Nawˬ shiˍ˗aˬ laˇ?
Baˍbuˍlonˍ venˇ hkʼaw li kiˉ shiˍ hpfuhˆ mawˬ taˍ ve leh oˇ htaˇ teˇ ce˗e li kiˉ shiˍ te ve awˬ hkʼaˇ Liꞈ hpu hkʼaw hkʼaˬ hkʼe bvuhꞈ taˍ ve le?
Baˍbuˍlonˍ venˇ te taˍ ve li kiˉ shiˍ laiˉ lanˬ shiˍ htaꞈ mawˇ awˬ piˍ htaꞈ chaˬ nyi tehˆ nyi paˍ hpfuhˆ mawˬ ve yoˬ. Chaˬ nyi tehˆ nyi paˍ teˇ gʼaˇ Ro˗beuꞈ Hkaw˗de˗va kʼoˆ ve, li kiˉ shiˍ chi ve teˇ hpaˍ lehˬ, “venˇ baˬ lo li kiˉ shiˍ te tuˬ jeꞈ cawˬ leh suhˆ kaꞈ cawˬ maˇ ve pa taw” oˇ kaˬ lo te ve yoˬ.
Baˍbuˍlonˍ venˇ hkʼaw ve awˬ hoˉ awˬ naˬ li kiˉ shiˍ te kuiˬ lo awˬ nu ve haiˬ ve awˬ ceuˬ te ve htaꞈ mawˇ awˬ piˍ chaˬ nyi tehˆ nyi paˍ shaˉ hkiˆ hpfuhˆ mawˬ ve yoˬ. Teˇ ce˗e peuˬ teˇ ce˗e chaˬ nyi tehˆ nyi paˍ Paw˗A˗ri Bon˗ri leh liꞈ tanˇ mvuh ve hkʼaw Aˍsuˇliˆ chaw ceuˬ tawˇ hkawˇ liꞈ maˍ chehˇ ve To˗la˗to kʼoˆ ve, “Baˍbuˍlonˍ venˇ lo liꞈ laiˉ kʼoˆ bvuhꞈ taˍ ve hkʼaw hpfuhˆ ve chaw, maˇ na yuˬ ve chaw, maˇ heˆ leh yawˇ hui ve gʼuiˬ sha htaꞈ oˉ kʼoˍ maˇ pui ve chaw htaꞈ tuˉ baˬ tehꞈ jawˇ mawˇ tawˇ piˇ ve yoˬ.” Tawˇ pa haˉ te kʼo, jawˇ mawˇ Neˍbuˍhkaˍneˍzaˍ ve awˬ ce˗e htaˇ ve liꞈ teˇ kʼoˆ hkʼaw kʼoˆ ve, “yawˇ hui htaꞈ te luˬ ve, tuˉ baˬ ve, mvuhˇ hkʼawˇ tawˆ la tcuh ve, yawˇ hui htaꞈ aˬ miˍ buiˬ hpfuh hkʼaw” baˬ keu tehꞈ kʼoˆ piˇ ve yoˬ.
Awˬ lawn chi lehˬ Liꞈ hpu hkʼaw gʼaw ve chaw htaꞈ Daˍyeˍlaˆ kaˇ nanˉ uiˍ 3 htaꞈ dawˇ mawˬ tuˬ te piˇ ve yoˬ. Baˍbuˍlonˍ venˇ awˬ baˬ lo Duˇraˆ miˬ tawˬ kuiˬ lo jawˇ mawˇ Neˍbuˍhkaˍneˍzaˍ shi shaˉ hoꞈ lonˉ te taˍ ve tehꞈ kʼoˆ ve yoˬ. Heˍbrehˇ chaw yaˇ nehˬ Shaˆdraˆ, Meˍshehˆ leh Aˍbeˍdaˍneˍgoˍ hui shi shaˉ hoꞈ lonˉ htaꞈ oˉ kʼoˍ maˇ pui ve yoˬ. Jawˇ mawˇ Neˍbuˍhkaˍneˍzaˍ nyi ma zuhˆ jaˇ leh “ponˬ laˬ htaˇ te jaw ve aˬ miˍ buiˬ hpfuh aꞈ kehˉ suhˍ pun chiˆ jaˇ ve aˬ miˍ buiˬ hpfuh lonˉ teˇ maˬ te tcuh” leh chi ve 3 gʼaˇ htaꞈ “aˬ miˍ bui hpfuh hkʼaw baˬ keu tcuh ve yoˬ.” Yaꞈ hkʼaˇ, yawˇ hui htaꞈ mvuhˇ naw ma tcuh yaˇ ga piˇ ve yoˬ.—Daˍyeˍlaˆ 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Li kiˉ shiˍ hkʼoˆ Neˍbuˍhkaˍneˍzaˍ ve awˬ meh bvuhꞈ taˍ ve
Baˍbuˍlonˍ venˇ hkʼaw hpfuhˆ mawˬ ve li kiˉ shiˍ lehˬ Liꞈ hpu hkʼaw bvuhꞈ taˍ ve cawˇ ve htaꞈ gʼa mawˬ ve yoˬ. Li kiˉ shiˍ chi ve teˇ hpaˍ hkʼoˆ jawˇ mawˇ htaꞈ chiˇ mvuh ve tawˇ hkawˇ bvuhꞈ taˍ ve htaꞈ gʼa mawˬ ve yoˬ. Li kiˉ shiˍ teˇ maˬ hkʼoˆ bvuhꞈ taˍ ve hkʼaw kʼoˆ ve, “Baˍbuˍlonˍ ve jawˇ mawˇ Neˍbuˍhkaˍneˍzaˍ . . . Uiˍ jaˇ mvuh jaˇ ve jawˇ mawˇ hawˉ yehˬ lonˉ te taˍ ve . . . Choˬ kaˬ lo ngaˬ ve awˬ yaˇ awˬ duˬ hkʼaˬ htaˆ kaꞈ uˉ peunˍ sheˍ.” Choˬ kaˬ lo bvuhꞈ taˍ ve awˬ lawn leh Daˍyeˍlaˆ liꞈ 4:30 hkʼaw Neˍbuˍhkaˍneˍzaˍ kʼoˆ ve htaꞈ suhˍ daꞈ jaˇ. Oˇ kaˬ lo kʼoˆ ve, “Baˍbuˍlonˍ venˇ hkʼaˬ ma uiˍ jaˇ ve htaꞈ nyi sheˍ. Ngaˬ ve awˬ meꞈ awˬ hponˇ hkʼaˬ ma uiˍ jaˇ ve htaꞈ hpeuꞈ maˍ piˇ tuˬ, venˇ chi htaꞈ ngaˬ te taˍ ve yoˬ.”
