1. ‘Gʼuiˬ sha lo laˬ ve dawˇ sha gaˇ sha ve’ ngaˬ hui cawˬ ve kʼo, aˬ htoꞈ ma awˬ bon gʼa tuˬ le? (Hpiˇliˇpiˆ 4:6, 7)

 Dawˇ sha gaˇ sha ve teˇ ceuˬ miˬ guiˬ hkʼoˆ maˇ˗awˍ ve chaw maˇ shiˍ ve yoˬ. Chi ve lehˬ, ‘Gʼuiˬ sha lo laˬ ve dawˇ sha gaˇ sha ve’ yoˬ. Awˬ pa Yaˬhoˉvaˬ geh meuˆ daꞈ ve pa taw, Gʼuiˬ sha lo laˬ ve dawˇ sha gaˇ sha ve lehˬ, nyi ma gawˬ lehˍ cawˬ ve htaꞈ kʼoˆ gaˇ ve yoˬ. Ngaˬ hui Gʼuiˬ sha lo laˬ ve dawˇ sha gaˇ sha ve cawˬ ve kʼo, ngaˬ hui nyi ma sha leh kawˆ tuˬ maˇ cawˬ. (Hpiˇliˇpiˆ 4:6, 7 gʼaw sheˍ.) Ngaˬ hui Yaˬhoˉvaˬ “dawˇ sha piˇ shehˍ hpaˇ Gʼuiˬ sha” geh meuˆ daꞈ tuˬ yoˬ. Leh Gʼuiˬ sha haꞈ ve chaw geh kaꞈ ngaˬ hui meuˆ daꞈ tuˬ yoˬ. (1 Hteˇsaˍlawˇniˆ 5:23) Chi hkʼoˆ kaꞈ, ngaˬ hui Yaˬhoˉvaˬ htaꞈ shiˍ ve, yawˇ htaꞈ gʼaˇ va ve leh yawˇ ve hkawˇ na yuˬ ve kʼo, Gʼuiˬ sha lo laˬ ve dawˇ sha gaˇ sha ve ngaˬ hui nyi ma gawˬ lehˍ cawˬ tuˬ ga laˇ leh ngaˬ hui shoꞈ shaꞈ ve gʼa hpuˇ htaˇ hkʼe taw maˇ dawˇ haˍ.

2. Gʼuiˬ sha lo laˬ ve dawˇ sha gaˇ sha ve ngaˬ hui cawˬ gʼa tuˬ yoˬ tehꞈ aˬ htoꞈ ma te yonˍ gʼa ve le?

² Naˬ beuˬ a naˍ, mvuhˇ yeˬ mvuhˇ haw lonˉ, mvuhˇ miˬ hpawˇ maˇ cawˇ maˇ hawˍ daꞈ ve, maˇ heˆ leh fawˉ ve mehˍ ve gʼa hpuˇ htaˇ, Gʼuiˬ sha lo laˬ ve dawˇ sha gaˇ sha ve cawˬ gʼa tuˬ hpehꞈ kʼai gʼa˗aw laˇ? Ngaˬ hui shoꞈ shaꞈ ve chi hkʼe ve gʼa hpuˇ htaˇ, kawˆ ve yoˬ hehˉ. Yeˍsuˆ tcuh yaˇ hui htaꞈ kʼoˆ maˍ piˇ jaw ve, “nawˬ hui ve nyi ma taˇ dawˇ haˍ gaˇ haˍ. Kawˆ ve nyi ma kaꞈ taˇ cawˬ piˇ.” (Yoˇhanˬ 14:27) Miˬ gui hkʼoˆ lo awˬ viˉ awˬ nyi maˇ maˇ Yeˍsuˆ beˆ maˍ piˇ ve htaꞈ gʼaꞈ te ve tehꞈ, ngaˬ hui gʼa mawˬ ve yoˬ. Yawˇ hui a shaꞈ teꞈ kuiˬ hkʼaw shoꞈ shaꞈ ve gʼa hpuˇ jaˇ ve htawˇ, dawˇ sha gaˇ sha ve leh nyi ma gawˬ lehˍ ve cawˬ tuˬ Yaˬhoˉvaˬ ga piˇ ve yoˬ.

3. Naˬ beuˬ a naˍ cawˬ htaˇ ngaˬ hui htaꞈ heuˆ la kuiˬ hkʼaˬ hkʼe cawˬ ve le?

³ Naˬ beuˬ a naˍ cawˬ htaˇ ngaˬ hui htaꞈ heuˆ la kuiˬ cawˬ jaˇ. A naˍ 19 cawˬ htaˇ ve awˬ yanˇ htaꞈ dawˇ nyi sheˍ. Chaˬ nyi tehˆ nyi hpawˇ ve teˇ maˬ hkʼaw kʼoˆ ve, chaw yaˇ zuhꞈ maˇ gʼa ve yoˬ. Naˬ beuˬ a naˍ cawˬ ve awˬ yanˇ htaˇ, chaw yaˇ dawˇ maˇ jaˇ leh dawˇ maˇ ve a naˍ cawˬ ve yoˬ. Chi hkʼoˆ kaꞈ, tzuhˬ yeꞈ caˉ ve, naˆ tsuhˇ yeꞈ caˉ ve, yehˬ kʼa hkʼaw  hehnˇ ve awˬ ceuˬ te piˇ ve, leh a shu yawˇ awˬ to htaꞈ tiˇ pehˍ ve chaw cawˬ maˇ jaˇ. Nawˬ naˬ beuˬ a naˍ gʼa hpuˇ ve kʼo hkʼa dehꞈ maˇ dawˇ maˇ tuˬ leh Gʼuiˬ sha lo laˬ ve dawˇ sha gaˇ sha ve cawˬ tuˬ nawˬ hkʼaˬ hkʼe gʼa te cawˇ ve le?

4. Awˬ leh meuˇ ve awˬ yanˇ htaꞈ caˉ daꞈ ve Yeˍsuˆ tcuh kaˍ paˍ ve tawˇ hkawˇ kʼoˆ taˍ ve htaꞈ nawˬ shiˍ ve lehˬ aˬ htoꞈ ma te nyi ma gawˬ lehˍ cawˬ tuˬ te laˇ ve le?

⁴ Awˬ leh meuˇ ve awˬ yanˇ hkʼaw “teˇ kaˬ peuˬ teˇ kaˬ” naˬ beuˬ a naˍ cawˬ la tuˬ yoˬ tehꞈ Yeˍsuˆ awˬ gʼuˇ suhˍ htaˇ kaꞈ kʼoˆ taˍ ve yoˬ. (Luˉkaꞈ 21:11) Awˬ lawn chi ngaˬ hui shiˍ ve lehˬ nyi ma gawˬ lehˍ cawˬ tuˬ te laˇ ve yoˬ. Aˬ htoꞈ ma pa taw le? Yeˍsuˆ kʼoˆ taˍ ve hkʼe teˇ ceuˬ le le awˬ tehˬ hpehꞈ la ve tehꞈ ngaˬ hui shiˍ ve yoˬ. Hkʼe te leh, ngaˬ hui hkʼe taw maˇ kawˆ. Awˬ lawn kʼo, awˬ leh meuˇ ve awˬ yanˇ hkʼaw chehˇ ve chaw htaꞈ Yeˍsuˆ kʼoˆ piˇ ve, “maˇ gʼa kawˆ cheˆ tuˬ shaˍ tiꞈ taˍ˗oꞈ” tehꞈ ngaˬ hui kaꞈ shiˍ ve yoˬ.—Maꞈhtehˍ 24:6.

5. (a) Hpiˇliˇpiˆ liꞈ 4:8, 9 hkʼaw kʼoˆ taˍ ve hkʼe, naˬ beuˬ a naˍ cawˬ ve awˬ yanˇ htaˇ aˬ htoꞈ ma ve awˬ lawn htaꞈ ngaˬ hui bon lawˬ cawˇ ve le? (b) Liꞈ hpu gʼaw keu taˍ ve awˬ hkawˇ htaꞈ na ve nawˬ awˬ pon awˬ bon hkʼaˬ hkʼe cawˬ ve le?

⁵ Naˬ beuˬ a naˍ cawˬ ve awˬ yanˇ htaˇ, ngaˬ hui kawˆ leh dawˇ maˇ jaˇ tuˬ te laˇ ve yoˬ. Awˬ viˉ awˬ nyi Deh˗siˇ ve awˬ lawn htaꞈ teˇ geh nyi sheˍ. Naˬ beuˬ a naˍ htaꞈ pa taw yawˇ ve aˉ hpaˇ, yawˇ ve awˬ viˉ awˬ nyi, leh saˍ laꞈ gʼonˍ, yawˇ hui suh peuˬ hkʼawꞈ nawˉ, Deh˗siˇ  b yawˇ a naˍ nehˉ leh awˬ e htaꞈ kʼawꞈ nehˉ la ve htaꞈ kawˆ ve yoˬ. Leh yawˇ kanˉ maˇ kʼawꞈ gʼa te la ve htaꞈ kaꞈ kawˆ ve yoˬ. Awˬ lawn kʼo, yawˇ kanˉ maˇ gʼa te˗o htaˇ, caˇ tuˬ vuiˬ tuˬ leh yehˬ ngaˍ˗a ve hpuˇ piˇ tuˬ maˇ cawˬ la ve htaꞈ yawˇ kawˆ ve yoˬ. Deh˗siˇ dawˇ maˇ jaˇ leh zuhꞈ muiˉ maˇ kʼa gʼa. Yaꞈ hkʼaˇ, yawˇ nyi ma gawˬ lehˍ kʼawꞈ cawˬ la tuˬ aˬ htoꞈ ma ga piˇ ve le? Deh˗siˇ nyi ma gawˬ lehˍ cawˬ leh daꞈ ve dawˇ hkʼaˇ cawˬ tuˬ Yaˬhoˉvaˬ geh bon lawˬ ve yoˬ. (Hpiˇliˇpiˆ 4:8, 9 gʼaw sheˍ.) Chi hkʼoˆ kaꞈ, Liꞈ hpu gʼaw keu taˍ ve awˬ hkawˇ yawˇ hkʼaˬ htaˆ kaꞈ na ve lehˬ, Yaˬhoˉvaˬ yawˇ htaꞈ tawˇ yaw laˇ ve hkʼe hpehꞈ ve yoˬ. Yawˇ kʼoˆ ve, “Liꞈ hpu gʼaw keu taˍ ve awˬ hkawˇ htaꞈ na ve lehˬ nyi ma sha ve yoˬ. Chi ngaˬ nyi ma gawˬ lehˍ cawˬ tuˬ leh hkʼe taw maˇ dawˇ haˍ tuˬ ga laˇ ve yoˬ. Yaˬhoˉvaˬ ngaˬ htaꞈ dawˇ haˍ jaˇ ve tehꞈ ngaˬ shiˍ ve yoˬ.”—Chiˇ mvuh ve 94:19.

6. Nawˬ a shu yawˇ hkʼaˇ yawˇ Liꞈ hpu henˇ leh hpawnˬ daꞈ˗e htaˇ hkʼaˬ hkʼe ga laˇ ve le?

⁶ Naˬ beuˬ a naˍ cawˬ ve awˬ yanˇ htaˇ ngaˬ hui te jaw ve awˬ ceuˬ kaꞈ te maˇ gʼa. Yaꞈ hkʼaˇ, nawˬ hkʼaˬ htaˆ kaꞈ hpawnˬ daꞈ˗e ve maˇ heˆ leh a shu yawˇ hkʼaˇ yawˇ Liꞈ hpu henˇ ve te gʼa sheˍ. Leh nawˬ awˬ viˉ awˬ nyi hpehꞈ laˬ jaw ve awˬ lawn gʼaw leh, yawˇ hui ve awˬ lawn VDO hkʼaw nyi ve kʼo, yawˇ hui nawˬ hkʼa shuˍ shoꞈ shaꞈ ve awˬ lawn gʼa hpuˇ ve htawˇ, Yaˬhoˉvaˬ ve kanˉ ka tiꞈ yeˬ ve hkʼaw te chehˇ ve htaꞈ nawˬ gʼa mawˬ htaˇ, nawˬ awˬ gʼaˇ gʼa tuˬ yoˬ. (1 Peˍtruˆ 5:9) Nawˬ hkʼaˬ htaˆ kaꞈ hpawnˬ daꞈ˗e ve kʼo, Liꞈ hpu hkʼaw daꞈ ve awˬ lawn htaꞈ nawˬ gʼa kaˇ leh, nawˬ daꞈ ve dawˇ hkʼaˇ cawˬ tuˬ te laˇ ve yoˬ. Chi hkʼoˆ kaꞈ, nawˬ awˬ gʼaˇ gʼa leh awˬ nu ve chaw htaꞈ awˬ gʼaˇ piˇ tuˬ awˬ yanˇ cawˬ ve yoˬ. (Roˉmaꞈ 1:11, 12) Yaˬhoˉvaˬ ve kanˉ te ve chaw yawˇ hui naˬ ve, kawˆ ve, maˇ heˆ leh chehˇ bawˬ htaˇ, Yaˬhoˉvaˬ yawˇ hui htaꞈ hkʼaˬ hkʼe ga piˇ ve awˬ lawn nawˬ dawˇ nyi ve kʼo, nawˬ co ha hpawˇ uiˍ la mvuh la leh Gʼuiˬ sha nawˬ htaꞈ kaꞈ ga laˇ tuˬ yoˬ tehꞈ yonˍ gʼa ve yoˬ.

7. Tcuh yaˇ Yoˇhanˬ ve awˬ lawn nawˬ htaꞈ hkʼaˬ hkʼe maˍ laˇ ve le?

 ⁷ Nawˬ awˬ viˉ awˬ nyi geh hkʼaˬ htaˆ kaꞈ caˉ daꞈ sheˍ. Naˬ beuˬ a naˍ cawˬ ve awˬ yanˇ htaˇ, ngaˬ hui maˇ gʼa mawˬ daꞈ ve yoˬ. Gʼa mawˬ daꞈ ve kʼo, ngaˬ hui tawˇ yaw daꞈ htaˇ awˬ paˇ lo maˇ gʼa chehˇ. Chi hkʼe hpehꞈ ve kʼo nawˬ kaꞈ tcuh yaˇ Yoˇhanˬ hkʼe dawˇ ve yoˬ hehˉ. Yawˇ ve awˬ chehˇ Gaˍyuˆ htaꞈ mawˬ gaˇ jaˇ ve yoˬ. (3 Yoˇhanˬ 13, 14) Yaꞈ hkʼaˇ, mawˬ daꞈ maˇ gʼa sheˍ ve tehꞈ yawˇ shiˍ ve yoˬ. Hkʼe te leh, yawˇ te gʼa ve hkʼe te ve lehˬ Gaˍyuˆ htaꞈ liꞈ bvuhꞈ piˇ ve yoˬ. Chi ve hkʼa shuˍ shuˍ, nawˬ awˬ viˉ awˬ nyi htaꞈ mawˬ daꞈ maˇ gʼa sheˍ ve kʼo, yawˇ hui geh awˬ hkʼeun hkʼaw tawˇ yaw kʼai ve, liꞈ bvuhꞈ kʼai ve, maˇ heˆ leh awˬ hkʼeun hkʼaw mehˆ hpfuhˇ mawˬ daꞈ leh tawˇ yaw daꞈ kaꞈ gʼa ve yoˬ. Nawˬ awˬ viˉ awˬ nyi geh caˉ daꞈ leh tawˇ yaw daꞈ ve kʼo, nawˬ hkʼe taw maˇ chehˇ bawˬ leh nyi ma gawˬ lehˍ cawˬ gʼa ve yoˬ. Yaꞈ hkʼaˇ, dawˇ haˍ dawˇ hkiˉ jaˇ ve kʼo, Hkriꞈ yaˇ awˬ moˍ hkʼaw nyi haꞈ shaˉ paˍ geh caˉ daꞈ leh awˬ gʼaˇ peꞈ laˇ tuˬ lawˬ sheˍ.—Iˉsaˍyaˆ 32:1, 2.

8. Mvuhˇ yeˬ mvuhˇ haw lonˉ nawˬ htaꞈ heuˆ la kuiˬ hkʼaˬ hkʼe cawˬ ve le?

⁸ Iˉ kaˆ htonˍ ve, miˬ hiˆ ve, maˇ heˆ leh aˍ miˬ toꞈ ve, chi ve teˇ hpaˍ htaꞈ nawˬ gʼa hpuˇ ve kʼo, nawˬ awˬ yanˇ maw chaweh dawˇ haˍ dawˇ hkiˉ jaˇ ve yoˬ hehˉ. Chi hkʼoˆ kaꞈ, nawˬ ve hpu shi mawˇ jeˬ, yehˬ luˬ kʼai tuˬ te laˇ ve, maˇ heˆ leh nawˬ haꞈ ve chaw gʼa suh ve kʼo, nawˬ nyi ma luˬ jaˇ ve, awˬ gʼaˇ nuˇ jaˇ leh beuꞈ jaˇ tuˬ te laˇ ve yoˬ. Nawˬ chi hkʼe gʼa hpuˇ ve lehˬ, nawˬ hpu htaꞈ haꞈ ve, mawˇ jeˬ htaꞈ haꞈ ve, maˇ heˆ leh yonˍ hkʼaˇ maˇ cawˬ ve tehꞈ kʼoˆ gaˇ ve maˇ heˆ. Nawˬ gʼa hpuˇ ve awˬ ceuˬ hehnˇ jaˇ ve pa taw, nawˬ maˇ daꞈ ve te tawˆ la tuˬ yoˬ tehꞈ chaw teˇ hpaˍ dawˇ ve yoˬ. (Yawˇbaˆ 1:11) Yaꞈ hkʼaˇ, nawˬ nyi ma gawˬ lehˍ cawˬ gʼa ve yoˬ. Nawˬ hkʼaˬ hkʼe gʼa te cawˇ ve teˇ geh nyi sheˍ.

9. Mvuhˇ yeˬ mvuhˇ haw lonˉ gʼa hpuˇ htaˇ ngaˬ hui gu hehnˇ taˍ gʼa tuˬ Yeˍsuˆ hkʼaˬ hkʼe maˍ laˇ ve le?

⁹ Tcuh kaˍ paˍ ve tawˇ hkawˇ Yeˍsuˆ kʼoˆ taˍ ve htaꞈ dawˇ nyi sheˍ. Miˬ guiˬ hkʼoˆ lo ve chaw teˇ hpaˍ lehˬ yawˇ mvuhˇ yeˬ mvuhˇ haw lonˉ maˇ gʼa hpuˇ taˍ tehꞈ dawˇ ve yoˬ. Yaꞈ hkʼaˇ, mvuhˇ yeˬ mvuhˇ haw lonˉ gʼaˇ hteꞈ cawˬ maˇ la leh teˇ nyi kʼo ngaˬ hui kaꞈ gʼa hpuˇ tuˬ yoˬ hehˉ. Yeˍsuˆ awˬ laꞈ gʼawˇ hui htaꞈ kʼoˆ piˇ ve, “chehˇ kuiˬ teˇ kaˬ peuˬ teˇ kaˬ” “miˬ gʼaˇ hteꞈ hiˆ ve” yoˬ. Leh awˬ leh meuˇ maˇ gaˬ sheˍ htaˇ mvuhˇ yeˬ mvuhˇ haw lonˉ laiˉ ceuˬ gʼa hpuˇ tuˬ yoˬ. (Luˉkaꞈ 21:11) Chi hkʼoˆ kaꞈ, Yeˍsuˆ tcuh kaˍ paˍ ve tawˇ hkawˇ kʼawꞈ kʼoˆ sheˍ ve, “haiˬ ve awˬ ceuˬ cawˬ maˇ la ve” htaꞈ ngaˬ hui kaꞈ mawˬ ve yoˬ. Chi beuꞈ teˇ co˗e haiˬ ve chaw, hehnˇ ve awˬ ceuˬ, leh haiˬ ve awˬ ceuˬ cawˬ maˇ jaˇ. (Maꞈhtehˍ 24:12) Ngaˬ hui mvuhˇ yeˬ mvuhˇ haw lonˉ gʼa hpuˇ ve lehˬ Yaˬhoˉvaˬ ngaˬ hui htaꞈ a yeˇ maˇ yuˬ laˇ ve tehꞈ Yeˍsuˆ maˇ gʼa kʼoˆ laˇ jaw. Awˬ tehˬ kʼo, Gʼuiˬ sha ve kanˉ ka tiꞈ yeˬ ve hkʼaw te ve chaw laiˉ gʼaˇ kaꞈ mvuhˇ yeˬ mvuhˇ haw lonˉ maˇ heˆ leh maˇ daꞈ ve awˬ ceuˬ gʼa hpuˇ jaw˗oˬ ve yoˬ. (Iˉsaˍyaˆ 57:1; 2 Kawˇrenˍhtuˆ 11:25) Chi teˇ hkui ngaˬ hui mvuhˇ yeˬ mvuhˇ haw lonˉ gʼa hpuˇ ve kʼo, Yaˬhoˉvaˬ anˇ tuˬ te leh ngaˬ hui htaꞈ maˇ haꞈ shaˉ laˇ ve htawˇ, ngaˬ hui nyi ma gawˬ lehˍ cawˬ tuˬ, leh loˍ ve teˇ ceuˬ le le yawˇ peꞈ laˇ tuˬ yoˬ.

10. Mvuhˇ yeˬ mvuhˇ haw lonˉ gʼa hpuˇ tuˬ yoˬ tehꞈ, chi teˇ hkui kaꞈ ngaˬ hui gu hehnˇ taˍ ve kʼo, aˬ htoꞈ ma te ngaˬ hui ve yonˍ hkʼaˇ yonˍ yeˬ ve tehꞈ hpeuꞈ maw piˇ ve le? (Tawˇ naˉ ve 22:3)

¹⁰ Mvuhˇ yeˬ mvuhˇ haw lonˉ gʼa hpuˇ la htaˇ, ngaˬ hui awˬ gʼuˇ suhˍ htaˇ kaꞈ gu hehnˇ taˍ ve kʼo, ngaˬ hui maˇ kawˆ jaˇ leh haꞈ yuˬ gʼa tuˬ yoˬ. Yaꞈ hkʼaˇ, chi hkʼe te ve lehˬ ngaˬ hui ve yonˍ hkʼaˇ maˇ yonˍ yeˬ ve tehꞈ kʼoˆ gaˇ ve laˇ? Maˇ heˆ. Ngaˬ hui awˉ lawˉ htaˇ kaꞈ gu hehnˇ taˍ ve lehˬ, ngaˬ hui ve yonˍ hkʼaˇ yonˍ yeˬ ve tehꞈ hpehꞈ maw piˇ leh Yaˬhoˉvaˬ nyi haꞈ shaˉ laˇ tuˬ yoˬ tehꞈ yonˍ gʼa ve yoˬ. Aˬ htoꞈ ma te chi hkʼe hpehꞈ ve le? Mvuhˇ yeˬ mvuhˇ haw lonˉ gʼa hpuˇ la tuˬ ve htaꞈ ngaˬ hui awˉ lawˉ htaˇ kaꞈ gu hehnˇ taˍ gʼa tuˬ Liꞈ hpu hkʼaw beˆ maˍ laˇ ve yoˬ. (Tawˇ naˉ ve 22:3 gʼaw sheˍ.) Chi hkʼoˆ kaꞈ, ngaˬ hui maˇ dawˇ maˇ gaˇ ve awˬ ceuˬ gʼa hpuˇ la htaˇ, Gʼuiˬ sha ve kanˉ hkʼaˇ lehˬ, awˬ lawn teˇ hpaˍ leh hpawnˬ daꞈ ve hkʼaw teˇ pawˆ pawˆ hteˇ˗ehꞈ kʼoˆ laˇ ve yoˬ. c Ngaˬ hui Yaˬhoˉvaˬ htaꞈ gʼaˇ va˗aw laˇ? Gʼaˇ va ve kʼo yawˇ kʼoˆ laˇ ve kanˉ htaꞈ chi teˇ hkui kaꞈ te cawˇ ve yoˬ.

11. Ma˗ga˗lehˆ ve awˬ lawn nawˬ htaꞈ aˬ htoꞈ ma maˍ laˇ ve le?

 ¹¹ Awˬ viˉ awˬ nyi yaˇ miˇ Ma˗ga˗lehˆ ve awˬ lawn htaꞈ teˇ geh nyi sheˍ. Yawˇ chehˇ kuiˬ teˇ tawn lo aˍ miˬ toꞈ laˬ ve pa taw, yawˇ gʼa hpaw˗e cawˇ ve tehꞈ mvuhˇ miˬ kanˉ te paˍ kʼoˆ piˇ ve yoˬ. Oˇ teˇ tawn lo teˇ gʼaˇ le le kaꞈ gʼa hpaw˗e cawˇ ve pa taw, yaꞈ kʼaw hkʼoˆ lo kaˇ maˇ jaˇ leh kʼai maˇ gʼa. Mvuhˇ hkʼawˇ gʼaˇ hteꞈ maˇ la leh Ma˗ga˗lehˆ kaꞈ kaˇ hkʼaw gʼa chehˇ taˍ sheˍ ve yoˬ. Yawˇ awˉ lawˉ htaˇ kaꞈ gu hehnˇ taˍ ve pa taw, gʼa ponˬ ve yoˬ. Yawˇ ve taˉ poˆ hkʼaw miˬ guiˬ awˬ han liꞈ cawˬ ve yoˬ. Hkʼe te leh, yawˇ oˇ kaˬ lo tawˆ˗e gʼa tuˬ awˬ nu ve yaꞈ kʼaw teˇ caˆ htaꞈ kʼai ve yoˬ. Chi hkʼoˆ kaꞈ, maˇ dawˇ maˇ gaˇ ve awˬ ceuˬ gʼa hpuˇ htaˇ, yawˇ yaꞈ kʼaw hkʼaˬ ve teˇ caˆ htaꞈ kʼai ve shiˍ tuˬ awˉ lawˉ htaˇ kaꞈ, miˬ guiˬ awˬ han liꞈ hkʼaˇ suh gʼaꞈ kʼai nyi jaw˗oˬ ve yoˬ. Ma˗ga˗lehˆ awˉ lawˉ htaˇ kaꞈ gu hehnˇ taˍ ve pa taw yawˇ gʼa ponˬ ve yoˬ.

12. Kawˆ ve maˇ gʼa hpuˇ tuˬ beˆ maˍ laˇ ve aˬ htoꞈ ma htaꞈ ngaˬ hui gʼaꞈ te cawˇ ve le?

¹² Teˇ pawˆ pawˆ mvuhˇ miˬ kanˉ te paˍ shiˍ laˇ kaˇ laˇ ve, ngaˬ hui kawˆ tuˬ maˇ gʼa hpuˇ leh mvuhˇ miˬ hkʼaw hteˇ hteˇ shawˇ shawˇ cawˬ tuˬ, ngaˬ hui hpaw˗e tuˬ kʼoˆ ve, maˇ heˆ leh teˇ ceuˬ ceuˬ te tehꞈ kʼoˆ laˇ ve yoˬ. Chaw teˇ hpaˍ kʼo yawˇ hui ve yehˬ maˇ heˆ leh mawˇ jeˬ htaꞈ dawˇ haˍ ve pa taw, maˇ na yuˬ leh laꞈ haˉ maˇ gʼaꞈ te gaˇ ve yoˬ. Ngaˬ hui Hkriꞈ yaˇ hpehꞈ ve kʼo hkʼaˬ hkʼe te cawˇ ve le? Liꞈ hpu hkʼaw ngaˬ hui htaꞈ kʼoˆ laˇ ve, “Jawˇ mawˇ Hkriꞈ htaꞈ pa taw, chaw yaˇ hui leuˆ yuˬ taˍ ve jawˇ mawˇ teˇ hpaˍ uˉ peunˍ ve awˬ hawˉ lo hkʼa dehꞈ chehˇ˗oˆ. Hkʼa peu˗eˬ awˬ hkʼoˆ uiˍ shehˍ hpaˇ hkunˉ hawˉ hkanˇ awˬ hawˉ lo chehˇ˗oˆ. A shu yawˇ ve mvuhˇ miˬ htaꞈ uˉ peunˍ ve jawˇ mawˇ awˬ hawˉ lo htawˇ hkʼa dehꞈ chehˇ˗oˆ.” (1 Peˍtruˆ 2:13, 14) Ngaˬ hui kawˆ ve maˇ gʼa hpuˇ tuˬ Gʼuiˬ sha ve kanˉ hkʼaˇ kaꞈ beˆ maˍ laˇ ve yoˬ. Tawˇ pa haˉ te kʼo, Gʼuiˬ sha ve kanˉ hkʼaˇ lehˬ ngaˬ hui maˇ dawˇ maˇ gaˇ ve gʼa hpuˇ htaˇ, yawˇ hui ngaˬ hui htaꞈ caˉ daꞈ gʼa tuˬ, chehˇ kuiˬ naˬ banˍ leh tawˇ yaw tuˬ naˬ banˍ nyi haꞈ shaˉ paˍ htaꞈ piˇ tehꞈ teˇ hkui teˇ hkui kʼoˆ laˇ ve yoˬ. Nawˬ chi hkʼe te˗oˬ laˇ? Chi hkʼoˆ kaꞈ, ngaˬ hui aˉ hkʼaw tiˉ chehˇ tuˬ beˆ maˍ laˇ ve yoˬ. Mvuhˇ yeˬ mvuhˇ haw lonˉ gʼa hpuˇ htaˇ ga laˇ ve awˬ ceuˬ htaꞈ ca yuˬ˗e tuˬ awˬ hkʼaˇ beˆ maˍ laˇ ve, maˇ heˆ leh hkʼaˬ hkʼe htaˇ shu htaꞈ ca ga piˇ gʼa tuˬ awˬ hkʼaˇ kaꞈ beˆ maˍ laˇ ve yoˬ. Beˆ maˍ laˇ ve chi teˇ hpaˍ htaꞈ ngaˬ hui gʼaꞈ te sheˍ. Ngaˬ hui maˇ na yuˬ ve kʼo, ngaˬ hui leh nyi haꞈ shaˉ paˍ kaꞈ kawˆ tuˬ cawˬ la ve yoˬ. Nyi haꞈ shaˉ paˍ lehˬ ngaˬ hui htaꞈ nyi haꞈ shaˉ tuˬ awˬ vuiˬ cawˬ ve tehꞈ tawnˇ taˍ sheˍ. (Heˍbrehˇ 13:17) Ma˗ga˗lehˆ kʼoˆ ve, “nyi haꞈ shaˉ paˍ leh Gʼuiˬ sha ve kanˉ hkʼaˇ beˆ maˍ laˇ ve htaꞈ gʼaꞈ te ve pa taw, ngaˬ gʼa ponˬ ve tehꞈ yonˍ gʼa ve yoˬ.”

13. Oˇ htaˇ teˇ co˗e ve Hkriꞈ yaˇ leh chi beuꞈ teˇ co˗e ve Hkriꞈ yaˇ yawˇ hui teˇ kaˬ lo gʼa ca chehˇ˗e ve htawˇ, ha lehˬ ve leh nyi ma gawˬ lehˍ ve cawˬ tuˬ aˬ htoꞈ ma te piˇ ve le?

¹³ Ngaˬ hui ve awˬ viˉ awˬ nyi laiˉ gʼaˇ mvuhˇ yeˬ mvuhˇ haw lonˉ, maꞈ te daꞈ ve, maˇ heˆ leh mvuhˇ miˬ  hkʼaw maˇ cawˇ maˇ hawˍ daꞈ ve htaꞈ pa taw, teˇ kaˬ lo gʼa ca chehˇ˗e ve yoˬ. Yaꞈ hkʼaˇ, yawˇ hui a shu yawˇ ve dawˇ hkʼaˇ pa leh yawˇ hui Hkriꞈ yaˇ ve awˬ vuiˬ te jaw ve hkʼe hkʼaˬ htaˆ kaꞈ te ve yoˬ. Yawˇ hui awˉ lawˉ peuˇ ve Hkriꞈ yaˇ hkʼa shuˍ te ve yoˬ. Awˉ lawˉ peuˇ ve Hkriꞈ yaˇ fawˉ ve mehˍ ve gʼa hpuˇ leh awˬ nu ve teˇ kaˬ lo gʼa hpaw˗e ve htawˇ, yawˇ hui “teˇ kaˬ peuˬ teˇ kaˬ lo kʼai leh ha lehˬ ve bon hkawˇ ca maˍ piˇ ve yoˬ.” (Tcuh yaˇ 8:4) Yawˇ hui shoꞈ shaꞈ ve gʼa hpuˇ ve htaꞈ a yeˇ yuˬ ve aꞈ kehˉ, ha lehˬ ve bon hkawˇ ca maˍ piˇ ve lehˬ Gʼuiˬ sha ve mvuhˇ miˬ htaꞈ a yeˇ yuˬ tuˬ te piˇ ve yoˬ. Yawˇ hui chi hkʼe te htaˇ ha lehˬ ve leh nyi ma gawˬ lehˍ cawˬ ve yoˬ.

14. Fawˉ ve mehˍ ve gʼa hpuˇ htaˇ ngaˬ hui nyi ma gawˬ lehˍ ve maˇ cawˬ tuˬ hkʼaˬ hkʼe te laˇ gʼa ve le?

¹⁴ Ngaˬ hui fawˉ ve mehˍ ve gʼa hpuˇ htaˇ ngaˬ hui nyi ma gawˬ lehˍ maˇ cawˬ tuˬ laiˉ ceuˬ te laˇ ve yoˬ. Ngaˬ hui gʼa mawˬ daꞈ ve, teˇ geh gʼa hpawnˬ daꞈ ve, leh teˇ geh gʼa hto toˇ ve, chi teˇ hpaˍ te htaˇ ngaˬ hui shu ca hpeh la ve htaꞈ maˇ kawˆ leh te jaw ve hkʼe teˇ geh te ve htaꞈ ha lehˬ gʼa ve yoˬ. Yaꞈ hkʼaˇ, ngaˬ hui ve kanˉ htaꞈ tawˍ laˇ leh hkʼa dehꞈ maˇ gʼa te htaˇ, hkʼaˬ hkʼe hpehꞈ la tuˬ ngaˬ hui dawˇ haˍ ve, maˇ heˆ leh hkʼaˬ hkʼe htaˇ shu ca hpeh la tuˬ ve htaꞈ ngaˬ hui kawˆ ve yoˬ. Ngaˬ hui chi hkʼe dawˇ ve lehˬ maˇ yaꞈ. Yaꞈ hkʼaˇ, ngaˬ hui shaˍ tiꞈ gʼa te ve yoˬ. Yeˍsuˆ awˬ laꞈ gʼawˇ hui htaꞈ kʼoˆ piˇ ve, yawˇ hui fawˉ ve mehˍ ve htaꞈ gʼa hpuˇ ve pa taw awˬ gʼaˇ nuˇ leh yawˇ htaꞈ baˬ taˉ laˇ tuˬ yoˬ hehˉ. (Yoˇhanˬ 16:1, 2) Hkʼe kʼo ngaˬ hui fawˉ ve mehˍ ve gʼa hpuˇ htaˇ nyi ma gawˬ lehˍ ve hkʼaˬ hkʼe te cawˬ gʼa tuˬ le? Teˇ geh nyi sheˍ.

15. Aˬ htoꞈ ma te ngaˬ hui fawˉ ve mehˍ gʼa hpuˇ ve htaꞈ maˇ kawˆ cawˇ ve le? (Yoˇhanˬ 15:20; 16:33)

¹⁵ Liꞈ hpu hkʼaw ngaˬ hui htaꞈ kʼoˆ laˇ ve, “Yeˍsuˆ Hkriꞈ awˬ hkʼaw lo Gʼuiˬ sha htaꞈ yawˆ yan gaˇ ve chaw hkʼa peu˗eˬ lehˬ, fawˉ ve mehˍ ve htaꞈ gʼa hkanˍ tuˬ yoˬ.” (2 Tiˆmoˉseˍ 3:12) Awˬ viˉ awˬ nyi A˗deˬ meh ve awˬ lawn htaꞈ teˇ geh nyi sheˍ. Yawˇ chehˇ ve mvuhˇ miˬ hkʼaw Shaˉhkiˆhkanˍ ve chaw ve kanˉ htaꞈ tawˍ laˇ ve tehꞈ yawˇ maˇ yonˍ gaˇ. Awˬ lawn kʼo, yawˇ kʼoˆ ve, ‘mvuhˇ miˬ chi ve hkʼaw Shaˉhkiˆhkanˍ ve chaw cawˬ maˇ jaˇ. Yawˇ hui ngaˬ hui hkʼa peu˗eˬ htaꞈ hpeh yuˬ maˇ gʼa taˬ.’ Yaꞈ hkʼaˇ, A˗deˬ chi hkʼe dawˇ ve lehˬ yawˇ nyi ma sha tuˬ maˇ te piˇ leh dawˇ haˍ dawˇ hkiˉ jaˇ tuˬ te piˇ ve yoˬ. Yaꞈ hkʼaˇ, awˬ nu ve awˬ viˉ awˬ nyi chi hkʼe maˇ dawˇ. Teˇ nyi kʼo, shu ca hpeh la tuˬ yoˬ tehꞈ yawˇ hui dawˇ ve yoˬ. Yawˇ hui Yaˬhoˉvaˬ htaꞈ gʼaˇ va leh yawˇ htaꞈ chiˇ aꞈ piˇ ve yoˬ. Hkʼe te leh, yawˇ hui A˗deˬ hkʼe taw maˇ dawˇ haˍ. A˗deˬ awˬ viˉ awˬ nyi htaꞈ chi hkʼe gʼa mawˬ htaˇ, yawˇ ve dawˇ hkʼaˇ pa leh awˬ viˉ awˬ nyi hkʼa shuˍ dawˇ leh Yaˬhoˉvaˬ htaꞈ gʼaˇ hkʼa dehꞈ va ve yoˬ. Yawˇ chi hkʼe te˗oˬ htaˇ yawˇ tuꞈ ve hkanˍ ve gʼa hpuˇ ve htawˇ ha lehˬ gʼa leh nyi ma gawˬ lehˍ cawˬ ve yoˬ. Chi shuˍ  shuˍ, teˇ nyi kʼo ngaˬ hui kaꞈ fawˉ ve mehˍ ve gʼa hpuˇ tuˬ yoˬ tehꞈ Yeˍsuˆ kʼoˆ laˇ ve tawˇ hkawˇ htaꞈ shiˍ gʼa ve yoˬ. Yaꞈ hkʼaˇ, Yeˍsuˆ ngaˬ hui htaꞈ htawˆ hkanˍ laˇ sheˍ ve, ngaˬ hui fawˉ ve meh ve gʼa hpuˇ ve htawˇ, caˉ leh Yaˬhoˉvaˬ htaꞈ ka tiꞈ yeˬ gʼa ve yoˬ.—Yoˇhanˬ 15:20; 16:33 gʼaw sheˍ.

16. Ngaˬ hui fawˉ ve mehˍ ve gʼa hpuˇ htaˇ beˆ maˍ laˇ ve aˬ htoꞈ ma htaꞈ na yuˬ cawˇ ve le?

¹⁶ Ngaˬ hui chehˇ ve mvuhˇ miˬ lo Gʼuiˬ sha ve kanˉ htaꞈ tawˍ laˇ ve maˇ heˆ leh hkʼa dehꞈ maˇ te gʼa ve kʼo, Hkriꞈ yaˇ awˬ moˍ hkʼaw nyi haꞈ shaˉ paˍ leh awˬ tcuhˆ puiˍ lo beˆ maˍ laˇ ve htaꞈ ngaˬ hui na yuˬ tuˬ yoˬ. Yawˇ hui ngaˬ hui htaꞈ beˆ maˍ laˇ ve lehˬ ngaˬ hui htaꞈ haꞈ shaˉ laˇ ve, leh ngaˬ hui yonˍ hkʼaˇ hpawˇ ve cuˇ yiˍ hkʼaˬ htaˆ kaꞈ gʼa tuˬ ga laˇ ve, ngaˬ hui hto toˇ ve te gʼa ve hkʼe te tuˬ yawˇ hui ga laˇ gaˇ ve yoˬ. Nawˬ hkʼa dehꞈ maˇ na gʼa ve htawˇ, yawˇ hui ve hkawˇ na yuˬ sheˍ. (Yaˍkoˆ 3:17) Chi hkʼoˆ kaꞈ, awˬ viˉ awˬ nyi leh Hkriꞈ yaˇ awˬ moˍ hkʼaw ve awˬ lawn, awˬ nu ve chaw htaꞈ taˇ kʼoˆ piˇ.—Cuˇ yiˍ piˇ ve 3:7.

17. Tcuh yaˇ hui hkʼa shuˍ ngaˬ hui aˬ htoꞈ ma te gaˇ ve le?

¹⁷ Gʼuiˬ sha ve chaw “Yeˍsuˆ awˬ pon Shaˉhkiˆhkanˍ ve” pa taw, Saˍtanˍ yawˇ hui htaꞈ tawˍ daꞈ ve yoˬ. (Hpeuꞈ maˍ ve 12:17) Yaꞈ hkʼaˇ, ngaˬ hui Saˍtanˍ leh yawˇ hpawˇ chehˇ ve chaw htaꞈ taˇ kawˆ. Ngaˬ hui tawˍ laˇ ve htaꞈ gʼa hpuˇ ve htawˇ, hto toˇ leh Gʼuiˬ sha ve awˬ lawn caˉ leh maˍ ve kʼo, ngaˬ hui ha lehˬ leh nyi ma gawˬ lehˍ ve cawˬ tuˬ yoˬ. Awˉ lawˉ peuˇ ve teˇ co˗e htaˇ, Yuˇdaꞈ chaw ve bon awˬ hoˉ, tcuh yaˇ hui htaꞈ maˇ hto toˇ tcuh htaˇ, yawˇ hui kʼoˆ ve hkʼe maˇ na. Yawˇ hui Gʼuiˬ sha hkawˇ na yuˬ leh hto toˇ ve pa taw, chi yawˇ hui ha lehˬ jaˇ tuˬ te piˇ ve yoˬ. (Tcuh yaˇ 5:27-29, 41, 42) Ngaˬ hui chehˇ ve mvuhˇ miˬ hkʼaw Gʼuiˬ sha ve kanˉ htaꞈ tawˍ laˇ ve maˇ heˆ leh hkʼa dehꞈ maˇ te gʼa ve kʼo, ngaˬ hui caˉ leh hto toˇ gaˇ ve yoˬ. Yaꞈ hkʼaˇ, ngaˬ hui shaˍ tiꞈ gʼa te cawˇ ve yoˬ. (Maꞈhtehˍ 10:16) Ngaˬ hui te gʼa ve hkʼe hkʼa dehꞈ hto toˇ ve kʼo, dawˇ sha gaˇ sha ve leh nyi ma gawˬ lehˍ cawˬ tuˬ yoˬ. Awˬ lawn kʼo, ngaˬ hui Yaˬhoˉvaˬ nyi hkʼaˇ suh tuˬ te piˇ chehˇ leh awˬ nu ve chaw htaꞈ ga piˇ tuˬ daꞈ ve awˬ lawn sha tanˇ hto maˍ piˇ chehˇ ve tehꞈ shiˍ ve yoˬ.

18. Ngaˬ hui htaꞈ awˬ tehˬ dawˇ sha gaˇ sha ve peꞈ laˇ gʼa ve a shu le?

¹⁸ Nawˬ a shaꞈ teꞈ kuiˬ hkʼaw shoꞈ shaꞈ ve gʼa hpuˇ jaˇ ve htawˇ, nawˬ nyi ma gawˬ lehˍ cawˬ gʼa ve tehꞈ yonˍ gʼa ve yoˬ. Dawˇ sha gaˇ sha ve nawˬ gʼa cawˬ cawˇ ve lehˬ Gʼuiˬ sha lo laˬ ve dawˇ sha gaˇ sha ve yawˇ teˇ gʼaˇ ceh tiˉ nawˬ htaꞈ peꞈ laˇ gʼa ve tehꞈ tawnˇ taˍ sheˍ. Nawˬ naˬ beuˬ a naˍ, mvuhˇ yeˬ mvuhˇ haw lonˉ, leh fawˉ ve mehˍ ve gʼa hpuˇ ve kʼo, Yaˬhoˉvaˬ, yawˇ ve kanˉ hkʼaˇ leh Hkriꞈ yaˇ awˬ moˍ hkʼaw ve chaw geh nawˬ meuˆ daꞈ sheˍ. Awˬ gʼuˇ suhˍ hpawˇ daꞈ jaˇ ve htaꞈ nawˬ dawˇ nyi sheˍ. Nawˬ chi hkʼe te dawˇ nyi ve kʼo, “dawˇ sha piˇ shehˍ hpaˇ Gʼuiˬ sha lehˬ, nawˬ hui geh chehˇ tuˬ yoˬ.” (Hpiˇliˇpiˆ 4:9) Gʼuˇ suhˍ teˇ lawn hkʼaw awˬ viˉ awˬ nyi shoꞈ shaꞈ ve gʼa hpuˇ ve htaꞈ ngaˬ hui ga piˇ gʼa tuˬ, leh yawˇ hui tuꞈ ve hkanˍ ve gʼa hpuˇ ve htawˇ Gʼuiˬ sha lo laˬ ve dawˇ sha gaˇ sha ve hkʼaˬ hkʼe te cawˬ gʼa tuˬ, teˇ geh henˇ tuˬ yoˬ.