1-2. Ngaˬ hui Baˆtiˆsaˬ haꞈ yuˬ peuˬ hkʼawꞈ nawˉ caˉ leh aˬ htoꞈ ma gʼa cawˬ cawˇ sheˍ ve le? Tawˇ pa haˉ kʼoˆ maˍ laˇ sheˍ.

 Nawˬ ve aˉ hkʼaw lo daꞈ kehˬ tuˬ teˇ hkui teˇ hkui te˗aw laˇ? Teˇ pawˆ pawˆ nawˬ yehˬ awˬ suhˉ hkʼaw ca chehˇ˗e te htaˇ, nawˬ daꞈ kehˬ tuˬ awˉ lawˉ gʼa te sheˍ ve yoˬ. Yaꞈ hkʼaˇ, peuˬ hkʼawꞈ nawˉ nawˬ daꞈ kehˬ tuˬ maˇ te˗o ve kʼo, jeꞈ meu˗e leh maˇ daꞈ ve awˬ ceuˬ aˉ hkʼaw lo leuˉ leh loꞈ la maˇ ve pa taw, chaꞈ chiˆ jaˇ tuˬ yoˬ. Nawˬ ve yehˬ chehˇ sha lawꞈ lawꞈ cawˬ tuˬ, nawˬ hkʼaˬ htaˆ kaꞈ daꞈ kehˬ tuˬ gʼa te ve yoˬ.

² Ngaˬ hui ve dawˇ hkʼaˇ leh te hkʼaˇ kaꞈ chi ve htaꞈ shuˍ ve yoˬ. Ngaˬ hui Baˆtiˆsaˬ maˇ haꞈ yuˬ sheˍ htaˇ, “ngaˬ hui ve awˬ to leh nyi ma htaꞈ chaꞈ chiˆ tuˬ te ve teˇ ceuˬ le le htaꞈ tsuhˇ baˬ” tuˬ gʼa coˇ caˇ jaˇ ve yoˬ. (2 Kawˇrenˍhtuˆ 7:1) Yaꞈ hkʼaˇ, ngaˬ hui Baˆtiˆsaˬ haꞈ yuˬ peuˬ hkʼawꞈ nawˉ Pawˇluꞈ beˆ maˍ laˇ ve htaꞈ ngaˬ hui gʼa gʼaꞈ te cawˇ ve yoˬ. Oˇ kaˬ lo kʼoˆ ve, “nawˬ hui ve nyi ma awˬ hkʼaw lo dawˇ hkʼaˇ awˬ suhˉ cawˬ la piˇ˗oˆ.” (Eˇfeˇsuꞈ 4:23) Chi aˬ htoꞈ ma te ngaˬ hui caˉ leh cawˬ cawˇ ve le? Awˬ lawn kʼo, miˬ guiˬ yaˇ ve dawˇ hkʼaˇ leh te hkʼaˇ chaꞈ chiˆ jaˇ ve pa taw, ngaˬ hui htaꞈ kaꞈ heuˆ la kuiˬ cawˬ jaˇ ve yoˬ. Ngaˬ hui chi hkʼe maˇ hpehꞈ leh hkʼaˬ htaˆ kaꞈ Yaˬhoˉvaˬ nyi hkʼaˇ suh ve chaw hpehꞈ tuˬ, dawˇ hkʼaˇ, te hkʼaˇ, leh loˍ ve awˬ ceuˬ htaꞈ teˇ hkui teˇ hkui chaˬ nyi cawˇ ve yoˬ.

3. “Nyi ma awˬ suhˉ kʼawꞈ pa” ve hkʼaˬ hkʼe kʼoˆ gaˇ ve le? (Roˉmaꞈ 12:2)

³ Ngaˬ hui ve nyi ma awˬ suhˉ kʼawꞈ pa tuˬ hkʼaˬ hkʼe gʼa te cawˇ ve le? (Roˉmaꞈ 12:2 gʼaw sheˍ.) Tawˇ pa haˉ chi htaꞈ teˇ geh nyi sheˍ. Yehˬ teˇ yehˬ hkʼa peu˗eˬ kʼawꞈ gu te ve leh yehˬ daꞈ tuˬ awˬ hkʼaˇ gu ve lehˬ maˇ shuˍ daꞈ ve yoˬ. Chi ve hkʼa shuˍ shuˍ daꞈ ve awˬ ceuˬ htaꞈ te ve lehˬ maˇ lawꞈ sheˍ. Yaꞈ hkʼaˇ, ngaˬ hui nyi ma awˬ suhˉ gʼa kʼawꞈ pa cawˇ ve yoˬ. Leh ngaˬ hui chi hkʼe te gʼa tuˬ, hkʼaˬ hkʼe ve chaw  hpehꞈ ve htaꞈ gʼa chaˬ nyi cawˇ ve yoˬ. Peuˬ leh ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ te gʼa ve hkʼe hkʼa dehꞈ gʼaꞈ te tuˬ, ngaˬ hui gʼa pa cawˇ ve yoˬ. Ngaˬ hui chi hkʼe ve caˉ leh gʼa te cawˇ ve yoˬ.

4. Ngaˬ hui miˬ guiˬ yaˇ ve awˬ liˇ awˬ hkʼaˇ htaꞈ maˇ henˇ yuˬ tuˬ hkʼaˬ hkʼe gʼa te cawˇ ve le?

⁴ Ngaˬ hui biˇ ve chaw hpehꞈ la htaˇ, ngaˬ hui te ve teˇ ceuˬ le le Yaˬhoˉvaˬ nyi hkʼaˇ suh ve te piˇ tuˬ yoˬ. Yaꞈ hkʼaˇ, awˬ yanˇ chi hkʼe ve maˇ gaˬ sheˍ htaˇ, Yaˬhoˉvaˬ nyi hkʼaˇ suh ve te piˇ tuˬ ngaˬ hui gʼa coˇ caˇ jaˇ ve yoˬ. Gʼuiˬ sha ngaˬ hui htaꞈ aˬ htoꞈ ma te tcuh gaˇ ve leh yawˇ nyi hkʼaˇ suh ve te piˇ gʼa tuˬ, ngaˬ hui nyi ma awˬ suhˉ gʼa kʼawꞈ pa cawˇ ve tehꞈ, Roˉmaꞈ liꞈ 12:2 hkʼaw tcuh yaˇ Pawˇluꞈ kʼoˆ ve tawˇ hkawˇ htaꞈ chaˬ nyi sheˍ. Chi htaꞈ pa taw, chi miˬ guiˬ yaˇ ve awˬ liˇ awˬ hkʼaˇ htaꞈ ngaˬ hui maˇ henˇ yuˬ tuˬ, ngaˬ hui dawˇ teh taˍ ve leh dawˇ cheˆ ve lehˬ Yaˬhoˉvaˬ hkʼe dawˇ ve, maˇ heˆ leh miˬ guiˬ yaˇ hkʼe dawˇ ve laˇ tehꞈ, a shu yawˇ awˬ to htaꞈ gʼa chaˬ nyi cawˇ ve yoˬ.

5. Yaˬhoˉvaˬ ve awˬ nyi htaꞈ caˉ daꞈ ve ngaˬ hui dawˇ ve awˬ ceuˬ htaꞈ hkʼaˬ hkʼe te shiˍ gʼa tuˬ le? (Awˬ han htaꞈ nyi sheˍ.)

⁵ Tawˇ pa haˉ teˇ maˬ htaꞈ teˇ geh nyi sheˍ. Yaˬhoˉvaˬ lehˬ ngaˬ hui htaꞈ ‘yawˇ ve awˬ nyi htaꞈ law taˍ leh dawˇ law chehˇ tcuh gaˇ ve yoˬ.ʼ (2 Peˍtruˆ 3:12) Chi htaꞈ pa taw, nawˬ a shu yawˇ awˬ to htaꞈ na nyi cawˇ ve, ‘awˬ leh meuˇ ve awˬ yanˇ gaˬ la paˇ neˇ jaˇ˗oˬ ve tehꞈ, ngaˬ ve a shaꞈ teꞈ hkʼaˇ hkʼaˬ hkʼe hpeuꞈ maw piˇ ve le? Ngaˬ ve a shaꞈ teꞈ kuiˬ hkʼaw Yaˬhoˉvaˬ ve kanˉ te ve a yeˇ uiˍ jaˇ tehꞈ shawˍ tuˬ, liꞈ henˇ ve, maˇ heˆ leh kanˉ te ve, ngaˬ dawˇ cheˆ ve htaꞈ caˉ daꞈ ve hkʼaˬ hkʼe hpeuꞈ maw piˇ ve le? Yaˬhoˉvaˬ lehˬ ngaˬ leh ngaˬ ve yehˬ kʼa htaꞈ nyi haꞈ shaˉ laˇ ve tehꞈ ngaˬ yonˍ˗aw laˇ? Maˇ heˆ leh ngaˬ ca caˇ gʼaꞈ caˇ ve hpawˇ ceh tiˉ dawˇ nyi chehˇ˗aw laˇ?ʼ Ngaˬ hui Yaˬhoˉvaˬ loˍ ve awˬ ceuˬ htaꞈ te ve kʼo, yawˇ nyi hkʼaˇ suh leh hkʼaˬ hkʼe taw ha lehˬ tuˬ ve htaꞈ dawˇ nyi sheˍ.—Maꞈhtehˍ 6:25-27, 33; Hpiˇliˇpiˆ 4:12, 13.

6. Ngaˬ hui caˉ leh aˬ htoꞈ ma gʼa te cawˇ ve le?

⁶ Ngaˬ hui ve dawˇ hkʼaˇ htaꞈ hkʼaˬ htaˆ kaꞈ gʼa  chaˬ nyi chehˇ cawˇ ve yoˬ. Aˬ htoꞈ ma gʼa pa cawˇ ve htaꞈ ngaˬ hui shiˍ htaˇ, laꞈ haˉ gʼa pa cawˇ ve yoˬ. Pawˇluꞈ Kawˇrenˍhtuˆ venˇ hkʼaw ve awˬ viˉ awˬ nyi htaꞈ kʼoˆ piˇ ve, “nawˬ hui yonˍ ve awˬ hkʼaw lo yeˬ chehˇ˗aw laˇ, maˇ yeˬ chehˇ laˇ, a shu yawˇ awˬ to htaꞈ hkʼa dehꞈ tehˆ nyi lawˇ nyi sheˍ.” (2 Kawˇrenˍhtuˆ 13:5) “Yonˍ ve awˬ hkʼaw lo yeˬ chehˇ” ve lehˬ, hpawnˬ daꞈ ve leh hto toˇ ve teˇ tcuhˉ teˇ yanˇ ceh kʼai ve maˇ heˆ. Yaꞈ hkʼaˇ, ngaˬ hui ve dawˇ hkʼaˇ, loˍ ve, leh te ve, awˬ nu ve awˬ ceuˬ htaꞈ kaꞈ caˉ daꞈ ve yoˬ. Chi htaꞈ pa taw, ‘ngaˬ hui ve nyi ma awˬ suhˉ caˉ leh pa gʼa tuˬʼ ngaˬ hui Liꞈ hpu gʼa gʼaw leh Yaˬhoˉvaˬ dawˇ ve hkʼe gʼa dawˇ ve yoˬ. Ngaˬ hui gʼa pa cawˇ ve aˬ htoꞈ ma cawˬ ve htaꞈ mawˬ htaˇ, Yaˬhoˉvaˬ nyi hkʼaˇ suh tuˬ ngaˬ hui gʼa te cawˇ ve yoˬ.—1 Kawˇrenˍhtuˆ 2:14-16.

7. Eˇfeˇsuꞈ liꞈ 4:31, 32 hkʼaw kʼoˆ taˍ ve hkʼe, ngaˬ hui aˬ htoꞈ ma gʼa te cawˇ sheˍ ve le? Leh aˬ htoꞈ ma te chi hkʼe te ve maˇ sha ve le?

⁷ Eˇfeˇsuꞈ liꞈ 4:31, 32 gʼaw sheˍ. Ngaˬ hui ve nyi ma awˬ suhˉ pa ve awˬ hkʼoˆ kaꞈ, ngaˬ hui ‘nyi ma awˬ suhˉ htaꞈ kaꞈ gʼa veuꞈ deh cawˇ ve yoˬ.ʼ (Eˇfeˇsuꞈ 4:24) Tawˇ pa haˉ te kʼo, kʼawꞈ te hkʼawꞈ gaˇ ve, beuꞈ ve, nyi ma zuhˆ ve, chi ve teˇ hpaˍ htaꞈ ngaˬ hui gʼa gʼaˇ tcuh ve yoˬ. Yaꞈ hkʼaˇ, chi hkʼe te tuˬ maˇ sha ve yoˬ. Aˬ htoꞈ ma pa taw le? Awˬ lawn kʼo, ngaˬ hui ve te hkʼaˇ dawˇ hkʼaˇ maˇ daꞈ ve teˇ hpaˍ cawˬ maw jaˇ˗oˬ ve yoˬ. Liꞈ hpu hkʼaw kʼoˆ ve, “chaw yaˇ teˇ hpaˍ lehˬ, yaˇ nehˬ ve awˬ yanˇ htaꞈ te leh yawˇ hui ve dawˇ hkʼaˇ teˇ hpaˍ chaꞈ chiˆ jaˇ ve” yoˬ. (Awˬ hkuiˉ puiˍ 8:21) Ngaˬ hui Baˆtiˆsaˬ haꞈ yuˬ˗oˬ ve htawˇ, ngaˬ hui ve te hkʼaˇ dawˇ hkʼaˇ maˇ daꞈ ve htaꞈ caˉ leh gʼa pa cawˇ ve yoˬ. Awˬ viˉ awˬ nyi teˇ gʼaˇ ve awˬ lawn htaꞈ teˇ geh nyi sheˍ.

8-9. Ngaˬ hui ve nyi ma awˬ suhˉ kʼawꞈ pa tuˬ caˉ leh gʼa coˇ caˇ cawˇ ve tehꞈ Saˍteˍhpanˍ ve awˬ lawn hkʼaˬ hkʼe maˍ laˇ ve le?

⁸ Awˬ viˉ awˬ nyi Saˍteˍhpanˍ lehˬ yawˇ ve nyi ma htaꞈ yuˬ tiˍ tuˬ haˍ ve yoˬ. Yawˇ kʼoˆ ve, “ngaˬ Baˆtiˆsaˬ haꞈ yuˬ˗oˬ ve htawˇ, ngaˬ ve nyi ma htaꞈ gʼa yuˬ tiˍ chehˇ sheˍ. Tawˇ pa haˉ te kʼo, teˇ nyi htaˇ ngaˬ teˇ yehˬ peuˬ teˇ yehˬ lo hto toˇ˗e htaˇ chaw hkʼawˇ ngaˬ ve kaˇ hkʼaw ri˗di˗o (Viˆhtaˆyuˆ) hkʼawˇ chehˇ ve htaꞈ gʼa mawˬ ve yoˬ. Leh ngaˬ yawˇ hkʼaˇ suh gʼaꞈ yuˬ kʼai ve yoˬ. Yawˇ htaꞈ gʼaꞈ mi˗e yoˬ te htaˇ, yawˇ ri˗di˗o baˬ taˉ leh gʼuiˇ hpaw˗e ve yoˬ. Ngaˬ ve ri˗di˗o hkʼaˬ hkʼe te yuˬ hkʼawꞈ gʼa ve, ngaˬ awˬ nu ve chaw htaꞈ kʼoˆ maˍ piˇ htaˇ, hto toˇ ve awˬ moˍ ehˉ hkʼaw nyi haꞈ shaˉ paˍ teˇ gʼaˇ ngaˬ htaꞈ na laˇ ve, ‘Saˍteˍhpanˍ˗oˬ, nawˬ yawˇ htaꞈ gʼa mi ve kʼo hkʼaˬ hkʼe te piˇ tuˬ le?ʼ Na hkawˇ chi ve ngaˬ nyi ma htaꞈ heuˆ jaˇ leh dawˇ sha gawˬ lehˍ ve chaw hpehꞈ tuˬ coˇ caˇ leh gʼa te cawˇ ve tehꞈ ngaˬ dawˇ nyi tuˬ te laˇ ve yoˬ.” b

⁹ Te hkʼaˇ dawˇ hkʼaˇ maˇ daꞈ ve ngaˬ hui pa gʼa˗oˬ ve tehꞈ dawˇ ve htawˇ, kʼawꞈ cawˬ la gʼa ve tehꞈ Saˍteˍhpanˍ ve awˬ lawn ngaˬ hui mawˬ tuˬ te laˇ ve yoˬ. Nawˬ chi hkʼe hpehꞈ ve kʼo, awˬ gʼaˇ taˇ nuˇ sheˍ. Nawˬ Gʼuiˬ sha ve kanˉ te ve maˇ daꞈ ve chaw hpehꞈ ve tehꞈ taˇ dawˇ cheˆ sheˍ. Tcuh yaˇ Pawˇluꞈ kaꞈ chi hkʼe kʼoˆ jaw ve, “ngaˬ daꞈ ve htaꞈ te gaˇ ve teˇ yanˇ, awˬ haiˬ teˇ ceuˬ ngaˬ geh chehˇ taˍ ve” yoˬ. (Roˉmaꞈ 7:21-23) Ngaˬ hui teˇ gʼaˇ le le maˇ biˇ ve chaw hpehꞈ ve pa taw, jeꞈ meu˗e leh maˇ daꞈ ve awˬ ceuˬ aˉ hkʼaw lo meuˆ loꞈ la ve hkʼe, ngaˬ hui ve te hkʼaˇ dawˇ hkʼaˇ maˇ daꞈ ve kʼawꞈ cawˬ la ve htaꞈ caˉ leh gʼa tawˍ daꞈ sheˍ ve yoˬ. Leh ngaˬ hui Gʼuiˬ sha mehˆ gʼuˇ suhˍ daꞈ ve chaw hpehꞈ tuˬ, maˇ daꞈ ve te hkʼaˇ dawˇ hkʼaˇ caˉ leh gʼa yuˬ baˬ cawˇ ve yoˬ. Chi ve ngaˬ hui hkʼaˬ hkʼe te gʼa tuˬ le?

10. Ngaˬ hui ve te hkʼaˇ dawˇ hkʼaˇ maˇ daꞈ ve htaꞈ tawˍ daꞈ tuˬ hkʼaˬ hkʼe gʼa te cawˇ ve le? (1 Yoˇhanˬ 5:14, 15)

¹⁰ Nawˬ ve te hkʼaˇ dawˇ hkʼaˇ maˇ daꞈ ve hkʼaˬ ve teˇ ceuˬ pa gaˇ ve bon lawˬ ve hkʼaw Yaˬhoˉvaˬ htaꞈ kʼoˆ piˇ sheˍ. Gʼuiˬ sha nawˬ ve bon lawˬ hkawˇ htaꞈ na leh ga laˇ tuˬ yoˬ tehꞈ yonˍ gʼa ve yoˬ. (1 Yoˇhanˬ 5:14, 15 gʼaw sheˍ.) Nawˬ ve te hkʼaˇ dawˇ hkʼaˇ maˇ daꞈ ve Yaˬhoˉvaˬ anˇ tuˬ te leh maˇ te mehˉ laˇ sheˍ ve htawˇ, nawˬ ve te hkʼaˇ dawˇ hkʼaˇ chi hkʼe ve htaꞈ gʼaˇ tuˬ, yawˇ nawˬ htaꞈ awˬ gʼaˇ peꞈ laˇ tuˬ yoˬ. (1 Peˍtruˆ  5:10) Chi hkʼoˆ kaꞈ, nawˬ bon lawˬ taˍ ve hkʼe gʼa gʼaꞈ te leh nawˬ ve te hkʼaˇ dawˇ hkʼaˇ maˇ daꞈ ve htaꞈ maˇ kʼawꞈ gʼa te. Tawˇ pa haˉ te kʼo, maˇ daꞈ ve awˬ han maˇ nyi ve, maˇ heˆ leh maˇ daꞈ ve te hkʼaˇ dawˇ hkʼaˇ nawˬ kʼawꞈ te la tuˬ ve liꞈ htaꞈ maˇ gʼaw. Leh maˇ daꞈ ve te hkʼaˇ dawˇ hkʼaˇ htaꞈ gʼaˇ tuˬ caˉ leh tawˍ daꞈ sheˍ.—Hpiˇliˇpiˆ 4:8; Kawˇlawˇsehˇ 3:2.

11. Ngaˬ hui caˉ leh nyi ma awˬ suhˉ kʼawꞈ pa tuˬ aˬ htoꞈ ma gʼa te cawˇ sheˍ ve le?

¹¹ Nawˬ ve maˇ daꞈ ve te hkʼaˇ dawˇ hkʼaˇ htaꞈ baˬ taˉ˗oˬ ve htawˇ, te hkʼaˇ dawˇ hkʼaˇ awˬ suhˉ kʼawꞈ cawˬ tuˬ a yeˇ uiˍ jaˇ ve yoˬ. Chi ve nawˬ hkʼaˬ hkʼe te gʼa tuˬ le? Yaˬhoˉvaˬ ve te hkʼaˇ dawˇ hkʼaˇ teˇ hpaˍ htaꞈ caˉ daꞈ ve nawˬ gʼa henˇ˗oˬ htaˇ, yawˇ htaꞈ coˇ caˇ leh henˇ yuˬ sheˍ. (Eˇfeˇsuꞈ 5:1, 2) Tawˇ pa haˉ te kʼo, Liꞈ hpu hkʼaw Yaˬhoˉvaˬ venˇ baˆ hpehˇ piˇ ve teˇ lawn htaꞈ nawˬ gʼa gʼaw htaˇ, a shu yawˇ awˬ to htaꞈ na nyi cawˇ ve, ‘ngaˬ shu htaꞈ venˇ baˆ chi hkʼe hpehˇ piˇ˗aw laˇ?’ Maˇ heˆ leh Liꞈ hpu hkʼaw Yaˬhoˉvaˬ haˍ ve gʼawˇ ve chaw htaꞈ ha kʼaˉ piˇ ve awˬ lawn htaꞈ caˉ daꞈ ve nawˬ gʼa gʼaw htaˇ, a shu yawˇ awˬ to htaꞈ na nyi cawˇ ve, ‘ngaˬ awˬ viˉ awˬ nyi haˍ ve gʼawˇ ve chaw htaꞈ ha kʼaˉ leh yawˇ htaꞈ aˬ htoꞈ ma ga piˇ gʼa ve le?’ Nawˬ caˉ leh nyi ma awˬ suhˉ pa leh te hkʼaˇ dawˇ hkʼaˇ pa tuˬ coˇ caˇ sheˍ. Nawˬ coˇ caˇ leh chi hkʼe te htaˇ yeunˇ hkanˍ sheˍ.

12. Liꞈ hpu lehˬ a shaꞈ teꞈ hkʼaˇ htaꞈ pa laˇ gʼa tuˬ kanˇ paˆ cawˬ ve tehꞈ Saˍteˍhpanˍ ve awˬ lawn hkʼaˬ hkʼe maˍ laˇ ve le?

¹² Chi awˬ gʼuˇ suhˍ htaˇ henˇ kʼai peuˬ ve Saˍteˍhpanˍ lehˬ yawˇ te hkʼaˇ dawˇ hkʼaˇ awˬ suhˉ awˬ meu˗eˇ awˬ meu˗eˇ kʼawꞈ cawˬ la gʼa ve yoˬ. Yawˇ kʼoˆ ve, “ngaˬ Baˆtiˆsaˬ haꞈ yuˬ peuˬ hkʼawꞈ nawˉ ngaˬ beuꞈ leh hehnˇ ve hpawˇ te tawˆ la tuˬ laiˉ ceuˬ gʼa hpuˇ ve yoˬ. Yaꞈ hkʼaˇ, ngaˬ nyi ma gawˬ lehˍ cawˬ tuˬ te leh ngaˬ htaꞈ nyi ma zuhˆ tuˬ te laˇ ve chaw awˬ paˇ lo maˇ chehˇ. Ngaˬ chi hkʼe te gʼa ve lehˬ, ngaˬ miˇ ma leh awˬ nu ve chaw ngaˬ htaꞈ chiˇ mvuh laˇ ve yoˬ. Ngaˬ chi hkʼe te gʼa tuˬ tehꞈ maˇ dawˇ nyi jaw! Yaꞈ hkʼaˇ, chi ve lehˬ ngaˬ hkʼaˇ ngaˬ te gʼa ve maˇ heˆ. Liꞈ hpu lehˬ ngaˬ ve a shaꞈ htaꞈ pa laˇ gʼa tuˬ kanˇ paˆ cawˬ ve tehꞈ ngaˬ yonˍ ve yoˬ.”

13. Ngaˬ hui cawˇ ve htaꞈ te gʼa tuˬ aˬ htoꞈ ma ga laˇ ve le? (Gaˍlaˍtiˆ 5:16)

¹³ Gaˍlaˍtiˆ liꞈ 5:16 gʼaw sheˍ. Ngaˬ hui cawˇ ve awˬ ceuˬ htaꞈ te gʼa tuˬ Yaˬhoˉvaˬ daꞈ kehˬ ve awˬ ha hpu ngaˬ hui htaꞈ peꞈ laˇ ve yoˬ. Ngaˬ hui Liꞈ hpu gʼaw htaˇ Gʼuiˬ sha geh daꞈ kehˬ ve awˬ ha hpu gʼa ve yoˬ. Ngaˬ hui hpawnˬ daꞈ˗e htaˇ kaꞈ daꞈ kehˬ ve awˬ ha hpu gʼa ve yoˬ. Ngaˬ hui hkʼa shuˍ cawˇ ve awˬ ceuˬ htaꞈ te ve awˬ viˉ awˬ nyi geh ngaˬ hui gʼa chehˇ ve yoˬ. Chi ngaˬ hui awˬ gʼaˇ cawˬ tuˬ te laˇ ve yoˬ. (Heˍbrehˇ 10:24, 25; 13:7) Chi hkʼoˆ kaꞈ, ngaˬ hui awˬ gʼaˇ nuˇ kuiˬ teˇ ceuˬ ceuˬ htaꞈ tawˍ daꞈ gʼaˇ tuˬ Yaˬhoˉvaˬ geh bon lawˬ htaˇ, ngaˬ hui awˬ gʼaˇ cawˬ leh tawˍ daꞈ gʼaˇ tuˬ yawˇ daꞈ kehˬ ve awˬ ha hpu ngaˬ hui htaꞈ peꞈ laˇ tuˬ yoˬ. Teˇ pawˆ pawˆ maˇ daꞈ ve awˬ ceuˬ htaꞈ te gaˇ tuˬ nyi ma cawˬ la ve htawˇ, Hkriꞈ yaˇ ve awˬ vuiˬ teˇ hpaˍ htaꞈ te ve lehˬ, maˇ daꞈ ve awˬ ceuˬ ngaˬ hui te gaˇ ve htaꞈ maˇ te tuˬ ga laˇ ve yoˬ. Gaˍlaˍtiˆ liꞈ 5:16 hkʼaw kʼoˆ ve, Gʼuiˬ sha ve awˬ ha hpu beˆ maˍ piˇ ve htaꞈ gʼaꞈ te ve chaw lehˬ, “awˬ suhˍ awˬ shaˍ a loˍ awˬ hkʼaˇ suh nawˬ hui maˇ kʼai taˬ.”

14. Ngaˬ hui cawˇ ve awˬ ceuˬ htaꞈ te tuˬ aˬ htoꞈ ma te caˉ leh gʼa coˇ caˇ cawˇ ve le?

¹⁴ Hkriꞈ yaˇ ve awˬ vuiˬ htaꞈ hkʼaˬ htaˆ kaꞈ te leh cawˇ ve awˬ ceuˬ htaꞈ caˉ leh te tuˬ a yeˇ uiˍ jaˇ ve awˬ vuiˬ hpehꞈ ve yoˬ. Aˬ htoꞈ ma pa taw le? Awˬ lawn kʼo, ngaˬ hui ve canˇ paˍ lehˬ maˇ jehˇ jaw. Canˇ paˍ lehˬ maˇ cawˇ ve awˬ ceuˬ htaꞈ te tuˬ lawˇ nyi laˇ ve yoˬ. Ngaˬ hui Baˆtiˆsaˬ haꞈ yuˬ˗oˬ ve htawˇ, teˇ pawˆ pawˆ kʼo ngaˬ hui maˇ te cawˇ ve tehꞈ shiˍ ve kaꞈ te gaˇ ve yoˬ. Tawˇ pa haˉ te kʼo, maꞈ teh˗oˍ te ve, tzuhꞈ yeꞈ caˆ ve, maˇ heˆ leh awˬ kʼu nyi ve awˬ han nyi ve yoˬ. (Eˇfeˇsuꞈ 5:3, 4) Awˬ viˉ awˬ nyi yaˇ nehˬ teˇ gʼaˇ kʼoˆ ve, “ngaˬ awˬ pon haˍ jaˇ ve awˬ ceuˬ lehˬ, hawˉ hkʼaˆ chawˇ hawˉ hkʼaˆ htaꞈ dawˇ cawˇ jaw ve yoˬ. Chi hkʼe ve dawˇ hkʼaˇ ngaˬ maˇ cawˬ˗oˬ tehꞈ dawˇ ve htawˇ, cawˬ chehˇ sheˍ ve yoˬ.” Teˇ pawˆ pawˆ kʼo maˇ daꞈ ve awˬ ceuˬ htaꞈ te gaˇ jaˇ. Nawˬ chi hkʼe hpehꞈ ve kʼo hkʼaˬ hkʼe te tuˬ le?

15. Maˇ daꞈ ve awˬ ceuˬ htaꞈ te gaˇ ve nyi ma “chaw yaˇ hui gʼa hpuˇ jaw ve” tehꞈ ngaˬ hui shiˍ htaˇ aˬ htoꞈ ma te awˬ gʼaˇ gʼa ve le? (Awˬ han htaꞈ nyi sheˍ.)

 ¹⁵ Maˇ daꞈ ve awˬ ceuˬ htaꞈ te gaˇ jaˇ ve nyi ma cawˬ htaˇ, nawˬ teˇ gʼaˇ ceh tiˉ chi hkʼe te gaˇ ve maˇ heˆ tehꞈ tawnˇ taˍ sheˍ. Liꞈ hpu hkʼaw kʼoˆ ve, “chaw yaˇ hui gʼa hpuˇ jaw ve beˬ ve lawˇ ve htaꞈ ceh tiˉ nawˬ hui gʼa hpuˇ ve yoˬ.” (1 Kawˇrenˍhtuˆ 10:13) Awˬ lawn chi ve hkʼa shuˍ Pawˇluꞈ Kawˇrenˍhtuˆ Hkriꞈ yaˇ hawˉ hkʼaˆ leh yaˇ miˇ htaꞈ kʼoˆ piˇ jaw ve yoˬ. Leh chaw teˇ hpaˍ haˉ chawˇ haˉ paˆ te ve, hawˉ hkʼaˆ chawˇ haˉ hkʼaˆ pehꞈ ve tzuhˆ te ve, leh tzuhˬ dawˬ bvuhˆ jaw ve yoˬ tehꞈ yawˇ kʼoˆ piˇ jaw ve yoˬ. (1 Kawˇrenˍhtuˆ 6:9-11) Yawˇ hui Baˆtiˆsaˬ haꞈ yuˬ peuˬ hkʼawꞈ nawˉ, yawˇ hui maˇ daꞈ ve awˬ ceuˬ htaꞈ maˇ te gaˇ˗oˬ ve tehꞈ nawˬ dawˇ ve laˇ? Maˇ heˆ. Yawˇ hui leuˆ yuˬ taˍ ve chaw hpehꞈ ve htawˇ, maˇ biˇ ve chaw hpehꞈ ve yoˬ. Teˇ pawˆ pawˆ kʼo yawˇ hui maˇ daꞈ ve awˬ ceuˬ htaꞈ te gaˇ ve nyi ma htaꞈ gʼa tawˍ daꞈ sheˍ ve yoˬ. Chi hkʼe shiˍ ve lehˬ ngaˬ hui htaꞈ awˬ gʼaˇ peꞈ laˇ jaˇ. Aˬ htoꞈ ma pa taw le? Maˇ daꞈ ve awˬ ceuˬ htaꞈ te gaˇ ve nyi ma nawˬ teˇ gʼaˇ ceh tiˉ gʼa tawˍ daꞈ ve maˇ heˆ tehꞈ hpeuꞈ maw laˇ ve yoˬ. “Miˬ guiˬ hkʼoˆ chehˇ ve nawˬ hui ve awˬ viˉ awˬ nyi teˇ hpaˍ htawˇ, chi hkʼa shuˍ shuˍ gʼa tuꞈ gʼa hkanˍ chehˇ ve htaꞈ nawˬ hui shiˍ ve yoˬ.”—1 Peˍtruˆ 5:9.

16. Kawˆ tuˬ cawˬ ve hkʼaˬ hkʼe ve dawˇ hkʼaˇ le? Leh aˬ htoꞈ ma pa taw le?

¹⁶ Nawˬ gʼa hpuˇ chehˇ ve shoꞈ shaꞈ ve awˬ lawn chaw teˇ gʼaˇ kaꞈ maˇ na gʼa laˇ ve tehꞈ dawˇ htaˇ kawˆ tuˬ cawˬ ve yoˬ. Chi hkʼe ve dawˇ hkʼaˇ lehˬ nawˬ awˬ gʼaˇ nuˇ kuiˬ leh dawˇ law kuiˬ maˇ cawˬ tuˬ kaꞈ te laˇ ve yoˬ. Leh maˇ daꞈ ve awˬ ceuˬ htaꞈ maˇ te tuˬ nawˬ awˬ gʼaˇ maˇ cawˬ ve tehꞈ dawˇ ve yoˬ hehˉ. Liꞈ hpu hkʼaw kʼoˆ ve, “Gʼuiˬ sha htawˇ, ka tiꞈ yeˬ leh, nawˬ hui hkanˍ maˇ gʼa ve beˬ ve lawˇ ve htaꞈ gʼa hpuˇ tuˬ, yawˇ a hkaw˗anˬ maˇ piˇ. Yaꞈ hkʼaˇ, beˬ ve lawˇ ve htaꞈ hpuˇ htaˇ, nawˬ hui hkanˍ hpehꞈ tuˬ, ponˬ ve yaꞈ kʼaw htaꞈ yawˇ gu taˍ tuˬ yoˬ.” (1 Kawˇrenˍhtuˆ 10:13) Chi htaꞈ pa taw, maˇ daꞈ ve awˬ ceuˬ htaꞈ te gaˇ jaˇ ve nyi ma cawˬ ve htawˇ, chi hkʼe ve htaꞈ nawˬ tawˍ daꞈ gʼaˇ ve yoˬ. Leh Yaˬhoˉvaˬ nawˬ htaꞈ ga laˇ tcuh ve kʼo nawˬ maˇ daꞈ ve awˬ ceuˬ htaꞈ maˇ te tuˬ yoˬ.

17. Maˇ daꞈ ve awˬ ceuˬ htaꞈ nawˬ te gaˇ jaˇ ve nyi ma cawˬ ve htawˇ, nawˬ aˬ htoꞈ ma te gʼa sheˍ ve le?

 ¹⁷ Ngaˬ hui teˇ gʼaˇ le le maˇ biˇ ve chaw hpehꞈ ve pa taw, maˇ daꞈ ve awˬ ceuˬ htaꞈ maˇ te gaˇ ve nyi ma maˇ cawˬ tuˬ haˍ jaˇ ve tehꞈ hkʼaˬ htaˆ kaꞈ tawnˇ taˍ sheˍ. Yaꞈ hkʼaˇ, maˇ daꞈ ve awˬ ceuˬ htaꞈ te gaˇ ve nyi ma hkʼaˬ hkʼe htaˇ cawˬ la ve kʼo, Yoˇsehꞈ te ve hkʼa shuˍ nawˬ tawˍ daꞈ gʼaˇ tuˬ yoˬ. Yawˇ Pawˇtiˆhpaˍ ve awˬ miˇ ma geh laꞈ haˉ hpaw˗e ve yoˬ. (Awˬ hkuiˉ puiˍ 39:12) Maˇ daꞈ ve awˬ ceuˬ nawˬ te gaˇ ve htaꞈ te tuˬ maˇ loˍ.

18-19. Ngaˬ hui ve te hkʼaˇ dawˇ hkʼaˇ awˬ suhˉ cawˬ tuˬ coˇ caˇ leh pa htaˇ, ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le?

¹⁸ Ngaˬ hui dawˇ ve leh te ve awˬ ceuˬ Yaˬhoˉvaˬ nyi hkʼaˇ suh ve te piˇ tuˬ, ngaˬ hui ve dawˇ hkʼaˇ awˬ suhˉ caˉ leh pa tuˬ gʼa coˇ caˇ cawˇ ve yoˬ. Leh chi hkʼe hpehꞈ tuˬ a shu yawˇ awˬ to htaꞈ hkʼaˬ htaˆ kaꞈ gʼa chaˬ nyi cawˇ ve yoˬ. Ngaˬ hui a shu yawˇ awˬ to htaꞈ na nyi cawˇ ve, ‘awˬ leh meuˇ ve awˬ yanˇ gaˬ la paˇ neˇ jaˇ˗oˬ ve tehꞈ ngaˬ ve yonˍ hkʼaˇ te tawˆ la ve awˬ ceuˬ hpeuꞈ maw piˇ˗aw laˇ? Ngaˬ ve te hkʼaˇ dawˇ hkʼaˇ caˉ leh awˬ suhˉ cawˬ tuˬ te˗aw laˇ? Ngaˬ Gʼuiˬ sha ve awˬ ha hpu beˆ maˍ laˇ ve awˬ hkʼaˇ suh gʼaꞈ te˗aw laˇ? Chi lehˬ ngaˬ “awˬ suhˍ awˬ shaˍ a loˍ awˬ hkʼaˇ suh” maˇ kʼai tuˬ ga laˇ ve yoˬ.’

¹⁹ Nawˬ a shu yawˇ awˬ to htaꞈ chaˬ nyi htaˇ, nawˬ hkʼaˬ hkʼe taw te gʼa˗oˬ ve htaꞈ a yeˇ yuˬ sheˍ. Nawˬ hkʼa biˇ biˇ te gʼa˗oˬ ve htaꞈ a yeˇ yuˬ ve maˇ heˆ. Hkʼaˬ kaˬ lo gʼa pa cawˇ ve htaꞈ shiˍ htaˇ awˬ gʼaˇ taˇ nuˇ sheˍ. Hpiˇliˇpiˆ liꞈ 3:16 hkʼaw kʼoˆ taˍ ve hkʼe gʼaꞈ te sheˍ. Oˇ kaˬ lo kʼoˆ ve, “ngaˬ hui hkʼa gʼaꞈ mi taˍ ve teˇ hpaˍ htaꞈ vawˆ taˍ leh hteˇ lehˍ kʼai˗a veuˬ.” Nawˬ chi hkʼe te ve kʼo, nawˬ ve te hkʼaˇ dawˇ hkʼaˇ awˬ suhˉ cawˬ tuˬ coˇ caˇ leh pa ve htaꞈ Yaˬhoˉvaˬ awˬ bon naꞈ laˇ tuˬ yoˬ tehꞈ yonˍ gʼa ve yoˬ.