Awˬ Lawn 1
“Yaˬhoˉvaˬ htaꞈ ca ve chaw lehˬ daꞈ ve awˬ ceuˬ gʼa tuˬ yoˬ”
2022 HKʼAWꞈ A YEˇ UIˍ JAˇ VE LIꞈ HPU AWˬ TAWN: “Yaˬhoˉvaˬ htaꞈ ca ve chaw lehˬ daꞈ ve awˬ ceuˬ gʼa tuˬ yoˬ.”—CHIˇ MVUH VE 34:10, Miˬ guiˬ awˬ suhˉ yuˬ tawˆ ve Liꞈ hpu.
KʼA MUIˬ HKAWˇ 4 ‘Yaˬhoˉvaˬ lehˬ ngaˬ ve yawˬ hawˉ shehˍ hpaˇ hpehꞈ ve’
HENˇ TUˬ VE TEˇ HPAˍ *
Daˍviˆ tuꞈ ve hkanˍ ve gʼa hpuˇ ve htawˇ, “daꞈ ve awˬ ceuˬ gʼa tuˬ yoˬ” tehꞈ dawˇ ve (Awˬ tawn 1-3 nyi sheˍ) *
1. Daˍviˆ tuꞈ ve hkanˍ ve aˬ htoꞈ ma gʼa hpuˇ ve le?
Jawˇ mawˇ Sawˉluꞈ Daˍviˆ htaꞈ tiˇ pehˍ gaˇ ve pa taw, yawˇ gʼa ponˬ tuˬ gʼa hpaw˗e ve yoˬ. Daˍviˆ teꞈ chiˉ maˇ cawˬ. Hkʼe te leh, Daˍviˆ hkaoˍ monˇ 5 shiˍ ca lawˬ˗e tuˬ Mawˇbaˆ venˇ lo kʼai ve yoˬ. (1 Saˍmo˗eˍlaˆ 21:1, 3) Peuˬ hkʼawꞈ nawˉ, Daˍviˆ leh yawˇ ve chaw haˉ kʼoˍ hkʼaw ca vaꞈ taˍ ve yoˬ. (1 Saˍmo˗eˍlaˆ 22:1) Daˍviˆ tuꞈ ve hkanˍ ve chi hkʼe ve hkʼaˬ hkʼe te gʼa hpuˇ ve le?
2. Sawˉluꞈ maˇ daꞈ ve awˬ ceuˬ gʼa hpuˇ tuˬ aˬ htoꞈ ma te ve le? (1 Saˍmo˗eˍlaˆ 23:16, 17)
2 Daˍviˆ maꞈ laiˉ pawˆ bawˆ gʼaˇ ve pa taw, laiˉ gʼaˇ kaꞈ Daˍviˆ htaꞈ nyi ma cawˇ leh Sawˉluꞈ Daˍviˆ htaꞈ hkawehˉ ve yoˬ. Sawˉluꞈ Yaˬhoˉvaˬ hkawˇ maˇ na yuˬ ve pa taw, Daˍviˆ htaꞈ Sawˉluꞈ awˬ tan jawˇ mawˇ te tuˬ Yaˬhoˉvaˬ leuˆ yuˬ piˇ ve htaꞈ kaꞈ Sawˉluꞈ shiˍ ve yoˬ. (1 Saˍmo˗eˍlaˆ 23:16, 17 gʼaw sheˍ.) Yaꞈ hkʼaˇ, Sawˉluꞈ kanˇ paˆ cawˬ sheˍ ve pa taw, yawˇ maꞈ moˍ cawˬ leh yawˇ htaꞈ awˬ gʼaˇ piˇ ve chaw laiˉ gʼaˇ kaꞈ cawˬ sheˍ ve yoˬ. Chi ve htaꞈ pa taw, Daˍviˆ gʼa ponˬ tuˬ gʼa hpaw˗e ve yoˬ. Yaˬhoˉvaˬ Daˍviˆ htaꞈ jawˇ mawˇ maˇ te tcuh tuˬ, Sawˉluꞈ Yaˬhoˉvaˬ htaꞈ tawˍ piˇ gʼa ve tehꞈ dawˇ˗aw laˇ? (Iˉsaˍyaˆ 55:11) Awˬ lawn chi htaꞈ caˉ daꞈ ve Liꞈ hpu hkʼaw maˇ gʼa kʼoˆ laˇ taˬ. Yaꞈ hkʼaˇ, ngaˬ hui yonˍ gʼa ve teˇ ceuˬ lehˬ, Sawˉluꞈ maˇ daꞈ ve awˬ ceuˬ gʼa hpuˇ jaˇ tuˬ te ve yoˬ. Awˬ lawn kʼo, chaw teˇ gʼaˇ kaꞈ Yaˬhoˉvaˬ htaꞈ tawˍ piˇ maˇ gʼa.
3. Daˍviˆ tuꞈ ve hkanˍ ve gʼa hpuˇ htaˇ hkʼaˬ hkʼe dawˇ ve le?
3 Daˍviˆ lehˬ uiˍ gaˇ mvuh gaˇ ve chaw maˇ hpehꞈ gaˇ. Awˬ tehˬ kʼo, yawˇ jawˇ mawˇ te tuˬ maˇ dawˇ nyi jaw ve htawˇ, Yaˬhoˉvaˬ Daˍviˆ htaꞈ jawˇ mawˇ te tuˬ leuˆ yuˬ piˇ ve yoˬ. (1 Saˍmo˗eˍlaˆ 16:1, 12, 13) Chi ve htaꞈ pa taw, Sawˉluꞈ lehˬ Daˍviˆ htaꞈ canˇ paˍ hkʼe shawˍ leh tiˇ pehˍ tuˬ gʼaꞈ yuˬ ve yoˬ. Yaꞈ hkʼaˇ, Daˍviˆ chi hkʼe ve kawˆ tuˬ gʼa hpuˇ ve htawˇ, yawˇ Yaˬhoˉvaˬ htaꞈ venˇ baˆ maˇ taˍ jaw. Daˍviˆ caˇ tuˬ maˇ cawˬ leh haˉ kʼoˍ hkʼaw gʼa hpaw vaꞈ toˇ ve htawˇ, yawˇ maˇ hkʼanˇ jaw. Daˍviˆ haˉ kʼoˍ hkʼaw chehˇ htaˇ, awˬ lawn chi ve htaꞈ caˉ daꞈ a yeˇ uiˍ ve Liꞈ hpu awˬ tawn yuˬ tawˆ ve yoˬ. Oˇ kaˬ lo kʼoˆ ve, “Yaˬhoˉvaˬ htaꞈ ca ve chaw lehˬ daꞈ ve awˬ ceuˬ gʼa tuˬ yoˬ.”—Chiˇ mvuh ve 34:10.
4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le? Leh aˬ htoꞈ ma te awˬ lawn chi teˇ hpaˍ a yeˇ uiˍ jaˇ ve le?
4 A naˍ cawˬ ve maˇ maw sheˍ htaˇ, Yaˬhoˉvaˬ ve kanˉ te ve chaw laiˉ gʼaˇ lehˬ caˇ tuˬ leh a shaꞈ teꞈ kuiˬ hkʼaw loˍ ve awˬ ceuˬ kaꞈ hkʼa dehꞈ maˇ cawˬ. * Ngaˬ hui lehˬ “tuꞈ jaˇ hkanˍ jaˇ ve” awˬ yanˇ hkʼaw chehˇ ve pa taw, shoꞈ shaꞈ ve gʼaˇ hteꞈ cawˬ maˇ jaˇ tuˬ yoˬ tehꞈ shiˍ ve yoˬ. (Maꞈhtehˍ 24:21) Chi htaꞈ pa taw, na hkawˇ 4 maˬ chi htaꞈ ngaˬ hui teˇ geh henˇ tuˬ yoˬ. Daˍviˆ lehˬ “daꞈ ve awˬ ceuˬ gʼa tuˬ yoˬ” tehꞈ kʼoˆ htaˇ, yawˇ aˬ htoꞈ ma htaꞈ kʼoˆ gaˇ ve le? Aˬ htoꞈ ma te ngaˬ hui cawˬ taˍ ve awˬ ceuˬ htaꞈ nyi hkʼaˇ suh cawˇ ve le? Yaˬhoˉvaˬ ngaˬ hui htaꞈ nyi haꞈ shaˉ laˇ tuˬ yoˬ tehꞈ aˬ htoꞈ ma te ngaˬ hui yonˍ gʼa ve le? Leh awˬ gʼuˇ suhˍ hpawˇ hpehꞈ la tuˬ ve awˬ ceuˬ teˇ hpaˍ htaꞈ chi teˇ hkui kaꞈ ngaˬ hui hkʼaˬ hkʼe te gu hehnˇ taˍ gʼa tuˬ le?
“NGAˬ LOˍ VE AWˬ CEUˬ HKʼA PEU˗Eˬ HTAꞈ GʼA TAˍ PEUˬ”
5-6. Chiˇ mvuh ve liꞈ 23:1-6 hkʼaw kʼoˆ taˍ ve hkʼe, Daˍviˆ kʼoˆ ve Yaˬhoˉvaˬ ve kanˉ te ve chaw “daꞈ ve awˬ ceuˬ gʼa tuˬ yoˬ” tehꞈ kʼoˆ htaˇ, ngaˬ hui na gʼa tuˬ hkʼaˬ hkʼe ga laˇ ve le?
5 Yaˬhoˉvaˬ ve kanˉ te ve chaw “daꞈ ve awˬ ceuˬ gʼa tuˬ yoˬ” tehꞈ Daˍviˆ kʼoˆ htaˇ, hkʼaˬ hkʼe kʼoˆ gaˇ ve le? Chiˇ mvuh ve liꞈ kaˇ nanˉ uiˍ 23 hkʼaw awˬ lawn chi ngaˬ hui na gʼa tuˬ ga laˇ ve yoˬ. Awˬ lawn kʼo, chi ve hkʼaw tawˇ hkawˇ hkʼa shuˍ shuˍ˗ehˬ ve yehˇ ve yoˬ. (Chiˇ mvuh ve 23:1-6 gʼaw sheˍ.) Daˍviˆ Chiˇ mvuh ve liꞈ kaˇ nanˉ uiˍ 23 tanˬ bvuhꞈ htaˇ oˇ kaˬ lo kʼoˆ ve, “Gʼuiˬ sha lehˬ, ngaˬ ve yawˬ hawˉ shehˍ hpaˇ hpehꞈ leh, ngaˬ loˍ ve awˬ ceuˬ hkʼa peu˗eˬ gʼa taˍ peuˬ.” Chi ve peuˬ hkʼawꞈ nawˉ kaꞈ, Daˍviˆ lehˬ Yaˬhoˉvaˬ yawˇ htaꞈ nyi haꞈ shaˉ tcuh ve pa taw, Yaˬhoˉvaˬ yawˇ htaꞈ peꞈ laˇ ve awˬ hpfuhˇ hkʼaˆ jaˇ ve laiˉ ceuˬ htaꞈ kʼoˆ sheˍ ve yoˬ. Gʼuiˬ sha yawˇ htaꞈ “hteˇ ve cawˇ ve yaꞈ kʼaw hkʼoˆ shiˍ kʼai” leh yawˇ ha lehˬ htaˇ leh tuꞈ htaˇ kaꞈ Gʼuiˬ sha ga piˇ ve yoˬ. Daˍviˆ Yaˬhoˉvaˬ ve “zuhˇ mvuhꞈ nawˉ lehˍ cawˬ ve” hkʼaw chehˇ ve htawˇ, yawˇ shoꞈ shaꞈ ve gʼa hpuˇ sheˍ ve yoˬ. Teˇ pawˆ pawˆ Daˍviˆ awˬ gʼaˇ nuˇ ve lehˬ, naˆ hoꞈ jaˇ ve lawˬ hkʼo hkʼaw chehˇ ve htaꞈ shuˍ leh yawˇ htaꞈ nyi bawˬ ve chaw kaꞈ cawˬ sheˍ ve yoˬ. Yaꞈ hkʼaˇ, Daˍviˆ chi hkʼe hpehꞈ ve htawˇ, yawˇ htaꞈ nyi haꞈ shaˉ piˇ shehˍ hpaˇ Yaˬhoˉvaˬ cawˬ leh yawˇ “kawˆ tuˬ ve maˇ heˆ.”
6 Daˍviˆ yawˇ a shaꞈ teꞈ kuiˬ hkʼaw “daꞈ ve awˬ ceuˬ gʼa tuˬ yoˬ” tehꞈ kʼoˆ ve, aˬ htoꞈ ma htaꞈ kʼoˆ gaˇ ve chi teˇ hkui ngaˬ hui shiˍ˗oˬ. Chi ve lehˬ yawˇ Yaˬhoˉvaˬ geh meuˆ daꞈ tuˬ teˇ ceuˬ le le te piˇ ve yoˬ. Daˍviˆ ha lehˬ ve lehˬ hpu shi mawˇ jeˬ htaꞈ pa taw maˇ heˆ. Daˍviˆ Yaˬhoˉvaˬ gu piˇ ve teˇ ceuˬ le le htaꞈ nyi hkʼaˇ suh ve yoˬ. Yawˇ awˬ pon a yeˇ uiˍ jaˇ ve lehˬ, Yaˬhoˉvaˬ geh awˬ bon gʼa leh nyi haꞈ shaˉ laˇ ve htaꞈ pa taw yoˬ.
7. Luˉkaꞈ liꞈ 21:20-24 hkʼaw kʼoˆ taˍ ve hkʼe, awˉ lawˉ peuˇ ve Hkriꞈ yaˇ Yuˇdaꞈ chaw a yeˇ uiˍ ve aˬ htoꞈ ma htaꞈ gʼa dawˇ cheˆ cawˇ ve le?
7 Ngaˬ hui hpu shi mawˇ jeˬ htaꞈ caˉ daꞈ ve cawˇ ve hpawˇ gʼa dawˇ tuˬ, Daˍviˆ ve tawˇ hkawˇ a yeˇ uiˍ ve tehꞈ ngaˬ hui mawˬ tuˬ ga laˇ ve yoˬ. Ngaˬ hui cawˬ taˍ ve awˬ ceuˬ htaꞈ ha lehˬ ve kaꞈ maˇ yaꞈ. Yaꞈ hkʼaˇ, chi ve ngaˬ hui a shaꞈ teꞈ kuiˬ hkʼaw a yeˇ uiˍ jaˇ ve tehꞈ maˇ gʼa shawˍ. Awˉ lawˉ peuˇ ve Hkriꞈ yaˇ a yeˇ uiˍ ve awˬ lawn chi ve htaꞈ na gʼa ve yoˬ. (Luˉkaꞈ 21:20-24 gʼaw sheˍ.) Yeˍsuˆ yawˇ hui htaꞈ shaˍ tiꞈ piˇ ve, teˇ nyi kʼo “Yeˍruˆsaˍlehnˍ venˇ htaꞈ maꞈ moˍ maꞈ cuˇ hkʼa caw zuhˇ hoˆ taˍ ve htaꞈ” nawˬ hui gʼa mawˬ tuˬ yoˬ. Chi hkʼaˬ hkʼe htaˆ hpehꞈ la ve kʼo, yawˇ hui ‘hkʼaw hkʼoˆ lawˬ hkʼoˆ lo haˆ gʼa hpaw˗e ve yoˬ.’ Yawˇ hui hpaw˗e ve kʼo gʼa ponˬ ve yoˬ. Yaꞈ hkʼaˇ, hpu shi mawˇ jeˬ htaꞈ gʼa baˬ taˉ ve yoˬ. Ponˬ laˬ ve laiˉ hkʼawꞈ htaˇ ve Shaw nyi kuiˬ Taꞈ yehˬ hkʼaw kʼoˆ ve, “yawˇ hui ti mi leh yehˬ kaꞈ gʼa baˬ taˉ ve yoˬ. Leh yawˇ hui aˉ hkʼaw lo cawˬ ve hpu shi mawˇ jeˬ htaꞈ kaꞈ maˇ kʼawꞈ gʼa yuˬ˗e. Nyi˗a kʼo awˬ nu ve awˬ ceuˬ a yeˇ uiˍ ve tehꞈ dawˇ ve htawˇ, Yaˬhoˉvaˬ yawˇ hui htaꞈ nyi haꞈ shaˉ laˇ leh awˬ gʼaˇ peꞈ laˇ tuˬ yoˬ tehꞈ yonˍ ve pa taw, Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ ve tehꞈ shawˍ ve yoˬ.”
8. Awˉ lawˉ peuˇ ve Hkriꞈ yaˇ Yuˇdaꞈ chaw htaꞈ hpehꞈ la ve awˬ ceuˬ a yeˇ uiˍ ve awˬ lawn ngaˬ hui htaꞈ aˬ htoꞈ ma maˍ laˇ ve le?
8 Awˉ lawˉ peuˇ ve Hkriꞈ yaˇ Yuˇdaꞈ chaw htaꞈ hpehꞈ la ve awˬ ceuˬ a yeˇ uiˍ ve awˬ lawn ngaˬ hui htaꞈ aˬ htoꞈ ma maˍ laˇ ve le? Shaw nyi kuiˬ Taꞈ yehˬ oˇ ve teˇ kʼoˆ hkʼaw kʼoˆ sheˍ ve, “awˬ gʼuˇ suhˍ hpawˇ hpu shi mawˇ jeˬ ve awˬ lawn lawˇ nyi laˇ ve kʼo, ngaˬ hui ve a shaꞈ teꞈ hkʼaˇ hkʼaˬ hkʼe hpehꞈ tuˬ ve hehˉ le? Hpu shi mawˇ jeˬ a yeˇ uiˍ jaˇ tehꞈ shawˍ ve maˇ heˆ leh Gʼuiˬ sha hpawˇ chehˇ ve chaw teˇ gʼaˇ le le gʼa ponˬ tuˬ a yeˇ uiˍ jaˇ tehꞈ shawˍ tuˬ laˇ? Ngaˬ hui hpaw˗e ve lehˬ, tuꞈ ve hkanˍ ve leh caˇ tuˬ dawˬ tuˬ maˇ lawꞈ tuˬ yoˬ. Loˍ ve awˬ ceuˬ teˇ ceuˬ le le te tuˬ ngaˬ hui gu hehnˇ taˍ cawˇ ve yoˬ. Awˉ lawˉ peuˇ ve Hkriꞈ yaˇ Yuˇdaꞈ mvuhˇ miˬ hkʼaw tawˆ˗e ve chaw hkʼa shuˍ yoˬ.” *
9. Pawˇluꞈ Yuˇdaꞈ chaw Hkriꞈ yaˇ htaꞈ kʼoˆ piˇ ve tawˇ hkawˇ nawˬ aˬ htoꞈ ma awˬ gʼaˇ gʼa ve le?
9 Hkriꞈ yaˇ chi teˇ hpaˍ yawˇ hui cawˬ taˍ ve teˇ ceuˬ le le htaꞈ baˬ taˉ leh, a shaꞈ teꞈ hkʼaˇ awˬ suhˉ kʼawꞈ tanˬ ve hkʼaˬ hkʼe taw taw haˍ ve, nawˬ dawˇ mawˬ gʼa˗aw laˇ? Yawˇ hui loˍ ve awˬ ceuˬ htaꞈ Yaˬhoˉvaˬ nyi haꞈ shaˉ laˇ tuˬ yoˬ tehꞈ gʼa yonˍ cawˇ ve yoˬ. Ponˬ laˬ ve 5 hkʼawꞈ Roˉmaꞈ chaw Yeˍruˆsaˍlehnˍ venˇ htaꞈ maˇ ca hoˆ la sheˍ htaˇ ve awˬ lawn hpehꞈ ve yoˬ. Pawˇluꞈ kaꞈ Yuˇdaꞈ chaw Hkriꞈ yaˇ hpehꞈ ve htaꞈ shaˍ tiꞈ piˇ ve yoˬ. Oˇ kaˬ lo kʼoˆ ve, “hpu htaꞈ sheˉ lai ve teˇ ceuˬ nawˬ hui awˬ hkʼaw lo taˇ cawˬ piˇ. Nawˬ hui hkʼa cawˬ taˍ ve teˇ hpaˍ htaꞈ nyi hkʼaˇ suh chehˇ˗oˆ. Awˬ lawn kʼo, ngaˬ nawˬ htaꞈ hkʼaˬ htaˆ kaꞈ maˇ hpaˆ, hkʼaˬ htaˆ kaꞈ maˇ baˬ tehꞈ Gʼuiˬ sha kʼoˆ taˍ ve yoˬ. Chi htaꞈ pa taw, Jawˇ mawˇ Gʼuiˬ sha lehˬ, ngaˬ htaꞈ ga laˇ shehˍ hpaˇ hpehꞈ leh, ngaˬ teꞈ chiˉ kawˆ tuˬ maˇ cawˬ. Chaw yaˇ ngaˬ htaꞈ aˬ htoꞈ ma te laˇ hpehꞈ tuˬ le, tehꞈ nyi ma haꞈ hanˉ ve awˬ hkʼaw lo ngaˬ hui kʼoˆ hpehꞈ ve yoˬ.” (Heˍbrehˇ 13:5, 6) Roˉmaꞈ chaw maꞈ maˇ ca bawˆ la sheˍ htaˇ Pawˇluꞈ beˆ maˍ piˇ ve tawˇ hkawˇ htaꞈ na yuˬ ve chaw lehˬ, yawˇ hui a shaꞈ teꞈ hkʼaˇ caˇ lawꞈ dawˬ lawꞈ te leh teˇ kaˬ lo ca chehˇ˗e tuˬ haˍ jaˇ tehꞈ maˇ dawˇ. Yawˇ hui loˍ ve awˬ ceuˬ htaꞈ Yaˬhoˉvaˬ nyi haꞈ shaˉ laˇ tuˬ yoˬ tehꞈ yonˍ ve yoˬ. Pawˇluꞈ ve tawˇ hkawˇ kaꞈ ngaˬ hui yonˍ gʼa tuˬ ga laˇ ve yoˬ.
“CAWˬ TAˍ VE AWˬ CEUˬ HTAꞈ NYI HKʼAˇ SUH VE”
10. Pawˇluꞈ ‘gʼa hkanˍ peuˬ’ tehꞈ kʼoˆ ve ngaˬ hui htaꞈ aˬ htoꞈ ma maˍ laˇ ve le?
10 Pawˇluꞈ Tiˆmoˉseˍ htaꞈ beˆ maˍ piˇ ve hkʼa shuˍ, ngaˬ hui kaꞈ yuˬ yehˇ cawˇ ve yoˬ. Yawˇ kʼoˆ ve, “caˇ tuˬ dawˬ tuˬ leh veuꞈ tuˬ kʼaˇ tuˬ cawˬ ve kʼo, ngaˬ hui nyi hkʼaˇ suh tuˬ yoˬ.” (1 Tiˆmoˉseˍ 6:8) Chi kʼoˆ gaˇ ve lehˬ, ngaˬ hui caˇ tuˬ mehˬ mehˬ maˇ gʼa caˇ˗o ve htaꞈ kʼoˆ gaˇ ve laˇ? Maˇ heˆ leh yehˬ daꞈ daꞈ ve leh veuꞈ kʼaˇ awˬ suhˉ vuiˬ maˇ gʼa˗o ve htaꞈ kʼoˆ gaˇ ve laˇ? Pawˇluꞈ chi hkʼe kʼoˆ gaˇ ve maˇ heˆ. Pawˇluꞈ kʼoˆ ve, ngaˬ hui cawˬ taˍ ve awˬ ceuˬ htaꞈ nyi hkʼaˇ suh cawˇ ve yoˬ. Chi lehˬ Pawˇluꞈ ‘gʼa hkanˍ peuˬ’ tehꞈ kʼoˆ ve yoˬ. (Hpiˇliˇpiˆ 4:12) Chi htaꞈ pa taw, ngaˬ hui awˬ pon a yeˇ uiˍ jaˇ ve lehˬ, Yaˬhoˉvaˬ geh meuˆ daꞈ ve yoˬ. Hpu shi mawˇ jeˬ htaꞈ maˇ heˆ.—Haˍbaˍkuˆ 3:17, 18.
Iˉsaˍreˍlaˆ chaw yawˇ hui heh puiˉ hkʼaw 40 hkʼawꞈ caw toˇ chehˇ htaˇ “loˍ ve awˬ ceuˬ hkʼa peu˗eˬ htaꞈ gʼa taˍ peuˬ.” Hkʼe kʼo ngaˬ hui˗ehˬ? Chi teˇ hkui ngaˬ hui cawˬ taˍ ve awˬ ceuˬ htaꞈ nyi hkʼaˇ suh˗aw laˇ? (Awˬ tawn 11 nyi sheˍ) *
11. Moˉseˍ ve tawˇ hkawˇ cawˬ taˍ ve awˬ ceuˬ htaꞈ nyi hkʼaˇ suh chehˇ˗o tehꞈ kʼoˆ ve ngaˬ hui htaꞈ aˬ htoꞈ ma maˍ laˇ ve le?
11 Teˇ pawˆ pawˆ kʼo, ngaˬ hui a shaꞈ teꞈ kuiˬ hkʼaw loˍ ve awˬ ceuˬ htaꞈ Yaˬhoˉvaˬ dawˇ ve hkʼe maˇ dawˇ. Iˉsaˍreˍlaˆ chaw heh puiˉ hkʼaw lo 40 hkʼawꞈ caw toˇ chehˇ htaˇ ve htaꞈ dawˇ nyi sheˍ. Moˉseˍ yawˇ hui htaꞈ kʼoˆ piˇ ve, “nawˬ hui hkʼa te ve kanˉ hkʼa peu˗eˬ htaꞈ Gʼuiˬ sha hkʼaˬ ma awˬ bon naꞈ laˇ taˍ peuˬ ve htaꞈ dawˇ nawˇ˗oˆ. Nawˬ hui heh puiˉ hkʼaw lo caw toˇ chehˇ htaˇ, yawˇ nawˬ hui htaꞈ haꞈ shaˉ laˇ taˍ peuˬ ve yoˬ. Awˬ yanˇ chi ve 40 hkʼawꞈ awˬ hkʼaw lo, yawˇ nawˬ hui geh chehˇ taˍ leh, nawˬ hui hkʼa loˍ ve hkʼa peu˗eˬ htaꞈ ga laˇ chehˇ ve yoˬ.” (Bon maˍ ve 2:7) Iˉsaˍreˍlaˆ chaw Eˇjiˇtuꞈ mvuhˇ miˬ lo tawˆ la htaˇ veuꞈ taˍ ve veuꞈ kʼaˇ kaꞈ maˇ zuhꞈ leh Yaˬhoˉvaˬ yawˇ hui htaꞈ maꞈ naˆ shiˍ caˍ piˇ lehˬ, yawˇ hui htaꞈ awˬ tehˬ awˬ na nyi haꞈ shaˉ piˇ chehˇ ve yoˬ. (Bon maˍ ve 8:3, 4) Yaꞈ hkʼaˇ, Iˉsaˍreˍlaˆ chaw teˇ hpaˍ yawˇ hui chi aꞈ kehˉ gʼa cawˇ ve tehꞈ dawˇ ve yoˬ. Yawˇ hui chi hkʼe ceh kaꞈ lawꞈ˗oˬ tehꞈ Moˉseˍ kʼoˆ piˇ leh shaˍ tiꞈ piˇ ve yoˬ. Ngaˬ hui cawˬ taˍ ve htaꞈ nyi hkʼaˇ suh ve, yawˇ gu teh taˍ laˇ ve htaꞈ awˬ hpfuhˇ shiˍ ve, yawˇ laꞈ shawnˍ peꞈ laˇ ve htaꞈ awˬ bon uiˍ jaˇ tehꞈ kʼoˆ piˇ htaˇ, Yaˬhoˉvaˬ ha lehˬ jaˇ tuˬ yoˬ.
YAˬHOˉVAˬ NGAˬ HUI HTAꞈ NYI HAꞈ SHAˉ LAˇ TUˬ YOˬ TEHꞈ YONˍ GʼA VE
12. Daˍviˆ Yaˬhoˉvaˬ htaꞈ gʼaˇ va ve, yawˇ awˬ to htaꞈ gʼaˇ maˇ va ve tehꞈ hkʼaˬ hkʼe hpeuꞈ maw laˇ ve le?
12 Yaˬhoˉvaˬ yawˇ htaꞈ haꞈ ve chaw htaꞈ yawˇ ka tiꞈ yeˬ piˇ leh dawˇ haˍ ve tehꞈ Daˍviˆ shiˍ ve yoˬ. Daˍviˆ Chiˇ mvuh ve liꞈ kaˇ nanˉ uiˍ 34 bvuhꞈ htaˇ, yawˇ ve a shaꞈ kawˆ tuˬ cawˬ ve yoˬ. Yawˇ yonˍ yeˬ jaˇ ve pa taw ‘Yaˬhoˉvaˬ ve mvuhˇ naw ma tcuh yaˇ haꞈ shaˉ piˇ chehˇ’ ve htaꞈ shuˍ ve yoˬ. (Chiˇ mvuh ve 34:7) Maꞈ moˍ maꞈ cuˇ hkʼa caw zuhˇ hoˆ taˍ ve lehˬ, maꞈ yaˇ maꞈ bawˆ kuiˬ lo canˇ paˍ bawˆ la ve htaꞈ shaˍ tiꞈ hkʼa dehꞈ te chehˇ ve hkʼe, mvuhˇ naw ma tcuh yaˇ chi hkʼe te chehˇ ve tehꞈ Daˍviˆ tehˆ taˍ ve yoˬ. Daˍviˆ maꞈ bawˆ cheuˬ ve, hawˇ ma bawˆ cheuˬ ve, aˉ htaw yehˇ cheuˬ ve yoˬ. Hkʼe te leh, Yaˬhoˉvaˬ yawˇ htaꞈ jawˇ mawˇ te tcuh tuˬ ka tiꞈ te piˇ ve htawˇ, yawˇ puiˉ ve hpehꞈ ve htaꞈ gʼaˇ maˇ va. (1 Saˍmo˗eˍlaˆ 16:13; 24:12) Chi htaꞈ pa taw, Yaˬhoˉvaˬ ve mvuhˇ naw ma tcuh yaˇ ‘Yaˬhoˉvaˬ htaꞈ yawˆ yan ve chaw hui htaꞈ ponˬ piˇ’ tuˬ yoˬ tehꞈ Daˍviˆ yonˍ ve yoˬ. Chi beuꞈ teˇ co˗e anˇ tuˬ te leh ngaˬ hui htaꞈ haꞈ shaˉ laˇ tuˬ maˇ dawˇ law. Yaꞈ hkʼaˇ, Yaˬhoˉvaˬ htaꞈ gʼaˇ va ve chaw yawˇ chi teˇ hkui gʼa suh˗e ve htawˇ, awˬ gʼuˇ suhˍ hpawˇ co co taiˍ taiˍ ve a shaꞈ gʼa tuˬ tehꞈ ngaˬ hui shiˍ ve yoˬ.
Tuꞈ jaˇ hkanˍ jaˇ ve awˬ yanˇ htaˇ, Gawˇgaˆ leh Maˍgawˇgaˆ ve maꞈ yaˇ ngaˬ hui htaꞈ ca bawˆ la tuˬ yoˬ. Yaꞈ hkʼaˇ, Yeˍsuˆ leh mvuhˇ naw ma tcuh yaˇ ngaˬ hui aˬ htoꞈ ma gʼa hpuˇ chehˇ ve htaꞈ shiˍ leh haꞈ shaˉ laˇ tuˬ yoˬ tehꞈ yonˍ gʼa ve (Awˬ lawn 1, awˬ tawn 13 nyi sheˍ)
13. Nyi˗a kʼo, aˬ htoꞈ ma te ngaˬ hui htaꞈ ca bawˆ la sha ve le? Leh aˬ htoꞈ ma te ngaˬ hui maˇ kawˆ cawˇ ve le? (Awˬ htaꞈ hpawˇ ve awˬ han htaꞈ nyi sheˍ.)
13 Maˇ maw ve awˬ yanˇ hkʼaw Yaˬhoˉvaˬ uˉ peunˍ ve htaꞈ ngaˬ hui hkʼaˬ hkʼe taw yonˍ ve htaꞈ lawˇ nyi laˇ tuˬ yoˬ. Gawˇgaˆ leh Maˍgawˇgaˆ lehˬ mvuhˇ miˬ teˇ hpaˍ htaꞈ kʼoˆ gaˇ ve yoˬ. Chi Gʼuiˬ sha ve chaw htaꞈ ca bawˆ la htaˇ, ngaˬ hui ve a shaꞈ kawˆ tuˬ cawˬ ve yoˬ. Chi hkʼe hpehꞈ htaˇ, Yaˬhoˉvaˬ ngaˬ hui htaꞈ awˬ tehˬ ga laˇ tuˬ yoˬ tehꞈ yonˍ gʼa ve yoˬ. Ngaˬ hui lehˬ yawˬ hkʼe hpehꞈ leh nyi haꞈ shaˉ paˍ maˇ cawˬ tehꞈ mvuhˇ miˬ teˇ hpaˍ dawˇ ve yoˬ. (Yeˍsaˍkeˍlaˆ 38:10-12) Ngaˬ hui laꞈ caˉ maˇ cawˬ ve, ngaˬ hui maꞈ bawˆ tuˬ maˇ te jawˬ jaw ve pa taw, yawˇ hui ngaˬ hui htaꞈ maꞈ ca bawˆ la sha ve tehꞈ dawˇ ve yoˬ. Yaꞈ hkʼaˇ, ngaˬ hui maˇ kawˆ. Ngaˬ hui Yaˬhoˉvaˬ htaꞈ yonˍ ve kʼo, Gʼuiˬ sha ve mvuhˇ naw ma tcuh yaˇ ngaˬ hui awˬ paˇ lo chehˇ taˍ ve hkʼe yonˍ gʼa ve yoˬ. Yaꞈ hkʼaˇ, ca bawˆ la ve chaw mvuhˇ miˬ teˇ hpaˍ, Gʼuiˬ sha ve mvuhˇ naw ma tcuh yaˇ htaꞈ mawˬ gʼa˗aw laˇ? Maˇ mawˬ gʼa. Awˬ lawn kʼo, yawˇ hui Yaˬhoˉvaˬ htaꞈ maˇ yonˍ ve pa taw, Yaˬhoˉvaˬ ve mvuhˇ naw ma tcuh yaˇ awˬ moˍ lonˉ ngaˬ hui awˬ tan maꞈ bawˆ laˇ tuˬ yoˬ. Yawˇ hui cheˆ˗ehꞈ kʼai leh kawˆ jaˇ tuˬ yoˬ!—Hpeuꞈ maˍ ve 19:11, 14, 15.
AWˬ GʼUˇ SUHˍ HPAWˇ HPEHꞈ LA TUˬ VE AWˬ CEUˬ HTAꞈ CHI TEˇ HKUI KAꞈ GU HEHNˇ TAˍ˗Oꞈ
14. Ngaˬ hui awˬ gʼuˇ suhˍ hpawˇ hpehꞈ la tuˬ ve awˬ ceuˬ htaꞈ chi teˇ hkui kaꞈ hkʼaˬ hkʼe te gu hehnˇ taˍ gʼa tuˬ le?
14 Ngaˬ hui awˬ gʼuˇ suhˍ hpawˇ hpehꞈ la tuˬ ve awˬ ceuˬ htaꞈ chi teˇ hkui kaꞈ hkʼaˬ hkʼe te gu hehnˇ taˍ gʼa tuˬ le? Awˉ lawˉ teˇ ceuˬ lehˬ, ngaˬ hui hpu shi mawˇ jeˬ hpawˇ cawˇ ve dawˇ hkʼaˇ gʼa cawˬ ve yoˬ. Teˇ nyi kʼo, awˬ ceuˬ chi teˇ hpaˍ htaꞈ ngaˬ hui gʼa baˬ taˉ tuˬ yoˬ tehꞈ gʼa dawˇ taˍ cawˇ ve yoˬ. Hkʼe te leh, ngaˬ hui cawˬ taˍ ve awˬ ceuˬ htaꞈ nyi hkʼaˇ gʼa suh leh chi hkui teˇ kaꞈ ngaˬ hui Yaˬhoˉvaˬ htaꞈ meuˆ daꞈ ve lehˬ, ha lehˬ jaˇ tuˬ te laˇ ve yoˬ. Ngaˬ hui Yaˬhoˉvaˬ htaꞈ gʼaˇ hteꞈ shiˍ daꞈ ve kʼo, Gawˇgaˆ leh Maꞈgawˇgaˆ ngaˬ hui htaꞈ ca bawˆ la htaˇ, Yaˬhoˉvaˬ ngaˬ hui htaꞈ nyi haꞈ shaˉ laˇ tuˬ yoˬ tehꞈ yonˍ gʼa ve yoˬ.
15. Yaˬhoˉvaˬ Daˍviˆ htaꞈ maˇ baˬ taˉ laˇ ve tehꞈ yawˇ yonˍ gʼa tuˬ aˬ htoꞈ ma te piˇ ve le?
15 Daˍviˆ htaꞈ ga piˇ ve hkʼa shuˍ, ngaˬ hui awˬ gʼuˇ suhˍ hpawˇ hpehꞈ la tuˬ ve awˬ ceuˬ htaꞈ gu hehnˇ taˍ gʼa tuˬ hkʼaˬ hkʼe ga laˇ gʼa tuˬ le? Daˍviˆ kʼoˆ ve, “Gʼuiˬ sha hkʼaˬ ma daꞈ jaˇ ve awˬ lawn nawˬ hkʼaˇ nawˬ dawˇ nyi˗o. Yawˇ awˬ hkʼaw lo gawˬ lehˍ gʼa chehˇ ve chaw lehˬ, gʼa ha lehˬ ve yoˬ.” (Chiˇ mvuh ve 34:8) Daˍviˆ kʼoˆ ve tawˇ hkawˇ chi, ponˬ laˬ htaˇ yawˇ Yaˬhoˉvaˬ htaꞈ gʼaˇ va leh yawˇ htaꞈ maˇ baˬ taˉ laˇ ve tehꞈ hpeuꞈ maw laˇ ve yoˬ. Hkʼe te leh, Daˍviˆ Yaˬhoˉvaˬ htaꞈ hkʼaˬ htaˆ kaꞈ gʼaˇ va gʼa ve tehꞈ shiˍ ve yoˬ. Tawˇ pa haˉ te kʼo, Daˍviˆ yaˇ nehˬ htaˇ, yawˇ Gawˇliˇyaꞈ geh gʼa bawˆ daꞈ ve yoˬ. Oˇ ve teˇ yanˇ yawˇ Gawˇliˇyaꞈ htaꞈ kʼoˆ ve, “ngaˬ ve Gʼuiˬ sha lehˬ, yaꞈ nyi nawˬ htaꞈ ngaˬ ve laꞈ sheh hkʼaw lo chiˇ aꞈ laˇ tuˬ ve yoˬ.” Hkʼe te leh, Yaˬhoˉvaˬ Daˍviˆ htaꞈ awˬ tehˬ awˬ na chi hkʼe te gʼa tuˬ ga piˇ ve yoˬ. (1 Saˍmo˗eˍlaˆ 17:46) Peuˬ hkʼawꞈ nawˉ, Daˍviˆ Sawˉluꞈ htaꞈ kanˉ te piˇ ve htawˇ, Sawˉluꞈ Daˍviˆ htaꞈ tiˇ pehˍ tuˬ awˬ hkʼaˇ laiˉ pawˆ ca ve yoˬ. Yaꞈ hkʼaˇ, ‘Yaˬhoˉvaˬ Daˍviˆ geh chehˇ ve yoˬ.’ (1 Saˍmo˗eˍlaˆ 18:12) Peuˬ laˬ htaˇ Yaˬhoˉvaˬ Daˍviˆ htaꞈ hkʼaˬ htaˆ kaꞈ ga piˇ ve tehꞈ awˬ lawn chi shiˍ tuˬ te laˇ ve yoˬ. Hkʼe te leh, yawˇ gʼa hpuˇ chehˇ ve shoꞈ shaꞈ ve awˬ ceuˬ htaꞈ yeunˇ hkanˍ gʼaˇ tuˬ Yaˬhoˉvaˬ awˬ tehˬ awˬ na ga laˇ tuˬ yoˬ tehꞈ yonˍ gʼa ve yoˬ.
16. “Gʼuiˬ sha hkʼaˬ ma daꞈ jaˇ ve awˬ lawn nawˬ hkʼaˇ nawˬ dawˇ nyi” tuˬ hkʼaˬ hkʼe te cawˇ ve le?
16 Chi teˇ hkui kaꞈ ngaˬ hui Yaˬhoˉvaˬ htaꞈ gʼaˇ hkʼa dehꞈ va ve kʼo, awˬ gʼuˇ suhˍ hpawˇ Yaˬhoˉvaˬ ngaˬ hui htaꞈ awˬ tehˬ awˬ na ga laˇ tuˬ yoˬ tehꞈ yonˍ gʼa ve yoˬ. Tawˇ pa haˉ te kʼo, hpawnˬ daꞈ lonˉ kʼai tuˬ ngaˬ hui kanˉ gʼa lawˬ jehˇ ve yoˬ. Ngaˬ hui hpawnˬ daꞈ ve hkʼaˬ htaˆ kaꞈ kʼai gʼa tuˬ leh Gʼuiˬ sha ve kanˉ maˇ maˇ te gʼa tuˬ, kanˉ te ve awˬ hkʼaˇ kaꞈ gʼa shawˍ teh taˍ ve yoˬ. Oˇ ve teˇ yanˇ Yaˬhoˉvaˬ ngaˬ hui htaꞈ awˬ tehˬ awˬ na ga laˇ tuˬ yoˬ tehꞈ yonˍ gʼa ve yoˬ. Yaꞈ hkʼaˇ, paw leˍ ngaˬ hui htaꞈ kanˉ maˇ jehˇ tcuh laˇ leh gʼaꞈ tawˆ laˇ ve kʼo, Yaˬhoˉvaˬ ngaˬ hui htaꞈ maˇ baˬ taˉ laˇ leh ngaˬ hui a shaꞈ teꞈ kuiˬ hkʼaw loˍ ve awˬ ceuˬ htaꞈ yawˇ hkʼaˬ htaˆ kaꞈ haꞈ shaˉ laˇ tuˬ yoˬ tehꞈ yonˍ gʼa˗aw laˇ? (Heˍbrehˇ 13:5) Awˬ viˉ awˬ nyi Gʼuiˬ sha ve kanˉ awˬ yanˇ hkʼa biˇ te ve laiˉ gʼaˇ, Yaˬhoˉvaˬ yawˇ hui htaꞈ ga laˇ tuˬ loˍ jaˇ ve awˬ yanˇ htaˇ, ga laˇ ve htaꞈ gʼa mawˬ ve yoˬ. Yaˬhoˉvaˬ lehˬ ka tiꞈ yeˬ ve Gʼuiˬ sha hpehꞈ leh yawˇ hui htaꞈ maˇ baˬ taˉ laˇ jaw.
17. 2022 hkʼawꞈ a yeˇ uiˍ jaˇ ve Liꞈ hpu awˬ tawn aˬ htoꞈ ma le? Leh aˬ htoꞈ ma te Liꞈ hpu awˬ tawn chi daꞈ jaˇ ve le?
17 Yaˬhoˉvaˬ ngaˬ hui geh chehˇ ve pa taw, awˬ gʼuˇ suhˍ hpawˇ hpehꞈ la tuˬ ve awˬ ceuˬ htaꞈ ngaˬ hui maˇ kawˆ. Ngaˬ hui a shaꞈ teꞈ kuiˬ hkʼaw Gʼuiˬ sha htaꞈ a yeˇ uiˍ jaˇ tehꞈ shawˍ ve kʼo, yawˇ ngaˬ hui htaꞈ maˇ baˬ taˉ laˇ taˬ. Leh chi teˇ hkui kaꞈ awˬ gʼuˇ suhˍ hpawˇ hpehꞈ la tuˬ ve awˬ ceuˬ htaꞈ ngaˬ hui gu hehnˇ taˍ ve kʼo, Yaˬhoˉvaˬ ngaˬ hui htaꞈ maˇ baˬ taˉ laˇ tehꞈ awˬ tehˬ awˬ na yonˍ gʼa ve yoˬ. 2022 hkʼawꞈ a yeˇ uiˍ jaˇ ve Liꞈ hpu awˬ tawn lehˬ Uˉ peunˍ ve Kawˍmiˍ tiˍ Chiˇ mvuh ve liꞈ 34:10 htaꞈ leuˆ yuˬ ve yoˬ. Oˇ kaˬ lo kʼoˆ ve, “Yaˬhoˉvaˬ htaꞈ ca ve chaw lehˬ daꞈ ve awˬ ceuˬ gʼa tuˬ yoˬ.”
KʼA MUIˬ HKAWˇ 38 Yawˇ nawˬ htaꞈ awˬ gʼaˇ cawˬ la piˇ tuˬ yoˬ
^ 2022 hkʼawꞈ a yeˇ uiˍ jaˇ ve Liꞈ hpu awˬ tawn lehˬ Chiˇ mvuh ve liꞈ 34:10 hkʼaw yuˬ laˬ taˍ ve yoˬ. Oˇ kaˬ lo kʼoˆ ve, “Yaˬhoˉvaˬ htaꞈ ca ve chaw lehˬ daꞈ ve awˬ ceuˬ gʼa tuˬ yoˬ.” Yaꞈ hkʼaˇ, Yaˬhoˉvaˬ ve kanˉ ka tiꞈ yeˬ ve hkʼaw te ve chaw laiˉ gʼaˇ lehˬ hpu shi mawˇ jeˬ maˇ cawˬ maˇ. Aˬ htoꞈ ma te yawˇ hui “daꞈ ve awˬ ceuˬ gʼa tuˬ yoˬ” tehꞈ kʼoˆ gʼa ve le? Liꞈ hpu awˬ tawn chi ve tcuhˉ kuiˬ na gʼa ve lehˬ, awˬ gʼuˇ suhˍ hpawˇ tuꞈ jaˇ hkanˍ jaˇ ve gʼa hpuˇ htaˇ, ngaˬ hui gu hehnˇ taˍ gʼa tuˬ hkʼaˬ hkʼe ga laˇ gʼa tuˬ le? Chi ve teˇ hpaˍ teˇ geh henˇ tuˬ yoˬ.
^ Shaw nyi kuiˬ Taꞈ yehˬ Ha pa 9 maˬ 15 nyi 2014 hkʼawꞈ hkʼaw “Gʼaw ve chaw na nyi hkawˇ” htaꞈ nyi sheˍ.
^ AWˬ HAN HTAꞈ KʼOˆ MAˍ TAˍ VE: Daˍviˆ lehˬ jawˇ mawˇ Sawˉluꞈ htaꞈ gʼa hpaw˗e leh haˉ kʼoˍ hkʼaw gʼa vaꞈ taˍ ve htawˇ, Yaˬhoˉvaˬ yawˇ htaꞈ piˇ ve awˬ ceuˬ htaꞈ awˬ hpfuhˇ shiˍ ve.
^ AWˬ HAN HTAꞈ KʼOˆ MAˍ TAˍ VE: Iˉsaˍreˍlaˆ chaw Eˇjiˇtuꞈ mvuhˇ miˬ hkʼaw tawˆ kʼai peuˬ hkʼawꞈ nawˉ, Yaˬhoˉvaˬ yawˇ hui htaꞈ maˍ naˆ shiˍ caˍ piˇ leh aˉ poꞈ veuꞈ kʼaˇ kaꞈ maˇ zuhꞈ.