1-2. (a) Ngaˬ hui haꞈ ve chaw suh˗oˬ ve kʼo, yawˇ htaꞈ dawˇ nawˇ jaˇ ve hkʼaˬ ve teˇ nyi le? (b) Yeˍsuˆ yawˇ maˇ suh sheˍ teˇ haˉ htaˇ aˬ htoꞈ ma awˬ pon hpawnˬ daꞈ ve le?

 Ngaˬ hui haꞈ ve chaw suh˗e ve hkʼaˬ hkʼe maw gaˬ˗oˬ ve htawˇ, ngaˬ hui yawˇ htaꞈ hkʼaˬ htaˆ kaꞈ tawnˇ gʼa ve yoˬ. Yawˇ suh˗e ve awˬ nyi gaˬ kʼo, ngaˬ hui yawˇ htaꞈ dawˇ nawˇ jaˇ ve yoˬ.

² Teˇ hkʼawꞈ le le ngaˬ hui leh miˬ guiˬ chi hkʼoˆ lo chaw laiˉ lanˬ gʼaˇ, ngaˬ hui haꞈ jaˇ ve Yeˍsuˆ suh ve awˬ nyi gaˬ kʼo, hpawnˬ daꞈ ve yoˬ. (1 Peˍtruˆ 1:8) Yawˇ ve a shaꞈ ngaˬ hui awˬ pon htaiˍ hkʼawꞈ laˇ ve htaꞈ dawˇ nawˇ tuˬ, ngaˬ hui venˇ baˆ gʼa ponˬ tuˬ, leh maˇ gʼa kʼawꞈ suh tuˬ, ngaˬ hui teˇ geh hpawnˬ daꞈ ve yoˬ. (Maꞈhtehˍ 20:28) Yawˇ ve awˬ laꞈ gʼawˇ htaꞈ yawˇ suh˗e ve dawˇ nawˇ tuˬ te˗o tehꞈ kʼoˆ piˇ ve yoˬ. Yeˍsuˆ maˇ suh sheˍ teˇ haˉ htaˇ, hpawnˬ daꞈ ve chi “ngaˬ htaꞈ dawˇ nawˇ tuˬ chi hkʼe te˗o” tehꞈ kʼoˆ ve yoˬ.—Luˉkaꞈ 22:19.

3. Awˬ lawn chi ve hkʼaw ngaˬ hui aˬ htoˬ ma htaꞈ henˇ tuˬ le?

³ Yeˍsuˆ suh ve dawˇ nawˇ tuˬ hpawnˬ daꞈ la ve hkʼaw awˬ nu ve chaw teˇ moˍ lehˬ, mvuhˇ naw ma hkʼoˆ chehˇ tuˬ dawˇ law taˍ ve yoˬ. Hpawnˬ daꞈ ve chi ve hkʼaw laˬ ve chaw laiˉ lanˬ gʼaˇ lehˬ miˬ guiˬ awˬ suhˉ hkʼaw chehˇ tuˬ dawˇ law taˍ ve yoˬ. Chaw chi ve 2 moˍ dawˇ law kuiˬ peun daꞈ ve htawˇ, teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ˗e tuˬ coˇ caˇ ve yoˬ. Leh hpawnˬ daꞈ ve chi hkʼaw ngaˬ hui aˬ htoꞈ ma awˬ bon gʼa ve awˬ lawn chi ve teˇ geh henˇ tuˬ yoˬ. Aˬ htoꞈ ma te leuˆ yuˬ taˍ ve chaw Yeˍsuˆ suh ve dawˇ nawˇ tuˬ hpawnˬ daꞈ la ve le, chi htaꞈ awˉ lawˉ henˇ tuˬ yoˬ.

4. Aˬ htoꞈ ma te leuˆ yuˬ taˍ ve chaw Yeˍsuˆ suh ve dawˇ nawˇ tuˬ hpawnˬ daꞈ ve hkʼaw hkaoˍ monˇ caˇ leh a pehˉ meuˇ gʼuiˬ dawˬ ve le?

⁴ Teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ htaˇ, leuˆ yuˬ taˍ ve chaw hkaoˍ monˇ caˇ leh a pehˉ meuˇ gʼuiˬ dawˬ ve yoˬ. Aˬ htoꞈ ma te yawˇ hui caˇ leh dawˬ ve le? Yeˍsuˆ miˬ guiˬ hkʼoˆ chehˇ ve awˬ  leh meuˇ teˇ haˉ htaˇ, awˬ lawn chi ve htaꞈ hkʼawꞈ piˇ ve yoˬ. Yeˍsuˆ leh awˬ laꞈ gʼawˇ oˇ ve teˇ haˉ Paˍsaˍhkaˍ pawehˇ caˇ peuˬ hkʼawꞈ nawˉ, yawˇ awˬ leh meuˇ teˇ pawˆ mvuhˇ haˉ awˍ caˇ ve tehꞈ kʼoˆ ve yoˬ. Yeˍsuˆ hkaoˍ monˇ leh a pehˉ meuˇ gʼuiˬ yawˇ ve tcuh yaˇ 11 gʼaˇ htaꞈ caˍ piˇ ve yoˬ. Peuˬ hkʼawꞈ nawˉ yawˇ hui htaꞈ ka tiꞈ 2 ceuˬ te piˇ ve yoˬ. Oˇ ve lehˬ ka tiꞈ shaˉ caˆ awˬ suhˉ leh Gʼuiˬ sha ve mvuhˇ miˬ awˬ lawn ka tiꞈ yoˬ. * (Luˉkaꞈ 22:19, 20, 28-30) Ka tiꞈ chi ve 2 ceuˬ lehˬ, tcuh yaˇ leh awˬ nu ve chaw teˇ moˍ mvuhˇ naw ma hkʼoˆ lo jawˇ mawˇ leh paw hkuˇ te tuˬ a hkaw˗anˬ cawˬ ve yoˬ. (Hpeuꞈ maˍ ve 5:10; 14:1) Ka tiꞈ chi ve 2 ceuˬ hkʼaw chehˇ tuˬ a hkaw˗anˬ cawˬ ve chaw lehˬ miˬ guiˬ hkʼoˆ leuˉ taˍ ve leuˆ yuˬ taˍ ve chaw ceh tiˉ Yeˍsuˆ suh ve dawˇ nawˇ tuˬ hpawnˬ daꞈ htaˇ, hkaoˍ monˇ caˇ leh a pehˉ meuˇ gʼuiˬ dawˬ ve yoˬ.

5. Leuˆ yuˬ taˍ ve chaw daꞈ jaˇ ve dawˇ law kuiˬ aˬ htoꞈ ma cawˬ ve le? Leh yawˇ hui hkʼaˬ hkʼe gʼa te cawˇ ve le?

⁵ Leuˆ yuˬ taˍ ve chaw Yeˍsuˆ suh ve dawˇ nawˇ tuˬ hpawnˬ daꞈ˗e ve teˇ ceuˬ lehˬ, yawˇ hui ve dawˇ law kuiˬ htaꞈ dawˇ nawˇ tuˬ awˬ pon yoˬ. Yaˬhoˉvaˬ yawˇ hui htaꞈ daꞈ jaˇ ve dawˇ law kuiˬ piˇ ve yoˬ. Chi ve lehˬ yawˇ hui maˇ gʼa suh leh maˇ kuiˇ puiˉ. Yawˇ hui lehˬ mvuhˇ naw ma hkʼoˆ Yeˍsuˆ geh gʼa uˉ peunˍ leh 144,000 gʼaˇ ve hkʼaw teˇ gʼaˇ hpehꞈ ve yoˬ. A yeˇ uiˍ jaˇ ve lehˬ yawˇ hui Yaˬhoˉvaˬ htaꞈ gʼa mawˬ tuˬ yoˬ. (1 Kawˇrenˍhtuˆ 15:51-53; 1 Yoˇhanˬ 3:2) Gʼuiˬ sha lehˬ leuˆ yuˬ taˍ ve chaw htaꞈ mvuhˇ naw ma hkʼoˆ lo daꞈ jaˇ ve awˬ vuiˬ te tcuh laˇ tuˬ yoˬ tehꞈ yawˇ hui shiˍ ve yoˬ. Yaꞈ hkʼaˇ, chi hkʼe te gʼa tuˬ yawˇ hui suh htaˇ hkʼa gaˬ ka tiꞈ gʼa yeˬ ve yoˬ. (2 Tiˆmoˉseˍ 4:7, 8) Leuˆ yuˬ taˍ ve chaw mvuhˇ naw ma hkʼoˆ lo ve dawˇ law kuiˬ htaꞈ dawˇ nyi htaˇ, yawˇ hui ha lehˬ jaˇ ve yoˬ. (Tiˇtuˆ 2:13) Hkʼe kʼo, “awˬ kaˍ awˬ nu yawˬ teˇ hpaˍ” yawˇ hui aˬ htoꞈ ma te Yeˍsuˆ suh ve dawˇ nawˇ tuˬ hpawnˬ daꞈ˗e ve le?—Yoˇhanˬ 10:16.

6. Aˬ htoꞈ ma te awˬ kaˍ awˬ nu ve yawˬ teˇ hpaˍ Yeˍsuˆ suh ve dawˇ nawˇ tuˬ hpawnˬ daꞈ˗e ve le?

⁶ Awˬ kaˍ awˬ nu ve yawˬ teˇ hpaˍ Yeˍsuˆ suh ve dawˇ nawˇ tuˬ hpawnˬ daꞈ htaˇ, hkaoˍ monˇ maˇ caˇ leh a pehˉ meuˇ gʼuiˬ maˇ dawˬ. Yaꞈ hkʼaˇ, yawˇ hui teˇ geh gʼa hpawnˬ daꞈ ve ha lehˬ jaˇ. 1938 hkʼawꞈ htaˇ, miˬ guiˬ hkʼoˆ lo dawˇ law kuiˬ cawˬ ve chaw htaꞈ Yeˍsuˆ suh ve dawˇ nawˇ tuˬ hpawnˬ daꞈ htaˇ kuˬ piˇ ve awˉ lawˉ teˇ pawˆ hpehꞈ ve yoˬ. Shaw nyi nyi Taꞈ yehˬ Ha pa 3 maˬ 1 nyi 1938 hkʼawꞈ hkʼaw kʼoˆ ve, “awˬ kaˍ awˬ nu ve yawˬ teˇ hpaˍ hpawnˬ daꞈ ve chi hkʼaw laˬ tuˬ leh choˬ kaˬ lo aˬ htoꞈ ma te ve htaꞈ ca nyi la tuˬ keunˍ jaˇ ve yoˬ. Chi ve lehˬ yawˇ hui ha lehˬ jaˇ ve awˬ yanˇ kaꞈ hpehꞈ cawˇ ve yoˬ.” Heuˆ daꞈ ve hkʼaw hkehˉ chaw laˬ tuˬ jehˬ piˇ leh heuˆ daꞈ ve chaw geh teˇ geh ha lehˬ ve hkʼe, awˬ kaˍ awˬ nu ve yawˬ teˇ hpaˍ kaꞈ Yeˍsuˆ suh ve dawˇ nawˇ tuˬ hpawnˬ daꞈ ve hkʼaw gʼa laˬ ve ha lehˬ jaˇ.

7. Aˬ htoꞈ ma te awˬ kaˍ awˬ nu ve yawˬ teˇ hpaˍ Yeˍsuˆ suh ve dawˇ nawˇ tuˬ hpawnˬ daꞈ ve hkʼaw bon maˍ hkawˇ ca na˗e gaˇ ve le?

⁷ Awˬ kaˍ awˬ nu ve yawˬ teˇ hpaˍ miˬ guiˬ hkʼoˆ lo yawˇ hui ve dawˇ law kuiˬ htaꞈ dawˇ nyi ve yoˬ. Awˬ kaˍ awˬ nu ve yawˬ teˇ hpaˍ kaꞈ Yeˍsuˆ suh ve dawˇ nawˇ tuˬ hpawnˬ daꞈ ve hkʼaw bon maˍ hkawˇ gʼa na ve yoˬ. Yeˍsuˆ chaw yaˇ htaꞈ teˇ hinˉ hkʼawꞈ uˉ peunˍ htaˇ, yawˇ leh 144,000 gʼaˇ aˬ htoꞈ ma te tuˬ ve yawˇ hui hkʼa dehꞈ dawˇ nyi ve yoˬ. Daꞈ jaˇ ve awˬ yanˇ chi ve hkʼaw lehˬ, Yeˍsuˆ leh yawˇ geh uˉ peunˍ ve chaw miˬ guiˬ chi htaꞈ daꞈ jaˇ ve hko hpehꞈ tuˬ gʼa ga daꞈ leh oˇ ve teˇ yanˇ miˬ guiˬ hkʼoˆ lo ve chaw biˇ ve chaw yaˇ hpehꞈ tuˬ kaꞈ gʼa ga daꞈ ve yoˬ. Yeˍsuˆ suh ve dawˇ nawˇ tuˬ hpawnˬ daꞈ la ve chaw laiˉ lanˬ gʼaˇ ha lehˬ jaˇ leh awˬ gʼuˇ suhˍ hpawˇ daꞈ jaˇ ve htaꞈ caˉ daꞈ ve, Liꞈ hpu hkʼaw tcuh kaˍ paˍ ve tawˇ hkawˇ teˇ hpaˍ htaꞈ dawˇ nyi ve ha lehˬ jaˇ. Tawˇ pa haˉ te kʼo, Iˉsaˍyaˆ liꞈ 35:5, 6; 65:21-23; Hpeuꞈ maˍ ve liꞈ 21:3, 4 hkʼaw yawˇ hui awˬ to leh yawˇ hui haꞈ ve chaw miˬ guiˬ awˬ suhˉ  hkʼaw gʼa chehˇ ve htaꞈ dawˇ mawˬ htaˇ, yawˇ hui kaꞈ awˬ gʼuˇ suhˍ hpawˇ ve dawˇ law kuiˬ htaꞈ hkʼa dehꞈ yonˍ gʼa leh Yaˬhoˉvaˬ ve kanˉ hkʼa dehꞈ te tuˬ dawˇ teh taˍ ve yoˬ.—Maꞈhtehˍ 24:13; Gaˍlaˍtiˆ 6:9.

8. Awˬ kaˍ awˬ nu ve yawˬ teˇ hpaˍ Yeˍsuˆ suh ve dawˇ nawˇ tuˬ hpawnˬ daꞈ˗e ve awˬ hkʼaˇ teˇ hkʼaˇ lehˬ aˬ htoꞈ ma le?

⁸ Awˬ kaˍ awˬ nu ve yawˬ teˇ hpaˍ Yeˍsuˆ suh ve dawˇ nawˇ tuˬ hpawnˬ daꞈ˗e ve awˬ hkʼaˇ teˇ hkʼaˇ lehˬ, yawˇ hui leuˆ yuˬ taˍ ve chaw htaꞈ haꞈ leh ga piˇ gaˇ ve tehꞈ hpeuꞈ maw piˇ gaˇ ve pa taw yoˬ. Liꞈ hpu hkʼaw awˬ gʼuˇ suhˍ htaˇ kaꞈ kʼoˆ taˍ ve, leuˆ yuˬ taˍ ve chaw leh awˬ kaˍ awˬ nu ve yawˬ teˇ hpaˍ teˇ moˍ tiˉ hpehꞈ tuˬ yoˬ. Awˬ lawn chi htaꞈ caˉ daꞈ ve ngaˬ hui teˇ geh henˇ tuˬ yoˬ.

9. Zaˍhkaˍriˆ liꞈ 8:23 hkʼaw tcuh kaˍ paˍ ve tawˇ hkawˇ kʼoˆ taˍ ve, awˬ kaˍ awˬ nu ve yawˬ teˇ hpaˍ leh leuˆ yuˬ taˍ ve chaw htaꞈ meuˆ daꞈ ve ngaˬ hui shiˍ tuˬ aˬ htoꞈ ma te laˇ ve le?

⁹ Zaˍhkaˍriˆ liꞈ 8:23 gʼaw sheˍ. Tcuh kaˍ paˍ ve tawˇ hkawˇ chi awˬ kaˍ awˬ nu ve yawˬ teˇ hpaˍ leuˆ yuˬ taˍ ve chaw htaꞈ hkʼaˬ hkʼe dawˇ ve ngaˬ hui dawˇ mawˬ tuˬ te laˇ ve yoˬ. “Yuˇdaꞈ chaw” leh “nawˬ hui” tehꞈ kʼoˆ ve lehˬ, teˇ moˍ tiˉ ve htaꞈ kʼoˆ gaˇ ve yoˬ. Chi lehˬ miˬ guiˬ hkʼoˆ lo leuˆ yuˬ taˍ ve leuˉ taˍ ve chaw htaꞈ kʼoˆ gaˇ ve yoˬ. (Roˉmaꞈ 2:28, 29) “Awˬ nu ve mvuhˇ miˬ yaˇ 10 gʼaˇ” lehˬ awˬ kaˍ awˬ nu ve yawˬ teˇ hpaˍ htaꞈ kʼoˆ gaˇ ve yoˬ. Yawˇ hui ‘Yuˇdaꞈ chaw teˇ gʼaˇ geh laˬ leh ngaˬ hui htawˇ nawˬ hui geh kʼai gaˇ ve’ tehꞈ kʼoˆ ve yoˬ. Chi lehˬ awˬ kaˍ awˬ nu ve yawˬ teˇ hpaˍ ka tiꞈ yeˬ leh leuˆ yuˬ taˍ ve chaw geh meuˆ daꞈ ve htaꞈ kʼoˆ gaˇ ve yoˬ. Yawˇ hui hkʼa peu˗eˬ teˇ moˍ tiˉ te leh Yaˬhoˉvaˬ htaꞈ oˉ kʼoˍ pui ve yoˬ. Yawˇ hui chi hkʼe meuˆ daꞈ ve pa taw Yeˍsuˆ suh ve dawˇ nawˇ tuˬ hpawnˬ daꞈ ve awˬ nyi gaˬ htaˇ, awˬ kaˍ awˬ nu ve yawˬ teˇ hpaˍ lehˬ leuˆ yuˬ taˍ ve chaw geh teˇ geh hpawnˬ daꞈ ve yoˬ.

10. Yeˍsaˍkeˍlaˆ liꞈ 37:15-19, 24, 25 hkʼaw tcuh kaˍ paˍ ve tawˇ hkawˇ awˬ tehˬ hpehꞈ la tuˬ Yaˬhoˉvaˬ hkʼaˬ hkʼe ga piˇ ve le?

¹⁰ Yeˍsaˍkeˍlaˆ liꞈ 37:15-19, 24, 25 gʼaw sheˍ. Tcuh kaˍ paˍ ve tawˇ hkawˇ awˬ tehˬ hpehꞈ la tcuh tuˬ, leuˆ yuˬ taˍ ve chaw leh awˬ kaˍ awˬ nu ve yawˬ teˇ hpaˍ teˇ moˍ tiˉ hpehꞈ la tuˬ Yaˬhoˉvaˬ te piˇ ve yoˬ. Tcuh kaˍ paˍ ve tawˇ hkawˇ hkʼaw suhˆ taˬ 2 maˬ htaꞈ kʼoˆ taˍ ve yoˬ. Suhˆ taˬ awˉ lawˉ teˇ maˬ lehˬ, ‘Yuˇdaꞈ awˬ pon hpehꞈ ve yoˬ.’ Chi lehˬ mvuhˇ naw ma hkʼoˆ lo dawˇ law kuiˬ cawˬ ve chaw htaꞈ kʼoˆ gaˇ ve yoˬ. Awˬ nu ve suhˆ taˬ teˇ maˬ lehˬ “Iˉsaˍreˍlaˆ awˬ pon hpehꞈ ve yoˬ.” Chi lehˬ miˬ guiˬ hkʼoˆ lo co co taiˍ taiˍ chehˇ tuˬ dawˇ law kuiˬ cawˬ ve chaw htaꞈ kʼoˆ gaˇ ve yoˬ. * Yaˬhoˉvaˬ lehˬ suhˆ taˬ chi 2 maˬ htaꞈ teˇ taˬ hkʼe tiˉ hpehꞈ la tcuh ve yoˬ. Chi ve 2 moˍ lehˬ Yeˍsuˆ uˉ peunˍ ve awˬ hawˉ lo teˇ moˍ tiˉ te leh Gʼuiˬ sha ve kanˉ te tuˬ yoˬ. Teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ htaˇ, awˬ kaˍ awˬ nu ve yawˬ teˇ hpaˍ leh leuˆ yuˬ taˍ ve chaw teˇ geh hpawnˬ daꞈ ve yoˬ. Yaꞈ hkʼaˇ, yawˇ hui teˇ geh hpawnˬ daꞈ lehˬ, “yawˬ moˍ teˇ moˍ tiˉ cawˬ leh, yawˬ hawˉ shehˍ hpaˇ teˇ gʼaˇ tiˉ cawˬ tuˬ yoˬ.”—Yoˇhanˬ 10:16.

11. Maꞈhtehˍ liꞈ 25:31-36, 40 hkʼaw “yawˬ” tehꞈ kʼoˆ ve lehˬ, Yeˍsuˆ Hkriꞈ ve awˬ viˉ awˬ nyi a yeˇ uiˍ ve kanˉ te tuˬ ve htaꞈ aˬ htoꞈ ma ga piˇ ve le?

¹¹ Maꞈhtehˍ liꞈ 25:31-36, 40 gʼaw sheˍ. Yeˍsuˆ tawˇ pa haˉ tehˆ maˍ laˇ ve hkʼaw “yawˬ” tehꞈ kʼoˆ ve lehˬ, Gʼuiˬ sha ve awˬ liˇ awˬ hkʼaˇ gʼaꞈ te ve chaw htaꞈ kʼoˆ gaˇ ve yoˬ. Yawˇ hui awˬ leh meuˇ ve awˬ yanˇ hkʼaw chehˇ ve awˬ kaˍ awˬ nu ve yawˬ teˇ hpaˍ hpehꞈ leh miˬ guiˬ hkʼoˆ lo co co taiˍ taiˍ chehˇ tuˬ dawˇ law kuiˬ cawˬ ve chaw hui yoˬ. Yawˇ hui Yeˍsuˆ Hkriꞈ ve awˬ viˉ awˬ nyi leuˆ yuˬ taˍ ve chaw htaꞈ ka tiꞈ yeˬ leh yawˇ hui htaꞈ gʼa ga piˇ ve yoˬ. Yawˇ hui leuˆ yuˬ taˍ ve chaw htaꞈ ga piˇ leh a yeˇ uiˍ ve awˬ vuiˬ htaꞈ te gʼa ve teˇ ceuˬ lehˬ, yawˇ hui hto toˇ leh shu awˬ laꞈ gʼawˇ hpehꞈ la tuˬ maˍ piˇ ve yoˬ.—Maꞈhtehˍ 24:14; 28:19, 20.

12-13. Awˬ kaˍ awˬ nu ve yawˬ teˇ hpaˍ Yeˍsuˆ Hkriꞈ ve awˬ viˉ awˬ nyi htaꞈ hkʼaˬ hkʼe ga piˇ sheˍ ve le?

¹² Awˬ kaˍ awˬ nu ve yawˬ teˇ hpaˍ Yeˍsuˆ Hkriꞈ ve awˬ viˉ awˬ nyi htaꞈ ga piˇ ve tehꞈ hpeuꞈ maw laˇ ve teˇ hkʼaˇ lehˬ, Yeˍsuˆ suh ve dawˇ nawˇ tuˬ hpawnˬ daꞈ ve  maˇ gaˬ sheˍ htaˇ, teˇ geh hpawnˬ daꞈ la tuˬ kuˬ piˇ ve liꞈ shu htaꞈ piˇ ve yoˬ. (Awˇ ceˍ awˇ fa “ Yeˍsuˆ suh ve dawˇ nawˇ tuˬ hpawnˬ daꞈ ve te tuˬ nawˬ gu hehnˇ˗oˬ laˇ?” htaꞈ nyi sheˍ.) Chi hkʼoˆ kaꞈ, Hkriꞈ yaˇ awˬ moˍ teˇ hpaˍ hkʼaw leuˆ yuˬ taˍ ve chaw maˇ cawˬ ve htawˇ, yawˇ hui Yeˍsuˆ suh ve dawˇ nawˇ tuˬ hpawnˬ daꞈ ve te tuˬ ga daꞈ ve yoˬ. Awˬ kaˍ awˬ nu ve yawˬ teˇ hpaˍ leuˆ yuˬ taˍ ve chaw htaꞈ gʼa ga piˇ ve ha lehˬ jaˇ. Yawˇ hui Yeˍsuˆ Hkriꞈ ve awˬ viˉ awˬ nyi htaꞈ aˬ htoꞈ ma te piˇ ve htawˇ maˇ kʼoˆ, yawˇ hui Yeˍsuˆ htaꞈ te piˇ chehˇ ve hkʼe shawˍ ve yoˬ.—Maꞈhtehˍ 25:37-40.

¹³ Mvuhˇ naw ma hkʼoˆ leh miˬ guiˬ hkʼoˆ dawˇ law kuiˬ cawˬ ve chaw teˇ gʼaˇ le le aˬ htoꞈ ma te Yeˍsuˆ suh ve dawˇ nawˇ tuˬ hpawnˬ daꞈ˗e cawˇ ve le? Awˬ hawˉ lo kʼoˆ taˍ ve htaꞈ nyi sheˍ.

14. Yaˬhoˉvaˬ leh Yeˍsuˆ ngaˬ hui htaꞈ hkʼaˬ hkʼe taw haꞈ ve le?

¹⁴ Yaˬhoˉvaˬ leh Yeˍsuˆ ngaˬ hui htaꞈ haꞈ ve awˬ bon uiˍ jaˇ. Yaˬhoˉvaˬ lehˬ ngaˬ hui htaꞈ haꞈ ve laiˉ hkʼaˇ hpeuꞈ maw laˇ ve yoˬ. A yeˇ uiˍ jaˇ ve teˇ hkʼaˇ lehˬ, yawˇ ve Yaˇ paˍ ngaˬ hui awˬ pon tuꞈ hkanˍ leh suh tcuh laˇ ve yoˬ. (Yoˇhanˬ 3:16) Yeˍsuˆ kaꞈ ngaˬ hui htaꞈ haꞈ jaˇ ve yoˬ. Yawˇ ngaˬ hui teˇ gʼaˇ le le awˬ pon hkanˍ suh laˇ ve yoˬ. (Yoˇhanˬ 15:13) Yaˬhoˉvaˬ leh Yeˍsuˆ ngaˬ hui htaꞈ haꞈ ve hkʼa peu˗eˬ htaꞈ ngaˬ hui te hkʼawꞈ piˇ maˇ gʼa ve htawˇ, yawˇ huiˉ maˬ htaꞈ awˬ bon uiˍ jaˇ tehꞈ hpeuꞈ maw piˇ tuˬ, ngaˬ hui a shaꞈ teꞈ kuiˬ hkʼaw teˇ nyi le le yawˇ hui ve hkawˇ na ve yoˬ. (Kawˇlawˇsehˇ 3:15) Yawˇ huiˉ maˬ ngaˬ hui htaꞈ haꞈ laˇ ve dawˇ nyi tuˬ, ngaˬ hui Yeˍsuˆ suh ve dawˇ nawˇ tuˬ hpawnˬ daꞈ˗e htaˇ, Yaˬhoˉvaˬ leh Yeˍsuˆ htaꞈ ngaˬ hui haꞈ ve tehꞈ hpeuꞈ maw piˇ chehˇ ve yoˬ.

15. Aˬ htoꞈ ma te leuˆ yuˬ taˍ ve chaw leh awˬ kaˍ awˬ nu ve yawˬ teˇ hpaˍ htaiˍ hkʼawꞈ ve htaꞈ awˬ hpfuhˇ shiˍ jaˇ ve le?

¹⁵ Htaiˍ hkʼawꞈ laˇ ve htaꞈ ngaˬ hui awˬ hpfuhˇ shiˍ jaˇ. (Maꞈhtehˍ 20:28) Htaiˍ hkʼawꞈ laˇ ve htaꞈ leuˆ yuˬ taˍ ve chaw kaꞈ awˬ hpfuhˇ shiˍ jaˇ. Htaiˍ hkʼawꞈ laˇ ve maˇ cawˬ ve kʼo, yawˇ hui dawˇ law taˍ ve awˬ tehˬ hpehꞈ la maˇ gʼa. Htaiˍ hkʼawꞈ laˇ ve htaꞈ yawˇ hui yonˍ ve tehꞈ hpeuꞈ maw piˇ ve pa taw, yawˇ hui Gʼuiˬ sha haꞈ yuˬ ve chaw hpehꞈ leh Gʼuiˬ sha ve yaˇ tehꞈ shawˍ ve yoˬ. (Roˉmaꞈ 5:1; 8:15-17, 23) Htaiˍ hkʼawꞈ laˇ ve htaꞈ awˬ kaˍ awˬ nu ve yawˬ teˇ hpaˍ htawˇ awˬ hpfuhˇ shiˍ jaˇ leh yawˇ hui yonˍ ve tehꞈ hpeuꞈ maw piˇ ve pa taw, yawˇ hui Gʼuiˬ sha ve mehˆ gʼuˇ suhˍ daꞈ kehˬ ve chaw hpehꞈ la ve yoˬ. Yawˇ hui daꞈ kehˬ ve kanˉ htaꞈ te gʼa leh, “uiˍ jaˇ ve tuꞈ ve hkanˍ ve awˬ hkʼaw lo tawˆ la” gʼa tuˬ, dawˇ law taˍ ve yoˬ. (Hpeuꞈ maˍ ve 7:13-15) Leuˆ yuˬ taˍ ve chaw leh awˬ kaˍ awˬ nu ve yawˬ teˇ hpaˍ htaiˍ hkʼawꞈ laˇ ve htaꞈ awˬ hpfuhˇ shiˍ ve tehꞈ hpeuꞈ maw piˇ ve teˇ ceuˬ lehˬ, teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ˗e ve yoˬ.

16. Ngaˬ hui Yeˍsuˆ suh ve dawˇ nawˇ tuˬ hpawnˬ daꞈ˗e ve awˬ hkʼaˇ teˇ hkʼaˇ lehˬ aˬ htoꞈ ma le?

¹⁶ Ngaˬ hui Yeˍsuˆ suh ve dawˇ nawˇ tuˬ hpawnˬ daꞈ˗e ve awˬ hkʼaˇ teˇ hkʼaˇ lehˬ, ngaˬ hui Yeˍsuˆ ve tawˇ hkawˇ na yuˬ gaˇ ve pa taw yoˬ. Mvuhˇ naw ma hkʼoˆ leh miˬ guiˬ hkʼoˆ dawˇ law kuiˬ cawˬ ve chaw htawˇ, Yeˍsuˆ suh ve dawˇ nawˇ tuˬ hpawnˬ daꞈ ve teˇ haˉ htaˇ, Yeˍsuˆ kʼoˆ ve tawˇ hkawˇ htaꞈ ngaˬ hui na yuˬ gaˇ ve yoˬ. Yawˇ kʼoˆ ve, “ngaˬ htaꞈ dawˇ nawˇ tuˬ chi hkʼe te˗o.”—1 Kawˇrenˍhtuˆ 11:23, 24.

17. Yeˍsuˆ suh ve dawˇ nawˇ tuˬ hpawnˬ daꞈ ve ngaˬ hui Yaˬhoˉvaˬ geh meuˆ daꞈ maˇ la tuˬ hkʼaˬ hkʼe ga laˇ ve le?

¹⁷ Yeˍsuˆ suh ve dawˇ nawˇ tuˬ hpawnˬ daꞈ ve ngaˬ hui Yaˬhoˉvaˬ geh meuˆ daꞈ maˇ la tuˬ ga laˇ ve. (Yaˍkoˆ 4:8) Ngaˬ hui gʼa henˇ peuˬ˗oˬ ve hkʼa shuˍ, ngaˬ hui Yeˍsuˆ suh ve dawˇ nawˇ tuˬ hpawnˬ daꞈ˗e htaˇ, Yaˬhoˉvaˬ ngaˬ hui htaꞈ dawˇ law kuiˬ peꞈ laˇ ve, leh yawˇ ngaˬ hui htaꞈ haꞈ laˇ ve, chi teˇ hpaˍ htaꞈ caˉ daꞈ ve ngaˬ hui gʼa dawˇ nyi tuˬ yoˬ. (Yeˍraˍmiˆ 29:11; 1 Yoˇhanˬ 4:8-10) Chi ve 2 ceuˬ htaꞈ ngaˬ hui dawˇ nyi htaˇ, ngaˬ hui Yaˬhoˉvaˬ htaꞈ haꞈ maˇ la leh yawˇ geh gʼaˇ hteꞈ meuˆ daꞈ tuˬ yoˬ.—Roˉmaꞈ 8:38, 39.

18. Yeˍsuˆ ve awˬ lawn htaꞈ dawˇ nyi htaˇ, ngaˬ hui aˬ htoꞈ ma te gaˇ tuˬ te laˇ ve le?

¹⁸ Ngaˬ hui Yeˍsuˆ suh ve dawˇ nawˇ tuˬ hpawnˬ˗e daꞈ htaˇ, ngaˬ hui yawˇ ve awˬ lawn htaꞈ henˇ yuˬ  gaˇ ve. (1 Peˍtruˆ 2:21) Yeˍsuˆ suh ve dawˇ nawˇ tuˬ hpawnˬ daꞈ ve maˇ gaˬ sheˍ htaˇ, yawˇ suh˗e htaˇ, leh yawˇ kʼawꞈ teꞈ tu la htaˇ, chi ve teˇ hpaˍ htaꞈ caˉ daꞈ ve awˉ lawˉ teˇ shinˉ ngaˬ hui Liꞈ hpu awˬ tawn gʼaw tuˬ yoˬ. Yeˍsuˆ suh ve dawˇ nawˇ tuˬ hpawnˬ daꞈ ve hkʼaw bon maˍ hkawˇ ngaˬ hui gʼa na htaˇ, Yeˍsuˆ ngaˬ hui htaꞈ hkʼaˬ hkʼe taw haꞈ ve dawˇ nyi tuˬ te laˇ ve yoˬ. (Eˇfeˇsuꞈ 5:2; 1 Yoˇhanˬ 3:16) Yeˍsuˆ ngaˬ hui awˬ pon laiˉ ceuˬ yuˬ tanˇ laˇ ve pa taw, awˬ lawn chi ve htaꞈ caˉ daꞈ ve ngaˬ hui gʼaw leh dawˇ nyi ve yoˬ. “Yeˍsuˆ te ve hkʼe” ngaˬ hui htawˇ te gaˇ ve yoˬ.—1 Yoˇhanˬ 2:6.

19. Ngaˬ hui Gʼuiˬ sha haꞈ ve chaw hkʼaˬ htaˆ kaꞈ hkʼaˬ hkʼe te hpehꞈ gʼa tuˬ le?

¹⁹ Yeˍsuˆ suh ve dawˇ nawˇ tuˬ hpawnˬ daꞈ htaˇ, ngaˬ hui Gʼuiˬ sha haꞈ ve chaw hkʼaˬ htaˆ kaꞈ hpehꞈ tuˬ coˇ caˇ leh te ve. (Yuˇdaꞈ 20, 21) Ngaˬ hui Gʼuiˬ sha hkawˇ na yuˬ ve, yawˇ ve awˬ meh htaꞈ yawˆ yan tuˬ te piˇ ve, leh yawˇ ha lehˬ tuˬ te piˇ ve kʼo, ngaˬ hui Gʼuiˬ sha haꞈ ve chaw hkʼaˬ htaˆ kaꞈ hpehꞈ gʼa tuˬ yoˬ. (Tawˇ naˉ ve 27:11; Maꞈhtehˍ 6:9; 1 Yoˇhanˬ 5:3) Ngaˬ hui Yeˍsuˆ suh ve dawˇ nawˇ tuˬ hpawnˬ daꞈ˗e htaˇ, teˇ nyi le le ngaˬ hui Gʼuiˬ sha haꞈ ve chaw hpehꞈ tuˬ coˇ caˇ leh te ve yoˬ. Ngaˬ hui “Yaˬhoˉvaˬ˗oˬ nawˬ ngaˬ htaꞈ hkʼaˬ htaˆ kaꞈ haꞈ laˇ˗oˆ” tehꞈ kʼoˆ piˇ chehˇ ve hkʼe hpehꞈ ve yoˬ.

20. Ngaˬ hui Yeˍsuˆ suh ve dawˇ nawˇ tuˬ hpawnˬ daꞈ˗e ve aˬ htoꞈ ma awˬ hkʼaˇ cawˬ sheˍ ve le?

²⁰ Mvuhˇ naw ma hkʼoˆ leh miˬ guiˬ hkʼoˆ dawˇ law kuiˬ cawˬ ve chaw htawˇ, ngaˬ hui Yeˍsuˆ suh ve dawˇ nawˇ tuˬ hpawnˬ daꞈ˗e ve awˬ hkʼaˇ laiˉ hkʼaˇ cawˬ ve yoˬ. Oˇ ve teˇ nyi hkʼaw ngaˬ hui teˇ geh hpawnˬ daꞈ˗e htaˇ, ngaˬ hui haꞈ ve chaw suh˗e ve htaꞈ dawˇ nyi ve yoˬ. Oˇ ve lehˬ Yeˍsuˆ Hkriꞈ yoˬ. Leh a yeˇ uiˍ jaˇ ve lehˬ, ngaˬ hui yawˇ haꞈ pehnˇ uiˍ jaˇ ve htaꞈ dawˇ nyi ve yoˬ. Oˇ ve lehˬ, Yaˬhoˉvaˬ yawˇ haꞈ pehnˇ ve pa taw, yawˇ haꞈ jaˇ ve Yaˇ paˍ ngaˬ hui awˬ pon htaiˍ hkʼawꞈ laˇ tcuh ve yoˬ. Chi teˇ hkʼawꞈ Yeˍsuˆ suh ve dawˇ nawˇ tuˬ hpawnˬ daꞈ ve shinˉ peuˬ 5 nyi mvuhˇ hpeuꞈ, Ha pa 4 maˬ 15 nyi 2022 hkʼawꞈ htaˇ te tuˬ yoˬ. Yaˬhoˉvaˬ leh yawˇ ve Yaˇ paˍ htaꞈ ngaˬ hui haꞈ jaˇ. Hkʼe te leh, ngaˬ hui Yeˍsuˆ suh ve dawˇ nawˇ tuˬ hpawnˬ daꞈ˗e ve teˇ ceuˬ kaꞈ maˇ tawˍ laˇ tcuh.