1. Aˬ htoꞈ ma te chi beuꞈ teˇ co˗e laiˉ gʼaˇ Liꞈ hpu htaꞈ maˇ yonˍ ve le?

 Chi beuꞈ teˇ co˗e laiˉ gʼaˇ yawˇ hui yonˍ gʼa jaw ve chaw htaꞈ nyi ma luˬ ve yoˬ. Hkʼe te leh, yawˇ hui a shu htaꞈ yonˍ tuˬ maˇ shiˍ ve yoˬ. Tawˇ pa haˉ te kʼo, mvuhˇ miˬ hpawˇ kanˉ te paˍ, chaˬ nyi tehˆ nyi paˍ, maˇ heˆ leh tanˇ kaˬ hpawˇ kanˉ te ve, yawˇ hui awˬ pon awˬ bon gʼa tuˬ tiˉ te ve laˇ? Leh bon awˬ hoˉ teˇ hpaˍ htaꞈ kaꞈ yawˇ hui maˇ yonˍ gʼa˗o ve yoˬ. Hkʼe te leh, yawˇ hui Liꞈ hpu htaꞈ kaꞈ maˇ yonˍ˗o ve yoˬ.

2. Chiˇ mvuh ve liꞈ 119:160 hkʼaw kʼoˆ taˍ ve hkʼe, ngaˬ hui aˬ htoꞈ ma ve awˬ lawn htaꞈ yonˍ cawˇ ve le?

² Yaˬhoˉvaˬ ve kanˉ te ve chaw teˇ gʼaˇ le le “ka tiꞈ yeˬ ve Gʼuiˬ sha” htaꞈ yonˍ ve yoˬ. Gʼuiˬ sha lehˬ yawˇ te ve teˇ ceuˬ le le ngaˬ hui awˬ pon awˬ bon cawˬ tuˬ te ve yoˬ. (Chiˇ mvuh ve 31:5; Iˉsaˍyaˆ 48:17) Liꞈ hpu hkʼaw kʼoˆ taˍ ve awˬ ceuˬ leh, “[Gʼuiˬ sha] ve awˬ liˇ tawˇ hkawˇ lehˬ hteˇ jaˇ cawˇ jaˇ” ve tehꞈ ngaˬ hui yonˍ gʼa ve yoˬ. b (Chiˇ mvuh ve 119:160 gʼaw sheˍ.) Liꞈ hpu hpawˇ chaˬ nyi tehˆ nyi paˍ teˇ gʼaˇ kʼoˆ ve htaꞈ ngaˬ hui yonˍ gʼa ve yoˬ. Oˇ kaˬ lo kʼoˆ ve, “Gʼuiˬ sha kʼoˆ taˍ ve teˇ ceuˬ le le cawˇ ve yoˬ. Gʼuiˬ sha kʼoˆ taˍ ve teˇ ceuˬ le le awˬ tehˬ awˬ na hpehꞈ la tuˬ yoˬ. Yawˇ hui Gʼuiˬ sha htaꞈ yonˍ ve pa taw yawˇ kʼoˆ ve teˇ ceuˬ le le htaꞈ kaꞈ yonˍ ve yoˬ.”

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Hkʼe kʼo awˬ nu ve chaw ngaˬ hui hkʼa shuˍ Liꞈ hpu htaꞈ yonˍ gʼa tuˬ, hkʼaˬ hkʼe ga piˇ gʼa tuˬ le? Ngaˬ hui Liꞈ hpu htaꞈ yonˍ gʼa tuˬ 3 hkʼaˇ htaꞈ teˇ geh nyi sheˍ. (1) Liꞈ hpu hkʼaw ve awˬ lawn lehˬ Heˍbrehˇ ve Liꞈ hpu htaꞈ shuˍ daꞈ ve yoˬ. (2) Liꞈ hpu hkʼaw ve tcuh kaˍ paˍ ve tawˇ hkawˇ awˬ tehˬ awˬ na hpehꞈ la ve, leh (3) Liꞈ hpu lehˬ kanˇ paˆ cawˬ leh chaw yaˇ ve te hkʼaˇ dawˇ hkʼaˇ htaꞈ pa piˇ gʼa ve yoˬ.

4. Chi beuꞈ teˇ co˗e Liꞈ hpu hkʼaw ve awˬ lawn ngaˬ hui gʼaw ve lehˬ Heˍbrehˇ ve Liꞈ hpu htaꞈ shuˍ daꞈ˗aw laˇ, tehꞈ aˬ htoꞈ ma te chaw teˇ hpaˍ htawˇ dawˇ nawˬ dawˇ cawˬ ve le?

⁴ Yaˬhoˉvaˬ lehˬ ka tiꞈ yeˬ ve hawˉ hkʼaˆ 40 gʼaˇ htaꞈ coˇ leh Liꞈ hpu bvuhꞈ tcuh taˍ ve yoˬ. Yaꞈ hkʼaˇ, Heˍbrehˇ ve Liꞈ hpu yawˇ hui bvuhꞈ taˍ ve ngaˬ hui awˬ co˗e maˇ cawˬ˗o. Chi teˇ hkui ngaˬ hui ve awˬ co˗e Liꞈ hpu teˇ caˉ peuˬ teˇ caˉ bvuhꞈ laˬ ve ceh tiˉ cawˬ ve yoˬ. Chi htaꞈ pa taw, chi beuꞈ teˇ co˗e ngaˬ hui gʼaw chehˇ ve Liꞈ hpu Heˍbrehˇ ve Liꞈ hpu htaꞈ shuˍ daꞈ˗aw laˇ, tehꞈ laiˉ gʼaˇ htawˇ dawˇ nawˬ dawˇ cawˬ ve yoˬ. Awˬ lawn chi ve htaꞈ ngaˬ hui hkʼaˬ hkʼe te yonˍ gʼa tuˬ teˇ geh henˇ tuˬ yoˬ.

5. Heˍbrehˇ ve Liꞈ hpu htaꞈ hkʼaˬ hkʼe te kʼawꞈ bvuhꞈ laˬ ve le? (Awˬ htaꞈ hpawˇ ve awˬ han htaꞈ nyi sheˍ.)

⁵ Yaˬhoˉvaˬ dawˇ pawnˍ piˇ leh bvuhꞈ tcuh taˍ ve Liꞈ hpu htaꞈ teˇ co˗e peuˬ teˇ co˗e yawˇ nyi haꞈ shaˉ chehˇ ve yoˬ. Gʼuiˬ sha lehˬ Iˉsaˍreˍlaˆ ve jawˇ mawˇ htaꞈ yawˇ ve awˬ liˇ tawˇ hkawˇ bvuhꞈ tcuh ve yoˬ. Gʼuiˬ sha lehˬ Leˍviˆ chaw htaꞈ cuˇ leh Iˉsaˍreˍlaˆ chaw htaꞈ yawˇ ve awˬ liˇ tawˇ hkawˇ maˍ piˇ tcuh ve yoˬ. (Bon maˍ ve 17:18; 31:24-26; Neˍhaˍmiˆ 8:7) Yuˇdaꞈ chaw Baˍbuˍlonˍ mvuhˇ miˬ lo awˬ ceˬ te peuˬ hkʼawꞈ nawˉ, Yuˇdaꞈ chaw teˇ moˍ Heˍbrehˇ ve Liꞈ hpu bvuhꞈ tuˬ awˬ vuiˬ gʼa ve yoˬ. (Eˇzaˍraˆ 7:6) Yawˇ hui Liꞈ hpu kʼawꞈ bvuhꞈ htaˇ, shaˍ tiꞈ hkʼa dehꞈ te ve yoˬ. Yawˇ hui bvuhꞈ taˍ ve liꞈ mehˆ htaꞈ ceh tiˉ gʼaw nyi ve maˇ heˆ. Yaꞈ hkʼaˇ, yawˇ hui bvuhꞈ taˍ ve cawˇ˗aw laˇ tehꞈ yonˍ gʼa tuˬ teˇ mehˆ le le htaꞈ hkʼa dehꞈ chaˬ nyi ve yoˬ. Leh Liꞈ hpu bvuhꞈ ve chaw htawˇ maˇ biˇ ve chaw hpehꞈ ve yoˬ. Hkʼe te leh, yawˇ hui bvuhꞈ tawˆ la taˍ ve Liꞈ hpu kaꞈ a ciˉ ciˉ yaꞈ kuiˬ cawˬ ve yoˬ. Yaꞈ hkʼaˇ, yawˇ hui Liꞈ hpu bvuhꞈ tawˆ la taˍ ve maˇ jaˇ ve pa taw, yaꞈ kuiˬ hkʼaˬ kaˬ lo cawˬ ve htaꞈ shiˍ tuˬ awˬ hawˉ lo ve awˬ hkʼaˇ chi teˇ hpaˍ htaꞈ yehˇ ve yoˬ.

6. Heˍbrehˇ ve Liꞈ hpu hkʼaˬ teˇ hkʼaˇ lo maˇ cawˇ ve tehꞈ shiˍ tuˬ awˬ hkʼaˇ hkʼaˬ hkʼe yehˇ ve le?

⁶ Chi beuꞈ teˇ co˗e Liꞈ hpu hpawˇ chaˬ nyi tehˆ nyi paˍ Liꞈ hpu bvuhꞈ tawˆ la taˍ ve hkʼaˬ teˇ hkʼaˇ lo yaꞈ ve tehꞈ shiˍ tuˬ daꞈ jaˇ ve awˬ hkʼaˇ htaꞈ yehˇ ve yoˬ. Tawˇ pa haˉ te kʼo, chaw 100 gʼaˇ htaꞈ Liꞈ hpu teˇ lawn bvuhꞈ tawˆ la tcuh ve yoˬ. Yaꞈ hkʼaˇ, chaw teˇ gʼaˇ teˇ ceuˬ ceuˬ bvuhꞈ maˇ cawˇ ve yoˬ. Yawˇ hkʼaˬ teˇ hkʼaˇ lo bvuhꞈ maˇ cawˇ ve tehꞈ shiˍ tuˬ, yawˇ bvuhꞈ taˍ ve liꞈ 99 gʼaˇ bvuhꞈ taˍ ve liꞈ htaꞈ tehˆ daꞈ ve yoˬ. Liꞈ hpu hpawˇ chaˬ nyi tehˆ nyi paˍ kaꞈ awˬ hkʼaˇ chi htaꞈ yehˇ ve yoˬ. Yawˇ hui Heˍbrehˇ ve Liꞈ hpu laiˉ daw laiˉ daw htaꞈ tehˆ daꞈ ve yoˬ. Hkʼe te leh, hkʼaˬ teˇ hkʼaˇ lo maˇ cawˇ ve, hkʼaˬ teˇ hkʼaˇ lo mehˉ˗e ve htaꞈ shiˍ gʼa ve yoˬ.

7. Liꞈ hpu bvuhꞈ ve chaw cawˇ ve hkʼaw hkʼa dehꞈ bvuhꞈ tawˆ ve tehꞈ ngaˬ hui hkʼaˬ hkʼe te shiˍ gʼa ve le?

⁷ Liꞈ hpu bvuhꞈ tawˆ la ve chaw cawˇ ve hkʼaw hkʼa dehꞈ bvuhꞈ taˍ ve yoˬ. Ngaˬ hui awˬ lawn teˇ lawn htaꞈ teˇ geh nyi sheˍ. Heˍbrehˇ Liꞈ hpu awˬ piˍ hkʼa biˇ cawˬ ve teˇ kʼoˆ lehˬ Hkon˗denˬ Leh˗ni˗kaˆ meh ve yoˬ. 1008 hkʼawꞈ maˇ heˆ leh 1009 hkʼawꞈ C.E. htaˇ, te tawˆ ve yoˬ. Yaꞈ hkʼaˇ, maˇ maw ve awˬ yanˇ htaˇ, Hkon˗denˬ Leh˗ni˗kaˆ aꞈ kehˉ piˍ jaˇ˗oˬ ve aˬ laˬ hkʼe 1,000 hkʼawꞈ gaˬ˗oˬ ve hkʼaw, Liꞈ hpu awˬ tawn teˇ hpaˍ hpaˍ htaꞈ hpfuhˆ mawˬ ve yoˬ. Chaw teˇ hpaˍ dawˇ ve, Hkon˗denˬ Leh˗ni˗kaˆ hkʼaw ve awˬ lawn leh Liꞈ hpu awˬ tawn oˇ ve teˇ hpaˍ htaꞈ peun daꞈ jaˇ ve yoˬ. Awˬ lawn kʼo, Liꞈ hpu awˬ tawn oˇ ve teˇ caˉ peuˬ teˇ caˉ bvuhꞈ la ve yoˬ. Yaꞈ hkʼaˇ, awˬ tehˬ kʼo chi hkʼe maˇ heˆ. Liꞈ hpu hpawˇ chaˬ nyi paˍ lehˬ Liꞈ hpu awˬ tawn oˇ ve teˇ hpaˍ leh Hkon˗denˬ Leh˗ni˗kaˆ hkʼaw ve awˬ lawn tehˆ daꞈ leh gʼa mawˬ ve, tawˇ hkawˇ leh awˬ lawn peun daꞈ ve htawˇ, Liꞈ hpu hkʼaw ve awˬ lawn awˬ tanˇ a ciˉ kaꞈ maˇ pa kʼai.

8. Heˍlaˍsaˆ ve Liꞈ hpu awˬ daw leh oˇ htaˇ teˇ co˗e awˬ nu ve liꞈ bvuhꞈ taˍ ve htaꞈ hkʼaˬ hkʼe peun daꞈ ve le?

⁸ Awˉ lawˉ peuˇ ve Hkriꞈ yaˇ kaꞈ Heˍlaˍsaˆ ve Liꞈ hpu bvuhꞈ htaˇ, Heˍbrehˇ ve Liꞈ hpu kʼawꞈ gʼaꞈ bvuhꞈ ve awˬ hkʼaˇ hkʼa shuˍ yehˇ ve yoˬ. Yawˇ hui Heˍlaˍsaˆ ve Liꞈ hpu 27 daw htaꞈ kʼawꞈ gʼaꞈ bvuhꞈ htaˇ shaˍ tiꞈ hkʼa dehꞈ te ve pa taw, chi ve teˇ hpaˍ lehˬ hpawnˬ daꞈ kuiˬ leh hto toˇ kuiˬ hkʼaw yehˇ ve yoˬ. Liꞈ hpu hpawˇ chaˬ nyi tehˆ nyi paˍ teˇ gʼaˇ awˬ hkuiˉ puiˍ htaˇ ve Heˍlaˍsaˆ ve Liꞈ hpu leh teˇ co˗e tiˉ hkʼaw  ve awˬ nu ve liꞈ htaꞈ kaꞈ tehˆ daꞈ ve yoˬ. Yawˇ kʼoˆ ve, “Heˍlaˍsaˆ ve Liꞈ hpu awˬ nu ve liꞈ aꞈ kehˉ bvuhꞈ maˇ ve yoˬ. Liꞈ chi ve hkʼaw bvuhꞈ taˍ ve lehˬ biˇ jaˇ ve yoˬ. Liꞈ hpu htaꞈ caˉ daꞈ ve liꞈ kʼoˆ teˇ kʼoˆ hkʼaw kʼoˆ ve, “chi beuꞈ teˇ co˗e ngaˬ hui gʼaw chehˇ ve Heˍlaˍsaˆ ve Liꞈ hpu awˬ lawn leh awˬ hkuiˉ puiˍ htaˇ bvuhꞈ taˍ ve awˬ lawn awˬ tanˇ htaꞈ hawˍ daꞈ ve tehꞈ ngaˬ hui yonˍ gʼa ve yoˬ.”

9. Iˉsaˍyaˆ liꞈ 40:8 hkʼaw Liꞈ hpu htaꞈ caˉ daꞈ ve awˬ tehˬ ve aˬ htoꞈ ma htaꞈ kʼoˆ taˍ ve le?

⁹ Peuˬ laˬ ve laiˉ ha hkʼawꞈ htaˇ, Liꞈ hpu bvuhꞈ paˍ Liꞈ hpu bvuhꞈ htaˇ shaˍ tiꞈ hkʼa dehꞈ te leh bvuhꞈ taˍ ve yoˬ. Awˬ hkuiˉ puiˍ htaˇ ve Liꞈ hpu htaꞈ hawˍ daꞈ ve ngaˬ hui cawˬ leh, a shu yawˇ hkʼaˇ yawˇ gʼaw leh henˇ gʼa ve yoˬ. c Yaˬhoˉvaˬ lehˬ chi hkʼe te laˇ shehˍ hpaˇ hpehꞈ ve yoˬ. (Iˉsaˍyaˆ 40:8 gʼaw sheˍ.) Yaꞈ hkʼaˇ, Liꞈ hpu lehˬ Gʼuiˬ sha dawˇ pawnˍ piˇ leh bvuhꞈ tcuh taˍ ve maˇ heˆ tehꞈ chaw teˇ hpaˍ kʼoˆ ve yoˬ. Hkʼe kʼo aˬ htoꞈ ma te Liꞈ hpu lehˬ Gʼuiˬ sha dawˇ pawnˍ piˇ leh bvuhꞈ tcuh taˍ ve tehꞈ ngaˬ hui kʼoˆ gʼa tuˬ, ngaˬ hui shaˉ hkiˆ teˇ hpaˍ htaꞈ teˇ geh nyi sheˍ.

10. 2 Peˍtruˆ liꞈ 1:21 hkʼaw tcuh kaˍ paˍ ve tawˇ hkawˇ awˬ tehˬ hpehꞈ ve tehꞈ tawˇ pa haˉ kʼoˆ maˍ laˇ sheˍ. (Awˬ han htaꞈ nyi sheˍ)

¹⁰ Liꞈ hpu hkʼaw tcuh kaˍ paˍ ve tawˇ hkawˇ cawˬ maˇ jaˇ. Tcuh kaˍ paˍ ve tawˇ hkawˇ chi teˇ hpaˍ lehˬ awˬ tehˬ hpehꞈ ve tehꞈ shaˉ hkiˆ cawˬ ve yoˬ. Tcuh kaˍ paˍ ve tawˇ hkawˇ kʼoˆ peuˬ hkʼawꞈ nawˉ laiˉ ha hkʼawꞈ gaˬ leh teˇ hpaˍ kʼo awˬ tehˬ hpehꞈ la ve yoˬ. (2 Peˍtruˆ 1:21 gʼaw sheˍ.) Baˍbuˍlonˍ venˇ luˬ kʼai tuˬ ve tcuh kaˍ paˍ ve tawˇ hkawˇ kʼoˆ taˍ ve htaꞈ caˉ daꞈ ve ngaˬ hui teˇ geh nyi sheˍ. Aˬ laˬ hkʼe 778 hkʼawꞈ te leh 732 hkʼawꞈ B.C.E. htaˇ, Baˍbuˍlonˍ venˇ uiˍ jaˇ ve htaꞈ canˇ paˍ bawˆ gʼaˇ tuˬ yoˬ tehꞈ tcuh kaˍ paˍ Iˉsaˍyaˆ htaꞈ dawˇ pawnˍ piˇ leh awˬ gʼuˇ suhˍ htaˇ kaꞈ kʼoˆ taˍ ve yoˬ. Venˇ chi htaꞈ bawˆ yuˬ gʼa ve chaw lehˬ Kuˇruˆ meh ve yoˬ. Venˇ chi htaꞈ hkʼaˬ hkʼe te bawˆ yuˬ gʼa ve awˬ hkʼaˇ kaꞈ kʼoˆ taˍ ve yoˬ. (Iˉsaˍyaˆ 44:27–45:2) Chi hkʼoˆ kaꞈ, Iˉsaˍyaˆ awˬ gʼuˇ suhˍ htaˇ kaꞈ kʼoˆ taˍ ve, Baˍbuˍlonˍ luˬ kʼai leh chaw teˇ gʼaˇ kaꞈ maˇ chehˇ˗o ve yoˬ. (Iˉsaˍyaˆ 13:19, 20) Leh chi awˬ tehˬ hpehꞈ la ve yoˬ. 539 hkʼawꞈ B.C.E. htaˇ, Baˍbuˍlonˍ venˇ htaꞈ Meˍdiˆ leh Paˇshaˇ chaw te luˬ piˇ ve yoˬ. Oˇ htaˇ teˇ co˗e Baˍbuˍlonˍ venˇ uiˍ jaˇ ve venˇ hpehꞈ jaw ve yoˬ. Chi teˇ hkui teꞈ chiˉ kaꞈ  maˇ leuˉ˗o. Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ hkʼaw Baˍbuˍlonˍ venˇ htaꞈ hkʼaˬ hkʼe te bawˆ yuˬ gʼa tuˬ ve awˬ hkʼaˇ, awˬ gʼuˇ suhˍ htaˇ kaꞈ Liꞈ hpu hkʼaw kʼoˆ laˇ taˍ ve VDO htaꞈ nyi gʼa ve yoˬ. Awˬ lawn 3 awˬ tawn 5 hkʼaw nyi sheˍ.

11. Daˍyeˍlaˆ liꞈ 2:41-43 hkʼaw chi beuꞈ teˇ co˗e awˬ tehˬ hkʼaˬ hkʼe hpehꞈ la chehˇ ve le?

¹¹ Liꞈ hpu hkʼaw tcuh kaˍ paˍ ve tawˇ hkawˇ, oˇ htaˇ ceh tiˉ awˬ tehˬ hpehꞈ la ve maˇ heˆ. Yaꞈ hkʼaˇ, tcuh kaˍ paˍ ve tawˇ hkawˇ chi beuꞈ teˇ co˗e kaꞈ awˬ tehˬ hpehꞈ la chehˇ ve htaꞈ ngaˬ hui gʼa mawˬ ve yoˬ. Daˍyeˍlaˆ ve tcuh kaˍ paˍ ve tawˇ hkawˇ htaꞈ caˉ daꞈ ve miˬ guiˬ hkʼoˆ lo ve kanˇ paˆ lonˉ Eˍgaˍlanˍ leh Aˍmeˬriˆkaꞈ mvuhˇ miˬ htaꞈ awˬ tehˬ hpehꞈ la chehˇ ve teˇ lawn lawn htaꞈ teˇ geh nyi sheˍ. (Daˍyeˍlaˆ 2:41-43 gʼaw sheˍ.) Miˬ guiˬ hkʼoˆ lo ve kanˇ paˆ lonˉ chi ve 2 mvuhˇ miˬ lehˬ “sho hkʼe awˬ gʼaˇ cawˬ” leh “teˇ hpaˍ hpaˍ jeꞈ hkʼe awˬ gʼaˇ nuˇ kʼai tuˬ” yoˬ tehꞈ, Daˍyeˍlaˆ ve tcuh kaˍ paˍ ve tawˇ hkawˇ awˬ gʼuˇ suhˍ htaˇ kaꞈ kʼoˆ taˍ ve cawˇ jaˇ ve yoˬ. Eˍgaˍlanˍ leh Aˍmeˬriˆkaꞈ sho hkʼe awˬ gʼaˇ cawˬ ve awˬ tehˬ hpehꞈ ve yoˬ. Maꞈ lonˉ 2 pawˆ pawˆ kaꞈ yawˇ hui gʼaˇ tuˬ ga piˇ jaˇ leh caˉ leh maꞈ moˉ lonˉ kaꞈ cawˬ sheˍ ve yoˬ. Mvuhˇ miˬ yaˇ hteˇ ve cawˇ ve gʼa tuˬ tawˍ piˇ ve pa taw, yawˇ hui kanˇ paˆ hkʼa dehꞈ maˇ cawˬ ve yoˬ. Mvuhˇ miˬ hpawˇ chaˬ nyi tehˆ nyi paˍ teˇ gʼaˇ chi teˇ hkui hpehꞈ chehˇ ve awˬ ceuˬ htaꞈ mawˬ leh kʼoˆ ve, “Aˍmeˬriˆkaꞈ mvuhˇ miˬ hkʼe taw shoꞈ shaꞈ ve awˬ nu ve mvuhˇ miˬ teˇ kaˬ kaꞈ maˇ cawˬ jaw.” Eˍgaˍlanˍ mvuhˇ miˬ kaꞈ maˇ cawˇ maˇ hawˍ daꞈ ve yoˬ. Awˬ lawn kʼo, yawˇ hui Uˉyawˉpaˆ miˬ guiˬ lo meuˆ daꞈ ve dawˇ hkʼaˇ maˇ hawˍ daꞈ ve pa taw yoˬ. Maˇ hawˍ daꞈ ve chi ve htaꞈ pa taw, miˬ guiˬ hkʼoˆ lo ve kanˇ paˆ lonˉ Eˍgaˍlanˍ leh Aˍmeˬriˆkaꞈ teˇ ceuˬ ceuˬ htaꞈ hkʼa dehꞈ te maˇ gʼa ve yoˬ.

12. Liꞈ hpu hkʼaw ve tcuh kaˍ paˍ ve tawˇ hkawˇ ngaˬ hui aˬ htoꞈ ma ve awˬ lawn htaꞈ yonˍ gʼa tuˬ te laˇ ve le?

¹² Liꞈ hpu hkʼaw ve tcuh kaˍ paˍ ve tawˇ hkawˇ laiˉ ceuˬ hpehꞈ kʼai˗o ve htaꞈ ngaˬ hui gʼa mawˬ htaˇ, awˬ gʼuˇ suhˍ hpawˇ ve htaꞈ caˉ daꞈ ve, Gʼuiˬ sha ka tiꞈ te taˍ laˇ ve awˬ tehˬ hpehꞈ la tuˬ tehꞈ ngaˬ hui yonˍ gʼa ve yoˬ. Chiˇ mvuh ve liꞈ bvuhꞈ paˍ Yaˬhoˉvaˬ geh bon lawˬ ve hkʼe, ngaˬ hui kaꞈ lawˬ gʼa ve yoˬ. Oˇ kaˬ lo kʼoˆ ve, ‘Gʼuiˬ sha˗oˬ, nawˬ ponˬ laˇ tuˬ ve htaꞈ ngaˬ law chehˇ ve yoˬ. Ngaˬ lehˬ, nawˬ ve tawˇ hkawˇ htaꞈ ceh tiˉ gʼaˇ va chehˇ ve yoˬ.’ (Chiˇ mvuh ve 119:81) Liꞈ hpu hkʼaw Yaˬhoˉvaˬ ka tiꞈ te taˍ laˇ ve, ngaˬ hui awˬ gʼuˇ suhˍ hpawˇ “uiˍ la daꞈ la tuˬ” yawˇ te laˇ tuˬ yoˬ. (Yeˍraˍmiˆ 29:11) Awˬ gʼuˇ suhˍ hpawˇ ngaˬ hui ve dawˇ law kuiˬ htaꞈ caˉ daꞈ ve lehˬ, ngaˬ hui puiˉ ve hpehꞈ ve htaꞈ maˇ cawˬ. Yaꞈ hkʼaˇ, Yaˬhoˉvaˬ ka tiꞈ te taˍ laˇ ve htaꞈ cawˬ ve yoˬ. Chi htaꞈ pa taw, ngaˬ hui Liꞈ hpu htaꞈ hkʼa dehꞈ yonˍ gʼa tuˬ Liꞈ hpu hkʼaw ve tcuh kaˍ paˍ ve tawˇ hkawˇ teˇ hpaˍ htaꞈ chaˬ nyi sheˍ.

13. Chiˇ mvuh ve liꞈ 119:66, 138 hkʼaw kʼoˆ taˍ ve hkʼe, ngaˬ hui Liꞈ hpu htaꞈ yonˍ gʼa tuˬ te laˇ ve teˇ ceuˬ lehˬ aˬ htoꞈ ma le?

¹³ Ngaˬ hui Liꞈ hpu htaꞈ yonˍ gʼa tuˬ te laˇ ve teˇ ceuˬ lehˬ, Liꞈ hpu hkʼaw beˆ maˍ laˇ taˍ ve htaꞈ laiˉ lanˬ gʼaˇ yuˬ yehˇ htaˇ yawˇ hui ve a shaꞈ teꞈ hkʼaˇ daꞈ la ve htaꞈ ngaˬ hui mawˬ ve yoˬ. (Chiˇ mvuh ve 119:66, 138 gʼaw sheˍ.) Tawˇ pa haˉ te kʼo, awˬ hpawˇ awˬ miˇ ma laiˉ ca baˬ daꞈ˗a tehꞈ te chehˇ ve htawˇ, Liꞈ hpu gʼa henˇ htaˇ yawˇ hui haꞈ daꞈ leh ha lehˬ ve yoˬ. Yawˇ hui ve yaˇ teˇ hpaˍ yehˬ kʼa haꞈ daꞈ ve hkʼaw uiˍ la ve, kawˆ tuˬ maˇ cawˬ ve, leh awˬ pa awˬ e yawˇ hui htaꞈ haꞈ jaˇ ve tehꞈ shiˍ ve yoˬ.—Eˇfeˇsuꞈ 5:22-29.

14. Liꞈ hpu lehˬ chaw yaˇ ve a shaꞈ teꞈ hkʼaˇ htaꞈ pa piˇ jaˇ ve tehꞈ hpeuꞈ maw laˇ ve tawˇ pa haˉ kʼoˆ maˍ laˇ sheˍ.

¹⁴ Liꞈ hpu hkʼaw beˆ maˍ laˇ ve htaꞈ yuˬ yehˇ ve lehˬ, chaw yaˇ ve a shaꞈ teꞈ hkʼaˇ pa kʼai jaˇ tuˬ te piˇ ve yoˬ. Hkʼe te leh, chaw haiˬ kaꞈ daꞈ ve chaw kʼawꞈ hpehꞈ la ve yoˬ. Htawnˍ yaˇ Jehˆ d meh ve teˇ gʼaˇ ve awˬ lawn htaꞈ teˇ geh nyi sheˍ. Yawˇ lehˬ chaw haiˬ hpehꞈ leh hehnˇ ve awˬ ceuˬ htaꞈ te ve yoˬ. Yawˇ lehˬ htawnˍ yaˇ kʼawˆ tuˬ cawˬ jaˇ ve teˇ gʼaˇ hpehꞈ leh tiˇ pehˍ piˇ tuˬ ve htaꞈ laiˉ gʼaˇ kaꞈ shiˍ ve yo. Shaˉhkiˆhkanˍ ve chaw Liꞈ hpu maˍ piˇ chehˇ kuiˬ lo Jehˆ ca mui na˗e htaˇ, awˬ viˉ awˬ nyi Liꞈ hpu ca maˍ la ve chaw nyi ma daꞈ jaˇ leh yawˇ  dawˇ cawˇ jaˇ ve pa taw yawˇ kaꞈ Liꞈ hpu lawˬ henˇ ve yoˬ. Liꞈ hpu hkʼaw awˬ tehˬ ve htaꞈ yawˇ yuˬ yehˇ htaˇ, yawˇ ve te hkʼaˇ dawˇ hkʼaˇ kaꞈ pa kʼai ve yoˬ. Peuˬ leh yawˇ hto toˇ ve chaw hpehꞈ ve yoˬ. Yawˇ co ha hpawˇ uiˍ la mvuh la leh Baˆtiˆsaˬ haꞈ yuˬ ve yoˬ. Yawˇ Gʼuiˬ sha ve mvuhˇ miˬ awˬ lawn kaiˬ ve hkʼaw htawnˍ yaˇ laiˉ gʼaˇ htaꞈ maˍ piˇ ve yoˬ. Leh 4 gʼaˇ htaꞈ Liꞈ hpu henˇ la tuˬ ga piˇ gʼa ve yoˬ. Yawˇ htaꞈ shu tiˇ pehˍ piˇ ve awˬ nyi gaˬ htaˇ, pa kʼai jaˇ˗o ve yoˬ. Yawˇ htaꞈ ga piˇ ve mvuhˇ miˬ ve awˬ liˇ awˬ hkʼaˇ hpawˇ kanˉ te ve teˇ gʼaˇ kʼoˆ ve, “yawˇ lehˬ peuˬ laˬ ve 20 hkʼawꞈ htaˇ ngaˬ shiˍ daꞈ ve Jehˆ htaꞈ maˇ shuˍ. Yaˬhoˉvaˬ ve Shaˉhkiˆhkanˍ ve chaw yawˇ htaꞈ Liꞈ hpu maˍ piˇ ve pa taw, yawˇ ve te hkʼaˇ dawˇ hkʼaˇ pa kai jaˇ.” Jehˆ htaꞈ shu tiˇ pehˍ piˇ ve htawˇ, ngaˬ hui Liꞈ hpu htaꞈ yonˍ gʼa ve tehꞈ yawˇ ve awˬ lawn ngaˬ hui htaꞈ hpeuꞈ maw laˇ ve yoˬ. Liꞈ hpu kanˇ paˆ cawˬ jaˇ leh chaw yaˇ ve te hkʼaˇ dawˇ hkʼaˇ htaꞈ pa piˇ gʼa jaˇ ve yoˬ.—Iˉsaˍyaˆ 11:6-9.

15. Yaˬhoˉvaˬ ve chaw Liꞈ hpu hkʼaw beˆ maˍ laˇ ve htaꞈ yuˬ yehˇ ve pa taw, awˬ nu ve chaw htaꞈ hkʼaˬ hkʼe peun daꞈ ve le? (Awˬ han htaꞈ nyi sheˍ.)

¹⁵ Yaˬhoˉvaˬ ve chaw Liꞈ hpu hkʼaw awˬ tehˬ ve htaꞈ a shaꞈ teꞈ kuiˬ hkʼaw yuˬ yehˇ ve yoˬ. (Yoˇhanˬ 13:35; 1 Kawˇrenˍhtuˆ 1:10) Hkʼe te leh, yawˇ hui haꞈ daꞈ leh teˇ moˍ tiˉ hpehꞈ ve yoˬ. Shaˉhkiˆhkanˍ ve chaw dawˇ sha gawˬ lehˍ cawˬ leh teˇ moˍ tiˉ hpehꞈ ve tehꞈ laiˉ gʼaˇ kaꞈ shiˍ ve yoˬ. Yawˇ hui lehˬ chi beuꞈ teˇ co˗e ve chaw, mvuhˇ miˬ hpawˇ maˇ cawˇ maˇ hawˍ daꞈ ve, chaw ceuˬ fuiˬ daꞈ hpehˬ daꞈ ve, leh awˬ moˍ pehˬ daꞈ ve, chi teˇ hpaˍ yawˇ hui htaꞈ peun daꞈ jaˇ. Yaˇ nehˬ teˇ gʼaˇ Cawn meh ve Shaˉhkiˆhkanˍ ve chaw teˇ moˍ tiˉ hpehꞈ ve htaꞈ dawˇ cawˇ jaˇ. Yawˇ chehˇ ve Aˍfaˍriˆkaˆ miˬ guiˬ teˇ tawn lo mvuhˇ miˬ hpawˇ maꞈ te daꞈ htaˇ yawˇ kaꞈ maꞈ yaˇ te ve yoˬ. Yaꞈ hkʼaˇ, hkʼawꞈ nawˉ htaˇ awˬ nu ve teˇ mvuhˇ miˬ lo yawˇ hpawˇ˗e ve yoˬ. Oˇ kaˬ lo chehˇ htaˇ, yawˇ Shaˉhkiˆhkanˍ ve chaw htaꞈ gʼa shiˍ daꞈ ve yoˬ. Cawn kʼoˆ ve, “awˬ tehˬ ve bon htaꞈ yonˍ ve chaw lehˬ mvuhˇ miˬ hpawˇ maˇ caˉ daꞈ leh maˇ cawˇ maˇ hawˍ daꞈ ve maˇ cawˬ ve tehꞈ ngaˬ gʼa henˇ ve yoˬ. Yaꞈ hkʼaˇ, yawˇ hui haꞈ daꞈ ve yoˬ.” Cawn kʼoˆ ve, “ngaˬ a shaꞈ tanˇ leh a shu yawˇ ve mvuhˇ miˬ htaꞈ haꞈ shaˉ tuˬ te jaw ve yoˬ. Yaꞈ hkʼaˇ, ngaˬ Liꞈ hpu hkʼaw awˬ tehˬ ve htaꞈ gʼa henˇ htaˇ, ngaˬ dawˇ cheˆ leh Yaˬhoˉvaˬ htaꞈ awˬ to chiˇ aꞈ piˇ ve yoˬ.” Cawn pa kʼai jaˇ˗oˬ ve yoˬ. Chaw ceuˬ maˇ shuˍ daꞈ ve chaw hui htaꞈ  bawˆ daꞈ ve aꞈ kehˉ, chi teˇ hkui chaw ceuˬ maˇ shuˍ daꞈ ve teˇ gʼaˇ le le htaꞈ Liꞈ hpu hkʼaw awˬ tehˬ ve htaꞈ caˉ daꞈ ve yawˇ kʼoˆ maˍ piˇ ve yoˬ. Ngaˬ hui Liꞈ hpu htaꞈ yonˍ gʼa leh kanˇ paˆ cawˬ jaˇ ve tehꞈ hpeuꞈ maw piˇ ve lehˬ, hpehꞈ laˬ jaw ve maˇ shuˍ daꞈ ve htawˇ, Liꞈ hpu hkʼaw beˆ maˍ laˇ taˍ ve htaꞈ teˇ gʼaˇ le le yuˬ yehˇ htaˇ awˬ bon cawˬ jaˇ ve yoˬ.

16. Ngaˬ hui Liꞈ hpu htaꞈ hkʼa dehꞈ yonˍ ve lehˬ aˬ htoꞈ ma te a yeˇ uiˍ jaˇ ve le?

¹⁶ Chi beuꞈ teˇ co˗e miˬ guiˬ chi hkʼoˆ lo gʼaˇ hteꞈ luˬ kʼai chehˇ ve pa taw, Liꞈ hpu htaꞈ yonˍ gʼa tuˬ haˍ ve yoˬ. Laiˉ gʼaˇ ngaˬ hui htawˇ dawˇ nawˬ dawˇ cawˬ tuˬ te laˇ ve yoˬ. Tawˇ pa haˉ te kʼo, Liꞈ hpu lehˬ awˬ tehˬ hpehꞈ ve hehˉ laˇ, Yaˬhoˉvaˬ lehˬ ka tiꞈ yeˬ leh cuˇ yiˍ cawˬ ve awˬ ceˬ htaꞈ leuˆ leh chi beuꞈ teˇ co˗e yawˇ ve kanˉ te ve chaw htaꞈ beˆ maˍ piˇ chehˇ ve awˬ tehˬ hpehꞈ ve laˇ, Yaˬhoˉvaˬ ve tawˇ hkawˇ awˬ tehˬ hpehꞈ ve tehꞈ ngaˬ hui yonˍ ve kʼo, Saˍtanˍ beˬ laˇ ve teˇ ceuˬ le le htaꞈ ngaˬ hui tawˍ daꞈ gʼaˇ tuˬ yoˬ. Ngaˬ hui ‘suh htaˇ hkʼa gaˬ Yaˬhoˉvaˬ ve awˬ liˇ tawˇ hkawˇ na yuˬ tuˬ dawˇ cheˆ taˍ peuˬ.’ (Chiˇ mvuh ve 119:112) Ngaˬ hui awˬ tehˬ ve awˬ lawn awˬ nu ve chaw htaꞈ kʼoˆ piˇ tuˬ “maˇ yaꞈ taw” leh yawˇ hui Liꞈ hpu hkʼaw ve awˬ liˇ awˬ hkʼaˇ a shaꞈ teꞈ kuiˬ hkʼaw yuˬ yehˇ tuˬ ga piˇ ve yoˬ. (Chiˇ mvuh ve 119:46) Ngaˬ hui shoꞈ shaꞈ ve leh fawˉ ve mehˍ ve gʼa hpuˇ hehnˇ jaˇ ve htawˇ yeunˇ hkanˍ gʼaˇ tuˬ yoˬ. Ngaˬ hui “ha lehˬ ha kʼa ve awˬ hkʼaw lo nyi ma yeˬ leh yeunˇ hkanˍ puiˉ tuˬ” yoˬ.—Kawˇlawˇsehˇ 1:11; Chiˇ mvuh ve 119:143, 157.

17. Chi teˇ hkʼawꞈ ve Liꞈ hpu awˬ tawn ngaˬ hui aˬ htoꞈ ma awˬ lawn htaꞈ dawˇ nyi tuˬ te laˇ ve le?

¹⁷ Yaˬhoˉvaˬ lehˬ ngaˬ hui htaꞈ Liꞈ hpu hkʼaw awˬ tehˬ ve htaꞈ shiˍ tcuh laˇ ve awˬ bon uiˍ jaˇ. Awˬ tehˬ ve lehˬ ngaˬ hui nyi ma gawˬ lehˍ cawˬ tuˬ te laˇ ve, dawˇ law kuiˬ cawˬ tuˬ te laˇ ve, leh miˬ guiˬ chi hkʼoˆ lo shoꞈ shaꞈ jaˇ ve htawˇ, ngaˬ hui a shaꞈ teꞈ kuiˬ hkʼaw hkʼaˬ hkʼe te tuˬ, Liꞈ hpu hkʼaw hkʼa tawˍ lehˆ beˆ maˍ laˇ taˍ ve yoˬ. Gʼuiˬ sha ve mvuhˇ miˬ uˉ peunˍ la htaˇ, ngaˬ hui ve a shaꞈ teꞈ hkʼaˇ chi teˇ hkui aꞈ kehˉ daꞈ tuˬ yoˬ tehꞈ Liꞈ hpu hkʼaw awˬ tehˬ ve ngaˬ hui dawˇ law kuiˬ cawˬ tuˬ te laˇ ve yoˬ. 2023 hkʼawꞈ a yeˇ uiˍ jaˇ ve Liꞈ hpu awˬ tawn hkʼaw, Yaˬhoˉvaˬ ve tawˇ hkawˇ hkʼa peu˗eˬ lehˬ hteˇ jaˇ cawˇ jaˇ ve tehꞈ ngaˬ hui yonˍ gʼa tuˬ te laˇ ve yoˬ.—Chiˇ mvuh ve 119:160.