Ha lehˬ ha kʼa hto toˇ ve chaw chi teˇ hpaˍ htaꞈ Yaˬhoˉvaˬ awˬ gʼaˇ peꞈ piˇ jaˇ. Oˇ ve teˇ hkʼawꞈ htaˇ Hkaw˗hpeu˗hteu (oˇ htaˇ ve gʼuˇ suhˍ peuˍ ve chaw htaꞈ kʼoˆ gaˇ ve) maˇ heˆ leh gʼuˇ suhˍ peuˍ ve chaw 225 gʼaˇ ve lehˬ 350 gʼaˇ kʼawꞈ maˇ la ve yoˬ. Hto toˇ ve chaw 8,000 gʼaˇ hpaˆ hto toˇ ve awˬ naˍ riˍ Awˬ tcuhˆ puiˍ lo feu piˇ ve awˉ lawˉ teˇ pawˆ hpehꞈ ve yoˬ. Laiˉ gʼaˇ nyi ma pfuhˇ leh haꞈ yuˬ piˇ ve chi yawˇ hui htaꞈ Yaˬhoˉvaˬ awˬ bon naꞈ piˇ jaˇ.

Ha pa 3 maˬ 21 nyi 1920 hkʼawꞈ awˬ viˉ awˬ nyi Yoˇsehꞈ F Raˆhteuˬfawˍ oˇ ve teˇ yanˇ Liꞈ hpu henˇ yaˇ awˬ moˍ hkʼaw yawˇ sheh kʼai ve yoˬ. Bon maˍ hkawˇ awˬ lawn lonˉ ma lehˬ, “Chi teˇ hkui a shaꞈ teꞈ chehˇ ve laiˉ lanˬ gʼaˇ maˇ gʼa suh.” Liꞈ hpu henˇ yaˇ coˇ caˇ leh nyi ma pfuhˇ ve chaw bon maˍ hkawˇ chi na la tuˬ, kuˬ piˇ ve yoˬ. Neuˇyawˆ venˇ awˬ han lonˉ nyi kuiˬ lo ngaˍ leh liꞈ kʼoˆ ehˉ aˬ laˬ hkʼe 320,000 kʼoˆ piˇ gʼa ve yoˬ.

Dawˇ taˍ ve aꞈ kehˉ awˬ bon gʼa jaˇ. Yawˇ hui ngaˍ taˍ ve awˬ han lonˉ nyi kuiˬ 5,000 gʼaˇ ceh mui kuiˬ cawˬ ve yoˬ. Leh 7,000 gʼaˇ mui kuiˬ maˇ cawˬ ve pa taw loꞈ˗e maˇ gʼa. Awˬ lawn chi ve Shaw nyi kuiˬ Taꞈ yehˬ hkʼaw kʼoˆ ve, laiˉ mvuhˇ miˬ lo laˬ ve hpawnˬ daꞈ lonˉ te jaw ve hkʼe, chi teˇ pawˆ kaꞈ Liꞈ hpu henˇ yaˇ dawˇ taˍ ve hkʼe te gʼa ve yoˬ.

Oˇ ve teˇ yanˇ, Liꞈ hpu henˇ yaˇ chi teˇ moˍ hto toˇ ve, “Chi teˇ hkui a shaꞈ teꞈ chehˇ ve laiˉ lanˬ gʼaˇ maˇ gʼa suh” kʼoˆ ve htaꞈ chaw laiˉ gʼaˇ shiˍ ve yoˬ. Oˇ ve teˇ yanˇ Gʼuiˬ sha ve mvuhˇ miˬ chi hkʼe taw taw zuhˇ kʼai tuˬ gʼa hto toˇ cawˇ ve yawˇ hui hkʼa dehꞈ maˇ na gʼa ve htawˇ, nyi ma pfuhˇ jaˇ. Ai˗daˇ O˗ma˗sa˗teꞈ 1902 hkʼawꞈ htaˇ hpawnˬ daꞈ lonˉ hkʼaw kʼai ve yoˬ. Yawˇ kʼoˆ ve, “chaw yaˇ teˇ gʼaˇ le le awˬ bon maˇ maˇ gʼa tuˬ dawˇ law kuiˬ cawˬ ve tehꞈ ngaˬ hui shiˍ leh hto toˇ kuiˬ lo mawˬ daꞈ ve chaw teˇ gʼaˇ le le htaꞈ daꞈ ve awˬ lawn sha tanˇ hto maˍ piˇ tuˬ ngaˬ hui dawˇ teh taˍ ve yoˬ.”

Caˇ tuˬ htaꞈ shuˍ ve co ha hpawˇ ve cuˇ yiˍ pehˍ piˇ tuˬ yoˬ tehꞈ yonˍ gʼa leh Beˍteˍlaˆ hkʼaw ve awˬ viˉ awˬ nyi liꞈ kʼoˆ tanˬ yanˍ tawˇ ve yoˬ. Beˍteˍlaˆ awˬ paˇ lo Buˆlinˍ, Neuˇyawˆ, Meu˗hteuˇ yaꞈ kʼaw yawˇ hui ngaˍ taˍ ve yehˬ nanˍ baꞈ 35 yawˇ hui vuiˬ taˍ ve awˬ hkʼeun oˇ kaˬ lo teh ve yoˬ.

Ha pa 1 ma 1920 hkʼawꞈ htaˇ, Liˍo Hpe leh Vaw˗teuˇ Beˍteˍlaˆ lo gaˬ la ve yoˬ. Vaw˗teuˇ kʼoˆ ve, “ngaˬ hui gaˬ la htaˇ liꞈ te tawˆ kuiˬ htaꞈ nyi haꞈ shaˉ paˍ ngaˬ hui htaꞈ nyi leh kʼoˆ ve, ‘sha gʼuˇ gaˬ˗e tuˬ teˇ naˍ riˍ hpaˆ ceh tiˉ cawˬ˗o.’ Hkʼe te leh yawˇ ngaˬ hui htaꞈ yehˬ miˬ kʼoˍ hkʼaw ve liꞈ kʼoˆ chiˇ taˆ la tcuh laˇ ve yoˬ.”

Liˍo gʼuˇ suhˍ teˇ nyi ve awˬ lawn kʼawꞈ kʼoˆ maˍ laˇ ve yoˬ. Yawˇ kʼoˆ ve, “ngaˬ hui ve kanˉ lehˬ yehˬ awˉ lawˉ teˇ htehꞈ daꞈ kehˬ tuˬ te ve yoˬ. Ngaˬ te jaw ve aꞈ kehˉ chi teˇ pawˆ chaꞈ chiˆ jaˇ. Yaꞈ hkʼaˇ, chi Gʼuiˬ sha ve kanˉ hpehꞈ ve pa taw te ve awˬ hpfuhˇ hkʼawꞈ jaˇ.”

 Awˬ viˉ awˬ nyi lehˬ nyi ma pfuhˇ jaˇ ve pa taw, hkʼaˬ nyiˇ shinˉ maˇ gaˬ sheˍ kaꞈ Shaw nyi kuiˬ Taꞈ yehˬ yanˍ tawˆ gʼa ve yoˬ. Ha pa 2 maˬ 1 nyi 1920 hkʼawꞈ htaˇ, Shaw nyi kuiˬ Taꞈ yehˬ 60,000 kʼoˆ yanˍ tawˆ gʼa ve yoˬ. Yehˬ nyiˇ htehꞈ teˇ htehꞈ hkʼaw kaꞈ liꞈ yanˍ tawˆ tuˬ awˬ hkʼeun cawˬ leh yehˬ miˬ kʼoˍ hkʼaw ve Maꞈ bawˆ tuˬ ve heuˇ shan hpawˇ meh piˇ taˍ ve yoˬ. Ha pa 4 maˬ 14 nyi 1920 hkʼawꞈ liꞈ kʼoˆ Deuꞈ Go˗denˇ Eˬ oˇ kaꞈ lo tanˬ yanˍ tawˆ taˍ ve yoˬ. Awˬ viˉ awˬ nyi ha lehˬ ha kʼa kanˉ te ve htaꞈ Yaˬhoˉvaˬ awˬ bon naꞈ piˇ ve, htawˇ dawˇ nawˬ dawˇ taˇ cawˬ.

Yaˬhoˉvaˬ ve kanˉ te ve ka tiꞈ yeˬ ve chaw ha lehˬ ha kʼa teˇ pawˆ gʼa kʼawꞈ hto toˇ ve ha lehˬ jaˇ leh teˇ moˍ tiˉ hpehꞈ ve yoˬ. Yaꞈ hkʼaˇ, 1917 hkʼawꞈ te leh 1919 hkʼawꞈ tuꞈ hkanˍ ve awˬ yanˇ htaˇ, Liꞈ hpu henˇ yaˇ teˇ hpaˍ hpaˍ Gʼuiˬ sha ve kanˉ hkʼaˇ htaꞈ baˬ taˉ ve yoˬ. Yawˇ hui htaꞈ aˬ htoꞈ ma ga piˇ gʼa ve le?

Shaw nyi kuiˬ Taꞈ yehˬ Ha pa 4 maˬ 1 nyi 1920 hkʼawꞈ awˬ lawn lonˉ ma lehˬ, “Ngaˬ hui dawˇ sha gawˬ lehˍ ve hkʼaw teˇ geh chehˇ sheˍ.” Yawˇ hui htaꞈ haꞈ pehnˇ ve hkʼaw kʼoˆ piˇ sheˍ ve, “Ngaˬ hui yonˍ gʼa ve . . . Gʼuiˬ sha hkawˇ na gaˇ ve chaw teˇ gʼaˇ le le . . . hkʼawꞈ nawˉ hpawˇ awˬ ceuˬ htaꞈ leunˇ baˬ taˉ ve, . . . leh Gʼuiˬ sha ve kanˉ te gʼa tuˬ, teˇ moˍ tiˉ te leh teˇ geh chehˇ ve yoˬ.”

Awˬ lawn chi htaꞈ gʼaw peuˬ hkʼawꞈ nawˉ laiˉ gʼaˇ chiˇ mvuh laˇ ve htaꞈ gʼa ve yoˬ. Awˬ hpawˇ awˬ miˇ ma teˇ ca kʼoˆ ve, “ponˬ laˬ ve laiˉ hkʼawꞈ ngaˬ hui maˇ te cawˇ ve htaꞈ shiˍ˗oˬ. Shu [hto toˇ ve] kanˉ te chehˇ htaˇ ngaˬ hui taꞈ iˉ chehˇ taˍ ve yoˬ. Ngaˬ hui chi hkʼe maˇ kʼawꞈ te tuˬ dawˇ taˍ ve yoˬ.” Awˬ viˉ awˬ nyi teˇ hpaˍ teˇ pawˆ kʼawꞈ hto toˇ la ve chaw, yawˇ hui htaꞈ law chehˇ ve kanˉ cawˬ maˇ jaˇ.

Ha pa 6 maˬ 21 nyi 1920 hkʼawꞈ taˍ leh Liꞈ hpu henˇ yaˇ liꞈ kʼoˆ “ZG” tanˬ piˇ ve yoˬ. Chi lehˬ Liꞈ kʼoˆ Faˉ taˍ ve awˬ tehˬ biˇ la peuˬ * maˇ htu ve teˇ kʼoˆ yoˬ. 1918 hkʼawꞈ htaˇ, Liꞈ kʼoˆ Faˉ taˍ ve awˬ tehˬ biˇ la peuˬ a hkaw˗anˬ maˇ peꞈ laˇ ve pa taw, liꞈ kʼoˆ chi gʼawˆ teh taˍ ve maˇ jaˇ.

 Hkaw˗hpeu˗hteu ceh tiˉ a yeˇ uiˍ ve kanˉ chi te tuˬ kuˬ piˇ ve maˇ heˆ. Ha pa 6 maˬ 1920 hkʼawꞈ hkʼaw ve liꞈ sha tanˇ lehˬ, Hkriꞈ yaˇ awˬ moˍ hkʼaw Baˆtiˆsaˬ haꞈ yuˬ˗oˬ ve teˇ gʼaˇ le le kanˉ chi te tuˬ awˬ gʼaˇ piˇ ve yoˬ. Teˇ gʼaˇ le le kanˉ chi htaꞈ a yeˇ uiˍ jaˇ tehꞈ dawˇ tuˬ, tawˇ hkawˇ teˇ maˬ teh taˍ ve ‘Ngaˬ teˇ ceuˬ gʼa te cawˇ ve lehˬ ZG liꞈ kʼoˆ piˇ ve yoˬ.’ Leh Eˆma Hu˗peu tawnˇ gʼa ve, chi teˇ pawˆ teˇ yehˬ peuˬ teˇ yehˬ hto toˇ ve laiˉ gʼaˇ awˬ pon awˉ lawˉ teˇ pawˆ hpehꞈ ve yoˬ. Leh yawˇ kʼoˆ ve, “ngaˬ hui dawˇ taˍ ve aꞈ kehˉ kanˉ chi gʼa zuhˇ kʼai ve yoˬ.”

Maꞈ lonˉ awˉ lawˉ teˇ pawˆ htaˇ awˬ nu ve mvuhˇ miˬ lo Liꞈ hpu henˇ yaˇ htaꞈ caˉ daꞈ tuˬ haˍ jaˇ ve awˬ ceuˬ te piˇ ve yoˬ. Chi htaꞈ pa taw awˬ viˉ awˬ nyi Raˆhteuˬfawˍ awˬ viˉ awˬ nyi teˇ hpaˍ htaꞈ awˬ gʼaˇ piˇ gaˇ leh hto toˇ ve kanˉ hteˇ hteˇ shawˇ shawˇ hpehꞈ tuˬ kʼawꞈ gu piˇ ve yoˬ. Chi htaꞈ pa taw, Ha pa 8 maˬ 12 nyi 1920 hkʼawꞈ htaˇ Raˆhteuˬfawˍ leh awˬ viˉ awˬ nyi awˬ nu ve hawˉ hkʼaˆ 4 gʼaˇ Eˬgaˍlaˍ mvuhˇ miˬ, Uˉyawˉpaˆ miˬ guiˬ leh mvuhˇ nyi tawˇ hpawˇ awˬ kʼaw ji lo kʼai ve yoˬ.

Awˬ viˉ awˬ nyi Raˆhteuˬfawˍ Eˬgaˍlaˍ mvuhˇ miˬ lo kʼai htaˇ, Liꞈ hpu henˇ yaˇ awˬ moˍ hpawnˬ daꞈ lonˉ te tuˬ 3 pawˆ gu leh, teˇ gʼaˇ le le na la hpehꞈ ve hpawnˬ daꞈ ve 12 pawˆ gu ve yoˬ. Laˬ ve chaw hkʼa peu˗eˬ 50,000 gʼaˇ cawˬ ve yoˬ. Chi teˇ pawˆ ve awˬ lawn Shaw nyi kuiˬ Taꞈ yehˬ hkʼaw kʼoˆ ve, “awˬ viˉ awˬ nyi awˬ gʼaˇ gʼa leh nyi ma sha jaˇ. Yawˇ hui awˬ yanˇ teˇ geh yehˇ leh kanˉ teˇ geh te ve pa taw, nyi ma luˬ chehˇ ve nyi ma teˇ pawˆ kʼawꞈ sha la ve yoˬ.” Pehˇriˆ venˇ lo Raˆhteuˬfawˍ bon maˍ ve awˬ lawn lonˉ ma lehˬ, “Chi teˇ hkui a shaꞈ teꞈ chehˇ ve laiˉ lanˬ gʼaˇ maˇ gʼa suh.” Yawˇ bon tanˬ maˍ htaˇ, Hpawnˬ daꞈ kuiˬ hkʼaw kaꞈ chaw biˇ˗e ve yoˬ. Leh kʼawꞈ shiˍ maˇ gaˇ ve chaw 300 gʼaˇ cawˬ ve yoˬ.

Teˇ shinˉ hkʼawꞈ nawˉ Raˆhteuˬfawˍ leh awˬ nu ve awˬ viˉ awˬ nyi hawˉ hkʼaˆ teˇ hpaˍ Aˍhtenˍ venˇ, hkai˗lo venˇ leh Yeˍruˆsaˍlehnˍ venˇ lo kʼawꞈ kʼai ve yoˬ. Venˇ chi teˇ hpaˍ hkʼaw nyi ma pfuhˇ ve chaw htaꞈ ga piˇ tuˬ, Yeˍruˆsaˍlehnˍ venˇ awˬ paˇ lo Ra˗ma˗la venˇ lo awˬ viˉ awˬ nyi Raˆhteuˬfawˍ liꞈ kʼoˆ teh kuiˬ gu ve yoˬ. Yawˇ Uˉyawˉpaˆ miˬ guiˬ lo kʼoꞈ˗e leh Uˉyawˉpaˆ miˬ guiˬ awˬ kʼaw ji lo kanˉ te kuiˬ yehˬ teh leh liꞈ kʼoˆ yanˍ tawˆ kuiˬ te ve yoˬ.

Ha pa 9 maˬ 1920 hkʼawꞈ htaˇ, Liꞈ hpu henˇ yaˇ liꞈ kʼoˆ Deuꞈ Go˗denˇ Eˬ 27 kʼoˆ teˇ kʼoˆ te tawˆ ve, chi lehˬ daꞈ jaˇ ve teˇ kʼoˆ hpehꞈ ve yoˬ. 1918 hkʼawꞈ htaˇ, liꞈ kʼoˆ chi ve hkʼaw Liꞈ hpu henˇ yaˇ htaꞈ shu fawˉ mehˍ piˇ ve awˬ lawn kʼoˆ tawˆ la ve yoˬ. Liꞈ kʼoˆ 4 lanˬ kʼoˆ hpaˆ yanˍ tawˆ tuˬ awˬ pon awˬ hkʼeun chi ve tanˇ hkuinˇ tanˇ vanˇ kanˉ te ve yoˬ. Awˬ hkʼeun chi Maꞈ bawˆ tuˬ ve heuˇ sha hpawˇ meh ve yoˬ.

 Liꞈ kʼoˆ chi ve hkʼaw awˬ viˉ awˬ nyi Eˉmaˆ Maˍhtiˆ ve awˬ lawn cawˬ ve yoˬ. Awˬ lawn chi hkʼe ve tcuhˇ tcuhˬ maˇ cawˬ jaw. Hkeh˗liˆfaw˗ni˗a lo Sanˍ Beuˬnaˍdiˍnoˍ venˇ gʼuˇ suhˍ peuˍ ve chaw te ve yoˬ. Ha pa 4 maˬ 17 nyi 1918 hkʼawꞈ htaˇ, yawˇ leh awˬ viˉ awˬ nyi hawˉ hkʼaˆ, E. Hehn, E. J. Sonˍnenˍbeuꞈ, leh E. A. Saˍteˍhpanˍ Liꞈ hpu henˇ yaˇ awˬ moˍ ehˉ geh hpawnˬ daꞈ˗e ve yoˬ.

Oˇ ve teˇ nyi hawˉ hkʼaˆ teˇ gʼaˇ awˬ nu ve awˬ ceuˬ htaꞈ dawˇ law leh hpawnˬ daꞈ la ve yoˬ. Yawˇ Liꞈ hpu henˇ gaˇ leh laˬ ve maˇ heˆ. Yawˇ hkʼawꞈ nawˉ htaˇ kʼawꞈ kʼoˆ ve, “teˇ ceuˬ ceuˬ ve shaˉ hkiˆ gʼa tuˬ Shaˉ naˉ lonˉ kanˉ te kuiˬ ngaˬ htaꞈ kʼai tcuh laˇ ve pa taw kʼai ve yoˬ.” Leh yawˇ gʼaꞈ ca chehˇ ve oˇ ve lehˬ, “shaˉ hkiˆ” Liꞈ kʼoˆ Faˉ taˍ ve awˬ tehˬ biˇ la peuˬ kʼoˆ ve htaꞈ mawˬ ve yoˬ. Peuˬ hkʼawꞈ nawˉ hkʼaˬ nyiˇ nyi maˇ gaˬ sheˍ htaˇ, awˬ viˉ awˬ nyi Eˉmaˆ leh awˬ nu ve hawˉ hkʼaˆ 3 gʼaˇ a hkaw˗anˬ maˇ gʼa ve liꞈ kʼoˆ piˇ ve pa taw, mvuhˇ miˬ ve awˬ liˇ htaꞈ te yaꞈ ve tehꞈ shawˍ ve leh htawnˍ hkʼaw lo yuˬ keu piˇ ve yoˬ.

Awˬ viˉ awˬ nyi Eˉmaˆ leh awˬ nu ve hawˉ hkʼaˆ 3 gʼaˇ maˇ cawˇ ve tehꞈ suhˉ jehˬ cheˆ piˇ leh htawnˍ hkʼaw 3 hkʼawꞈ haw piˇ ve yoˬ. Yawˇ hui shaˉ naˉ gʼuˇ suhˍ lo teˇ pawˆ kʼawꞈ chaˬ nyi laˇ tuˬ lawˬ ve htaꞈ shu maˇ haꞈ yuˬ piˇ. Hkʼe te leh yawˇ hui htaꞈ Ha pa 5 maˬ 17 nyi 1920 hkʼawꞈ htaˇ htawnˍ hkʼaw yuˬ keu piˇ ve yoˬ. Peuˬ hkʼawꞈ nawˉ teˇ ceuˬ le le kaꞈ daꞈ la ve yoˬ.

Ha pa 6 maˬ 20 nyi 1920 hkʼawꞈ htaˇ, Sanˍ Fan˗shiˆkoˇ venˇ hpawnˬ daꞈ lonˉ hkʼaw yawˇ hui ve awˬ lawn awˬ viˉ awˬ nyi Raˆhteuˬfawˍ kʼoˆ ve yoˬ. Awˬ viˉ awˬ nyi gʼa kaˇ htaˇ cheˆ˗ehꞈ kʼai ve yoˬ. Aˍmeˬriˆkaꞈ mvuhˇ miˬ ve uˉ peunˍ paˍ geh awˬ hkʼeun hkʼaw tawˇ yaw kʼai ve yoˬ. “Suhˉ jehˬ ve chi ngaˬ hui dawˇ ve . . . Eˉmaˆ Maˍhtiˆ ve awˬ lawn . . . mvuhˇ miˬ awˬ liˇ htaꞈ te yaꞈ ve tehꞈ suhˉ jehˬ piˇ ve maˇ cawˇ ve awˬ lawn hpehꞈ ve . . . mvuhˇ miˬ uˉ peunˍ paˍ teˇ hpaˍ kanˇ paˆ yehˇ leh heˍ ve . . .Eˉmaˆ Maˍhtiˆ htaꞈ . . . awˬ lawn chi yawˇ yaꞈ ve hkʼe te piˇ leh htawnˍ hkʼaw chehˇ tuˬ suhˉ jehˬ cheˆ piˇ ve. Ngaˬ hui . . . maˇ haꞈ yuˬ gʼa.”

Shawˉ pawˍ gaˬ leh mvuhˇ miˬ uˉ peunˍ paˍ Woˆlo Wi˗sa lehˬ, awˬ viˉ awˬ nyi Eˉmaˆ Maˍhtiˆ, E. Hehn, E. J. Sonˍnenˍbeuꞈ, leh E. A. Saˍteˍhpanˍ ve awˬ lawn jehˬ cheˆ piˇ ve awˬ lawn pa ve yoˬ. Leh yawˇ hui htaꞈ maˇ hteˇ maˇ cawˇ ve hkʼaw htawnˍ hkʼaw yuˬ keu piˇ ve htaꞈ gʼa hpehˇ piˇ ve yoˬ.

1920 hkʼawꞈ ve awˬ yanˇ htaˇ, Liꞈ hpu henˇ yaˇ awˬ moˍ ha lehˬ tuˬ te piˇ ve laiˉ ceuˬ cawˬ ve yoˬ. Kanˉ te kuiˬ awˬ tcuhˆ puiˍ lo ve kanˉ laiˉ ceuˬ cawˬ la leh Hkriꞈ yaˇ hto toˇ ve lehˬ maˇ te jaw ve aꞈ kehˉ kʼawꞈ te maˇ ve yoˬ. Chaw yaˇ gʼa hpuˇ ve awˬ lawn Gʼuiˬ sha ve mvuhˇ miˬ ceh tiˉ gu laˇ gʼa ve tehꞈ yawˇ hui hto toˇ ve yoˬ. (Maꞈhtehˍ 24:14) 1921 hkʼawꞈ htaˇ, Gʼuiˬ sha ve mvuhˇ miˬ awˬ tehˬ ve hto toˇ ve peuˬ laˬ ve teˇ hkʼawꞈ aꞈ kehˉ kʼawꞈ te maˇ tuˬ yoˬ.