1-2. Aˬ htoꞈ ma te ngaˬ hui teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ˗e ve le?

 Ngaˬ hui co co taiˍ taiˍ ve a shaꞈ gʼa tuˬ Yeˍsuˆ ve a shaꞈ tanˇ laˇ ve 2,000 hkʼawꞈ hpaˇ gaˬ˗oˬ. Yeˍsuˆ miˬ guiˬ hkʼoˆ chehˇ ve awˬ leh meuˇ teˇ haˉ htaˇ, yawˇ htaꞈ dawˇ nawˇ ve hpawnˬ daꞈ ve hkʼa sha sha˗ehˬ te gʼa tuˬ, hkonˍ monˇ leh a pehˉ meuˇ gʼuiˬ htaꞈ yehˇ˗oˆ tehꞈ, awˬ laꞈ gʼawˇ hui htaꞈ kʼoˆ piˇ ve yoˬ.—1 Kawˇrenˍhtuˆ 11:23-26.

² Ngaˬ hui Yeˍsuˆ htaꞈ haꞈ ve pa taw, yawˇ kʼoˆ laˇ ve tawˇ hkawˇ htaꞈ na yuˬ ve yoˬ. (Yoˇhanˬ 14:15) Teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ ve awˬ yanˇ htaˇ, yawˇ suh ve ngaˬ hui awˬ pon tcuhˉ kuiˬ hkʼaˬ hkʼe cawˬ ve, bon lawˬ leh hkʼa dehꞈ dawˇ nyi ve awˬ hkʼaw lo awˬ bon uiˍ jaˇ tehꞈ hpeuꞈ maw piˇ ve yoˬ. Chi hkʼoˆ kaꞈ, ngaˬ hui Gʼuiˬ sha ve kanˉ maˇ maˇ te gaˇ leh chaw maˇ maˇ Yeˍsuˆ suh ve dawˇ nawˇ tuˬ hpawnˬ daꞈ la tuˬ jehˬ piˇ gaˇ ve yoˬ. A yeˇ uiˍ jaˇ ve lehˬ ngaˬ hui hpawnˬ daꞈ ve chi htaꞈ maˇ kʼai gʼa tuˬ teˇ ceuˬ kaꞈ taˇ tawˍ laˇ tcuh.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Yaˬhoˉvaˬ ve chaw Yeˍsuˆ suh ve htaꞈ hkʼa dehꞈ dawˇ nyi tuˬ coˇ caˇ jaˇ ve 3 hkʼaˇ htaꞈ teˇ geh henˇ tuˬ yoˬ. (1) Yawˇ hui Yeˍsuˆ te ve hkʼa shuˍ te ve, (2) Yawˇ hui awˬ nu ve chaw Yeˍsuˆ suh ve dawˇ nawˇ tuˬ hpawnˬ daꞈ ve laˬ tuˬ jehˬ piˇ ve, leh (3) yawˇ hui tawˍ ve tsuhˇ ve gʼa hpuˇ ve htawˇ, Yeˍsuˆ suh ve dawˇ nawˇ tuˬ hpawnˬ daꞈ˗e ve yoˬ.

4. Yeˍsuˆ suh ve dawˇ nawˇ tuˬ hpawnˬ daꞈ htaˇ ngaˬ hui ve na hkawˇ aˬ htoꞈ ma htaꞈ hkʼawꞈ laˇ gʼa ve le? Leh awˬ tehˬ ve chi teˇ hpaˍ htaꞈ aˬ htoꞈ ma te ngaˬ hui a yeˇ yuˬ cawˇ ve le? (Luˉkaꞈ 22:19, 20)

⁴ Teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ htaˇ, hkʼawꞈ laˇ hkawˇ laiˉ lawn bon maˍ hkawˇ hkʼaw gʼa kaˇ ve yoˬ. Tawˇ pa haˉ te kʼo, aˬ htoꞈ ma te chaw yaˇ htaiˍ hkʼawꞈ laˇ tuˬ htaꞈ loˍ ve le, leh chaw teˇ gʼaˇ chaw maˇ maˇ awˬ pon hkʼaˬ hkʼe te htaiˍ hkʼawꞈ laˇ gʼa tuˬ le, teˇ geh gʼa henˇ tuˬ yoˬ. Yeˍsuˆ suh ve dawˇ nawˇ tuˬ hpawnˬ daꞈ ve  te htaˇ hkonˍ monˇ leh a pehˉ meuˇ gʼuiˬ tcuhˉ kuiˬ hkʼaˬ hkʼe kʼoˆ gaˇ ve leh a shu caˇ cawˇ ve le, chi ve kaꞈ ngaˬ hui teˇ geh henˇ tuˬ yoˬ. (Luˉkaꞈ 22:19, 20 gʼaw sheˍ.) Leh awˬ gʼuˇ suhˍ hpawˇ miˬ guiˬ awˬ suhˉ hkʼaw dawˇ law kuiˬ cawˬ ve chaw teˇ gʼaˇ le le awˬ pon, ngaˬ hui daꞈ ve awˬ ceuˬ maˇ maˇ htaꞈ dawˇ nyi tuˬ awˬ yanˇ cawˬ ve yoˬ. (Iˉsaˍyaˆ 35:5, 6; 65:17, 21-23) Awˬ tehˬ ve chi teˇ hpaˍ htaꞈ ngaˬ hui a yeˇ yuˬ cawˇ ve yoˬ. Awˬ lawn kʼo, miˬ guiˬ chi hkʼoˆ lo laiˉ hinˉ lanˬ gʼaˇ awˬ lawn chi hkʼe ve htaꞈ maˇ na gʼa leh Yeˍsuˆ htaiˍ hkʼawꞈ laˇ ve awˬ hpfuhˇ yawˇ hui awˬ pon awˬ bon hkʼaˬ hkʼe taw cawˬ ve htaꞈ kaꞈ maˇ shiˍ ve yoˬ. Chi hkʼoˆ kaꞈ, Yeˍsuˆ te maˍ taˉ piˇ ve hkʼa shuˍ Yeˍsuˆ suh ve dawˇ nawˇ tuˬ hpawnˬ daꞈ ve htaꞈ kaꞈ yawˇ hui maˇ te ve yoˬ. Aˬ htoꞈ ma pa taw le?

5. Tcuh yaˇ hui suh peuˬ hkʼawꞈ nawˉ Yeˍsuˆ te maˍ taˉ piˇ ve hkʼa shuˍ awˬ laꞈ gʼawˇ hui te˗aw laˇ? Tawˇ pa haˉ kʼoˆ maˍ laˇ sheˍ.

⁵ Tcuh yaˇ hui suh peuˬ hkʼawꞈ nawˉ maˇ maw, Hkriꞈ yaˇ awˬ moˍ hkʼaw maˇ heˆ heˆ ve maˍ paˍ tanˬ cawˬ la ve yoˬ. (Maꞈhtehˍ 13:24-27, 37-39) Yawˇ hui lehˬ “awˬ laꞈ gʼawˇ teˇ hpaˍ htaꞈ yawˇ hui awˬ hkʼaˇ suh kʼai tuˬ ve awˬ pon beˬ yuˬ tuˬ hteˇ ve tawˇ hkawˇ htaꞈ yawˇ hui hpfuhˆ piˇ tuˬ yoˬ.” (Tcuh yaˇ 20:29, 30) Yawˇ hui hteˇ ve tawˇ hkawˇ htaꞈ “hpfuhˆ” ve teˇ ceuˬ lehˬ, Liꞈ hpu hkʼaw kʼoˆ taˍ ve hkʼe chaw maˇ maˇ ve venˇ baˆ htaꞈ htaiˍ hkʼawꞈ laˇ tuˬ Yeˍsuˆ ve a shaꞈ teˇ pawˆ ceh tiˉ tanˇ laˇ ve maˇ heˆ tehꞈ yawˇ hui kʼoˆ ve yoˬ. Yaꞈ hkʼaˇ, yawˇ hui kʼoˆ sheˍ ve, Yeˍsuˆ ve a shaꞈ tanˇ laˇ peuˬ kaꞈ gʼa tanˇ laˇ sheˍ ve yoˬ. (Heˍbrehˇ 9:27, 28) Chi beuꞈ teˇ co˗e laiˉ gʼaˇ chi hkʼe yonˍ leh awˬ liˇ awˬ hkʼaˇ chi hkʼe b bon yehˬ lo hkʼaˬ htaˆ kaꞈ te ve yoˬ. Chaw teˇ hpaˍ kʼo, awˬ liˇ awˬ hkʼaˇ chi ve htaꞈ teˇ nyi le le kaꞈ te ve yoˬ. Maˇ heˆ heˆ ve bon liˇ teˇ moˍ moˍ kʼo, Yeˍsuˆ suh ve dawˇ nawˇ tuˬ hpawnˬ daꞈ ve teˇ hkui teˇ hkui maˇ te. Yaꞈ hkʼaˇ, yawˇ hui lehˬ Yeˍsuˆ htaiˍ hkʼawꞈ laˇ ve awˬ hpfuhˇ tcuhˉ kuiˬ aˬ htoꞈ ma htaꞈ kʼoˆ gaˇ ve yawˇ hui maˇ na gʼa ve yoˬ. Leh chaw teˇ hpaˍ htawˇ dawˇ nawˬ dawˇ cawˬ ve, ‘Yeˍsuˆ ngaˬ awˬ pon awˬ tehˬ awˬ na venˇ baˆ htaꞈ htaiˍ hkʼawꞈ laˇ ve laˇ?’ Aˬ htoꞈ ma te yawˇ hui htawˇ dawˇ nawˬ dawˇ chi hkʼe cawˬ ve le? Yeˍsuˆ htaiˍ hkʼawꞈ laˇ ve awˬ hpfuhˇ venˇ baˆ htaꞈ ponˬ laˇ maˇ gʼa taˬ tehꞈ chaw teˇ hpaˍ kʼoˆ ve hkawˇ yawˇ hui na ve yoˬ. Yaꞈ hkʼaˇ, Yeˍsuˆ ve awˬ laꞈ gʼawˇ hkʼaˬ hkʼe te ve le?

6. 1872 hkʼawꞈ gaˬ htaˇ, Liꞈ hpu henˇ yaˇ awˬ moˍ ehˉ aˬ htoꞈ ma htaꞈ na gʼa la ve le?

⁶ Aˬ laˬ hkʼe 1870 hkʼawꞈ htaˇ Liꞈ hpu henˇ yaˇ awˬ moˍ ehˉ hkʼaw sheh kʼai paˍ ChanˍHtehˍ Raˆsenˍ Liꞈ hpu htaꞈ hkʼa dehꞈ hpfuhˆ nyi ve yoˬ. Awˬ lawn kʼo, Yeˍsuˆ htaiˍ hkʼawꞈ laˇ ve tcuhˉ kuiˬ hkʼaˬ hkʼe kʼoˆ gaˇ ve htaꞈ yawˇ hkʼa dehꞈ shiˍ gaˇ leh yawˇ hui Yeˍsuˆ suh ve dawˇ nawˇ tuˬ hpawnˬ daꞈ ve hkʼaˬ hkʼe gʼa te cawˇ ve htaꞈ kaꞈ shiˍ gaˇ ve yoˬ. 1872 hkʼawꞈ gaˬ htaˇ, Yeˍsuˆ ve a shaꞈ chaw yaˇ teˇ gʼaˇ le le awˬ pon htaiˍ hkʼawꞈ laˇ ve tehꞈ yawˇ hui hkʼa dehꞈ na gʼa la ve yoˬ. Yawˇ hui chi hkʼe na gʼa htaˇ, yawˇ hui awˬ nu ve chaw htaꞈ hto maˍ piˇ tuˬ, liꞈ kʼoˆ te tawˆ ve, awˬ lawn sha tanˇ liꞈ leh liꞈ kʼoˆ ehˉ hkʼaw kaꞈ keu ve yoˬ. Peuˬ hkʼawꞈ nawˉ yawˇ hui awˉ lawˉ peuˇ ve Hkriꞈ yaˇ te jaw ve hkʼe te ve lehˬ, Yeˍsuˆ suh ve dawˇ nawˇ tuˬ hpawnˬ daꞈ ve teˇ hkʼawꞈ teˇ pawˆ ceh tiˉ te ve yoˬ.

7. Liꞈ hpu henˇ yaˇ awˬ moˍ ehˉ hpfuhˆ nyi ve htaꞈ ngaˬ hui awˬ bon hkʼaˬ hkʼe gʼa ve le?

⁷ Awˬ viˉ awˬ nyi chi teˇ hpaˍ hkʼa dehꞈ hpfuhˆ nyi ve htaꞈ chi beuꞈ teˇ co˗e ngaˬ hui awˬ pon awˬ bon hkʼaˬ hkʼe gʼa ve le? Yeˍsuˆ ve a shaꞈ tanˇ laˇ ve htaꞈ caˉ daꞈ ve awˬ tehˬ ve awˬ lawn htaꞈ ngaˬ hui gʼa shiˍ leh Yeˍsuˆ htaiˍ hkʼawꞈ laˇ ve chaw yaˇ teˇ gʼaˇ le le awˬ pon awˬ bon hkʼaˬ hkʼe cawˬ ve htaꞈ kaꞈ gʼa shiˍ ve yoˬ. (1 Yoˇhanˬ 2:1, 2) Gʼuiˬ sha ve hkawˇ na yuˬ ve chaw awˬ pon Liꞈ hpu hkʼaw dawˇ law kuiˬ 2 ceuˬ kʼoˆ taˍ ve htaꞈ ngaˬ hui gʼa shiˍ ve yoˬ. Awˉ lawˉ teˇ moˍ lehˬ mvuhˇ naw ma hkʼoˆ lo co co taiˍ taiˍ ve a shaꞈ gʼa leh laiˉ lanˬ gʼaˇ miˬ guiˬ chi hkʼoˆ lo co co taiˍ taiˍ ve a shaꞈ gʼa tuˬ yoˬ. Yaˬhoˉvaˬ ngaˬ hui htaꞈ hkʼaˬ hkʼe taw haꞈ ve ngaˬ hui shiˍ htaˇ, yawˇ geh gʼaˇ hteꞈ kʼawꞈ meuˆ daꞈ maˇ la leh ngaˬ hui teˇ gʼaˇ leh teˇ gʼaˇ Yeˍsuˆ htaiˍ hkʼawꞈ laˇ ve htaꞈ awˬ bon hkʼaˬ hkʼe gʼa ve kaꞈ gʼa shiˍ ve yoˬ. (1 Peˍtruˆ 3:18;  1 Yoˇhanˬ 4:9) Chi htaꞈ pa taw, oˇ htaˇ teˇ co˗e awˬ viˉ awˬ nyi te ve hkʼe ngaˬ hui te tuˬ yoˬ. Yeˍsuˆ suh ve dawˇ nawˇ tuˬ yawˇ te maˍ taˉ laˇ ve hkʼe, awˬ nu ve chaw laˬ gʼa tuˬ ngaˬ hui jehˬ piˇ tuˬ yoˬ.

8. Awˬ nu ve chaw Yeˍsuˆ suh ve dawˇ nawˇ tuˬ hpawnˬ daꞈ ve laˬ tuˬ jehˬ piˇ ve Yaˬhoˉvaˬ ve chaw hkʼaˬ hkʼe te ve le? (Awˬ han htaꞈ nyi sheˍ.)

⁸ Awˬ nu ve chaw Yeˍsuˆ suh ve dawˇ nawˇ tuˬ hpawnˬ daꞈ ve laˬ tuˬ jehˬ piˇ ve, Yaˬhoˉvaˬ ve Shaˉhkiˆhkanˍ ve chaw te ve maw jaˇ˗oˬ. 1881 hkʼawꞈ awˬ yanˇ htaˇ, Aˍmeˬreˆkaꞈ mvuhˇ miˬ Hpenˬsinˬveˬni˗aˬ lo Eh˗ri˗ki˗ne venˇ hkʼaw awˬ viˉ awˬ nyi ve aˉ hkʼaw lo Yeˍsuˆ suh ve dawˇ nawˇ tuˬ hpawnˬ daꞈ ve te ve yoˬ. Peuˬ hkʼawꞈ nawˉ Hkriꞈ yaˇ awˬ moˍ teˇ kaˬ leh teˇ kaˬ kaꞈ Yeˍsuˆ suh ve dawˇ nawˇ tuˬ hpawnˬ daꞈ ve te ve yoˬ. Ha pa 3 maˬ 1940 hkʼawꞈ htaˇ, hto toˇ ve chaw teˇ gʼaˇ le le htaꞈ beˆ maˍ piˇ ve, hto toˇ kuiˬ lo nyi ma pfuhˇ ve chaw Yeˍsuˆ suh ve dawˇ nawˇ tuˬ hpawnˬ daꞈ la tuˬ jehˬ piˇ tehꞈ kʼoˆ piˇ ve yoˬ. 1960 hkʼawꞈ Yeˍsuˆ suh ve dawˇ nawˇ tuˬ hpawnˬ daꞈ la tuˬ jehˬ piˇ ve liꞈ Beˍteˍlaˆ hkʼaw yanˍ tawˆ ve awˉ lawˉ teˇ pawˆ hpehꞈ ve yoˬ. Oˇ htaˇ tanˬ leh awˬ nu ve chaw Yeˍsuˆ suh ve dawˇ nawˇ tuˬ hpawnˬ daꞈ ve laˬ tuˬ jehˬ piˇ ve liꞈ laiˉ hinˉ lanˬ kʼoˆ yawˍ tawˆ ve yoˬ. Awˬ nu ve chaw Yeˍsuˆ suh ve dawˇ nawˇ tuˬ hpawnˬ daꞈ ve laˬ tuˬ jehˬ piˇ tuˬ aˬ htoꞈ ma te ngaˬ hui chi hkʼe taw taw coˇ caˇ ve le?

9-10. Awˬ nu ve chaw Yeˍsuˆ suh ve dawˇ nawˇ tuˬ hpawnˬ daꞈ la tuˬ ngaˬ hui jehˬ piˇ ve a shu awˬ pon awˬ bon gʼa ve le? (Yoˇhanˬ 3:16)

⁹ Awˬ nu ve chaw Yeˍsuˆ suh ve dawˇ nawˇ tuˬ hpawnˬ daꞈ la tuˬ ngaˬ hui jehˬ piˇ ve teˇ hkʼaˇ lehˬ, Yaˬhoˉvaˬ leh Yeˍsuˆ chaw yaˇ awˬ pon aˬ htoꞈ ma te laˇ ve, awˉ lawˉ teˇ pawˆ hpawnˬ daꞈ la ve chaw htaꞈ shiˍ tcuh gaˇ ve yoˬ. (Yoˇhanˬ 3:16 gʼaw sheˍ.) Hpawnˬ daꞈ kuiˬ hkʼaw yawˇ hui awˬ lawn chi ve gʼa kaˇ htaˇ, yawˇ hui chi aꞈ kehˉ kʼawꞈ shiˍ gaˇ tuˬ leh Yaˬhoˉvaˬ ve kanˉ te ve chaw te gaˇ tuˬ te piˇ ve tehꞈ  ngaˬ hui dawˇ law taˍ ve yoˬ. Chi hkʼoˆ kaꞈ, awˬ nu ve chaw kaꞈ awˬ bon gʼa sheˍ ve yoˬ.

¹⁰ Yaˬhoˉvaˬ yawˇ hui htaꞈ haꞈ chehˇ sheˍ ve tehꞈ shiˍ tuˬ, Gʼuiˬ sha ve kanˉ maˇ te˗o ve chaw kaꞈ Yeˍsuˆ suh ve dawˇ nawˇ tuˬ hpawnˬ daꞈ la tuˬ ngaˬ hui jehˬ piˇ sheˍ ve yoˬ. Ngaˬ hui jehˬ piˇ ve chaw laiˉ gʼaˇ hpawnˬ daꞈ kuiˬ hkʼaw laˬ ve htaꞈ ngaˬ hui gʼa mawˬ htaˇ ha lehˬ jaˇ. Yeˍsuˆ suh ve dawˇ nawˇ tuˬ hpawnˬ daꞈ ve lehˬ, yawˇ hui ha lehˬ ha kʼa ve hkʼaw Yaˬhoˉvaˬ ve kanˉ te jaw ve htaꞈ dawˇ nawˇ tuˬ te piˇ ve yoˬ. Mo˗ne˗kaˇ c ve awˬ lawn htaꞈ teˇ geh nyi sheˍ. A naˍ 19 ve awˬ yanˇ htaˇ lehˬ Mo˗ne˗kaˇ hto toˇ ve chaw teˇ pawˆ kʼawꞈ te ve yoˬ. 2021 hkʼawꞈ Yeˍsuˆ suh ve dawˇ nawˇ tuˬ hpawnˬ daꞈ ve yawˇ laˬ peuˬ hkʼawꞈ nawˉ kʼoˆ ve, “Yeˍsuˆ suh ve dawˇ nawˇ tuˬ hpawnˬ daꞈ ve chi teˇ pawˆ daꞈ jaˇ. Awˬ lawn kʼo, 20 hkʼawꞈ ve awˬ yanˇ hkʼaw ngaˬ awˬ nu ve chaw htaꞈ hto maˍ piˇ ve awˉ lawˉ teˇ pawˆ hpehꞈ leh yawˇ hui Yeˍsuˆ suh ve dawˇ nawˇ tuˬ hpawnˬ daꞈ la tuˬ kaꞈ jehˬ piˇ ve yoˬ. Yaˬhoˉvaˬ leh Yeˍsuˆ ngaˬ awˬ pon te laˇ ve awˬ ceuˬ htaꞈ awˬ hpfuhˇ shiˍ ve pa taw, Yeˍsuˆ suh ve dawˇ nawˇ tuˬ hpawnˬ daꞈ ve chi teˇ pawˆ awˬ nu ve chaw htaꞈ jehˬ piˇ tuˬ ngaˬ te gʼa ve hkʼe te ve yoˬ.” (Chiˇ mvuh ve 103:1-4) Yawˇ hui nyi ma pfuhˇ ve maˇ pfuhˇ ve htawˇ yawˇ hui Yeˍsuˆ suh ve dawˇ nawˇ tuˬ hpawnˬ daꞈ la tuˬ ngaˬ hui coˇ caˇ leh jehˬ piˇ sheˍ ve yoˬ. Awˬ lawn kʼo, ngaˬ hui chi hkʼe te ve htaꞈ Yaˬhoˉvaˬ awˬ hpfuhˇ shiˍ ve yoˬ.

11. Awˬ nu ve chaw Yeˍsuˆ suh ve dawˇ nawˇ tuˬ hpawnˬ daꞈ la tuˬ ngaˬ hui jehˬ piˇ htaˇ, Yaˬhoˉvaˬ awˬ bon hkʼaˬ hkʼe naꞈ laˇ tuˬ le? (Haˆgehˇ 2:7)

¹¹ Awˬ nu ve chaw Yeˍsuˆ suh ve dawˇ nawˇ tuˬ hpawnˬ daꞈ la tuˬ ngaˬ hui jehˬ piˇ htaˇ, Yaˬhoˉvaˬ ngaˬ hui htaꞈ awˬ bon naꞈ la tuˬ yoˬ. 2021 hkʼawꞈ htaˇ, a naˍ 19 htaꞈ caˉ daꞈ ve awˬ liˇ teh henhˇ jaˇ ve htawˇ, Yeˍsuˆ suh ve dawˇ nawˇ tuˬ hpawnˬ daꞈ la ve chaw 21,367,603 gʼaˇ cawˬ ve yoˬ. Chi ve lehˬ miˬ guiˬ hkʼoˆ lo Shaˉhkiˉhkanˍ ve chaw aꞈ kehˉ 2 pun maˇ ve yoˬ. Yaˬhoˉvaˬ lehˬ chaw chi hkʼe ma ma laˬ maˇ ve htaꞈ a yeˇ yuˬ ve ceh maˇ heˆ. Yaꞈ hkʼaˇ, yawˇ lehˬ teˇ gʼaˇ leh teˇ gʼaˇ htaꞈ kaꞈ a yeˇ yuˬ laˇ ve yoˬ. (Luˉkaꞈ 15:7; 1 Tiˆmoˉseˍ 2:3, 4) Ngaˬ hui nyi ma nuˇ nehˬ ve chaw htaꞈ mawˬ tuˬ Yaˬhoˉvaˬ ga laˇ tuˬ yoˬ tehꞈ yonˍ gʼa ve yoˬ.—Haˆgehˇ 2:7 gʼaw sheˍ.

12. Ngaˬ hui Yeˍsuˆ suh ve dawˇ nawˇ tuˬ hpawnˬ daꞈ˗e ve maˇ gʼa kʼai tuˬ aˬ htoꞈ ma te laˇ ve le?

¹² Yeˍsuˆ awˬ gʼuˇ suhˍ htaˇ kaꞈ kʼoˆ laˇ taˍ ve, awˬ leh meuˇ ve awˬ yanˇ hkʼaw ngaˬ hui shoꞈ shaꞈ ve leh tuꞈ ve hkanˍ ve laiˉ ceuˬ gʼa hpuˇ tuˬ yoˬ. Tawˇ pa haˉ te kʼo, yehˬ kʼa hkʼaw ve chaw tawˍ laˇ ve, fawˉ mehˍ laˇ ve, maꞈ te daꞈ ve, naˬ beuˬ a naˍ, leh awˬ nu ve awˬ ceuˬ kaꞈ cawˬ ve yoˬ. (Maꞈhtehˍ 10:36; Maˍkuˆ 13:9; Luˉkaꞈ 21:10, 11) Teˇ pawˆ pawˆ kʼo, awˬ ceuˬ chi ve teˇ hpaˍ kaꞈ ngaˬ hui Yeˍsuˆ suh ve dawˇ nawˇ tuˬ hpawnˬ daꞈ˗e ve maˇ gʼa kʼai tuˬ te laˇ ve yoˬ. Leh awˬ viˉ awˬ nyi kaꞈ awˬ ceuˬ chi teˇ hpaˍ htaꞈ tawˍ daꞈ gʼaˇ tuˬ hkʼaˬ hkʼe te ve le? Leh Yaˬhoˉvaˬ yawˇ hui htaꞈ hkʼaˬ hkʼe ga piˇ ve le?

13. A˗ce htawnˍ hkʼaw lo chehˇ ve htawˇ, Yeˍsuˆ suh ve dawˇ nawˇ tuˬ hpawnˬ daꞈ ve haꞈ hanˉ leh te ve htaꞈ Yaˬhoˉvaˬ awˬ bon hkʼaˬ hkʼe naꞈ piˇ ve le?

¹³ Htawnˍ hkʼaw lo chehˇ ve. Awˬ viˉ awˬ nyi yonˍ ve htaꞈ pa taw htawnˍ hkʼaw lo gʼa chehˇ ve htawˇ, Yeˍsuˆ suh ve dawˇ nawˇ tuˬ hpawnˬ daꞈ ve yawˇ hui te gʼa ve hkʼe te ve yoˬ. A˗ce ve awˬ lawn htaꞈ teˇ geh nyi sheˍ. Htawnˍ hkʼaw lo yawˇ chehˇ ve bawehˇ lehˬ maˇ uiˍ leh oˇ kaˬ lo htawnˍ yaˇ 3-4 gʼaˇ chehˇ ve yoˬ. 2021 hkʼawꞈ Yeˍsuˆ suh ve dawˇ nawˇ tuˬ hpawnˬ daꞈ ve awˬ yanˇ htaˇ, A˗ce htawnˍ hkʼaw lo chehˇ ve htawˇ, yawˇ a pehˉ meuˇ gʼuiˬ leh hkaoˍ monˇ cawˬ ve yoˬ. A˗ce Yeˍsuˆ suh ve dawˇ nawˇ tuˬ hpawnˬ daꞈ ve te htaˇ, yawˇ hkʼaˇ yawˇ bon maˍ tuˬ dawˇ teh taˍ ve yoˬ. Yaꞈ hkʼaˇ, yawˇ teˇ geh chehˇ ve htawnˍ yaˇ shuˉ dawˬ leh maˇ daꞈ ve tawˇ kaꞈ yaw ve yoˬ. Hkʼe kʼo A˗ce hkʼaˬ hkʼe te tuˬ le? Yawˇ lehˬ htawnˍ yaˇ oˇ ve teˇ hpaˍ teˇ naˍ liˍ ve hkʼaw maˇ daꞈ ve tawˇ maˇ yaw leh shuˉ kaꞈ maˇ dawˬ tuˬ lawˬ piˇ ve yoˬ. A˗ce lawˬ piˇ ve hkʼe htawnˍ yaˇ oˇ ve teˇ hpaˍ gʼaꞈ te laˇ  ve htaꞈ yawˇ ha lehˬ jaˇ ve awˬ hkʼoˆ kaꞈ anˇ jaˇ ve yoˬ. A˗ce kʼoˆ ve, “Yeˍsuˆ suh ve dawˇ nawˇ tuˬ hpawnˬ daꞈ ve awˬ lawn ngaˬ yawˇ hui htaꞈ kʼoˆ maˍ laˇ˗a tehꞈ kʼoˆ piˇ ve yoˬ.” Htawnˍ yaˇ oˇ ve teˇ hpaˍ maˇ dawˇ cawˇ tehꞈ kʼoˆ laˇ ve htawˇ, A˗ce Yeˍsuˆ suh ve dawˇ nawˇ tuˬ hpawnˬ daꞈ ve te leh A˗ce bon maˍ ve htaꞈ yawˇ hui gʼa kaˇ peuˬ hkʼawꞈ nawˉ, awˬ lawn chi htaꞈ caˉ daꞈ ve yawˇ hui kʼawꞈ na laˇ ve yoˬ.

14. A naˍ 19 ve awˬ yanˇ htaˇ, Yeˍsuˆ suh ve dawˇ nawˇ tuˬ hpawnˬ daꞈ ve awˬ viˉ awˬ nyi coˇ caˇ leh aˬ htoꞈ ma te ve le?

¹⁴ A naˍ 19. A naˍ 19 ve awˬ yanˇ htaˇ, Yaˬhoˉvaˬ ve Shaˉhkiˆhkanˍ ve chaw lehˬ Yeˍsuˆ suh ve dawˇ nawˇ tuˬ hpawnˬ daꞈ ve teˇ geh te maˇ gʼa ve yoˬ. Yaꞈ hkʼaˇ, chi ve lehˬ yawˇ hui Yeˍsuˆ suh ve dawˇ nawˇ tuˬ hpawnˬ daꞈ ve maˇ te tuˬ maˇ te piˇ gʼa. d Hkriꞈ yaˇ awˬ moˍ teˇ kaˬ le le Yeˍsuˆ suh ve dawˇ nawˇ tuˬ hpawnˬ daꞈ ve awn˗laiˉ hkʼaw te ve yoˬ. Hkʼe kʼo, chaw laiˉ lanˬ gʼaˇ in˗teu˗neꞈ maˇ cawˬ ve hkʼaˬ hkʼe te gʼa tuˬ le? Mvuhˇ miˬ teˇ hpaˍ hpaˍ hkʼaw kʼo, Yeˍsuˆ suh ve dawˇ nawˇ tuˬ hpawnˬ daꞈ ve teˇ tuˬ awˬ han hkʼaw leh ri˗di˗oꞈ (viˆhtaˆyuˆ) hkʼaw tawˆ tcuh ve yoˬ. Chi hkʼoˆ kaꞈ, awˬ tcuhˆ puiˍ teˇ kaˬ kaˬ kʼo, Yeˍsuˆ suh ve dawˇ nawˇ tuˬ hpawnˬ daꞈ ve bon maˍ hkawˇ awˉ lawˉ htaˇ kaꞈ 500 chaw ceuˬ tawˇ hkawˇ ri˗di˗oꞈ hkʼaw hpaˆ keu taˍ leh vuiˇ jaˇ kuiˬ lo chehˇ ve awˬ viˉ awˬ nyi htaꞈ feu piˇ ve yoˬ.

15. Liꞈ hpu henˇ ve chaw Shon meh ve awˬ lawn nawˬ htaꞈ aˬ htoꞈ ma maˍ laˇ ve le?

 ¹⁵ Yehˬ kʼa hkʼaw ve chaw tawˍ piˇ ve. Chaw teˇ hpaˍ awˬ pon Yeˍsuˆ suh ve dawˇ nawˇ tuˬ hpawnˬ daꞈ ve maˇ gʼa kʼai ve lehˬ, yehˬ kʼa hkʼaw ve chaw tawˍ piˇ ve yoˬ. Liꞈ hpu henˇ ve chaw Shon meh ve awˬ lawn htaꞈ teˇ geh nyi sheˍ. 2021 hkʼawꞈ Yeˍsuˆ suh ve dawˇ nawˇ tuˬ hpawnˬ daꞈ ve maˇ gaˬ sheˍ gʼuˇ suhˍ teˇ nyi htaˇ, Shon Liꞈ hpu maˍ laˇ ve chaw htaꞈ kʼoˆ piˇ ve, yehˬ kʼa hkʼaw ve chaw tawˍ laˇ ve pa taw Yeˍsuˆ suh ve dawˇ nawˇ tuˬ hpawnˬ daꞈ ve maˇ gʼa kʼai. Liꞈ hpu maˍ ve chaw Luˉkaꞈ liꞈ 22:44 hkʼaw yawˇ htaꞈ gʼaw tcuh ve yoˬ. Yawˇ kʼoˆ ve ngaˬ hui tuꞈ ve hkanˍ ve gʼa hpuˇ htaˇ, ngaˬ hui bon lawˬ leh nyi ma awˬ tawˬ hkʼa gaˬ Yaˬhoˉvaˬ htaꞈ gʼaˇ va leh Yeˍsuˆ te maˍ laˇ ve hkʼe gʼaꞈ te cawˇ ve yoˬ. Peuˬ leh Shon Yeˍsuˆ suh ve dawˇ nawˇ tuˬ hpawnˬ daꞈ tuˬ awˬ pon a pehˉ meuˇ gʼuiˬ leh hkonˍ monˇ gu teh leh Vehˆsaiˉ jw.org hkʼaw teˇ nyi le le Liꞈ hpu chaˬ nyi tuˬ bon maˍ keu taˍ ve htaꞈ nyi ve yoˬ. Leh yawˇ ve bawehˇ hkʼaw teˇ gʼaˇ tiˉ chehˇ htaˇ, Yeˍsuˆ suh ve dawˇ nawˇ tuˬ bon maˍ hkawˇ yawˇ awˬ han hkʼaw nyi ve yoˬ. Peuˬ leh Shon yawˇ geh Liꞈ hpu maˍ laˇ ve chaw htaꞈ liꞈ bvuhꞈ leh kʼoˆ piˇ ve, “aˉ nyi htaˇ nawˬ ngaˬ htaꞈ awˬ gʼaˇ peꞈ laˇ jaˇ. Yeˍsuˆ suh ve dawˇ nawˇ tuˬ hpawnˬ daꞈ ve ngaˬ te gʼa ve hkʼe teˇ ceuˬ le le te leh Yaˬhoˉvaˬ kaꞈ ga laˇ jaˇ ve yoˬ. Ngaˬ Yaˬhoˉvaˬ htaꞈ awˬ bon uiˍ jaˇ ve yoˬ. Ngaˬ ha lehˬ jaˇ ve pa taw hkʼaˬ hkʼe kʼoˆ tuˬ naˍ kaꞈ maˇ shiˍ!” Nawˬ chi ve hkʼa shuˍ shuˍ gʼa hpuˇ ve kʼo, Yaˬhoˉvaˬ nawˬ htaꞈ ga laˇ gʼa ve tehꞈ dawˇ˗aw laˇ?

16. Yeˍsuˆ suh ve dawˇ nawˇ tuˬ hpawnˬ daꞈ ve ngaˬ hui kʼai htaˇ, Yaˬhoˉvaˬ ngaˬ hui htaꞈ awˬ bon naꞈ laˇ tuˬ yoˬ tehꞈ aˬ htoꞈ ma te yonˍ gʼa ve le? (Roˉmaꞈ 8:31, 32)

¹⁶ Yeˍsuˆ suh ve htaꞈ hkʼa dehꞈ dawˇ nyi tuˬ ngaˬ hui Yeˍsuˆ suh ve dawˇ nawˇ tuˬ hpawnˬ daꞈ˗e ve htaꞈ Yaˬhoˉvaˬ awˬ hpfuhˇ shiˍ ve yoˬ. Gʼuiˬ sha ngaˬ hui awˬ pon teˇ ceuˬ le le te laˇ ve htaꞈ ngaˬ hui awˬ hpfuhˇ shiˍ htaˇ, yawˇ awˬ bon naꞈ laˇ tuˬ yoˬ tehꞈ ngaˬ hui yonˍ gʼa ve yoˬ. (Roˉmaꞈ 8:31, 32 gʼaw sheˍ.) Chi htaꞈ pa taw, chi teˇ hkʼawꞈ Yeˍsuˆ suh ve dawˇ nawˇ tuˬ hpawnˬ daꞈ ve kʼai gʼa tuˬ, Yeˍsuˆ suh ve dawˇ nawˇ tuˬ hpawnˬ daꞈ ve awˬ yanˇ htaˇ, ngaˬ hui Yaˬhoˉvaˬ ve kanˉ maˇ maˇ te gʼa tuˬ dawˇ teh taˍ gʼa ve yoˬ.