1. 2 Kawˇrenˍhtuˆ liꞈ 3:1-3 hkʼaw shu Baˆtiˆsaˬ haꞈ yuˬ tuˬ maˍ piˇ ve daꞈ jaˇ ve awˬ vuiˬ htaꞈ ngaˬ hui awˬ hpfuhˇ shiˍ tuˬ hkʼaˬ hkʼe ga laˇ ve le? (Awˬ htaꞈ hpawˇ ve awˬ han htaꞈ nyi sheˍ.)

 Nawˬ ve Hkriꞈ yaˇ awˬ moˍ hkʼaw liꞈ hpu henˇ chehˇ ve chaw Baˆtiˆsaˬ haꞈ yuˬ htaˇ, nawˬ hkʼaˬ hkʼe dawˇ tuˬ le? Ha lehˬ jaˇ tuˬ yoˬ. (Maꞈhtehˍ 28:19) Leh oˇ ve teˇ gʼaˇ nawˬ geh Liꞈ hpu henˇ chehˇ ve chaw hpehꞈ ve kʼo, yawˇ Baˆtiˆsaˬ haꞈ yuˬ ve htaꞈ nawˬ gʼa mawˬ htaˇ ha lehˬ jaˇ tuˬ ve maˇ heˆ laˇ? (1 Hteˇsaˍlawˇniˆ 2:19, 20) Baˆtiˆsaˬ haꞈ yuˬ gehˇ sheˍ ve chaw lehˬ, Liꞈ hpu maˍ piˇ ve chaw awˬ pon “shaˉ hkiˆ hkanˍ ve liꞈ” ceh hpehꞈ ve maˇ heˆ. Yaꞈ hkʼaˇ hkriꞈ yaˇ awˬ moˍ hkʼaw ve chaw teˇ gʼaˇ le le awˬ pon hpehꞈ ve yoˬ.—2 Kawˇrenˍhtuˆ 3:1-3 gʼaw sheˍ.

2. (a) A yeˇ uiˍ jaˇ ve na hkawˇ ngaˬ hui dawˇ nyi cawˇ ve aˬ htoꞈ ma le? Leh aˬ htoꞈ ma pa taw le? (b) Liꞈ hpu henˇ ve aˬ htoꞈ ma kʼoˆ gaˇ ve le? (Awˬ maiˉ htaꞈ nyi sheˍ.)

² Peuˬ laˬ ve 4 hkʼawꞈ htaˇ Shaˉhkiˆhkanˍ ve chaw geh teˇ ha pa le le Liꞈ hpu henˇ ve chaw aˬ laˬ hkʼe 10,000,000 gʼaˇ * cawˬ ve ha lehˬ jaˇ. 4 hkʼawꞈ ve awˬ yanˇ chi ve hkʼaw, Baˆtiˆsaˬ haꞈ yuˬ leh Shaˉhkiˆhkanˍ ve chaw hpehꞈ la ve teˇ hkʼawꞈ ve hkʼaw 280,000 gʼaˇ cawˬ ve yoˬ. Yaꞈ hkʼaˇ Liꞈ hpu henˇ chehˇ ve chaw Baˆtiˆsaˬ haꞈ yuˬ tuˬ ngaˬ hui hkʼaˬ hkʼe te ga piˇ gʼa tuˬ le? Laiˉ gʼaˇ Yeˍsuˆ ve awˬ laꞈ gʼawˇ hpehꞈ la tuˬ Yaˬhoˉvaˬ awˬ yanˇ peꞈ laˇ chehˇ sheˍ ve hkʼaw, Liꞈ hpu henˇ chehˇ ve chaw teˇ gʼaˇ le le uiˍ la mvuh la tuˬ ngaˬ hui ga piˇ gʼa ve hkʼe ga piˇ leh Baˆtiˆsaˬ haˆ haˆ haꞈ yuˬ tcuh gaˇ ve yoˬ. Awˬ leh meuˇ gaˬ la paˇ neˇ ve yoˬ!—1 Kawˇrenˍhtuˆ 7:29; 1 Peˍtruˆ 4:7.

3. Liꞈ hpu henˇ ve chaw htaꞈ maˍ piˇ tuˬ awˬ hkʼaˇ awˬ lawn chi ve hkʼaw aˬ htoꞈ ma htaꞈ henˇ tuˬ le?

 ³ Shu awˬ laꞈ gʼawˇ hpehꞈ la tuˬ maˍ piˇ ve a yeˇ uiˍ jaˇ. Uˉ peunˍ ve Kawˍmiˍtiˍ lehˬ, miˬ guiˬ chi hkʼoˆ lo Awˬ tcuhˆ puiˍ ve Kawˍmiˍtiˍ htaꞈ, Liꞈ hpu henˇ chehˇ ve chaw uiˍ la mvuh la leh Baˆtiˆsaˬ haꞈ yuˬ tuˬ, hkʼaˬ hkʼe te leh ga piˇ gʼa tuˬ awˬ hkʼaˇ htaꞈ chaˬ nyi tcuh ve yoˬ. Chi ve teˇ lawn leh gʼuˇ suhˍ teˇ lawn hkʼaw gʼuˇ suhˍ peuˍ ve chaw, miˍshenˍnaˍliˍ, leh toˇ nyi shehˍ hpaˇ * yawˇ hui ve awˬ lawn ngaˬ hui hkʼaˬ hkʼe henˇ yuˬ gʼa ve teˇ geh henˇ tuˬ yoˬ. (Tawˇ naˉ ve 11:14; 15:22) Liꞈ hpu maˍ piˇ ve awˬ bon hkʼaˬ hkʼe gʼa tuˬ, Liꞈ hpu maˍ ve chaw leh Liꞈ hpu henˇ ve chaw hkʼaˬ hkʼe gʼa te cawˇ ve yawˇ hui kʼoˆ maˍ laˇ taˍ ve yoˬ. Awˬ lawn chi ve hkʼaw Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ gʼa tuˬ, yawˇ hkʼaˬ hkʼe gʼa te cawˇ ve 5 hkʼaˇ htaꞈ teˇ geh nyi sheˍ.

4. Yehˬ miˉ hpeꞈ lo Liꞈ hpu maˍ piˇ ve awˬ hkʼaˇ ngaˬ hui hkʼaˬ hkʼe te haꞈ yuˬ cawˇ ve le?

⁴ Awˬ viˉ awˬ nyi laiˉ gʼaˇ yehˬ shehˍ hpaˇ ve yehˬ miˉ hpeꞈ lo Liꞈ hpu maˍ piˇ ve yoˬ. Yehˬ shehˍ hpaˇ Liꞈ hpu htaꞈ nyi ma pfuhˇ tuˬ ga piˇ ve chi daꞈ ve awˬ hkʼaˇ hpehꞈ ve htawˇ, chi lehˬ maˍ piˇ ve awˬ yanˇ maˇ maw leh teˇ shinˉ le le te maˇ gʼa ve yoˬ hehˉ. Yehˬ shehˍ hpaˇ nyi ma gʼaˇ hteꞈ kʼawꞈ pfuhˇ tuˬ, awˬ hkʼeun hkʼaw yawˇ geh Liꞈ hpu hkʼaw ve awˬ lawn tawˇ yaw daꞈ gʼa tuˬ, maˇ heˆ leh liꞈ bvuhꞈ piˇ gʼa tuˬ awˬ viˉ awˬ nyi teˇ hpaˍ yawˇ geh caˉ daꞈ gʼa tuˬ lawˬ ve yoˬ. Laiˉ gʼaˇ kʼo, chi hkʼe laiˉ ha pa te ve yoˬ. Liꞈ hpu henˇ ve chaw coˇ caˇ leh Liꞈ hpu henˇ tuˬ ve awˬ yanˇ oˇ hkʼe taweh cawˬ ve kʼo, yawˇ uiˍ la mvuh la leh awˬ to chiˇ aꞈ leh Baˆtiˆsaˬ haꞈ yuˬ gʼa˗aw laˇ? Chi hkʼe hpehꞈ gʼa tuˬ haˍ jaˇ.

5. Liꞈ hpu henˇ ve chaw htaꞈ ngaˬ hui ga piˇ gʼa tuˬ Luˉkaꞈ liꞈ 14:27-33 hkʼaw Yeˍsuˆ hkʼaˬ hkʼe kʼoˆ ve le?

⁵ Teˇ pawˆ htaˇ Yeˍsuˆ yawˇ ve awˬ laꞈ gʼawˇ hpehꞈ gaˇ ve kʼo, hkʼaˬ hkʼe gʼa te cawˇ ve tawˇ pa haˉ tehˆ maˍ piˇ ve yoˬ. Chaw teˇ gʼaˇ mvuh ve yehˬ lonˉ htaꞈ te gaˇ leh hkunˉ hawˉ hkanˇ teˇ gʼaˇ maꞈ te gaˇ ve awˬ lawn chi ve Yeˍsuˆ kʼoˆ maˍ piˇ ve yoˬ. Yeˍsuˆ kʼoˆ ve chaw teˇ gʼaˇ mvuh ve yehˬ lonˉ te gaˇ ve kʼo, yehˬ oˇ ve htaꞈ te peuˬ gʼa tuˬ ‘hkʼaˬ ma peuˬ tuˬ ve htaꞈ mui taˍ leh awˉ lawˉ shawˍ nyi ve’ yoˬ. Leh hkunˉ hawˉ hkanˇ hpehꞈ ve chaw teˇ gʼaˇ lehˬ, maꞈ yaˇ awˬ hkʼaˇ gu taˍ ve htaꞈ gʼaꞈ te gʼa˗aw laˇ? tehꞈ, “mui taˍ leh awˉ lawˉ hkʼa dehꞈ” gʼa dawˇ nyi ve yoˬ. (Luˉkaꞈ 14:27-33 gʼaw sheˍ.) Yeˍsuˆ ve awˬ laꞈ gʼawˇ hpehꞈ gaˇ ve chaw lehˬ, yawˇ awˬ hkʼaˇ suh gʼaꞈ yuˬ ve hkʼaˬ hkʼe kʼoˆ gaˇ ve hkʼa dehꞈ gʼa dawˇ nyi ve yoˬ. [Aˬ htoꞈ ma gʼa yuˬ tanˇ ve.] Yawˇ hui teˇ shinˉ le le Liꞈ hpu henˇ gʼa tuˬ awˬ gʼaˇ gʼa piˇ ve yoˬ. Ngaˬ hui chi hkʼe ve hkʼaˬ hkʼe te gʼa tuˬ le?

6. Liꞈ hpu henˇ ve chaw uiˍ la mvuh la tuˬ ngaˬ hui hkʼaˬ hkʼe te gʼa ve le?

⁶ Nawˬ yawˇ geh Liꞈ hpu awˬ tawn maˇ heˆ leh Liꞈ hpu hkʼaw ve awˬ lawn awˬ yanˇ maw chaweh yaw  daꞈ gʼa ve yoˬ. Liꞈ hpu henˇ ve chaw Liꞈ hpu henˇ jaw muiˬ ve hkʼe henˇ gʼa tuˬ, yawˇ awˬ yanˇ maw chaweh kʼawꞈ henˇ gʼa˗aw laˇ tehꞈ na piˇ gʼa ve yoˬ. Yehˬ shehˍ hpaˇ ve yehˬ miˉ hpeꞈ lo Liꞈ hpu henˇ ve kʼo, teˇ kaˬ kaˬ ca mui henˇ hpehꞈ˗aw laˇ tehꞈ na piˇ gʼa ve yoˬ. Yawˇ Liꞈ hpu henˇ ve htaꞈ a yeˇ hkʼaˬ hkʼe taw yuˬ ve, yawˇ hkʼawꞈ laˇ ve htaꞈ nawˬ shiˍ gʼa ve yoˬ. Yawˇ htaꞈ haˆ haˆ uiˍ la mvuh la tcuh gaˇ ve kʼo, teˇ shinˉ ve hkʼaw Liꞈ hpu 2 pawˆ henˇ hpehꞈ˗aw laˇ? tehꞈ na piˇ gʼa ve yoˬ. Yaꞈ hkʼaˇ, Liꞈ hpu henˇ ve teˇ shinˉ ve hkʼaw teˇ pawˆ maˇ heˆ leh nyiˇ pawˆ henˇ ve maˇ lawꞈ. Nawˬ gʼa te cawˇ ve awˬ nu ve awˬ ceuˬ kaꞈ cawˬ ve yoˬ.

7. Liꞈ hpu maˍ ve chaw teˇ pawˆ le le Liꞈ hpu ca maˍ˗e htaˇ, hkʼaˬ hkʼe te hkʼa dehꞈ gu gʼa tuˬ le?

⁷ Liꞈ hpu maˍ ve chaw teˇ pawˆ le le Liꞈ hpu ca maˍ˗e htaˇ hkʼa dehꞈ gʼa gu cawˇ ve yoˬ. Nawˬ awˬ lawn awˬ tanˇ awˉ lawˉ gu teh leh Liꞈ hpu awˬ tawn teˇ hpaˍ nyi gʼa ve yoˬ. Awˬ lawn chi ve hkʼaw cawˬ ve a yeˇ uiˍ ve, awˬ lawn lonˉ ma, awˬ lawn ehˉ, teˇ tawn le le ve na hkawˇ, Liꞈ hpu awˬ tawn gʼaw sheˍ kʼoˆ ve, awˬ han, awˬ lawn chi ve htaꞈ kʼoˆ maˍ laˇ ve VDO, chi ve teˇ hpaˍ nawˬ dawˇ nyi gʼa ve yoˬ. Nawˬ kʼoˆ maˍ piˇ ve htaꞈ yawˇ hkʼa dehꞈ na gʼa leh a shaꞈ teꞈ kuiˬ hkʼaw yuˬ yehˇ tuˬ, nawˬ geh Liꞈ hpu henˇ chehˇ ve chaw htaꞈ gʼa dawˇ nyi piˇ ve yoˬ.—Neˍhaˍmiˆ 8:8; Tawˇ naˉ ve 15:28.

8. Kawˇlawˇsehˇ liꞈ 1:9, 10 hkʼaw tcuh yaˇ Pawˇluꞈ kʼoˆ ve tawˇ hkawˇ, Liꞈ hpu henˇ ve chaw awˬ pon bon lawˬ piˇ tuˬ hkʼaˬ hkʼe maˍ laˇ ve le?

⁸ Liꞈ hpu maˍ˗e tuˬ gu htaˇ, Liꞈ hpu henˇ ve chaw leh yawˇ loˍ ve awˬ ceuˬ nawˬ Yaˬhoˉvaˬ geh bon gʼa lawˬ cawˇ ve yoˬ. Liꞈ hpu henˇ ve chaw henˇ taˍ ve awˬ ceuˬ nyi ma hkʼaw gaˬ tuˬ, nawˬ Yaˬhoˉvaˬ ga laˇ tuˬ lawˬ sheˍ. (Kawˇlawˇsehˇ 1:9, 10 gʼaw sheˍ.) Liꞈ hpu henˇ ve chaw hkʼaˬ ve teˇ ceuˬ na gʼa tuˬ haˍ jaˇ ve le, maˇ heˆ leh haꞈ yuˬ tuˬ haˍ jaˇ ve le, a shu yawˇ awˬ to htaꞈ na nyi sheˍ. Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tuˬ nawˬ gʼa ga piˇ ve tehꞈ tawnˇ taˍ sheˍ.

9. Liꞈ hpu maˍ ve chaw Liꞈ hpu henˇ ve chaw htaꞈ awˉ lawˉ htaˇ gu teh taˍ gʼa tuˬ, hkʼaˬ hkʼe ga piˇ gʼa tuˬ le? Kʼoˆ maˍ laˇ sheˍ.

⁹ Hkaˬ htaˆ kaꞈ Liꞈ hpu henˇ ve kʼo Yeˍsuˆ Liꞈ hpu henˇ ve chaw awˬ pon te piˇ ve htaꞈ yawˇ awˬ hpfuhˇ shiˍ tuˬ te piˇ leh yawˇ gʼaˇ hteꞈ kʼawꞈ henˇ gaˇ tuˬ ngaˬ hui dawˇ law ve yoˬ. (Maꞈhtehˍ 5:3, 6) Liꞈ hpu henˇ htaˇ awˬ bon hkʼa dehꞈ gʼa tuˬ, Liꞈ hpu henˇ ve chaw henˇ chehˇ ve htaꞈ a yeˇ hkʼa dehꞈ gʼa yuˬ cawˇ ve yoˬ. Yawˇ henˇ chehˇ ve awˬ ceuˬ htaꞈ a yeˇ yuˬ tuˬ, teˇ pawˆ le le gu teh ve a yeˇ hkʼaˬ hkʼe taw uiˍ ve yawˇ na gʼa tuˬ, nawˬ gʼa ga piˇ cawˇ ve yoˬ. Awˬ lawn awˬ tanˇ yawˇ awˉ lawˉ gʼa gʼaw leh henˇ taˍ ve hkʼaˬ hkʼe yuˬ yehˇ tuˬ gʼa dawˇ nyi ve yoˬ. Nawˬ yawˇ htaꞈ hkʼaˬ hkʼe ga piˇ gʼa tuˬ le? Nawˬ yawˇ geh teˇ geh gu leh hkʼaˬ hkʼe te tuˬ gʼa te maˍ  piˇ ve yoˬ. * Na hkawˇ hkʼaˬ hkʼe te hteˇ˗ehꞈ hkʼawꞈ gʼa tuˬ leh a yeˇ uiˍ ve awˬ tawn htaꞈ hkʼaiˉ taˍ ve kʼo, hkʼawꞈ sha ve tehꞈ kʼoˆ maˍ piˇ sheˍ. Yawˇ hkʼaˇ yawˇ ve dawˇ hkʼaˇ hkʼawꞈ tuˬ maˍ piˇ sheˍ. Yawˇ chi hkʼe te ve kʼo, yawˇ awˬ lawn awˬ tanˇ htaꞈ hkʼaˬ hkʼe taw na gʼa ve nawˬ shiˍ tuˬ yoˬ. Yaꞈ hkʼaˇ, yawˇ nyi ma pfuhˇ tuˬ te piˇ gʼa ve awˬ nu ve awˬ hkʼaˇ kaꞈ cawˬ sheˍ ve yoˬ.

10. Aˬ htoꞈ ma te teˇ nyi le le Liꞈ hpu gʼaw ve a yeˇ uiˍ jaˇ ve le? Liꞈ hpu henˇ ve chaw yawˇ gʼaw taˍ ve htaꞈ awˬ bon hkʼa dehꞈ gʼa tuˬ hkʼaˬ hkʼe gʼa te cawˇ ve le?

¹⁰ Liꞈ hpu maˍ ve chaw geh henˇ ve awˬ hkʼoˆ kaꞈ, Liꞈ hpu henˇ ve chaw teˇ nyi le le gʼa te cawˇ ve teˇ ceuˬ ceuˬ cawˬ ve yoˬ. Yawˇ teˇ nyi le le Yaˬhoˉvaˬ geh gʼa yaw daꞈ ve yoˬ. Chi ve yawˇ hkʼaˬ hkʼe te gʼa tuˬ le? Gʼuiˬ sha hkawˇ na leh yawˇ geh yaw daꞈ ve yoˬ. Gʼuiˬ sha hkawˇ na ve lehˬ teˇ nyi le le Liꞈ hpu gʼaw ve yoˬ. (Yawˇsuˆ 1:8; Chiˇ mvuh ve 1:1-3) jw.org hkʼaw cawˬ ve “Liꞈ hpu Gʼaw tuˬ Gu ve Awˬ hkʼaˇ” yawˇ htaꞈ nyi tcuh hpehꞈ ve yoˬ. * Liꞈ hpu gʼaw ve yawˇ awˬ bon hkʼa dehꞈ gʼa tuˬ, Yaˬhoˉvaˬ htaꞈ caˉ daꞈ ve yawˇ htaꞈ hkʼaˬ hkʼe maˍ piˇ ve leh, yawˇ gʼa henˇ taˍ ve awˬ ceuˬ a shaꞈ teꞈ kuiˬ hkʼaw hkʼaˬ hkʼe yuˬ yehˇ tuˬ hkʼa dehꞈ gʼa dawˇ nyi ve tehꞈ gʼa maˍ piˇ ve yoˬ.—Tcuh yaˇ 17:11; Yaˍkoˆ 1:25.

11. Liꞈ hpu henˇ ve chaw bon lawˬ ve awˬ hkʼaˇ cawˇ ve htaꞈ hkʼaˬ hkʼe te henˇ gʼa tuˬ le? Leh yawˇ hkʼaˬ htaˆ kaꞈ Yaˬhoˉvaˬ geh bon lawˬ ve aˬ htoꞈ ma te a yeˇ uiˍ jaˇ ve le?

¹¹ Liꞈ hpu henˇ ve chaw Yaˬhoˉvaˬ geh yaw daꞈ leh teˇ nyi le le bon lawˬ tuˬ awˬ gʼaˇ piˇ sheˍ. Nawˬ yawˇ htaꞈ Liꞈ hpu tanˬ maˍ htaˇ leh hpehˇ htaˇ kaꞈ nyi ma awˬ tawˬ hkʼa gaˬ bon lawˬ cawˇ ve yoˬ. Bon lawˬ htaˇ kaꞈ yawˇ awˬ pon bon lawˬ piˇ cawˇ ve yoˬ. Nawˬ bon lawˬ ve awˬ hkʼaˇ yawˇ mawˬ htaˇ, nyi ma awˬ tawˬ hkʼa gaˬ bon hkʼaˬ hkʼe lawˬ cawˇ ve yawˇ shiˍ tuˬ yoˬ. Yeˍsuˆ ve awˬ meh htaꞈ cuˇ leh Yaˬhoˉvaˬ Gʼuiˬ sha geh bon gʼa lawˬ cawˇ ve yawˇ shiˍ tuˬ yoˬ. (Maꞈhtehˍ 6:9; Yoˇhanˬ 15:16) Yawˇ teˇ nyi le le Liꞈ hpu gʼaw ve kʼo, Gʼuiˬ sha geh hkʼaˬ hkʼe taw meuˆ daꞈ tuˬ ve htaꞈ dawˇ nyi sheˍ! (Yaˬhoˉvaˬ hkawˇ na ve) leh bon lawˬ ve (Yaˬhoˉvaˬ geh tawˇ yaw daꞈ ve.) (Yaˍkoˆ 4:8) Nawˬ geh Liꞈ hpu henˇ ve chaw chi hkʼe te ve kʼo, chi yawˇ uiˍ la mvuh la leh awˬ to chiˇ aꞈ leh Baˆtiˆsaˬ haꞈ yuˬ tuˬ ga piˇ gʼa ve yoˬ hehˉ. Yaꞈ hkʼaˇ, yawˇ htaꞈ aˬ htoꞈ ma ga piˇ gʼa sheˍ ve le?

12. Liꞈ hpu maˍ ve chaw, Liꞈ hpu henˇ ve chaw htaꞈ Yaˬhoˉvaˬ geh meuˆ daꞈ tuˬ hkʼaˬ hkʼe ga piˇ gʼa tuˬ le?

¹² Liꞈ hpu henˇ ve chaw yawˇ gʼa henˇ taˍ ve awˬ ceuˬ nyi ma hkʼaw hkʼa dehꞈ gʼa gaˬ tcuh ve yoˬ. Aˬ htoꞈ ma pa taw le? Nyi ma lehˬ loˍ ve htaꞈ caˉ daꞈ ve pa taw, ngaˬ hui ve te hkʼaˇ dawˇ hkʼaˇ htaꞈ cawˬ  ve yoˬ. Nyi ma lehˬ ngaˬ hui te gaˇ tuˬ te laˇ ve yoˬ. Yeˍsuˆ chaw yaˇ htaꞈ laiˉ ceuˬ maˍ piˇ leh yawˇ hui kaꞈ dawˇ cawˇ ve yoˬ. Yaꞈ hkʼaˇ, Yeˍsuˆ maˍ ve yawˇ hui ve nyi ma hkʼaw gaˬ ve pa taw, yawˇ hui yawˇ awˬ hkʼaˇ suh gʼaꞈ yuˬ gaˇ ve yoˬ. (Luˉkaꞈ 24:15, 27, 32) Yaˬhoˉvaˬ lehˬ awˬ tehˬ cawˬ leh yawˇ hui meuˆ daꞈ gʼa ve tehꞈ shiˍ tuˬ nawˬ gʼa ga piˇ ve yoˬ. Gʼuiˬ sha lehˬ Awˬ pa leh yawˇ ve awˬ chawˇ hpehꞈ ve dawˇ tuˬ ga piˇ sheˍ. (Chiˇ mvuh ve 25:4, 5) Nawˬ yawˇ geh Liꞈ hpu maˍ ve teˇ pawˆ le le aˬ htoꞈ ma awˬ lawn maˍ piˇ ve htawˇ, Yaˬhoˉvaˬ hkʼaˬ hkʼe ve Gʼuiˬ sha hpehꞈ ve kʼoˆ piˇ leh Gʼuiˬ sha ve te hkʼaˇ dawˇ hkʼaˇ haꞈ pehnˇ ve, ha kʼaˉ puiˉ ve, chi teˇ hpaˍ kaꞈ kʼoˆ maˍ piˇ ve yoˬ. (Tawˆ kʼai ve 34:5, 6; 1 Peˍtruˆ 5:6, 7) Yeˍsuˆ kʼoˆ ve, “piˇ taˍ ve tawˇ chi teˇ hkawˇ lehˬ, hkʼa peu˗eˬ aꞈ kehˉ uiˍ leh awˉ lawˉ peuˇ ve teˇ hkawˇ hpehꞈ” leh “nawˬ ve [Yaˬhoˉvaˬ] Gʼuiˬ sha htaꞈ gʼa haꞈ ve yoˬ.” (Maꞈhtehˍ 22:37, 38) Liꞈ hpu henˇ ve chaw Yaˬhoˉvaˬ htaꞈ nyi ma awˬ tawˬ hkʼa gaˬ haꞈ tuˬ nawˬ ga piˇ sheˍ.

13. Liꞈ hpu maˍ ve chaw Liꞈ hpu henˇ ve chaw htaꞈ Yaˬhoˉvaˬ ve te hkʼaˇ dawˇ hkʼaˇ htaꞈ caˉ daꞈ ve henˇ tuˬ hkʼaˬ hkʼe ga piˇ gʼa tuˬ le?

¹³ Nawˬ Liꞈ hpu henˇ ve chaw geh yaw daꞈ htaˇ, nawˬ Yaˬhoˉvaˬ htaꞈ hkʼaˬ hkʼe dawˇ ve yawˇ htaꞈ kʼoˆ maˍ piˇ sheˍ. Nawˬ aˬ htoꞈ ma te Yaˬhoˉvaˬ htaꞈ haꞈ ve kʼoˆ maˍ piˇ sheˍ. Chi yawˇ kaꞈ Yaˬhoˉvaˬ geh gʼa meuˆ daꞈ leh gʼa haꞈ ve tehꞈ shiˍ tuˬ ga piˇ sheˍ. (Chiˇ mvuh ve 73:28) Tawˇ pa haˉ te kʼo, Gʼuiˬ sha ve kanˉ hkʼaˇ liꞈ kʼoˆ hkʼaw ve awˬ bon cawˬ ve leh Gʼuiˬ sha ve te hkʼaˇ dawˇ hkʼaˇ Liꞈ hpu hkʼaw cawˬ ve, haꞈ pehnˇ ve, cuˇ yiˍ, hteˇ ve cawˇ ve, leh yawˇ ve kanˇ paˆ nawˬ hkʼaˬ ve teˇ maˬ dawˇ cawˇ ve nawˬ geh Liꞈ hpu henˇ chehˇ ve chaw htaꞈ kʼoˆ maˍ piˇ gʼa˗aw laˇ? Chi ve teˇ hpaˍ hkʼaw ve teˇ maˬ nawˬ mvuhˇ naw ma hkʼoˆ ve Awˬ pa Yaˬhoˉvaˬ htaꞈ haꞈ tuˬ te laˇ ve tehꞈ yawˇ htaꞈ shiˍ tcuh sheˍ. Yaꞈ hkʼaˇ, Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tuˬ, awˬ nu ve awˬ ceuˬ kaꞈ gʼa te cawˇ sheˍ ve yoˬ.

14. Liꞈ hpu henˇ ve chaw uiˍ la mvuh la gʼa tuˬ ga piˇ ve, Heˍbrehˇ liꞈ 10:24, 25 hkʼaw hpawnˬ daꞈ ve htaꞈ caˉ daꞈ ve hkʼaˬ hkʼe kʼoˆ taˍ ve le?

¹⁴ Ngaˬ hui teˇ gʼaˇ le le Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tcuh gaˇ ve yoˬ. Ngaˬ hui Liꞈ hpu henˇ ve chaw htaꞈ ga piˇ gʼa ve a yeˇ uiˍ jaˇ ve teˇ hkʼaˇ lehˬ, hpawnˬ daꞈ la tuˬ awˬ gʼaˇ piˇ ve yoˬ. Liꞈ hpu henˇ ve chaw uiˍ la mvuh la vaiˇ jaˇ ve lehˬ, hpawnˬ daꞈ kuiˬ lo haˆ haˆ laˬ ve yoˬ tehꞈ awˬ viˉ awˬ nyi laiˉ gʼaˇ ve hpehꞈ laˬ jaw ve awˬ lawn kʼoˆ maˍ laˇ ve yoˬ. (Chiˇ mvuh ve 111:1) Liꞈ hpu henˇ ve chaw Liꞈ hpu henˇ htaˇ laiˉ ceuˬ henˇ gʼa ve tehꞈ, awˬ viˉ awˬ nyi teˇ hpaˍ kʼoˆ maˍ laˇ ve yoˬ. Yaꞈ hkʼaˇ, chi ve teˇ hpaˍ lehˬ cuˇ yiˍ teˇ ceuˬ ceuˬ ceh hpehꞈ ve yoˬ hehˉ. Yawˇ cuˇ yiˍ kʼawꞈ gʼa gaˇ ve kʼo, yawˇ hpawnˬ daꞈ kuiˬ lo gʼa laˬ cawˇ ve yoˬ. Nawˬ geh Liꞈ hpu henˇ chehˇ ve chaw geh Heˍbrehˇ 10:24, 25 gʼaw sheˍ. Yawˇ hpawnˬ daꞈ la ve kʼo, aˬ htoꞈ ma awˬ bon gʼa tuˬ kʼoˆ maˍ piˇ  sheˍ. Hpawnˬ daꞈ kuiˬ lo ngaˬ hui aˬ ma ca te ve le? * yawˇ htaꞈ VDO hpaw maˍ piˇ sheˍ. Hpawnˬ daꞈ ve yawˇ awˬ pon a yeˇ uiˍ jaˇ ve tehꞈ dawˇ tuˬ ga piˇ leh hpawnˬ daꞈ ve hkʼaˬ htaˆ kaꞈ laˬ tuˬ ga piˇ sheˍ.

15. Liꞈ hpu henˇ ve chaw hkʼaˬ htaˆ kaꞈ hpawnˬ daꞈ la tuˬ ngaˬ hui awˬ gʼaˇ hkʼaˬ hkʼe piˇ gʼa ve le?

¹⁵ Nawˬ geh Liꞈ hpu henˇ chehˇ ve chaw maˇ hpawnˬ daꞈ la jaw ve, maˇ heˆ leh hpawnˬ daꞈ ve hkʼaˬ htaˆ kaꞈ maˇ laˬ ve kʼo, nawˬ hkʼaˬ hkʼe te tuˬ le? Hpawnˬ daꞈ ve hkʼaw nawˬ gʼa henˇ˗oˬ ve awˬ ceuˬ hkʼaˬ hkʼe taw dawˇ cawˇ ve yawˇ htaꞈ kʼoˆ maˍ piˇ sheˍ. Chi hkʼe te ve kʼo, nawˬ yawˇ htaꞈ jehˬ piˇ ve aꞈ kehˉ yawˇ hpawnˬ daꞈ la gaˇ tuˬ yoˬ hehˉ. Chi teˇ hkui yehˇ chehˇ ve Shaw nyi kuiˬ Taꞈ yehˬ leh Ngaˬ hui Hkriꞈ yaˇ a shaꞈ teꞈ hkʼaˇ leh Gʼuiˬ sha hkʼaˇ te ve liꞈ kʼoˆ yawˇ htaꞈ piˇ sheˍ. Leh gʼuˇ suhˍ teˇ pawˆ hpawnˬ daꞈ htaˇ aˬ htoꞈ ma awˬ lawn henˇ tuˬ yawˇ htaꞈ kʼoˆ maˍ piˇ sheˍ. Yawˇ awˬ pon hkʼaˬ ve teˇ tawn dawˇ cawˇ ve le na piˇ sheˍ. Awˬ nu ve bon hkʼaw yawˇ kʼai leh te jaw ve aꞈ kehˉ, yawˇ ngaˬ hui geh awˉ lawˉ teˇ pawˆ hpawnˬ daꞈ la htaˇ daꞈ jaˇ ve tehꞈ dawˇ tuˬ yoˬ. (1 Kawˇrenˍhtuˆ 14:24, 25) Laiˉ gʼaˇ daꞈ ve htaꞈ yawˇ gʼa mawˬ htaˇ, yawˇ uiˍ la mvuh la leh Baˆtiˆsaˬ haꞈ yuˬ gaˇ tuˬ te piˇ ve yoˬ.

16. Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tuˬ ngaˬ hui hkʼaˬ hkʼe gʼa te cawˇ ve le? Leh gʼuˇ suhˍ teˇ lawn hkʼaw aˬ htoꞈ ma htaꞈ henˇ tuˬ le?

¹⁶ Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tuˬ hkʼaˬ hkʼe maˍ piˇ tuˬ le? Yawˇ teˇ shinˉ le le hkʼaˬ htaˆ kaꞈ Liꞈ hpu henˇ tuˬ, leh Liꞈ hpu maˇ henˇ sheˍ htaˇ teˇ pawˆ le le awˉ lawˉ gu tuˬ awˬ gʼaˇ piˇ leh, Liꞈ hpu henˇ ve htaꞈ a yeˇ uiˍ ve tehꞈ yawˇ dawˇ tuˬ hkʼaˬ hkʼe ga piˇ cawˇ ve le? Yawˇ teˇ nyi le le Yaˬhoˉvaˬ geh tawˇ yaw daꞈ leh hkʼa dehꞈ meuˆ daꞈ tuˬ ngaˬ hui awˬ gʼaˇ piˇ gaˇ ve yoˬ. Leh yawˇ hpawnˬ daꞈ ve laˬ tuˬ kaꞈ ngaˬ hui awˬ gʼaˇ piˇ gaˇ ve yoˬ. (Awˇ ceˍ awˇ fa “ Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tuˬ hkʼaˬ hkʼe ga piˇ cawˇ ve le?” htaꞈ nyi sheˍ.) Chi hkʼe ceh maˇ lawꞈ, gʼuˇ suhˍ teˇ lawn hkʼaw Liꞈ hpu henˇ ve chaw uiˍ la mvuh la leh Baˆtiˆsaˬ haꞈ yuˬ tuˬ, ga piˇ ve awˬ viˉ awˬ nyi gʼa te cawˇ ve 5 hkʼaˇ cawˬ ve yoˬ.