1. Mvuhˇ yeˬ mvuhˇ haw lonˉ maˇ gʼa hpuˇ sheˍ htaˇ, gu hehnˇ taˍ ve lehˬ aˬ htoꞈ ma te cuˇ yiˍ cawˬ jaˇ ve le?

 Mvuhˇ yeˬ mvuhˇ haw lonˉ maˇ gʼa hpuˇ sheˍ htaˇ gu hehnˇ taˍ ve chaw lehˬ, mvuhˇ yeˬ mvuhˇ haw lonˉ gʼa hpuˇ htaˇ gʼa ponˬ tuˬ awˬ hkʼaˇ cawˬ leh awˬ nu ve chaw htaꞈ kaꞈ ga piˇ gʼa ve yoˬ. Uˉyawˉpaˆ miˬ guiˬ lo chaw yaˇ hpawˇ ga piˇ ve awˬ moˍ kʼoˆ ve, “hkʼa dehꞈ gu hehnˇ taˍ ve lehˬ gʼa ponˬ tuˬ awˬ hkʼaˇ cawˬ ve yoˬ.”

2. Tuꞈ jaˇ hkanˍ jaˇ ve maˇ gaˬ la sheˍ htaˇ, aˬ htoꞈ ma te ngaˬ hui hkʼa dehꞈ gu hehnˇ taˍ cawˇ ve le? (Maꞈhtehˍ 24:44)

² “Tuꞈ jaˇ hkanˍ jaˇ ve teˇ ceuˬ lehˬ” laꞈ tcuh laꞈ haˉ hpehꞈ la tuˬ yoˬ. (Maꞈhtehˍ 24:21) Yaꞈ hkʼaˇ, chi mvuhˇ yeˬ mvuhˇ haw lonˉ awˬ nu ve htaꞈ peun daꞈ ve yoˬ. Awˬ lawn kʼo, chi awˬ tehˬ gaˬ la tuˬ ve yoˬ tehꞈ ngaˬ hui shiˍ ve yoˬ. Peuˬ laˬ ve aˬ laˬ hkʼe 2,000 hkʼawꞈ htaˇ, Yeˍsuˆ yawˇ awˬ hkʼaˇ suh gʼaꞈ yuˬ ve chaw htaꞈ shaˍ tiꞈ piˇ ve, tuꞈ jaˇ hkanˍ jaˇ ve gaˬ la tuˬ hkʼa dehꞈ gu hehnˇ taˍ˗oꞈ. (Maꞈhtehˍ 24:44 gʼaw sheˍ.) Ngaˬ hui hkʼa dehꞈ gu hehnˇ taˍ ve kʼo, tuꞈ jaˇ hkanˍ jaˇ ve awˬ yanˇ htaˇ yeunˇ hkanˍ gʼaˇ leh awˬ nu ve chaw yeunˇ hkanˍ gʼaˇ tuˬ kaꞈ ga piˇ gʼa tuˬ yoˬ.—Luˉkaꞈ 21:36.

3. Yeunˇ hkanˍ ve, teˇ gʼaˇ leh teˇ gʼaˇ ha kʼaˉ daꞈ ve, leh haꞈ daꞈ ve lehˬ, tuꞈ jaˇ hkanˍ jaˇ ve awˬ yanˇ htaˇ ngaˬ hui gu hehnˇ taˍ gʼa tuˬ hkʼaˬ hkʼa ga laˇ gʼa ve le?

³ Tuꞈ jaˇ hkanˍ jaˇ ve awˬ yanˇ htaˇ ngaˬ hui gu hehnˇ taˍ gʼa tuˬ, ga laˇ gʼa ve te hkʼaˇ dawˇ hkʼaˇ 3 ceuˬ htaꞈ teˇ geh nyi sheˍ. Oˇ ve teˇ yanˇ Gʼuiˬ sha ve kanˉ hkʼaˇ ngaˬ hui htaꞈ suhˉ jehˬ ve awˬ lawn hto toˇ tcuh laˇ leh tawˍ laˇ ve htaꞈ gʼa hpuˇ ve kʼo, hkʼaˬ hkʼe te tuˬ ve le? Ngaˬ hui Yaˬhoˉvaˬ ve hkawˇ na yuˬ leh yawˇ haꞈ shaˉ laˇ ve htaꞈ gʼa tuˬ ngaˬ hui caˉ leh yawˇ htaꞈ gʼaˇ va tuˬ, gʼa yeunˇ hkanˍ cawˇ ve yoˬ. (Hpeuꞈ maˍ ve 16:21) Awˬ viˉ awˬ nyi hpu shi mawˇ jeˬ hkʼa peu˗eˬ luˬ kʼai ve kʼo, ngaˬ hui hkʼaˬ hkʼe te tuˬ ve le? Ngaˬ hui yawˇ hui htaꞈ ga piˇ tuˬ, teˇ gʼaˇ leh teˇ gʼaˇ ha kʼaˉ daꞈ ve gʼa cawˬ ve yoˬ. (Haˍbaˍkuˆ 3:17, 18) Mvuhˇ miˬ teˇ hpaˍ pawnˇ daꞈ leh ngaˬ hui htaꞈ ca bawˆ la htaˇ awˬ viˉ awˬ nyi laiˉ gʼaˇ geh teˇ geh gʼa chehˇ cawˇ ve kʼo, tuꞈ jaˇ hkanˍ jaˇ ve awˬ yanˇ chi ve htaꞈ ponˬ kʼai gʼa tuˬ teˇ gʼaˇ leh teˇ gʼaˇ leuˉ leh gʼa haꞈ daꞈ ve yoˬ.—Yeˍsaˍkeˍlaˆ 38:10-12.

4. Yeunˇ hkanˍ ve, teˇ gʼaˇ leh teˇ gʼaˇ ha kʼaˉ daꞈ ve, leh haꞈ daꞈ ve, chi teˇ hpaˍ leuˉ leh cawˬ tuˬ Liꞈ hpu hkʼaw kʼoˆ laˇ taˍ ve htaꞈ ngaˬ hui hkʼaˬ hkʼe te shiˍ gʼa tuˬ le?

⁴ Yeunˇ hkanˍ ve, teˇ gʼaˇ leh teˇ gʼaˇ ha kʼaˉ daꞈ ve, leh haꞈ daꞈ ve, ngaˬ  hui leuˉ leh cawˬ tuˬ Liꞈ hpu hkʼaw kʼoˆ laˇ taˍ ve yoˬ. Luˉkaꞈ liꞈ 21:19 hkʼaw kʼoˆ ve, ‘nawˬ awˬ leh meuˇ hkʼa gaˬ yeunˇ hkanˍ ve kʼo, co co taiˍ taiˍ a shaꞈ gʼa tuˬ yoˬ.’ Kawˇlawˇsehˇ liꞈ 3:12 hkʼaw kʼoˆ ve, ‘ha kʼaˉ puiˉ ve htaꞈ veuꞈ deh˗o.’ 1 Hteˇsaˍlawˇniˆ liꞈ 4:9, 10 hkʼaw kʼoˆ ve, ‘teˇ gʼaˇ leh teˇ gʼaˇ haꞈ daꞈ tuˬ Gʼuiˬ sha nawˬ hui htaꞈ maˍ laˇ peuˬ. Awˬ viˉ awˬ nyi teˇ hpaˍ˗oˬ, chi aꞈ kehˉ leuˉ leh haꞈ maˇ la tuˬ ngaˬ hui nawˬ hui htaꞈ awˬ gʼaˇ peꞈ laˇ ve yoˬ.’ Liꞈ hpu awˬ tawn chi ve teˇ hpaˍ awˬ laꞈ gʼawˇ hui lehˬ, yeunˇ hkanˍ ve, teˇ gʼaˇ leh teˇ gʼaˇ ha kʼaˉ daꞈ ve, leh haꞈ daꞈ ve leuˉ leh cawˬ˗oˬ ve chaw htaꞈ bvuhꞈ piˇ ve yoˬ. Yaꞈ hkʼaˇ, yawˇ hui te hkʼaˇ dawˇ hkʼaˇ chi ve teˇ hpaˍ leuˉ leh gʼa te tawˆ la sheˍ ve yoˬ. Ngaˬ hui kaꞈ chi hkʼa shuˍ shuˍ gʼa te cawˇ ve yoˬ. Awˉ lawˉ peuˇ ve Hkriꞈ yaˇ te hkʼaˇ dawˇ hkʼaˇ chi ve hkʼaˬ hkʼe hpeuꞈ maw daꞈ ve, leh ngaˬ hui yawˇ hui htaꞈ hkʼaˬ hkʼe henˇ yuˬ gʼa tuˬ kaꞈ teˇ geh henˇ tuˬ yoˬ. Chi hkʼe te ve lehˬ, ngaˬ hui tuꞈ jaˇ hkanˍ jaˇ ve htaꞈ gu hehnˇ taˍ gʼa tuˬ ga laˇ ve yoˬ.

5. Awˉ lawˉ peuˇ ve Hkriꞈ yaˇ tuꞈ ve hkanˍ ve htaꞈ hkʼaˬ hkʼe te yeunˇ hkanˍ gʼaˇ ve le?

⁵ Awˉ lawˉ peuˇ ve Hkriꞈ yaˇ yeunˇ hkanˍ ve gʼa cawˬ ve yoˬ. (Heˍbrehˇ 10:36) Yawˇ hui lehˬ maˇ˗awˍ ve chaw shoꞈ shaꞈ ve gʼa hpuˇ ve hkʼe gʼa hpuˇ ve htaꞈ gʼa yeunˇ hkanˍ ve yoˬ. Yawˇ hui chi aꞈ kehˉ tuꞈ ve hkanˍ ve kaꞈ gʼa hpuˇ sheˍ ve yoˬ. Yuˇdaꞈ chaw bon awˬ hoˉ leh Roˉmaꞈ maꞈ yaˇ yawˇ hui htaꞈ fawˉ mehˍ piˇ ve ceh tiˉ maˇ heˆ. Yaꞈ hkʼaˇ, yawˇ hui ve yehˬ kʼa hkʼaw ve chaw kaꞈ yawˇ hui htaꞈ fawˉ mehˍ piˇ ve yoˬ. (Maꞈhtehˍ 10:21) Teˇ pawˆ pawˆ kʼo, Hkriꞈ yaˇ chi ve teˇ hpaˍ Gʼuiˬ sha htaꞈ hpfuhˆ ve chaw, Hkriꞈ yaˇ awˬ moˍ hkʼaw maˇ cawˇ maˇ hawˍ daꞈ tuˬ te ve, leh maˇ heˆ heˆ maˍ ve htaꞈ kaꞈ yawˇ hui gʼa yeunˇ hkanˍ ve yoˬ. (Tcuh yaˇ 20:29, 30) Yawˇ hui chi hkʼe gʼa hpuˇ ve htawˇ, Hkriꞈ yaˇ chi ve teˇ hpaˍ yeunˇ hkanˍ gʼaˇ leh hkʼaˬ htaˆ kaꞈ ka tiꞈ yeˬ sheˍ ve yoˬ. (Hpeuꞈ maˍ ve 2:3) Hkʼaˬ hkʼe te yawˇ hui yeunˇ hkanˍ gʼaˇ ve le? Liꞈ hpu hkʼaw Yawˇbaˆ ve awˬ lawn htaꞈ yawˇ hui dawˇ nyi ve yoˬ. (Yaˍkoˆ 5:10, 11) Leh yawˇ hui awˬ gʼaˇ gʼa tuˬ Yaˬhoˉvaˬ geh bon lawˬ ve yoˬ. (Tcuh yaˇ 4:29-31) Chi hkʼoˆ kaꞈ, Hkriꞈ yaˇ chi ve teˇ hpaˍ yawˇ hui yeunˇ hkanˍ ve kʼo, awˬ bon gʼa tuˬ yoˬ tehꞈ dawˇ ve yoˬ.—Tcuh yaˇ 5:41.

6. Meh˗ri˗tanˇ tawˍ piˇ ve htaꞈ yeunˇ hkanˍ gʼaˇ ve awˬ lawn nawˬ hkʼaˬ hkʼe henˇ yuˬ gʼa ve le?

⁶ Liꞈ hpu hkʼaw yeunˇ hkanˍ gʼaˇ ve chaw awˬ lawn leh Gʼuiˬ sha ve kanˉ hkʼaˇ hkʼaw ve liꞈ kʼoˆ teˇ hpaˍ htaꞈ ngaˬ hui gʼaw nyi leh awˬ lawn chi ve teˇ hpaˍ htaꞈ dawˇ nyi ve kʼo, ngaˬ hui kaꞈ yeunˇ hkanˍ gʼaˇ tuˬ yoˬ. Ehˬbeˇniˇ˗aˇ mvuhˇ miˬ lo chehˇ ve Meh˗ri˗tanˇ kaꞈ chi hkʼa shuˍ te ve yoˬ. Yehˬ kʼa hkʼaw ve chaw yawˇ htaꞈ tawˍ piˇ hehnˇ jaˇ ve yoˬ. Leh yawˇ hui yawˇ htaꞈ dawˆ piˇ ve yoˬ. Yawˇ yeunˇ hkanˍ gʼaˇ ve awˬ lawn htaꞈ kʼoˆ maˍ laˇ ve, “Yawˇbaˆ ve awˬ lawn gʼaw htaˇ, ngaˬ dawˇ cawˇ jaˇ. Yawˇbaˆ tuꞈ ve hkanˍ ve gʼa hpuˇ jaˇ. Yaꞈ hkʼaˇ, yawˇ chi hkʼe gʼa hpuˇ ve a shu te laˇ ve kaꞈ maˇ shiˍ. Leh yawˇ kʼoˆ ve, ‘ngaˬ suh htaˇ hkʼa gaˬ Gʼuiˬ sha htaꞈ ka tiꞈ yeˬ tuˬ yoˬ!’ (Yawˇbaˆ 27:5) Yawˇbaˆ ngaˬ aꞈ kehˉ gʼa hpuˇ jaˇ ve htaꞈ gʼa mawˬ ve yoˬ. Ngaˬ tawˍ ve tsuhˇ ve gʼa hpuˇ ve chi hkʼe ve a shu te laˇ ve kaꞈ ngaˬ shiˍ ve yoˬ.”

7. Chi teˇ hkui ngaˬ hui shoꞈ shaꞈ ve maˇ gʼa hpuˇ jaˇ sheˍ ve htawˇ, ngaˬ hui hkʼaˬ hkʼe te cawˇ ve le?

⁷ Ngaˬ hui leuˉ leh yeunˇ hkanˍ gʼaˇ tuˬ, ngaˬ hui aˬ htoꞈ ma awˬ lawn dawˇ haˍ ve, teˇ hkui teˇ hkui bon lawˬ ve hkʼaw Yaˬhoˉvaˬ htaꞈ kʼoˆ piˇ sheˍ. (Hpiˇliˇpiˆ 4:6; 1 Hteˇsaˍlawˇniˆ 5:17) Chi teˇ hkui nawˬ shoꞈ shaꞈ jaˇ ve maˇ gʼa hpuˇ sheˍ ve htawˇ, nawˬ htawˇ dawˇ nawˬ dawˇ cawˬ ve, nyi ma maˇ sha ve, maˇ heˆ leh hkʼaˬ hkʼe te tuˬ maˇ shiˍ htaˇ, Gʼuiˬ sha ga laˇ tuˬ lawˬ gʼa ve yoˬ. Chi teˇ hkui teˇ nyi le le shoꞈ shaꞈ ve awˬ lawn gʼa hpuˇ ve maˇ uiˍ ve htawˇ, Yaˬhoˉvaˬ ga laˇ tuˬ coˇ caˇ leh lawˬ gʼa ve yoˬ. Awˬ gʼuˇ suhˍ hpawˇ shoꞈ shaꞈ ve chi aꞈ kehˉ gʼa hpuˇ jaˇ htaˇ, Yaˬhoˉvaˬ ga laˇ tuˬ lawˬ ve nawˬ htawˇ dawˇ nawˬ dawˇ maˇ cawˬ leh, nawˬ htaꞈ hkʼaˬ hkʼe htaˇ ga piˇ cawˇ ve, leh hkʼaˬ hkʼe ga piˇ tuˬ ve, Gʼuiˬ sha shiˍ ve tehꞈ nawˬ yonˍ gʼa ve yoˬ.—Chiˇ mvuh ve 27:1, 3.

8. Chi teˇ hkui tuꞈ ve hkanˍ ve htaꞈ yeunˇ hkanˍ gʼaˇ ve lehˬ awˬ gʼuˇ suhˍ hpawˇ tuꞈ jaˇ hkanˍ jaˇ ve gʼa hpuˇ htaˇ yeunˇ hkanˍ gʼaˇ tuˬ yoˬ tehꞈ Mi˗la ve awˬ lawn hkʼaˬ hkʼe maˍ laˇ ve le? (Yaˍkoˆ 1:2-4) (Awˬ han htaꞈ nyi sheˍ.)

⁸ Chi teˇ hkui ngaˬ hui tuꞈ ve hkanˍ ve gʼa hpuˇ ve htaꞈ yeunˇ hkanˍ gʼaˇ ve kʼo, awˬ gʼuˇ suhˍ hpawˇ tuꞈ jaˇ hkanˍ jaˇ ve gʼa hpuˇ htaˇ yeunˇ hkanˍ gʼaˇ tuˬ yoˬ. (Roˉmaꞈ 5:3) Aˬ htoꞈ ma te chi hkʼe kʼoˆ gʼa ve le? Awˬ viˉ awˬ nyi laiˉ gʼaˇ dawˇ ve, yeunˇ hkanˍ gʼaˇ ve teˇ pawˆ  le le, awˬ gʼuˇ suhˍ hpawˇ shoꞈ shaꞈ ve gʼa hpuˇ htaˇ, yeunˇ hkanˍ gʼaˇ tuˬ yoˬ. Yaˬhoˉvaˬ ga laˇ ve pa taw yawˇ hui shoꞈ shaꞈ ve htaꞈ yeunˇ hkanˍ gʼaˇ ve yoˬ. Yawˇ hui shoꞈ shaꞈ ve gʼa hpuˇ sheˍ ve kʼo, Yaˬhoˉvaˬ ga laˇ tuˬ yoˬ tehꞈ leuˉ leh yonˍ gʼa ve yoˬ. Yawˇ hui chi hkʼe yonˍ ve lehˬ awˬ gʼuˇ suhˍ hpawˇ tuꞈ jaˇ hkanˍ jaˇ ve gʼa hpuˇ htaˇ yeunˇ hkanˍ gʼaˇ tuˬ yoˬ. (Yaˍkoˆ 1:2-4 gʼaw sheˍ.) Ehˬbeˇniˇ˗aˇ mvuhˇ miˬ lo chehˇ ve, gʼuˇ suhˍ peuˍ ve mi˗la kʼoˆ ve, peuˬ laˬ htaˇ yawˇ shoꞈ shaꞈ ve gʼa hpuˇ jaw˗o ve htaꞈ yeunˇ hkanˍ gʼaˇ ve lehˬ, chi teˇ hkui shoꞈ shaꞈ ve gʼa hpuˇ ve htaꞈ yeunˇ hkanˍ gʼaˇ tuˬ ga laˇ ve yoˬ. Yawˇ kʼoˆ ve, teˇ pawˆ pawˆ kʼo yawˇ teˇ gʼaˇ ceh tiˉ shoꞈ shaꞈ ve gʼa hpuˇ ve tehꞈ dawˇ ve yoˬ. Yaꞈ hkʼaˇ, ponˬ laˬ ve 20 hkʼawꞈ ve awˬ yanˇ hkʼaw Yaˬhoˉvaˬ yawˇ htaꞈ hkʼaˬ hkʼe ga laˇ ve htaꞈ dawˇ nyi ve yoˬ. Hkʼe te leh, yawˇ awˬ to htaꞈ awˬ gʼa piˇ ve, “awˬ gʼaˇ taˇ nuˇ, yeunˇ hkanˍ leh ka tiꞈ yeˬ sheˍ. Yaˬhoˉvaˬ ngaˬ htaꞈ ga laˇ leh laiˉ hkʼawꞈ yeunˇ hkanˍ gʼaˇ˗oˬ ve pa taw, caˉ leh yeunˇ hkanˍ sheˍ.” Nawˬ kaꞈ chi ve hkʼa shuˍ shuˍ, ponˬ laˬ htaˇ nawˬ yeunˇ hkanˍ gʼaˇ tuˬ Yaˬhoˉvaˬ hkʼaˬ hkʼe ga laˇ ve htaꞈ dawˇ nyi sheˍ. Nawˬ tuꞈ ve hkanˍ ve htaꞈ yeunˇ hkanˍ gʼaˇ ve teˇ pawˆ le le Yaˬhoˉvaˬ mawˬ leh, yawˇ nawˬ htaꞈ laꞈ shawnˍ peꞈ laˇ tuˬ yoˬ tehꞈ yonˍ gʼa ve yoˬ. (Maꞈhtehˍ 5:10-12) Tuꞈ jaˇ hkanˍ jaˇ ve awˬ yanˇ gaˬ la htaˇ, nawˬ hkʼaˬ hkʼe te tuˬ shiˍ leh caˉ leh yeunˇ hkanˍ tuˬ yoˬ tehꞈ dawˇ teh taˍ ve yoˬ.

9. Siˇriˆ mvuhˇ miˬ Anˍtiˆawˍ venˇ hkʼaw chehˇ ve awˬ viˉ awˬ nyi teˇ gʼaˇ leh teˇ gʼaˇ hkʼaˬ hkʼe ha kʼaˉ daꞈ ve le?

⁹ Yuˇdaꞈ mvuhˇ miˬ hkʼaw meuꞈ lonˉ kaˆ lonˉ gaˬ la htaˇ, Hkriꞈ yaˇ hkʼaˬ hkʼe te ve htaꞈ teˇ geh nyi sheˍ. Yuˇdaꞈ mvuhˇ miˬ hkʼaw awˬ viˉ awˬ nyi meuꞈ lonˉ kaˆ lonˉ gʼa hpuˇ ve htaꞈ Suˇriˆ mvuhˇ miˬ hkʼaw Anˍtiˆawˍ venˇ lo chehˇ ve awˬ viˉ awˬ nyi gʼa kaˇ htaˇ ha kʼaˉ jaˇ ve yoˬ. Yaꞈ hkʼaˇ, yawˇ hui awˬ viˉ awˬ nyi htaꞈ ha kʼaˉ ve ceh maˇ heˆ. Ga piˇ ve yoˬ. Yawˇ hui lehˬ, “teˇ gʼaˇ le le a shu yawˇ puiˉ ve hpehꞈ ve hkʼe, Yuˇdaꞈ mvuhˇ miˬ awˬ hkʼaw lo chehˇ ve awˬ viˉ awˬ nyi teˇ hpaˍ htaꞈ ga piˇ tuˬ dawˇ cheˆ taˍ ve yoˬ.” (Tcuh yaˇ 11:27-30) Awˬ viˉ awˬ nyi meuꞈ lonˉ kaˆ lonˉ gʼa hpuˇ ve chaw chehˇ vuiˇ jaˇ ve htawˇ, Anˍtiˆawˍ venˇ lo chehˇ ve awˬ viˉ awˬ nyi yawˇ hui htaꞈ ga piˇ tuˬ dawˇ teh taˍ ve yoˬ.—1 Yoˇhanˬ 3:17, 18.

10. Awˬ viˉ awˬ nyi mvuhˇ yeˬ mvuhˇ haw lonˉ gʼa hpuˇ htaˇ ngaˬ hui teˇ gʼaˇ leh teˇ gʼaˇ ha kʼaˉ daꞈ ve tehꞈ hkʼaˬ hkʼe te hpehꞈ maw piˇ gʼa ve le? (Awˬ han htaꞈ nyi sheˍ.)

¹⁰ Awˬ viˉ awˬ nyi mvuhˇ yeˬ mvuhˇ haw lonˉ gʼa hpuˇ ve chaw htaꞈ ngaˬ hui kaꞈ teˇ gʼaˇ leh teˇ gʼaˇ ha kʼaˉ daꞈ ve tehꞈ hpeuꞈ maw piˇ gʼa ve yoˬ. Ngaˬ hui awˬ viˉ awˬ nyi htaꞈ laꞈ haˉ ga piˇ gʼa tuˬ, nyi haꞈ shaˉ paˍ htaꞈ ngaˬ hui hkʼaˬ hkʼe ga piˇ gʼa ve le tehꞈ na nyi piˇ gʼa ve yoˬ. Miˬ guiˬ hkʼa peu˗eˬ hkʼoˆ kanˉ awˬ pon hpu tanˇ tanˇ piˇ ve, leh awˬ viˉ awˬ nyi chi teˇ hpaˍ mvuhˇ yeˬ mvuhˇ haw lonˉ gʼa hpuˇ ve chaw awˬ pon kaꞈ bon lawˬ piˇ gʼa ve yoˬ. b (Tawˇ naˉ ve 17:17) Tawˇ pa haˉ te kʼo, 2020 hkʼawꞈ a naˍ 19 ve awˬ yanˇ htaˇ, awˬ viˉ awˬ nyi htaꞈ nyi haꞈ shaˉ tuˬ, miˬ guiˬ hkʼoˆ lo tuꞈ ve hkanˍ ve hpawˇ ga piˇ tuˬ, 950 awˬ moˍ leuˆ teh ve yoˬ. Chi teˇ moˍ htaꞈ ngaˬ hui awˬ hpfuhˇ shiˍ leh awˬ bon uiˍ jaˇ ve yoˬ. Awˬ viˉ awˬ nyi tuꞈ ve hkanˍ ve hpawˇ gʼa hpuˇ ve chaw htaꞈ yawˇ hui ha kʼaˉ jaˇ ve yoˬ. Hkʼe te leh, yawˇ hui tuꞈ ve hkanˍ ve hpawˇ mawˇ ca yuˬ piˇ ve, yonˍ hkʼaˇ hpawˇ yonˍ yeˬ tuˬ kaꞈ ga piˇ leh, teˇ pawˆ pawˆ kʼo yehˬ paˆ˗a ve, maˇ heˆ leh hpawnˬ daꞈ kuiˬ paˆ˗a ve kaꞈ ca gu piˇ ve yoˬ.—2 Kawˇrenˍhtuˆ 8:1-4 htaꞈ tehˆ daꞈ sheˍ.

11. Teˇ gʼaˇ leh teˇ gʼaˇ ha kʼaˉ daꞈ ve tehꞈ hpeuꞈ maw piˇ ve lehˬ, Yaˬhoˉvaˬ htaꞈ chiˇ mvuh tuˬ hkʼaˬ hkʼe te piˇ gʼa ve le?

¹¹ Awˬ viˉ awˬ nyi mvuhˇ yeˬ mvuhˇ haw lonˉ gʼa hpuˇ ve chaw htaꞈ ngaˬ hui teˇ gʼaˇ leh teˇ gʼaˇ ha kʼaˉ daꞈ ve tehꞈ hpeuꞈ maw piˇ ve kʼo, awˬ nu ve chaw chaˬ nyi mawˬ ve yoˬ. Tawˇ pa haˉ te kʼo, 2019 hkʼawꞈ htaˇ Baˬhaˇmaˇ mvuhˇ miˬ lo mvuhˇ yeˬ mvuhˇ haw lonˉ Heun˗ri˗hkin laˬ leh hpawnˬ daꞈ kuiˬ yehˬ teˇ yehˬ paˆ˗e ve yoˬ. Awˬ viˉ awˬ nyi hpawnˬ daꞈ kuiˬ yehˬ chi ve kʼawꞈ gu te htaˇ, Shaˉhkiˆhkanˍ ve chaw maˇ heˆ ve laꞈ shaˉ maˉ te paˍ teˇ gʼaˇ htaꞈ yawˇ hui na piˇ ve, yawˇ htaꞈ kanˉ teˇ ceuˬ ceuˬ te tcuh ve kʼo, awˬ hpfuhˇ hkʼaˬ hkʼe ma heuˆ ve le tehꞈ na piˇ ve yoˬ. Hawˉ hkʼaˆ chi teˇ gʼaˇ kʼoˆ ve, “ngaˬ ve mawˇ yuˬ kʼai leh ngaˬ geh kanˉ te ve chaw htaꞈ shiˍ kʼai leh te tcuh hpehꞈ ve yoˬ. Awˬ hpfuhˇ maˇ heuˆ. Nawˬ hui awˬ chawˇ htaꞈ chi hkʼe taw taw ga piˇ ve htaꞈ ngaˬ gʼa mawˬ leh dawˇ cawˇ jaˇ ve pa taw, nawˬ hui ve kanˉ hkʼaˇ awˬ pon ngaˬ  kaꞈ gʼa ga piˇ gaˇ ve yoˬ.” Miˬ guiˬ hkʼoˆ lo maˇ˗awˍ ve chaw Yaˬhoˉvaˬ htaꞈ maˇ shiˍ ve yoˬ. Yaꞈ hkʼaˇ, yawˇ hui Yaˬhoˉvaˬ ve Shaˉhkiˆhkanˍ ve chaw ga daꞈ ve htaꞈ gʼa mawˬ ve yoˬ. Ngaˬ hui teˇ gʼaˇ leh teˇ gʼaˇ ha kʼaˉ daꞈ ve tehꞈ hpeuꞈ maw piˇ htaˇ, awˬ nu ve chaw Yaˬhoˉvaˬ Gʼuiˬ sha “ha kʼaˉ puiˉ jaˇ ve” htaꞈ shiˍ daꞈ gaˇ ve tehꞈ ngaˬ hui shiˍ htaˇ ha lehˬ jaˇ.—Eˇfeˇsuꞈ 2:4.

12. Chi teˇ hkui teˇ gʼaˇ leh teˇ gʼaˇ ha kʼaˉ daꞈ ve lehˬ awˬ gʼuˇ suhˍ hpawˇ tuꞈ jaˇ hkanˍ jaˇ ve gʼa hpuˇ htaˇ gu hehnˇ taˍ gʼa tuˬ hkʼaˬ hkʼe ga laˇ gʼa ve le? (Hpeuꞈ maˍ ve 13:16, 17)

¹² Tuꞈ jaˇ hkanˍ jaˇ ve awˬ yanˇ htaˇ, aˬ htoꞈ ma te teˇ gʼaˇ leh teˇ gʼaˇ ha kʼaˉ daꞈ cawˇ ve le? Mvuhˇ miˬ teˇ hpaˍ hpawˇ maˇ chehˇ ve chaw lehˬ tuꞈ jaˇ hkanˍ jaˇ ve awˬ yanˇ htaˇ shoꞈ shaꞈ ve gʼa hpuˇ jaˇ tuˬ yoˬ tehꞈ Liꞈ hpu hkʼaw kʼoˆ laˇ taˍ ve yoˬ. Chi hkʼe ve, chi teˇ hkui kaꞈ awˬ viˉ awˬ nyi teˇ hpaˍ hpaˍ gʼa hpuˇ chehˇ ve yoˬ. Awˬ viˉ awˬ nyi loˍ ve awˬ ceuˬ cawˬ tuˬ ga laˇ tuˬ ve htaꞈ loˍ ve yoˬ. (Hpeuꞈ maˍ ve 13:16, 17 gʼaw sheˍ.) Ngaˬ hui ve Jawˇ mawˇ Yeˍsuˆ suhˉ jehˬ la ve awˬ yanˇ htaˇ, ngaˬ hui teˇ gʼaˇ leh teˇ gʼaˇ ha kʼaˉ daꞈ ve tehꞈ yawˇ htaꞈ mawˬ tcuh gaˇ ve yoˬ. Leh Gʼuiˬ sha ve “mvuhˇ miˬ awˬ hkʼaw lo laˬ chehˇ la˗o” tehꞈ Yeˍsuˆ ngaˬ hui htaꞈ kuˬ laˇ tcuh gaˇ ve yoˬ.—Maꞈhtehˍ 25:34-40.

13. Roˉmaꞈ liꞈ 15:7 hkʼaw kʼoˆ taˍ ve hkʼe, awˉ lawˉ peuˇ ve Hkriꞈ yaˇ hkʼa dehꞈ haꞈ daꞈ tuˬ aˬ htoꞈ ma te ve le?

¹³ Awˉ lawˉ peuˇ ve Hkriꞈ yaˇ haꞈ daꞈ ve tehꞈ teˇ gʼaˇ le le shiˍ ve yoˬ. Yaꞈ hkʼaˇ, yawˇ hui teˇ gʼaˇ leh teˇ gʼaˇ haꞈ daꞈ ve sha ve maˇ heˆ. Tawˇ pa haˉ te kʼo, Roˉmaꞈ venˇ lo Hkriꞈ yaˇ awˬ moˍ hkʼaw peun daꞈ jaˇ ve htaꞈ dawˇ nyi sheˍ. Choˬ kaˬ lo ve Hkriꞈ yaˇ lehˬ Moˉseˍ ve awˬ liˇ tawˇ hkawˇ htaꞈ gʼaꞈ te tuˬ, Yuˇdaꞈ chaw htaꞈ ceh tiˉ maˍ piˇ ve maˇ heˆ. Yaꞈ hkʼaˇ, hpehꞈ laˬ jaw ve leh chaw liˇ vaˇ liˇ maˇ shuˍ daꞈ ve chaw htaꞈ kaꞈ maˍ piˇ ve yoˬ. Chi hkʼoˆ kaꞈ, Hkriꞈ yaˇ teˇ hpaˍ kʼo awˬ ceˬ hpehꞈ ve, teˇ hpaˍ kʼo awˬ ceˬ maˇ hpehꞈ leh teˇ hpaˍ kʼo awˬ shehˍ hpaˇ hpehꞈ ve yoˬ. Hkriꞈ yaˇ chi ve teˇ hpaˍ peun daꞈ jaˇ ve htawˇ, hkʼaˬ hkʼe te yawˇ hui hkʼa dehꞈ haꞈ daꞈ gʼa ve le? Pawˇluꞈ yawˇ hui “teˇ gʼaˇ leh teˇ gʼaˇ htaꞈ haꞈ yuˬ daꞈ˗oꞈ” tehꞈ kʼoˆ piˇ ve yoˬ. (Roˉmaꞈ 15:7 gʼaw sheˍ.) Chi hkʼaˬ hkʼe kʼoˆ gaˇ ve le? “Haꞈ yuˬ” tehꞈ kʼoˆ ve tawˇ hkawˇ lehˬ, chaw teˇ gʼaˇ aˉ hkʼaw lo laˬ tuˬ haꞈ yuˬ piˇ ve, maˇ heˆ leh ngaˬ hui htaꞈ awˬ chawˇ te la tuˬ ve htaꞈ kʼoˆ gaˇ ve yoˬ. Tawˇ pa haˉ te kʼo, Awˍneˍsiˍmuˆ lehˬ Hpiˇleˍmonˍ ve awˬ ceˬ te jaw ve htawˇ, Pawˇluꞈ Hpiˇleˍmonˍ htaꞈ kʼoˆ piˇ ve, Awˍneˍsiˍmuˆ htaꞈ hkʼa dehꞈ “haꞈ yuˬ” piˇ˗oˆ. (Hpiˇleˍmonˍ 17) Piˇkiˇlaˆ leh Aˍkuˉlaˆ Aˍpawˇluꞈ htaꞈ haꞈ yuˬ piˇ leh Aˍpawˇluꞈ yawˇ hui hkʼe taw Hkriꞈ yaˇ ve awˬ lawn maˇ shiˍ ve htawˇ, yawˇ hui ve aˉ hkʼaw lo “kuˬ” laˬ ve yoˬ. (Tcuh yaˇ 18:26) Oˇ htaˇ teˇco˗e ve Hkriꞈ yaˇ peun daꞈ jaˇ ve htawˇ, yawˇ hui maˇ fuiˍ daꞈ pehˬ daꞈ leh haꞈ yuˬ daꞈ leh haꞈ daꞈ jaˇ ve yoˬ.

14. Heh˗na leh yawˇ ve awˬ hpawˇ awˬ viˉ awˬ nyi htaꞈ haꞈ ve tehꞈ hkʼaˬ hkʼe hpeuꞈ maw piˇ ve le?

¹⁴ Ngaˬ hui kaꞈ awˬ viˉ awˬ nyi htaꞈ haꞈ ve tehꞈ hpeuꞈ maw piˇ gʼa ve lehˬ, yawˇ hui geh awˬ chawˇ teˇ geh te ve yoˬ. Ngaˬ hui chi hkʼe te ve kʼo, yawˇ hui ngaˬ hui htaꞈ kʼawꞈ haꞈ tuˬ yoˬ. (2 Kawˇrenˍhtuˆ 6:11-13) Heh˗na leh yawˇ ve awˬ hpawˇ ve awˬ lawn htaꞈ teˇ geh nyi sheˍ. Yawˇ huiˉ maˬ Miˍshenˍnaˍliˍ te leh Aˍfaˍriˆkaˆ miˬ guiˬ mvuhˇ nyi tawˆ hpawˇ lo kʼai ve maˇ maw hkʼawꞈ nawˉ a naˍ 19 cawˬ la ve yoˬ. Yawˇ hui awˬ viˉ awˬ nyi htaꞈ mawˬ daꞈ maˇ gʼa leh hkʼa dehꞈ shiˍ daꞈ tuˬ kaꞈ haˍ ve yoˬ. Hkʼe kʼo, Heh˗na leh awˬ hpawˇ awˬ viˉ awˬ nyi htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa tuˬ le? Yawˇ hui tawˇ yaw tuˬ awˬ hkʼeun hkʼaw mehˆ hpfuhˇ mawˬ daꞈ leh tawˇ yaw daꞈ ve pa taw, awˬ viˉ awˬ nyi htaꞈ hkʼa dehꞈ shiˍ daꞈ gaˇ ve tehꞈ kʼoˆ piˇ ve yoˬ. Awˬ viˉ awˬ nyi laiˉ yehˬ kʼa ha lehˬ jaˇ leh yawˇ hui geh awˬ hkʼeun hkʼaw teˇ hkui teˇ hkui te kʼai leh liꞈ kaꞈ bvuhꞈ feu piˇ ve yoˬ. Aˬ htoꞈ ma te Heh˗na leh yawˇ ve awˬ hpawˇ awˬ viˉ awˬ nyi htaꞈ hkʼa dehꞈ shiˍ daꞈ gaˇ ve le? Heh˗na kʼoˆ ve, “ngaˬ hui ve yehˬ kʼa ha lehˬ htaˇ, maˇ heˆ leh tuꞈ ve hkanˍ ve gʼa hpuˇ htaˇ, awˬ viˉ awˬ nyi haꞈ laˇ ve htaꞈ gʼa jaw ve yoˬ. Chi ve htaꞈ ngaˬ maˇ leunˇ jaw. Hkʼe te leh, ngaˬ kaꞈ awˬ viˉ awˬ nyi htaꞈ haꞈ ve tehꞈ hpeuꞈ maw piˇ gaˇ ve yoˬ.”

15. Va˗ne˗shaˉ ve awˬ lawn nawˬ awˬ viˉ awˬ nyi teˇ gʼaˇ le le htaꞈ haꞈ tuˬ hkʼaˬ hkʼe maˍ laˇ ve le? (Awˬ han htaꞈ nyi sheˍ.)

¹⁵ Hkriꞈ yaˇ awˬ moˍ hkʼaw awˬ viˉ awˬ nyi hpehꞈ laˬ jaw ve, awˬ hoꞈ awˬ han leh te hkʼaˇ dawˇ hkʼaˇ kaꞈ maˇ shuˍ daꞈ ve yoˬ. Awˬ viˉ awˬ nyi htaꞈ daꞈ ve hpawˇ ngaˬ hui nyi ve kʼo, teˇ gʼaˇ le le htaꞈ haꞈ tuˬ yoˬ. Nuˇziˬlehˬ mvuhˇ miˬ lo Hkriꞈ yaˇ awˬ moˍ hkʼaw Gʼuiˬ sha ve kanˉ te ve awˬ viˉ awˬ nyi Va˗ne˗shaˉ awˬ nu ve awˬ viˉ awˬ nyi teˇ hpaˍ ve te hkʼaˇ dawˇ hkʼaˇ htaꞈ yawˇ maˇ dawˇ  cawˇ tehꞈ dawˇ jaw ve yoˬ. Yaꞈ hkʼaˇ, Va˗ne˗shaˉ yawˇ hui geh awˬ chawˇ maˇ te ve aꞈ kehˉ, coˇ caˇ leh yawˇ hui geh awˬ chawˇ te ve yoˬ. Yawˇ chi hkʼe te˗oˬ htaˇ, Yaˬhoˉvaˬ aˬ htoꞈ ma te awˬ viˉ awˬ nyi chi teˇ hpaˍ htaꞈ haꞈ ve yawˇ mawˬ ve yoˬ. Va˗ne˗shaˉ kʼoˆ ve, “ngaˬ hpawˇ toˇ nyi shehˍ hpaˇ te˗oˬ htaˇ, ngaˬ hui teˇ gʼaˇ leh teˇ gʼaˇ te hkʼaˇ dawˇ hkʼaˇ kaꞈ maˇ shuˍ daꞈ ve tehꞈ gʼa mawˬ ve yoˬ. Chi teˇ hkui ngaˬ yawˇ hui geh awˬ chawˇ te daꞈ sha leh teˇ gʼaˇ leh teˇ gʼaˇ te hkʼaˇ dawˇ hkʼaˇ maˇ shuˍ daꞈ ve htaꞈ ngaˬ na gʼa la˗o. Chi hkʼe ve htaꞈ Yaˬhoˉvaˬ kaꞈ dawˇ cawˇ ve tehꞈ ngaˬ dawˇ ve yoˬ. Chi hkʼe peun daꞈ jaˇ ve htaꞈ Yaˬhoˉvaˬ yawˇ geh laˬ tuˬ gʼawˬ veu laˇ ve yoˬ.” Yaˬhoˉvaˬ nyi ve hkʼe ngaˬ hui kaꞈ nyi ve kʼo, yawˇ hui htaꞈ haꞈ ve tehꞈ hpeuꞈ maw piˇ chehˇ ve yoˬ.—2 Kawˇrenˍhtuˆ 8:24.

16. Tuꞈ jaˇ hkanˍ jaˇ ve awˬ yanˇ htaˇ haꞈ daꞈ ve lehˬ aˬ htoꞈ ma te a yeˇ uiˍ jaˇ ve le? (Awˬ han htaꞈ nyi sheˍ.)

¹⁶ Tuꞈ jaˇ hkanˍ jaˇ ve awˬ yanˇ htaˇ haꞈ daꞈ ve lehˬ a yeˇ uiˍ jaˇ. Tuꞈ jaˇ hkanˍ jaˇ ve tanˬ htaˇ Yaˬhoˉvaˬ ngaˬ hui htaꞈ hkʼaˬ hkʼe haꞈ shaˉ laˇ tuˬ ve htaꞈ teˇ geh nyi sheˍ. Uiˍ ve Baˍbuˍlonˍ yawˇ hui htaꞈ ca bawˆ la htaˇ, Yaˬhoˉvaˬ yawˇ ve chaw htaꞈ aˬ htoꞈ ma te tcuh tuˬ teˇ geh nyi sheˍ. Yaˬhoˉvaˬ kʼoˆ ve, “ngaˬ ve chaw teˇ hpaˍ˗oˬ, nawˬ hui a shu yawˇ ve yehˬ lo kʼoꞈ˗e leh, yehˬ miˉ hkʼa dehꞈ hoˆ taˍ˗oꞈ. Gʼuiˬ sha nyi ma zuhˆ ve awˬ yanˇ peuˬ kʼai htaˇ hkʼa gaˬ, nawˬ hui teˇ hkui teˇ yanˇ ca hpaw vaꞈ taˍ˗oꞈ.” (Iˉsaˍyaˆ 26:20) Tuꞈ jaˇ hkanˍ jaˇ htaˇ ngaˬ hui kaꞈ nyi˗a kʼo tawˇ hkawˇ chi hkʼe ve htaꞈ gʼa gʼaꞈ te cawˇ ve yoˬ. “Yehˬ lo kʼawꞈ˗e” kʼoˆ ve lehˬ Hkriꞈ yaˇ awˬ moˍ htaꞈ kʼoˆ gaˇ ve yoˬ. Chi lehˬ ngaˬ hui Hkriꞈ yaˇ awˬ moˍ hkʼaw awˬ viˉ awˬ nyi geh chehˇ ve kʼo, oˇ ve teˇ yanˇ Yaˬhoˉvaˬ ngaˬ hui htaꞈ haꞈ shaˉ laˇ tuˬ ka tiꞈ te taˍ laˇ ve yoˬ. Chi htaꞈ pa taw, ngaˬ hui awˬ viˉ awˬ nyi geh ceh tiˉ yeunˇ hkanˍ ve maˇ heˆ. Yaꞈ hkʼaˇ, chi teˇ hkui kaꞈ yawˇ hui htaꞈ haꞈ cawˇ ve yoˬ. Ngaˬ hui ponˬ tuˬ, maˇ gʼa ponˬ tuˬ ve lehˬ, ngaˬ hui te ve htaꞈ cawˬ ve yoˬ.

17. Chi teˇ hkui kaꞈ tuꞈ jaˇ hkanˍ jaˇ ve gʼa hpuˇ tuˬ ve htaꞈ ngaˬ hui gu hehnˇ taˍ ve kʼo, oˇ ve teˇ yanˇ gaˬ kʼo ngaˬ hui htaꞈ hkʼaˬ hkʼe ga laˇ tuˬ le?

¹⁷ “Kawˆ tuˬ uiˍ jaˇ ve [Yaˬhoˉvaˬ] ve awˬ nyi” teˇ gʼaˇ le le awˬ pon haˍ jaˇ ve awˬ yanˇ hpehꞈ ve yoˬ. (Zeˍhpaˍniˆ 1:14, 15) Yaˬhoˉvaˬ ve chaw htawˇ tuꞈ jaˇ hkanˍ jaˇ ve htaꞈ gʼa hpuˇ tuˬ yoˬ. Yaꞈ hkʼaˇ, chi teˇ hkui kaꞈ ngaˬ hui gu hehnˇ taˍ ve kʼo, ngaˬ hui nyi ma gawˬ lehˍ cawˬ leh oˇ ve teˇ yanˇ awˬ nu ve chaw htaꞈ ga piˇ gʼa tuˬ yoˬ. Aˬ htoꞈ ma gʼa hpuˇ ve htawˇ maˇ kʼoˆ, ngaˬ hui yeunˇ hkanˍ gʼaˇ tuˬ yoˬ. Leh awˬ viˉ awˬ nyi tuꞈ ve hkanˍ ve gʼa hpuˇ ve kʼo, ngaˬ hui te ve teˇ ceuˬ le le awˬ hkʼaw lo teˇ gʼaˇ leh teˇ gʼaˇ ha kʼaˉ daꞈ ve tehꞈ hpeuꞈ maw piˇ gʼa leh yawˇ hui htaꞈ ga piˇ tuˬ yoˬ. Chi teˇ hkui kaꞈ ngaˬ hui ve awˬ viˉ awˬ nyi htaꞈ haꞈ daꞈ ve kʼo, oˇ ve teˇ yanˇ ngaˬ hui yawˇ hui htaꞈ haꞈ leh meuˆ daꞈ tuˬ yoˬ. Yaˬhoˉvaˬ ngaˬ hui htaꞈ laꞈ shawnˍ peꞈ laˇ tuˬ ve lehˬ co co taiˍ taiˍ ve a shaꞈ hpehꞈ ve yoˬ. Leh miˬ guiˬ hkʼoˆ lo mvuhˇ yeˬ mvuhˇ haw lonˉ maˇ heˆ leh tuꞈ ve hkanˍ ve maˇ cawˬ ve hkʼaw ngaˬ hui gʼa chehˇ tuˬ yoˬ.—Iˉsaˍyaˆ 65:17.