1-2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 A shaꞈ ngeh jaˇ leh “awˬ gʼaˇ nuˇ leh teꞈ chiˉ te maˇ gʼa ve” tehꞈ dawˇ puiˉ la ve yoˬ hehˉ. (Yawˇbaˆ 14:1) Leh teˇ pawˆ pawˆ ngaˬ hui awˬ gʼaˇ nuˇ ve anˇ tuˬ maˇ loˍ. Oˇ htaˇ teˇ co˗e Gʼuiˬ sha ve kanˉ te ve chaw laiˉ gʼaˇ htawˇ chi hkʼe dawˇ jaw ve yoˬ. Teˇ gʼaˇ gʼaˇ kʼo suh˗e gaˇ ve yoˬ. (1 Jawˇmawˇ 19:2-4; Yawˇbaˆ 3:1-3, 11; 7:15, 16) Yaꞈ hkʼaˇ, yawˇ hui chi hkʼe dawˇ ve teˇ pawˆ le le, yawˇ hui gʼaˇ va chehˇ ve Yaˬhoˉvaˬ lehˬ, yawˇ hui htaꞈ awˬ gʼaˇ piˇ leh awˬ gʼaˇ uiˍ la tuˬ ga piˇ ve yoˬ. Yawˇ hui ve awˬ lawn kaꞈ Liꞈ hpu hkʼaw cawˬ leh ngaˬ hui htaꞈ maˍ laˇ leh awˬ gʼaˇ kaꞈ peꞈ laˇ tuˬ yoˬ.—Roˉmaꞈ 15:4.

² Awˬ lawn chi ve hkʼaw Yaˬhoˉvaˬ ve kanˉ te ve chaw teˇ hpaˍ hpaˍ shoꞈ shaꞈ ve gʼaˇ hpuˇ leh awˬ gʼaˇ nuˇ tuˬ te piˇ ve teˇ geh henˇ tuˬ yoˬ. Tawˇ pa haˉ te kʼo, Yaˍkoˆ ve yaˇ paˍ Yoˇsehꞈ, mehˇ chawˇ ma Nawˉmiꞈ, Nawˉmiꞈ ve awˬ hkuiˇ ma Ruˉhtaˆ, Chiˇ mvuh ve liꞈ kaˇ nanˉ uiˍ 73 bvuhꞈ paˍ Leˍviˆ chaw, leh tcuh yaˇ Peˍtruˆ, Yaˬhoˉvaˬ yawˇ hui htaꞈ awˬ gʼaˇ uiˍ la tuˬ hkʼaˬ hkʼe ga piˇ ve le? Leh yawˇ hui ve awˬ lawn ngaˬ hui htaꞈ hkʼaˬ hkʼe maˍ laˇ gʼa ve le? Na hkawˇ chi ve teˇ hpaˍ htaꞈ hkʼawꞈ laˇ hkawˇ lehˬ, “[Yaˬhoˉvaˬ] lehˬ, nyi ma luˬ chehˇ ve chaw hui awˬ paˇ neˇ lo chehˇ taˍ ve yoˬ. Dawˇ law kuiˬ maˇ cawˬ ve chaw hui htaꞈ yawˇ ponˬ piˇ tuˬ yoˬ” tehꞈ ngaˬ hui yonˍ gʼa ve yoˬ.—Chiˇ mvuh ve 34:18.

3-4. Yoˇsehꞈ yaˇ nehˬ htaˇ aˬ htoꞈ ma gʼa hpuˇ ve le?

³ Yoˇsehꞈ a shaꞈ 17 hkʼawꞈ htaˇ zuhꞈ maˆ 2 maˬ htaꞈ gʼa mawˬ ve yoˬ. Chi ve 2 maˬ maˬ Gʼuiˬ sha geh laˬ ve yoˬ. Zuhꞈ maˆ chi ve lehˬ, teˇ nyi kʼo yawˇ a yeˇ uiˍ ve chaw hpehꞈ tuˬ leh yehˬ kʼa hkʼaw ve chaw yawˇ htaꞈ yawˆ yan piˇ ve kaꞈ gʼa tuˬ yoˬ. (Awˬ hkuiˉ puiˍ 37:5-10) Yawˇ zuhꞈ maˆ mawˬ peuˬ hkʼawꞈ nawˉ maˇ maw, yawˇ ve a shaꞈ teꞈ hkʼaˇ pa kʼai jaˇ.  Yawˇ yawˆ yan ve htaꞈ gʼa cawˇ ve htawˇ, awˬ viˉ paˍ hui yawˇ shu ve awˬ ceˬ te tuˬ hawˇ piˇ ve yoˬ. Hkʼe te leh, Eˇjiˇtuꞈ mvuhˇ miˬ hkʼaw maꞈ poˍ lonˉ Pawˇtiˆhpaˍ ve yehˬ hkʼaw yawˇ kanˉ gʼa te ve yoˬ. (Awˬ hkuiˉ puiˍ 37:21-28) Awˬ pa haꞈ jaˇ ve yaˇ hpehꞈ ve htawˇ, chi teˇ hkui Yoˇsehꞈ lehˬ, Gʼuiˬ sha htaꞈ oˉ kʼoˍ maˇ pui ve Eˇjiˇtuꞈ chaw ve awˬ ceˬ gʼa te ve yoˬ.—Awˬ hkuiˉ puiˍ 39:1.

⁴ Yoˇsehꞈ ve a shaꞈ teꞈ hkʼaˇ haˍ jaˇ ve gʼa hpuˇ ve yoˬ. Pawˇtiˆhpaˍ ve awˬ miˇ ma Yoˇsehꞈ yawˇ htaꞈ nyiˉ pehˇ laˇ ve tehꞈ she pfuhˍ piˇ ve yoˬ. Pawˇtiˆhpaˍ Yoˇsehꞈ htaꞈ maˇ na nyi piˇ sheˍ ve htawˇ, yawˇ htaꞈ htawnˍ hkʼaw lo yuˬ keu piˇ leh sho caˆ peh tiˍ piˇ ve htaꞈ dawˇ nyi sheˍ. (Awˬ hkuiˉ puiˍ 39:14-20; Chiˇ mvuh ve 105:17, 18) Oˇ ve teˇ yanˇ Yoˇsehꞈ yaˇ nehˬ hpehꞈ ve yoˬ. Shu ve awˬ miˇ ma htaꞈ nyiˉ pehˇ ve tehꞈ she pfuhˍ piˇ ve, yawˇ hkʼaˬ hkʼe dawˇ ve htaꞈ dawˇ nyi sheˍ. Awˬ lawn chi gʼa kaˇ ve chaw lehˬ Yoˇsehꞈ ve Gʼuiˬ sha htaꞈ nyi cha tuˬ te piˇ ve yoˬ hehˉ. Oˇ ve teˇ yanˇ Yoˇsehꞈ awˬ gʼaˇ nuˇ jaˇ ve anˇ tuˬ maˇ loˍ!

5. Yoˇsehꞈ awˬ gʼaˇ nuˇ jaˇ ve htaꞈ hkʼaˬ hkʼe te haꞈ yuˬ gʼa ve le?

⁵ Yoˇsehꞈ awˬ ceˬ hpehꞈ leh peuˬ hkʼawꞈ nawˉ htawnˍ hkʼaw lo gʼa chehˇ ve yoˬ. Leh yawˇ dawˇ taˍ ve hkʼe te maˇ gʼa. Yawˇ a shaꞈ teꞈ hkʼaˇ pa gaˇ ve htawˇ pa maˇ gʼa. Yaꞈ hkʼaˇ, yawˇ daꞈ ve hpawˇ hkʼaˬ htaˆ kaꞈ dawˇ nyi tuˬ aˬ htoꞈ ma ga piˇ ve le? Yawˇ te maˇ gʼa ve awˬ ceuˬ htaꞈ dawˇ nyi cawˇ ve aꞈ kehˉ, yawˇ gʼa ve awˬ vuiˬ htaꞈ kaiˬ ve hkʼaw te ve yoˬ. Leh a yeˇ uiˍ jaˇ ve lehˬ, yawˇ a shaꞈ teꞈ kuiˬ hkʼaw Yaˬhoˉvaˬ htaꞈ a yeˇ uiˍ jaˇ ve tehꞈ shawˍ ve yoˬ. Leh Yaˬhoˉvaˬ Yoˇsehꞈ te ve teˇ ceuˬ le le htaꞈ awˬ bon naꞈ piˇ ve yoˬ.—Awˬ hkuiˉ puiˍ 39:21-23.

6. Yoˇsehꞈ yawˇ ve zuhꞈ maˆ htaꞈ awˬ gʼaˇ hkʼaˬ hkʼe gʼa ve le?

⁶ Yoˇsehꞈ yawˇ ve zuhꞈ maˆ Yaˬhoˉvaˬ geh laˬ ve htaꞈ dawˇ nyi htaˇ, awˬ gʼaˇ gʼa ve yoˬ. Zuhꞈ maˆ chi ve lehˬ, yawˇ ve yehˬ kʼa hkʼaw ve chaw htaꞈ gʼa kʼawꞈ mawˬ daꞈ tuˬ tehꞈ yonˍ gʼa leh, yawˇ ve a shaꞈ teꞈ hkʼaˇ kaꞈ daꞈ la tuˬ yonˍ gʼa ve yoˬ. Yoˇsehꞈ a shaꞈ 37 hkʼawꞈ htaˇ, yawˇ ve zuhꞈ maˆ chi awˬ tehˬ hpehꞈ la ve yoˬ!—Awˬ hkuiˉ puiˍ 37:7, 9, 10; 42:6, 9.

7. 1 Peˍtruˆ liꞈ 5:10 hkʼaw kʼoˆ taˍ ve hkʼe, ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ aˬ htoꞈ ma ga laˇ ve le?

⁷ Ngaˬ hui henˇ yuˬ tuˬ awˬ pon. Miˬ guiˬ chi haiˬ jaˇ leh chaw yaˇ ngaˬ hui htaꞈ maˇ hteˇ maˇ cawˇ te laˇ  tuˬ yoˬ tehꞈ Yoˇsehꞈ ve awˬ lawn shaˍ tiꞈ peꞈ laˇ ve yoˬ. Awˬ viˉ awˬ nyi teˇ hpaˍ kaꞈ ngaˬ hui nyi ma naˬ tuˬ teˇ pawˆ pawˆ te laˇ gʼa ve yoˬ hehˉ. Yaꞈ hkʼaˇ, Yaˬhoˉvaˬ lehˬ ngaˬ hui htaꞈ haꞈ shaˉ laˇ shehˍ hpaˇ hpehꞈ leh peun kuiˬ hpehꞈ ve yoˬ. Ngaˬ hui awˬ gʼaˇ nuˇ jaˇ leh Gʼuiˬ sha ve kanˉ maˇ te ve taˇ te. (Chiˇ mvuh ve 62:6, 7; 1 Peˍtruˆ 5:10 gʼaw sheˍ.) Yoˇsehꞈ aˬ laˬ hkʼe 17 hkʼawꞈ htaˇ, Yaˬhoˉvaˬ yawˇ htaꞈ zuhꞈ maˆ 2 maˬ mawˬ tcuh ve htaꞈ taˇ leunˇ sheˍ. Yaˬhoˉvaˬ yaˇ nehˬ yawˇ ve kanˉ te ve chaw htaꞈ yawˇ awˬ hpfuhˇ shiˍ ve tehꞈ ngaˬ hui hkʼa tawˍ lehˆ gʼa mawˬ ve yoˬ. Chi beuꞈ teˇ co˗e ve yaˇ nehˬ laiˉ gʼaˇ kaꞈ Yoˇsehꞈ hkʼa shuˍ Yaˬhoˉvaˬ htaꞈ yonˍ ve yoˬ. Yawˇ hui Gʼuiˬ sha htaꞈ ka tiꞈ yeˬ ve pa taw, maˇ hteˇ maˇ cawˇ ve hkʼaw htawnˍ hkʼaw lo gʼa chehˇ ve yoˬ.—Chiˇ mvuh ve 110:3.

8. Nawˉmiꞈ leh Ruˉhtaˆ aˬ htoꞈ ma gʼa hpuˇ ve le?

⁸ Meuꞈ lonˉ kaˆ lonˉ cawˬ ve pa taw, Nawˉmiꞈ leh yawˇ ve yehˬ kʼa yawˇ hui paw kuiˬ Yuˇdaꞈ mvuhˇ miˬ htaꞈ baˬ taˉ leh, Mawˇbaˆ mvuhˇ miˬ lo ca hpaw chehˇ kʼai ve yoˬ. Peuˬ leh Nawˉmiꞈ ve awˬ hpawˇ Eˇliˆmaˍlehˆ suh˗e leh yawˇ leh yaˇ paˍ 2 gʼaˇ htaꞈ baˬ taˉ piˇ ve yoˬ. Peuˬ leh yawˇ ve yaˇ paˍ 2 gʼaˇ kaꞈ Mawˇbaˆ chaw yaˇ miˇ Ruˉhtaˆ leh Awˇraˍpaˆ htaꞈ heuˆ ve yoˬ. Aˬ laˬ hkʼe 10 hkʼawꞈ peuˬ hkʼawꞈ nawˉ, Nawˉmiꞈ ve yaˇ paˍ 2 gʼaˇ yaˇ maˇ cawˬ sheˍ htaˇ suh˗e ve yoˬ. (Ruˉhtaˆ 1:1-5) Yaˇ miˇ chi ve 3 gʼaˇ nyi ma hkʼaˬ hkʼe taw luˬ ve htaꞈ dawˇ nyi sheˍ! Awˬ tehˬ kʼo, Ruˉhtaˆ leh Awˇraˍpaˆ lehˬ awˬ hpawˇ awˬ suhˉ kʼawꞈ heuˆ kaꞈ gʼa ve yoˬ. Hkʼe kʼo, Nawˉmiꞈ mawˇ jaˇ˗oˬ ve htaꞈ a shu nyi haꞈ shaˉ tuˬ ve le? Nawˉmiꞈ awˬ gʼaˇ nuˇ jaˇ leh kʼoˆ ve, “ngaˬ htaꞈ Nawˉmiꞈ tehꞈ taˇ kʼawꞈ kuˬ. Ngaˬ htaꞈ Maˍraˆ tehꞈ kʼawꞈ kuˬ˗oꞈ. Awˬ lawn kʼo, Gʼuiˬ sha lehˬ ngaˬ htaꞈ hkʼaˇ jaˇ ve awˬ ceuˬ peꞈ laˇ peuˬ.” Nawˉmiꞈ nyi ma luˬ jaˇ. Yawˇ Behˍlehˍhehnˍ venˇ lo kʼoꞈ˗e tuˬ dawˇ cheˆ leh Ruˉhtaˆ kaꞈ yawˇ geh kʼai ve yoˬ.—Ruˉhtaˆ 1:7, 18-20.

9. Ruˉhtaˆ liꞈ 1:16, 17, 22 hkʼaw kʼoˆ taˍ ve hkʼe, Ruˉhtaˆ lehˬ Nawˉmiꞈ awˬ gʼaˇ gʼa tuˬ hkʼaˬ hkʼe te piˇ ve le?

⁹ Nawˉmiꞈ awˬ gʼaˇ nuˇ ve htaꞈ haꞈ yuˬ gʼa tuˬ aˬ htoꞈ ma ga piˇ ve le? Yawˇ htaꞈ ga piˇ ve lehˬ haꞈ pehnˇ ve teˇ ceuˬ yoˬ. Tawˇ pa haˉ te kʼo, Ruˉhtaˆ lehˬ Nawˉmiꞈ htaꞈ haꞈ ve pa taw, yawˇ htaꞈ maˇ baˬ taˉ. (Ruˉhtaˆ 1:16, 17, 22 gʼaw sheˍ.) Behˍlehˍhehnˍ venˇ lo chehˇ htaˇ, Ruˉhtaˆ yawˇ leh Nawˉmiꞈ awˬ pon caˬ nu gʼawˆ ve kanˉ hkeuꞈ jaˇ. Ruˉhtaˆ nyi ma daꞈ leh kanˉ te kaiˬ ve htaꞈ laiˉ gʼaˇ shiˍ ve yoˬ.—Ruˉhtaˆ 3:11; 4:15.

10. Ruˉhtaˆ leh Nawˉmiꞈ hkʼe haˍ ve gʼawˇ ve chaw htaꞈ Yaˬhoˉvaˬ hkʼaˬ hkʼe ha kʼaˉ piˇ ve le?

¹⁰ Ruˉhtaˆ leh Nawˉmiꞈ hkʼe haˍ ve gʼawˇ ve chaw htaꞈ Yaˬhoˉvaˬ ha kʼaˉ ve tehꞈ hpeuꞈ maw piˇ tuˬ, Yaˬhoˉvaˬ Iˉsaˍreˍlaˆ chaw htaꞈ awˬ liˇ tawˇ hkawˇ teˇ maˬ teh piˇ ve yoˬ. Haˍ ve gʼawˇ ve chaw awˬ pon ti mi jaˇ lo cawˬ ve caˬ htaꞈ maˇ gʼa gʼeuꞈ tehꞈ Gʼuiˬ sha mvuhˇ miˬ yaˇ htaꞈ awˬ liˇ teh piˇ ve yoˬ. (Oˉ kʼoˍ pui ve 19:9, 10) Chi htaꞈ pa taw, Nawˉmiꞈ leh Ruˉhtaˆ shu geh maˇ lawˬ kaꞈ caˇ tuˬ ca gʼa leh, yawˇ hui awˬ meꞈ awˬ hponˇ maˇ luˬ leh yaꞈ taw tuˬ kaꞈ maˇ loˍ.

11-12. Bawˇzaˆ Nawˉmiꞈ leh Ruˉhtaˆ ha lehˬ tuˬ hkʼaˬ hkʼe te piˇ ve le?

¹¹ Bawˇzaˆ paw shaˍ jaˇ leh Ruˉhtaˆ caˬ ca gʼawˆ˗e ve ti mi awˬ shehˍ hpaˇ hpehꞈ ve yoˬ. Ruˉhtaˆ awˬ hpawˇ mawˇ ve awˬ e htaꞈ haꞈ leh ka tiꞈ yeˬ ve htaꞈ Bawˇzaˆ nyi ma cawˇ jaˇ. Bawˇzaˆ Ruˉhtaˆ htaꞈ heuˆ leh Nawˉmiꞈ ve awˬ shinˉ awˬ ka miˬ guiˬ kaꞈ vuiˬ hkʼawꞈ ve yoˬ. (Ruˉhtaˆ 4:9-13) Peuˬ hkʼawꞈ nawˉ, yawˇ huiˉ maˬ yaˇ paˍ Awˇbehˆ meh ve cawˬ la leh Awˇbehˆ lehˬ jawˇ mawˇ Daˍviˆ ve awˬ puˍ lonˉ hpehꞈ ve yoˬ.—Ruˉhtaˆ 4:17.

¹² Awˇbehˆ yeˇ ehˉ htaˇ Nawˉmiꞈ gʼa taˆ ve hkʼaˬ hkʼe taw ha lehˬ ve htaꞈ dawˇ nyi sheˍ. Yawˇ nyi ma awˬ tawˬ hkʼa gaˬ Yaˬhoˉvaˬ htaꞈ awˬ bon uiˍ jaˇ kʼoˆ piˇ ve yoˬ. Yaꞈ hkʼaˇ, Nawˉmiꞈ leh Ruˉhtaˆ chi aꞈ kehˉ ha lehˬ jaˇ tuˬ aˬ htoꞈ ma cawˬ sheˍ ve le? Yawˇ hui kʼawꞈ teꞈ tu la htaˇ, Awˇbehˆ lehˬ Yaˬhoˉvaˬ ka tiꞈ te taˍ piˇ ve Meˍsiˉyaꞈ ve awˬ puˍ lonˉ hpehꞈ ve tehꞈ yawˇ hui shiˍ tuˬ yoˬ.

13. Nawˉmiꞈ leh Ruˉhtaˆ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹³ Ngaˬ hui henˇ yuˬ tuˬ awˬ pon. Ngaˬ hui shoꞈ shaꞈ ve gʼa hpuˇ leh awˬ gʼaˇ nuˇ htaˇ, nyi ma naˬ jaˇ ve  yoˬ hehˉ. Teˇ pawˆ pawˆ ngaˬ hui shoꞈ shaꞈ ve gʼa hpuˇ htaˇ, gu gʼa tuˬ awˬ hkʼaˇ ca maˇ mawˬ ve yoˬ hehˉ. Yaꞈ hkʼaˇ, awˬ yanˇ oˇ ve hkʼaw mvuhˇ naw ma hkʼoˆ ve Awˬ pa Yaˬhoˉvaˬ htaꞈ ngaˬ hui gʼa yonˍ leh awˬ viˉ awˬ nyi geh gʼa meuˆ daꞈ cawˇ ve yoˬ. Nawˉmiꞈ ve awˬ hpawˇ leh yaˇ paˍ hui htaꞈ maˇ kʼawꞈ teꞈ tu la piˇ sheˍ ve hkʼe, ngaˬ hui shoꞈ shaꞈ ve teˇ pawˆ le le Yaˬhoˉvaˬ te mehˉ laˇ ve maˇ heˆ. Yaꞈ hkʼaˇ, ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ yawˇ ga laˇ ve yoˬ. Gʼuiˬ sha lehˬ awˬ viˉ awˬ nyi htaꞈ cuˇ leh ngaˬ hui htaꞈ daꞈ ve awˬ ceuˬ te laˇ tcuh leh ngaˬ hui htaꞈ haꞈ ve tehꞈ hpeuꞈ maw laˇ ve yoˬ.—Tawˇ naˉ ve 17:17.

14. Aˬ htoꞈ ma te Leˍviˆ chaw teˇ gʼaˇ awˬ gʼaˇ nuˇ jaˇ ve le?

¹⁴ Chiˇ mvuh ve liꞈ kaˇ nanˉ uiˍ 73 bvuhꞈ paˍ lehˬ Leˍviˆ chaw hpehꞈ ve yoˬ. Yaˬhoˉvaˬ htaꞈ oˉ kʼoˍ pui kuiˬ hkʼaw yawˇ kanˉ gʼa te ve lehˬ daꞈ jaˇ ve awˬ vuiˬ hpehꞈ ve yoˬ. Yaꞈ hkʼaˇ, awˬ yanˇ teˇ yanˇ htaˇ yawˇ kaꞈ awˬ gʼaˇ nuˇ jaˇ tehꞈ dawˇ ve yoˬ. Aˬ htoꞈ ma pa taw le? Yawˇ haiˬ ve chaw leh uiˍ muiˬ caˆ muiˬ ve chaw htaꞈ hkawehˉ ve yoˬ. Awˬ tehˬ kʼo, yawˇ chaw haiˬ oˇ ve teˇ hpaˍ hkʼa shuˍ maˇ te gaˇ. Yaꞈ hkʼaˇ, chaw oˇ ve teˇ hpaˍ a shaꞈ teꞈ kuiˬ hkʼaw daꞈ ve laiˉ ceuˬ gʼa ve htaꞈ yawˇ gʼa mawˬ ve yoˬ. (Chiˇ mvuh ve 73:2-9, 11-14) Nyi˗a kʼo yawˇ hui paw sha leh teꞈ chiˉ maˇ gʼa dawˇ haˍ. Awˬ lawn kʼo, yawˇ hui teˇ ceuˬ le le cawˬ ve yoˬ. Yawˇ hui a shaꞈ teꞈ chehˇ kuiˬ hkʼaw dawˇ taˍ ve hkʼe te gʼa ve lehˬ Chiˇ mvuh ve liꞈ bvuhꞈ paˍ awˬ nuˇ jaˇ tuˬ te piˇ ve yoˬ. Leh yawˇ kʼoˆ ve, “oˇ hkʼe hpehꞈ ve kʼo, ngaˬ venˇ baˆ maˇ te leh, ngaˬ ve awˬ to htaꞈ daꞈ kehˬ piˇ taˍ ve lehˬ, aˬ htoꞈ ma awˬ bon cawˬ ve le?” Chi hkʼe ve dawˇ hkʼaˇ lehˬ kawˆ tuˬ cawˬ jaˇ leh yawˇ Yaˬhoˉvaˬ ve kanˉ maˇ te tuˬ te piˇ la gʼa ve yoˬ hehˉ.

15. Chiˇ mvuh ve liꞈ 73:16-19, 22-25 hkʼaw kʼoˆ taˍ ve hkʼe, Chiˇ mvuh ve liꞈ bvuhꞈ paˍ Leˍviˆ chaw chi teˇ gʼaˇ awˬ gʼaˇ nuˇ ve htaꞈ hkʼaˬ hkʼe te gʼaˇ ve le?

¹⁵ Chiˇ mvuh ve liꞈ 73:16-19, 22-25 gʼaw sheˍ. Leˍviˆ chaw “[Gʼuiˬ sha] ve bon yehˬ lo kʼai ve teˇ yanˇ htaˇ hehꞈ shiˍ la ve yoˬ.” Leh Yaˬhoˉvaˬ htaꞈ oˉ kʼoˍ pui ve awˬ nu ve chaw geh yawˇ gʼa chehˇ ve yoˬ. Oˇ kaˬ lo yawˇ nyi ma gawˬ lehˍ cawˬ ve, yawˇ a shaꞈ teꞈ kuiˬ hkʼaw daꞈ ve awˬ ceuˬ htaꞈ hkʼa dehꞈ dawˇ nyi gʼa ve, leh awˬ lawn oˇ ve htaꞈ caˉ daꞈ ve yawˇ bon lawˬ ve yoˬ. Yawˇ dawˇ ve awˬ ceuˬ kʼaˍ jaˇ ve tehꞈ shiˍ la leh chi yawˇ Yaˬhoˉvaˬ htaꞈ baˬ˗aˉ tuˬ te piˇ ve yoˬ. Haiˬ ve chaw lehˬ, “leˆ jaˇ ve chehˇ kuiˬ lo teh taˍ” leh awˬ leh meuˇ htaˇ, “kawˆ tuˬ uiˍ ve chehˇ kuiˬ lo gʼa gaˬ ve” tehꞈ yawˇ na gʼa la ve yoˬ. Yawˇ maˇ hkawehˉ˗o leh awˬ gʼaˇ maˇ nuˇ tuˬ, Yaˬhoˉvaˬ dawˇ ve hkʼe yawˇ gʼa dawˇ ve yoˬ. Yawˇ chi hkʼe te htaˇ,  nyi ma gawˬ lehˍ cawˬ la leh kʼawꞈ ha lehˬ la ve yoˬ. Yawˇ kʼoˆ ve, “ngaˬ [Yaˬhoˉvaˬ] htaꞈ gʼa taˍ peuˬ ve pa taw, miˬ guiˬ hkʼoˆ ngaˬ aˬ htoꞈ ma kʼawꞈ loˍ tuˬ sheˍ ve le?”

16. Leˍviˆ chaw chi teˇ gʼaˇ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹⁶ Ngaˬ hui henˇ yuˬ tuˬ awˬ pon. Haiˬ ve chaw daꞈ ve htaꞈ laiˉ ceuˬ gʼa leh a shaꞈ teꞈ kuiˬ hkʼaw ha lehˬ ve htaꞈ ngaˬ hui maˇ hkawehˉ cawˇ. Yawˇ hui ha lehˬ ve lehˬ, teˇ hkui teˇ yanˇ ceh cawˬ leh awˬ gʼuˇ suhˍ hpawˇ kaꞈ maˇ yeˬ. (Cuˇ yiˍ piˇ ve 8:12, 13) Ngaˬ hui yawˇ hui htaꞈ hkawehˉ ve kʼo, awˬ gʼaˇ nuˇ tuˬ te laˇ leh Yaˬhoˉvaˬ htaꞈ baˬ taˉ tuˬ te laˇ gʼa ve yoˬ hehˉ. Haiˬ ve chaw a shaꞈ teꞈ hkʼaˇ daꞈ ve laiˉ ceuˬ gʼa ve htaꞈ nawˬ hkawehˉ ve tehꞈ dawˇ la ve kʼo, Leˍviˆ chaw chi teˇ gʼaˇ te ve hkʼe te sheˍ. Yaˬhoˉvaˬ nawˬ htaꞈ haꞈ pehnˇ ve hkʼaw beˆ maˍ laˇ ve hkawˇ na sheˍ. Leh Yaˬhoˉvaˬ te tcuh gaˇ ve hkʼe te ve chaw geh awˬ chawˇ te sheˍ. Nawˬ a shaꞈ teꞈ kuiˬ hkʼaw teˇ ceuˬ le aꞈ kehˉ Gʼuiˬ sha htaꞈ haꞈ ve kʼo, nawˬ awˬ tehˬ ha lehˬ ve htaꞈ gʼa mawˬ tuˬ yoˬ. “Awˬ tehˬ awˬ na yeˬ ve a shaꞈ” yaꞈ kʼaw hkʼoˆ lo nawˬ chehˇ tuˬ yoˬ.—1 Tiˆmoˉseˍ 6:19.

17. Peˍtruˆ awˬ gʼaˇ nuˇ jaˇ tuˬ aˬ htoꞈ ma te piˇ ve le?

¹⁷ Tcuh yaˇ Peˍtruˆ lehˬ Gʼuiˬ sha ve kanˉ htaꞈ nyi ma pfuhˇ jaˇ ve chaw hpehꞈ ve yoˬ. Yaꞈ hkʼaˇ, yawˇ nyi ma haw puiˉ jaˇ. Leh teˇ pawˆ pawˆ kʼo, yawˇ tawˇ yaw ve, maˇ heˆ leh te ve, hkʼawꞈ nawˉ htaˇ yawˇ nyi ma luˬ tuˬ te piˇ ve yoˬ. Tawˇ pa haˉ te kʼo, teˇ pawˆ htaˇ Yeˍsuˆ tcuh yaˇ hui htaꞈ kʼoˆ piˇ ve, yawˇ tuꞈ ve hkanˍ ve gʼa hpuˇ leh gʼa suh˗e tuˬ yoˬ. Peˍtruˆ Yeˍsuˆ htaꞈ “chi hkʼe ve teˇ ceuˬ nawˬ htaꞈ a ciˉ kaꞈ maˇ gʼa heuˆ tehꞈ” kʼoˆ piˇ ve yoˬ. (Maꞈhtehˍ 16:21-23) Peuˬ leh Peˍtruˆ chi hkʼe dawˇ ve maˇ cawˇ tehꞈ Yeˍsuˆ kʼoˆ piˇ ve yoˬ. Leh chaw awˬ moˍ lonˉ Yeˍsuˆ htaꞈ peh la htaˇ, Peˍtruˆ nyi ma haw leh aˉ htaw gʼawˬ tawˆ leh paw hkuˇ lonˉ ve awˬ ceˬ teˇ gʼaˇ ve naˍ paw htaꞈ chaw cheˆ ve yoˬ. (Yoˇhanˬ 18:10, 11) Chi teˇ pawˆ kaꞈ Yeˍsuˆ Peˍtruˆ htaꞈ kʼoˆ piˇ ve nawˬ dawˇ ve maˇ cawˇ. Leh peuˬ hkʼawꞈ nawˉ teˇ ceuˬ kʼawꞈ hpehꞈ la htaˇ Peˍtruˆ kʼoˆ ve, awˬ nu ve awˬ laꞈ gʼawˇ Yeˍsuˆ htaꞈ baˬ taˉ ve htawˇ, ngaˬ nawˬ htaꞈ maˇ baˬ taˉ! (Maꞈhtehˍ 26:33) Yawˇ awˬ to htaꞈ yonˍ gʼa jaˇ ve pa taw, yawˇ ve awˬ gʼaˇ nuˇ kuiˬ htaꞈ nyi maˇ mawˬ. Yawˇ chaw yaˇ htaꞈ kawˆ ve pa taw, Yeˍsuˆ htaꞈ  3 pawˆ chiˇ baˬ ve yoˬ. Peuˬ hkʼawꞈ nawˉ Peˍtruˆ awˬ gʼaˇ nuˇ jaˇ leh “yawˇ tawˆ kʼai leh gʼaˇ hteꞈ hawˬ ve yoˬ.” (Maꞈhtehˍ 26:69-75) Yeˍsuˆ yawˇ htaꞈ venˇ baˆ hpehˇ laˇ˗aw laˇ tehꞈ yawˇ htawˇ dawˇ nawˬ dawˇ cawˬ ve yoˬ.

18. Peˍtruˆ awˬ gʼaˇ nuˇ ve htaꞈ gʼaˇ tuˬ Yeˍsuˆ hkʼaˬ hkʼe ga piˇ ve le?

¹⁸ Peˍtruˆ yawˇ awˬ gʼaˇ nuˇ jaˇ lehˬ, Yaˬhoˉvaˬ ve kanˉ maˇ te tuˬ maˇ te laˇ tcuh. Oˇ ve teˇ pawˆ yawˇ te yaꞈ peuˬ hkʼawꞈ nawˉ, yawˇ caˉ leh Yaˬhoˉvaˬ ve kanˉ kʼawꞈ te leh, awˬ nu ve tcuh yaˇ hui geh chehˇ taˍ sheˍ ve yoˬ. (Yoˇhanˬ 21:1-3; Tcuh yaˇ 1:15, 16) Peˍtruˆ daꞈ la tuˬ aˬ htoꞈ ma ga piˇ ve le? Chi awˬ gʼuˇ suhˍ htaˇ, Peˍtruˆ ve yonˍ hkʼaˇ maˇ mehˉ kʼai tuˬ, Yeˍsuˆ bonˍ lawˬ laˇ ve htaꞈ yawˇ tawnˇ gʼa leh, Yeˍsuˆ Peˍtruˆ htaꞈ kʼawꞈ la leh yawˇ ve awˬ viˉ awˬ nyi htaꞈ yonˍ hkʼaˇ hehnˇ la tuˬ ca ga piˇ˗oˆ tehꞈ kʼoˆ piˇ ve yoˬ. Bon lawˬ hkawˇ oˇ ve htaꞈ Yaˬhoˉvaˬ hkʼawꞈ piˇ ve yoˬ. Oˇ ve hkʼawꞈ nawˉ, Yeˍsuˆ Peˍtruˆ geh kʼai ve yoˬ. Yeˍsuˆ chi hkʼe te ve lehˬ, Peˍtruˆ htaꞈ awˬ gʼaˇ piˇ ve yoˬ. (Luˉkaꞈ 22:32; 24:33, 34; 1 Kawˇrenˍhtuˆ 15:5) Peuˬ hkʼawꞈ nawˉ, tcuh yaˇ hui teˇ haˉ mvuhˇ hkʼa htiˇ ngaˇ ca ve htawˇ teˇ hkeh kaꞈ maˇ gʼa. Hkʼe te leh, Yeˍsuˆ yawˇ hui htaꞈ yawˇ ve awˬ to maw piˇ leh, Peˍtruˆ Yeˍsuˆ htaꞈ hkʼaˬ hkʼe taw haꞈ ve kʼawꞈ kʼoˆ tcuh ve yoˬ. Yeˍsuˆ yawˇ haꞈ ve awˬ chawˇ htaꞈ venˇ baˆ hpehˇ piˇ leh yawˇ htaꞈ kanˉ kʼawꞈ piˇ ve yoˬ.—Yoˇhanˬ 21:15-17.

19. Chiˇ mvuh ve liꞈ 103:13, 14 hkʼaw ngaˬ hui ve venˇ baˆ htaꞈ Yaˬhoˉvaˬ nyi ve hkʼe nyi tuˬ hkʼaˬ hkʼe ga laˇ ve le?

¹⁹ Ngaˬ hui henˇ yuˬ tuˬ awˬ pon. Yeˍsuˆ Peˍtruˆ htaꞈ te piˇ ve awˬ hkʼaˇ Yeˍsuˆ Peˍtruˆ htaꞈ ha kʼaˉ jaˇ ve tehꞈ hkʼa tawˍ lehˆ hpeuꞈ maw piˇ leh Yeˍsuˆ yawˇ Awˬ pa htaꞈ hkʼa dehꞈ henˇ yuˬ gʼa ve yoˬ. Chi htaꞈ pa taw, ngaˬ hui te yaꞈ htaˇ, Yaˬhoˉvaˬ ngaˬ hui htaꞈ venˇ baˆ maˇ hpehˇ laˇ taˍ tehꞈ taˇ dawˇ. Saˍtanˍ ngaˬ hui htaꞈ chi hkʼe dawˇ tcuh gaˇ ve tehꞈ taˇ leunˇ sheˍ. Yaꞈ hkʼaˇ, ngaˬ hui awˬ to leh ngaˬ hui htaꞈ te yaꞈ laˇ ve chaw htaꞈ Yaˬhoˉvaˬ ngaˬ hui htaꞈ haꞈ ve hkʼe haꞈ leh, ngaˬ hui hkʼaˬ hkʼe taw te gʼa ve htaꞈ yawˇ na gʼa ve hkʼe na gʼa leh, yawˇ ngaˬ hui htaꞈ venˇ baˆ hpehˇ laˇ gaˇ ve hkʼe venˇ baˆ hpehˇ piˇ cawˇ ve yoˬ. Shu ngaˬ hui htaꞈ nyi ma luˬ tuˬ te laˇ htaˇ, ngaˬ hui kaꞈ chi hkʼe te cawˇ ve yoˬ.—Chiˇ mvuh ve liꞈ 103:13, 14 gʼaw sheˍ.

20. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

²⁰ Yoˇsehꞈ, Nawˉmiꞈ, Ruˉhtaˆ, Leˍviˆ chaw, leh Peˍtruˆ, yawˇ hui ve awˬ lawn “[Yaˬhoˉvaˬ] lehˬ, nyi ma luˬ chehˇ ve chaw hui awˬ paˇ neˇ lo chehˇ taˍ ve” tehꞈ ngaˬ hui yonˍ gʼa tuˬ te laˇ ve yoˬ. (Chiˇ mvuh ve 34:18) Teˇ pawˆ pawˆ kʼo, ngaˬ hui shoꞈ shaꞈ ve leh awˬ gʼaˇ nuˇ ve htaꞈ gʼa hpuˇ htaˇ Yaˬhoˉvaˬ maˇ ponˬ laˇ. Yaꞈ hkʼaˇ, Gʼuiˬ sha ga laˇ ve htaꞈ ngaˬ hui gʼa leh shoꞈ shaꞈ ve htaꞈ yeunˇ hkanˍ gʼaˇ ve kʼo, ngaˬ hui ve yonˍ hkʼaˇ kaꞈ hehnˇ la tuˬ yoˬ. (1 Peˍtruˆ 1:6, 7) Gʼuˇ suhˍ teˇ lawn hkʼaw, Yaˬhoˉvaˬ ve kanˉ ka tiꞈ yeˬ ve hkʼaw te ve chaw, yawˇ hui maˇ biˇ ve pa taw awˬ gʼaˇ nuˇ ve, maˇ heˆ leh shoꞈ shaꞈ ve gʼa hpuˇ leh haꞈ yuˬ tuˬ haˍ jaˇ tehꞈ dawˇ htaˇ, Yaˬhoˉvaˬ yawˇ hui htaꞈ hkʼaˬ hkʼe ga piˇ ve le, teˇ geh henˇ tuˬ yoˬ.