1. Nawˬ Liꞈ hpu tanˬ henˇ htaˇ awˬ tehˬ ve awˬ lawn aˬ htoꞈ ma gʼa henˇ ve le?

 Nawˬ Liꞈ hpu tanˬ henˇ htaˇ ve awˬ lawn htaꞈ tawnˇ gʼa˗aw laˇ? Oˇ ve teˇ yanˇ Gʼuiˬ sha awˬ meh cawˬ ve nawˬ gʼa shiˍ ve anˇ jaˇ ve yoˬ. Suh peuˬ hkʼawꞈ nawˉ aˬ miˍ buiˬ hpfuh hkʼaw gʼa hkanˍ ve maˇ cawˬ ve tehꞈ nawˬ gʼa shiˍ htaˇ, nyi ma sha jaˇ ve yoˬ. Nawˬ haꞈ ve chaw suh˗oˬ ve htaꞈ gʼa kʼawꞈ mawˬ daꞈ tuˬ awˬ hkʼaˇ cawˬ ve tehꞈ nawˬ gʼa shiˍ htaˇ ha lehˬ jaˇ leh miˬ guiˬ awˬ suhˉ hkʼaw gʼa chehˇ tuˬ tehꞈ gʼa shiˍ ve kaꞈ ha lehˬ jaˇ ve yoˬ.

2. Liꞈ hpu hkʼaw awˬ tehˬ ve awˬ lawn gʼa henˇ˗oˬ ve awˬ hkʼoˆ kaꞈ nawˬ co ha hpawˇ hkʼaˬ hkʼe te uiˍ la mvuh la gʼa sheˍ ve le? (Eˇfeˇsuꞈ 5:1, 2)

² Nawˬ Liꞈ hpu leuˉ leh gʼa henˇ htaˇ Yaˬhoˉvaˬ htaꞈ haꞈ maˇ la ve yoˬ. Leh haꞈ ve chi htaꞈ pa taw nawˬ henˇ taˍ ve awˬ ceuˬ htaꞈ yuˬ yehˇ ve yoˬ. Nawˬ Liꞈ hpu hkʼaw ve awˬ liˇ awˬ hkʼaˇ gʼaꞈ te htaˇ, nawˬ laiˉ lawn daꞈ ve hpawˇ dawˇ cheˆ gʼa ve yoˬ. Chi hkʼoˆ kaꞈ, nawˬ Yaˬhoˉvaˬ htaꞈ nyi hkʼaˇ suh tuˬ te piˇ gaˇ ve pa taw, nawˬ ve dawˇ hkʼaˇ pa leh cawˇ ve awˬ ceuˬ htaꞈ te ve yoˬ. Yaˇ ehˉ yawˇ haꞈ ve awˬ pa awˬ e htaꞈ henˇ yuˬ ve hkʼa shuˍ, nawˬ htaꞈ haꞈ ve Awˬ pa Yaˬhoˉvaˬ Gʼuiˬ sha htaꞈ coˇ caˇ leh henˇ yuˬ sheˍ.—Eˇfeˇsuꞈ 5:1, 2 gʼaw sheˍ.

3. Ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le?

³ Ngaˬ hui a shu yawˇ awˬ to htaꞈ na nyi cawˇ ve, ‘ngaˬ Baˆtiˆsaˬ haꞈ yuˬ gehˇ sheˍ htaˇ aꞈ kehˉ chi teˇ hkui Yaˬhoˉvaˬ htaꞈ leuˉ leh haꞈ˗aw laˇ? Ngaˬ Baˆtiˆsaˬ haꞈ yuˬ peuˬ hkʼawꞈ nawˉ ngaˬ Yaˬhoˉvaˬ dawˇ ve hkʼe dawˇ leh yawˇ htaꞈ hkʼa dehꞈ henˇ yuˬ˗aw laˇ? Awˬ viˉ awˬ nyi htaꞈ haꞈ ve tehꞈ hpeuꞈ maw piˇ˗aw laˇ?’ Nawˬ lehˬ Yaˬhoˉvaˬ leh awˬ nu ve chaw htaꞈ “awˉ lawˉ htaˇ nawˬ haꞈ puiˉ ve” hkʼe maˇ cawˬ tehꞈ dawˇ ve kʼo, awˬ gʼaˇ taˇ nuˇ. Awˉ lawˉ peuˇ ve Hkriꞈ yaˇ teˇ hpaˍ hpaˍ kaꞈ chi hkʼe hpehꞈ ve yoˬ. Yeˍsuˆ yawˇ hui htaꞈ dawˇ law chehˇ sheˍ ve kʼo, yawˇ kaꞈ ngaˬ hui htaꞈ dawˇ law chehˇ sheˍ ve yoˬ. (Hpeuꞈ maˍ ve 2:4, 7) Ngaˬ hui Liꞈ hpu henˇ gehˇ sheˍ htaˇ hkʼa shuˍ haꞈ ve leuˉ leh cawˬ gʼa tuˬ yoˬ tehꞈ Yeˍsuˆ shiˍ ve yoˬ.

4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 ⁴ Awˬ lawn chi ve hkʼaw ngaˬ hui Yaˬhoˉvaˬ leh awˬ nu ve chaw htaꞈ leuˉ leh haꞈ ve tehꞈ hpeuꞈ maw piˇ tuˬ teˇ geh henˇ tuˬ yoˬ. Ngaˬ hui chi hkʼe te ve kʼo, ngaˬ hui leh awˬ nu ve chaw aˬ htoꞈ ma awˬ bon gʼa tuˬ kaꞈ teˇ geh henˇ tuˬ yoˬ.

5-6. Pawˇluꞈ Gʼuiˬ sha ve kanˉ te htaˇ yawˇ shoꞈ shaꞈ ve awˬ lawn aˬ htoꞈ ma gʼa hpuˇ ve le? Yaꞈ hkʼaˇ, Pawˇluꞈ Yaˬhoˉvaˬ ve kanˉ caˉ leh te tuˬ aˬ htoꞈ ma ga piˇ ve le?

⁵ Tcuh yaˇ Pawˇluꞈ ha lehˬ ha kʼa ve hkʼaw Yaˬhoˉvaˬ ve kanˉ te ve yoˬ. Yaꞈ hkʼaˇ, yawˇ shoꞈ shaꞈ ve awˬ lawn laiˉ ceuˬ gʼa hpuˇ ve yoˬ. Pawˇluꞈ laiˉ pawˆ kʼai vuiˇ jaˇ leh oˇ htaˇ teˇ co˗e kʼo maˇ sha ve yoˬ. Laiˉ pawˆ yawˇ “iˉ kaˆ lawˬ htaꞈ hkanˍ ve awˬ hkʼaw lo kawˆ tuˬ cawˬ ve, chaw hkʼawˇ htaꞈ kawˆ tuˬ cawˬ ve,” leh tawˍ taˍ paˍ yawˇ htaꞈ jawꞈ piˇ ve kaꞈ gʼa hpuˇ jaw ve yoˬ. (2 Kawˇrenˍhtuˆ 11:23-27) Chi hkʼoˆ kaꞈ, laiˉ pawˆ awˬ viˉ awˬ nyi lehˬ Pawˇluꞈ yawˇ hui htaꞈ ga piˇ ve awˬ hpfuhˇ maˇ shiˍ ve yoˬ.—2 Kawˇrenˍhtuˆ 10:10; Hpiˇliˇpiˆ 4:15.

⁶ Pawˇluꞈ Yaˬhoˉvaˬ ve kanˉ caˉ leh te gʼa tuˬ aˬ htoꞈ ma ga piˇ ve le? Pawˇluꞈ Yaˬhoˉvaˬ htaꞈ hkʼa dehꞈ shiˍ ve yoˬ. Pawˇluꞈ Liꞈ hpu hkʼaw leh yawˇ gʼa hpuˇ htaˇ Gʼuiˬ sha ga laˇ jaw ve htaꞈ dawˇ nyi ve pa taw, Yaˬhoˉvaˬ hkʼaˬ hkʼe ve Gʼuiˬ sha hpehꞈ ve htaꞈ shiˍ gʼa ve yoˬ. (Roˉmaꞈ 8:38, 39; Eˇfeˇsuꞈ 2:4, 5) Leh yawˇ kaꞈ Yaˬhoˉvaˬ htaꞈ haꞈ jaˇ ve yoˬ. Pawˇluꞈ Gʼuiˬ sha htaꞈ haꞈ ve tehꞈ hpeuꞈ maw piˇ ve lehˬ, ‘Hkriꞈ yaˇ hui htaꞈ ga piˇ taˍ peuˬ ve awˬ hkʼoˆ, oˇ ve teˇ yanˇ yawˇ chi hkʼe te chehˇ ve yoˬ.’—Heˍbrehˇ 6:10.

7. Ngaˬ hui Yaˬhoˉvaˬ htaꞈ leuˉ leh haꞈ tuˬ awˬ hkʼaˇ teˇ hkʼaˇ lehˬ aˬ htoꞈ ma le?

⁷ Ngaˬ hui Yaˬhoˉvaˬ htaꞈ leuˉ leh haꞈ tuˬ kaiˬ ve hkʼaw Liꞈ hpu gʼaw leh henˇ ve yoˬ. Teˇ pawˆ le le ngaˬ hui Liꞈ hpu gʼaw htaˇ awˬ lawn oˇ ve ngaˬ hui Yaˬhoˉvaˬ htaꞈ hkʼa dehꞈ shiˍ tuˬ aˬ htoꞈ ma ga laˇ ve htaꞈ nyi sheˍ. Leh a shu yawˇ awˬ to htaꞈ na nyi cawˇ ve, “ngaˬ gʼaw ve awˬ lawn Yaˬhoˉvaˬ ngaˬ htaꞈ haꞈ ve tehꞈ mawˬ tuˬ hkʼaˬ hkʼe ga laˇ ve le? Leh awˬ lawn chi ngaˬ Yaˬhoˉvaˬ htaꞈ haꞈ tuˬ hkʼaˬ hkʼe ga laˇ ve le?”

8. Bon lawˬ ve lehˬ ngaˬ hui Yaˬhoˉvaˬ htaꞈ leuˉ leh haꞈ tuˬ hkʼaˬ hkʼe ga laˇ ve le?

⁸ Ngaˬ hui Yaˬhoˉvaˬ htaꞈ leuˉ leh haꞈ tuˬ awˬ hkʼaˇ teˇ hkʼaˇ lehˬ hkʼaˬ htaˆ kaꞈ yawˇ geh bon lawˬ ve yoˬ. Ngaˬ hui hkʼaˬ hkʼe dawˇ ve kaꞈ yawˇ htaꞈ kʼoˆ piˇ ve yoˬ. (Chiˇ mvuh ve 25:4, 5) Leh Yaˬhoˉvaˬ ngaˬ hui ve bon lawˬ hkawˇ htaꞈ awˬ tehˬ hkʼawꞈ laˇ tuˬ yoˬ. (1 Yoˇhanˬ 3:21, 22) Aˍshaˆ miˬ guiˬ lo chehˇ ve awˬ viˉ awˬ nyi yaˇ miˇ teˇ gʼaˇ Kan kʼoˆ ve, “awˉ lawˉ htaˇ ngaˬ Yaˬhoˉvaˬ htaꞈ haꞈ ve lehˬ yawˇ htaꞈ caˉ daꞈ ve awˬ ceuˬ gʼa henˇ ve pa taw yoˬ. Yaꞈ hkʼaˇ, Gʼuiˬ sha ngaˬ ve bon lawˬ hkawˇ htaꞈ hkʼawꞈ laˇ ve gʼa mawˬ htaˇ, ngaˬ yawˇ htaꞈ leuˉ leh haꞈ ve yoˬ. Chi ve htaꞈ pa taw, Gʼuiˬ sha nyi hkʼaˇ suh tuˬ ngaˬ te piˇ gaˇ ve yoˬ.” b

9. Tiˆmoˉseˍ awˬ nu ve chaw htaꞈ leuˉ leh haꞈ ve tehꞈ hkʼaˬ hkʼe hpeuꞈ maw laˇ ve le?

⁹ Pawˇluꞈ Hkriꞈ yaˇ hpehꞈ peuˬ hkʼawꞈ nawˉ laiˉ hkʼawꞈ htaˇ, yawˇ yaˇ nehˬ teˇ gʼaˇ Tiˆmoˉseˍ htaꞈ mawˬ daꞈ ve yoˬ. Tiˆmoˉseˍ lehˬ Yaˬhoˉvaˬ leh awˬ nu ve chaw htaꞈ haꞈ ve yoˬ. Pawˇluꞈ Hpiˇliˇpiˆ venˇ hkʼaw chehˇ ve awˬ viˉ awˬ nyi htaꞈ kʼoˆ piˇ ve, “yawˇ hkʼa shuˍ shuˍ nyi ma taˍ ve chaw teˇ gʼaˇ kaꞈ ngaˬ geh maˇ cawˬ. Yawˇ lehˬ, nawˬ hui awˬ pon daꞈ ve teˇ ceuˬ htaꞈ awˬ tehˬ awˬ na dawˇ nyi puiˉ ve chaw teˇ gʼaˇ hpehꞈ ve yoˬ.” (Hpiˇliˇpiˆ 2:20) Tiˆmoˉseˍ awˬ hkʼaˇ gu puiˉ ve maˇ heˆ leh maˍ cheuˬ ve htaꞈ Pawˇluꞈ maˇ gʼa chiˇ mvuh piˇ. Yaꞈ hkʼaˇ, Tiˆmoˉseˍ awˬ viˉ awˬ nyi htaꞈ haꞈ ve Pawˇluꞈ chiˇ mvuh piˇ ve yoˬ. Chi htaꞈ pa taw, Tiˆmoˉseˍ ca guiˇ la leh yawˇ htaꞈ gʼa mawˬ daꞈ tuˬ Hkriꞈ yaˇ awˬ moˍ hkʼaw ve awˬ viˉ awˬ nyi dawˇ law chehˇ ve yoˬ.—1 Kawˇrenˍhtuˆ 4:17.

10. Heh˗na leh yawˇ ve awˬ hpawˇ awˬ viˉ awˬ nyi htaꞈ haꞈ ve tehꞈ hkʼaˬ hkʼe hpeuꞈ maw piˇ ve le?

¹⁰ Ngaˬ hui kaꞈ awˬ viˉ awˬ nyi htaꞈ ga piˇ tuˬ awˬ hkʼaˇ ca cawˇ ve yoˬ. (Heˍbrehˇ 13:16) Peuˬ laˬ ve teˇ lawn hkʼaw awˬ viˉ awˬ nyi yaˇ miˇ Heh˗na ve awˬ lawn htaꞈ teˇ geh kʼawꞈ nyi sheˍ. Mvuhˇ yeˬ mvuhˇ haw lonˉ laˬ peuˬ hkʼawꞈ nawˉ Heh˗na leh yawˇ ve  awˬ hpawˇ awˬ viˉ awˬ nyi teˇ yehˬ kʼa geh ca guiˇ˗e leh yawˇ hui ve yehˬ paˆ˗a ve htaꞈ gʼa mawˬ ve yoˬ. Hkʼe te leh, yawˇ hui aˉ poꞈ veuꞈ kʼaˇ kehˬ lehˍ ve veuꞈ tuˬ maˇ cawˬ. Heh˗na kʼoˆ ve, “ngaˬ hui yawˇ hui ve veuꞈ kʼaˇ yuˬ tsuhˇ leh htuˍ piˇ ve yoˬ. Awˬ tehˬ kʼo, chi hkʼe te ve lehˬ haˍ jaˇ ve maˇ heˆ. Yaꞈ hkʼaˇ, ngaˬ hui chi hkʼe te piˇ htaˇ, ngaˬ hui leh awˬ viˉ awˬ nyi oˇ ve teˇ yehˬ kʼa chi teˇ hkui hkʼa gaˬ meuˆ daꞈ ve yoˬ.” Heh˗na leh awˬ hpawˇ awˬ viˉ awˬ nyi htaꞈ haꞈ ve tehꞈ hpeuꞈ maw piˇ ve lehˬ, yawˇ hui htaꞈ ga piˇ ve yoˬ.—1 Yoˇhanˬ 3:17, 18.

11. (a) Ngaˬ hui awˬ nu ve chaw htaꞈ haꞈ ve tehꞈ hpeuꞈ maw piˇ htaˇ, yawˇ hui awˬ pon awˬ bon hkʼaˬ hkʼe cawˬ ve le? (b) Tawˇ naˉ ve liꞈ 19:17 hkʼaw kʼoˆ taˍ ve hkʼe, ngaˬ hui awˬ nu ve chaw htaꞈ haꞈ ve tehꞈ hpeuꞈ maw piˇ ve kʼo, Yaˬhoˉvaˬ hkʼaˬ hkʼe dawˇ tuˬ ve le?

¹¹ Ngaˬ hui awˬ nu ve chaw htaꞈ haꞈ leh daꞈ ve te piˇ htaˇ, ngaˬ hui Yaˬhoˉvaˬ htaꞈ henˇ yuˬ ve tehꞈ yawˇ hui mawˬ tuˬ yoˬ. Ngaˬ hui yawˇ hui htaꞈ daꞈ ve te piˇ ve lehˬ, ngaˬ hui dawˇ taˍ ve aꞈ kehˉ yawˇ hui awˬ hpfuhˇ shiˍ ve yoˬ. Awˬ lawn chi ve hkʼaw Kan ve awˬ lawn ngaˬ hui gʼa henˇ˗oˬ ve hkʼe, yawˇ yaˇ ehˉ htaˇ awˬ viˉ awˬ nyi yaˇ miˇ laiˉ gʼaˇ yawˇ htaꞈ ga piˇ ve yawˇ ha lehˬ jaˇ ve yoˬ. Yawˇ kʼoˆ ve, “ngaˬ hto toˇ˗e tuˬ shiˍ kʼai laˇ ve awˬ viˉ awˬ nyi yaˇ miˇ laiˉ gʼaˇ htaꞈ awˬ bon uiˍ jaˇ. Yawˇ hui ngaˬ htaꞈ ca shiˍ la leh hkaoˍ monˇ, leh sha gʼuˇ awˍ teˇ geh caˇ˗e tuˬ kaꞈ jehˬ laˇ ve yoˬ. Peuˬ hkʼawꞈ nawˉ ngaˬ htaꞈ shiˍ kʼoˬ laˇ ve yoˬ. Yawˇ hui chi hkʼe te ve hkʼaˬ hkʼe taw coˇ caˇ jaˇ ve htaꞈ chi teˇ hkui ngaˬ shiˍ la leh, yawˇ hui ngaˬ htaꞈ haꞈ jaˇ ve kaꞈ shiˍ ve yoˬ.” Teˇ gʼaˇ le le ngaˬ hui te piˇ ve htaꞈ awˬ bon uiˍ hkawˇ shiˍ ve maˇ heˆ. Kan awˬ viˉ awˬ nyi yawˇ htaꞈ ga laˇ ve htaꞈ kʼoˆ ve, “yawˇ hui ngaˬ awˬ pon te laˇ ve htaꞈ ngaˬ daꞈ ve te hkʼawꞈ piˇ gaˇ ve yoˬ. Yaꞈ hkʼaˇ, chi teˇ hkui yawˇ hui hkʼaˬ kaˬ lo chehˇ ve ngaˬ maˇ shiˍ. Yaˬhoˉvaˬ shiˍ ve yoˬ. Yawˇ hui ngaˬ htaꞈ te laˇ ve daꞈ ve te hkʼawꞈ piˇ tuˬ Yaˬhoˉvaˬ geh bon lawˬ piˇ ve yoˬ.” Kan kʼoˆ ve cawˇ ve yoˬ. Ngaˬ hui awˬ nu ve chaw awˬ pon te piˇ ve i jaˇ ve awˬ ceuˬ hpehꞈ ve htawˇ, Yaˬhoˉvaˬ mawˬ ve yoˬ. Chi lehˬ awˬ hpfuhˇ hkʼaˆ jaˇ ve tuˉ tanˇ tuˬ hkʼe hpehꞈ ve tehꞈ Gʼuiˬ  sha shawˍ leh, ngaˬ hui htaꞈ te hkʼawꞈ laˇ tuˬ yoˬ.—Tawˇ naˉ ve 19:17 gʼaw sheˍ.

12. Awˬ viˉ awˬ nyi hawˉ hkʼaˆ Hkriꞈ yaˇ awˬ moˍ hkʼaw awˬ nu ve awˬ viˉ awˬ nyi htaꞈ haꞈ ve tehꞈ hkʼaˬ hkʼe hpeuꞈ maw piˇ gʼa tuˬ le? (Awˬ han htaꞈ nyi sheˍ.)

¹² Nawˬ awˬ viˉ awˬ nyi hawˉ hkʼaˆ hpehꞈ ve kʼo, nawˬ awˬ nu ve awˬ viˉ awˬ nyi htaꞈ haꞈ ve tehꞈ hpeuꞈ maw piˇ leh yawˇ hui htaꞈ hkʼaˬ hkʼe ga piˇ gʼa tuˬ le? Awˬ viˉ awˬ nyi hawˉ hkʼaˆ yaˇ nehˬ teˇ gʼaˇ Cawn˗deh meh ve yawˇ Hkriꞈ yaˇ awˬ moˍ hkʼaw ga piˇ tuˬ chi aꞈ kehˉ te gʼa ve aˬ htoꞈ ma cawˬ sheˍ ve le tehꞈ nyi haꞈ shaˉ paˍ htaꞈ na piˇ ve yoˬ. Cawn˗deh co ha hpawˇ hkʼa dehꞈ uiˍ la mvuh la chehˇ ve htaꞈ nyi haꞈ shaˉ paˍ chiˇ mvuh piˇ ve yoˬ. Leh aˬ htoꞈ ma te gʼa sheˍ ve kaꞈ beˆ maˍ piˇ ve yoˬ. Tawˇ pa haˉ te kʼo, Cawn˗deh awˬ viˉ awˬ nyi htaꞈ haꞈ yuˬ piˇ tuˬ hpawnˬ daꞈ kuiˬ lo a ciˉ vaiˇ chaweh gaˬ la cawˇ ve tehꞈ nyi haꞈ shaˉ paˍ beˆ maˍ piˇ ve yoˬ. Leh hpawnˬ daꞈ kuiˬ hkʼaw hkʼa dehꞈ hkʼawꞈ tuˬ, leh hto toˇ ve awˬ moˍ ehˉ hkʼaw awˬ viˉ awˬ nyi htaꞈ ga piˇ tuˬ awˬ hkʼaˇ kaꞈ beˆ maˍ piˇ ve yoˬ. Chi teˇ hpaˍ htaꞈ Cawn˗deh gʼaꞈ te htaˇ yawˇ maˇ te jaw ve awˬ ceuˬ htaꞈ gʼa henˇ ve ceh maˇ heˆ. Awˬ viˉ awˬ nyi htaꞈ leuˉ leh haꞈ tuˬ awˬ hkʼaˇ kaꞈ gʼa henˇ ve yoˬ. Ga piˇ shehˍ hpaˇ te˗oˬ htaˇ hehꞈ awˬ viˉ awˬ nyi htaꞈ ga piˇ gʼa ve maˇ heˆ tehꞈ Cawn˗deh gʼa shiˍ la ve yoˬ. Awˬ viˉ awˬ nyi htaꞈ ga piˇ gʼa leh leuˉ leh kʼawꞈ ga piˇ cawˇ ve yoˬ.—1 Tiˆmoˉseˍ 3:8-10, 13.

13. Haꞈ pehnˇ ve lehˬ awˬ viˉ awˬ nyi Hkri˗si˗ti˗an meh ve nyi haꞈ shaˉ paˍ gʼa kʼawꞈ te tuˬ hkʼaˬ hkʼe ga piˇ ve le?

¹³ Nawˬ ga piˇ shehˍ hpaˇ maˇ heˆ leh nyi haꞈ shaˉ paˍ te jaw leh chi teˇ hkui maˇ gʼa te˗oˬ ve kʼo, nawˬ haꞈ pehnˇ ve leh nawˬ te jaw ve kanˉ htaꞈ Yaˬhoˉvaˬ maˇ leunˇ. (1 Kawˇrenˍhtuˆ 15:58) Chi hkʼoˆ kaꞈ, nawˬ haꞈ pehnˇ ve caˉ leh kʼawꞈ hpeuꞈ maw piˇ ve htaꞈ Yaˬhoˉvaˬ mawˬ ve yoˬ. Awˬ viˉ awˬ nyi hawˉ hkʼaˆ teˇ gʼaˇ Hkri˗si˗ti˗an meh ve yawˇ nyi haꞈ shaˉ paˍ maˇ gʼa te˗oˬ htaˇ, nyi ma luˬ jaˇ ve yoˬ. Yaꞈ hkʼaˇ, yawˇ kʼoˆ ve, “ngaˬ nyi haꞈ shaˉ paˍ gʼa te ve maˇ gʼa te˗o ve htawˇ, ngaˬ Yaˬhoˉvaˬ htaꞈ haꞈ ve pa taw yawˇ ve kanˉ te gʼa ve hkʼe, teˇ ceuˬ le le te tuˬ dawˇ teh taˍ ve yoˬ.” Peuˬ hkʼawꞈ nawˉ yawˇ nyi haꞈ shaˉ paˍ gʼa kʼawꞈ te ve  yoˬ. Yaꞈ hkʼaˇ, yawˇ kʼoˆ ve, “ngaˬ a ciˉ dawˇ haˍ ve yoˬ. Yaˬhoˉvaˬ ngaˬ htaꞈ ha kʼaˉ laˇ ve pa taw nyi haꞈ shaˉ paˍ kʼawꞈ te tcuh laˇ ve kʼo, te tuˬ yoˬ tehꞈ ngaˬ dawˇ ve yoˬ. Ngaˬ Yaˬhoˉvaˬ leh awˬ viˉ awˬ nyi htaꞈ haꞈ ve pa taw yoˬ.”

14. Jawˬjiˬ˗a mvuhˇ miˬ lo chehˇ ve awˬ viˉ awˬ nyi yaˇ miˇ kʼoˆ ve tawˇ hkawˇ nawˬ htaꞈ hkʼaˬ hkʼe maˍ laˇ ve le?

¹⁴ Chi hkʼoˆ kaꞈ, Yaˬhoˉvaˬ ve kanˉ te ve chaw lehˬ awˬ nu ve chaw htaꞈ haꞈ ve yoˬ. (Maꞈhtehˍ 22:37-39) Tawˇ pa haˉ te kʼo, Jawˬjiˬ˗a mvuhˇ miˬ lo chehˇ ve awˬ viˉ awˬ nyi yaˇ miˇ Eh˗la˗naˆ kʼoˆ ve, “awˉ lawˉ htaˇ ngaˬ hto toˇ˗e ve lehˬ Yaˬhoˉvaˬ htaꞈ haꞈ ve pa taw yoˬ. Yaꞈ hkʼaˇ, ngaˬ leuˉ leh yawˇ htaꞈ haꞈ htaˇ awˬ nu ve chaw htaꞈ kʼawꞈ haꞈ tuˬ te laˇ ve yoˬ. Ngaˬ hto maˍ piˇ ve chaw shoꞈ shaꞈ ve awˬ lawn aˬ htoꞈ ma gʼa hpuˇ ve htaꞈ ngaˬ dawˇ nyi ve yoˬ. Yawˇ hui nyi ma pfuhˇ tuˬ ngaˬ aˬ htoꞈ ma awˬ lawn yaw cawˇ ve kaꞈ dawˇ nyi ve yoˬ. Ngaˬ leuˉ leh dawˇ nyi htaˇ, chi yawˇ hui htaꞈ hkʼa dehꞈ ga piˇ gaˇ tuˬ te laˇ ve yoˬ.”—Roˉmaꞈ 10:13-15.

15-16. Awˬ han hkʼaw gʼa mawˬ ve hkʼe, awˬ nu ve chaw htaꞈ haꞈ pehnˇ ve tehꞈ hpeuꞈ maw piˇ ve lehˬ aˬ htoꞈ ma awˬ bon gʼa ve le?

¹⁵ Ngaˬ hui awˬ viˉ awˬ nyi htaꞈ haꞈ ve tehꞈ hpeuꞈ maw piˇ htaˇ, yawˇ hui ceh tiˉ awˬ bon gʼa ve maˇ heˆ. Yaꞈ hkʼaˇ, awˬ nu ve chaw kaꞈ awˬ bon gʼa ve yoˬ. A naˍ 19 tanˬ cawˬ htaˇ, awˬ viˉ awˬ nyi Hpa˗lo leh yawˇ ve awˬ miˇ ma Hkriꞈ yaˇ awˬ moˍ hkʼaw awˬ viˉ awˬ nyi chaw mawˇ ma laiˉ gʼaˇ Gʼuiˬ sha ve kanˉ te ve hkʼaw tawˇ yaw tuˬ awˬ hkʼeun, htehˆ leꞈ, hkaw hpi˗u teuˇ yehˇ tuˬ maˍ piˇ ve yoˬ. Awˉ lawˉ htaˇ awˬ viˉ awˬ nyi chaw mawˇ teˇ gʼaˇ haˍ jaˇ tehꞈ dawˇ ve yoˬ. Peuˬ hkʼawꞈ nawˉ yawˇ kaꞈ te gʼa ve yoˬ. Yeˍsuˆ suh ve dawˇ nawˇ tuˬ hpawnˬ daꞈ la tuˬ yawˇ ve awˬ viˉ awˬ nyi laiˉ gʼaˇ htaꞈ jehˬ piˇ leh awn˗laiˉ hkʼaw hpawnˬ  daꞈ la ve chaw 60 gʼaˇ cawˬ ve yoˬ. Hpa˗lo leh yawˇ ve awˬ miˇ ma coˇ caˇ ve pa taw, awˬ viˉ awˬ nyi chi teˇ gʼaˇ leh yawˇ ve awˬ viˉ awˬ nyi laiˉ gʼaˇ awˬ bon gʼa ve htaꞈ gʼa mawˬ ve yoˬ. Yawˇ Hpa˗lo htaꞈ liꞈ bvuhꞈ piˇ leh kʼoˆ ve, “ngaˬ hui hkʼe ve chaw mawˇ htaꞈ maˍ laˇ ve nawˬ huiˉ maˬ htaꞈ awˬ bon uiˍ jaˇ mehˍ. Nawˬ huiˉ maˬ ngaˬ hui htaꞈ coˇ caˇ leh hkʼaˬ hkʼe taw ga laˇ ve ngaˬ maˇ leunˇ gʼa. Yaˬhoˉvaˬ ngaˬ hui htaꞈ haꞈ leh a yeˇ yuˬ laˇ ve kaꞈ maˇ leunˇ gʼa.”

¹⁶ Awˬ lawn chi hkʼe ve awˬ viˉ awˬ nyi Hpa˗lo htaꞈ a yeˇ uiˍ jaˇ ve teˇ lawn maˍ laˇ ve tehꞈ dawˇ ve yoˬ. Haꞈ pehnˇ ve lehˬ cuˇ yiˍ leh puiˉ ve hpehꞈ ve aꞈ kehˉ a yeˇ uiˍ jaˇ ve tehꞈ yawˇ gʼa shiˍ ve yoˬ. Yawˇ kʼoˆ ve, “oˇ htaˇ ngaˬ toˇ nyi shehˍ hpaˇ te jaw ve yoˬ. Ngaˬ bon maˍ jaw ve awˬ lawn chi teˇ hkui awˬ viˉ awˬ nyi leunˇ peuˬ˗oˬ hehˉ tehꞈ dawˇ ve yoˬ. Yaꞈ hkʼaˇ, ngaˬ yawˇ hui htaꞈ aˬ htoꞈ ma ga piˇ jaw ve yawˇ hui tawnˇ gʼa ve yoˬ.”

17. Ngaˬ hui haꞈ pehnˇ ve tehꞈ hpeuꞈ maw piˇ ve kʼo, a shu awˬ bon gʼa sheˍ ve le?

¹⁷ Ngaˬ hui awˬ viˉ awˬ nyi htaꞈ haꞈ ve tehꞈ hpeuꞈ maw piˇ ve kʼo, maˇ dawˇ maˇ gaˇ ve hkʼaw ngaˬ hui kaꞈ awˬ bon gʼa ve yoˬ. Nuˇziˬlehˬ mvuhˇ miˬ lo chehˇ ve awˬ viˉ awˬ nyi Co˗na˗htan kaꞈ chi hkʼe dawˇ ve yoˬ. Teˇ nyi htaˇ shinˉ peuˬ hkawꞈ nyi sha gʼuˇ hkʼawꞈ nawˉ haw jaˇ ve yoˬ. Awˬ viˉ awˬ nyi hawˉ hkʼaˆ teˇ gʼaˇ gʼuˇ suhˍ peuˍ ve te chehˇ ve yawˇ teˇ gʼaˇ tiˉ yaꞈ kʼaw jaˇ lo hto toˇ chehˇ ve htaꞈ Co˗na˗htan gʼa mawˬ ve yoˬ. Awˬ gʼuˇ suhˍ hpawˇ kʼo awˬ viˉ awˬ nyi chi ve teˇ gʼaˇ geh teˇ shinˉ le le sha gʼuˇ hkʼawꞈ nawˉ Gʼuiˬ sha ve kanˉ teˇ geh te tuˬ yawˇ dawˇ teh taˍ ve yoˬ. Chi hkʼe te ve yawˇ awˬ bon gʼa jaˇ tuˬ yoˬ tehꞈ oˇ ve teˇ hkui htaˇ yawˇ maˇ dawˇ nyi jaw. Co˗na˗htan kʼoˆ ve, “oˇ htaˇ ngaˬ Gʼuiˬ sha ve kanˉ te ve htaꞈ hkʼa dehꞈ maˇ dawˇ cawˇ. Yaꞈ hkʼaˇ, awˬ viˉ awˬ nyi gʼuˇ suhˍ peuˍ ve chi teˇ gʼaˇ maˍ ve awˬ hkʼaˇ leh yawˇ Gʼuiˬ sha ve kanˉ te ve aw bon gʼa ve htaꞈ ngaˬ gʼa mawˬ htaˇ, ngaˬ Gʼuiˬ sha ve kanˉ leuˉ leh kʼawꞈ te gaˇ tuˬ te laˇ ve yoˬ. Leh ngaˬ meuˆ daꞈ jaˇ ve awˬ chawˇ kaꞈ cawˬ ve yoˬ. Yawˇ ngaˬ co ha hpawˇ uiˍ la mvuh la tuˬ, ngaˬ Gʼuiˬ sha ve kanˉ te ve htaꞈ ha lehˬ tuˬ, leh Yaˬhoˉvaˬ geh meuˆ daꞈ maˇ la tuˬ kaꞈ ga laˇ ve yoˬ.”

18. Yaˬhoˉvaˬ ngaˬ hui htaꞈ aˬ htoꞈ ma te tcuh gaˇ ve le?

¹⁸ Yaˬhoˉvaˬ lehˬ ngaˬ hui teˇ gʼaˇ le le yawˇ htaꞈ haꞈ leh awˬ nu ve chaw htaꞈ leuˉ leh haꞈ tcuh gaˇ ve yoˬ. Ngaˬ hui gʼa henˇ˗oˬ ve hkʼe, ngaˬ hui Yaˬhoˉvaˬ htaꞈ leuˉ leh haꞈ tuˬ Liꞈ hpu gʼaw leh hkʼa dehꞈ dawˇ nyi ve yoˬ. Leh hkʼaˬ htaˆ kaꞈ yawˇ geh bon lawˬ ve yoˬ. Awˬ viˉ awˬ nyi htaꞈ leuˉ leh haꞈ tuˬ yawˇ hui htaꞈ ga piˇ gʼa tuˬ ve awˬ hkʼaˇ ca ve yoˬ. Ngaˬ hui Yaˬhoˉvaˬ leh awˬ viˉ awˬ nyi htaꞈ leuˉ leh haꞈ ve tehꞈ hpeuꞈ maw piˇ ve kʼo, yawˇ hui geh meuˆ daꞈ jaˇ tuˬ yoˬ. Ngaˬ hui lehˬ Yaˬhoˉvaˬ leh awˬ viˉ awˬ nyi geh hkʼaˬ htaˆ kaꞈ awˬ chawˇ hpehꞈ tuˬ yoˬ.