hkʼe hkʼawꞈ piˇ ve le? A˗deˬ awˬ viˉ awˬ nyi geh ca guiˇ˗e maˇ gʼa ve pa taw, Yaˬhoˉvaˬ awˬ nu ve awˬ viˉ awˬ nyi htaꞈ cuˇ leh yaˇ miˇ chi teˇ gʼaˇ htaꞈ ga piˇ tcuh ve yoˬ. Awˬ viˉ awˬ nyi teˇ hpaˍ kʼo yawˇ htaꞈ saˍ laꞈ gʼonˍ awˬ yanˇ tinˍ piˇ taˍ ve geh shiˍ kʼai piˇ ve yoˬ. Teˇ hpaˍ kʼo yawˇ htaꞈ hpu ga piˇ ve yoˬ. Awˬ viˉ awˬ nyi chi teˇ hpaˍ coˇ caˇ ve, haꞈ hanˉ ve, leh teˇ moˍ tiˉ hpehꞈ ve htaꞈ Yaˬhoˉvaˬ awˬ bon naꞈ piˇ ve yoˬ. (Heˍbrehˇ 13:16) Ngaˬ hui ve kanˉ htaꞈ tawˍ laˇ ve mvuhˇ miˬ hkʼaw nawˬ hui nyi haꞈ shaˉ paˍ hpehꞈ ve kʼo, nawˬ te maˇ gʼa ve awˬ ceuˬ awˬ nu ve awˬ viˉ awˬ nyi ga laˇ tuˬ lawˬ sheˍ. (Yeˍraˍmiˆ 36:5, 6) A yeˇ uiˍ jaˇ ve lehˬ nawˬ Yaˬhoˉvaˬ htaꞈ gʼaˇ va leh nawˬ awˬ viˉ awˬ nyi htaꞈ hkʼa dehꞈ ga piˇ tuˬ Yaˬhoˉvaˬ ga laˇ gʼa ve yoˬ.

15. Ngaˬ hui fawˉ ve mehˍ ve gʼa hpuˇ htaˇ awˬ viˉ awˬ nyi geh teˇ moˍ tiˉ hkʼaˬ hkʼe te hpehꞈ gʼa tuˬ le?

¹⁵ Awˬ viˉ awˬ nyi te gʼa ve awˬ ceuˬ. Ngaˬ hui ve kanˉ htaꞈ tawˍ laˇ ve awˬ yanˇ htaˇ, laiˉ gʼaˇ htaꞈ mawˬ daꞈ maˇ gʼa ve yoˬ. chi htaꞈ pa taw a yeˇ uiˍ jaˇ ve lehˬ, awˬ viˉ awˬ nyi teˇ gʼaˇ le le gʼa haꞈ daꞈ cawˇ ve yoˬ. Ngaˬ hui tawˍ daꞈ chehˇ ve lehˬ Saˍtanˍ yoˬ. Awˬ viˉ awˬ nyi maˇ heˆ. Awˬ viˉ awˬ nyi yaꞈ kuiˬ htaꞈ taˇ nyi. Nawˬ hui maˇ na gʼa daꞈ ve awˬ ceuˬ cawˬ ve kʼo laꞈ haˉ gu sheˍ. (Tawˇ naˉ ve 19:11; Eˇfeˇsuꞈ 4:26) Teˇ gʼaˇ leh teˇ gʼaˇ ga daꞈ tuˬ awˉ lawˉ te sheˍ. (Tiˇtuˆ 3:14) Kaˇ hpawˇ caˉ daꞈ ve maˇ dawˇ maˇ gaˇ gʼa hpuˇ ve awˬ viˉ awˬ nyi yaˇ miˇ ve awˬ lawn lehˬ, awˬ nu ve awˬ viˉ awˬ nyi yawˇ htaꞈ ga piˇ ve pa taw awˬ bon gʼa jaˇ. Hto toˇ ve awˬ moˍ ehˉ hkʼaw awˬ viˉ awˬ nyi teˇ gʼaˇ le le haꞈ daꞈ leh  meuˆ daꞈ jaˇ ve pa taw, teˇ yehˬ kʼa hkʼaw ve chaw hkʼe hpehꞈ ve yoˬ.—Chiˇ mvuh ve 133:1.

16. Kawˇlawˇsehˇ liꞈ 4:3, 18 hkʼaw kʼoˆ taˍ ve hkʼe, fawˉ ve mehˍ ve gʼa hpuˇ ve awˬ viˉ awˬ nyi htaꞈ ngaˬ hui hkʼaˬ hkʼe ga piˇ gʼa tuˬ le?

¹⁶ Awˬ viˉ awˬ nyi laiˉ shehnˉ gʼaˇ mvuhˇ miˬ uˉ peunˍ paˍ ngaˬ hui ve kanˉ htaꞈ tawˍ laˇ kuiˬ lo yawˇ hui Yaˬhoˉvaˬ ve kanˉ te ve yoˬ. Teˇ hpaˍ kʼo yonˍ ve htaꞈ pa taw htawnˍ hkʼaw lo gʼa chehˇ ve yoˬ. Ngaˬ hui yawˇ hui awˬ pon leh yehˬ kʼa hkʼaw ve chaw awˬ pon bon lawˬ piˇ gʼa ve yoˬ. Awˬ viˉ awˬ nyi chi ve teˇ hpaˍ htaꞈ yonˍ hkʼaˇ hpawˇ, awˬ to hpawˇ, leh mvuhˇ miˬ awˬ liˇ hpawˇ, ca ga piˇ ve kawˆ tuˬ cawˬ ve chaw awˬ pon ngaˬ hui bon lawˬ piˇ gʼa ve yoˬ. c (Kawˇlawˇsehˇ 4:3, 18 gʼaw sheˍ.) Nawˬ ve bon lawˬ hkawˇ lehˬ nawˬ dawˇ taˍ ve aꞈ kehˉ kanˇ paˆ cawˬ jaˇ!—2 Hteˇsaˍlawˇniˆ 3:1, 2; 1 Tiˆmoˉseˍ 2:1, 2.

17. Fawˉ ve mehˍ ve gʼa hpuˇ htaˇ yeunˇ hkanˍ gʼaˇ tuˬ chi teˇ hkui kaꞈ hkʼaˬ hkʼe gu hehnˇ taˍ gʼa ve le?

¹⁷ Fawˉ ve mehˍ ve gʼa hpuˇ htaˇ yeunˇ hkanˍ gʼaˇ tuˬ nawˬ leh yehˬ kʼa hkʼaw ve chaw chi teˇ hkui kaꞈ gu hehnˇ taˍ gʼa ve yoˬ. (Tcuh yaˇ 14:22) Maˇ daꞈ ve awˬ ceuˬ gʼa hpuˇ la tuˬ ve htaꞈ ceh tiˉ taˇ dawˇ nyi chehˇ. Nawˬ leh yaˇ Yaˬhoˉvaˬ geh hkʼa dehꞈ meuˆ daꞈ gʼa tuˬ ve htaꞈ a yeˇ yuˬ sheˍ. Nawˬ dawˇ haˍ ve cawˬ htaˇ, nawˬ hkʼaˬ hkʼe dawˇ ve awˬ ceuˬ bon lawˬ ve hkʼaw Gʼuiˬ sha htaꞈ kʼoˆ piˇ sheˍ. (Chiˇ mvuh ve 62:7, 8) Leh Yaˬhoˉvaˬ htaꞈ gʼaˇ va gʼa tuˬ aˬ htoꞈ ma awˬ hkʼaˇ cawˬ ve nawˬ ve yehˬ kʼa hkʼaw ve chaw geh yaw daꞈ sheˍ. d Mvuhˇ yeˬ mvuhˇ haw lonˉ gʼa hpuˇ htaˇ gʼa ponˬ tuˬ, nawˬ ve yaˇ htaꞈ gu hehnˇ taˍ piˇ ve hkʼa shuˍ, fawˉ ve mehˍ ve gʼa hpuˇ htaˇ gʼa ponˬ tuˬ, nawˬ ve yaˇ htaꞈ gu hehnˇ taˍ piˇ gʼa ve yoˬ. Yaˇ Yaˬhoˉvaˬ htaꞈ gʼaˇ va tuˬ nawˬ maˍ piˇ ve pa taw, yaˇ haꞈ hanˉ leh maˇ kawˆ tuˬ yoˬ.

18. Awˬ gʼuˇ suhˍ hpawˇ ngaˬ hui htaꞈ law chehˇ ve aˬ htoꞈ ma cawˬ ve le?

¹⁸ Gʼuiˬ sha lo laˬ ve dawˇ sha gaˇ sha ve gawˬ lehˍ cawˬ leh kawˆ ve maˇ cawˬ tuˬ te laˇ ve yoˬ. (Hpiˇliˇpiˆ 4:6, 7) Naˬ beuˬ a naˍ, mvuhˇ yeˬ mvuhˇ haw lonˉ, maˇ heˆ leh fawˉ ve mehˍ ve gʼa hpuˇ ve htawˇ, dawˇ sha gaˇ sha ve, chi ngaˬ hui nyi ma gawˬ lehˍ cawˬ tuˬ te laˇ ve yoˬ. Yaˬhoˉvaˬ lehˬ kaiˬ ve nyi haꞈ shaˉ paˍ ngaˬ hui htaꞈ a yeˇ yuˬ leh awˬ gʼaˇ peꞈ laˇ tcuh ve yoˬ. Leh yawˇ ngaˬ hui htaꞈ teˇ gʼaˇ leh teˇ gʼaˇ ga daꞈ tcuh gaˇ ve yoˬ. Chi teˇ hkui ngaˬ hui cawˬ ve dawˇ sha gaˇ sha ve lehˬ, awˬ gʼuˇ suhˍ hpawˇ chi aꞈ kehˉ “tuꞈ jaˇ hkanˍ jaˇ ve” awˬ yanˇ ngaˬ hui yeunˇ hkanˍ gʼaˇ tuˬ kaꞈ ga laˇ ve yoˬ. (Maꞈhtehˍ 24:21) Oˇ ve teˇ yanˇ ngaˬ hui dawˇ sha gaˇ sha ve hkʼaˬ htaˆ kaꞈ gʼa cawˬ leh awˬ viˉ awˬ nyi kaꞈ cawˬ tuˬ gʼa ga piˇ ve yoˬ. Awˬ yanˇ oˇ ve peuˬ hkʼawꞈ nawˉ ngaˬ hui shoꞈ shaꞈ ve leh dawˇ haˍ ve awˬ ceuˬ maˇ kʼawꞈ gʼa hpuˇ˗o. Yaˬhoˉvaˬ ngaˬ hui htaꞈ hkʼaˬ htaˆ kaꞈ peꞈ laˇ gaˇ ve awˬ ceuˬ ngaˬ hui gʼa tuˬ yoˬ. Chi ve lehˬ awˬ tehˬ awˬ na dawˇ sha gaˇ sha ve yoˬ.—Iˉsaˍyaˆ 26:3, 4.