1-3. Ngaˬ hui aˬ htoꞈ ma ve awˬ lawn htaꞈ hawˬ ve le?

 Nawˬ hawˬ ve awˬ leh meuˇ teˇ pawˆ hkʼaˬ htaˆ le? Teˇ pawˆ pawˆ kʼo, ngaˬ hui ha lehˬ ve pa taw, hawˬ ve yoˬ. Yaꞈ hkʼaˇ, laiˉ pawˆ kʼo, ngaˬ hui nyi ma luˬ ve pa taw, hawˬ ve yoˬ. Tawˇ pa haˉ te kʼo, ngaˬ hui haꞈ ve chaw suh˗e htaˇ, hawˬ ve yoˬ. Aˍmeˬriˆkaꞈ mvuhˇ miˬ lo chehˇ ve Law˗la˗lni kʼoˆ ve, “ngaˬ yaˇ miˇ suh peuˬ hkʼawꞈ nawˉ, ngaˬ nyi ma luˬ jaˇ leh nyi ma sha la tuˬ teˇ ceh kaꞈ te laˇ maˇ gʼa tehꞈ dawˇ ve yoˬ. Ngaˬ nyi ma luˬ jaˇ leh daꞈ ve teˇ ceuˬ kaꞈ maˇ cawˬ˗o tehꞈ dawˇ ve yoˬ. Ngaˬ a shaꞈ hkʼaˬ hkʼe te kʼawꞈ teꞈ chehˇ kʼai gʼa tuˬ naˍ maˇ shiˍ.” *

² Awˬ nu ve awˬ ceuˬ htaꞈ pa taw ngaˬ hui hawˬ ve yoˬ. Jaˬpanˍ mvuhˇ miˬ lo chehˇ ve gʼuˇ suhˍ peuˍ ve Hiˆlo˗miˆ kʼoˆ ve, “ngaˬ hto toˇ kuiˬ awˬ ti lo ve chaw nyi ma maˇ pfuhˇ. Hkʼe te leh, teˇ pawˆ pawˆ kʼo ngaˬ awˬ gʼaˇ nuˇ jaˇ leh hawˬ ve yoˬ. Nyi ma pfuhˇ ve chaw teˇ gʼaˇ gʼaˇ htaꞈ mawˬ daꞈ gaˇ ve pa taw, Yaˬhoˉvaˬ ga laˇ tuˬ ngaˬ hawˬ leh lawˬ ve yoˬ.”

³ Nawˬ awˬ viˉ awˬ nyi yaˇ miˇ chi nyiˇ gʼaˇ hkʼe dawˇ jaw˗aw laˇ? Ngaˬ hui laiˉ gʼaˇ kaꞈ chi hkʼe dawˇ jaw ve yoˬ. (1 Peˍtruˆ 5:9) Ngaˬ hui Yaˬhoˉvaˬ htaꞈ ha lehˬ ve hkʼaw oˉ kʼoˍ pui gaˇ ve yoˬ. Yaꞈ hkʼaˇ, teˇ pawˆ pawˆ kʼo ka tiꞈ yeˬ ve htaꞈ lawˇ nyi laˇ ve pa taw, nyi ma luˬ ve, awˬ gʼaˇ nuˇ ve, maˇ heˆ leh dawˇ maˇ jaˇ leh Yaˬhoˉvaˬ ve kanˉ te htaˇ mehˆ gʼuiˬ yaꞈ la ve yoˬ. (Chiˇ mvuh ve 6:6; 100:2) Ngaˬ hui chi hkʼe gʼa hpuˇ ve kʼo hkʼaˬ hkʼe te haꞈ yuˬ gʼa tuˬ le?

4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁴ Ngaˬ hui Yeˍsuˆ ve awˬ lawn htaꞈ henˇ yuˬ gʼa ve yoˬ. Teˇ pawˆ pawˆ kʼo, yawˇ gʼa hpuˇ ve awˬ ceuˬ nyi ma luˬ jaˇ leh, “mehˆ gʼuiˬ yaꞈ la” tuˬ te piˇ ve yoˬ. (Yoˇhanˬ 11:35; Luˉkaꞈ 19:41; 22:44; Heˍbrehˇ 5:7)  Yeˍsuˆ hawˬ tuˬ te piˇ ve teˇ lawn lawn, leh ngaˬ hui hawˬ tuˬ te laˇ ve htaꞈ haꞈ yuˬ gʼa tuˬ kaꞈ awˬ lawn chi ve hkʼaw teˇ geh henˇ tuˬ yoˬ.

5. Yoˇhanˬ liꞈ 11:32-36 hkʼaw kʼoˆ taˍ ve hkʼe, Yeˍsuˆ htaꞈ caˉ daꞈ ve ngaˬ hui htaꞈ aˬ htoꞈ ma maˍ laˇ ve le?

⁵ Beˍtaˍniˆ hkʼaˆ hkʼaw Yeˍsuˆ haꞈ jaˇ ve teˇ yehˬ kʼa cawˬ ve yoˬ. Yawˇ hui awˬ viˉ awˬ nyi 3 gʼaˇ cawˬ ve lehˬ, Laˍzaˍruˆ, Maˍhtaˆ leh Maˍriˆ yoˬ. Yeˍsuˆ lehˬ awˬ chawˇ chi ve 3 gʼaˇ htaꞈ haꞈ jaˇ. Mvuhˇ kaˆ ve awˬ yanˇ 32 hkʼawꞈ C.E htaˇ, Laˍzaˍruˆ naˬ jaˇ leh suh˗e ve yoˬ. (Yoˇhanˬ 11:3, 14) Chi Maˍhtaˆ leh Maˍriˆ nyi ma luˬ jaˇ tuˬ te piˇ ve yoˬ. Laˍzaˍruˆ suh peuˬ hkʼawꞈ nawˉ, Yeˍsuˆ kaꞈ hkʼaˆ chi hkʼaw laˬ ve yoˬ. Yeˍsuˆ laˬ ve htaꞈ Maˍhtaˆ gʼa kaˇ htaˇ, yawˇ Yeˍsuˆ geh laꞈ haˉ kʼai ve yoˬ. Maˍhtaˆ Yeˍsuˆ htaꞈ “Jawˇ mawˇ˗oˬ, nawˬ choˬ kaˬ chehˇ taˍ ve hkʼe kʼo, ngaˬ ve awˬ nyi paˍ suh tuˬ ve maˇ heˆ” tehꞈ kʼoˆ piˇ htaˇ, yawˇ nyi ma hkʼaˬ hkʼe taw luˬ ve htaꞈ dawˇ nyi sheˍ. (Yoˇhanˬ 11:21) Maˍhtaˆ, Maˍriˆ leh awˬ nu ve chaw hawˬ ve htaꞈ Yeˍsuˆ gʼa mawˬ htaˇ, “mehˆ gʼuiˬ yaꞈ la ve yoˬ.”—Yoˇhanˬ 11:32-36 gʼaw sheˍ.

6. Aˬ htoꞈ ma te Yeˍsuˆ hawˬ ve le?

⁶ Aˬ htoꞈ ma te oˇ ve teˇ yanˇ Yeˍsuˆ hawˬ ve le? Liꞈ hpu htaꞈ hkʼa dehꞈ na gʼa tuˬ liꞈ (Kaˇlaˇ hkawˇ) hkʼaw kʼoˆ ve, “yawˇ ve awˬ chawˇ Laˍzaˍruˆ suh˗e htaˇ Maˍhtaˆ leh Maˍriˆ nyi ma luˬ jaˇ ve pa taw, Yeˍsuˆ ‘dawˇ haˍ jaˇ leh mehˆ gʼuiˬ yaꞈ la tuˬ’ te piˇ ve yoˬ. * Yeˍsuˆ haꞈ ve awˬ chawˇ Laˍzaˍruˆ naˬ jaˇ htaˇ, yawˇ hkʼaˬ hkʼe naˬ ve, yawˇ suh˗e yoˬ te htaˇ hkʼaˬ hkʼe dawˇ ve, dawˇ nyi ve yoˬ hehˉ.” Maˍhtaˆ leh Maˍriˆ yawˇ hui haꞈ ve chaw suh˗e ve pa taw, nyi ma luˬ jaˇ leh hawˬ ve htaꞈ Yeˍsuˆ kaꞈ nyi ma luˬ jaˇ leh hawˬ ve yoˬ. Nawˬ meuˆ daꞈ jaˇ ve awˬ chawˇ leh yehˬ kʼa hkʼaw ve chaw suh˗e ve kʼo, nawˬ kaꞈ chi ve hkʼa shuˍ shuˍ dawˇ tuˬ yoˬ. Awˬ lawn chi ve Liꞈ hpu hkʼaw maˍ laˇ ve 3 lawn htaꞈ ngaˬ hui teˇ geh henˇ tuˬ yoˬ.

7. Yeˍsuˆ awˬ chawˇ htaꞈ dawˇ haˍ leh hawˬ ve lehˬ Yaˬhoˉvaˬ htaꞈ caˉ daꞈ ve ngaˬ hui shiˍ tuˬ aˬ htoꞈ ma te laˇ ve le?

⁷ Yaˬhoˉvaˬ nawˬ hkʼaˬ hkʼe dawˇ ve htaꞈ na gʼa ve. Chi hkʼoˆ kaꞈ Yeˍsuˆ lehˬ, “[yawˇ ve Awˬ pa] nyi ma taˍ ve hkʼa shuˍ shuˍ, yawˇ taˍ ve yoˬ.” Yeˍsuˆ hawˬ htaˇ, Yaˬhoˉvaˬ hkʼaˬ hkʼe dawˇ ve htaꞈ ngaˬ  hui shiˍ ve yoˬ. (Heˍbrehˇ 1:3; Yoˇhanˬ 14:9) Nawˬ haꞈ ve chaw suh˗e htaˇ, Yaˬhoˉvaˬ nawˬ nyi ma luˬ ve htaꞈ ceh mawˬ ve maˇ heˆ tehꞈ yonˍ gʼa ve yoˬ. Yaꞈ hkʼaˇ, Yaˬhoˉvaˬ nawˬ hkʼa shuˍ nyi ma luˬ ve yoˬ. Nawˬ nyi ma luˬ jaˇ ve htaꞈ yawˇ haꞈ shaˉ laˇ gaˇ ve yoˬ.—Chiˇ mvuh ve 34:18; 147:3.

8. Ngaˬ hui haꞈ ve chaw suh˗oˬ ve htaꞈ Yeˍsuˆ kʼawꞈ teꞈ tu la piˇ gʼa tuˬ yoˬ tehꞈ aˬ htoꞈ ma te ngaˬ hui yonˍ gʼa ve le?

⁸ Nawˬ haꞈ ve chaw suh˗oˬ ve htaꞈ Yeˍsuˆ kʼawꞈ teꞈ tu la piˇ tcuh gaˇ ve. Yeˍsuˆ maˇ hawˬ sheˍ htaˇ, Laˍzaˍruˆ “kʼawꞈ teꞈ tu la tuˬ” yoˬ tehꞈ Maˍhtaˆ htaꞈ ka tiꞈ te piˇ leh Maˍhtaˆ kaꞈ Yeˍsuˆ kʼoˆ ve hkʼe yonˍ ve yoˬ. (Yoˇhanˬ 11:23-27) Maˍhtaˆ lehˬ Yaˬhoˉvaˬ ve kanˉ te ve ka tiꞈ yeˬ ve chaw hpehꞈ leh ponˬ laˬ ve laiˉ ha hkʼawꞈ htaˇ, Eˇliˇyaꞈ leh Eˇliˇshehˇ suh˗oˬ ve chaw htaꞈ kʼawꞈ teꞈ tu la piˇ gʼa ve tehꞈ Maˍhtaˆ shiˍ ve yoˬ. (1 Jawˇ mawˇ 17:17-24; 2 Jawˇ mawˇ 4:32-37) Leh Maˍhtaˆ kaꞈ Yeˍsuˆ suh˗oˬ ve chaw teˇ hpaˍ htaꞈ kʼawꞈ teꞈ tu la piˇ gʼa ve tehꞈ gʼa kaˇ jaw ve yoˬ. (Luˉkaꞈ 7:11-15; 8:41, 42, 49-56) Nawˬ haꞈ ve chaw kʼawꞈ teꞈ tu la ve htaꞈ gʼa mawˬ daꞈ tuˬ yoˬ tehꞈ nawˬ yonˍ gʼa ve yoˬ. Chi htaꞈ pa taw, Yeˍsuˆ yawˇ ve awˬ chawˇ hawˬ chehˇ ve htaꞈ awˬ gʼaˇ piˇ htaˇ, Yeˍsuˆ hawˬ ve ngaˬ hui htaꞈ aˬ htoꞈ ma maˍ laˇ ve le? Suh peuˬ ve laiˉ gʼaˇ htaꞈ Yeˍsuˆ kʼawꞈ teꞈ tu la piˇ tcuh gaˇ ve tehꞈ ngaˬ hui gʼa henˇ˗oˬ ve yoˬ.

9. Nyi ma luˬ chehˇ ve chaw htaꞈ nawˬ ga piˇ htaˇ Yeˍsuˆ hkʼa shuˍ hkʼaˬ hkʼe te gʼa tuˬ le?

⁹ Nyi ma luˬ chehˇ ve chaw htaꞈ nawˬ ga piˇ gʼa ve. Yeˍsuˆ Maˍhtaˆ leh Maˍriˆ geh ceh tiˉ hawˬ ve maˇ heˆ. Yawˇ yawˇ hui hkawˇ na leh awˬ gʼaˇ kaꞈ piˇ ve yoˬ. Ngaˬ hui kaꞈ chi hkʼe te gʼa ve yoˬ. Awˆsaˍteˇriˇ˗aˇ mvuhˇ miˬ lo chehˇ ve nyi haꞈ shaˉ paˍ Dehn kʼoˆ ve, “ngaˬ miˇ ma suh peuˬ hkʼawꞈ nawˉ, shu ngaˬ htaꞈ ga laˇ tuˬ loˍ jaˇ ve yoˬ. Awˬ viˉ awˬ nyi hawˉ hkʼaˆ laiˉ gʼaˇ leh yawˇ hui ve awˬ miˇ ma kaꞈ tanˇ vanˇ leh tanˇ hkuinˇ ngaˬ htaꞈ awˬ chawˇ te laˇ leh ngaˬ kʼoˆ maˍ piˇ ve htaꞈ na taˍ laˇ ve yoˬ. Ngaˬ hawˬ htaˇ yawˇ hui maˇ hpehꞈ bawˬ. Ngaˬ kanˉ te maˇ gʼa˗oˬ htaˇ yawˇ hui ngaˬ htaꞈ laiˉ ceuˬ ga laˇ ve yoˬ. Tawˇ pa haˉ te kʼo, yawˇ hui ngaˬ ve kaˇ tsuhˇ laˇ ve, mawˇ vuiˬ laˇ ve, maˇ heˆ leh awˬ chiˇ te laˇ ve, leh yawˇ hui ngaˬ geh teˇ geh bon lawˬ laˇ ve yoˬ. Awˬ viˉ awˬ nyi chi teˇ hpaˍ lehˬ awˬ tehˬ awˬ na awˬ chawˇ hpehꞈ leh ‘teˇ gʼaˇ htaꞈ teˇ gʼaˇ haꞈ daꞈ puiˉ ve yoˬ.’”—Tawˇ naˉ ve 17:17.

10. Luˉkaꞈ liꞈ 19:36-40 hkʼaw kʼoˆ taˍ ve hkʼe, aˬ htoꞈ ma hpehꞈ la ve le?

¹⁰ Niˆsanˍ Ha pa 9 nyi 33 hkʼawꞈ C.E htaˇ, Yeˍsuˆ Yeˍruˆsaˍlehnˍ venˇ lo kʼai leh oˇ kaˬ lo chehˇ ve chaw lehˬ, a shu yawˇ ve veuꞈ kʼaˇ htaꞈ yaꞈ kʼaw hpuiˇ lo hkʼawˇ piˇ ve chi lehˬ, Yeˍsuˆ yawˇ hui ve Jawˇ mawˇ hpehꞈ ve tehꞈ hpeuꞈ maw laˇ ve yoˬ. Oˇ ve teˇ yanˇ teˇ gʼaˇ le le ha lehˬ jaˇ. (Luˉkaꞈ 19:36-40 gʼaw sheˍ.) Oˇ ve hkʼawꞈ nawˉ, awˬ laꞈ gʼawˇ hui maˇ dawˇ maˇ gaˇ ve hkʼaw teˇ ceuˬ ceuˬ hpehꞈ la ve yoˬ. Liꞈ hpu hkʼaw kʼoˆ ve, “venˇ awˬ paˇ lo [Yeˍsuˆ] gaˬ la htaˇ, venˇ htaꞈ gʼa mawˬ leh, yawˇ hawˬ” ve yoˬ. Yeˍruˆsaˍlehnˍ venˇ hkʼaw chehˇ ve chaw luˬ ve sheˆ ve htaꞈ gʼa hpuˇ tuˬ yoˬ tehꞈ Yeˍsuˆ hawˬ leh kʼoˆ ve yoˬ.—Luˉkaꞈ 19:41-44.

11. Yeˍruˆsaˍlehnˍ venˇ hkʼaw chehˇ ve chaw htaꞈ pa taw aˬ htoꞈ ma te Yeˍsuˆ hawˬ ve le?

¹¹ Yeˍsuˆ ve chaw ceuˬ yawˇ htaꞈ hkʼa dehꞈ haꞈ yuˬ piˇ ve pa taw, yawˇ hawˬ ve yoˬ. Yaꞈ hkʼaˇ, maˇ˗awˍ ve chaw Gʼuiˬ sha ve mvuhˇ miˬ daꞈ ve awˬ lawn sha tanˇ htaꞈ yawˇ hui a yeˇ maˇ te. Yeˍruˆsaˍlehnˍ venˇ te luˬ leh venˇ chi ve hkʼaw shu maˇ tiˇ pehˍ piˇ ve Yuˇdaꞈ chaw kaꞈ shu ceˬ te tuˬ yuˬ kʼai ve yoˬ. (Luˉkaꞈ 21:20-24) Hkʼe kʼo, chi beuꞈ teˇ co˗e, nawˬ hto toˇ kuiˬ lo ve chaw nawˬ hto toˇ ve htaꞈ a yeˇ te˗aw laˇ? A yeˇ hkʼa dehꞈ maˇ te ve kʼo, Yeˍsuˆ hawˬ ve nawˬ htaꞈ aˬ htoꞈ ma maˍ laˇ ve le? Ngaˬ hui 3 lawn htaꞈ teˇ geh henˇ tuˬ yoˬ.

12. Yeˍsuˆ shu htaꞈ dawˇ haˍ leh hawˬ ve pa taw, Yaˬhoˉvaˬ htaꞈ caˉ daꞈ ve ngaˬ hui shiˍ tuˬ aˬ htoꞈ ma te laˇ ve le?

¹² Yaˬhoˉvaˬ lehˬ chaw yaˇ htaꞈ dawˇ haˍ ve. Yeˍsuˆ hawˬ ve lehˬ Yaˬhoˉvaˬ chaw yaˇ htaꞈ hkʼaˬ hkʼe taw dawˇ haˍ ve ngaˬ hui shiˍ tuˬ te laˇ ve yoˬ. Gʼuiˬ sha kʼoˆ ve, “chaw hkʼa peu˗eˬ venˇ baˆ htaꞈ dawˇ hpfuhˆ leh teˇ gʼaˇ kaꞈ maˇ gʼa luˬ kʼai tuˬ yawˇ heuˆ gaˇ ve” yoˬ. (2 Peˍtruˆ 3:9) Chi beuꞈ teˇ co˗e ngaˬ hui yawˇ  hui htaꞈ haꞈ ve tehꞈ hpeuꞈ maw piˇ gʼa ve lehˬ, yawˇ hui awˬ tehˬ ve htaꞈ henˇ la tuˬ ngaˬ hui coˇ caˇ leh ga piˇ ve yoˬ.—Maꞈhtehˍ 22:39. *

13-14. Yeˍsuˆ chaw yaˇ htaꞈ hkʼaˬ hkʼe ha kʼaˉ ve le? Leh ngaˬ hui yawˇ htaꞈ hkʼaˬ hkʼe te henˇ yuˬ gʼa tuˬ le?

¹³ Yeˍsuˆ kaiˬ ve hkʼaw Gʼuiˬ sha ve kanˉ te ve. Yeˍsuˆ chaw yaˇ htaꞈ haꞈ leh ha kʼaˉ ve yoˬ. Hkʼe te leh, yawˇ yawˇ hui htaꞈ teˇ yanˇ le le maˍ piˇ ve yoˬ. (Luˉkaꞈ 19:47, 48) Teˇ pawˆ pawˆ kʼo, Yeˍsuˆ geh chaw laˬ ve maˇ jaˇ. Yeˍsuˆ geh “chaw awˬ moˍ lonˉ teˇ pawˆ kʼawꞈ hpawnˬ la ve pa taw, yawˇ hui awˍ kaꞈ caˇ maˇ tanˇ” leh maˍ piˇ ve yoˬ. (Maˍkuˆ 3:20) Teˇ pawˆ htaˇ, hawˉ hkʼaˆ teˇ gʼaˇ Yeˍsuˆ maˍ ve htaꞈ na gaˇ ve pa taw, tanˇ hkuinˇ htaˇ kʼawꞈ laˬ ve yoˬ. Yeˍsuˆ kaꞈ ha lehˬ ve hkʼaw maˍ piˇ ve yoˬ. (Yoˇhanˬ 3:1, 2) Yeˍsuˆ maˍ piˇ ve htaꞈ gʼa kaˇ ve chaw maˇ˗awˍ ve awˬ laꞈ gʼawˇ maˇ hpehꞈ la ve htawˇ, yawˇ maˍ piˇ ve htaꞈ gʼa kaˇ ve chaw maˇ jaˇ. Chi beuꞈ teˇ co˗e kaꞈ hkʼa shuˍ ngaˬ hui teˇ gʼaˇ le le htaꞈ daꞈ ve awˬ lawn sha tanˇ kaˇ tcuh gaˇ ve yoˬ. Hkʼe te leh, ngaˬ hui hto toˇ ve awˬ hkʼaˇ kaꞈ pa ve yoˬ.—Tcuh yaˇ 10:42.

¹⁴ Ha lehˬ ha kʼa pa ve. Ngaˬ hui hkʼaˬ htaˆ kaꞈ teˇ yanˇ hkʼaw ceh tiˉ hto toˇ˗e ve kʼo, nyi ma pfuhˇ ve chaw htaꞈ ngaˬ hui hkʼa dehꞈ maˇ mawˬ ve yoˬ hehˉ. Gʼuˇ suhˍ peuˍ ve Ma˗hti˗daˆ kʼoˆ ve, “ngaˬ leh ngaˬ hpawˇ hto toˇ˗e tuˬ awˬ hkʼaˇ laiˉ hkʼaˇ pa ve yoˬ. Mvuhˇ shawˉ htaˇ tanˇ kaˬ hkʼaˇ te kuiˬ lo hto toˇ˗e ve yoˬ. Sha gʼuˇ htaˇ laiˉ gʼaˇ awˬ baˬ lo tawˆ la ve pa taw, ngaˬ hui liꞈ kʼoˆ keu leh caꞈ tuˬ yehˇ leh hto toˇ ve yoˬ. Mvuhˇ hpeuꞈ la htaˇ laiˉ gʼaˇ aˉ hkʼaw chehˇ ve pa taw, ngaˬ hui kaꞈ teˇ yehˬ peuˬ teˇ yehˬ hto toˇ˗e ve yoˬ.” Chi htaꞈ pa taw, ngaˬ hui tanˇ ve awˬ yanˇ htaˇ ceh hto toˇ ve aꞈ kehˉ chaw laiˉ gʼaˇ htaꞈ gʼa mawˬ daꞈ tuˬ ngaˬ hui hto toˇ ve awˬ yanˇ gʼa pa cawˇ ve yoˬ. Ngaˬ hui chi hkʼe te ve kʼo, Yaˬhoˉvaˬ kaꞈ ha lehˬ jaˇ tuˬ yoˬ.

15. Luˉkaꞈ liꞈ 22:39-44 hkʼaw kʼoˆ taˍ ve hkʼe, Yeˍsuˆ maˇ suh sheˍ awˬ leh meuˇ teˇ haˉ htaˇ aˬ htoꞈ ma hpehꞈ la ve le?

¹⁵ Niˆsanˍ Ha pa 14 nyi 33 hkʼawꞈ C.E teˇ haˉ htaˇ, Yeˍsuˆ dawˇ haˍ jaˇ ve teˇ haˉ hpehꞈ ve yoˬ. Oˇ ve teˇ haˉ yawˇ miˬ guiˬ hkʼoˆ lo chehˇ ve awˬ leh meuˇ teˇ haˉ hpehꞈ ve pa taw yoˬ. Yawˇ Geˍseˍmaˍniˆ hko hkʼaw kʼai leh nyi ma hkʼaw cawˬ ve awˬ ceuˬ Yaˬhoˉvaˬ htaꞈ kʼoˆ piˇ ve yoˬ. (Luˉkaꞈ 22:39-44 gʼaw sheˍ.) Yawˇ lehˬ “gʼaˇ hteꞈ kuˬ leh mehˆ gʼuiˬ yaꞈ la ve awˬ hkʼaw lo bon lawˬ leh lawˬ hkawˉ ve yoˬ.”  (Heˍbrehˇ 5:7) Yeˍsuˆ aˬ htoꞈ ma ve awˬ lawn bon lawˬ ve le? Yawˇ Yaˬhoˉvaˬ htaꞈ ka tiꞈ yeˬ gʼa tuˬ leh yawˇ ve a loˍ htaꞈ gʼaꞈ te gʼa tuˬ bon lawˬ ve yoˬ. Leh Yaˬhoˉvaˬ kaꞈ yawˇ haꞈ jaˇ ve Yaˇ paˍ ve bon lawˬ hkawˇ htaꞈ na ve yoˬ. Hkʼe te leh, Yeˍsuˆ htaꞈ awˬ gʼaˇ piˇ tuˬ mvuhˇ naw ma tcuh yaˇ peu piˇ ve yoˬ.

16. Geˍseˍmaˍniˆ hko hkʼaw Yeˍsuˆ bon lawˬ htaˇ, aˬ htoꞈ ma te dawˇ haˍ jaˇ ve le?

¹⁶ Yeˍsuˆ Geˍseˍmaˍniˆ hko hkʼaw chehˇ htaˇ, Yeˍsuˆ Gʼuiˬ sha ve awˬ meh htaꞈ maˇ shawˍ maˇ caˆ kʼoˆ ve tehꞈ shu she pfuhˍ piˇ ve pa taw, yawˇ dawˇ haˍ jaˇ ve hkʼaw bon lawˬ leh hawˬ ve yoˬ. Yawˇ suh htaˇ hkʼa gaˬ Gʼuiˬ sha htaꞈ ka tiꞈ yeˬ gʼa tuˬ, Gʼuiˬ sha ve awˬ meh htaꞈ maˇ gʼa she pfuhˍ tuˬ, yawˇ a yeˇ uiˍ jaˇ ve awˬ vuiˬ htaꞈ gʼa haꞈ shaˉ ve tehꞈ shiˍ ve yoˬ. Nawˬ Gʼuiˬ sha htaꞈ ka tiꞈ yeˬ ve htaꞈ lawˇ nyi laˇ ve pa taw, nawˬ kaꞈ dawˇ maˇ jaˇ ve kʼo, Yeˍsuˆ hawˬ ve nawˬ htaꞈ aˬ htoꞈ ma maˍ laˇ ve le? Ngaˬ hui 3 lawn htaꞈ teˇ geh henˇ tuˬ yoˬ.

17. Yaˬhoˉvaˬ lehˬ Yeˍsuˆ ve bon lawˬ hkawˇ htaꞈ hkʼawꞈ piˇ ve ngaˬ hui htaꞈ aˬ htoꞈ ma maˍ laˇ ve le?

¹⁷ Yaˬhoˉvaˬ nawˬ ve bon lawˬ hkawˇ htaꞈ na ve. Yeˍsuˆ nyi ma awˬ tawˬ hkʼa gaˬ bon lawˬ ve htaꞈ Yaˬhoˉvaˬ hkʼawꞈ piˇ ve yoˬ. Aˬ htoꞈ ma pa taw le? Yeˍsuˆ dawˇ haˍ jaˇ ve awˬ ceuˬ lehˬ, yawˇ Yaˬhoˉvaˬ htaꞈ ka tiꞈ yeˬ gaˇ leh Yaˬhoˉvaˬ ve awˬ meh htaꞈ maˇ gʼa she pfuhˍ tuˬ te piˇ gaˇ ve pa taw yoˬ. Nawˬ dawˇ haˍ jaˇ ve awˬ ceuˬ lehˬ, Yaˬhoˉvaˬ htaꞈ ka tiꞈ yeˬ gaˇ leh yawˇ ve awˬ meh htaꞈ maˇ gʼa she pfuhˍ tuˬ te piˇ gaˇ ve kʼo, Gʼuiˬ sha nawˬ ve bon lawˬ hkawˇ htaꞈ kaꞈ hkʼawꞈ laˇ tuˬ yoˬ.—Chiˇ mvuh ve 145:18, 19.

18. Yeˍsuˆ lehˬ ngaˬ hui ve awˬ chawˇ ngaˬ hui ve dawˇ hkʼaˇ htaꞈ na gʼa ve hkʼe hkʼaˬ hkʼe shuˍ ve le?

¹⁸ Yeˍsuˆ lehˬ nawˬ ve dawˇ hkʼaˇ htaꞈ na gʼa ve. Nawˬ dawˇ haˍ dawˇ hkiˉ jaˇ ve kʼo, nawˬ ve awˬ chawˇ nawˬ ve dawˇ hkʼaˇ htaꞈ na gʼa laˇ ve ha lehˬ jaˇ ve yoˬ hehˉ. Nawˬ ve awˬ chawˇ nawˬ hkʼa shuˍ shoꞈ shaꞈ ve gʼa hpuˇ jaw ve chaw cawˬ ve kʼo, yawˇ nawˬ htaꞈ awˬ gʼaˇ peꞈ laˇ gʼa jaˇ tuˬ yoˬ. Yeˍsuˆ kaꞈ chi hkʼe ve awˬ chawˇ hpehꞈ ve yoˬ. Awˬ gʼaˇ nuˇ leh ga laˇ tuˬ loˍ htaˇ, hkʼaˬ hkʼe kʼai ve yawˇ shiˍ ve yoˬ. Ngaˬ hui awˬ gʼaˇ nuˇ ve htaꞈ yawˇ hkʼa dehꞈ na gʼa leh ngaˬ hui ‘loˍ ve awˬ yanˇ awˬ hkʼaw lo yawˇ ga laˇ tuˬ yoˬ.’ (Heˍbrehˇ 4:15, 16) Yeˍsuˆ Geˍseˍmaˍniˆ hko hkʼaw chehˇ htaˇ, yawˇ htaꞈ mvuhˇ naw ma tcuh yaˇ ga laˇ tcuh ve yoˬ. Ngaˬ hui kaꞈ Yaˬhoˉvaˬ gʼa ga laˇ tcuh cawˇ ve yoˬ. Yaˬhoˉvaˬ lehˬ yawˇ ve kanˉ hkʼaˇ hkʼaw ve liꞈ teˇ hpaˍ, VDO, bon maˍ hkawˇ, nyi haꞈ shaˉ paˍ, leh co ha hpawˇ ve chaw mawˇ, chi teˇ hpaˍ htaꞈ cuˇ leh ngaˬ hui htaꞈ ga laˇ tcuh ve yoˬ.

19. Nawˬ ka tiꞈ yeˬ ve htaꞈ lawˇ nyi laˇ ve pa taw dawˇ maˇ jaˇ ve kʼo, nawˬ awˬ gʼaˇ cawˬ tuˬ Yaˬhoˉvaˬ hkʼaˬ hkʼe ga laˇ ve le? Tawˇ pa haˉ kʼoˆ maˍ laˇ sheˍ.

 ¹⁹ Yaˬhoˉvaˬ lehˬ ‘nawˬ htaꞈ dawˇ sha gaˇ sha ve teˇ ceuˬ peꞈ laˇ ve.’ Nawˬ awˬ gʼaˇ cawˬ tuˬ bon lawˬ sheˍ. Chi hkʼe te ve kʼo, “chaw yaˇ hui ca dawˇ maˇ gaˬ ve dawˇ sha gaˇ sha ve teˇ ceuˬ” nawˬ gʼa tuˬ yoˬ. (Hpiˇliˇpiˆ 4:6, 7) Nawˬ dawˇ haˍ leh teꞈ chiˉ dawˇ maˇ gʼa ve kʼo, Gʼuiˬ sha lo laˬ ve dawˇ sha gaˇ sha ve teˇ ceuˬ nyi ma gawˬ lehˍ cawˬ leh hkʼaˬ hkʼe dawˇ gʼa tuˬ ga laˇ gʼa ve yoˬ. Awˬ lawn chi ve lehˬ awˬ viˉ awˬ nyi yaˇ miˇ Lu˗seˇ meh ve gʼa hpuˇ jaw ve yoˬ. Yawˇ kʼoˆ ve, “laiˉ pawˆ kʼo, ngaˬ teˇ gʼaˇ tiˉ chehˇ ve tehꞈ dawˇ ve yoˬ. Leh teˇ pawˆ pawˆ kʼo, Yaˬhoˉvaˬ lehˬ ngaˬ htaꞈ maˇ haꞈ˗oˬ ve tehꞈ dawˇ ve yoˬ. Ngaˬ chi hkʼe dawˇ htaˇ, dawˇ ve awˬ ceuˬ Yaˬhoˉvaˬ htaꞈ kʼoˆ ve yoˬ. Ngaˬ Yaˬhoˉvaˬ geh bon laꞈ haˉ lawˬ leh ngaˬ hkʼaˬ hkʼe dawˇ ve yawˇ htaꞈ kʼoˆ maˍ piˇ ve yoˬ. Bon lawˬ ve lehˬ ngaˬ htaꞈ ga laˇ gʼa jaˇ.” Awˬ viˉ awˬ nyi yaˇ miˇ bon lawˬ ve awˬ lawn lehˬ, ngaˬ hui nyi ma gawˬ lehˍ cawˬ tuˬ ga laˇ gʼa jaˇ ve tehꞈ gʼa mawˬ ve yoˬ.

20. Yeˍsuˆ hawˬ ve ngaˬ hui htaꞈ aˬ htoꞈ ma maˍ laˇ ve le?

²⁰ Yeˍsuˆ hawˬ ve lehˬ ngaˬ hui awˬ gʼaˇ gʼa tuˬ laiˉ ceuˬ maˍ laˇ ve yoˬ. Awˬ chawˇ nyi ma luˬ chehˇ ve htaꞈ ngaˬ hui ga piˇ sheˍ. Ngaˬ hui haꞈ ve chaw suh˗e ve kʼo, Yaˬhoˉvaˬ leh Yeˍsuˆ kʼawꞈ teꞈ tu la piˇ gʼa ve tehꞈ ngaˬ hui yonˍ sheˍ. Yaˬhoˉvaˬ leh Yeˍsuˆ chaw yaˇ htaꞈ ha kʼaˉ ve tehꞈ ngaˬ hui gʼa mawˬ ve yoˬ. Ngaˬ hui hto toˇ leh Liꞈ hpu maˍ piˇ htaˇ, yawˇ hui htaꞈ ha kʼaˉ piˇ cawˇ ve yoˬ. Chi hkʼoˆ kaꞈ, Yaˬhoˉvaˬ leh Yeˍsuˆ ngaˬ hui ve dawˇ hkʼaˇ, ngaˬ hui ve awˬ gʼaˇ nuˇ kuiˬ, leh ngaˬ hui yeunˇ hkanˍ gʼaˇ tuˬ, yawˇ hui ga laˇ gaˇ ve tehꞈ ngaˬ hui shiˍ htaˇ, awˬ gʼaˇ gʼa ve yoˬ. Yaˬhoˉvaˬ ka tiꞈ te taˍ laˇ ve biˇ la htaˇ hkʼa gaˬ ngaˬ hui gʼaꞈ te sheˍ. Oˇ kaˬ lo kʼoˆ ve, ‘yawˇ lehˬ ngaˬ hui ve mehˆ gʼuiˬ hkʼa peu˗eˬ htaꞈ shiˆ baˬ laˇ tuˬ yoˬ.’—Hpeuꞈ maˍ ve 21:4.