Daˍviˆ kʼoˆ ve awˬ tehˬ hpehꞈ ve yoˬ.

Daˍviˆ Chiˇ mvuh ve liꞈ 61:8 leh awˬ nu ve Liꞈ hpu awˬ tawn hkʼaw hkʼa shuˍ kʼoˆ ve htaꞈ bvuhꞈ taˍ ve ngaˬ hui teˇ geh nyi sheˍ. Yawˇ kʼoˆ ve, “ngaˬ nawˬ htaꞈ ka tiꞈ te taˍ ve hkʼe, teˇ nyi le le ngaˬ nawˬ htaꞈ tanˇ laˇ leh kʼa muiˬ chiˇ mvuh tuˬ yoˬ.” “Ngaˬ ve Jawˇ mawˇ Gʼuiˬ sha˗oˬ, nyi ma awˬ tawˬ hkʼa gaˬ ngaˬ nawˬ htaꞈ chiˇ mvuh tuˬ yoˬ. Nawˬ uiˍ jaˇ mvuh jaˇ ve awˬ lawn co co taiˍ taiˍ ngaˬ kʼaoˍ maˍ piˇ tuˬ yoˬ.” ‘Teˇ nyi le le ngaˬ nawˬ htaꞈ kʼa muiˬ chiˇ mvuh tuˬ yoˬ.’—Chiˇ mvuh ve 61:8; 86:12; 145:1, 2.

Daˍviˆ chi hkʼe bvuhꞈ ve lehˬ yawˇ maˇ gʼa suh tehꞈ kʼoˆ gaˇ ve maˇ heˆ. Chaw yaˇ teˇ gʼaˇ le le venˇ baˆ yaˇ hpehꞈ leh gʼa suh˗e ve tehꞈ ngaˬ hui shiˍ ve yoˬ. Yawˇ kaꞈ venˇ baˆ cawˬ ve tehꞈ kʼoˆ ve yoˬ. (Awˬ hkuiˉ puiˍ 3:3, 17-19; Chiˇ mvuh ve 51:4, 5) Gʼuiˬ sha ve kanˉ ka tiꞈ yeˬ ve hkʼaw te ve chaw kaꞈ gʼa suh˗e ve tehꞈ yawˇ shiˍ ve yoˬ. Tawˇ pa haˉ te kʼo, Aˍbraˍhanˍ, Iˉcaˆ, Yaˍkoˆ, kaꞈ suh˗oˬ. Awˬ leh meuˇ gaˬ kʼo, Daˍviˆ yawˇ kaꞈ gʼa suh˗e tuˬ ve htaꞈ shiˍ ve yoˬ. (Chiˇ mvuh ve 37:25; 39:4) Chi htaꞈ pa taw, Daˍviˆ Chiˇ mvuh ve liꞈ 61:8 hkʼaw bvuhꞈ ve yawˇ a shaꞈ teꞈ chehˇ ve teˇ co˗e teˇ nyi le le Gʼuiˬ sha htaꞈ chiˇ mvuh tuˬ yoˬ tehꞈ dawˇ teh taˍ ve yoˬ.—2 Saˍmo˗eˍlaˆ 7:12.

Teˇ pawˆ pawˆ kʼo Daˍviˆ kaꞈ yawˇ ve awˬ lawn bvuhꞈ ve yoˬ. Tawˇ pa haˉ te kʼo, Chiˇ mvuh ve liꞈ kaˇ nanˉ uiˍ 18, 51, leh 52 awˉ lawˉ teˇ tawn htaꞈ ngaˬ hui mawˬ gʼa ve yoˬ. Chi hkʼoˆ kaꞈ, Chiˇ mvuh ve liꞈ kaˇ nanˉ uiˍ 23 hkʼaw Daˍviˆ yawˇ yawˬ ehˉ hawˉ htaˇ ve htaꞈ dawˇ mawˬ ve yoˬ. Hkʼe te leh, Daˍviˆ kʼoˆ ve Yaˬhoˉvaˬ lehˬ yawˇ ve yawˬ hawˉ shehˍ hpaˇ hpehꞈ leh yawˇ htaꞈ nyi haꞈ shaˉ laˇ ve, ga laˇ ve, leh nyi ma sha tuˬ te laˇ ve yoˬ. Chi ve htaꞈ pa taw yawˇ Yaˬhoˉvaˬ ve kanˉ “co co taiˍ taiˍ” te gaˇ ve yoˬ.—Chiˇ mvuh ve 23:6.

Liꞈ hpu hkʼaw cawˬ ve awˬ ceuˬ Daˍviˆ htaꞈ Yaˬhoˉvaˬ dawˇ pawnˍ piˇ leh bvuhꞈ tcuh taˍ ve tehꞈ ngaˬ hui tawnˇ taˍ cawˇ ve yoˬ. Leh Daˍviˆ kaꞈ tcuh kaˍ paˍ ve tawˇ hkawˇ laiˉ hkawˇ bvuhꞈ ve yoˬ. Tawˇ pa haˉ te kʼo, Chiˇ mvuh ve liꞈ kaˇ nanˉ uiˍ 110 hkʼaw Daˍviˆ lehˬ yawˇ ve Jawˇ mawˇ mvuhˇ naw ma hkʼoˆ lo Gʼuiˬ sha ve “laꞈ sha paˉ lo mui taˍ” ve htaꞈ kʼoˆ ve yoˬ. Leh “canˇ paˍ teˇ hpaˍ htaꞈ uˉ peunˍ” tuˬ leh “chaw ceuˬ teˇ hpaˍ htaꞈ suhˉ jehˬ” tuˬ kanˇ paˆ gʼa ve yoˬ. Chaw chi ve teˇ gʼaˇ lehˬ Daˍviˆ ve awˬ ceuˬ awˬ hkʼaˇ Meˍsiˉyaꞈ hpehꞈ ve tehꞈ ngaˬ hui na gʼa ve yoˬ. Meˍsiˉyaꞈ lehˬ mvuhˇ naw ma hkʼoˆ uˉ peunˍ leh “co co taiˍ taiˍ paw hkuˇ hpehꞈ tuˬ yoˬ.” (Chiˇ mvuh ve 110:1-6) Leh Yeˍsuˆ miˬ guiˬ hkʼoˆ chehˇ htaˇ, Chiˇ mvuh ve liꞈ kaˇ nanˉ uiˍ 110 hkʼaw tcuh kaˍ paˍ ve tawˇ hkawˇ yawˇ htaꞈ kʼoˆ gaˇ ve tehꞈ kʼoˆ leh tcuh kaˍ paˍ ve tawˇ hkawˇ chi awˬ gʼuˇ suhˍ hpawˇ awˬ tehˬ hpehꞈ la tuˬ yoˬ.—Maꞈhtehˍ 22:41-45.

Chi htaꞈ pa taw, Daˍviˆ yawˇ a shaꞈ teꞈ kuiˬ hkʼaw hpehꞈ la ve awˬ ceuˬ leh awˬ gʼuˇ suhˍ hpawˇ hpehꞈ la tuˬ ve awˬ ceuˬ, Yaˬhoˉvaˬ Daˍviˆ htaꞈ dawˇ pawnˍ piˇ leh bvuhꞈ tcuh ve tehꞈ ngaˬ hui gʼa mawˬ ve yoˬ. Daˍviˆ htaꞈ kʼawꞈ teꞈ tu la piˇ htaˇ Yaˬhoˉvaˬ htaꞈ co co taiˍ taiˍ chiˇ mvuh tuˬ yoˬ. Awˬ lawn chi ve Chiˇ mvuh ve liꞈ 37:10, 11, 29 hkʼaw ngaˬ hui na gʼa tuˬ ga laˇ ve yoˬ. Awˬ tawn chi teˇ hpaˍ hkʼaw kʼoˆ taˍ ve awˬ ceuˬ, Iˉsaˍreˍlaˆ chaw awˬ co˗e htaˇ hpehꞈ la peuˬ˗oˬ leh Yaˬhoˉvaˬ yawˇ ka tiꞈ te taˍ ve htaꞈ gʼaꞈ te htaˇ awˬ gʼuˇ suhˍ hpawˇ miˬ guiˬ chi hkʼoˆ lo awˬ tehˬ awˬ na hpehꞈ la tuˬ sheˍ ve yoˬ.—Liꞈ kʼoˆ chi ve hkʼaw “Nawˬ ngaˬ geh Paˍraˍdiˇsuˆ awˬ hkʼaw lo gʼa chehˇ tuˬ yoˬ” tehꞈ kʼoˆ ve awˬ lawn hkʼaw awˬ tawn 8 htaꞈ nyi sheˍ.

Chiˇ mvuh ve liꞈ 61:8 leh awˬ nu ve Liꞈ hpu awˬ tawn shuˍ daꞈ ve lehˬ, Daˍviˆ a shaꞈ teꞈ chehˇ ve teˇ co˗e Yaˬhoˉvaˬ htaꞈ chiˇ mvuh gaˇ ve tehꞈ ngaˬ hui mawˬ tuˬ te laˇ ve yoˬ. Awˬ gʼuˇ suhˍ hpawˇ Yaˬhoˉvaˬ lehˬ Daˍviˆ htaꞈ kʼawꞈ teꞈ tu la piˇ htaˇ, Daˍviˆ te tuˬ ve awˬ ceuˬ htaꞈ kʼoˆ sheˍ ve yoˬ.