1-2. Hkriꞈ yaˇ lehˬ yehˬ lonˉ htaꞈ hkʼaˬ hkʼe shuˍ ve le? (1 Kawˇrenˍhtuˆ 15:58)

 1978 hkʼawꞈ htaˇ Jaˬpanˍ mvuhˇ miˬ To˗ki venˇ lo yehˬ lonˉ 60 htehꞈ te ve yoˬ. Miˬ hiˆ la ve kʼo yehˬ lonˉ chi maˇ paˆ˗e tuˬ ve hehˉ laˇ tehꞈ chaw laiˉ gʼaˇ mawˬ htaˇ htawˇ dawˇ nawˬ dawˇ cawˬ ve yoˬ. To˗ki venˇ lo miˬ teˇ hkui teˇ hkui hiˆ ve pa taw, yehˬ lonˉ chi ve maˇ paˆ˗e tuˬ yehˬ lonˉ te tuˬ awˬ han shawehˇ ve chaw awˬ hkʼaˇ hkʼaˬ hkʼe gu ve le? Miˬ hiˆ la htaˇ yehˬ lonˉ chi ve maˇ gʼa paˆ ce la tuˬ yehˬ te ve hpawˇ shawehˇ laˇ paˍ hkʼa dehꞈ te tuˬ shawehˇ laˇ ve yoˬ. Hkʼe kʼo chi beuꞈ teˇ co˗e ve Hkriꞈ yaˇ yehˬ lonˉ chi htaꞈ hkʼaˬ hkʼe shuˍ ve le?

² Hkriꞈ yaˇ lehˬ yonˍ yeˬ ve hpawˇ keunˍ daꞈ cawˇ daꞈ ve chaw gʼa hpehꞈ ve yoˬ. Yawˇ lehˬ Yaˬhoˉvaˬ ve awˬ liˇ tawˇ hkawˇ leh awˬ liˇ awˬ hkʼaˇ htaꞈ hkʼa dehꞈ gʼa yonˍ yeˬ cawˇ ve yoˬ. (1 Kawˇrenˍhtuˆ 15:58 gʼaw sheˍ.) Yawˇ “na yuˬ puiˉ ve” chaw gʼa hpehꞈ ve yoˬ. Yaꞈ hkʼaˇ, teˇ ceuˬ ceuˬ gʼa hpuˇ la htaˇ yawˇ ‘awˬ hkʼaˇ ca puiˉ ve’ chaw gʼa hpehꞈ ve yoˬ. (Yaˍkoˆ 3:17) Hkriꞈ yaˇ keunˍ daꞈ cawˇ daꞈ ve chaw hpehꞈ ve lehˬ, teˇ ceuˬ htaꞈ ceh tiˉ vawˆ tinˍ taˍ ve maˇ heˆ leh teˇ lawn le le htaꞈ haꞈ yuˬ ve maˇ heˆ. Ngaˬ hui hkʼaˬ hkʼe htaˇ gʼa yonˍ yeˬ cawˇ ve, awˬ lawn chi ve hkʼaw teˇ geh henˇ tuˬ yoˬ. Ngaˬ hui yonˍ yeˬ ve cawˬ tuˬ dawˇ teh taˍ ve htaꞈ Saˍtanˍ coˇ caˇ leh te luˬ laˇ ve 5 ceuˬ htaꞈ teˇ geh henˇ tuˬ yoˬ. Chi hkʼoˆ kaꞈ, Saˍtanˍ loˍ ve awˬ ceuˬ htaꞈ ngaˬ hui maˇ gʼa gʼaꞈ te tuˬ hkʼaˬ hkʼe te cawˇ ve kaꞈ teˇ geh henˇ tuˬ yoˬ.

3. Tcuh yaˇ liꞈ 15:28, 29 hkʼaw Yaˬhoˉvaˬ awˬ liˇ awˬ hkʼaˇ aˬ htoꞈ ma peꞈ laˇ taˍ ve le?

³ Uiˍ jaˇ mvuhˇ jaˇ ve Yaˬhoˉvaˬ lehˬ awˬ liˇ awˬ hkʼaˇ teh tuˬ a hkaw˗anˬ cawˬ ve yoˬ. Leh yawˇ peꞈ laˇ ve awˬ liˇ awˬ hkʼaˇ lehˬ hkʼaˬ htaˆ kaꞈ yehˇ gʼa ve yoˬ. (Iˉsaˍyaˆ 33:22) Tawˇ pa haˉ te kʼo, awˉ lawˉ peuˇ teˇ co˗e ve uˉ peunˍ ve kawˍmiˍtiˍ lehˬ Hkriꞈ yaˇ gʼa yonˍ yeˬ cawˇ ve 3 ceuˬ htaꞈ kʼoˆ taˍ ve yoˬ. (1) Yaˬhoˉvaˬ htaꞈ ceh tiˉ oˉ kʼoˍ gʼa pui ve, (2) Awˬ suhˍ ve awˬ lawn htaꞈ yawˆ yan leh (3) Liꞈ hpu hkʼaw awˬ liˇ awˬ hkʼaˇ cawˇ ve hpawˇ hkʼaˬ htaˆ kaꞈ gʼa gʼaꞈ te ve yoˬ. (Tcuh yaˇ 15:28, 29 gʼaw sheˍ.) Leh chi beuꞈ teˇ co˗e ve Hkriꞈ yaˇ awˬ lawn chi ve 3 ceuˬ htaꞈ hkʼaˬ hkʼe te yonˍ yeˬ gʼa tuˬ le?

4. Ngaˬ hui Yaˬhoˉvaˬ htaꞈ ceh tiˉ oˉ kʼoˍ pui tuˬ hkʼaˬ hkʼe gʼa te cawˇ ve le? (Hpeuꞈ maˍ ve 4:11)

 ⁴ Ngaˬ hui Yaˬhoˉvaˬ htaꞈ ceh tiˉ oˉ kʼoˍ gʼa pui ve. Yaˬhoˉvaˬ lehˬ Iˉsaˍreˍlaˆ chaw yawˇ htaꞈ ceh tiˉ oˉ kʼoˍ pui tehꞈ kʼoˆ piˇ ve yoˬ. (Bon maˍ ve 5:6-10) Leh Saˍtanˍ Yeˍsuˆ htaꞈ beˬ piˇ lawˇ piˇ htaˇ, ngaˬ hui Yaˬhoˉvaˬ htaꞈ ceh tiˉ oˉ kʼoˍ gʼa pui ve tehꞈ Yeˍsuˆ hkʼa dehꞈ kʼoˆ laˇ taˍ ve yoˬ. (Maꞈhtehˍ 4:8-10) Chi htaꞈ pa taw, ngaˬ hui shaˉ hoꞈ htaꞈ oˉ kʼoˍ maˇ pui leh chaw yaˇ htaꞈ kaꞈ oˉ kʼoˍ maˇ pui ve yoˬ. Tawˇ pa haˉ te kʼo, bon hpawˇ ve awˬ hoˉ teˇ hpaˍ, mvuhˇ miˬ kanˉ te paˍ, awˬ han te ve chaw, liꞈ hkawˇ kʼa ve chaw, maˇ heˆ leh enˍ daꞈ ve chaw awˬ meh bvuhˬ ve chaw chi teˇ hpaˍ ngaˬ hui yawˆ yan leh Gʼuiˬ sha hkʼe shawnˍ leh oˉ kʼoˍ maˇ pui ve yoˬ. Yaꞈ hkʼaˇ, ngaˬ hui Yaˬhoˉvaˬ hpawˇ chehˇ leh ‘awˬ ceuˬ hkʼa peu˗eˬ htaꞈ hpanˍ shehˍ hpaˇ’ Gʼuiˬ sha htaꞈ ceh tiˉ oˉ kʼoˍ pui ve yoˬ.—Hpeuꞈ maˍ ve 4:11 gʼaw sheˍ.

5. A shaꞈ leh awˬ suhˍ ve awˬ lawn aˬ htoꞈ ma te ngaˬ hui Yaˬhoˉvaˬ ve awˬ liˇ tawˇ hkawˇ htaꞈ na yuˬ cawˇ ve le?

⁵ A shaꞈ leh awˬ suhˍ ve awˬ lawn ngaˬ hui Yaˬhoˉvaˬ ve awˬ liˇ tawˇ hkawˇ htaꞈ na yuˬ cawˇ ve. Aˬ htoꞈ ma pa taw le? Awˬ lawn kʼo, awˬ suhˍ lehˬ a shaꞈ htaꞈ kʼoˆ gaˇ ve yoˬ. Chi lehˬ Yaˬhoˉvaˬ geh gʼa ve awˬ hpfuhˇ hkʼaˆ jaˇ ve laꞈ shawnˍ hpehꞈ ve yoˬ. (Oˉ kʼoˍ pui ve 17:14) Yaˬhoˉvaˬ chaw yaˇ htaꞈ to nuˇ to shaˆ ve awˬ shaˍ caˇ tcuh ve awˉ lawˉ teˇ pawˆ htaˇ, awˬ suhˍ taˇ caˇ tehꞈ kʼoˆ piˇ ve yoˬ. (Awˬ hkuiˉ puiˍ 9:4) Peuˬ hkʼawꞈ nawˉ Moˉseˍ ve awˬ liˇ tawˇ hkawˇ hkʼaw awˬ suhˍ ve awˬ lawn hkʼa tawˍ lehˆ bvuhꞈ keu tcuh taˍ ve yoˬ. (Oˉ kʼoˍ pui ve 17:10) Awˉ lawˉ peuˇ ve Hkriꞈ yaˇ teˇ co˗e htaˇ gaˬ leh Yaˬhoˉvaˬ uˉ peunˍ ve kawˍmiˍtiˍ htaꞈ beˆ maˍ piˇ leh Hkriꞈ yaˇ teˇ gʼaˇ le le ‘awˬ suhˍ htaꞈ taˇ caˇ’ tehꞈ kʼoˆ piˇ tcuh ve yoˬ. (Tcuh yaˇ 15:28, 29) Ngaˬ hui naˆ tsuhˇ yehˬ lo haꞈ shaˉ tuˬ awˬ lawn dawˇ cheˆ htaˇ, awˬ lawn chi ve chi beuꞈ teˇ ce˗e ngaˬ hui na yuˬ leh yonˍ yeˬ cawˇ ve yoˬ. b

6. Yaˬhoˉvaˬ ve awˬ liˇ awˬ hkʼaˇ daꞈ jaˇ ve htaꞈ ngaˬ hui gʼaꞈ te tuˬ hkʼaˬ hkʼe gʼa te cawˇ ve le?

⁶ Ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ hkʼaˬ htaˆ kaꞈ gʼaꞈ te ve. (Heˍbrehˇ 13:4) Tcuh yaˇ Pawˇluꞈ ngaˬ hui htaꞈ beˆ maˍ laˇ ve, “miˬ guiˬ htaꞈ caˉ daꞈ ve awˬ ceuˬ teˇ hpaˍ htaꞈ tiˇ pehˍ˗oꞈ.” Chi ve lehˬ, ngaˬ hui maˇ daꞈ ve te gaˇ ve nyi ma cawˬ ve htaꞈ coˇ caˇ leh gʼa yuˬ baˬ ve htaꞈ kʼoˆ gaˇ ve yoˬ. Ngaˬ hui haˉ chawˇ haˉ paˆ te la ve awˬ ceuˬ htaꞈ maˇ nyi leh maˇ te ve yoˬ. (Kawˇlawˇsehˇ 3:5; Yawˇbaˆ 31:1) Ngaˬ hui htaꞈ lawˇ nyi laˇ ve kʼo, awˬ lawn chi ve htaꞈ maˇ dawˇ nyi leh Yaˬhoˉvaˬ geh meuˆ daꞈ ve awˬ ceuˬ htaꞈ maˇ te luˬ laˇ tcuh.

7. Ngaˬ hui aˬ htoꞈ ma te tuˬ dawˇ teh taˍ ve le? Leh aˬ htoꞈ ma pa taw le?

⁷ Yaˬhoˉvaˬ lehˬ ngaˬ hui htaꞈ “nyi ma awˬ tawˬ hkʼa gaˬ na yuˬ” tcuh gaˇ ve yoˬ. (Roˉmaꞈ 6:17) Ngaˬ hui Yaˬhoˉvaˬ ve awˬ liˇ tawˇ hkawˇ, chi teˇ hkawˇ na yuˬ gaˇ ve, oˇ ve teˇ hkawˇ maˇ na yuˬ gaˇ ve, leuˆ yuˬ tuˬ ve a hkaw˗anˬ maˇ cawˬ. Yaˬhoˉvaˬ beˆ maˍ laˇ taˍ ve lehˬ ngaˬ hui awˬ pon daꞈ jaˇ tehꞈ gʼa tawnˇ taˍ cawˇ ve yoˬ. (Iˉsaˍyaˆ 48:17, 18; 1 Kawˇrenˍhtuˆ 6:9, 10) Ngaˬ hui coˇ caˇ leh Yaˬhoˉvaˬ nyi hkʼaˇ suh tuˬ te piˇ gaˇ leh Chiˇ mvuh ve liꞈ bvuhꞈ paˍ dawˇ ve hkʼe ngaˬ hui kaꞈ dawˇ ve yoˬ. Oˇ kaˬ lo kʼoˆ ve, “ngaˬ suh htaˇ hkʼaˬ gaˬ nawˬ ve awˬ liˇ tawˇ hkawˇ htaꞈ na yuˬ tuˬ dawˇ cheˆ taˍ peuˬ.” (Chiˇ mvuh ve 119:112) Yaꞈ hkʼaˇ, Saˍtanˍ ngaˬ hui dawˇ teh taˍ ve htaꞈ te luˬ tuˬ yawˇ hkʼaˬ hkʼe te ve le?

8. Ngaˬ hui dawˇ teh taˍ ve htaꞈ te luˬ laˇ tuˬ Saˍtanˍ hkʼaˬ hkʼe fawˉ mehˍ laˇ ve le?

⁸ Fawˉ mehˍ laˇ ve. Saˍtanˍ ngaˬ hui dawˇ teh taˍ ve htaꞈ te luˬ laˇ tuˬ, ngaˬ hui ve awˬ to leh nyi ma hpawˇ kaꞈ te luˬ gaˇ ve yoˬ. Saˍtanˍ lehˬ ngaˬ hui htaꞈ “cheꞈ caˇ tuˬ” dawˇ teh taˍ ve yoˬ. Chi kʼoˆ gaˇ ve lehˬ ngaˬ hui Yaˬhoˉvaˬ geh meuˆ daꞈ ve htaꞈ Saˍtanˍ te luˬ gaˇ ve yoˬ. (1 Peˍtruˆ 5:8) Awˉ lawˉ peuˇ ve Hkriꞈ yaˇ yawˇ hui Yaˬhoˉvaˬ hpawˇ chehˇ tuˬ dawˇ teh taˍ ve pa taw, fawˉ mehˍ piˇ ve, awˬ to htaꞈ naˬ tuˬ te piˇ ve, leh tiˇ pehˍ piˇ ve htaꞈ gʼa hpuˇ ve yoˬ. (Tcuh yaˇ  5:27, 28, 40; 7:54-60) Chi beuꞈ teˇ co˗e kaꞈ Saˍtanˍ chaw yaˇ htaꞈ fawˉ mehˍ chehˇ sheˍ ve yoˬ. Chi hkʼe ve Ruˆsaˆ mvuhˇ miˬ hkʼaw leh awˬ nu ve mvuhˇ miˬ lo chehˇ ve awˬ viˉ awˬ nyi htaꞈ mvuhˇ miˬ uˉ peunˍ paˍ haiˬ jaˇ ve te piˇ ve htaꞈ ngaˬ hui gʼa mawˬ ve yoˬ. Leh awˬ nu ve mvuhˇ miˬ lo ve awˬ viˉ awˬ nyi htaꞈ tawˍ piˇ leh fawˉ mehˍ piˇ ve yoˬ.

9. Awˬ viˉ awˬ nyi teˇ gʼaˇ nyiˉ piˇ ve hkʼaˬ hkʼe ve htaꞈ gʼa hpuˇ ve le?

⁹ Nyiˉ piˇ ve. Ngaˬ hui fawˉ mehˍ ve gʼa hpuˇ ve awˬ hkʼoˆ kaꞈ, Saˍtanˍ “heˍ yuˬ beˬ yuˬ ve” awˬ nu ve awˬ hkʼaˇ kaꞈ yehˇ sheˍ ve yoˬ. (Eˇfeˇsuꞈ 6:11) Awˬ viˉ awˬ nyi hawˉ hkʼaˆ teˇ gʼaˇ Bawˆ meh ve, naˆ tsuhˇ yehˬ lo yawˇ gʼa shawˆ hpeꞈ ve awˬ lawn htaꞈ teˇ geh nyi sheˍ. Yawˇ aˬ htoꞈ ma hpehꞈ ve htawˇ awˬ suhˍ maˇ keu tehꞈ saˍ laꞈ gʼonˍ laiˉ gʼaˇ htaꞈ kʼoˆ piˇ ve yoˬ. Yawˇ dawˇ cheˆ ve htaꞈ saˍ laꞈ gʼonˍ gʼaꞈ te ve yoˬ. Yaꞈ hkʼaˇ, maˇ shawˆ hpeꞈ sheˍ teˇ haˉ htaˇ, yawˇ ve yehˬ kʼa hkʼaw ve chaw kʼoꞈ˗e peuˬ hkʼawꞈ nawˉ naˆ tsuhˇ muˍ pehˬ paˍ saˍ laꞈ gʼonˍ tanˇ hkuinˇ htaˇ yawˇ geh laˬ leh saˍ laꞈ gʼonˍ nawˬ htaꞈ suhˍ maˇ keu laˇ ve htawˇ, nawˬ teˇ ceuˬ ceuˬ hpehꞈ la ve kʼo, awˬ suhˍ keu laˇ tuˬ yoˬ tehꞈ kʼoˆ piˇ ve yoˬ. Yawˇ ve yehˬ kʼa hkʼaw ve chaw yawˇ awˬ paˇ lo maˇ chehˇ˗o ve kʼo Bawˆ nyi ma pa tuˬ yoˬ hehˉ tehꞈ saˍ laꞈ gʼonˍ dawˇ ve yoˬ. Yaꞈ hkʼaˇ, Bawˆ yawˇ suhˍ maˇ keu tehꞈ kʼoˆ piˇ sheˍ ve yoˬ. Yawˇ teˇ ceuˬ ceuˬ hpehꞈ la ve htawˇ, awˬ suhˍ maˇ keu tehꞈ kʼoˆ piˇ ve yoˬ.

10. Miˬ guiˬ yaˇ dawˇ ve hkʼe ngaˬ hui dawˇ ve kʼo aˬ htoꞈ ma te kawˆ tuˬ cawˬ ve le? (1 Kawˇrenˍhtuˆ 3:19, 20)

¹⁰ Miˬ guiˬ yaˇ dawˇ ve hkʼe dawˇ ve. Miˬ guiˬ yaˇ dawˇ ve hkʼe ngaˬ hui dawˇ ve kʼo, ngaˬ hui Yaˬhoˉvaˬ leh yawˇ ve awˬ liˇ awˬ hkʼaˇ htaꞈ kaꞈ a yeˇ maˇ yuˬ tuˬ yoˬ. (1 Kawˇrenˍhtuˆ 3:19, 20 gʼaw sheˍ.) Maˇ˗awˍ ve chaw lehˬ, yawˇ hui te gaˇ ve hkʼe te ve pa taw, “miˬ guiˬ ve cuˇ yiˍ” htaꞈ dawˇ cawˇ ve yoˬ. Peˍraˍgaˍ venˇ lo ve chaw leh Saˍtiˍrehˇ venˇ lo ve chaw lehˬ, haˉ chawˇ haˉ paˆ te leh shaˉ hoꞈ htaꞈ oˉ kʼoˍ pui ve lehˬ a hkʼe leˇ hpehꞈ ve tehꞈ dawˇ ve yoˬ. Oˇ kaˬ lo chehˇ ve Hkriꞈ yaˇ teˇ hpaˍ kaꞈ yawˇ hui hkʼe dawˇ la ve yoˬ. Chi htaꞈ pa taw, Hkriꞈ yaˇ chi ve 2 moˍ hkʼaw haˉ chawˇ haˉ paˆ te ve cawˬ ve pa taw Yeˍsuˆ hehnˇ chaweh beˆ maˍ piˇ ve yoˬ. (Hpeuꞈ maˍ ve 2:14, 20) Chi beuꞈ teˇ co˗e ngaˬ hui kaꞈ miˬ guiˬ yaˇ dawˇ ve hkʼe dawˇ tuˬ nyiˉ laˇ ve chaw lehˬ, yehˬ kʼa hkʼaw ve chaw, awˬ suhˍ awˬ shaˍ hpawˇ ve awˬ viˉ awˬ nyi, maˇ heˆ leh awˬ chawˇ ngaˬ hui ve yonˍ ve awˬ liˇ awˬ hkʼaˇ hehnˇ jaˇ leh Gʼuiˬ sha ve awˬ liˇ awˬ hkʼaˇ htaꞈ a yeˇ maˇ yuˬ leh maˇ gʼaꞈ te tuˬ te laˇ ve yoˬ. Tawˇ pa haˉ te kʼo, Liꞈ hpu hkʼaw ve awˬ liˇ awˬ hkʼaˇ a yeˇ maˇ uiˍ leh piˍ jaˇ˗o tehꞈ yawˇ hui kʼoˆ laˇ ve yoˬ.

11. Ngaˬ hui Gʼuiˬ sha ve awˬ liˇ awˬ hkʼaˇ htaꞈ coˇ caˇ leh gʼaꞈ te htaˇ aˬ htoꞈ ma maˇ te cawˇ ve le?

¹¹ Teˇ pawˆ pawˆ kʼo, Yaˬhoˉvaˬ hkʼaˬ tawˍ lehˆ maˇ beˆ maˍ laˇ ve pa taw, “bvuhꞈ taˍ ve awˬ hkʼaˇ suh ceh tiˉ” ngaˬ hui maˇ gʼaꞈ te gaˇ ve yoˬ. (1 Kawˇrenˍhtuˆ 4:6) Yeˍsuˆ ve awˬ co˗e htaˇ bon awˬ hoˉ hui kaꞈ chi hkʼe te yaꞈ ve yoˬ. Moˉseˍ ve awˬ liˇ tawˇ hkawˇ awˬ hkʼoˆ kaꞈ, yawˇ hui hkʼaˇ yawˇ hui awˬ liˇ teh ve yoˬ. Chi ve lehˬ mawˇ hehnˇ jaˇ ve awˬ nu ve chaw htaꞈ taˆ tcuh ve htaꞈ shuˍ ve yoˬ. (Maꞈhtehˍ 23:4) Yaˬhoˉvaˬ lehˬ Liꞈ hpu leh yawˇ ve kanˉ hkʼaˇ htaꞈ cuˇ leh ngaˬ hui htaꞈ hkʼa tawˍ lehˆ beˆ maˍ laˇ taˍ ve yoˬ. Chi lehˬ ngaˬ hui awˬ leuˉ kʼawꞈ keu tuˬ maˇ loˍ. (Tawˇ naˉ ve 3:5-7) Chi htaꞈ pa taw, Liꞈ hpu hkʼaw maˇ gʼa kʼoˆ laˇ taˍ ve, awˬ liˇ awˬ hkʼaˇ awˬ leuˉ ngaˬ hui maˇ gʼa keu leh a shu yawˇ hkʼaˇ yawˇ ve awˬ liˇ awˬ viˉ awˬ nyi htaꞈ maˇ gʼa teh piˇ.

12. Saˍtanˍ “tcuhˉ kuiˬ maˇ cawˬ ve heˍ ve tawˇ hkawˇ htaꞈ” hkʼaˬ hkʼe yehˇ ve le?

¹² Heˍ ve tawˇ hkawˇ. Saˍtanˍ lehˬ chaw yaˇ maˇ cawˇ maˇ hawˍ daꞈ tuˬ leh maˇ daꞈ ve htaꞈ te tuˬ “tcuhˉ kuiˬ maˇ cawˬ ve heˍ ve tawˇ hkawˇ” leh “miˬ guiˬ htaꞈ caˉ daꞈ ve dawˇ hkʼaˇ” htaꞈ yehˇ ve yoˬ. (Kawˇlawˇsehˇ 2:8) Awˉ lawˉ peuˇ teˇ co˗e htaˇ awˬ ceuˬ chi teˇ hpaˍ lehˬ chaw yaˇ ve cuˇ yiˍ, Yuˇdaꞈ chaw maˍ ve Liꞈ hpu hkʼaw maˍ ve htaꞈ maˇ shuˍ daꞈ leh, Hkriꞈ yaˇ Moˉseˍ ve awˬ liˇ tawˇ hkawˇ htaꞈ gʼaꞈ te tehꞈ kʼoˆ maˍ ve kaꞈ maˇ shuˍ daꞈ ve yoˬ. Awˬ ceuˬ chi teˇ hpaˍ lehˬ heˍ ve tawˇ hkawˇ hpehꞈ ve pa taw, Yaˬhoˉvaˬ cuˇ yiˍ maˍ yiˍ peꞈ laˇ shehˍ hpaˇ htaꞈ chaw yaˇ a yeˇ maˇ te tuˬ Saˍtanˍ te piˇ ve yoˬ. Chi beuꞈ teˇ co˗e Saˍtanˍ yehˇ ve lehˬ chaw yaˇ ve dawˇ hkʼaˇ leh mvuhˇ miˬ kanˉ te paˍ geh laˬ ve awˬ lawn sha  tanˇ maˇ heˆ heˆ ve leh, in˗teu˗neꞈ hkʼaw leh awˬ han teˇ hpaˍ hkʼaw hpehꞈ ve yoˬ. Awˬ lawn chi ve a naˍ 19 ve awˬ yanˇ htaˇ, ngaˬ hui hkʼa tawˍ lehˆ gʼa mawˬ ve yoˬ. c Yaˬhoˉvaˬ ve Shaˉhkiˆhkanˍ ve chaw lehˬ Gʼuiˬ sha ve kanˉ hkʼaˇ beˆ maˍ laˇ ve htaꞈ na ve pa taw, awˬ nu ve chaw maˇ heˆ heˆ ve awˬ lawn htaꞈ na leh dawˇ haˍ ve hkʼe taw ngaˬ hui maˇ dawˇ haˍ.—Maꞈhtehˍ 24:45.

13. A yeˇ maˇ uiˍ ve awˬ ceuˬ htaꞈ ngaˬ hui maˇ te tuˬ aˬ htoꞈ ma te shaˍ tiꞈ gʼa te cawˇ ve le?

¹³ A yeˇ maˇ uiˍ ve awˬ ceuˬ htaꞈ maˇ te. “A yeˇ uiˍ ve” awˬ ceuˬ htaꞈ ngaˬ hui a yeˇ gʼa te cawˇ ve yoˬ. (Hpiˇliˇpiˆ 1:9, 10) A yeˇ maˇ uiˍ ve awˬ ceuˬ lehˬ awˬ yanˇ shonˇ tuˬ, awˬ gʼaˇ maˇ cawˬ tuˬ, leh a shaꞈ teꞈ kuiˬ hkʼaw a yeˇ uiˍ ve awˬ ceuˬ htaꞈ a yeˇ maˇ te tuˬ te laˇ ve yoˬ. Tawˇ pa haˉ te kʼo, caˇ ve dawˬ ve, gʼaˇ jehˇ ve, ngaˬ hui awˬ ceuˬ chi teˇ hpaˍ htaꞈ ceh tiˉ a yeˇ te jaˇ ve kʼo, ngaˬ hui te ve kanˉ kaꞈ awˬ bon maˇ cawˬ tuˬ te laˇ ve yoˬ. (Luˉkaꞈ 21:34, 35) Chi hkʼoˆ kaꞈ, chi beuꞈ teˇ co˗e awˬ lawn sha tanˇ hkʼaw mvuhˇ miˬ kanˉ te paˍ leh mvuhˇ miˬ yaˇ maˇ cawˇ maˇ hawˍ daꞈ ve awˬ lawn cawˬ maˇ jaˇ ve yoˬ. Awˬ lawn chi ve teˇ hpaˍ htaꞈ ngaˬ hui a yeˇ hkʼe taw maˇ gʼa te tuˬ gʼa tawnˇ taˍ cawˇ ve yoˬ. Ngaˬ hui chi hkʼe maˇ te ve kʼo, teˇ hpawˇ lo chehˇ tuˬ dawˇ la ve yoˬ. Ngaˬ hui cawˇ ve htaꞈ te tuˬ dawˇ teh taˍ ve htaꞈ Saˍtanˍ te luˬ laˇ tuˬ yehˇ ve 5 ceuˬ htaꞈ gʼa henˇ˗oˬ. Ngaˬ hui hkʼa dehꞈ yonˍ yeˬ gʼa tuˬ, leh Saˍtanˍ te tcuh gaˇ ve awˬ ceuˬ htaꞈ maˇ gʼa te tuˬ, hkʼaˬ hkʼe te cawˇ ve awˬ lawn chi ve hkʼaw teˇ geh henˇ tuˬ yoˬ.

14. Ngaˬ hui Yaˬhoˉvaˬ hpawˇ chehˇ leh, yonˍ yeˬ gʼa tuˬ ga laˇ gʼa ve teˇ hkʼaˇ lehˬ aˬ htoꞈ ma le?

¹⁴ Nawˬ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ tuˬ tehꞈ dawˇ teh taˍ ve. Nawˬ chi hkʼe dawˇ cheˆ ve lehˬ, Yaˬhoˉvaˬ hpawˇ chehˇ gaˇ ve pa taw yoˬ. Chi htaꞈ pa taw, oˇ ve teˇ yanˇ nawˬ awˬ tehˬ ve htaꞈ ca mawˬ˗oˬ ve tehꞈ yonˍ gʼa tuˬ aˬ htoꞈ ma ga laˇ gʼa ve htaꞈ dawˇ nyi sheˍ. Nawˬ Yaˬhoˉvaˬ htaꞈ shiˍ daꞈ ve nawˬ yawˇ htaꞈ yawˆ yan leh haꞈ ve pa taw, nawˬ ve Awˬ pa hkʼe shawnˍ ve yoˬ. Nawˬ leuˉ leh yonˍ yeˬ ve pa taw nyi ma pa tuˬ te laˇ ve yoˬ. Nawˬ Yaˬhoˉvaˬ maˇ dawˇ cawˇ ve awˬ ceuˬ htaꞈ maˇ te leh nawˬ a shaꞈ teꞈ kuiˬ hkʼaw yawˇ nyi hkʼaˇ suh tuˬ te ve yoˬ. Yaˬhoˉvaˬ nawˬ htaꞈ venˇ baˆ hpehˇ laˇ˗oˬ ve tehꞈ gʼa shiˍ htaˇ, nawˬ nyi ma sha ve yoˬ. (Chiˇ mvuh ve 32:1, 2) Nawˬ Hkriꞈ yaˇ awˬ moˍ  hpawnˬ daꞈ ve hkʼaw kʼai leh Liꞈ hpu hkʼaw daꞈ ve awˬ ceuˬ gʼa henˇ taˍ ve awˬ nu ve chaw htaꞈ kʼoˆ maˍ piˇ ve yoˬ. Peuˬ hkʼawꞈ nawˉ Gʼuiˬ sha htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ ve yoˬ. Leh chi teˇ hkui nawˬ a shaꞈ gʼa tuˬ ve yaꞈ kʼaw hkʼoˆ lo kʼai chehˇ ve yoˬ. Yaꞈ kʼaw chi teˇ caˆ htaꞈ maˇ tawˆ˗e tuˬ dawˇ teh taˍ gʼa ve yoˬ.—Maꞈhtehˍ 7:13, 14.

15. Aˬ htoꞈ ma te a shu yawˇ hkʼaˇ yawˇ Liꞈ hpu henˇ leh hkʼa dehꞈ dawˇ nyi ve lehˬ awˬ bon cawˬ ve le?

¹⁵ A shu yawˇ hkʼaˇ yawˇ Liꞈ hpu henˇ leh hkʼa dehꞈ dawˇ nyi ve. Suhˆ cehˬ awˬ geu tcuhˆ naˉ ve kʼo, mvuhˇ yeˬ mvuhˇ haw lonˉ laˬ htaˇ maˇ paiˍ˗e gʼa. Chi ve hkʼa shuˍ shuˍ, ngaˬ hui ve yonˍ hkʼaˇ yonˍ yeˬ ve kʼo, ngaˬ hui aˬ htoꞈ ma gʼa hpuˇ ve htawˇ hkʼaˬ htaˆ kaꞈ yonˍ yeˬ gʼa tuˬ yoˬ. Suhˆ cehˬ uiˍ la htaˇ, awˬ geu cawˬ maˇ leh tcuhˆ naˉ ve yoˬ. Chi ve hkʼa shuˍ shuˍ, ngaˬ hui a shu yawˇ hkʼaˇ yawˇ Liꞈ hpu henˇ leh hkʼa dehꞈ dawˇ nyi htaˇ, ngaˬ hui ve yonˍ hkʼaˇ yonˍ yeˬ leh Yaˬhoˉvaˬ beˆ maˍ laˇ taˍ ve daꞈ jaˇ tehꞈ ngaˬ hui hkʼa dehꞈ yonˍ gʼa ve yoˬ. (Kawˇlawˇsehˇ 2:6, 7) Ngaˬ hui a shu yawˇ hkʼaˇ yawˇ Liꞈ hpu henˇ htaˇ, aˬ htoꞈ ma maˍ laˇ ve, beˆ maˍ laˇ ve, htaꞈ dawˇ nyi sheˍ. Leh oˇ htaˇ teˇ co˗e Yaˬhoˉvaˬ ve kanˉ te ve chaw htaꞈ yawˇ hkʼaˬ hkʼe te haꞈ shaˉ piˇ ve, awˬ lawn htaꞈ dawˇ nyi tuˬ te laˇ ve yoˬ. Tawˇ pa haˉ te kʼo, Yeˍsaˍkeˍlaˆ bon yehˬ lonˉ ve awˬ han htaꞈ zuhꞈ maˆ gʼa mawˬ ve yoˬ. Mvuhˇ naw ma tcuh yaˇ bon yehˬ lonˉ htaꞈ tehˆ nyi htaˇ ve awˬ lawn htaꞈ yawˇ dawˇ cawˇ ve yoˬ. Zuhꞈ maˆ chi ve Yeˍsaˍkeˍlaˆ yonˍ yeˬ tuˬ leh awˬ gʼaˇ gʼa tuˬ te piˇ ve yoˬ. Daꞈ kehˬ ve oˉ kʼoˍ pui tuˬ ve awˬ lawn Yaˬhoˉvaˬ ve awˬ liˇ awˬ hkʼaˇ htaꞈ haꞈ shaˉ tuˬ ngaˬ hui aˬ htoꞈ ma gʼa te cawˇ ve htaꞈ shiˍ tuˬ ga laˇ ve yoˬ. d (Yeˍsaˍkeˍlaˆ 40:1-4; 43:10-12) Liꞈ hpu hkʼaw ve tcuhˉ kuiˬ naˉ ve awˬ lawn ngaˬ hui a shu yawˇ hkʼaˇ yawˇ Liꞈ hpu henˇ leh hkʼa dehꞈ dawˇ nyi ve kʼo, ngaˬ hui kaꞈ awˬ bon gʼa tuˬ yoˬ.

16. Bawˆ nyi ma yonˍ yeˬ ve cawˬ ve lehˬ yawˇ htaꞈ hkʼaˬ hkʼe ga piˇ ve le? (Chiˇ mvuh ve 112:7)

¹⁶ Nawˬ ve nyi ma yonˍ yeˬ tuˬ te sheˍ. Jawˇ mawˇ Daˍviˆ kʼoˆ ve, yawˇ Yaˬhoˉvaˬ htaꞈ leuˉ leh haꞈ tuˬ yoˬ. Yawˇ kʼa muiˬ hkawˇ kʼa leh kʼoˆ ve, “Gʼuiˬ sha˗oˬ, ngaˬ nawˬ htaꞈ gʼaˇ va” tuˬ yoˬ. (Chiˇ mvuh ve 57:7) Ngaˬ hui kaꞈ yonˍ yeˬ leh Yaˬhoˉvaˬ htaꞈ gʼaˇ hkʼa dehꞈ va gʼa ve yoˬ. (Chiˇ mvuh ve 112:7 gʼaw sheˍ.) Bawˆ yonˍ yeˬ gʼa tuˬ aˬ htoꞈ ma ga piˇ ve awˬ lawn htaꞈ teˇ geh kʼawꞈ nyi sheˍ. Yawˇ teˇ ceuˬ ceuˬ hpehꞈ la htaˇ, awˬ suhˍ gu teh taˍ laˇ˗a tehꞈ saˍ laꞈ gʼonˍ kʼoˆ piˇ ve,  saˍ laꞈ gʼonˍ chi hkʼe te ve kʼo, yawˇ naˆ tsuhˇ yehˬ lo laꞈ haˉ tawˆ˗e tuˬ yoˬ tehꞈ kʼoˆ piˇ ve yoˬ. Peuˬ hkʼawꞈ nawˉ awˬ lawn chi ve htaꞈ Bawˆ kʼoˆ ve, “oˇ ve teˇ yanˇ ngaˬ aˬ htoꞈ ma hpehꞈ la tuˬ ve htaꞈ maˇ kawˆ leh ngaˬ laꞈ haˉ kʼoˆ piˇ gʼa ve yoˬ.”

17. Bawˆ ve awˬ lawn ngaˬ hui htaꞈ aˬ htoꞈ ma maˍ laˇ ve le? (Awˬ han htaꞈ nyi sheˍ.)

¹⁷ Bawˆ naˆ tsuhˇ yehˬ lo maˇ kʼai sheˍ htaˇ kaꞈ yawˇ Yaˬhoˉvaˬ hkawˇ na yuˬ tuˬ dawˇ cheˆ˗oˬ ve pa taw, yawˇ hkʼa dehꞈ yonˍ yeˬ gʼa ve yoˬ. Yawˇ hkʼa dehꞈ yonˍ yeˬ gʼa tuˬ ga piˇ gʼa ve lehˬ (1) yawˇ Yaˬhoˉvaˬ nyi hkʼaˇ shu tuˬ teˇ piˇ gaˇ ve, (2) a shaꞈ leh awˬ suhˍ htaꞈ caˉ daꞈ ve awˬ lawn yawˇ Liꞈ hpu leh Gʼuiˬ sha ve kanˉ hkʼaˇ hkʼaw ve liꞈ hkʼa dehꞈ gʼaw leh (3) Yaˬhoˉvaˬ beˆ maˍ laˇ ve htaꞈ gʼaꞈ te ve lehˬ, chi teˇ hkui leh awˬ gʼuˇ shuˍ hpawˇ kaꞈ awˬ bon gʼa tuˬ yoˬ tehꞈ yawˇ yonˍ gʼa ve yoˬ. Ngaˬ hui kaꞈ yawˇ hkʼa shuˍ te ve kʼo, ngaˬ hui shoꞈ shaꞈ ve maˇ heˆ leh tuꞈ ve hkanˍ ve aˬ htoꞈ ma gʼa hpuˇ ve htawˇ maˇ kʼoˆ, ngaˬ hui kaꞈ yonˍ yeˬ ve cawˬ gʼa tuˬ yoˬ.

18. Baˍrehˆ ve awˬ lawn ngaˬ hui Yaˬhoˉvaˬ htaꞈ gʼaˇ va tuˬ hkʼaˬ hkʼe maˍ laˇ ve le? (Awˬ htaꞈ hpawˇ ve awˬ han htaꞈ nyi sheˍ.)

¹⁸ Yaˬhoˉvaˬ htaꞈ gʼaˇ va ve. Yaˬhoˉvaˬ beˆ maˍ laˇ ve htaꞈ Baˍrehˆ gʼaˇ va ve pa taw, canˇ paˍ htaꞈ hkʼaˬ hkʼe te gʼaˇ ve teˇ geh nyi sheˍ. Yaˬhoˉvaˬ lehˬ Baˍrehˆ htaꞈ maꞈ yaˇ shiˍ leh Hkaˍnaˍ chaw laꞈ caˉ hkʼa biˇ cawˬ ve htaꞈ ca bawˆ˗e tcuh htaˇ, Iˉsaˍreˍlaˆ chaw ve maꞈ yaˇ lehˬ htanˍ tuˬ leh gehˇ teˇ maˬ˗ehˬ kaꞈ maˇ cawˬ ve yoˬ. (Suhˉ jehˬ ve 5:8) Tcuh kaˍ ma Deˍboˇraˍ lehˬ Baˍrehˆ htaꞈ Taˍbawˇraˆ hkʼaw lo yaꞈ la tcuh leh maꞈ poˍ lonˉ Siˇsaˍraˆ iˉ mvuhˇ lawˬ 900 hkeh cawˬ ve htaꞈ ca bawˆ˗e tcuh ve yoˬ. Iˉ mvuhˇ lawˬ chi teˇ hpaˍ leh maꞈ yaˇ miˬ tawˬ kuiˬ lo bawˆ htaˇ gʼaˇ tuˬ awˬ hkʼaˇ cawˬ ve tehꞈ Baˍrehˆ shiˍ ve htawˇ, yawˇ na yuˬ ve yoˬ. Baˍrehˆ ve maꞈ yaˇ miˬ tawˬ kuiˬ lo ca bawˆ˗e htaˇ, Yaˬhoˉvaˬ lehˬ mvuhˇ yeˬ lonˉ laˬ tcuh leh Hkaˍnaˍ chaw ve iˉ mvuhˇ lawˬ jeꞈ nehˆ hkʼaw tuˍ loꞈ˗e tcuh leh Yaˬhoˉvaˬ lehˬ Baˍrehˆ maꞈ bawˆ gʼaˇ tuˬ ga piˇ ve yoˬ. (Suhˉ jehˬ ve 4:1-7, 10, 13-16) Ngaˬ hui Yaˬhoˉvaˬ htaꞈ gʼaˇ va leh yawˇ ve kanˉ hkʼaˇ beˆ maˍ laˇ ve htaꞈ na yuˬ ve kʼo, ngaˬ hui kaꞈ Saˍtanˍ htaꞈ gʼaˇ tuˬ yoˬ.—Bon maˍ ve 31:6.

19. Aˬ htoꞈ ma te nawˬ hkʼaˬ htaˆ kaꞈ yonˍ yeˬ gaˇ ve le?

¹⁹ Ngaˬ hui Saˍtanˍ uˉ peunˍ ve awˬ hawˉ lo chehˇ ve pa taw, ngaˬ hui hkʼaˬ htaˆ kaꞈ yonˍ yeˬ tuˬ gʼa coˇ caˇ cawˇ ve yoˬ. (1 Tiˆmoˉseˍ 6:11, 12; 2 Peˍtruˆ 3:17) Fawˉ mehˍ laˇ ve, nyiˉ laˇ ve, miˬ guiˬ yaˇ dawˇ ve hkʼe dawˇ ve, heˍ ve tawˇ hkawˇ leh a yeˇ maˇ uiˍ ve awˬ ceuˬ htaꞈ te tuˬ chi ve teˇ hpaˍ htaꞈ ngaˬ hui gʼaˇ tcuh tuˬ dawˇ teh taˍ ve yoˬ. (Eˇfeˇsuꞈ 4:14) Leh ngaˬ hui hkʼaˬ htaˆ kaꞈ yonˍ yeˬ gʼa tuˬ Yaˬhoˉvaˬ htaꞈ haꞈ leh yawˇ ve tawˇ hkawˇ htaꞈ htawˇ dawˇ nawˬ dawˇ maˇ cawˬ leh na yuˬ cawˇ ve yoˬ. Chi hkʼoˆ kaꞈ, ngaˬ hui awˬ hkʼaˇ ca ve chaw gʼa hpehꞈ ve yoˬ. Yaꞈ hkʼaˇ, Yaˬhoˉvaˬ leh Yeˍsuˆ awˬ hkʼaˇ ca puiˉ ve daꞈ jaˇ ve hkʼaˬ hkʼe hpehꞈ ve gʼuˇ suhˍ teˇ lawn hkʼaw teˇ geh henˇ tuˬ yoˬ.