Liꞈ hpu hkʼaw leh chaw yaˇ teˇ co˗e peuˬ teˇ co˗e, Hkriꞈ yaˇ chi hkʼe te gʼa ve maˇ gʼa kʼoˆ laˇ taˍ.

Chi teˇ tawn Liꞈ hpu laiˉ kʼoˆ hkʼaw yanˍ tawˆ ve lehˬ, Pawˇluꞈ ve awˬ co˗e htaˇ chaw suh˗oˬ ve awˬ tan Baˆtiˆsaˬ haꞈ yuˬ piˇ gʼa ve tehꞈ chaw laiˉ gʼaˇ dawˇ tuˬ te piˇ ve yoˬ. Tawˇ pa haˉ te kʼo, Liꞈ hpu teˇ kʼoˆ hkʼaw chi teˇ tawn htaꞈ yanˍ tawˆ ve lehˬ, “chaw suh˗oˬ ve maˇ kʼawꞈ teꞈ tu la ve kʼo, aˬ htoꞈ ma te chaw suh˗oˬ ve awˬ pon Baˆtiˆsaˬ haꞈ yuˬ piˇ ve chaw cawˬ ve le?”

Liꞈ hpu hpawˇ chaˬ nyi tehˆ nyi paˍ 2 gʼaˇ htaꞈ teˇ geh nyi sheˍ. Dr. Ke˗kaw˗le Lawˆvoꞈ kʼoˆ ve, Baˆtiˆsaˬ haꞈ yuˬ ve awˬ lawn dawˇ hkʼaˇ lehˬ, “Liꞈ hpu hkʼaw leh chaw yaˇ teˇ co˗e peuˬ teˇ co˗e, suh˗oˬ ve chaw awˬ tan Baˆtiˆsaˬ haꞈ yuˬ ve teˇ ceuˬ lehˬ, shaˉ hkiˆ htawˆ hkanˍ taˍ ve maˇ cawˬ.” Cuˇ yiˍ cawˬ paˍ Kaw˗daw D Fe Liꞈ hpu hpawˇ chaˬ nyi tehˆ nyi paˍ teˇ gʼaˇ kaꞈ chi hkʼe dawˇ ve yoˬ. “Liꞈ hpu hkʼaw leh chaw yaˇ teˇ co˗e peuˬ teˇ co˗e Baˆtiˆsaˬ haꞈ yuˬ ve chi hkʼe maˇ cawˬ. Liꞈ hpu awˬ suhˉ hkʼaw kaꞈ chi hkʼe maˇ kʼoˆ jaw. Awˉ lawˉ peuˇ ve Hkriꞈ yaˇ chi hkʼe te ve shaˉ hkiˆ teˇ kaˬ kaꞈ maˇ cawˬ. Tcuh yaˇ hui suh peuˬ hkʼawꞈ nawˉ chi hkʼe te ve bon liˇ teˇ hpaˍ teˇ moˍ kaꞈ maˇ cawˬ” tehꞈ yawˇ bvuhꞈ ve yoˬ.

Liꞈ hpu hkʼaw kʼoˆ ve, Yeˍsuˆ awˬ hkʼaˇ suhˍ gʼaꞈ yuˬ ve chaw htaꞈ yawˇ tawˇ piˇ taˉ ve, “chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o. . . . Yawˇ hui htaꞈ baˆtiˆsaˬ piˇ˗oˆ.” (Maꞈhtehˍ 28:19, 20) Hkʼaˬ ve teˇ gʼaˇ awˬ laꞈ gʼawˇ hpehꞈ gaˇ leh Baˆtiˆsaˬ maˇ haꞈ yuˬ sheˍ htaˇ, yawˇ Yaˬhoˉvaˬ leh yawˇ ve Yaˇ paˍ htaꞈ caˉ daꞈ ve awˬ lawn gʼa henˇ cawˇ sheˍ ve yoˬ. Yawˇ huiˉ maˬ nyiˇ gʼaˇ htaꞈ yonˍ leh na yuˬ ve tehꞈ gʼa hpeuꞈ maw piˇ sheˍ ve yoˬ. Suh˗oˬ leh tuˍ pfuh hkʼaw chehˇ ve chaw chi hkʼe te maˇ gʼa. Hkriꞈ yaˇ a shaꞈ teꞈ chehˇ sheˍ ve chaw kaꞈ yawˇ hui awˬ tan chi hkʼe te piˇ maˇ gʼa.—Cuˇ yiˍ piˇ ve 9:5, 10; Yoˇhanˬ 4:1; 1 Kawˇrenˍhtuˆ 1:14-16.

Hkʼe kʼo, Pawˇluꞈ ve tawˇ hkawˇ tcuhˉ kuiˬ hkʼaˬ hkʼe kʼoˆ gaˇ ve le?

Kawˇrenˍhtuˆ venˇ hkʼaw chehˇ ve chaw teˇ hpaˍ hpaˍ kʼawꞈ teꞈ tu la ve htaꞈ maˇ yonˍ. (1 Kawˇrenˍhtuˆ 15:12) Yawˇ hui ve dawˇ hkʼaˇ maˇ cawˇ ve tehꞈ Pawˇluꞈ hpeuꞈ maw piˇ ve yoˬ. Pawˇluꞈ kʼoˆ ve, yawˇ “teˇ nyi le le suh ve teˇ ceuˬ htaꞈ hpuˇ daꞈ chehˇ ve yoˬ.” Yaꞈ hkʼaˇ, kawˆ tuˬ uiˍ ve yawˇ suh˗e tuˬ te piˇ ve laiˉ pawˆ gʼa hpuˇ ve yoˬ. Pawˇluꞈ kaꞈ kʼawꞈ teꞈ tu la leh Yeˍsuˆ hkʼa shuˍ mvuhˇ naw ma hkʼoˆ taˆ˗e tuˬ yoˬ tehꞈ yonˍ gʼa ve yoˬ.—1 Kawˇrenˍhtuˆ 15:30-32, 42-44.

Kawˇrenˍhtuˆ venˇ hkʼaw chehˇ ve chaw leuˆ yuˬ taˍ ve Hkriꞈ yaˇ hpehꞈ ve kʼoˆ gaˇ lehˬ, Yawˇ hui shoꞈ shaꞈ ve teˇ nyi le le gʼa hpuˇ leh maˇ kʼawꞈ teꞈ tu la piˇ sheˍ htaˇ gʼa suh ve htaꞈ yawˇ hui na gʼa ve yoˬ. Yawˇ hui Baˆtiˆsaˬ haꞈ yuˬ htaˇ, “Yeˍsuˆ Hkriꞈ awˬ hkʼaw lo” teˇ moˍ tiˉ hpehꞈ tuˬ yoˬ. Yawˇ hui Yeˍsuˆ hkʼa shuˍ “suh ve awˬ hkʼaw lo baˆtiˆsaˬ hkanˍ” yuˬ ve yoˬ. (Roˉmaꞈ 6:3) Chi kʼoˆ gaˇ ve lehˬ, yawˇ hui Yeˍsuˆ hkʼa shuˍ tuꞈ ve hkanˍ ve leh suh ve gʼa hpuˇ leh kʼawꞈ teꞈ tu la tuˬ yoˬ.

Yeˍsuˆ Baˆtiˆsaˬ haꞈ yuˬ peuˬ hkʼawꞈ nawˉ aˬ laˬ hkʼe 2 hkʼawꞈ htaˇ, yawˇ tcuh yaˇ 2 gʼaˇ htaꞈ kʼoˆ piˇ ve, “ngaˬ hkanˍ ve Baˆtiˆsaˬ htaꞈ nawˬ huiˉ maˬ gʼa hkanˍ tuˬ yoˬ.” (Maˍkuˆ 10:38, 39) Chi ve teˇ tawn iˉ kaˆ awˬ hkʼaw lo Baˆtiˆsaˬ haꞈ yuˬ ve htaꞈ Yeˍsuˆ kʼoˆ gaˇ ve maˇ heˆ. Yaꞈ hkʼaˇ, yawˇ kʼoˆ gaˇ ve lehˬ, “suh ve awˬ hkʼaw lo Baˆtiˆsaˬ hkanˍ” yuˬ ve yoˬ. Yawˇ Gʼuiˬ sha htaꞈ awˬ leh hkʼa gaˬ ka tiꞈ yeˬ ve kʼoˆ gaˇ ve lehˬ, yawˇ kaꞈ gʼa suh˗e ve tehꞈ kʼoˆ ve yoˬ. Pawˇluꞈ bvuhꞈ ve, leuˆ yuˬ taˍ ve chaw lehˬ ‘Hkriꞈ geh teˇ geh gʼa tuꞈ gʼa hkanˍ’ tuˬ yoˬ. Leh yawˇ hui “Hkriꞈ geh teˇ geh awˬ meꞈ awˬ hponˇ gʼa tuˬ” yoˬ. (Roˉmaꞈ 8:16, 17; 2 Kawˇrenˍhtuˆ 4:17) Kʼawꞈ teꞈ tu la leh mvuhˇ naw ma hkʼoˆ lo taˆ˗e tuˬ yawˇ hui gʼa suh˗e ve yoˬ.

Chi htaꞈ pa taw Pawˇluꞈ chi hkʼe kʼoˆ ve cawˇ ve yoˬ. “Suh peuˬ ve chaw hui awˬ pon Baˆtiˆsaˬ hkanˍ ve chaw hui lehˬ, aˬ htoꞈ ma pa taw ca hkanˍ ve le? Suh ve chaw hui awˬ tehˬ awˬ na maˇ kʼawꞈ teꞈ tu la ve kʼo, aˬ htoꞈ ma pa taw yawˇ hui ve awˬ tan shu Baˆtiˆsaˬ hkanˍ yuˬ ve le?”