1-2. (a) Yeˍsuˆ ve a shaꞈ teꞈ hkʼaˇ leh yawˇ Gʼuiˬ sha ve kanˉ te htaˇ ve awˬ lawn htaꞈ dawˇ nyi htaˇ, ngaˬ hui hkʼaˬ hkʼe dawˇ ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 Ngaˬ hui haꞈ ve chaw suh˗e htaˇ, yawˇ htaꞈ dawˇ nawˇ jaˇ ve yoˬ. Yawˇ maˇ suh sheˍ htaˇ naˬ hkʼanˇ ve htaꞈ mawˬ ve pa taw, ngaˬ hui nyi ma luˬ jaˇ ve yoˬ. Yaꞈ hkʼaˇ, awˬ yanˇ ponˬ kʼai htaˇ, ngaˬ hui yawˇ maˍ laˇ ve awˬ ceuˬ htaꞈ dawˇ mawˬ ve, ngaˬ hui htaꞈ awˬ gʼaˇ peꞈ laˇ tuˬ yawˇ kʼoˆ ve leh te ve awˬ ceuˬ htaꞈ dawˇ mawˬ ve, ngaˬ hui ha lehˬ tuˬ yawˇ te laˇ ve awˬ ceuˬ htaꞈ dawˇ mawˬ ve pa taw, ngaˬ hui kaꞈ awˬ meu˗eˇ awˬ meu˗eˇ nyi ma sha la ve yoˬ.

² Chi ve hkʼa shuˍ shuˍ Yeˍsuˆ tuꞈ jaˇ hkanˍ jaˇ ve hkʼaw suh˗e ve htaꞈ caˉ daꞈ ngaˬ hui gʼaw nyi htaˇ nyi ma luˬ jaˇ. Yeˍsuˆ suh ve dawˇ nawˇ tuˬ hpawnˬ daꞈ ve awˬ yanˇ htaˇ, Yeˍsuˆ ngaˬ hui htaꞈ htaiˍ hkʼawꞈ laˇ ve awˬ hpfuhˇ hkʼa dehꞈ dawˇ nyi tuˬ ve a yeˇ uiˍ jaˇ ve yoˬ. (1 Kawˇrenˍhtuˆ 11:24, 25) Yawˇ miˬ guiˬ hkʼoˆ lo Gʼuiˬ sha ve kanˉ te htaˇ, kʼoˆ ve leh te ve awˬ ceuˬ htaꞈ dawˇ nyi ve kʼo ngaˬ hui ha lehˬ gʼa ve yoˬ. Chi hkʼoˆ kaꞈ, Yeˍsuˆ chi teˇ hkui te ve awˬ ceuˬ leh awˬ gʼuˇ suhˍ hpawˇ ngaˬ hui awˬ pon te tuˬ ve awˬ ceuˬ htaꞈ dawˇ nyi htaˇ, ngaˬ hui kaꞈ awˬ gʼaˇ gʼa ve yoˬ. Awˬ ceuˬ chi ve hkʼa peu˗eˬ htaꞈ ngaˬ hui dawˇ nyi htaˇ, yawˇ ngaˬ hui htaꞈ haꞈ laˇ ve htaꞈ dawˇ nyi ve lehˬ, yawˇ htaꞈ awˬ bon uiˍ jaˇ tehꞈ kʼoˆ piˇ gaˇ tuˬ te laˇ ve yoˬ. Chi ve lehˬ awˬ lawn chi ve hkʼaw teˇ geh henˇ tuˬ yoˬ.

3. Ngaˬ hui awˬ pon Yeˍsuˆ htaiˍ hkʼawꞈ laˇ ve htaꞈ awˬ bon uiˍ jaˇ tehꞈ hpeuꞈ maw piˇ tuˬ hkʼaˬ hkʼe te gʼa ve le?

³ Yeˍsuˆ ve a shaꞈ teꞈ hkʼaˇ leh yawˇ suh ve htaꞈ caˉ daꞈ ve awˬ lawn ngaˬ hui hkʼa dehꞈ dawˇ nyi htaˇ awˬ bon uiˍ jaˇ tehꞈ kʼoˆ piˇ gaˇ ve yoˬ. Yeˍsuˆ miˬ guiˬ hkʼoˆ lo Gʼuiˬ sha ve kanˉ te htaˇ, Gʼuiˬ sha ve mvuhˇ miˬ  chaw yaˇ awˬ pon daꞈ ve aˬ htoꞈ ma te laˇ tuˬ yawˇ maˍ piˇ ve yoˬ. Liꞈ hpu hkʼaw awˬ ceuˬ chi teˇ hpaˍ htaꞈ caˉ daꞈ ve ngaˬ hui shiˍ tuˬ te laˇ ve awˬ bon uiˍ jaˇ. Yeˍsuˆ htaiˍ hkʼawꞈ laˇ ve lehˬ ngaˬ hui Yaˬhoˉvaˬ leh Yeˍsuˆ geh meuˆ daꞈ tuˬ te laˇ ve pa taw awˬ bon uiˍ jaˇ. Yeˍsuˆ htaꞈ hkʼa yonˍ ve chaw hui lehˬ co co taiˍ taiˍ a shaꞈ gʼa tuˬ dawˇ law kuiˬ cawˬ leh yawˇ haꞈ ve chaw kʼawꞈ teꞈ tu la ve htaꞈ gʼa mawˬ daꞈ tuˬ dawˇ law kuiˬ cawˬ ve yoˬ. (Yoˇhanˬ 5:28, 29; Roˉmaꞈ 6:23) Awˬ tehˬ kʼo, ngaˬ hui daꞈ jaˇ ve laꞈ shawnˍ chi hkʼe tawn tawn ve htaꞈ maˇ gʼa keunˍ. Yaˬhoˉvaˬ leh Yeˍsuˆ ngaˬ hui awˬ pon te laˇ ve awˬ ceuˬ htaꞈ ngaˬ hui ca te hkʼawꞈ piˇ maˇ gʼa. (Roˉmaꞈ 5:8, 20, 21) Yaꞈ hkʼaˇ, ngaˬ hui teˇ gʼaˇ le le yawˇ huiˉ maˬ htaꞈ awˬ bon uiˍ jaˇ kʼoˆ piˇ gʼa ve yoˬ. Chi ngaˬ hui hkʼaˬ hkʼe te gʼa tuˬ le?

4. Maˍriˆ Maˍgaˍdaˍlaˆ Yeˍsuˆ yawˇ awˬ pon te laˇ ve awˬ ceuˬ htaꞈ awˬ bon uiˍ jaˇ kʼoˆ piˇ tuˬ yawˇ hkʼaˬ hkʼe te ve le? (Awˬ han htaꞈ nyi sheˍ.)

⁴ Yuˇdaꞈ chaw Maˍriˆ Maˍgaˍdaˍlaˆ ve awˬ lawn htaꞈ teˇ geh nyi sheˍ. Yawˇ ve a shaꞈ teꞈ hkʼaˇ shoꞈ shaꞈ jaˇ. Yawˇ awˬ to hkʼaw neˇ 7 hkeh geh taˍ ve yoˬ. Yawˇ tuꞈ jaˇ hkanˍ jaˇ leh teˇ gʼaˇ˗ehꞈ kaꞈ ga laˇ maˇ gʼa tehꞈ dawˇ ve yoˬ. Yeˍsuˆ Maˍriˆ awˬ to hkʼaw neˇ gʼaꞈ tawˆ piˇ peuˬ hkʼawꞈ nawˉ yawˇ hkʼaˬ hkʼe tawn ha lehˬ ve htaꞈ dawˇ nyi sheˍ. Yawˇ Yeˍsuˆ htaꞈ awˬ bon uiˍ jaˇ kʼoˆ piˇ ve lehˬ, yawˇ ve awˬ laꞈ gʼawˇ hpehꞈ la ve, yawˇ ve awˬ gʼaˇ awˬ shaˉ yuˬ tanˇ ve, leh yawˇ cawˬ taˍ ve hkʼa peu˗eˬ Gʼuiˬ sha ve kanˉ te ve hpawˇ gʼa ga piˇ ve yoˬ. (Luˉkaꞈ 8:1-3) Maˍriˆ Yeˍsuˆ htaꞈ awˬ bon uiˍ jaˇ tehꞈ kʼoˆ piˇ ve htawˇ, Yeˍsuˆ yawˇ awˬ pon chi ve aꞈ kehˉ te piˇ jaˇ ve htaꞈ kaꞈ yawˇ maˇ shiˍ sheˍ. Yeˍsuˆ chaw yaˇ awˬ pon a shaꞈ gʼa tuˬ tanˇ piˇ ve lehˬ, ‘Yaˇ hpu htaꞈ hkʼa yonˍ ve chaw hkʼa peu˗eˬ co tiꞈ ha tiꞈ htaꞈ gʼa tuˬ yoˬ.’ (Yoˇhanˬ 3:16) Oˇ ve teˇ yanˇ Maˍriˆ awˬ lawn chi ve htaꞈ maˇ shiˍ sheˍ ve htawˇ, Yeˍsuˆ htaꞈ awˬ bon uiˍ jaˇ tehꞈ hpeuꞈ maw piˇ ve lehˬ, ka tiꞈ yeˬ ve yoˬ. Yeˍsuˆ suhˆ hkuiˉ daw hkʼoˆ lo htaꞈ keu piˇ leh naˬ jaˇ htaˇ, Maˍriˆ leh awˬ nu ve chaw laiˉ gʼaˇ Yeˍsuˆ htaꞈ awˬ gʼaˇ piˇ chehˇ ve yoˬ. (Yoˇhanˬ 19:25) Yeˍsuˆ suh peuˬ hkʼawꞈ nawˉ Maˍriˆ leh awˬ nu ve yaˇ miˇ 2 gʼaˇ kaꞈ sha hawnˉ vuiˬ leh Yeˍsuˆ ve tuˍ hpfuh lo kʼai ve yoˬ. (Maˍkuˆ 16:1, 2) Maˍriˆ ka tiꞈ yeˬ ve pa taw yawˇ daꞈ jaˇ ve laꞈ shawnˍ gʼa ve yoˬ. Maˍriˆ Yeˍsuˆ kʼawꞈ teꞈ tu la ve htaꞈ gʼa kʼawꞈ mawˬ daꞈ leh tawˇ gʼa yaw daꞈ ve ha lehˬ jaˇ ve yoˬ. Awˬ nu ve awˬ laꞈ gʼawˇ hui aꞈ kehˉ yawˇ lehˬ daꞈ jaˇ ve awˬ vuiˬ gʼa ve yoˬ.—Yoˇhanˬ 20:11-18.

5. Yaˬhoˉvaˬ leh Yeˍsuˆ ngaˬ hui awˬ pon teˇ ceuˬ le le te laˇ ve htaꞈ awˬ bon uiˍ jaˇ tehꞈ hpeuꞈ maw piˇ tuˬ hkʼaˬ hkʼe te gʼa ve le?

 ⁵ Yaˬhoˉvaˬ leh Yeˍsuˆ ngaˬ hui awˬ pon teˇ ceuˬ le le te laˇ ve htaꞈ awˬ bon uiˍ jaˇ tehꞈ hpeuꞈ maw piˇ gʼa ve lehˬ, Gʼuiˬ sha ve mvuhˇ miˬ awˬ pon ngaˬ hui ve awˬ gʼaˇ awˬ shaˉ leh hpu shi mawˇ jeˬ tanˇ piˇ gʼa ve yoˬ. Tawˇ pa haˉ te kʼo, hpawnˬ daꞈ kuiˬ yehˬ te ve htaꞈ ga piˇ tuˬ, maˇ heˆ leh hpawnˬ daꞈ kuiˬ yehˬ daꞈ kehˬ tuˬ te ve htaꞈ hkʼaˬ htaˆ kaꞈ ga piˇ gʼa ve yoˬ.

6. Htaiˍ hkʼawꞈ ve awˬ hpfuhˇ ngaˬ hui teˇ gʼaˇ leh teˇ gʼaˇ htaꞈ Gʼuiˬ sha peꞈ laˇ ve laꞈ shawnˍ hpehꞈ ve tehꞈ hkʼaˬ hkʼe kʼoˆ gʼa ve le?

⁶ Yaˬhoˉvaˬ leh Yeˍsuˆ ngaˬ hui htaꞈ hkʼaˬ hkʼe taw haꞈ ve tehꞈ dawˇ nyi htaˇ, ngaˬ hui yawˇ huiˉ maˬ htaꞈ haꞈ gaˇ tuˬ te laˇ ve yoˬ. (1 Yoˇhanˬ 4:10, 19) Ngaˬ hui teˇ gʼaˇ leh teˇ gʼaˇ awˬ pon Yeˍsuˆ htaiˍ hkʼawꞈ laˇ ve htaꞈ shiˍ htaˇ, ngaˬ hui Yaˬhoˉvaˬ leh Yeˍsuˆ htaꞈ haꞈ gaˇ tuˬ te laˇ ve yoˬ. Awˬ lawn chi ve htaꞈ Pawˇluꞈ kaꞈ shiˍ ve yoˬ. Yawˇ Gaˍlaˍtiˆ venˇ lo awˬ viˉ awˬ nyi htaꞈ liꞈ bvuhꞈ piˇ htaˇ, “ngaˬ htaꞈ haꞈ leh ngaˬ awˬ pon yawˇ awˬ to tanˇ peuˬ ve, Gʼuiˬ sha ve Yaˇ hpu htaꞈ” awˬ bon uiˍ jaˇ tehꞈ kʼoˆ piˇ ve yoˬ. (Gaˍlaˍtiˆ 2:20) Yeˍsuˆ htaiˍ hkʼawꞈ laˇ ve pa taw, nawˬ Yaˬhoˉvaˬ geh awˬ chawˇ te la tuˬ yawˇ nawˬ htaꞈ gʼawˬ veu laˇ ve yoˬ. (Yoˇhanˬ 6:44) Yaˬhoˉvaˬ nawˬ awˬ to htaꞈ daꞈ ve nyi mawˬ leh nawˬ yawˇ geh meuˆ daꞈ la tuˬ awˬ hpfuhˇ hkʼaˆ jaˇ ve awˬ ceuˬ peꞈ laˇ ve htaꞈ nyi ma gawˬ lehˍ cawˬ leh ha lehˬ jaˇ ve maˇ heˆ laˇ? Nawˬ awˬ lawn chi htaꞈ dawˇ nyi ve lehˬ Yaˬhoˉvaˬ leh Yeˍsuˆ htaꞈ haꞈ maˇ la tuˬ te laˇ˗aw laˇ? A shu yawˇ awˬ to htaꞈ na nyi cawˇ ve, ‘yawˇ huiˉ maˬ ngaˬ hui htaꞈ haꞈ laˇ ve aˬ htoꞈ ma te gaˇ tuˬ te laˇ ve le?’

7. Awˬ han hkʼaw mawˬ ve hkʼe ngaˬ hui teˇ gʼaˇ le le Yaˬhoˉvaˬ leh Yeˍsuˆ htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa ve le? (2 Kawˇrenˍhtuˆ 5:14, 15; 6:1, 2)

⁷ Ngaˬ hui Yaˬhoˉvaˬ leh Yeˍsuˆ htaꞈ haꞈ ve lehˬ awˬ nu ve chaw htaꞈ haꞈ ve tehꞈ hpeuꞈ maw piˇ gaˇ ve yoˬ. (2 Kawˇrenˍhtuˆ 5:14, 15; 6:1, 2 gʼaw sheˍ.) Ngaˬ hui awˬ nu ve chaw htaꞈ haꞈ ve tehꞈ hpeuꞈ maw piˇ gʼa ve teˇ hkʼaˇ lehˬ, kaiˬ ve hkʼaw hto toˇ ve yoˬ. Ngaˬ hui mawˬ daꞈ ve teˇ gʼaˇ le le htaꞈ Gʼuiˬ sha ve awˬ lawn kʼoˆ maˍ piˇ ve yoˬ. Mvuhˇ miˬ, chaw ceuˬ,  hpu cawˬ ve chaw, maˇ heˆ leh aˉ yaˇ cawˬ ve chaw, teˇ hpaˍ htaꞈ pa taw ngaˬ hui maˇ cawˇ maˇ hawˍ daꞈ ve maˇ cawˬ. Chi ve htaꞈ pa taw, Yaˬhoˉvaˬ yawˇ loˍ ve awˬ ceuˬ lehˬ, “chaw hkʼa peu˗eˬ htaiˍ hkʼawꞈ ve htaꞈ gʼa tuˬ ve awˬ hkʼoˆ kaꞈ, hteˇ ve cawˇ ve htaꞈ shiˍ la tuˬ yawˇ heuˆ gaˇ ve” htaꞈ ngaˬ hui te gaˇ ve yoˬ.—1 Tiˆmoˉseˍ 2:4.

8. Ngaˬ hui awˬ viˉ awˬ nyi htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa tuˬ le?

⁸ Chi hkʼoˆ kaꞈ, ngaˬ hui Yaˬhoˉvaˬ leh Yeˍsuˆ htaꞈ haꞈ ve tehꞈ hpeuꞈ maw piˇ gʼa ve lehˬ, awˬ viˉ awˬ nyi htaꞈ haꞈ ve yoˬ. (1 Yoˇhanˬ 4:21) Awˬ viˉ awˬ nyi shoꞈ shaꞈ ve leh tuꞈ ve hkanˍ ve htaꞈ gʼa hpuˇ htaˇ, ngaˬ hui yawˇ hui htaꞈ a yeˇ yuˬ piˇ leh ga piˇ cawˇ ve yoˬ. Awˬ viˉ awˬ nyi yawˇ hui haꞈ ve chaw suh˗e htaˇ, yawˇ hui naˬ htaˇ ca guiˇ˗e piˇ leh yawˇ hui awˬ gʼaˇ nuˇ htaˇ kaꞈ awˬ gʼaˇ ca piˇ˗e ve yoˬ. (2 Kawˇrenˍhtuˆ 1:3-7; 1 Hteˇsaˍlawˇniˆ 5:11, 14) Ngaˬ hui awˬ viˉ awˬ nyi awˬ pon bon hkʼaˬ htaˆ kaꞈ lawˬ piˇ ve yoˬ. Awˬ lawn kʼo, “hteˇ ve cawˇ ve chaw bon lawˬ ve lehˬ, kanˇ paˆ cawˬ maˇ jaˇ” tehꞈ ngaˬ hui shiˍ ve yoˬ.—Yaˍkoˆ 5:16.

9. Ngaˬ hui awˬ viˉ awˬ nyi htaꞈ haꞈ ve tehꞈ hpeuꞈ maw piˇ ve teˇ hkʼaˇ lehˬ aˬ htoꞈ ma le?

⁹ Chi hkʼoˆ kaꞈ, ngaˬ hui awˬ viˉ awˬ nyi htaꞈ haꞈ ve tehꞈ hpeuꞈ maw piˇ ve lehˬ, yawˇ hui geh cawˇ daꞈ hui daꞈ tuˬ te ve yoˬ. Venˇ baˆ hpehˇ piˇ ve awˬ lawn ngaˬ hui Yaˬhoˉvaˬ htaꞈ henˇ yuˬ gʼa ve yoˬ. Ngaˬ hui ve venˇ baˆ htaꞈ htaiˍ hkʼawꞈ laˇ tuˬ ngaˬ hui awˬ pon Yaˬhoˉvaˬ yawˇ ve Yaˇ paˍ suh˗e tcuh laˇ ve kʼo, awˬ viˉ awˬ nyi ngaˬ hui htaꞈ te yaꞈ laˇ ve kʼo yawˇ hui htaꞈ venˇ baˆ hpehˇ piˇ cawˇ ve yoˬ. Yeˍsuˆ tawˇ pa haˉ tehˆ maˍ laˇ ve awˬ ceˬ hkʼe ngaˬ hui maˇ hpehꞈ gaˇ. Yawˇ ve awˬ shehˍ hpaˇ geh yawˇ jeˬ cha maˇ jaˇ ve maˇ kʼawꞈ shaiˍ tcuh˗o ve yoˬ. Yaꞈ hkʼaˇ, yawˇ ve awˬ chawˇ teˇ gʼaˇ yawˇ geh jeˬ a ciˉ ceh tiˉ cha taˍ ve htaꞈ shaiˍ tcuh ve yoˬ. (Maꞈhtehˍ 18:23-35) Nawˬ awˬ viˉ awˬ nyi geh maˇ cawˇ maˇ hawˍ daꞈ ve kʼo, Yeˍsuˆ suh ve dawˇ nawˇ tuˬ hpawnˬ daꞈ ve maˇ gaˬ sheˍ htaˇ, nawˬ awˬ viˉ awˬ nyi geh cawˇ daꞈ hawˍ daꞈ tuˬ te sheˍ. (Maꞈhtehˍ 5:23, 24) Chi hkʼe te ve lehˬ nawˬ Yaˬhoˉvaˬ leh Yeˍsuˆ htaꞈ haꞈ jaˇ ve tehꞈ hpeuꞈ maw piˇ ve yoˬ.

10-11. Nyi haꞈ shaˉ paˍ Yaˬhoˉvaˬ leh Yeˍsuˆ htaꞈ haꞈ ve tehꞈ hpeuꞈ maw piˇ tuˬ aˬ htoꞈ ma te gʼa ve le? (1 Peˍtruˆ 5:1, 2)

¹⁰ Nyi haꞈ shaˉ paˍ Yaˬhoˉvaˬ leh Yeˍsuˆ htaꞈ haꞈ ve tehꞈ hkʼaˬ hkʼe hpeuꞈ maw piˇ gʼa ve le? Nyi haꞈ shaˉ paˍ te cawˇ ve a yeˇ uiˍ jaˇ ve teˇ ceuˬ lehˬ, Yeˍsuˆ ve yawˬ awˬ moˍ htaꞈ nyi haꞈ shaˉ ve yoˬ. (1 Peˍtruˆ 5:1, 2 gʼaw sheˍ.) Yeˍsuˆ yawˇ ve tcuh yaˇ Peˍtruˆ geh tawˇ yaw daꞈ htaˇ awˬ lawn chi ve hkʼa tawˍ lehˆ kʼoˆ piˇ ve yoˬ. Peˍtruˆ Yeˍsuˆ htaꞈ 3 pawˆ chiˇ baˬ peuˬ hkʼawꞈ nawˉ, yawˇ Yeˍsuˆ htaꞈ hkʼaˬ hkʼe taw haꞈ ve hpeuꞈ maw piˇ gaˇ ve yoˬ. Yeˍsuˆ kʼawꞈ teꞈ tu la peuˬ hkʼawꞈ nawˉ, yawˇ Peˍtruˆ htaꞈ na nyi piˇ ve, ‘Yoˇhanˬ ve yaˇ Siˉmonˍ˗oˬ, nawˬ ngaˬ htaꞈ haꞈ˗aw laˇ?’ Peˍtruˆ lehˬ yawˇ ve awˬ shehˍ hpaˇ htaꞈ haꞈ ve tehꞈ hpeuꞈ maw piˇ tuˬ teˇ ceuˬ le le te ve htaꞈ ngaˬ hui yonˍ gʼa ve yoˬ. Hkʼe te leh, Yeˍsuˆ Peˍtruˆ htaꞈ kʼoˆ piˇ ve, “ngaˬ ve yawˬ teˇ hpaˍ htaꞈ haꞈ shaˉ˗oˆ.” (Yoˇhanˬ 21:15-17) Oˇ ve teˇ yanˇ tanˬ leh Peˍtruˆ yawˇ ve a shaꞈ teꞈ chehˇ ve teˇ co˗e, Yeˍsuˆ htaꞈ haꞈ ve tehꞈ hpeuꞈ maw piˇ tuˬ Yeˍsuˆ ve yawˬ awˬ moˍ htaꞈ nyi haꞈ shaˉ ve yoˬ.

¹¹ Nyi haꞈ shaˉ paˍ hpehꞈ ve chaw˗oˬ, Yeˍsuˆ Peˍtruˆ geh tawˇ yaw daꞈ ve awˬ lawn nawˬ awˬ pon a yeˇ uiˍ jaˇ ve tehꞈ Yeˍsuˆ suh ve dawˇ nawˇ tuˬ hpawnˬ daꞈ ve maˇ gaˬ sheˍ htaˇ leh peuˬ hkʼawꞈ nawˉ hkʼaˬ hkʼe hpeuꞈ maw piˇ gʼa tuˬ le? Nawˬ Yaˬhoˉvaˬ leh Yeˍsuˆ htaꞈ haꞈ ve tehꞈ hpeuꞈ maw piˇ gʼa ve lehˬ, awˬ viˉ awˬ nyi htaꞈ hkʼaˬ htaˆ kaꞈ awˬ gʼaˇ piˇ leh Gʼuiˬ sha ve kanˉ maˇ te˗o ve chaw htaꞈ kʼawꞈ kʼawꞈ la tuˬ coˇ caˇ leh ga piˇ ve yoˬ. (Yeˍsaˍkeˍlaˆ 34:11, 12) Chi hkʼoˆ kaꞈ, Liꞈ hpu henˇ ve chaw leh Yeˍsuˆ suh ve dawˇ nawˇ tuˬ hpawnˬ daꞈ la ve chaw htaꞈ kaꞈ a yeˇ yuˬ piˇ cawˇ ve yoˬ. Yawˇ hui htaꞈ ha lehˬ ha kʼa ve hkʼaw haꞈ yuˬ laˇ ve tehꞈ shiˍ tuˬ, nawˬ te gʼa ve hkʼe teˇ ceuˬ le le te sheˍ. Awˬ lawn kʼo, awˬ gʼuˇ suhˍ hpawˇ yawˇ Yeˍsuˆ ve awˬ laꞈ gʼawˇ hpehꞈ la tuˬ yoˬ hehˉ.

12. Yeˍsuˆ maˇ suh sheˍ teˇ haˉ htaˇ yawˇ kʼoˆ ve awˬ lawn htaꞈ ngaˬ hui dawˇ nyi ve lehˬ, hkʼaˬ hkʼe te ngaˬ hui haꞈ hanˉ ve cawˬ tuˬ te laˇ ve le? (Yoˇhanˬ 16:32, 33)

¹² Yeˍsuˆ miˬ guiˬ hkʼoˆ lo a shaꞈ teꞈ chehˇ ve awˬ leh meuˇ teˇ haˉ htaˇ, yawˇ ve awˬ laꞈ gʼawˇ htaꞈ kʼoˆ piˇ ve,  “chi miˬ guiˬ hkʼoˆ lo nawˬ hui gʼa tuꞈ gʼa hkanˍ ve yoˬ. Yaꞈ hkʼaˇ nyi ma taˇ luˬ, ha lehˬ chehˇ˗oˆ. Ngaˬ lehˬ chi miˬ guiˬ htaꞈ gʼaˇ peuˬ.” (Yoˇhanˬ 16:32, 33 gʼaw sheˍ.) Yeˍsuˆ canˇ paˍ mehˆ gʼuˇ suhˍ haꞈ hanˉ leh ka tiꞈ yeˬ gʼa tuˬ hkʼaˬ hkʼe ga piˇ ve le? Yeˍsuˆ Yaˬhoˉvaˬ htaꞈ gʼaˇ va ve yoˬ. Yeˍsuˆ yawˇ ve awˬ laꞈ gʼawˇ kaꞈ yawˇ hkʼa shuˍ gʼa hpuˇ tuˬ yoˬ tehꞈ shiˍ ve pa taw, Yaˬhoˉvaˬ yawˇ ve awˬ laꞈ gʼawˇ htaꞈ nyi haꞈ shaˉ laˇ tuˬ bon lawˬ ve yoˬ. (Yoˇhanˬ 17:11) Awˬ lawn chi ve htaꞈ ngaˬ hui shiˍ ve aˬ htoꞈ ma te haꞈ hanˉ tuˬ te laˇ ve le? Yaˬhoˉvaˬ lehˬ ngaˬ hui ve canˇ paˍ hkʼa peu˗eˬ aꞈ kehˉ kanˇ paˆ cawˬ jaˇ leh yawˇ mehˆ gʼuˇ suhˍ teˇ ceuˬ kaꞈ faˉ taˍ maˇ gʼa ve tehꞈ ngaˬ hui shiˍ ve yoˬ. (1 Yoˇhanˬ 4:4) Ngaˬ hui Yaˬhoˉvaˬ htaꞈ gʼaˇ va ve kʼo, ngaˬ hui kawˆ ve maˇ cawˬ leh haꞈ hanˉ ve cawˬ gʼa ve tehꞈ yonˍ gʼa ve yoˬ.

13. Aˍriˆmaꞈhtehˍ venˇ yaˇ Yoˇsehꞈ lehˬ, haꞈ hanˉ ve cawˬ ve tehꞈ hkʼaˬ hkʼe hpeuꞈ maw laˇ ve le?

¹³ Aˍriˆmaꞈhtehˍ venˇ yaˇ Yoˇsehꞈ ve awˬ lawn htaꞈ teˇ geh nyi sheˍ. Yawˇ lehˬ Yuˇdaꞈ chaw shaˉ nanˉ lonˉ hkʼaw leh, yawˇ chehˇ kuiˬ teˇ tawn lo awˬ meh bvuhˬ ve chaw kaꞈ hpehꞈ ve yoˬ. Yaꞈ hkʼaˇ, Yoˇsehꞈ lehˬ haꞈ hanˉ ve hkʼa dehꞈ maˇ cawˬ. Yoˇhanˬ kʼoˆ ve, “Yoˇsehꞈ oˇ ve teˇ gʼaˇ lehˬ, Yeˍsuˆ ve awˬ laꞈ gʼawˇ hpehꞈ ve htawˇ, Yuˇdaꞈ chaw hui htaꞈ kawˆ ve pa taw, awˬ laꞈ gʼawˇ hpehꞈ ve yoˬ tehꞈ shu htaꞈ maˇ shiˍ tcuh.” (Yoˇhanˬ 19:38) Yoˇsehꞈ lehˬ Gʼuiˬ sha ve mvuhˇ miˬ daꞈ ve awˬ lawn sha tanˇ htaꞈ a yeˇ yuˬ ve htawˇ, yawˇ Yeˍsuˆ htaꞈ yonˍ ve tehꞈ shu htaꞈ maˇ shiˍ tcuh gaˇ ve yoˬ. Yawˇ lehˬ shu maˇ yawˆ yan laˇ ve htaꞈ kawˆ ve pa taw yoˬ hehˉ. Liꞈ hpu hkʼaw kʼoˆ ve, Yeˍsuˆ suh peuˬ hkʼawꞈ nawˉ Yoˇsehꞈ lehˬ “nyi ma haꞈ hanˉ te leh, jawˇ mawˇ Piˉlaꞈ geh kʼai leh Yeˍsuˆ ve awˬ to htaꞈ lawˬ yuˬ ve yoˬ.” (Maˍkuˆ 15:42, 43) Yoˇsehꞈ lehˬ Yeˍsuˆ ve awˬ laꞈ gʼawˇ hpehꞈ ve tehꞈ maˇ faˉ taˍ˗o.

14. Nawˬ chaw htaꞈ kawˆ ve kʼo, aˬ htoꞈ ma te cawˇ ve le?

¹⁴ Nawˬ Yoˇsehꞈ hkʼa shuˍ chaw htaꞈ kawˆ jaw˗aw laˇ? Teˇ pawˆ pawˆ nawˬ liꞈ henˇ yehˬ lo chehˇ ve maˇ heˆ leh kanˉ te kuiˬ lo chehˇ htaˇ, nawˬ Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ shu htaꞈ kʼoˆ piˇ tuˬ yaꞈ taw˗aw laˇ? Hto toˇ ve chaw maˇ te ve, maˇ heˆ leh Baˆtiˆsaˬ maˇ haꞈ yuˬ sheˍ ve lehˬ, awˬ nu ve chaw maˇ dawˇ cawˇ la ve htaꞈ kawˆ ve laˇ? Kawˆ ve chi hkʼe ve htaꞈ pa taw, cawˇ ve tehꞈ nawˬ shiˍ ve awˬ ceuˬ htaꞈ maˇ te tuˬ taˇ te laˇ tcuh. Yaˬhoˉvaˬ geh bon lawˬ sheˍ. Yawˇ loˍ ve awˬ ceuˬ htaꞈ gʼaꞈ te tuˬ nawˬ haꞈ hanˉ ve cawˬ tuˬ yawˇ ga laˇ tuˬ lawˬ sheˍ. Nawˬ ve bon lawˬ hkawˇ htaꞈ Yaˬhoˉvaˬ hkʼawꞈ laˇ ve tehꞈ gʼa mawˬ htaˇ, nawˬ awˬ gʼaˇ cawˬ leh haꞈ hanˉ ve cawˬ tuˬ yoˬ.—Iˉsaˍyaˆ 41:10, 13.

15. Yeˍsuˆ ve awˬ laꞈ gʼawˇ yawˇ kʼawꞈ teꞈ tu la peuˬ hkʼawꞈ nawˉ gʼa mawˬ htaˇ ha lehˬ jaˇ leh ha lehˬ ve chi yawˇ hui awˬ pon awˬ bon hkʼaˬ hkʼe cawˬ ve le? (Luˉkaꞈ 24:52, 53)

¹⁵ Yeˍsuˆ suh˗e htaˇ awˬ laꞈ gʼawˇ hui nyi ma luˬ jaˇ ve yoˬ. Tawˇ pa haˉ te kʼo, nawˬ kaꞈ awˬ laꞈ gʼawˇ oˇ ve hkʼaw ve teˇ gʼaˇ hpehꞈ leh Yeˍsuˆ suh˗e htaˇ nawˬ kaꞈ chehˇ taˍ ve yoˬ. Nawˬ hkʼaˬ hkʼe dawˇ tuˬ le? Yawˇ  hui haꞈ jaˇ ve awˬ chawˇ ceh tiˉ suh˗e ve maˇ heˆ. Yaꞈ hkʼaˇ, yawˇ hui teꞈ chiˉ dawˇ law kuiˬ kaꞈ maˇ cawˬ˗o ve tehꞈ dawˇ ve yoˬ. (Luˉkaꞈ 24:17-21) Yaꞈ hkʼaˇ, Yeˍsuˆ kʼawꞈ teꞈ tu la leh yawˇ hui htaꞈ awˬ to maw piˇ htaˇ, yawˇ te ve awˬ ceuˬ Liꞈ hpu hkʼaw tcuh kaˍ paˍ ve tawˇ hkawˇ htaꞈ awˬ tehˬ awˬ na biˇ la ve yoˬ tehꞈ yawˇ hui na gʼa tuˬ ga piˇ ve yoˬ. Leh Yeˍsuˆ kaꞈ yawˇ hui htaꞈ a yeˇ uiˍ ve kanˉ piˇ ve yoˬ. (Luˉkaꞈ 24:26, 27, 45-48) Yeˍsuˆ kʼawꞈ teꞈ tu la peuˬ hkʼawꞈ nawˉ 40 nyi gaˬ leh yawˇ mvuhˇ naw ma hkʼoˆ lo gʼa tawˆ˗e tuˬ ve awˬ yanˇ gaˬ˗oˬ htaˇ, oˇ ve teˇ yanˇ awˬ laꞈ gʼawˇ hui nyi ma luˬ ve lehˬ, kʼawꞈ ha lehˬ la ve yoˬ. Yawˇ hui ve Jawˇ mawˇ a shaꞈ teꞈ chehˇ sheˍ ve tehꞈ shiˍ ve pa taw, yawˇ hui ve kanˉ hkʼa dehꞈ te gʼa tuˬ ga laˇ gʼa ve tehꞈ shiˍ ve yoˬ. Ha lehˬ ve chi lehˬ yawˇ hui teˇ nyi le le Yaˬhoˉvaˬ htaꞈ chiˇ mvuh gaˇ tuˬ kaꞈ te piˇ ve yoˬ.—Luˉkaꞈ 24:52, 53 gʼaw sheˍ; Tcuh yaˇ 5:42.

16. Yeˍsuˆ ve awˬ laꞈ gʼawˇ htaꞈ ngaˬ hui hkʼaˬ hkʼe te henˇ yuˬ gʼa tuˬ le?

¹⁶ Yeˍsuˆ ve awˬ laꞈ gʼawˇ htaꞈ ngaˬ hui hkʼaˬ hkʼe te henˇ yuˬ gʼa tuˬ le? Ngaˬ hui Yaˬhoˉvaˬ htaꞈ oˉ kʼoˍ gʼa pui ve lehˬ Yeˍsuˆ suh ve dawˇ nawˇ tuˬ hpawnˬ daꞈ ve awˬ yanˇ htaˇ ceh tiˉ maˇ heˆ. Yaꞈ hkʼaˇ, ngaˬ hui yawˇ htaꞈ hkʼaˬ htaˆ kaꞈ oˉ kʼoˍ gʼa pui ve ha lehˬ jaˇ. Ngaˬ hui chi hkʼe ha lehˬ gʼa tuˬ Gʼuiˬ sha ve mvuhˇ miˬ awˬ lawn ngaˬ hui a shaꞈ teꞈ kuiˬ hkʼaw a yeˇ uiˍ jaˇ tehꞈ gʼa shawˍ cawˇ ve yoˬ. Awˬ viˉ awˬ nyi Gʼuiˬ sha ve kanˉ te gʼa tuˬ, hpawnˬ daꞈ˗e gʼa tuˬ, leh hkʼaˬ htaˆ kaꞈ yehˬ kʼa hkʼaw oˉ kʼoˍ pui ve te gʼa tuˬ, yawˇ hui ve kanˉ hkʼaˇ pa ve yoˬ. Awˬ viˉ awˬ nyi teˇ hpaˍ kʼo, awˬ nu ve chaw hpu shi mawˇ jeˬ htaꞈ a yeˇ uiˍ jaˇ tehꞈ shawˍ ve awˬ ceuˬ htaꞈ yawˇ hui yuˬ tanˇ leh Hkriꞈ yaˇ awˬ moˍ hkʼaw awˬ viˉ awˬ nyi htaꞈ hkʼa dehꞈ ga piˇ gʼa tuˬ, maˇ heˆ leh hto toˇ ve chaw loˍ jaˇ kuiˬ lo ca ga piˇ˗e ve yoˬ. Yaˬhoˉvaˬ ve kanˉ caˉ leh te gʼa tuˬ ngaˬ hui tuꞈ ve hkanˍ ve htaꞈ gʼa yeunˇ hkanˍ ve htawˇ, ngaˬ hui a shaꞈ teꞈ kuiˬ hkʼaw Yaˬhoˉvaˬ uˉ peunˍ ve htaꞈ a yeˇ uiˍ jaˇ tehꞈ shawˍ ve kʼo, yawˇ awˬ bon naꞈ laˇ tuˬ yoˬ tehꞈ ka tiꞈ te taˍ laˇ ve yoˬ.—Tawˇ naˉ ve 10:22; Maꞈhtehˍ 6:32, 33.

17. Yeˍsuˆ suh ve dawˇ nawˇ tuˬ hpawnˬ daꞈ ve awˬ yanˇ htaˇ nawˬ aˬ htoꞈ ma te tuˬ dawˇ teh taˍ ve le? (Awˬ han htaꞈ nyi sheˍ.)

¹⁷ Shinˉ peuˬ 2 nyi mvuhˇ hpeuꞈ, Ha pa 4 maˬ 4 nyi Yeˍsuˆ suh ve dawˇ nawˇ tuˬ hpawnˬ daꞈ ve htaꞈ ngaˬ hui law chehˇ ve yoˬ. Yaꞈ hkʼaˇ, ngaˬ hui chi teˇ hkui kaꞈ Yeˍsuˆ ve a shaꞈ teꞈ hkʼaˇ leh yawˇ suh ve awˬ lawn htaꞈ caˉ daꞈ ve hkʼa dehꞈ dawˇ nyi gʼa leh Yaˬhoˉvaˬ leh Yeˍsuˆ ngaˬ hui htaꞈ haꞈ laˇ ve htaꞈ kaꞈ dawˇ nyi gʼa ve yoˬ. Yeˍsuˆ suh ve dawˇ nawˇ tuˬ hpawnˬ daꞈ ve maˇ gaˬ sheˍ htaˇ leh peuˬ hkʼawꞈ nawˉ kaꞈ ngaˬ hui awˬ lawn chi ve htaꞈ hkʼa dehꞈ dawˇ nyi cawˇ ve yoˬ. Tawˇ pa haˉ te kʼo, Yeˍsuˆ miˬ guiˬ hkʼoˆ chehˇ ve awˬ leh meuˇ teˇ shinˉ htaˇ ve awˬ lawn Ngaˬ hui Hkriꞈ yaˇ a shaꞈ teꞈ hkʼaˇ leh Gʼuiˬ sha kanˉ te ve liꞈ hkʼaw Ha pa 4 maˬ 2019 hkʼawꞈ liꞈ mehˆ hpfuhˇ 4-5 hkʼaw gʼaw leh hkʼa dehꞈ dawˇ nyi gʼa ve yoˬ. Awˬ lawn chi ve teˇ hpaˍ htaꞈ nawˬ gʼaw htaˇ, nawˬ awˬ bon uiˍ jaˇ tehꞈ kʼoˆ piˇ gaˇ tuˬ ve htaꞈ a yeˇ te ve, nawˬ haꞈ ve tehꞈ hpeuꞈ maw piˇ gaˇ tuˬ te laˇ ve, nawˬ haꞈ hanˉ ve cawˬ tuˬ te laˇ ve leh nawˬ leuˉ leh ha lehˬ ve cawˬ tuˬ kaꞈ te laˇ ve yoˬ. Nawˬ awˬ hpfuhˇ shiˍ ve tehꞈ hpeuꞈ maw piˇ leh nyi ma awˬ tawˬ hkʼa gaˬ awˬ bon uiˍ jaˇ tehꞈ kʼoˆ piˇ tuˬ, nawˬ aˬ htoꞈ ma te gʼa ve htaꞈ dawˇ nyi sheˍ. Yeˍsuˆ suh ve dawˇ nawˇ tuˬ hpawnˬ daꞈ ve awˬ yanˇ htaˇ nawˬ te ve teˇ ceuˬ le le htaꞈ Yeˍsuˆ awˬ hpfuhˇ shiˍ ve tehꞈ yonˍ gʼa ve yoˬ.—Hpeuꞈ maˍ ve 2:19.