Yaˬhoˉvaˬ lehˬ chaw yaˇ htaꞈ ‘miˬ guiˬ hkʼoˆ uˉ peunˍ chehˇ˗oˆ’ tehꞈ kʼoˆ piˇ htaˇ, awˬ leh meuˇ miˬ guiˬ hkʼa peu˗eˬ hkʼoˆ daꞈ jaˇ ve hko hpehꞈ tuˬ tehꞈ yawˇ kʼoˆ ve yoˬ. (Awˬ hkuiˉ puiˍ 1:28) Co co taiˍ taiˍ a shaꞈ gʼa tuˬ ve chaw teˇ gʼaˇ le le tawˇ hkawˇ chi ve htaꞈ gʼa na yuˬ cawˇ ve yoˬ. Yaꞈ hkʼaˇ, Eˍdenˍ hko hkʼaw gʼa chehˇ ve chaw awˉ lawˉ teˇ ca htaꞈ maˇ shuˍ. Yawˇ hui lehˬ miˬ guiˬ hkʼa peu˗eˬ hkʼoˆ Eˍdenˍ hko gʼaˇ hteꞈ uiˍ kʼai tuˬ te ve yoˬ. Aˍmaˍgeˍdonˍ peuˬ hkʼawꞈ nawˉ, miˬ guiˬ hkʼa peu˗eˬ hkʼoˆ luˬ taˍ sheˆ taˍ ve awˬ ceuˬ htaꞈ ngaˬ hui daꞈ kehˬ tuˬ gʼa te ve yoˬ. Chi ve lehˬ kanˉ uiˍ jaˇ ve teˇ ceuˬ hpehꞈ ve yoˬ.

Iˉsaˍreˍlaˆ chaw Baˍbuˍlonˍ mvuhˇ miˬ lo awˬ ceˬ te leh kʼawꞈ la htaˇ ve htaꞈ dawˇ nyi tuˬ te laˇ ve yoˬ. Yawˇ hui chehˇ kuiˬ lo 70 hkʼawꞈ ve awˬ yanˇ chaw teˇ gʼaˇ kaꞈ maˇ chehˇ ve yoˬ. Yaꞈ hkʼaˇ, Iˉsaˍyaˆ awˬ gʼuˇ suhˍ htaˇ kaꞈ kʼoˆ taˍ ve, Yaˬhoˉvaˬ yawˇ hui htaꞈ awˬ bon naꞈ piˇ leh yawˇ hui ve chehˇ kuiˬ teˇ pawˆ kʼawꞈ gu te ve yoˬ. Iˉsaˍyaˆ kʼoˆ ve, “mvuhˇ miˬ oˇ ve lehˬ, hteunˍ lonˉ hpehꞈ chehˇ ve htawˇ, Eˍdenˍ hko hkʼa shuˍ ngaˬ  kʼawꞈ hpehꞈ la piˇ tuˬ yoˬ.” (Iˉsaˍyaˆ 51:3) Iˉsaˍreˍlaˆ chaw htaꞈ Yaˬhoˉvaˬ ga piˇ leh awˬ tehˬ te gʼa ve tehꞈ ngaˬ hui gʼa mawˬ ve yoˬ. Awˬ gʼuˇ suhˍ hpawˇ Yaˬhoˉvaˬ lehˬ miˬ guiˬ hkʼoˆ chehˇ ve chaw htaꞈ awˬ bon naꞈ piˇ leh miˬ guiˬ daꞈ jaˇ ve hko hpehꞈ tuˬ te gʼa ve tehꞈ ngaˬ hui yonˍ gʼa tuˬ te laˇ ve yoˬ. Miˬ guiˬ daꞈ jaˇ ve hko hpehꞈ tuˬ nawˬ kaꞈ ga piˇ gaˇ ve tehꞈ hpeuꞈ maw piˇ tuˬ, chi teˇ hkui kaꞈ aˬ htoꞈ ma te gʼa ve le?

Awˬ nu ve chaw maˇ heˆ leh awˬ paˇ awˬ kui lo ve chaw yehˬ daꞈ kehˬ tuˬ maˇ te ve htawˇ, nawˬ ve yehˬ daꞈ kehˬ tuˬ hkʼaˬ htaˆ kaꞈ te gʼa ve yoˬ. Chi hkʼoˆ kaꞈ, hpawnˬ daꞈ kuiˬ yehˬ leh hpawnˬ daꞈ kuiˬ yehˬ lonˉ hkʼaw kaꞈ daꞈ kehˬ tuˬ te ve htaꞈ nawˬ ga piˇ gʼa ve yoˬ. Nawˬ te gʼa ve kʼo mvuhˇ yeˬ mvuhˇ haw lonˉ gʼa hpuˇ ve chaw htaꞈ ga piˇ kaꞈ gʼa ve yoˬ. Chi hkʼe te ve lehˬ, ga laˇ tuˬ loˍ ve cawˬ htaˇ nawˬ hkʼaˬ htaˆ kaꞈ ga piˇ gʼa ve tehꞈ hpeuꞈ maw piˇ ve yoˬ. ‘Miˬ guiˬ awˬ suhˉ hkʼaw chehˇ htaˇ Yaˬhoˉvaˬ ngaˬ htaꞈ yehˇ tuˬ, chi teˇ hkuiˬ kaꞈ ngaˬ teˇ ceuˬ ceuˬ te jaw˗aw laˇ?’ tehꞈ a shu yawˇ awˬ to htaꞈ na nyi cawˇ ve yoˬ.

Yaˍiˉruˆ ve yaˇ miˇ kʼawꞈ teꞈ tu la peuˬ hkʼawꞈ nawˉ, yawˇ htaꞈ caˇ tuˬ caˍ piˇ˗oˆ tehꞈ oˇ kaˬ lo chehˇ ve chaw htaꞈ Yeˍsuˆ kʼoˆ piˇ ve yoˬ. (Maˍkuˆ 5:42, 43) 12 hkʼawꞈ ve yaˇ miˇ htaꞈ nyi haꞈ shaˉ piˇ ve lehˬ haˍ ve awˬ lawn hpehꞈ ve maˇ heˆ. Yaꞈ hkʼaˇ, Yeˍsuˆ ka tiꞈ te taˍ laˇ ve htaꞈ dawˇ nyi sheˍ. Oˇ kaˬ lo kʼoˆ ve, “tuˍ hpfuh awˬ hkʼaw lo chehˇ ve chaw hkʼa peu˗eˬ lehˬ, yawˇ ve tawˇ hkawˇ htaꞈ gʼa kaˇ leh tawˆ la tuˬ ve awˬ yanˇ gaˬ la tuˬ yoˬ.” (Yoˇhanˬ 5:28, 29) Oˇ ve teˇ yanˇ ngaˬ hui kanˉ gʼa te tuˬ ve cawˬ maˇ jaˇ. Kʼawꞈ teꞈ tu la ve chaw htaꞈ ngaˬ hui ga piˇ tuˬ, Liꞈ hpu hkʼaw hkʼa tawˍ lehˆ maˇ gʼa kʼoˆ laˇ taˍ ve htawˇ, ngaˬ hui kanˉ gʼa te tuˬ cawˬ maˇ jaˇ ve tehꞈ dawˇ mawˬ gʼa ve yoˬ. Tawˇ pa haˉ te kʼo, yawˇ hui caˇ tuˬ, chehˇ kuiˬ, leh aˉ poꞈ veuꞈ kʼaˇ cawˬ tuˬ gʼa ga piˇ ve yoˬ. Oˇ ve teˇ yanˇ gaˬ kʼo, nawˬ yawˇ hui htaꞈ ha lehˬ ha kʼa ga piˇ gʼa ve tehꞈ hpeuꞈ maw piˇ gʼa tuˬ, chi teˇ hkui kaꞈ aˬ htoꞈ ma te gʼa ve le? Teˇ geh nyi sheˍ.

Toˇ nyi shehˍ hpaˇ nawˬ chehˇ ve Hkriꞈ yaˇ awˬ moˍ hkʼaw ca guiˇ la tuˬ kʼoˆ laˇ htaˇ, nawˬ yawˇ htaꞈ awˍ teˇ ponˬ te caˍ piˇ gʼa˗aw laˇ? Beˍteˍlaˆ hkʼaw ve awˬ viˉ awˬ nyi awˬ vuiˬ awˬ suhˉ gʼa leh hto toˇ kuiˬ awˬ ti loˍ jaˇ kuiˬ lo kʼai tcuh ve yoˬ. Toˇ nyi shehˍ hpaˇ teˇ hpaˍ lehˬ toˇ nyi shehˍ hpaˇ maˇ kʼawꞈ gʼa te˗o leh awˬ vuiˬ awˬ suhˉ kʼawꞈ gʼa htaˇ, nawˬ yawˇ hui ve chehˇ kuiˬ yehˬ ca piˇ gʼa˗aw laˇ? Hpawnˬ daꞈ lonˉ 3 nyi maˇ heˆ leh hpawnˬ daꞈ lonˉ 1 nyi htaˇ, hpawnˬ daꞈ ve maˇ tanˬ sheˍ htaˇ leh peuˬ hkʼawꞈ nawˉ, daꞈ kehˬ tuˬ te ve htaꞈ nawˬ  ga piˇ gʼa˗aw laˇ? Maˇ heˆ leh awˬ viˉ awˬ nyi teˇ kaˬ lo laˬ ve chaw htaꞈ nawˬ haꞈ yuˬ piˇ gʼa˗aw laˇ?

Tcuh yaˇ liꞈ 24:15 hkʼaw kʼoˆ taˍ ve hkʼe, chaw laiˉ lanˬ gʼaˇ kʼawꞈ teꞈ tu la tuˬ yoˬ tehꞈ ngaˬ hui dawˇ law gʼa ve yoˬ. Leh chaw laiˉ lanˬ gʼaˇ lehˬ Yaˬhoˉvaˬ ve awˬ lawn maˇ gʼa kaˇ jaw ve yoˬ. a Oˇ ve teˇ yanˇ Gʼuiˬ sha ve kanˉ te ve ka tiꞈ yeˬ ve chaw lehˬ yawˇ hui htaꞈ Gʼuiˬ sha ve awˬ lawn maˍ piˇ tuˬ awˬ yanˇ cawˬ ve yoˬ. (Iˉsaˍyaˆ 11:9) Uˉyawˉpaˆ miˬ guiˬ, Aˍmeˬriˆkaꞈ awˬ hawˉ hpawˇ, Aˍfaˍriˆkaˆ miˬ guiˬ, chi teˇ hpaˍ lo hto toˇ jaw ve Cha˗lawꞈ lehˬ awˬ yanˇ oˇ ve htaꞈ dawˇ law taˍ ve yoˬ. Yawˇ kʼoˆ ve, “kʼawꞈ teꞈ tu la ve chaw htaꞈ maˍ piˇ tuˬ ngaˬ law chehˇ ve yoˬ. Suh˗oˬ ve chaw teˇ gʼaˇ gʼaˇ ve awˬ lawn ngaˬ gʼaw htaˇ, ‘yawˇ Yaˬhoˉvaˬ ve awˬ lawn htaꞈ shiˍ ve kʼo, yawˇ ve a shaꞈ teꞈ hkʼaˇ chi hkʼe maˇ hpehꞈ taˍ tehꞈ ngaˬ dawˇ ve yoˬ.’ Kʼawꞈ teꞈ tu la ve chaw htaꞈ Yaˬhoˉvaˬ ve awˬ lawn maˍ piˇ tuˬ ve ngaˬ ha lehˬ jaˇ. Yawˇ Yaˬhoˉvaˬ ve awˬ lawn shiˍ ve kʼo, yawˇ ve a shaꞈ teꞈ hkʼaˇ hkʼaˬ hkʼe taw daꞈ tuˬ ve hehˉ tehꞈ ngaˬ kʼoˆ piˇ ve yoˬ.”

Yaˬhoˉvaˬ ve kanˉ te ve ka tiꞈ yeˬ ve chaw htawˇ, Yeˍsuˆ awˬ gʼuˇ suhˍ a shaꞈ teꞈ chehˇ jaw ve chaw lehˬ, laiˉ ceuˬ gʼa henˇ tuˬ yoˬ. Daˍyeˍlaˆ tcuh kaˍ paˍ ve tawˇ hkawˇ bvuhꞈ htaˇ, yawˇ kaꞈ tcuhˉ kuiˬ htaꞈ maˇ na gʼa ve pa taw, yawˇ bvuhꞈ ve tcuh kaˍ paˍ ve tawˇ hkawˇ awˬ tehˬ hkʼaˬ hkʼe hpehꞈ la ve, ngaˬ hui yawˇ htaꞈ gʼa kʼoˆ maˍ piˇ ve ha lehˬ jaˇ tuˬ te laˇ ve yoˬ. (Daˍyeˍlaˆ 12:8) Chi hkʼoˆ kaꞈ, Ruˉhtaˆ leh Nawˉmiꞈ lehˬ Meˍsiˉyaꞈ yawˇ hui ve awˬ haweh awˬ haˆ hpehꞈ ve tehꞈ kʼoˆ maˍ piˇ htaˇ, yawˇ hui hkʼaˬ hkʼe taw ha lehˬ jaˇ tuˬ ve htaꞈ ngaˬ hui dawˇ mawˬ nyi sheˍ. Saˍtanˍ nyiˉ laˇ ve maˇ heˆ leh awˬ nu ve awˬ ceuˬ htaꞈ dawˇ nyi tuˬ maˇ cawˬ ve pa taw, miˬ guiˬ hkʼa peu˗eˬ hkʼoˆ Liꞈ hpu maˍ ve kanˉ daꞈ jaˇ ve htaꞈ ngaˬ hui kaꞈ gʼa ga piˇ ve ha lehˬ jaˇ tuˬ yoˬ.

Kʼawꞈ teꞈ tu la ve chaw htaꞈ maˍ piˇ tuˬ nawˬ gu hehnˇ taˍ˗oˬ ve tehꞈ chi teˇ hkui kaꞈ aˬ htoꞈ ma te gʼa ve le? Nawˬ te gʼa ve awˬ ceuˬ lehˬ, coˇ caˇ leh Liꞈ hpu maˍ cheuˬ la tuˬ te ve leh hkʼaˬ htaˆ kaꞈ hto toˇ˗e ve yoˬ. (Maꞈhtehˍ 24:14) Nawˬ a shaꞈ maˇ ve maˇ heˆ leh awˬ nu ve awˬ ceuˬ htaꞈ pa taw Gʼuiˬ sha ve kanˉ hkʼa dehꞈ te maˇ gʼa ve htawˇ, kʼawꞈ teꞈ tu la ve chaw htaꞈ Liꞈ hpu maˍ piˇ tuˬ, chi teˇ hkui kaꞈ hto toˇ ve nawˬ te gʼa ve hkʼe gʼaˇ hteꞈ te ve yoˬ.

Nawˬ a shu yawˇ awˬ to htaꞈ na nyi cawˇ ve, ‘miˬ guiˬ lehˬ ngaˬ gʼa tuˬ ve awˬ shinˉ hpehꞈ ve tehꞈ law chehˇ ve laˇ? Miˬ guiˬ awˬ suhˉ hpehꞈ la tuˬ ngaˬ gʼa ga te leh kʼawꞈ teꞈ tu la ve chaw htaꞈ ga piˇ leh maˍ piˇ tuˬ, ngaˬ ha lehˬ jaˇ ve maˇ heˆ laˇ?’ Nawˬ miˬ guiˬ awˬ suhˉ hkʼaw te tuˬ ve hkʼa shuˍ, chi teˇ hkui kaꞈ nawˬ coˇ caˇ leh hkʼa dehꞈ te htaˇ, chi lehˬ nawˬ chi teˇ hkui kaꞈ hkʼa dehꞈ gu hehnˇ taˍ˗oˬ ve tehꞈ hpeuꞈ maw piˇ ve yoˬ.