Awˬ Lawn 49
Ngaˬ hui co co taiˍ taiˍ a shaꞈ gʼa hpehꞈ ve
‘Yawˇ hui co tiꞈ ha tiꞈ gʼa tuˬ yoˬ.ʼ—YOˇHANˬ 17:3.
KʼA MUIˬ HKAWˇ 147 Ka tiꞈ co co taiˍ taiˍ ve a shaꞈ
HENˇ TUˬ VE TEˇ HPAˍ a
1. Co co taiˍ taiˍ a shaꞈ gʼa tuˬ ka tiꞈ te laˇ taˍ ve htaꞈ ngaˬ hui dawˇ nyi htaˇ, hkʼaˬ hkʼe dawˇ tuˬ te laˇ ve le?
Yaˬhoˉvaˬ hkawˇ na yuˬ ve chaw “co co taiˍ taiˍ” ve a shaꞈ gʼa tuˬ yoˬ tehꞈ yawˇ ka tiꞈ te taˍ laˇ ve yoˬ. (Roˉmaꞈ 6:23) Ka tiꞈ chi ve htaꞈ ngaˬ hui dawˇ nyi htaˇ, ngaˬ hui yawˇ htaꞈ haꞈ maˇ la ve yoˬ. Yaˬhoˉvaˬ ngaˬ hui htaꞈ haꞈ jaˇ ve pa taw, ngaˬ hui htaꞈ maˇ suh˗e tcuh gaˇ leh ngaˬ hui yawˇ geh hkʼaˬ htaˆ kaꞈ chehˇ tcuh gaˇ ve yoˬ.
2. Co co taiˍ taiˍ a shaꞈ gʼa tuˬ ka tiꞈ te taˍ laˇ ve ngaˬ hui htaꞈ hkʼaˬ hkʼe ga laˇ gʼa ve le?
2 Co co taiˍ taiˍ a shaꞈ gʼa tuˬ Gʼuiˬ sha ka tiꞈ te taˍ laˇ ve lehˬ, chi teˇ hkui ngaˬ hui gʼa hpuˇ chehˇ ve tuꞈ ve hkanˍ ve htaꞈ yeunˇ hkanˍ gʼaˇ tuˬ ga laˇ ve yoˬ. Canˇ paˍ ngaˬ hui htaꞈ tiˇ pehˍ laˇ tuˬ yoˬ tehꞈ kawˆ ho laˇ ve htawˇ, ngaˬ hui Yaˬhoˉvaˬ ve kanˉ caˉ leh te tuˬ yoˬ. Aˬ htoꞈ ma pa taw le? Awˬ hkʼaˇ teˇ hkʼaˇ lehˬ, ngaˬ hui Yaˬhoˉvaˬ htaꞈ ka tiꞈ yeˬ leh gʼa suh ve htawˇ, yawˇ kʼawꞈ teꞈ tu la tcuh laˇ tuˬ yoˬ tehꞈ ngaˬ hui shiˍ ve yoˬ. Yawˇ lehˬ ngaˬ hui htaꞈ co co taiˍ taiˍ a shaꞈ teꞈ chehˇ tcuh laˇ tuˬ yoˬ tehꞈ shiˍ ve yoˬ. (Yoˇhanˬ 5:28, 29; 1 Kawˇrenˍhtuˆ 15:55-58; Heˍbrehˇ 2:15) Ngaˬ hui co co taiˍ taiˍ ve a shaꞈ cawˬ gʼa tuˬ yoˬ tehꞈ aˬ htoꞈ ma te yonˍ gʼa ve le? Awˬ hawˉ lo ve awˬ hkʼaˇ teˇ hpaˍ htaꞈ teˇ geh kʼawꞈ nyi sheˍ.
YAˬHOˉVAˬ LEHˬ CO CO TAIˍ TAIˍ TEꞈ CHEHˇ VE
3. Yaˬhoˉvaˬ lehˬ ngaˬ hui htaꞈ co co taiˍ taiˍ ve a shaꞈ teꞈ chehˇ tcuh laˇ gʼa tuˬ yoˬ tehꞈ aˬ htoꞈ ma te yonˍ gʼa ve le? (Chiˇ mvuh ve 102:12, 24, 27)
3 Yaˬhoˉvaˬ lehˬ ngaˬ hui htaꞈ co co taiˍ taiˍ ve a shaꞈ teꞈ chehˇ tcuh gaˇ ve tehꞈ shiˍ ve yoˬ. Yaˬhoˉvaˬ lehˬ a shaꞈ teꞈ ve awˬ hkuiˉ pui hpehꞈ leh yawˇ lehˬ co co taiˍ taiˍ teꞈ chehˇ ve yoˬ. (Chiˇ mvuh ve 36:9) Yaˬhoˉvaˬ lehˬ co co taiˍ taiˍ teꞈ chehˇ leh yawˇ lehˬ co co taiˍ taiˍ yeˬ chehˇ leh maˇ suh puiˉ ve tehꞈ Liꞈ hpu laiˉ tawn hkʼaw gʼa mawˬ ve yoˬ. Liꞈ hpu teˇ tawn tawn htaꞈ teˇ geh nyi sheˍ. Chiˇ mvuh ve liꞈ 90:2 hkʼaw kʼoˆ ve, Yaˬhoˉvaˬ lehˬ “co co taiˍ taiˍ Gʼuiˬ sha hpehꞈ chehˇ taˍ ve yoˬ.” Leh Chiˇ mvuh ve liꞈ kaˇ nanˉ uiˍ 102 hkʼaw chi ve teˇ tawn htaꞈ shuˍ ve laiˉ tawn hkʼaw kaꞈ kʼoˆ taˍ ve yoˬ. (Chiˇ mvuh ve 102:12, 24, 27 gʼaw sheˍ.) Chi hkʼoˆ kaꞈ, tcuh kaˍ paˍ Haˍbaˍkuˆ Yaˬhoˉvaˬ htaꞈ kʼoˆ sheˍ ve, “Gʼuiˬ sha˗oˬ, awˬ hkuiˉ puiˍ htaˇ kaꞈ nawˬ lehˬ Gʼuiˬ sha hpehꞈ chehˇ taˍ ve yoˬ. Nawˬ lehˬ daꞈ kehˬ jaˇ leh co co taiˍ taiˍ teꞈ chehˇ ve ngaˬ ve Gʼuiˬ sha hpehꞈ ve yoˬ.”—Haˍbaˍkuˆ 1:12.
4. Gʼuiˬ sha lehˬ co co taiˍ taiˍ teꞈ chehˇ leh kʼawꞈ teꞈ chehˇ tuˬ ve awˬ lawn ngaˬ hui maˇ na gʼa ve kʼo, chi aˬ htoꞈ ma te ngaˬ hui htawˇ dawˇ nawˬ dawˇ maˇ cawˬ cawˇ ve le?
4 ‘Yaˬhoˉvaˬ lehˬ co co taiˍ taiˍ teꞈ chehˇ ve Gʼuiˬ sha hpehꞈ ve tehꞈ nawˬ na gʼa tuˬ haˍ ve awˬ lawn hpehꞈ˗aw laˇ?ʼ (Iˉsaˍyaˆ 40:28) Nawˬ chi hkʼe dawˇ ve kʼo anˇ tuˬ maˇ loˍ. Eˇliˇhuˆ Gʼuiˬ sha htaꞈ kʼoˆ ve, “yawˇ hkʼaˬ ma uiˍ jaˇ mvuh jaˇ ve htaꞈ ngaˬ hui hkʼa biˇ shiˍ maˇ hpehꞈ.” (Yawˇbaˆ 36:26) Yaꞈ hkʼaˇ, ngaˬ hui teˇ ceuˬ ceuˬ maˇ na gʼa ve kʼo, oˇ ve awˬ tehˬ maˇ cawˬ ve tehꞈ kʼoˆ gaˇ ve maˇ heˆ. Tawˇ pa haˉ te kʼo, awˬ gʼeuˆ htaꞈ caˉ daꞈ ve ngaˬ hui hkʼa dehꞈ maˇ na gʼa ve htawˇ, awˬ gʼeuˆ awˬ tehˬ maˇ cawˬ ve tehꞈ kʼoˆ gaˇ ve maˇ heˆ. Yaˬhoˉvaˬ lehˬ co co taiˍ taiˍ teꞈ chehˇ leh maˇ suh puiˉ ve tehꞈ chaw yaˇ maˇ na gʼa ve htawˇ, Yaˬhoˉvaˬ lehˬ co co taiˍ taiˍ maˇ teꞈ chehˇ ve tehꞈ kʼoˆ gaˇ ve maˇ heˆ. Hpanˍ shehˍ hpaˇ ve awˬ lawn ngaˬ hui na gʼa ve maˇ heˆ leh maˇ na gʼa ve htawˇ, Gʼuiˬ sha htaꞈ caˉ daꞈ ve awˬ tehˬ ve awˬ lawn maˇ pa. (Roˉmaꞈ 11:33-36) Yaˬhoˉvaˬ lehˬ mvuhˇ naw ma miˬ naˆ ma leh mvuhˇ nyi awˬ gʼeuˆ maˇ cawˬ sheˍ htaˇ kaꞈ teꞈ chehˇ taˍ ve yoˬ. Yaˬhoˉvaˬ lehˬ yawˇ ve “kanˇ paˆ htaꞈ yehˇ leh, miˬ guiˬ leh mvuhˇ naw ma htaꞈ te hpanˍ taˍ ve yoˬ.” Leh Gʼuiˬ sha lehˬ “mvuhˇ naw ma” maˇ cawˬ sheˍ htaˇ kaꞈ yawˇ a shaꞈ teꞈ chehˇ taˍ ve yoˬ. (Yeˍraˍmiˆ 51:15; Tcuh yaˇ 17:24) Ngaˬ hui co co taiˍ taiˍ a shaꞈ cawˬ gʼa tuˬ tehꞈ yonˍ gʼa ve awˬ nu ve awˬ hkʼaˇ cawˬ sheˍ laˇ?
NGAˬ HUI CO CO TAIˍ TAIˍ TEꞈ CHEHˇ GʼA TUˬ HPANˍ TAˍ LAˇ VE
5. Chaw yaˇ awˉ lawˉ teˇ ca aˬ htoꞈ ma dawˇ law kuiˬ cawˬ ve le?
5 Miˬ guiˬ hkʼoˆ lo Yaˬhoˉvaˬ hpanˍ taˍ ve awˬ ceuˬ teˇ hpaˍ lehˬ, chaw yaˇ ceh tiˉ maˇ suh puiˉ ve daꞈ jaˇ ve dawˇ law kuiˬ peꞈ laˇ taˍ ve yoˬ. Yaꞈ hkʼaˇ, Yaˬhoˉvaˬ Aˍdanˍ htaꞈ shaˍ tiꞈ piˇ ve, “daꞈ ve leh maˇ daꞈ ve htaꞈ shiˍ puiˉ ve suhˆ cehˬ oˇ ve teˇ cehˬ ve awˬ shiˍ htaꞈ nawˬ taˇ caˇ. Nawˬ lehˬ suhˆ cehˬ oˇ ve teˇ cehˬ ve awˬ shiˍ htaꞈ caˇ ve kʼo, awˬ tehˬ awˬ na gʼa suh tuˬ yoˬ.” (Awˬ hkuiˉ puiˍ 2:17) Aˍdanˍ leh Eˇvaꞈ Yaˬhoˉvaˬ hkawˇ na yuˬ ve kʼo, yawˇ hui maˇ gʼa suh taˬ. Hkʼe te leh, Yaˬhoˉvaˬ lehˬ yawˇ hui htaꞈ “co co teꞈ chehˇ piˇ lawˬ gʼa ve iˉ shiˍ” oˇ ve caˍ piˇ gʼa ve tehꞈ kʼoˆ gʼa ve yoˬ. Chi kʼoˆ gaˇ ve lehˬ yawˇ hui htaꞈ “co co taiˍ taiˍ teꞈ chehˇ piˇ lawˬ” gʼa ve yoˬ. b—Awˬ hkuiˉ puiˍ 3:22.
6-7. (a) Gʼuiˬ sha lehˬ chaw yaˇ htaꞈ suh puiˉ tuˬ hpanˍ taˍ laˇ ve maˇ heˆ tehꞈ aˬ htoꞈ ma awˬ hkʼaˇ hpeuꞈ maw laˇ sheˍ ve le? (b) Miˬ guiˬ awˬ suhˉ hkʼaw nawˬ aˬ htoꞈ ma htaꞈ te gaˇ ve le? (Awˬ han htaꞈ nyi sheˍ.)
6 Chaw yaˇ ve uˉ nawꞈ nehˆ lehˬ awˬ lawn awˬ tanˇ gʼawˆ keu gʼa maˇ jaˇ ve tehꞈ chaˬ nyi tehˆ nyi paˍ teˇ hpaˍ shaˉ hkiˆ gʼa mawˬ ve htaꞈ nyi ma pfuhˇ lawꞈ lawꞈ te laˇ ve yoˬ. Paw htaˇ tanˬ leh suh htaˇ hkʼa gaˬ ngaˬ hui ve uˉ nawꞈ nehˆ yehˇ gʼa ve yoˬ. 2010 hkʼawꞈ htaˇ ve liꞈ kʼoˆ teˇ kʼoˆ hkʼaw kʼoˆ ve, ngaˬ hui ve uˉ nawꞈ nehˆ hkʼaw awˬ lawn 2.5 lanˇ hkʼe taw cawˬ gʼa ve maˇ heˆ leh awˬ han zuhˬ jaˇ ve 3 lanˇ naˍriˍ hkʼe taw maˇ ve yoˬ. (300 hkʼawꞈ hpaˆ) Awˬ tehˬ kʼo ngaˬ hui ve uˉ nawꞈ nehˆ lehˬ chi ve aꞈ kehˉ kaꞈ awˬ lawn gʼawˆ teh gʼa maˇ jaˇ sheˍ. Yaˬhoˉvaˬ lehˬ ngaˬ hui ve uˉ nawꞈ nehˆ htaꞈ 70 hkʼawꞈ maˇ heˆ leh 80 hkʼawꞈ hpaˆ ceh tiˉ yehˇ gʼa ve maˇ heˆ tehꞈ hpeuꞈ maw laˇ ve yoˬ.—Chiˇ mvuh ve 90:10.
7 Yaˬhoˉvaˬ lehˬ ngaˬ hui htaꞈ co co taiˍ taiˍ a shaꞈ teꞈ chehˇ tuˬ hpanˍ taˍ laˇ ve yoˬ. Liꞈ hpu hkʼaw kʼoˆ ve, Yaˬhoˉvaˬ lehˬ chaw yaˇ htaꞈ co co taiˍ taiˍ ve a shaꞈ cawˬ gaˇ tuˬ ve nyi ma yawˇ piˇ laˇ taˍ peuˬ ve yoˬ. (Cuˇ yiˍ piˇ ve 3:11) Hkʼe te leh, suh ve teˇ ceuˬ lehˬ ngaˬ hui ve canˇ paˍ hpehꞈ ve tehꞈ shawˍ ve yoˬ. (1 Kawˇrenˍhtuˆ 15:26) Ngaˬ hui naˬ jaˇ htaˇ teꞈ chiˉ maˇ te leh suh tuˬ law taˍ ve laˇ? Chi hkʼe maˇ heˆ. Ngaˬ hui naˬ ve htaꞈ haꞈ shaˉ tuˬ saˍ laꞈ gʼonˍ geh kʼai ve, maˇ heˆ leh maˇ gʼa suh tuˬ naˆ tsuhˇ dawˬ ve, leh ngaˬ hui te gʼa ve hkʼe teˇ ceuˬ le le te ve yoˬ. Ngaˬ hui haꞈ ve chaw a shaꞈ i ve maˇ heˆ leh a shaꞈ maˇ ve suh ve kʼo, ngaˬ hui awˬ yanˇ maw chaweh nyi ma luˬ ve yoˬ. (Yoˇhanˬ 11:32, 33) Ngaˬ hui maˇ suh gaˇ ve lehˬ Yaˬhoˉvaˬ ngaˬ hui htaꞈ co co taiˍ taiˍ teꞈ chehˇ tuˬ hpanˍ taˍ laˇ ve yoˬ. Yaˬhoˉvaˬ ngaˬ hui htaꞈ co co taiˍ taiˍ teꞈ chehˇ tcuh gaˇ leh ngaˬ hui co co taiˍ taiˍ teꞈ chehˇ gʼa tuˬ yawˇ ga laˇ tuˬ yoˬ tehꞈ yonˍ gʼa ve yoˬ. Ngaˬ hui co co taiˍ taiˍ teꞈ chehˇ gʼa tuˬ tehꞈ yonˍ gʼa tuˬ awˬ nu ve awˬ hkʼaˇ kaꞈ cawˬ sheˍ ve yoˬ. Yaˬhoˉvaˬ te jaw ve leh chi teˇ hkui yawˇ te chehˇ ve awˬ ceuˬ lehˬ yawˇ dawˇ taˍ ve awˬ ceuˬ htaꞈ maˇ pa ve tehꞈ ngaˬ hui mawˬ tuˬ te laˇ gʼa ve htaꞈ teˇ geh nyi sheˍ.
Awˬ gʼuˇ suhˍ hpawˇ co co taiˍ taiˍ ve a shaꞈ gʼa htaˇ, ngaˬ hui gʼa tuˬ ve awˬ ceuˬ teˇ hpaˍ htaꞈ dawˇ nyi ve ha lehˬ ve (Awˬ tawn 7 nyi sheˍ) c
YAˬHOˉVAˬ DAWˇ TEH TAˍ VE HTAꞈ MAˇ PA
8. Iˉsaˍyaˆ liꞈ 55:11 hkʼaw Gʼuiˬ sha dawˇ teh taˍ ve htaꞈ caˉ daꞈ ve ngaˬ hui htaꞈ hkʼaˬ hkʼe maˍ laˇ ve le?
8 Aˍdanˍ leh Eˇvaꞈ venˇ baˆ te leh yawˇ hui ve awˬ yaˇ awˬ duˬ hkʼa peu˗eˬ gʼa suh˗e ve htawˇ, Yaˬhoˉvaˬ awˉ lawˉ htaˇ dawˇ teh taˍ ve maˇ pa. (Iˉsaˍyaˆ 55:11 gʼaw sheˍ.) Gʼuiˬ sha lehˬ ka tiꞈ yeˬ ve chaw htaꞈ co co taiˍ taiˍ a shaꞈ teꞈ chehˇ tcuh gaˇ ve yoˬ. Ngaˬ hui chi hkʼe kʼoˆ gʼa ve lehˬ, Gʼuiˬ sha yawˇ kʼoˆ jaw ve awˬ ceuˬ leh yawˇ te jaw ve awˬ ceuˬ htaꞈ ngaˬ hui teˇ geh henˇ tuˬ yoˬ.
9. Gʼuiˬ sha aˬ htoꞈ ma ka tiꞈ te taˍ laˇ ve le? (Daˍyeˍlaˆ 12:2, 13)
9 Gʼuiˬ sha ka tiꞈ te taˍ laˇ ve suh peuˬ ve chaw htaꞈ kʼawꞈ teꞈ tu la piˇ leh yawˇ hui htaꞈ co co taiˍ taiˍ teꞈ chehˇ tcuh tuˬ yoˬ. (Tcuh yaˇ 24:15; Tiˇtuˆ 1:1, 2) Gʼuiˬ sha lehˬ suh peuˬ ve chaw htaꞈ kʼawꞈ teꞈ tu la tcuh piˇ gaˇ jaˇ ve tehꞈ, yawˇ ve kanˉ te ve ka tiꞈ yeˬ ve chaw yonˍ ve yoˬ. (Yawˇbaˆ 14:14, 15) Chaw yaˇ kʼawꞈ teꞈ tu la leh co co taiˍ taiˍ teꞈ chehˇ tcuh tuˬ yoˬ tehꞈ tcuh kaˍ paˍ Daˍyeˍlaˆ kaꞈ shiˍ ve yoˬ. (Chiˇ mvuh ve 37:29; Daˍyeˍlaˆ 12:2, 13 gʼaw sheˍ.) Yaˬhoˉvaˬ yawˇ ve kanˉ te ve ka tiꞈ yeˬ ve chaw htaꞈ co co taiˍ taiˍ teꞈ chehˇ tcuh tuˬ yoˬ tehꞈ ka tiꞈ chi ve htaꞈ Yeˍsuˆ kaꞈ laiˉ pawˆ kʼoˆ ve yoˬ. (Luˉkaꞈ 10:25; 18:18) Leh Yeˍsuˆ ve Awˬ pa Yaˬhoˉvaˬ kaꞈ Yeˍsuˆ htaꞈ suh kuiˬ lo kʼawꞈ teꞈ tu la piˇ ve yoˬ.—Maꞈhtehˍ 19:29; 22:31, 32; Luˉkaꞈ 18:30; Yoˇhanˬ 11:25.
Eˇliˇyaꞈ suh peuˬ ve chaw htaꞈ kʼawꞈ teꞈ tu la piˇ gʼa ve lehˬ ngaˬ hui aˬ htoꞈ ma awˬ lawn htaꞈ yonˍ gʼa tuˬ te laˇ ve le? (Awˬ tawn 10 nyi sheˍ)
10. Peuˬ taˉ ve awˬ yanˇ htaˇ kʼawꞈ teꞈ tu la ve awˬ lawn aˬ htoꞈ ma hpeuꞈ maw laˇ ve le? (Awˬ han htaꞈ nyi sheˍ.)
10 Yaˬhoˉvaˬ lehˬ a shaꞈ piˇ shehˍ hpaˇ hpehꞈ leh chaw yaˇ suh˗oˬ ve htaꞈ kʼawꞈ teꞈ tu la piˇ gʼa tuˬ yawˇ kanˇ paˆ cawˬ ve yoˬ. Yaˬhoˉvaˬ tcuh kaˍ paˍ Eˇliˇyaꞈ htaꞈ kanˇ paˆ chi hkʼe ve piˇ jaw ve yoˬ. Hkʼe te leh, Eˇliˇyaꞈ lehˬ Zaˍraˍtaˆ chaw mehˇ chawˇ ma ve yaˇ paˍ htaꞈ kʼawꞈ teꞈ tu la piˇ ve yoˬ. (1 Jawˇmawˇ 17:21-23) Peuˬ hkʼawꞈ nawˉ Yaˬhoˉvaˬ lehˬ tcuh kaˍ paˍ Eˇliˇshehˇ htaꞈ kaꞈ kanˇ paˆ piˇ leh Suˆnenˍ chaw mehˇ chawˇ ma ve yaˇ paˍ htaꞈ kaꞈ kʼawꞈ teꞈ tu la piˇ ve yoˬ. (2 Jawˇmawˇ 4:18-20, 34-37) Kʼawꞈ teꞈ tu la ve chi teˇ pawˆ leh awˬ nu ve laiˉ pawˆ Yaˬhoˉvaˬ lehˬ suh peuˬ ve chaw htaꞈ kʼawꞈ teꞈ tu la piˇ gʼa ve kanˇ paˆ cawˬ ve tehꞈ hpeuꞈ maw laˇ ve yoˬ. Leh Yeˍsuˆ miˬ guiˬ hkʼoˆ lo chehˇ htaˇ Yaˬhoˉvaˬ kanˇ paˆ chi hkʼe ve Yeˍsuˆ htaꞈ kaꞈ piˇ ve tehꞈ hpeuꞈ maw laˇ ve yoˬ. (Yoˇhanˬ 11:23-25, 43, 44) Chi teˇ hkui Yeˍsuˆ mvuhˇ naw ma hkʼoˆ Jawˇ mawˇ hpehꞈ˗oˬ. Yeˍsuˆ lehˬ ‘mvuhˇ naw ma hkʼoˆ leh miˬ guiˬ hkʼoˆ ve kanˇ paˆ hkʼa peu˗eˬ gʼa peuˬ.’ Hkʼe te leh, Yeˍsuˆ lehˬ Gʼuiˬ sha ka tiꞈ te taˍ ve tawˇ hkawˇ awˬ tehˬ biˇ la tuˬ te ve yoˬ. Oˇ kaˬ lo kʼoˆ ve, “tuˍ hpfuh awˬ hkʼaw lo chehˇ ve chaw hkʼa peu˗eˬ” kʼawꞈ teꞈ tu la leh co co taiˍ taiˍ teꞈ chehˇ tcuh tuˬ yoˬ.—Maꞈhtehˍ 28:18; Yoˇhanˬ 5:25-29.
11. Htaiˍ hkʼawꞈ ve awˬ hpfuhˇ ngaˬ hui co co taiˍ taiˍ ve a shaꞈ gʼa tuˬ hkʼaˬ hkʼe ga laˇ gʼa ve le?
11 Aˬ htoꞈ ma te Yaˬhoˉvaˬ lehˬ yawˇ haꞈ jaˇ ve Yaˇ paˍ Yeˍsuˆ htaꞈ tuꞈ ve hkanˍ ve hkʼaw suh˗e tcuh ve le? Yeˍsuˆ kʼoˆ ve, “Gʼuiˬ sha miˬ guiˬ yaˇ htaꞈ haꞈ jaˇ ve pa taw, yawˇ ve Yaˇ hpu tiˍ piˇ laˇ ve yoˬ. Hkʼe te leh, Yaˇ hpu htaꞈ hkʼa yonˍ ve chaw hkʼa peu˗eˬ maˇ gʼa luˬ maˇ gʼa sheˆ ve awˬ hkʼoˆ kaꞈ, co tiꞈ ha tiꞈ htaꞈ gʼa ve yoˬ.” (Yoˇhanˬ 3:16) Yaˬhoˉvaˬ lehˬ Yeˍsuˆ ve a shaꞈ htaꞈ ngaˬ hui co co taiˍ taiˍ a shaꞈ gʼa tuˬ awˬ pon htaiˍ hkʼawꞈ laˇ tcuh ve yoˬ. (Maꞈhtehˍ 20:28) Pawˇluꞈ kaꞈ awˬ lawn chi htaꞈ kʼoˆ ve, “chaw teˇ gʼaˇ htaꞈ pa taw suh ve teˇ ceuˬ cawˬ la ve hkʼe, chaw teˇ gʼaˇ htaꞈ pa taw suh ve chaw hui kʼawꞈ teꞈ tu la ve teˇ ceuˬ cawˬ la ve yoˬ. Aˍdanˍ awˬ hkʼaw lo chaw hkʼa peu˗eˬ suh ve hkʼe, Hkriꞈ awˬ hkʼaw lo chaw hkʼa peu˗eˬ kʼawꞈ teꞈ tu la tuˬ yoˬ.”—1 Kawˇrenˍhtuˆ 15:21, 22.
12. Yaˬhoˉvaˬ yawˇ dawˇ teh taˍ ve awˬ tehˬ hpehꞈ la tcuh tuˬ hkʼaˬ hkʼe te ve le?
12 Nawˬ ve mvuhˇ miˬ gaˬ la piˇ˗oˆ. Mvuhˇ naw ma hkʼoˆ lo nawˬ ve a loˍ biˇ ve hkʼe, miˬ guiˬ hkʼoˆ htaꞈ htawˇ biˇ la tuˬ, Yeˍsuˆ awˬ laꞈ gʼawˇ htaꞈ bon chi hkʼe lawˬ tuˬ maˍ piˇ ve yoˬ. (Maꞈhtehˍ 6:9, 10) Gʼuiˬ sha dawˇ teh taˍ ve teˇ ceuˬ lehˬ chaw yaˇ htaꞈ co co taiˍ taiˍ a shaꞈ teꞈ chehˇ tcuh gaˇ ve yoˬ. Chi hkʼe hpehꞈ gʼa tuˬ Yaˬhoˉvaˬ lehˬ Yeˍsuˆ htaꞈ mvuhˇ naw ma hkʼoˆ Jawˇ mawˇ hpehꞈ tuˬ leuˆ yuˬ ve yoˬ. Gʼuiˬ sha dawˇ taˍ ve hkʼe awˬ tehˬ hpehꞈ la gʼa tuˬ 144,000 gʼaˇ htaꞈ leuˆ yuˬ leh Yeˍsuˆ geh teˇ geh uˉ peunˍ tcuh ve yoˬ.—Hpeuꞈ maˍ ve 5:9, 10.
13. Chi teˇ hkui Yaˬhoˉvaˬ aˬ htoꞈ ma te chehˇ ve le? Leh ngaˬ hui yawˇ ve mvuhˇ miˬ hpawˇ chehˇ tuˬ aˬ htoꞈ ma gʼa te cawˇ ve le?
13 Yaˬhoˉvaˬ chaw awˬ moˍ lonˉ htaꞈ shaw hpoˆ chehˇ leh yawˇ hui Gʼuiˬ sha ve mvuhˇ miˬ uˉ peunˍ ve awˬ hawˉ lo chehˇ tuˬ maˍ piˇ ve yoˬ. (Hpeuꞈ maˍ ve 7:9, 10; Yaˍkoˆ 2:8) Chi beuꞈ teˇ co˗e miˬ guiˬ hkʼoˆ lo kawˆ ve leh maꞈ te daꞈ ve htaꞈ pa taw, maˇ cawˇ maˇ hawˍ daꞈ ve yoˬ. Yaꞈ hkʼaˇ, chaw awˬ moˍ lonˉ lehˬ Gʼuiˬ sha ve mvuhˇ miˬ hpawˇ chehˇ ve yoˬ. Mvuhˇ miˬ leh chaw ceuˬ nyi bawˬ daꞈ ve teˇ ceuˬ le le htaꞈ yawˇ hui maˇ cawˬ tcuh tuˬ coˇ caˇ leh te chehˇ ve yoˬ. Aˉ htaw htaꞈ laˇ hpuiˇ kʼawꞈ lawˍ tuˬ Liꞈ hpu hkʼaw kʼoˆ taˍ ve hkʼe yawˇ hui te chehˇ ve yoˬ. (Miˆhkaˍ 4:3) Maꞈ bawˆ ve htaꞈ caˉ daꞈ leh laiˉ gʼaˇ suh tcuh tuˬ te ve aꞈ kehˉ, yawˇ hui lehˬ awˬ nu ve chaw “awˬ tehˬ awˬ na yeˬ ve a shaꞈ” gʼa tuˬ ga piˇ ve yoˬ. Awˬ tehˬ ve Gʼuiˬ sha htaꞈ caˉ daꞈ ve awˬ lawn maˍ piˇ leh Gʼuiˬ sha aˬ htoꞈ ma dawˇ teh taˍ ve htaꞈ chaw yaˇ shiˍ tuˬ ga piˇ ve yoˬ. (1 Tiˆmoˉseˍ 6:19) Yawˇ hui htaꞈ yehˬ kʼa hkʼaw ve chaw tawˍ piˇ ve, yawˇ hui Gʼuiˬ sha ve mvuhˇ miˬ hpawˇ lo chehˇ ve pa taw, hpu hpawˇ shoꞈ shaꞈ ve awˬ lawn cawˬ ve yoˬ. Yaꞈ hkʼaˇ, yawˇ hui loˍ ve awˬ ceuˬ Yaˬhoˉvaˬ awˬ tehˬ ga piˇ tuˬ yoˬ. (Maꞈhtehˍ 6:25, 30-33; Luˉkaꞈ 18:29, 30) Awˬ ceuˬ chi ve hkʼa peu˗eˬ lehˬ Gʼuiˬ sha ve mvuhˇ miˬ awˬ tehˬ cawˬ ve tehꞈ, ngaˬ hui yonˍ gʼa tuˬ te laˇ leh Gʼuiˬ sha yawˇ dawˇ law taˍ ve awˬ ceuˬ awˬ tehˬ hpehꞈ la tcuh tuˬ yoˬ.
AWˬ GʼUˇ SUHˍ HPAWˇ DAꞈ JAˇ VE NGAˬ HUI HTAꞈ LAW TAˍ VE
14-15. Suh ve teˇ ceuˬ htaꞈ co co taiˍ taiˍ te luˬ piˇ tuˬ yoˬ tehꞈ Yaˬhoˉvaˬ ka tiꞈ te laˇ ve awˬ tehˬ hkʼaˬ hkʼe hpehꞈ la tuˬ le?
14 Chi teˇ hkui Yeˍsuˆ lehˬ mvuhˇ naw ma hkʼoˆ Jawˇ mawˇ te chehˇ˗oˬ. Leh Gʼuiˬ sha ka tiꞈ te taˍ ve teˇ ceuˬ le le htaꞈ yawˇ te tuˬ yoˬ. (2 Kawˇrenˍhtuˆ 1:20) 1914 hkʼawꞈ htaˇ tanˬ leh Yeˍsuˆ lehˬ yawˇ ve canˇ paˍ teˇ hpaˍ awˬ hkʼoˆ kanˇ paˆ cawˬ ve yoˬ. (Chiˇ mvuh ve 110:1, 2) Leh maˇ maw maw kʼo Yeˍsuˆ leh yawˇ geh uˉ peunˍ ve chaw lehˬ, canˇ paˍ teˇ hpaˍ htaꞈ gʼaˇ leh haiˬ ve chaw hkʼa peu˗eˬ htaꞈ te luˬ piˇ tuˬ yoˬ.—Hpeuꞈ maˍ ve 6:2.
15 Yeˍsuˆ uˉ peunˍ ve 1,000 hkʼawꞈ ve awˬ yanˇ htaˇ, suh ve chaw htaꞈ yawˇ kʼawꞈ teꞈ tu la piˇ leh na yuˬ ve chaw teˇ gʼaˇ le le htaꞈ biˇ ve chaw hpehꞈ tuˬ yawˇ ga piˇ tuˬ yoˬ. Lawˇ nyi piˇ ve awˬ leh meuˇ teˇ pawˆ peuˬ hkʼawꞈ nawˉ, daꞈ ve chaw hpehꞈ ve tehꞈ Yaˬhoˉvaˬ dawˇ cheˆ piˇ˗oˬ ve chaw lehˬ “mvuhˇ miˬ hkʼaw co co taiˍ taiˍ gʼa chehˇ tuˬ yoˬ.” (Chiˇ mvuh ve 37:10, 11, 29) Ngaˬ hui ha lehˬ jaˇ tuˬ ve lehˬ, “awˬ leh meuˇ te luˬ piˇ tuˬ ve canˇ paˍ lehˬ, suh ve teˇ ceuˬ htaꞈ” co co taiˍ taiˍ te luˬ piˇ tuˬ yoˬ.—1 Kawˇrenˍhtuˆ 15:26.
16. Ngaˬ hui Yaˬhoˉvaˬ ve kanˉ te ve a yeˇ uiˍ jaˇ ve lehˬ aˬ htoꞈ ma le?
16 Awˬ lawn chi ve hkʼaw ngaˬ hui gʼa henˇ kʼai peuˬ ve hkʼe, co co taiˍ taiˍ a shaꞈ gʼa tuˬ dawˇ law kuiˬ lehˬ Liꞈ hpu hkʼaw shaˉ hkiˆ hkʼa biˇ cawˬ ve yoˬ. Dawˇ law kuiˬ chi ve lehˬ, awˬ leh meuˇ ve awˬ yanˇ tuꞈ jaˇ hkanˍ jaˇ ve hkʼaw ngaˬ hui Yaˬhoˉvaˬ geh ka tiꞈ yeˬ gʼa tuˬ ga laˇ ve yoˬ. Yaꞈ hkʼaˇ, awˬ tehˬ awˬ na Yaˬhoˉvaˬ htaꞈ nyi hkʼaˇ suh ve te piˇ gʼa tuˬ ngaˬ hui co co taiˍ taiˍ ve a shaꞈ gʼa gaˇ ve pa taw te ve ceh maˇ gʼa hpehꞈ piˇ. Ngaˬ hui Yaˬhoˉvaˬ htaꞈ ka tiꞈ yeˬ gʼa tuˬ a yeˇ uiˍ jaˇ ve awˬ hkʼaˇ lehˬ, ngaˬ hui Yaˬhoˉvaˬ leh Yeˍsuˆ htaꞈ haꞈ jaˇ ve yoˬ. (2 Kawˇrenˍhtuˆ 5:14, 15) Haꞈ pehnˇ ve chi ngaˬ hui Yaˬhoˉvaˬ leh Yeˍsuˆ htaꞈ henˇ yuˬ gaˇ tuˬ te laˇ leh ngaˬ hui ve dawˇ law kuiˬ awˬ nu ve chaw htaꞈ kʼoˆ piˇ gaˇ tuˬ kaꞈ te laˇ ve yoˬ. (Roˉmaꞈ 10:13-15) Ngaˬ hui a shu yawˇ awˬ pon tiˉ maˇ dawˇ nyi leh shu htaꞈ piˇ gaˇ puiˉ ve nyi ma cawˬ tuˬ gʼa henˇ htaˇ, Yaˬhoˉvaˬ lehˬ ngaˬ hui htaꞈ yawˇ ve awˬ chawˇ co co taiˍ taiˍ te tcuh gaˇ ve yoˬ.—Heˍbrehˇ 13:16.
17. Ngaˬ hui teˇ gʼaˇ leh teˇ gʼaˇ aˬ htoꞈ ma te cawˇ ve le? (Maꞈhtehˍ 7:13, 14)
17 Co co taiˍ taiˍ ve a shaꞈ gʼa tuˬ ngaˬ hui kaꞈ teˇ gʼaˇ hpehꞈ˗aw laˇ? Yaˬhoˉvaˬ lehˬ ngaˬ hui htaꞈ co co taiˍ taiˍ a shaꞈ gʼa tuˬ awˬ hkʼaˇ peꞈ laˇ˗oˬ. Ngaˬ hui caˉ leh a shaꞈ gʼa tuˬ ve yaꞈ kʼaw hkʼoˆ lo chehˇ˗aw laˇ tehꞈ, chi teˇ hkui ngaˬ hui leuˆ yuˬ ve htaꞈ cawˬ ve yoˬ. (Maꞈhtehˍ 7:13, 14 gʼaw sheˍ.) Leh miˬ guiˬ awˬ suhˉ hkʼaw co co taiˍ taiˍ ve a shaꞈ hkʼaˬ hkʼe hpehꞈ tuˬ le? Awˬ lawn chi htaꞈ caˉ daꞈ ve gʼuˇ suhˍ teˇ lawn hkʼaw teˇ geh henˇ tuˬ yoˬ.
KʼA MUIˬ HKAWˇ 141 A shaꞈ lehˬ anˇ tuˬ hpehꞈ ve
a Nawˬ co co taiˍ taiˍ ve a shaꞈ gʼa tuˬ law chehˇ˗aw laˇ? Yaˬhoˉvaˬ ngaˬ hui htaꞈ ka tiꞈ te laˇ ve, teˇ nyi kʼo ngaˬ hui co co taiˍ taiˍ ve a shaꞈ gʼa leh ngaˬ hui gʼa suh tuˬ ve htaꞈ kawˆ tuˬ maˇ loˍ˗o. Yaˬhoˉvaˬ ka tiꞈ chi ve awˬ tehˬ hpehꞈ la tcuh tuˬ yoˬ tehꞈ ngaˬ hui hkʼa dehꞈ yonˍ gʼa tuˬ, awˬ lawn chi ve hkʼaw awˬ hkʼaˇ teˇ hpaˍ hpaˍ htaꞈ ngaˬ hui teˇ geh henˇ tuˬ yoˬ.
b Awˇ ceˍ awˇ fa “ Liꞈ hpu hkʼaw ‘co co taiˍ taiˍʼ kʼoˆ ve” htaꞈ nyi sheˍ.
c AWˬ HAN HTAꞈ KʼOˆ MAˍ TAˍ VE: Awˬ viˉ awˬ nyi chaw mawˇ yawˇ co co taiˍ taiˍ ve a shaꞈ gʼa htaˇ te tuˬ ve awˬ ceuˬ htaꞈ dawˇ nyi chehˇ ve.
