1. Yeˍsuˆ suh˗e la paˇ neˇ htaˇ yawˇ awˬ paˇ lo ve chaw haiˬ teˇ gʼaˇ htaꞈ aˬ htoꞈ ma kʼoˆ piˇ ve le? (Luˉkaꞈ 23:39-43)

 Yeˍsuˆ suh˗e la paˇ neˇ htaˇ, naˬ jaˇ ve yoˬ. Yawˇ awˬ paˇ lo ve chaw haiˬ nyiˇ gʼaˇ kaꞈ naˬ jaˇ ve yoˬ. (Luˉkaꞈ 23:32, 33) Yawˇ huiˉ maˬ Yeˍsuˆ htaꞈ nyi cha ve pa taw, Yeˍsuˆ ve awˬ laꞈ gʼawˇ hpehꞈ ve maˇ heˆ tehꞈ ngaˬ hui shiˍ ve yoˬ. (Maꞈhtehˍ 27:44; Maˍkuˆ 15:32) Yaꞈ hkʼaˇ, chaw haiˬ teˇ gʼaˇ venˇ baˆ dawˇ hpfuhˆ ve yoˬ. Yawˇ Yeˍsuˆ htaꞈ kʼoˆ piˇ ve, “nawˬ hkunˉ hawˉ hkanˇ te laˬ ve teˇ yanˇ, ngaˬ htaꞈ dawˇ nawˇ laˇ˗oˆ.” Yeˍsuˆ yawˇ htaꞈ kʼawꞈ kʼoˆ piˇ ve, “ngaˬ nawˬ htaꞈ awˬ tehˬ awˬ na kʼoˆ laˇ ve, yaꞈ nyi nawˬ ngaˬ geh teˇ geh Paˍraˍdiˇsuˆ awˬ hkʼaw lo gʼa chehˇ tuˬ yoˬ.” (Luˉkaꞈ 23:39-43 gʼaw sheˍ.) Chaw haiˬ chi ve teˇ gʼaˇ Yeˍsuˆ “mvuhˇ naw ma mvuhˇ miˬ” awˬ lawn bon maˍ ve htaꞈ gʼa kaˇ jaw ve yoˬ hehˉ. Yaꞈ hkʼaˇ, yawˇ Yeˍsuˆ ve awˬ laꞈ gʼawˇ maˇ hpehꞈ leh Yeˍsuˆ yawˇ htaꞈ mvuhˇ naw ma mvuhˇ miˬ awˬ hkʼaw lo yawˇ geh teˇ geh gʼa chehˇ tuˬ yoˬ tehꞈ maˇ gʼa kʼoˆ piˇ. (Maꞈhtehˍ 4:17) Chi ve lehˬ, miˬ guiˬ awˬ suhˉ hkʼaw hpehꞈ la tuˬ ve awˬ ceuˬ htaꞈ Yeˍsuˆ kʼoˆ ve tehꞈ hpeuꞈ maw laˇ ve yoˬ. Aˬ htoꞈ ma te ngaˬ hui chi hkʼe kʼoˆ gʼa ve le?

2. Chaw haiˬ venˇ baˆ dawˇ hpfuhˆ ve chi teˇ gʼaˇ Yuˇdaꞈ chaw hpehꞈ ve tehꞈ ngaˬ hui hkʼaˬ hkʼe te shiˍ gʼa ve le?

² Chaw haiˬ venˇ baˆ dawˇ hpfuhˆ ve chi teˇ gʼaˇ Yuˇdaꞈ chaw hpehꞈ ve yoˬ. Awˬ lawn kʼo yawˇ awˬ nu ve chaw haiˬ teˇ gʼaˇ htaꞈ kʼoˆ piˇ ve, “yawˇ hkʼa shuˍ shuˍ suhˉ taˆ ve htaꞈ nawˬ htawˇ hkanˍ chehˇ ve awˬ hkʼaw lo, Gʼuiˬ sha htaꞈ nawˬ maˇ kawˆ laˇ?” (Luˉkaꞈ 23:40) Yuˇdaꞈ chaw lehˬ Gʼuiˬ sha teˇ gʼaˇ htaꞈ ceh tiˉ oˉ kʼoˍ pui ve yoˬ. Yaꞈ hkʼaˇ, buiˇ shaˆ aˉ naˆ chaw lehˬ gʼuiˬ sha teˇ hpaˍ htaꞈ oˉ kʼoˍ pui ve yoˬ. (Tawˆ kʼai ve 20:2, 3; 1 Kawˇrenˍhtuˆ 8:5, 6) Chaw chi nyiˇ gʼaˇ buiˇ shaˆ aˉ naˆ chaw hpehꞈ ve kʼo chaw haiˬ oˇ ve teˇ gʼaˇ kʼoˆ ve, “nawˬ gʼuiˬ sha teˇ hpaˍ htaꞈ maˇ kawˆ ve laˇ?” Chi hkʼoˆ kaꞈ, Yeˍsuˆ buiˇ shaˆ aˉ naˆ chaw htaꞈ Gʼuiˬ sha ve mvuhˇ miˬ awˬ lawn maˍ piˇ tuˬ laˬ ve maˇ heˆ tehꞈ gʼa mawˬ ve yoˬ. Yawˇ  “Iˉsaˍreˍlaˆ teˇ yehˬ awˬ hkʼaw lo mehˉ kʼai peuˬ ve yawˬ teˇ hpaˍ geh” ceh laˬ ve yoˬ. (Maꞈhtehˍ 15:24) Yaˬhoˉvaˬ suh peuˬ ve chaw htaꞈ kʼawꞈ teꞈ tu la piˇ gʼa ve tehꞈ, Iˉsaˍreˍlaˆ chaw htaꞈ shiˍ tcuh leh chaw haiˬ venˇ baˆ dawˇ hpfuhˆ ve chi teˇ gʼaˇ htaꞈ kaꞈ awˬ lawn chi shiˍ tcuh ve yoˬ. Yaˬhoˉvaˬ Yeˍsuˆ htaꞈ kʼawꞈ teꞈ tu la piˇ leh, Yeˍsuˆ Gʼuiˬ sha ve mvuhˇ miˬ hkʼaw Jawˇ mawˇ hpehꞈ tuˬ yawˇ kʼoˆ ve tawˇ hkawˇ ngaˬ hui shiˍ tuˬ te laˇ ve yoˬ. Gʼuiˬ sha yawˇ htaꞈ kaꞈ kʼawꞈ teꞈ tu la tcuh laˇ gʼa ve tehꞈ yawˇ dawˇ law ve yoˬ.

3. Yeˍsuˆ miˬ guiˬ awˬ suhˉ htaꞈ kʼoˆ htaˇ, chaw haiˬ venˇ baˆ dawˇ hpfuhˆ ve chi teˇ gʼaˇ aˬ htoꞈ ma htaꞈ dawˇ mawˬ ve le? Tawˇ pa haˉ kʼoˆ maˍ laˇ sheˍ. (Awˬ hkuiˉ puiˍ 2:15)

³ Chaw haiˬ chi ve teˇ gʼaˇ Yuˇdaꞈ chaw hpehꞈ ve awˬ hkʼoˆ kaꞈ, Yaˬhoˉvaˬ lehˬ Aˍdanˍ leh Eˇvaꞈ htaꞈ Eˍdenˍ hko hkʼaw chehˇ tcuh ve awˬ lawn yawˇ shiˍ ve yoˬ hehˉ. Chi htaꞈ pa taw, Yeˍsuˆ kʼoˆ ve miˬ guiˬ awˬ suhˉ lehˬ miˬ guiˬ hkʼoˆ lo cawˬ ve daꞈ jaˇ ve hko htaꞈ kʼoˆ gaˇ ve tehꞈ yawˇ shiˍ ve yoˬ.—Awˬ hkuiˉ puiˍ 2:15 gʼaw sheˍ.

4. Yeˍsuˆ chaw haiˬ teˇ gʼaˇ htaꞈ kʼoˆ piˇ ve tawˇ hkawˇ ngaˬ hui aˬ htoꞈ ma dawˇ nyi tuˬ te laˇ ve le?

⁴ Yeˍsuˆ chaw haiˬ oˇ ve teˇ gʼaˇ htaꞈ kʼoˆ piˇ ve tawˇ hkawˇ miˬ guiˬ awˬ suhˉ hkʼaw ve a shaꞈ teꞈ hkʼaˇ hkʼaˬ hkʼe hpehꞈ tuˬ ve ngaˬ hui dawˇ nyi tuˬ te laˇ ve yoˬ. Awˬ tehˬ kʼo miˬ guiˬ awˬ suhˉ hkʼaˬ hkʼe hpehꞈ tuˬ ve htaꞈ ngaˬ hui shiˍ gʼa ve yoˬ. Awˬ lawn kʼo, jawˇ mawˇ Sawˉlaꞈmonˍ uˉ peunˍ ve awˬ yanˇ htaˇ dawˇ sha gawˬ lehˍ ve cawˬ ve htaꞈ mawˬ gʼa ve yoˬ. Sawˉlaꞈmonˍ aꞈ kehˉ uiˍ jaˇ mvuhˇ jaˇ ve Yeˍsuˆ leh yawˇ geh teˇ geh uˉ peunˍ tuˬ ve chaw geh kanˉ te leh miˬ guiˬ hkʼoˆ lo Sawˉlaꞈmonˍ ve awˬ co˗e aꞈ kehˉ daꞈ jaˇ ve te tuˬ yoˬ tehꞈ, ngaˬ hui dawˇ law gʼa ve yoˬ. (Maꞈhtehˍ 12:42) Leh “awˬ kaˍ awˬ nu yawˬ” miˬ guiˬ awˬ suhˉ hkʼaw co co taiˍ taiˍ gʼa chehˇ tuˬ yawˇ hui aˬ htoꞈ ma gʼa te cawˇ ve htaꞈ a yeˇ te ve yoˬ.—Yoˇhanˬ 10:16.

5. Nawˬ dawˇ kʼo miˬ guiˬ awˬ suhˉ hkʼaw ve a shaꞈ teꞈ hkʼaˇ hkʼaˬ hkʼe hpehꞈ tuˬ le?

⁵ Miˬ guiˬ awˬ suhˉ htaꞈ kʼoˆ htaˇ, nawˬ aˬ htoꞈ ma htaꞈ dawˇ mawˬ ve le? Daꞈ jaˇ ve Eˍdenˍ hko htaꞈ shuˍ ve nawˬ dawˇ mawˬ ve yoˬ hehˉ. (Awˬ hkuiˉ puiˍ 2:7-9) Tcuh kaˍ paˍ Miˆhkaˍ bvuhꞈ taˍ ve htaꞈ nawˬ dawˇ mawˬ ve yoˬ. Oˇ kaˬ lo kʼoˆ ve, Yaˬhoˉvaˬ ve chaw lehˬ “a shu yawˇ ve a pehˉ meuˇ hko leh, maˉ nawˆ hko hkʼaw gawˬ lehˍ gʼa chehˇ” tuˬ yoˬ. (Miˆhkaˍ 4:3, 4) Miˬ guiˬ awˬ suhˉ hkʼaw caˇ tuˬ dawˬ tuˬ hkʼa biˇ cawˬ tuˬ yoˬ tehꞈ kʼoˆ taˍ ve, Liꞈ hpu laiˉ tawn htaꞈ nawˬ dawˇ mawˬ ve yoˬ hehˉ. (Chiˇ mvuh ve 72:16; Iˉsaˍyaˆ 65:21, 22) Daꞈ jaˇ ve hko hkʼaw nawˬ mui taˍ leh hpui lawˇ hkʼoˆ lo caˇ tuˬ hkʼa biˇ cawˬ ve geh nawˬ oˇ kaˬ lo chehˇ taˍ ve htaꞈ dawˇ mawˬ nyi sheˍ. Mvuhˇ haw shaˉ daꞈ ve leh suhˉ veˆ hawˉ jaˇ ve geh nawˬ awˬ to, awˬ chawˇ teˇ hpaˍ, yehˬ kʼa hkʼaw ve chaw, awˬ viˉ awˬ nyi kʼawꞈ teꞈ tu la ve chaw geh ha lehˬ ha kʼa te leh tawˇ yaw daꞈ chehˇ ve awˬ han htaꞈ dawˇ mawˬ nyi sheˍ. Chi ve hkʼa peu˗eˬ lehˬ zuhꞈ maˆ hkʼe ceh hpehꞈ ve maˇ heˆ. Yaꞈ hkʼaˇ, chi ve lehˬ awˬ gʼuˇ suhˍ hpawˇ awˬ tehˬ awˬ na hpehꞈ la tuˬ yoˬ. Leh chi hkʼe ceh tiˉ maˇ heˆ. Ha lehˬ jaˇ tuˬ ve kanˉ htaꞈ kaꞈ ngaˬ hui gʼa te tuˬ yoˬ.

6. Miˬ guiˬ awˬ suhˉ hkʼaw ngaˬ hui aˬ htoꞈ ma ve kanˉ gʼa te tuˬ le? (Awˬ han htaꞈ nyi sheˍ.)

⁶ Ngaˬ hui kanˉ te ve hkʼaw ha lehˬ gʼa tuˬ  Yaˬhoˉvaˬ hpanˍ taˍ laˇ ve yoˬ. (Cuˇ yiˍ piˇ ve 2:24) Yeˍsuˆ uˉ peunˍ ve 1,000 hkʼawꞈ ve awˬ yanˇ htaˇ, ngaˬ hui kanˉ te tuˬ cawˬ maˇ jaˇ. Tuꞈ jaˇ hkanˍ jaˇ ve htaꞈ gʼa ponˬ ve chaw lehˬ, kʼawꞈ teꞈ tu la ve chaw htaꞈ aˉ poꞈ veuꞈ kʼaˇ, caˇ tuˬ, chehˇ kuiˬ cawˬ tuˬ gʼa ga piˇ tuˬ yoˬ. Yawˇ hui chi ve teˇ hpaˍ cawˬ tuˬ gʼa ga piˇ ve lehˬ ngaˬ hui ha lehˬ tuˬ te laˇ ve yoˬ. Aˍdanˍ leh Eˇvaꞈ Eˍdenˍ hko gʼaˇ hteꞈ kʼawꞈ uiˍ kʼai tuˬ te ve hkʼa shuˍ, miˬ guiˬ hkʼoˆ lo daꞈ jaˇ ve hko hpehꞈ tuˬ ngaˬ hui kaꞈ te tuˬ awˬ vuiˬ gʼa ve yoˬ. Chi hkʼoˆ kaꞈ, kʼawꞈ teꞈ tu la ve laiˉ lanˬ gʼaˇ htaꞈ ngaˬ hui Liꞈ hpu gʼa maˍ piˇ ve, hkʼaˬ hkʼe tawn ha lehˬ jaˇ tuˬ ve htaꞈ dawˇ nyi sheˍ. Chaw chi teˇ hpaˍ lehˬ Yaˬhoˉvaˬ leh yawˇ ve a loˍ htaꞈ kaꞈ maˇ shiˍ ve chaw hpehꞈ ve yoˬ. Yeˍsuˆ ve awˬ co˗e maˇ gaˬ sheˍ htaˇ, Gʼuiˬ sha ve kanˉ ka tiꞈ yeˬ ve hkʼaw te ve chaw laiˉ gʼaˇ kʼawꞈ teꞈ tu la leh laiˉ ceuˬ gʼa kʼawꞈ henˇ tuˬ yoˬ.

7. Ngaˬ hui aˬ htoꞈ ma awˬ lawn htaꞈ yonˍ gʼa ve le? Leh aˬ htoꞈ ma pa taw le?

⁷ Miˬ guiˬ awˬ suhˉ hkʼaw Yeˍsuˆ uˉ peunˍ ve awˬ hawˉ lo a shaꞈ teꞈ hkʼaˇ dawˇ sha gawˬ lehˍ ve, daꞈ ve awˬ ceuˬ maˇ maˇ cawˬ tuˬ ve, leh hteˇ hteˇ shawˇ shawˇ hkʼa dehꞈ gu laˇ tuˬ ve tehꞈ ngaˬ hui yonˍ gʼa ve yoˬ. Aˬ htoꞈ ma te ngaˬ hui chi hkʼe yonˍ gʼa ve le? Awˬ lawn kʼo, Yaˬhoˉvaˬ lehˬ Sawˉlaꞈmonˍ ve awˬ co˗e htaˇ te piˇ jaw˗oˬ ve htaꞈ ngaˬ hui mawˬ gʼa ve yoˬ.

8. Chiˇ mvuh ve liꞈ 37:10, 11, 29 hkʼaw ve tawˇ hkawˇ, oˇ htaˇ teˇ co˗e awˬ tehˬ hkʼaˬ hkʼe hpehꞈ la jaw˗oˬ ve le? (Chi ve teˇ kʼoˆ hkʼaw “gʼaw ve chaw na nyi hkawˇ” htaꞈ nyi sheˍ.)

⁸ Cuˇ yiˍ cawˬ ve jawˇ mawˇ hteˇ ve cawˇ ve hkʼaw uˉ peunˍ htaˇ, a shaꞈ teꞈ hkʼaˇ hkʼaˬ hkʼe hpehꞈ tuˬ jawˇ mawˇ Daˍviˆ htaꞈ dawˇ pawnˍ piˇ leh bvuhꞈ tcuh ve yoˬ. (Chiˇ mvuh ve 37:10, 11, 29 gʼaw sheˍ.) Yehˬ shehˍ hpaˇ geh miˬ guiˬ awˬ suhˉ ve awˬ lawn ngaˬ hui yaw daꞈ htaˇ, maˇ˗awˍ ve kʼo ngaˬ hui Chiˇ mvuh ve liꞈ 37:11 htaꞈ gʼaw ve yoˬ. Awˬ lawn kʼo Yeˍsuˆ kaꞈ hkʼaw pui hkʼoˆ lo bon maˍ htaˇ, chi ve teˇ tawn htaꞈ maˍ ve yoˬ. Chi lehˬ awˬ gʼuˇ suhˍ hpawˇ awˬ tehˬ awˬ na hpehꞈ la tuˬ ve tehꞈ hpeuꞈ maw laˇ ve yoˬ. (Maꞈhtehˍ 5:5) Sawˉlaꞈmonˍ uˉ peunˍ ve awˬ co˗e htaˇ hkʼaˬ hkʼe hpehꞈ ve, Daˍviˆ kʼoˆ ve tawˇ hkawˇ kaꞈ ngaˬ hui mawˬ tuˬ te laˇ ve yoˬ. Sawˉlaꞈmonˍ uˉ peunˍ ve awˬ co˗e htaˇ Iˉsaˍreˍlaˆ chaw hui dawˇ sha gawˬ lehˍ ve leh daꞈ ve awˬ ceuˬ cawˬ ve yoˬ. Yawˇ hui lehˬ, “hkuiˇ jaˇ daꞈ jaˇ ve mvuhˇ miˬ” hkʼaw gʼa chehˇ ve yoˬ. Chi hkʼoˆ kaꞈ, Yaˬhoˉvaˬ kʼoˆ sheˍ ve, ‘nawˬ hui lehˬ ngaˬ ve awˬ liˇ tawˇ hkawˇ teˇ hpaˍ htaꞈ hkʼa dehꞈ na yuˬ leh ngaˬ lehˬ nawˬ hui ve mvuhˇ miˬ htaꞈ gawˬ lehˍ cawˬ la piˇ leh,  nawˬ hui zuhꞈ mehˬ kʼa mehˬ cawˬ tuˬ yoˬ.’ (Oˉ kʼoˍ pui ve 20:24; 26:3, 6) Ka tiꞈ chi ve teˇ hpaˍ lehˬ Sawˉlaꞈmonˍ ve awˬ co˗e htaˇ awˬ tehˬ hpehꞈ ve yoˬ. (1 Raˍsaˍvanˍ 22:9; 29:26-28) Awˬ yanˇ oˇ ve teˇ yanˇ hkʼaw Iˉsaˍreˍlaˆ chaw htaꞈ canˇ paˍ “maˇ” ca shoꞈ shaꞈ la. (Chiˇ mvuh ve 37:10) Chi htaꞈ pa taw, Chiˇ mvuh ve liꞈ 37:10, 11, 29 hkʼaw awˬ tehˬ hpehꞈ˗oˬ ve leh, awˬ gʼuˇ suhˍ hpawˇ kʼawꞈ hpehꞈ la tuˬ ve htaꞈ ngaˬ hui gʼa mawˬ ve yoˬ.

9. Sheˍbaˆ mvuhˇ miˬ htaꞈ uˉ peunˍ ve jawˇ mawˇ ma lehˬ Sawˉlaꞈmonˍ uˉ peunˍ ve awˬ co˗e htaˇ ve htaꞈ caˉ daꞈ ve hkʼaˬ hkʼe kʼoˆ ve le?

⁹ Sawˉlaꞈmonˍ uˉ peunˍ ve awˬ hawˉ lo Iˉsaˍreˍlaˆ chaw dawˇ sha gawˬ lehˍ ve leh hpehꞈ hpehꞈ sha sha ve awˬ lawn Sheˍbaˆ mvuhˇ miˬ htaꞈ uˉ peunˍ ve jawˇ mawˇ ma gʼa kaˇ htaˇ, yawˇ oˇ kaˬ lo ca nyi la tuˬ ve lehˬ laˬ vuiˇ jaˇ. (1 Jawˇmawˇ 10:1) Yawˇ gʼa mawˬ peuˬ hkʼawꞈ nawˉ kʼoˆ ve, ‘ngaˬ gʼa kaˇ taˍ ve aꞈ kehˉ uiˍ jaˇ maˇ jaˇ ve cawˬ sheˍ ve yoˬ. Nawˬ miˇ ma teˇ hpaˍ lehˬ, hkʼaˬ ma awˬ bon uiˍ ve le? Nawˬ geh chehˇ taˍ leh nawˬ ve tawˇ htaꞈ teˇ nyi le le gʼa kaˇ chehˇ ve awˬ ceˬ teˇ hpaˍ htawˇ hkʼaˬ ma awˬ bon uiˍ jaˇ ve le?’ (1 Jawˇmawˇ 10:6-8) Sawˉlaꞈmonˍ ve awˬ co˗e htaˇ dawˇ sha gawˬ lehˍ cawˬ ve lehˬ, Yeˍsuˆ uˉ peunˍ ve awˬ hawˉ lo chaw yaˇ awˬ pon Yaˬhoˉvaˬ te laˇ tuˬ ve awˬ ceuˬ htaꞈ tehˆ taˍ ve yoˬ.

10. Sawˉlaꞈmonˍ aꞈ kehˉ Yeˍsuˆ hkʼaˬ hkʼe hpawˇ uiˍ ve le?

¹⁰ Sawˉlaꞈmonˍ aꞈ kehˉ Yeˍsuˆ lehˬ teˇ hpawˇ le le lo uiˍ ve yoˬ. Sawˉlaꞈmonˍ lehˬ maˇ biˇ ve chaw yaˇ hpehꞈ ve yoˬ. Yawˇ lehˬ laiˉ pawˆ te yaꞈ leh Iˉsaˍreˍlaˆ chaw hkʼa peu˗eˬ luˬ ve sheˆ ve gʼa hpuˇ tuˬ te piˇ ve yoˬ. Yeˍsuˆ lehˬ biˇ jaˇ ve uˉ peunˍ shehˍ hpaˇ hpehꞈ leh teˇ pawˆ kaꞈ maˇ te yaꞈ jaw ve yoˬ. (Luˉkaꞈ 1:32; Heˍbrehˇ 4:14, 15) Yeˍsuˆ lehˬ Saˍtanˍ beˬ piˇ ve hehnˇ jaˇ ve gʼa hpuˇ jaw˗oˬ ve yoˬ. Yawˇ lehˬ venˇ baˆ maˇ te yaꞈ jaw leh yawˇ uˉ peunˍ ve awˬ hawˉ lo chehˇ ve chaw yaˇ htaꞈ luˬ ve sheˆ ve gʼa hpuˇ tuˬ maˇ te piˇ ve tehꞈ hpeuꞈ maw laˇ ve yoˬ. Yeˍsuˆ lehˬ ngaˬ hui ve Jawˇ mawˇ lonˉ hpehꞈ ve yoˬ.

11. Yeˍsuˆ geh a shu kaꞈ uˉ peunˍ tuˬ le?

¹¹ Yeˍsuˆ geh 144,000 gʼaˇ kaꞈ uˉ peunˍ tuˬ yoˬ. Yawˇ hui chaw yaˇ htaꞈ nyi haꞈ shaˉ leh Yaˬhoˉvaˬ ve a loˍ miˬ guiˬ chi hkʼoˆ lo biˇ la tuˬ yawˇ hui ga daꞈ ve yoˬ. (Hpeuꞈ maˍ ve 14:1-3) Yawˇ hui chaw yaˇ hpehꞈ htaˇ, tuꞈ ve hkanˍ ve laiˉ ceuˬ htaꞈ gʼa hpuˇ jaw˗oˬ ve yoˬ. Chi htaꞈ pa taw, yawˇ hui ha kʼaˉ ve hkʼaw uˉ peunˍ tuˬ yoˬ. Hkʼe kʼo yawˇ hui aˬ htoꞈ ma ve awˬ vuiˬ htaꞈ te tuˬ le?

12. Yaˬhoˉvaˬ lehˬ 144,000 gʼaˇ htaꞈ aˬ htoꞈ ma ve awˬ vuiˬ te tcuh tuˬ le?

¹² Sawˉlaꞈmonˍ te jaw ve aꞈ kehˉ, Yeˍsuˆ leh yawˇ geh uˉ peunˍ ve chaw uiˍ jaˇ ve kanˉ htaꞈ te tuˬ yoˬ. Sawˉlaꞈmonˍ lehˬ Iˉsaˍreˍlaˆ mvuhˇ miˬ hkʼaw chaw laiˉ lanˬ gʼaˇ htaꞈ ceh nyi haꞈ shaˉ ve yoˬ. Yaꞈ hkʼaˇ, Yeˍsuˆ leh yawˇ geh uˉ peunˍ ve chaw lehˬ, miˬ guiˬ hkʼoˆ lo ve chaw hkʼa peu˗eˬ htaꞈ nyi haꞈ shaˉ tuˬ yoˬ. Yaˬhoˉvaˬ lehˬ leuˆ yuˬ taˍ ve chaw htaꞈ daꞈ ve awˬ vuiˬ piˇ ve htaꞈ ngaˬ hui gʼa mawˬ ve yoˬ.

13. Yeˍsuˆ leh yawˇ geh uˉ peunˍ ve chaw daꞈ jaˇ ve awˬ vuiˬ aˬ htoꞈ ma htaꞈ gʼa te tuˬ le?

¹³ 144,000 gʼaˇ lehˬ Yeˍsuˆ geh Jawˇ mawˇ leh paw hkuˇ gʼa te tuˬ yoˬ. (Hpeuꞈ maˍ ve 5:10) Moˉseˍ ve awˬ liˇ tawˇ hkawˇ hkʼaw paw hkuˇ lehˬ mvuhˇ miˬ yaˇ htaꞈ chehˇ sha cawˬ sha tuˬ leh Yaˬhoˉvaˬ geh meuˆ daꞈ tuˬ ga piˇ ve awˬ vuiˬ gʼa ve yoˬ. Moˉseˍ ve awˬ liˇ tawˇ hkawˇ lehˬ, ‘gaˬ la tuˬ ve daꞈ ve awˬ ceuˬ teˇ hpaˍ ve aˉ gʼuiˬ ha ceh tiˉ hpehꞈ ve yoˬ.’ Hkʼe te leh, Yeˍsuˆ leh yawˇ geh uˉ peunˍ ve chaw lehˬ, miˬ guiˬ hkʼoˆ lo chehˇ ve chaw htaꞈ chehˇ sha cawˬ sha tuˬ leh Yaˬhoˉvaˬ geh meuˆ daꞈ tuˬ ga piˇ tuˬ yoˬ tehꞈ ngaˬ hui mawˬ ve yoˬ. (Heˍbrehˇ 10:1) Yeˍsuˆ leh yawˇ geh uˉ peunˍ ve chaw miˬ guiˬ hkʼoˆ lo chehˇ ve chaw htaꞈ hkʼaˬ hkʼe te caˉ daꞈ tuˬ, chi teˇ hkui ngaˬ hui maˇ shiˍ sheˍ. Yaꞈ hkʼaˇ, miˬ guiˬ awˬ suhˉ hkʼaw ngaˬ hui gʼa chehˇ˗oˬ htaˇ, teˇ gʼaˇ le le htaꞈ beˆ maˍ laˇ tuˬ yoˬ tehꞈ ngaˬ hui yonˍ gʼa ve yoˬ.—Hpeuꞈ maˍ ve 21:3, 4.

14. “Awˬ kaˍ awˬ nu yawˬ” leh “i ve yawˬ” awˬ moˍ hkʼaˬ hkʼe te meuˆ daꞈ ve le?

¹⁴ Yeˍsuˆ yawˇ geh uˉ peunˍ ve chaw htaꞈ “i ve yawˬ” awˬ moˍ tehꞈ kuˬ ve yoˬ. (Luˉkaꞈ 12:32) Leh  yawˇ 2 moˍ teˇ moˍ htaꞈ kaꞈ kʼoˆ sheˍ ve yoˬ. Yawˇ yawˇ hui htaꞈ “awˬ kaˍ awˬ nu yawˬ” tehꞈ kuˬ leh chi ve 2 moˍ pawnˇ daꞈ leh teˇ moˍ tiˉ hpehꞈ tuˬ yoˬ. (Yoˇhanˬ 10:16) Chi teˇ hkui chi ve 2 moˍ kanˉ teˇ geh te chehˇ ve yoˬ. Leh awˬ gʼuˇ suhˍ hpawˇ kʼo “i ve yawˬ” awˬ moˍ mvuhˇ naw ma hkʼoˆ lo chehˇ leh “awˬ kaˍ awˬ nu yawˬ” miˬ guiˬ awˬ suhˉ hkʼaw chehˇ ve htawˇ, yawˇ hui kanˉ teˇ geh kʼawꞈ te tuˬ yoˬ. Miˬ guiˬ awˬ suhˉ hkʼaw gʼa chehˇ tuˬ “awˬ kaˍ awˬ nu yawˬ” chi teˇ hkui aˬ htoꞈ ma gʼa te sheˍ ve le?

15. (a) “Awˬ kaˍ awˬ nu yawˬ” Yeˍsuˆ ve awˬ viˉ awˬ nyi htaꞈ hkʼaˬ hkʼe te ga piˇ gʼa tuˬ le? (b) Awˬ viˉ awˬ nyi naˆ tsuhˇ hawˇ kuiˬ sainˍ hkʼaw kʼai ve chaw htaꞈ nawˬ hkʼaˬ hkʼe te henˇ yuˬ gʼa ve le? (Awˬ han htaꞈ nyi sheˍ.)

¹⁵ Chaw haiˬ venˇ baˆ dawˇ hpfuhˆ ve oˇ ve teˇ gʼaˇ lehˬ, Yeˍsuˆ te ve awˬ ceuˬ htaꞈ awˬ hpfuhˇ shiˍ ve tehꞈ maˇ gʼa hpeuꞈ maw piˇ sheˍ htaˇ yawˇ awˉ lawˉ suh˗e ve yoˬ. Yaꞈ hkʼaˇ, chi teˇ hkui ngaˬ hui “awˬ kaˍ awˬ nu yawˬ” hpehꞈ ve lehˬ, Yeˍsuˆ te ve awˬ ceuˬ htaꞈ awˬ hpfuhˇ shiˍ ve tehꞈ hpeuꞈ maw piˇ tuˬ awˬ yanˇ cawˬ ve yoˬ. Tawˇ pa haˉ te kʼo, ngaˬ hui Yeˍsuˆ htaꞈ haꞈ leh yawˇ hpawˇ chehˇ ve tehꞈ hpeuꞈ maw piˇ ve lehˬ, awˬ viˉ awˬ nyi leuˆ yuˬ taˍ ve chaw htaꞈ ga piˇ ve yoˬ. Yeˍsuˆ kʼoˆ ve, a shu teˇ gʼaˇ yawˬ hpehꞈ ve tehꞈ shiˍ tuˬ yawˇ ve awˬ viˉ awˬ nyi htaꞈ te piˇ ve awˬ ceuˬ htaꞈ mawˬ gʼa ve yoˬ. (Maꞈhtehˍ 25:31-40) Ngaˬ hui Yeˍsuˆ ve awˬ viˉ awˬ nyi htaꞈ ga piˇ gʼa ve lehˬ, kaiˬ ve hkʼaw hto toˇ leh shu awˬ laꞈ gʼawˇ hpehꞈ la tuˬ te ve yoˬ. (Maꞈhtehˍ 28:18-20) Hkʼe te leh, Liꞈ hpu maˍ tuˬ ve laꞈ caˉ yawˇ hui gu laˇ ve htaꞈ ngaˬ hui yehˇ gaˇ ve yoˬ. Tawˇ pa haˉ te kʼo, Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ yehˇ gʼa ve yoˬ. Chi teˇ hkui nawˬ liꞈ kʼoˆ chi teˇ maˬ htaꞈ yehˇ leh Liꞈ hpu maˍ piˇ ve chaw teˇ gʼaˇ kaꞈ maˇ cawˬ sheˍ ve kʼo, te gʼa ve hkʼe awˬ nu ve chaw htaꞈ jehˬ piˇ leh Liꞈ hpu maˍ piˇ tuˬ dawˇ teh taˍ cawˇ ve yoˬ.

16. Miˬ guiˬ awˬ suhˉ hkʼaw Gʼuiˬ sha ve mvuhˇ miˬ yaˇ hpehꞈ tuˬ chi teˇ hkui kaꞈ ngaˬ hui aˬ htoꞈ ma gu hehnˇ taˍ cawˇ ve le?

¹⁶ Miˬ guiˬ awˬ suhˉ hkʼaw Yaˬhoˉvaˬ chehˇ tcuh gaˇ ve chaw hpehꞈ tuˬ, ngaˬ hui chi teˇ hkui kaꞈ a shu yawˇ ve te hkʼaˇ dawˇ hkʼaˇ gʼa pa cawˇ ve yoˬ. Ngaˬ hui tawˇ yaw ve leh te ve hkʼaw ka tiꞈ gʼa yeˬ cawˇ leh a shaꞈ teꞈ kuiˬ hkʼaw keunˍ daꞈ cawˇ daꞈ ve gʼa te ve yoˬ. Ngaˬ hui lehˬ Yaˬhoˉvaˬ, a shu yawˇ ve awˬ ca, leh awˬ viˉ awˬ nyi htaꞈ kaꞈ ka tiꞈ gʼa yeˬ ve yoˬ. Ngaˬ hui haiˬ ve miˬ guiˬ chi hkʼoˆ lo chehˇ htaˇ, Yaˬhoˉvaˬ ve awˬ liˇ awˬ hkʼaˇ htaꞈ a shaꞈ teꞈ kuiˬ hkʼaw hkʼa dehꞈ yuˬ yehˇ ve kʼo, miˬ guiˬ awˬ suhˉ hkʼaw chehˇ htaˇ Yaˬhoˉvaˬ ve awˬ liˇ awˬ hkʼaˇ htaꞈ a shaꞈ teꞈ kuiˬ hkʼaw caˉ leh yuˬ yehˇ tuˬ sha ve yoˬ. Chi hkʼoˆ kaꞈ, ngaˬ hui puiˉ ve hpehꞈ ve teˇ ceuˬ ceuˬ  htaꞈ te jaw ve, maˇ heˆ leh awˬ nu ve daꞈ ve te hkʼaˇ dawˇ hkʼaˇ htaꞈ te jaw ve kʼo, Gʼuiˬ sha ve miˬ guiˬ awˬ suhˉ hkʼaw ngaˬ hui chehˇ tuˬ gu hehnˇ taˍ ve tehꞈ hpeuꞈ maw piˇ ve yoˬ. Shaw nyi kuiˬ Taꞈ yehˬ chi teˇ kʼoˆ hkʼaw, ‘Miˬ guiˬ lehˬ nawˬ gʼa tuˬ ve awˬ shinˉ hpehꞈ ve’ tehꞈ gu hehnˇ taˍ˗oˬ laˇ? hkʼaw nyi sheˍ.

17. Peuˬ laˬ htaˇ te jaw ve awˬ ceuˬ htaꞈ pa taw ngaˬ hui nyi ma luˬ chehˇ sheˍ ve laˇ? Tawˇ pa haˉ kʼoˆ maˍ laˇ sheˍ.

¹⁷ Chi hkʼoˆ kaꞈ, peuˬ laˬ htaˇ te jaw ve awˬ ceuˬ htaꞈ pa taw ngaˬ hui nyi ma luˬ chehˇ sheˍ ve kʼo, nyi ma maˇ luˬ tuˬ coˇ caˇ sheˍ. Yaꞈ hkʼaˇ Yeˍsuˆ htaiˍ hkʼawꞈ laˇ˗oˬ ve tehꞈ kʼoˆ leh “venˇ baˆ kʼawꞈ te ve” maˇ hpehꞈ. (Heˍbrehˇ 10:26-31) Ngaˬ hui venˇ baˆ uiˍ jaˇ ve htaꞈ te ve htawˇ, ngaˬ hui awˬ tehˬ awˬ na venˇ baˆ dawˇ hpfuhˆ leh Yaˬhoˉvaˬ leh nyi haꞈ shaˉ paˍ ga laˇ tuˬ lawˬ leh a shu yawˇ ve te hkʼaˇ dawˇ hkʼaˇ pa ve kʼo, Yaˬhoˉvaˬ ngaˬ hui htaꞈ venˇ baˆ hpehˇ laˇ tuˬ yoˬ tehꞈ yonˍ gʼa ve yoˬ. (Iˉsaˍyaˆ 55:7; Tcuh yaˇ 3:19) Yeˍsuˆ Hpaˍriˍsehˇ hui htaꞈ kʼoˆ piˇ ve tawˇ hkawˇ ngaˬ hui hkʼaˬ htaˆ kaꞈ tawnˇ taˍ cawˇ ve yoˬ. Yawˇ kʼoˆ ve, “hteˇ ve cawˇ ve chaw hui htaꞈ kuˬ yuˬ tuˬ ngaˬ laˬ ve maˇ heˆ. Venˇbaˆ yaˇ hui htaꞈ kuˬ yuˬ tuˬ ngaˬ laˬ ve yoˬ.” (Maꞈhtehˍ 9:13) Yeˍsuˆ htaiˍ hkʼawꞈ laˇ ve awˬ hpfuhˇ ngaˬ hui ve venˇ baˆ hkʼa peu˗eˬ htaꞈ yuˬ baˬ laˇ tuˬ kanˇ paˆ cawˬ ve yoˬ.

18. Yeˍsuˆ awˬ paˇ lo ve chaw haiˬ teˇ gʼaˇ htaꞈ nawˬ aˬ htoꞈ ma awˬ lawn yaw daꞈ gaˇ ve le?

¹⁸ Nawˬ miˬ guiˬ awˬ suhˉ hkʼaw chehˇ leh Yeˍsuˆ geh yaw daꞈ ve chaw haiˬ teˇ gʼaˇ htaꞈ, nawˬ yawˇ geh yaw daꞈ chehˇ ve htaꞈ dawˇ mawˬ nyi sheˍ. Yeˍsuˆ htaiˍ hkʼawꞈ laˇ ve awˬ hpfuhˇ awˬ bon hkʼaˬ hkʼe taw uiˍ ve awˬ lawn nawˬ huiˉ maˬ yaw daꞈ ve yoˬ hehˉ. Yeˍsuˆ suh˗e la yoˬ te htaˇ, hkʼaˬ hkʼe hpehꞈ ve awˬ lawn nawˬ yawˇ htaꞈ kʼoˆ maˍ laˇ tcuh ve yoˬ hehˉ. Yeˍsuˆ yawˇ htaꞈ oˇ hkʼe hkʼawꞈ piˇ ve yawˇ hkʼaˬ hkʼe dawˇ ve htaꞈ nawˬ na nyi piˇ ve yoˬ hehˉ. Awˬ leh meuˇ ve awˬ yanˇ Saˍtanˍ uˉ peunˍ ve a shaꞈ teꞈ hkʼaˇ hkʼaˬ hkʼe hpehꞈ ve, yawˇ kaꞈ nawˬ htaꞈ na nyi laˇ tuˬ yoˬ hehˉ. Miˬ guiˬ awˬ suhˉ hkʼaw hawˉ hkʼaˆ chi ve teˇ gʼaˇ hkʼe ve chaw htaꞈ nawˬ kaꞈ Liꞈ hpu gʼa maˍ piˇ ve, hkʼaˬ hkʼe taw daꞈ jaˇ ve htaꞈ dawˇ nyi sheˍ.—Eˇfeˇsuꞈ 4:22-24.

19. Miˬ guiˬ awˬ suhˉ hkʼaw ve a shaꞈ teꞈ hkʼaˇ aˬ htoꞈ ma te ha lehˬ jaˇ ve le? (Awˬ htaꞈ hpawˇ ve awˬ han htaꞈ nyi sheˍ.)

¹⁹ Miˬ guiˬ awˬ suhˉ hkʼaw ve a shaꞈ teꞈ hkʼaˇ ha lehˬ jaˇ ve yoˬ. Ngaˬ hui ha lehˬ ve hkʼaw kanˉ gʼa te leh laiˉ chaw ceuˬ htaꞈ gʼa mawˬ daꞈ tuˬ yoˬ. A yeˇ uiˍ jaˇ ve lehˬ, teˇ nyi le le ngaˬ hui Yaˬhoˉvaˬ geh hkʼa dehꞈ meuˆ daꞈ maˇ la tuˬ awˬ hkʼaˇ cawˬ leh yawˇ ngaˬ hui htaꞈ peꞈ laˇ ve awˬ ceuˬ htaꞈ kaꞈ ha lehˬ gʼa ve yoˬ. Ngaˬ hui lehˬ Yaˬhoˉvaˬ leh yawˇ hpanˍ taˍ ve awˬ ceuˬ hkʼa peu˗eˬ htaꞈ caˉ daꞈ ve gʼa henˇ tuˬ yoˬ. Ngaˬ hui ve a shaꞈ shaˬ te shaˬ gʼa chehˇ maw ve kʼo, yawˇ htaꞈ gʼaˇ hteꞈ haꞈ maˇ la tuˬ yoˬ. Ngaˬ hui miˬ guiˬ awˬ suhˉ hkʼaw co co taiˍ taiˍ gʼa chehˇ tuˬ yoˬ tehꞈ, Yaˬhoˉvaˬ leh Yeˍsuˆ ka tiꞈ te laˇ ve htaꞈ awˬ bon uiˍ jaˇ ve yoˬ.