1. Baˆtiˆsaˬ haꞈ yuˬ˗oˬ ve chaw aˬ htoꞈ ma gʼa te cawˇ ve le?

 Nawˬ Baˆtiˆsaˬ haꞈ yuˬ˗oˬ ve laˇ? Haꞈ yuˬ˗oˬ ve kʼo, nawˬ Yaˬhoˉvaˬ htaꞈ yonˍ leh yawˇ ve kanˉ hkʼaˇ hkʼaw kanˉ te gaˇ ve tehꞈ nawˬ Baˆtiˆsaˬ haꞈ yuˬ htaˇ, awˬ nu ve chaw htaꞈ hpeuꞈ maw piˇ ve yoˬ. * Chi beuꞈ teˇ co˗e Yaˬhoˉvaˬ yawˇ ve kanˉ hkʼaˇ htaꞈ beˆ maˍ chehˇ ve pa taw, nawˬ Yaˬhoˉvaˬ htaꞈ gʼaˇ hteꞈ yonˍ tuˬ gʼa te cawˇ ve yoˬ.

2-3. Chi beuꞈ teˇ co˗e Yaˬhoˉvaˬ yawˇ ve kanˉ hkʼaˇ htaꞈ beˆ maˍ chehˇ ve awˬ hkʼaˇ, yawˇ htaꞈ caˉ daꞈ ve 3 hkʼaˇ ngaˬ hui shiˍ gʼa ve aˬ htoꞈ ma cawˬ ve le? Kʼoˆ maˍ laˇ sheˍ.

² Gʼuiˬ sha lehˬ yawˇ hkʼaˬ hkʼe ve Gʼuiˬ sha hpehꞈ ve le, Gʼuiˬ sha ve a loˍ hkʼaˬ hkʼe cawˬ ve le, leh Gʼuiˬ sha ve awˬ liˇ awˬ hkʼaˇ hkʼaˬ hkʼe cawˬ ve le? Chi beuꞈ teˇ co˗e Gʼuiˬ sha yawˇ ve kanˉ hkʼaˇ htaꞈ beˆ maˍ chehˇ ve tehꞈ, awˬ hkʼaˇ chi ve teˇ hpaˍ ngaˬ hui shiˍ tuˬ te laˇ ve yoˬ. Yaˬhoˉvaˬ ve kanˉ hkʼaˇ htaꞈ caˉ daꞈ ve ngaˬ hui mawˬ gʼa ve awˬ lawn chi ve hkʼaw 3 hkʼaˇ htaꞈ teˇ geh henˇ tuˬ yoˬ.

³ Awˉ lawˉ teˇ hkʼaˇ, “Gʼuiˬ sha lehˬ chaw mehˆ hpfuhˇ htaꞈ maˇ nyi.” (Tcuh yaˇ 10:34) Yaˬhoˉvaˬ haꞈ pehnˇ ve htaꞈ pa taw “chaw hkʼa peu˗eˬ htaꞈ htaiˍ hkʼawꞈ piˇ tuˬ” yawˇ ve Yaˇ paˍ miˬ guiˬ hkʼoˆ lo laˬ tcuh ve yoˬ. (1 Tiˆmoˉseˍ 2:6; Yoˇhanˬ 3:16) Htaiˍ hkʼawꞈ ve chi chaw maˇ maˇ awˬ bon gʼa tuˬ ga gʼa ve hkʼe ga piˇ leh, Yaˬhoˉvaˬ yawˇ ve chaw htaꞈ cuˇ leh, chi teˇ hkui daꞈ ve awˬ lawn sha tanˇ na gaˇ ve chaw htaꞈ hto maˍ piˇ tcuh ve yoˬ. Nyiˇ hkʼaˇ teˇ hkʼaˇ, Gʼuiˬ sha lehˬ hteˇ hteˇ shawˇ shawˇ cawˬ leh gawˬ lehˍ ve htaꞈ te piˇ shehˍ hpaˇ hpehꞈ ve yoˬ. (1 Kawˇrenˍhtuˆ 14:33, 40) Chi htaꞈ pa taw, Gʼuiˬ sha htaꞈ oˉ kʼoˍ pui ve chaw lehˬ hteˇ hteˇ shawˇ shawˇ leh gawˬ lehˍ ve gʼa cawˬ ve yoˬ. Shehˆ hkʼaˇ teˇ hkʼaˇ, Yaˬhoˉvaˬ lehˬ Saˍ laꞈ lonˉ hpehꞈ ve yoˬ. (Iˉsaˍyaˆ 30:20, 21) Hkriꞈ yaˇ awˬ moˍ hkʼaw leh hto toˇ ve kanˉ hkʼaw Gʼuiˬ sha dawˇ pawnˍ piˇ ve  Liꞈ hpu htaꞈ caˉ daꞈ ve shu htaꞈ maˍ piˇ tuˬ, yawˇ ve kanˉ hkʼaˇ a yeˇ te ve yoˬ. Awˉ lawˉ peuˇ teˇ co˗e htaˇ, Yaˬhoˉvaˬ ve te hkʼaˇ dawˇ hkʼaˇ chi ve 3 hkʼaˇ htaꞈ ngaˬ hui hkʼaˬ hkʼe te shiˍ gʼa ve le? Leh chi beuꞈ teˇ co˗e Yaˬhoˉvaˬ ve te hkʼaˇ dawˇ hkʼaˇ 3 hkʼaˇ htaꞈ ngaˬ hui hkʼaˬ hkʼe te shiˍ gʼa ve le? Chi beuꞈ teˇ co˗e Yaˬhoˉvaˬ ve kanˉ hkʼaˇ hkʼaw kanˉ te gʼa tuˬ, daˬ kehˬ ve awˬ ha hpu ngaˬ hui htaꞈ hkʼaˬ hkʼe te ga laˇ ve le?

4. Tcuh yaˇ liꞈ 1:8 hkʼaw kʼoˆ taˍ ve hkʼe, Yeˍsuˆ yawˇ ve awˬ laꞈ gʼawˇ htaꞈ aˬ htoꞈ ma te tuˬ kʼoˆ piˇ ve le? Leh yawˇ hui htaꞈ aˬ htoꞈ ma ga piˇ tuˬ le?

⁴ Awˉ lawˉ peuˇ teˇ co˗e. Chaw teˇ gʼaˇ le le dawˇ law kuiˬ cawˬ tuˬ Yeˍsuˆ bon tanˬ maˍ piˇ ve yoˬ. (Luˉkaꞈ 4:43) Yeˍsuˆ yawˇ ve awˬ laꞈ gʼawˇ htaꞈ kanˉ chi ve “mvuhˇ leh miˬ leh hkʼa gaˬ” caˉ leh te˗oˆ tehꞈ kʼoˆ piˇ ve yoˬ. (Tcuh yaˇ 1:8 gʼaw sheˍ.) Kanˉ chi yawˇ hui ve awˬ gʼaˇ awˬ shaˉ htaꞈ cuˇ ve kʼo te maˇ gʼa taˬ. Yaꞈ hkʼaˇ, yawˇ hui “ga piˇ shehˍ hpaˇ” gʼa cawˬ ve yoˬ. Ga piˇ shehˍ hpaˇ chi lehˬ daꞈ kehˬ ve awˬ ha hpu Yeˍsuˆ yawˇ hui htaꞈ piˇ tuˬ ka tiꞈ te taˍ ve yoˬ.—Yoˇhanˬ 14:26; Zaˍhkaˍriˆ 4:6.

5-6. Daꞈ kehˬ ve awˬ ha hpu Yeˍsuˆ ve awˬ laꞈ gʼawˇ hui htaꞈ hkʼaˬ hkʼe ga piˇ ve le?

⁵ Peˍteˍkoˆteˍ awˬ nyi 33 hkʼawꞈ htaˇ Yeˍsuˆ ve awˬ laꞈ gʼawˇ daꞈ kehˬ ve awˬ ha hpu gʼa ve yoˬ. Chi yawˇ hui bon laꞈ haˉ maˍ tuˬ ga piˇ leh maˇ maw ve awˬ yanˇ hkʼaw laiˉ hinˉ gʼaˇ awˬ tehˬ ve htaꞈ haꞈ yuˬ ve yoˬ. (Tcuh yaˇ 2:41; 4:4) Awˬ laꞈ gʼawˇ hui tawˍ ve tsuhˇ ve gʼa hpuˇ htaˇ maˇ kawˆ leh caˉ leh bon maˍ tuˬ Gʼuiˬ sha ga laˇ tuˬ lawˬ ve yoˬ. Yawˇ hui lehˬ “nawˬ ve awˬ ceˬ hui nyi ma haꞈ hanˉ te leh nawˬ ve tawˇ hkawˇ htaꞈ maˍ piˇ hpehꞈ tuˬ ga laˇ sheˍ” tehꞈ bon lawˬ ve yoˬ. Bon lawˬ peuˬ hkʼawꞈ nawˉ, “yawˇ hui hkʼa peu˗eˬ awˬ hkʼaw lo daꞈ ve kehˬ ve Awˬ ha hpu biˇ la leh, Gʼuiˬ sha ve tawˇ hkawˇ htaꞈ nyi ma haꞈ hanˉ te leh maˍ ve yoˬ”.—Tcuh yaˇ 4:18-20, 29, 31.

⁶ Yeˍsuˆ ve awˬ laꞈ gʼawˇ hui lehˬ shoꞈ shaꞈ ve laiˉ ceuˬ kaꞈ gʼa hpuˇ ve yoˬ. Tawˇ pa haˉ te kʼo, oˇ htaˇ teˇ co˗e liꞈ daw maˇ cawˬ maˇ leh, chi beuꞈ ngaˬ hui cawˬ taˍ ve hkʼe Liꞈ hpu awˬ lawn kʼoˆ maˍ laˇ ve liꞈ htawˇ maˇ cawˬ. Chi hkʼoˆ kaꞈ, yawˇ hui bon gʼa maˍ cawˇ ve laiˉ chaw ceuˬ cawˬ sheˍ ve yoˬ. Awˬ laꞈ gʼawˇ hui chi hkʼe gʼa hpuˇ ve htawˇ, yawˇ hui nyi˗a kʼo te maˇ gʼa taˍ ve awˬ ceuˬ htaꞈ te gʼa tuˬ, hkʼaˬ nyiˇ chi hkʼawꞈ maˇ gaˬ sheˍ ve kaꞈ yawˇ hui “mvuhˇ naw ma awˬ hawˉ lo cawˬ taˍ ve” teˇ kaˬ le le lo ha lehˬ ve bon hkawˇ maˍ piˇ taˍ peuˬ.—Kawˇlawˇsehˇ 1:6, 23.

7. Yaˬhoˉvaˬ yawˇ ve chaw htaꞈ aˬ htoꞈ ma te tcuh gaˇ ve yawˇ hui shiˍ ve 100 hkʼawꞈ hpaˆ gaˬ˗oˬ ve tehꞈ, ngaˬ hui hkʼaˬ hkʼe te shiˍ ve le? Yawˇ hui chi hkʼe shiˍ˗oˬ htaˇ, hkʼaˬ hkʼe te ve le?

⁷ Chi beuꞈ teˇ co˗e. Yaˬhoˉvaˬ yawˇ ve chaw htaꞈ beˆ maˍ chehˇ leh yawˇ hui loˍ ve awˬ gʼaˇ awˬ shaˉ piˇ ve yoˬ. Maˇ˗awˍ ve ngaˬ hui htaꞈ beˆ maˍ laˇ ve lehˬ, daꞈ kehˬ ve awˬ ha hpu dawˇ pawnˍ piˇ ve Liꞈ hpu geh laˬ ve yoˬ. Liꞈ hpu hkʼaw Yeˍsuˆ Gʼuiˬ sha ve kanˉ te ve leh Yeˍsuˆ tanˬ˗aˉ ve kanˉ awˬ laꞈ gʼawˇ hui htaꞈ te tehꞈ, kʼoˆ piˇ taˉ ve awˬ lawn cawˬ ve yoˬ. (Maꞈhtehˍ 28:19, 20) Awˬ tehˬ kʼo, Ha pa 7 maˬ 1881 hkʼawꞈ htaˇ ve liꞈ kʼoˆ hkʼaw kʼoˆ taˍ ve, “Shu chiˇ mvuh laˇ ve maˇ heˆ leh paw sha la tuˬ ngaˬ hui htaꞈ kuˬ leh leuˆ yuˬ taˍ ve maˇ heˆ. Yaꞈ hkʼaˇ, ngaˬ hui cawˬ taˍ ve teˇ ceuˬ le le daꞈ ve awˬ lawn sha tanˇ hto toˇ tuˬ awˬ pon yoˬ.” Leh Kanˉ chi a shu htaꞈ piˇ ve le? liꞈ kʼoˆ 1919 hkʼawꞈ htaˇ te tawˆ taˍ ve hkʼaw kʼoˆ ve, “Ngaˬ hui htaꞈ te tcuh laˇ tuˬ ve kanˉ laiˉ ceuˬ cawˬ sheˍ. Yaꞈ hkʼaˇ, kanˉ chi Jawˇmawˇ ve kanˉ hpehꞈ ve pa taw ngaˬ hui kanˉ chi te gʼa tuˬ yawˇ awˬ gʼaˇ awˬ shaˉ peꞈ laˇ tuˬ yoˬ.” (Laˇhuˍ hkawˇ maˇ cawˬ.) Awˉ lawˉ peuˇ ve Hkriꞈ yaˇ hkʼa shuˍ awˬ viˉ aw nyi chi teˇ hpaˍ haꞈ hanˉ leh yawˇ hui te gʼa ve hkʼe te ve yoˬ. Awˬ lawn kʼo, teˇ gʼaˇ le le htaꞈ hto maˍ piˇ gʼa tuˬ, daꞈ kehˬ ve awˬ ha hpu yawˇ hui htaꞈ ga laˇ gʼa ve tehꞈ yonˍ ve yoˬ. Ngaˬ hui htawˇ chi hkʼe yonˍ gʼa ve yoˬ.

8-9. Hto toˇ ve kanˉ uiˍ la mvuh la tuˬ Yaˬhoˉvaˬ yawˇ ve kanˉ hkʼaˇ hkʼaˬ hkʼe ve awˬ hkʼaˇ htaꞈ yehˇ ve le?

⁸ Yaˬhoˉvaˬ ve kanˉ hkʼaˇ daꞈ ve awˬ lawn sha tanˇ hto toˇ tuˬ daꞈ jaˇ ve laꞈ caˉ htaꞈ yehˇ ve yoˬ. Laꞈ caˉ chi teˇ hpaˍ lehˬ, liꞈ kʼoˆ teˇ hpaˍ, “Hpanˍ taˍ ve awˬ han,” awˬ hkawˇ tawˆ tuˬ awˬ hkʼeun, kaˇ awˬ hkawˇ tawˆ ve, ri di˗o (radio) hkʼaw tawˆ ve, leh chi beuꞈ teˇ co˗e awˬ hkʼeun awˬ suhˉ awˬ suhˉ kaꞈ tawˆ la ve yoˬ. Chi hkʼoˆ kaꞈ, Gʼuiˬ sha ve kanˉ hkʼaˇ laiˉ chaw ceuˬ tawˇ hkawˇ oˇ htaˇ aꞈ kehˉ yuˬ tawˆ maˇ ve yoˬ. Aˬ htoꞈ ma  pa taw le? Chaw ceuˬ teˇ ceuˬ le le daꞈ ve awˬ lawn sha tanˇ gʼa kaˇ cawˇ ve pa taw Yaˬhoˉvaˬ lehˬ chaw mehˆ hpfuhˇ htaꞈ maˇ nyi. Yawˇ awˬ gʼuˇ suhˍ htaˇ kaꞈ kʼoˆ taˍ ve, daꞈ ve awˬ lawn sha tanˇ chi ‘mvuhˇ miˬ teˇ peˆ le le, awˬ ceuˬ awˬ hkʼaˇ teˇ ceuˬ le le, tawˇ hkawˇ teˇ ceuˬ le le, chaw ceuˬ teˇ ceuˬ le le htaꞈ maˇ kʼoˆ,’ gʼa kaˇ cawˇ ve yoˬ. (Hpeuꞈ maˍ ve 14:6, 7) Gʼuiˬ sha ve mvuhˇ miˬ daꞈ ve awˬ lawn sha tanˇ teˇ gʼaˇ le le htaꞈ yawˇ kaˇ tcuh gaˇ ve yoˬ.

⁹ Yaꞈ hkʼaˇ, chaw teˇ hpaˍ hpaˍ htaꞈ ngaˬ hui tawˇ gʼa yaw daꞈ tuˬ haˍ ve yoˬ. Tawˇ pa haˉ te kʼo, hkehˉ chaw haˉ kuiˬ yehˬ awˬ baˬ ve chaw maˇ loꞈ˗e tcuh laˇ ve yoˬ. Ngaˬ hui chaw chi teˇ hpaˍ geh hkʼaˬ hkʼe te yaw daꞈ gʼa tuˬ le? Hkʼe te leh Yaˬhoˉvaˬ ve kanˉ hkʼaˇ chaw guiˇ kuiˬ lo hto toˇ tuˬ ve awˬ hkʼaˇ awˬ suhˉ ca ve yoˬ. Tawˇ pa haˉ te kʼo, 2001 hkʼawꞈ htaˇ, liꞈ kʼoˆ keu leh caꞈ tuˬ leh awˬ nu ve awˬ hkʼaˇ Hpaˉlanˍ mvuhˇ miˬ hkʼaw awˉ lawˉ yehˇ tuˬ Uˉ peunˍ ve Kawˍmiˍtiˍ a hkaw˗anˬ piˇ ve yoˬ. Peuˬ leh awˬ nu ve mvuhˇ miˬ kaꞈ kʼawꞈ yehˇ ve yoˬ. Ngaˬ hui kaꞈ awˬ bon gʼa ve yoˬ. Leh 2011 hkʼawꞈ htaˇ, Aˍmeˬriˆkaꞈ mvuhˇ miˬ Neuˇyawˆ venˇ lo chaw te to maˇ jaˇ kuiˬ teˇ kaˬ lo hto toˇ ve awˬ hkʼaˇ awˬ suhˉ teh ve yoˬ. Awˉ lawˉ teˇ hkʼawꞈ htaˇ, liꞈ kʼoˆ htu ve 102,129 kʼoˆ leh liꞈ kʼoˆ 68,911 kʼoˆ piˇ gʼa ve yoˬ. Leh Liꞈ hpu henˇ gaˇ ve chaw 4,701 gʼaˇ cawˬ ve yoˬ. Kanˉ chi htaꞈ Yaˬhoˉvaˬ ga laˇ chehˇ ve tehꞈ gʼa mawˬ ve yoˬ. Liꞈ kʼoˆ keu leh caꞈ tuˬ leh awˬ nu ve awˬ ceuˬ kaꞈ teˇ kaˬ le le lo yehˇ tuˬ Uˉ peunˍ ve Kawˍmiˍtiˍ a hkaw˗anˬ piˇ ve yoˬ.

10. Ngaˬ hui hto toˇ leh maˍ cheuˬ la tuˬ hkʼaˬ hkʼe te cawˇ ve le?

¹⁰ Nawˬ te gʼa ve awˬ ceuˬ. Ngaˬ hui hto toˇ ve cheuˬ la tuˬ, hpawnˬ daꞈ kuiˬ hkʼaw Yaˬhoˉvaˬ maˍ laˇ ve yoˬ. Hkʼe te leh, nawˬ gʼa henˇ taˍ ve htaꞈ yuˬ yehˇ sheˍ. Nawˬ hto toˇ ve awˬ moˍ ehˉ hkʼaw hkʼaˬ htaˆ kaꞈ hto toˇ sheˍ. Nawˬ hto toˇ leh maˍ puiˉ tuˬ kaꞈ yawˇ hui ga laˇ gʼa ve yoˬ. Leh yawˇ hui ve daꞈ ve awˬ lawn nawˬ htaꞈ awˬ gʼaˇ peꞈ laˇ tuˬ yoˬ. Nawˬ tawˍ ve tsuhˇ ve gʼa hpuˇ ve htawˇ, yeunˇ hkanˍ leh hto toˇ sheˍ. A yeˇ uiˍ ve Liꞈ hpu awˬ tawn kʼoˆ taˍ ve hkʼe, Gʼuiˬ sha ve a loˍ awˬ hkʼaˇ suh gʼaꞈ te gʼa ve lehˬ ngaˬ hui ve awˬ gʼaˇ awˬ shaˉ htaꞈ maˇ heˆ, daꞈ kehˬ ve awˬ ha htaꞈ pa taw te gʼa ve tehꞈ shiˍ ve yoˬ. (Zaˍhkaˍriˆ 4:6) Gʼuiˬ sha ngaˬ hui htaꞈ awˬ gʼaˇ peꞈ laˇ tuˬ yoˬ tehꞈ yonˍ gʼa ve yoˬ. Chi yawˇ ve kanˉ hpehꞈ ve yoˬ.

11. Awˬ viˉ awˬ nyi hteˇ hteˇ shawˇ shawˇ leh gawˬ lehˍ ve cawˬ tuˬ, awˉ lawˉ peuˇ ve teˇ co˗e Uˉ peunˍ ve Kawˍmiˍtiˍ teˇ moˍ tiˉ te leh hkʼaˬ hkʼe ga piˇ ve le?

¹¹ Awˉ lawˉ peuˇ ve teˇ co˗e. Awˬ viˉ awˬ nyi hteˇ hteˇ shawˇ shawˇ leh gawˬ lehˍ ve cawˬ tuˬ, Yeˍruˆsaˍlehnˍ  venˇ hkʼaw ve Uˉ peunˍ ve Kawˍmiˍtiˍ teˇ moˍ tiˉ te leh kanˉ teˇ geh te ve yoˬ. (Tcuh yaˇ 2:42) Tawˇ pa haˉ te kʼo, 49 hkʼawꞈ C.E htaˇ awˬ guiˬ meuˇ shoˍ ve awˬ lawn jehˬ daꞈ ve yoˬ. Awˬ lawn chi htaꞈ gu tuˬ, Uˉ peunˍ ve Kawˍmiˍtiˍ htaꞈ daꞈ kehˬ ve awˬ ha hpu beˆ maˍ piˇ ve yoˬ. Hkriꞈ yaˇ awˬ lawn chi htaꞈ gu maˇ gʼa ve kʼo, hto toˇ ve kaꞈ awˬ bon maˇ gʼa. Uˉ peunˍ ve Kawˍmiˍtiˍ Yuˇdaꞈ chaw hpehꞈ ve htawˇ, yawˇ hui Yuˇdaꞈ chaw ve awˬ liˇ awˬ hkʼaˇ leh chi htaꞈ awˬ gʼaˇ piˇ ve chaw geh kanˇ paˆ maˇ gʼa. Yawˇ hui Liꞈ hpu hkʼaw leh daꞈ kehˬ ve awˬ ha hpu beˆ maˍ laˇ tuˬ ca ve yoˬ. (Tcuh yaˇ 15:1, 2, 5-20, 28) Awˬ bon hkʼaˬ hkʼe gʼa ve le? Yawˇ hui dawˇ cheˆ ve htaꞈ Yaˬhoˉvaˬ awˬ bon naꞈ piˇ ve yoˬ. Awˬ viˉ awˬ nyi teˇ moˍ tiˉ hpehꞈ leh gawˬ lehˍ cawˬ ve yoˬ. Leh hto toˇ ve kaꞈ uiˍ la mvuh la leh awˬ bon maˇ maˇ gʼa ve yoˬ.—Tcuh yaˇ 15:30, 31; 16:4, 5.

12. Chi beuꞈ teˇ co˗e Yaˬhoˉvaˬ ve kanˉ hkʼaˇ hteˇ hteˇ shawˇ shawˇ leh gawˬ lehˍ ve cawˬ tuˬ aˬ htoꞈ ma hpeuꞈ maw laˇ ve le?

¹² Chi beuꞈ teˇ co˗e. Yaˬhoˉvaˬ ve kanˉ hkʼaˇ yawˇ ve chaw htaꞈ hteˇ hteˇ shawˇ shawˇ leh gawˬ lehˍ ve cawˬ tuˬ ga piˇ ve yoˬ. Ziˉonˍ ve Shaw nyi kuiˬ Taꞈ yehˬ leh Yeˍsuˆ Jawˇmawˇ te ve htaꞈ Bon maˍ ve (Laˇhuˍ hkawˇ maˇ cawˬ.) Ha pa 11 maˬ 1895 hkʼawꞈ liꞈ mehˆ hpfuhˇ 15 hkʼaw ve awˬ lawn lonˉ ma lehˬ “Keunˍ daꞈ cawˇ daꞈ ve hkʼe, nyi sha ve awˬ hkʼaw lo te˗o.” Chi lehˬ 1 Kawˇrenˍhtuˆ liꞈ 14:40 hkʼaw yuˬ laˬ taˍ ve yoˬ. Choˬ kaˬ lo kʼoˆ ve, Awˉ lawˉ peuˇ teˇ co˗e ve Hkriꞈ yaˇ awˬ moˍ hteˇ hteˇ shawˇ shawˇ cawˬ tuˬ awˬ laꞈ gʼawˇ hui liꞈ laiˉ kʼoˆ bvuhꞈ piˇ ve yoˬ. “Aˬ sho˗eˬ htaˇ hkʼa bvuhꞈ taˍ ve teˇ hpaˍ lehˬ, ngaˬ hui htaꞈ maˍ laˇ tuˬ ve awˬ pon bvuhꞈ taˍ ve yoˬ.” Chi na yuˬ tuˬ a yeˇ uiˍ jaˇ. (Roˉmaꞈ 15:4) Awˉ lawˉ peuˇ ve Hkriꞈ yaˇ hkʼe, chi beuꞈ teˇ co˗e kaꞈ Gʼuiˬ sha ve kanˉ hkʼaˇ coˇ caˇ leh, Hkriꞈ yaˇ awˬ moˍ hteˇ hteˇ shawˇ shawˇ leh gawˬ lehˍ ve cawˬ tuˬ te ve yoˬ. Tawˇ pa haˉ te kʼo, nawˬ awˬ nu ve Hkriꞈ yaˇ awˬ moˍ hkʼaw maˇ heˆ leh shu mvuhˇ miˬ lo kʼai leh hpawnˬ daꞈ˗e ve kʼo, Shaw nyi kuiˬ Taꞈ yehˬ hkʼaˬ teˇ lawn henˇ ve leh hkʼaˬ hkʼe te henˇ ve nawˬ shiˍ tuˬ yoˬ. Choˬ kaˬ lo leh nawˬ ve Hkriꞈ yaˇ awˬ moˍ hkʼaw hpawnˬ daꞈ ve peun daꞈ ve tehꞈ nawˬ maˇ dawˇ. Chaw yaˇ teˇ gʼaˇ le le cawˇ daꞈ hawˍ daꞈ leh teˇ moˍ tiˉ hpehꞈ gʼa ve chi Gʼuiˬ sha ve daꞈ kehˬ ve awˬ ha hpu ceh tiˉ ga laˇ gʼa ve yoˬ.—Zeˍhpaˍniˆ 3:9.

13. Yaˍkoˆ liꞈ 3:17 hkʼaw ve dawˇ nyi htaˇ, a shu yawˇ awˬ to htaꞈ hkʼaˬ hkʼe na nyi cawˇ ve le?

¹³ Nawˬ te gʼa ve awˬ ceuˬ. Yaˬhoˉvaˬ yawˇ ve chaw htaꞈ “cawˇ daꞈ hawˍ daꞈ” tcuh gaˇ ve yoˬ. (Eˇfeˇsuꞈ 4:1-3) Chi htaꞈ pa taw, ‘Hkriꞈ yaˇ awˬ moˍ gawˬ lehˍ ve cawˬ leh cawˇ daꞈ hawˍ daꞈ ve cawˬ tuˬ ngaˬ ga piˇ chehˇ˗aw laˇ? Shehˍ kʼai paˍ hkawˇ ngaˬ na chehˇ˗aw laˇ? Ngaˬ Hkriꞈ yaˇ awˬ moˍ hkʼaw awˬ vuiˬ cawˬ ve  kʼo, shu ngaˬ htaꞈ yonˍ gʼa˗aw laˇ? Ngaˬ awˬ yanˇ cawˇ cawˇ te leh shu htaꞈ ga piˇ chehˇ˗aw la?’ Chi teˇ hpaˍ a shu yawˇ awˬ to htaꞈ na nyi cawˇ ve yoˬ. (Yaˍkoˆ 3:17 gʼaw sheˍ.) Nawˬ pa keunˍ pa cawˇ ve htaꞈ mawˬ ve kʼo, daꞈ kehˬ ve awˬ ha hpu ga laˇ tuˬ lawˬ sheˍ. Nawˬ ve te hkʼaˇ dawˇ hkʼaˇ pa tuˬ daꞈ kehˬ ve awˬ ha hpu ga laˇ tcuh ve kʼo, awˬ viˉ awˬ nyi kaꞈ nawˬ htaꞈ haꞈ leh awˬ hpfuhˇ shiˍ tuˬ yoˬ.

14. Kawˇlawˇsehˇ liꞈ 1:9, 10 hkʼaw awˉ lawˉ peuˇ teˇ co˗e htaˇ Gʼuiˬ sha yawˇ ve chaw ‘yawˇ ve a loˍ htaꞈ hkʼa biˇ biˇ shiˍ tuˬ’ hkʼaˬ hkʼe ga piˇ ve le?

¹⁴ Awˉ lawˉ peuˇ teˇ co˗e htaˇ. Yaˬhoˉvaˬ yawˇ ve chaw htaꞈ gʼa maˍ ve ha lehˬ jaˇ. (Chiˇ mvuh ve 32:8) Gʼuiˬ sha lehˬ yawˇ ve chaw yawˇ htaꞈ shiˍ tcuh gaˇ ve, haꞈ tcuh gaˇ ve, leh co co taiˍ taiˍ ve a shaꞈ gʼa tcuh gaˇ ve yoˬ. Yaꞈ hkʼaˇ, Gʼuiˬ sha yawˇ hui htaꞈ maˇ maˍ piˇ ve kʼo, chi ve hkʼa peu˗eˬ te maˇ gʼa taˬ. (Yoˇhanˬ 17:3) Awˉ lawˉ peuˇ teˇ co˗e htaˇ, Gʼuiˬ sha yawˇ ve chaw htaꞈ maˍ tuˬ Hkriꞈ yaˇ awˬ moˍ hkʼaw ve chaw htaꞈ yehˇ ve yoˬ. (Kawˇlawˇsehˇ 1:9, 10 gʼaw sheˍ.) Daꞈ kehˬ ve awˬ ha hpu lehˬ “ga piˇ shehˍ hpaˇ” hpehꞈ leh awˬ laꞈ gʼawˇ hui htaꞈ maˍ piˇ tuˬ yoˬ tehꞈ Yeˍsuˆ ka tiꞈ te taˍ ve yoˬ. (Yoˇhanˬ 14:16) Awˬ laꞈ gʼawˇ hui Liꞈ hpu htaꞈ hkʼa dehꞈ na gʼa tuˬ, leh Yeˍsuˆ maˍ ve leh te ve awˬ lawn teˇ hpaˍ htaꞈ tawnˇ gʼa tuˬ, daꞈ kehˬ ve awˬ ha hpu ga piˇ ve yoˬ. Yawˇ hui bvuhꞈ taˍ ve ha lehˬ ve bon hkawˇ liꞈ hkʼaw ngaˬ hui gʼaw hpehꞈ ve yoˬ. Chi ve teˇ hpaˍ awˉ lawˉ peuˇ ve Hkriꞈ yaˇ yonˍ hkʼaˇ yonˍ yeˬ tuˬ, yawˇ hui Yaˬhoˉvaˬ leh yawˇ ve Yaˇ Yeˍsuˆ htaꞈ haꞈ tuˬ, leh yawˇ hui hkʼa dehꞈ haꞈ daꞈ tuˬ ga piˇ ve yoˬ.

15. Yaˬhoˉvaˬ ka tiꞈ te taˍ ve hkʼe gʼaꞈ te ve tehꞈ Iˉsaˍyaˆ liꞈ 2:2, 3 hkʼaw nawˬ htaꞈ aˬ htoꞈ ma hpeuꞈ maw laˇ ve le?

¹⁵ Chi beuꞈ teˇ co˗e kaꞈ. Yaˬhoˉvaˬ awˬ gʼuˇ suhˍ htaˇ kaꞈ kʼoˆ taˍ ve, “laˬ tuˬ ve awˬ yanˇ awˬ hkʼaw lo” chaw teˇ ceuˬ le le Yaˬhoˉvaˬ maˍ piˇ ve htaꞈ gʼa tuˬ, mvuh jaˇ ve hkʼaw pui lo laˬ tuˬ yoˬ. (Iˉsaˍyaˆ 2:2, 3 gʼaw sheˍ.) Chi beuꞈ teˇ co˗e tcuh kaˍ paˍ tawˇ hkawˇ chi awˬ tehˬ hpehꞈ la ve htaꞈ ngaˬ hui gʼa mawˬ ve yoˬ. Awˬ tehˬ oˉ kʼoˍ pui ve lehˬ, maˇ heˆ heˆ ve oˉ kʼoˍ pui ve hkʼa peu˗eˬ aꞈ kehˉ daꞈ ve yoˬ. Chi hkʼoˆ kaꞈ, Yaˬhoˉvaˬ lehˬ hti caˇ hti dawˬ ve pawehˇ lonˉ cuˇ yiˍ  maˇ maˇ ngaˬ hui htaꞈ peꞈ laˇ ve yoˬ. (Iˉsaˍyaˆ 25:6) Yaꞈ hkʼaˇ, Yaˬhoˉvaˬ lehˬ “ka tiꞈ yeˬ leh cuˇ yiˍ cawˬ ve awˬ ceˬ” geh laˬ ve cuˇ yiˍ ceh peꞈ laˇ ve maˇ heˆ. Gʼuiˬ sha ngaˬ hui htaꞈ cuˇ yiˍ laiˉ ceuˬ kaꞈ peꞈ laˇ ve yoˬ. Tawˇ pa haˉ te kʼo, liꞈ kʼoˆ hkʼaw ve awˬ lawn leh bon maˍ hkawˇ teˇ hpaˍ, yaˇ ehˉ ve VDO, leh VDO teˇ hpaˍ kaꞈ cawˬ ve yoˬ. (Maꞈhtehˍ 24:45) Yawˇbaˆ ve awˬ chawˇ Eˇliˇhuˆ dawˇ ve hkʼe ngaˬ hui kaꞈ dawˇ ve yoˬ. Yawˇ kʼoˆ ve, “[Gʼuiˬ sha] lehˬ shu aꞈ kehˉ uiˍ jaˇ ve saˍ laꞈ lonˉ hpehꞈ ve yoˬ.”—Yawˇbaˆ 36:22.

16. Yaˬhoˉvaˬ maˍ laˇ ve htaꞈ nawˬ awˬ bon gʼa tuˬ hkʼaˬ hkʼe gʼa te cawˇ ve le?

¹⁶ Nawˬ te gʼa ve awˬ ceuˬ. Nawˬ gʼaw ve awˬ ceuˬ leh Liꞈ hpu hkʼaw gʼa henˇ ve awˬ ceuˬ yuˬ yehˇ gʼa tuˬ, Gʼuiˬ sha ve daꞈ kehˬ ve awˬ ha hpu nawˬ htaꞈ ga laˇ tuˬ yoˬ. Chiˇ mvuh ve liꞈ bvuhꞈ paˍ bvuhꞈ taˍ ve hkʼe nawˬ bon lawˬ sheˍ. Choˬ kaˬ lo kʼoˆ ve, “Gʼuiˬ sha˗oˬ, nawˬ te tcuh gaˇ ve awˬ ceuˬ, ngaˬ htaꞈ a ciˉ maˍ laˇ˗oˆ. Ka tiꞈ yeˬ ve awˬ hkʼaw lo ngaˬ nawˬ ve tawˇ htaꞈ na yuˬ tuˬ yoˬ. Nawˬ ve kanˉ htaꞈ coˇ caˇ leh te puiˉ tuˬ ngaˬ htaꞈ maˍ laˇ˗oˆ.” (Chiˇ mvuh ve 86:11) Chi htaꞈ pa taw, nawˬ Liꞈ hpu gʼaw leh dawˇ nyi ve, Yaˬhoˉvaˬ ve kanˉ hkʼaˇ gu laˇ taˍ ve Hkriꞈ yaˇ ve liꞈ kʼoˆ teˇ hpaˍ htaꞈ kaꞈ gʼaw sheˍ. Nawˬ cuˇ yiˍ maˇ maˇ gʼa tuˬ ceh dawˇ law taˍ ve maˇ heˆ tehꞈ tawnˇ taˍ sheˍ. Yaꞈ hkʼaˇ, nawˬ gʼa henˇ ve awˬ ceuˬ awˬ tehˬ hpehꞈ ve tehꞈ, yonˍ gʼa tcuh leh chi ve nawˬ a shaꞈ teꞈ kuiˬ hkʼaw yuˬ yehˇ sheˍ. Nawˬ chi hkʼe te gʼa tuˬ daꞈ kehˬ ve awˬ ha hpu ga laˇ tuˬ yoˬ. Chi hkʼoˆ kaꞈ, nawˬ awˬ viˉ awˬ nyi htaꞈ kaꞈ awˬ gʼaˇ gʼa piˇ ve yoˬ. (Heˍbrehˇ 10:24, 25) Aˬ htoꞈ ma pa taw le? Awˬ lawn kʼo, yawˇ hui nawˬ ve yehˬ kʼa hkʼaw ve chaw hkʼe hpehꞈ ve yoˬ. Nawˬ ve dawˇ hkʼaˇ hkʼe hkʼawꞈ tuˬ, nawˬ ve awˬ vuiˬ htaꞈ hkʼa dehꞈ te gʼa tuˬ, leh Gʼuiˬ sha ve daꞈ kehˬ ve awˬ ha hpu ga laˇ tuˬ nawˬ bon lawˬ sheˍ. Awˬ hkʼaˇ chi ve teˇ hpaˍ htaꞈ pa taw, nawˬ Yaˬhoˉvaˬ leh Yeˍsuˆ ve “yawˬ” htaꞈ haꞈ leh awˬ hpfuhˇ shiˍ ve tehꞈ hpeuꞈ maw piˇ ve yoˬ.—Yoˇhanˬ 21:15-17.

17. Nawˬ Yaˬhoˉvaˬ ve kanˉ hkʼaˇ htaꞈ ka tiꞈ yeˬ ve tehꞈ hkʼaˬ hkʼe te hpeuꞈ maw piˇ gʼa tuˬ le?

¹⁷ Maˇ maw ve awˬ yanˇ hkʼaw Gʼuiˬ sha ve daꞈ kehˬ ve awˬ ha hpu beˆ maˍ piˇ ve kanˉ hkʼaˇ ceh tiˉ miˬ gui chi hkʼoˆ lo leuˉ taˉ tuˬ yoˬ. Chi htaꞈ pa taw, nawˬ ha lehˬ ha kʼa ve hkʼaw Yaˬhoˉvaˬ ve kanˉ hkʼaˇ hpawˇ chehˇ sheˍ. Chaw mehˆ hpfuhˇ htaꞈ maˇ nyi leh teˇ gʼaˇ le le htaꞈ daꞈ ve awˬ lawn sha tanˇ hto maˍ piˇ tuˬ, nawˬ Yaˬhoˉvaˬ haꞈ pehnˇ ve htaꞈ gʼa henˇ yuˬ ve yoˬ. Hkriꞈ yaˇ awˬ moˍ hkʼaw cawˇ daꞈ hawˍ daꞈ tuˬ ga piˇ gʼa tuˬ, hteˇ hteˇ shawˇ shawˇ leh dawˇ sha gawˬ lehˍ cawˬ ve Gʼuiˬ sha htaꞈ nawˬ henˇ yuˬ gʼa ve yoˬ. Gʼuiˬ sha nawˬ htaꞈ gu laˇ ve teˇ ceuˬ le le htaꞈ henˇ yuˬ tuˬ, nawˬ ve Saˍ laꞈ lonˉ hkawˇ na sheˍ. Saˍtanˍ ve awˬ yanˇ peuˬ la paˇ neˇ htaˇ, nawˬ kawˆ tuˬ maˇ loˍ. Yaꞈ hkʼaˇ, Yaˬhoˉvaˬ ve kanˉ hkʼaˇ htaꞈ ka tiꞈ yeˬ leh yawˇ ve kanˉ te ve chaw awˬ paˇ lo haꞈ hanˉ leh huˉ chehˇ tuˬ yoˬ.