1. Hkriꞈ yaˇ lehˬ suhˆ cehˬ htaꞈ hkʼaˬ hkʼe shuˍ cawˇ ve le? (Awˬ han htaꞈ nyi sheˍ.)

 Laˇhuˍ chaw mawˇ hkawˇ kʼoˆ ve, “suhˆ ceh awˬ kʼaˉ neˉ ve kʼo, mvuhˇ haw laˬ htaˇ maˇ hteh.” Tawˇ hkawˇ chi a yeˇ uiˍ jaˇ ve teˇ ceuˬ lehˬ mvuhˇ haw mvuhˇ yeˬ laˬ htaˇ, suhˆ ceh chi ve maˇ paiˍ˗e gʼa ve yoˬ. Chi ve hkʼa shuˍ shuˍ, ngaˬ hui Yaˬhoˉvaˬ ve kanˉ caˉ leh te gʼa ve pa taw ha lehˬ gʼa sheˍ ve yoˬ. Chi ve ngaˬ hui hkʼaˬ hkʼe te gʼa tuˬ le? Ngaˬ hui awˬ hkʼaˇ ca puiˉ ve chaw hpehꞈ ve kʼo, a shaꞈ teꞈ kuiˬ hkʼaw pa ve awˬ ceuˬ cawˬ htaˇ, pa tuˬ sha ve yoˬ. Shu ve dawˇ hkʼaˇ leh dawˇ cheˆ ve htaꞈ gʼa yawˆ yan piˇ ve yoˬ.

2. Ngaˬ hui a shaꞈ teꞈ kuiˬ hkʼaw pa ve cawˬ htaˇ, pa gʼa tuˬ ngaˬ hui htaꞈ ga laˇ gʼa ve te hkʼaˇ dawˇ hkʼaˇ aˬ htoꞈ ma cawˬ ve le? Leh awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Ngaˬ hui Yaˬhoˉvaˬ ve kanˉ te ve chaw hpehꞈ ve pa taw, awˬ hkʼaˇ ca puiˉ ve chaw hpehꞈ gʼa ve yoˬ. Chi hkʼoˆ kaꞈ, ngaˬ hui nyi ma nuˇ nehˬ leh shu htaꞈ ha kʼaˉ puiˉ ve chaw kaꞈ hpehꞈ gaˇ ve yoˬ. A shaꞈ teꞈ kuiˬ hkʼaw pa ve cawˬ htaˇ, te hkʼaˇ dawˇ hkʼaˇ chi ve teˇ hpaˍ awˬ viˉ awˬ nyi laiˉ gʼaˇ haꞈ yuˬ gʼa tuˬ hkʼaˬ hkʼe ga piˇ gʼa ve awˬ lawn chi ve hkʼaw teˇ geh henˇ tuˬ yoˬ. Leh te hkʼaˇ dawˇ hkʼaˇ chi ve teˇ hpaˍ ngaˬ hui htaꞈ hkʼaˬ hkʼe ga laˇ gʼa ve kaꞈ teˇ geh henˇ tuˬ yoˬ. Yaˬhoˉvaˬ leh Yeˍsuˆ awˬ hkʼaˇ ca puiˉ ve daꞈ jaˇ ve henˇ yuˬ tuˬ hkʼaˬ hkʼe hpehꞈ ve awˉ lawˉ teˇ geh henˇ tuˬ yoˬ.

3. Yaˬhoˉvaˬ lehˬ awˬ hkʼaˇ ca puiˉ ve Gʼuiˬ sha hpehꞈ ve tehꞈ ngaˬ hui hkʼaˬ hkʼe te shiˍ gʼa ve le?

³ Liꞈ hpu hkʼaw kʼoˆ ve, Yaˬhoˉvaˬ lehˬ ‘yeˬ jaˇ ve haˉ hpawˇ hkʼe’ hpehꞈ ve yoˬ. Awˬ lawn kʼo, Gʼuiˬ sha lehˬ hkʼaˬ htaˆ kaꞈ yeˬ chehˇ ve yoˬ. (Bon maˍ ve 32:4) Chi hkʼe hpehꞈ ve htawˇ, yawˇ lehˬ awˬ hkʼaˇ ca puiˉ ve Gʼuiˬ sha hpehꞈ ve yoˬ. Miˬ guiˬ hkʼoˆ lo ve awˬ ceuˬ pa kʼai htaˇ, Yaˬhoˉvaˬ ve a loˍ awˬ tehˬ hpehꞈ la tuˬ, pa tuˬ gu hehnˇ taˍ ve yoˬ. Yaˬhoˉvaˬ lehˬ chaw yaˇ htaꞈ yawˇ ve awˬ hoꞈ awˬ han hkʼa shuˍ hpanˍ taˍ ve pa taw, ngaˬ hui a shaꞈ teꞈ kuiˬ hkʼaw pa ve cawˬ htaˇ pa gʼa sha ve yoˬ. Chi hkʼoˆ kaꞈ, ngaˬ hui shoꞈ shaꞈ ve aˬ htoꞈ ma gʼa hpuˇ ve htawˇ maˇ kʼoˆ, ngaˬ  hui cuˇ yiˍ cawˬ ve hkʼaw dawˇ cheˆ gʼa tuˬ Gʼuiˬ sha lehˬ Liꞈ hpu hkʼaw awˬ liˇ awˬ hkʼaˇ hkʼa tawˍ lehˆ cawˬ tcuh laˇ taˍ ve yoˬ. Yaˬhoˉvaˬ lehˬ ‘yeˬ jaˇ ve haˉ hpawˇ hkʼe’ hpehꞈ ve htawˇ, yawˇ ve awˬ lawn leh yawˇ ve awˬ liˇ awˬ hkʼaˇ ngaˬ hui htaꞈ shaˉ hkiˆ mawˬ tcuh laˇ ve yoˬ. Yaꞈ hkʼaˇ, Yaˬhoˉvaˬ awˬ hkʼaˇ ca puiˉ ve Gʼuiˬ sha hpehꞈ ve yoˬ.

4. Yaˬhoˉvaˬ lehˬ awˬ hkʼaˇ ca puiˉ ve Gʼuiˬ sha hpehꞈ ve tehꞈ aˬ htoꞈ ma ve awˬ lawn hpeuꞈ maw laˇ ve le? (Oˉ kʼoˍ pui ve 5:7, 11)

⁴ Yaˬhoˉvaˬ hpanˍ taˍ ve awˬ ceuˬ teˇ hpaˍ lehˬ daꞈ jaˇ leh awˬ hkʼaˇ ca ve yoˬ. Yawˇ lehˬ teˇ ceuˬ htaꞈ ceh tiˉ vawˆ taˍ leh awˬ liˇ teh hehnˇ jaˇ ve maˇ heˆ. Tawˇ pa haˉ te kʼo, Yaˬhoˉvaˬ lehˬ Iˉsaˍreˍlaˆ chaw htaꞈ ha kʼaˉ ve tehꞈ hpeuꞈ maw piˇ ve yoˬ. Yawˇ lehˬ haˍ gʼawˇ ve chaw leh paw sha ve chaw htaꞈ hkʼa shuˍ˗ehˬ gʼa tuˉ tanˇ cawˇ ve tehꞈ maˇ gʼa kʼoˆ piˇ. Teˇ pawˆ pawˆ kʼo, Gʼuiˬ sha lehˬ yawˇ hui cawˬ taˍ ve hkʼe tuˉ tanˇ tcuh ve yoˬ.—Oˉ kʼoˍ pui ve 5:7, 11 gʼaw sheˍ.

5. Yaˬhoˉvaˬ lehˬ nyi ma nuˇ nehˬ leh ha kʼaˉ puiˉ ve Gʼuiˬ sha hpehꞈ ve tehꞈ aˬ htoꞈ ma ve awˬ lawn hpeuꞈ maw laˇ ve le?

⁵ Yaˬhoˉvaˬ lehˬ nyi ma nuˇ nehˬ leh ha kʼaˉ puiˉ jaˇ ve pa taw, yawˇ lehˬ awˬ hkʼaˇ ca puiˉ ve Gʼuiˬ sha hpehꞈ ve yoˬ. Tawˇ pa haˉ te kʼo, Sawˉdonˍ venˇ htaꞈ te luˬ htaˇ, yawˇ lehˬ nyi ma nuˇ nehˬ ve tehꞈ hpeuꞈ maw laˇ ve yoˬ. Yaˬhoˉvaˬ mvuhˇ naw ma tcuh yaˇ htaꞈ cuˇ leh Lawˇtaˍ hkʼaw hkʼoˆ lo hpaw˗e tuˬ kʼoˆ piˇ tcuh ve yoˬ. Yaꞈ hkʼaˇ, Lawˇtaˍ kawˆ jaˇ ve pa taw, yawˇ leh yawˇ ve yehˬ kʼa Zawˇraˆ venˇ ehˉ hkʼaw hpaw˗e tcuh laˇ tuˬ lawˬ ve yoˬ. Yaꞈ hkʼaˇ, awˬ tehˬ kʼo venˇ chi htaꞈ kaꞈ Yaˬhoˉvaˬ te luˬ tuˬ dawˇ teh taˍ ve yoˬ. Hkʼe te leh, Yaˬhoˉvaˬ kʼoˆ taˍ ve hkʼe Lawˇtaˍ gʼa gʼaꞈ te ve yoˬ. Chi hkʼe hpehꞈ ve htawˇ Lawˇtaˍ lawˬ ve hkʼe Yaˬhoˉvaˬ gʼaꞈ te ve yoˬ. Chi kʼoˆ gaˇ ve lehˬ Zawˇraˆ venˇ htaꞈ Yaˬhoˉvaˬ te luˬ tuˬ dawˇ teh taˍ ve htaꞈ maˇ kʼawꞈ te luˬ ve yoˬ. (Awˬ hkuiˉ puiˍ 19:18-22) Peuˬ laˬ ve laiˉ ha hkʼawꞈ htaˇ, Yaˬhoˉvaˬ Niˇnaˍveˍ chaw htaꞈ ha kʼaˉ piˇ ve yoˬ. Yawˇ Niˇnaˍveˍ venˇ htaꞈ te luˬ tuˬ yoˬ tehꞈ tcuh kaˍ paˍ Yoˇnaˆ htaꞈ cuˇ leh kʼoˆ piˇ tcuh ve yoˬ. Yaꞈ hkʼaˇ, Niˇnaˍveˍ chaw venˇ baˆ dawˇ hpfuhˆ htaˇ, Gʼuiˬ sha yawˇ hui htaꞈ ha kʼaˉ ve yoˬ. Yawˇ awˉ lawˉ htaˇ dawˇ teh taˍ ve hkʼe venˇ chi htaꞈ maˇ te luˬ.—Yoˇnaˆ 3:1, 10; 4:10, 11.

6. Yeˍsuˆ lehˬ Yaˬhoˉvaˬ hkʼa shuˍ awˬ hkʼaˇ ca puiˉ ve tehꞈ hkʼaˬ hkʼe hpeuꞈ maw laˇ ve le?

⁶ Yeˍsuˆ lehˬ Yaˬhoˉvaˬ hkʼa shuˍ awˬ hkʼaˇ ca puiˉ ve tehꞈ hpeuꞈ maw laˇ ve yoˬ. Yeˍsuˆ miˬ guiˬ hkʼoˆ lo laˬ ve lehˬ, ‘Iˉsaˍreˍlaˆ teˇ yehˬ awˬ pon ceh tiˉ’ bon maˍ piˇ tuˬ laˬ ve htawˇ, yawˇ awˬ hkʼaˇ ca puiˉ ve tehꞈ hpeuꞈ maw laˇ ve yoˬ. Teˇ pawˆ htaˇ Iˉsaˍreˍlaˆ chaw maˇ heˆ ve yaˇ miˇ teˇ gʼaˇ yawˇ ve yaˇ miˇ “neˇ geh leh gʼa tuꞈ gʼa hkanˍ jaˇ” peuˬ ve htaꞈ a ciˉ gu laˇ˗oˆ tehꞈ lawˬ ve yoˬ. Yeˍsuˆ yawˇ htaꞈ ha kʼaˉ jaˇ ve pa taw, yawˇ lawˬ ve hkʼe ga piˇ leh gu na˗e piˇ ve yoˬ. (Maꞈhtehˍ 15:21-28) Ngaˬ hui teˇ lawn htaꞈ teˇ geh nyi sheˍ. Yeˍsuˆ kʼoˆ laˇ jaw ve, ‘ngaˬ htaꞈ chiˇ baˬ ve kʼo, yawˇ htaꞈ chiˇ baˬ tuˬ yoˬ.’ (Maꞈhtehˍ 10:33) Peˍtruˆ Yeˍsuˆ htaꞈ 3 pawˆ chiˇ baˬ htaˇ, Yeˍsuˆ yawˇ htaꞈ chiˇ baˬ˗aw laˇ? Maˇ chiˇ baˬ. Peˍtruˆ nyi ma awˬ tawˬ hkʼa gaˬ dawˇ hpfuhˆ leh yonˍ yeˬ ve cawˬ ve tehꞈ Yeˍsuˆ shiˍ ve yoˬ. Yeˍsuˆ kʼawꞈ teꞈ tu la peuˬ hkʼawꞈ nawˉ Yeˍsuˆ Peˍtruˆ geh laˬ leh yawˇ htaꞈ haꞈ leh venˇ baˆ hpehˇ laˇ˗oˬ ve tehꞈ kʼoˆ piˇ ve yoˬ.—Luˉkaꞈ 24:33, 34.

7. Hpiˇliˇpiˆ liꞈ 4:5 hkʼaw kʼoˆ taˍ ve hkʼe, ngaˬ hui hkʼaˬ hkʼe ve chaw hpehꞈ ve tehꞈ awˬ nu ve chaw htaꞈ dawˇ tcuh gaˇ ve le?

⁷ Yaˬhoˉvaˬ leh Yeˍsuˆ awˬ hkʼaˇ ca puiˉ ve tehꞈ ngaˬ hui gʼa mawˬ ve yoˬ. Hkʼe kʼo ngaˬ hui hkʼaˬ hkʼe te cawˇ ve le? Yaˬhoˉvaˬ kaꞈ ngaˬ hui htaꞈ awˬ hkʼaˇ ca puiˉ ve chaw hpehꞈ tcuh gaˇ ve yoˬ. (Hpiˇliˇpiˆ 4:5  gʼaw sheˍ.) Liꞈ hpu teˇ kʼoˆ hkʼaw chi teˇ tawn htaꞈ yuˬ tawˆ ve, “awˬ meh bvuhˬ ve chaw lehˬ awˬ hkʼaˇ ca puiˉ ve chaw hpehꞈ ve yoˬ.” A shu yawˇ awˬ to htaꞈ na nyi cawˇ ve, ‘ngaˬ awˬ hkʼaˇ ca puiˉ ve chaw hpehꞈ leh shu awˬ hawˉ lo chehˇ ve tehꞈ laiˉ gʼaˇ kaꞈ shiˍ˗aw laˇ? Maˇ heˆ leh ngaˬ teˇ ceuˬ htaꞈ ceh tiˉ vawˆ tiˍ taˍ ve chaw hpehꞈ˗aw laˇ? Ngaˬ dawˇ taˍ ve hkʼe shu htaꞈ gʼaꞈ te tcuh tuˬ dawˇ˗aw laˇ? Maˇ heˆ leh shu kʼoˆ ve htaꞈ na leh te gʼa ve kʼo yawˇ lawˬ laˇ ve htaꞈ gʼaꞈ te sheˍ.’ Ngaˬ hui awˬ hkʼaˇ ca puiˉ ve chaw hpehꞈ ve kʼo, Yaˬhoˉvaˬ leh Yeˍsuˆ htaꞈ henˇ yuˬ chehˇ ve tehꞈ hpeuꞈ maw piˇ chehˇ ve yoˬ. Awˬ hkʼaˇ ca puiˉ ve chaw hpehꞈ ve lehˬ a yeˇ uiˍ jaˇ ve tehꞈ hpeuꞈ maw piˇ gʼa ve 2 hkʼaˇ htaꞈ teˇ geh nyi sheˍ. Chi ve lehˬ ngaˬ hui a shaꞈ teꞈ kuiˬ hkʼaw pa ve cawˬ htaˇ hpehꞈ ve yoˬ. Leh awˬ nu ve chaw dawˇ ve leh dawˇ cheˆ ve ngaˬ hui htaꞈ maˇ shuˍ daꞈ htaˇ kaꞈ hpehꞈ ve yoˬ.

8. A shaꞈ teꞈ kuiˬ hkʼaw pa ve cawˬ htaˇ ngaˬ hui awˬ hkʼaˇ ca puiˉ ve chaw hpehꞈ tuˬ, aˬ htoꞈ ma ga laˇ gʼa ve le? (Awˬ maiˉ htaꞈ nyi sheˍ.)

⁸ A shaꞈ teꞈ kuiˬ hkʼaw pa ve cawˬ htaˇ awˬ hkʼaˇ ca puiˉ ve chaw hpehꞈ ve lehˬ a yeˇ uiˍ jaˇ ve yoˬ. A shaꞈ teꞈ kuiˬ hkʼaw pa ve cawˬ htaˇ maˇ dawˇ maˇ gaˇ ve hkʼaw shoꞈ shaꞈ ve cawˬ tuˬ te laˇ gʼa ve yoˬ. Tawˇ pa haˉ te kʼo, ngaˬ hui laꞈ tcuh laꞈ haˉ naˬ jaˇ ve, maˇ heˆ leh ngaˬ hui ve chehˇ kuiˬ mvuhˇ miˬ hkʼaw caˇ tuˬ dawˬ tuˬ leh mawˇ hkʼa peu˗eˬ awˬ hpfuhˇ hkʼaˆ jaˇ ve, maˇ heˆ leh mvuhˇ miˬ hpawˇ uˉ peunˍ paˍ pa ve pa taw, ngaˬ hui htaꞈ heuˆ la kuiˬ cawˬ jaˇ ve yoˬ. (Cuˇ yiˍ piˇ ve 9:11; 1 Kawˇrenˍhtuˆ 7:31) Ngaˬ hui htaꞈ awˬ vuiˬ pa laˇ ve, maˇ heˆ leh awˬ nu ve teˇ kaˬ lo Gʼuiˬ sha ve kanˉ gʼa ca te ve kʼo, ngaˬ hui awˬ pon haˍ jaˇ ve yoˬ. Ngaˬ hui pa ve aˬ htoꞈ ma gʼa hpuˇ ve htawˇ maˇ kʼoˆ, ngaˬ hui awˬ hawˉ lo ve 4 ceuˬ htaꞈ gʼaꞈ te ve kʼo, pa tuˬ sha ve yoˬ. (1) Hpehꞈ chehˇ ve htaꞈ haꞈ yuˬ ve, (2) awˬ gʼuˇ suhˍ hpawˇ ve htaꞈ dawˇ nyi ve, (3) daꞈ ve hpawˇ nyi ve, leh (4) awˬ nu ve chaw awˬ pon te ve yoˬ. b Awˬ ceuˬ chi teˇ hpaˍ yawˇ htaꞈ ga piˇ gʼa ve tehꞈ hpeuꞈ maw laˇ ve, awˬ viˉ awˬ nyi teˇ hpaˍ hpehꞈ laˬ jaw ve awˬ lawn htaꞈ teˇ geh nyi sheˍ.

9. Miˍshenˍnaˍliˍ teˇ ca maˇ dawˇ maˇ gaˇ ve shoꞈ shaꞈ ve gʼa hpuˇ htaˇ, hkʼaˬ hkʼe haꞈ yuˬ gʼa ve le?

⁹ Hpehꞈ chehˇ ve htaꞈ haꞈ yuˬ ve. E˗ma˗nu˗e˗le leh Fa˗siˆkaˇ awˬ nu ve mvuhˇ miˬ lo Miˍshenˍnaˍliˍ te tuˬ awˬ vuiˬ gʼa ve yoˬ. Yaꞈ hkʼaˇ, yawˇ hui awˬ nu ve mvuhˇ miˬ lo kʼai leh chaw ceuˬ tawˇ hkawˇ awˬ suhˉ gʼa henˇ ve yoˬ. Leh Hkriꞈ yaˇ awˬ moˍ hkʼaw awˬ viˉ awˬ nyi htaꞈ shiˍ daꞈ gehˇ sheˍ htaˇ, a naˍ 19 tanˬ cawˬ la ve pa taw, yawˇ hui aˉ hkʼaw tiˉ gʼa chehˇ taˍ ve yoˬ. Peuˬ leh Fa˗siˆkaˇ ve awˬ e laꞈ tcuh laꞈ haˉ ve hkʼaw suh˗e ve yoˬ. Yawˇ aˉ hkʼaw kʼoꞈ˗e gaˇ jaˇ ve htawˇ a naˍ 19 cawˬ ve pa taw, kʼoꞈ˗e maˇ gʼa ve yoˬ. Shoꞈ shaꞈ ve htaꞈ Fa˗siˆkaˇ haꞈ yuˬ gʼa tuˬ aˬ htoꞈ ma ga piˇ ve le? Yawˇ hui te ve awˉ lawˉ teˇ ceuˬ lehˬ, yawˇ hui teˇ nyi leh teˇ nyi yeunˇ hkanˍ gʼaˇ tuˬ Yaˬhoˉvaˬ geh cuˇ yiˍ gʼa tuˬ bon lawˬ ve yoˬ. Yaˬhoˉvaˬ yawˇ ve kanˉ hkʼaˇ htaꞈ cuˇ leh yawˇ hui ve bon lawˬ hkawˇ htaꞈ hkʼawꞈ piˇ tuˬ awˬ yanˇ cawˇ daꞈ ve yoˬ. Tawˇ pa haˉ te kʼo, VDO hkʼaw awˬ viˉ awˬ nyi hawˉ hkʼaˆ teˇ gʼaˇ htaꞈ na piˇ ve awˬ lawn yawˇ hui awˬ gʼaˇ gʼa jaˇ ve yoˬ. Awˬ viˉ awˬ nyi hawˉ hkʼaˆ chi teˇ gʼaˇ kʼoˆ ve, “ngaˬ hui hpehꞈ chehˇ ve awˬ ceuˬ htaꞈ laꞈ haˉ haꞈ yuˬ gʼa ve kʼo, ngaˬ hui ha lehˬ ve kʼawꞈ cawˬ gʼa tuˬ yoˬ. Leh awˬ yanˇ chi ve hkʼaw Yaˬhoˉvaˬ ve kanˉ te leh awˬ nu ve chaw htaꞈ ga piˇ ve yoˬ.” c 2 ceuˬ teˇ ceuˬ lehˬ, awˬ hkʼeun hkʼaw hto toˇ ve cheuˬ la tuˬ dawˇ teh taˍ ve yoˬ. Yawˇ hui Liꞈ hpu maˍ piˇ ve chaw teˇ gʼaˇ cawˬ ve yoˬ. Leh 3 ceuˬ teˇ ceuˬ lehˬ, yawˇ hui awˬ viˉ awˬ nyi ga laˇ ve htaꞈ haꞈ yuˬ leh awˬ viˉ awˬ nyi yawˇ hui htaꞈ haꞈ ve awˬ hpfuhˇ shiˍ ve yoˬ. Awˬ viˉ awˬ nyi yaˇ miˇ teˇ gʼaˇ yawˇ hui htaꞈ a yeˇ yuˬ laˇ leh dawˇ haˍ ve pa taw, teˇ hkʼawꞈ ve awˬ yanˇ hkʼaw teˇ nyi le le liꞈ bvuhꞈ leh Liꞈ hpu awˬ tawn kaꞈ bvuhꞈ feu laˇ ve yoˬ. Chi beuꞈ teˇ co˗e ngaˬ hui kaꞈ hkʼa shuˍ shuˍ, ngaˬ hui a shaꞈ teꞈ kuiˬ hkʼaw pa ve cawˬ htaˇ haꞈ yuˬ ve kʼo, te gʼa ve awˬ ceuˬ htaꞈ ha lehˬ gʼa ve yoˬ.

10. Awˬ viˉ awˬ nyi yaˇ miˇ teˇ gʼaˇ a shaꞈ teꞈ kuiˬ hkʼaw pa ve awˬ ceuˬ htaꞈ hkʼaˬ hkʼe haꞈ yuˬ gʼa ve le?

 ¹⁰ Awˬ gʼuˇ suhˍ hpawˇ ve htaꞈ dawˇ nyi ve. Roˬmaˇniˇ˗aˇ mvuhˇ miˬ lo chehˇ ve awˬ viˉ awˬ nyi yaˇ miˇ Hkriˆ˗tin˗naˇ Jaˬpanˍ mvuhˇ miˬ lo chehˇ ve yoˬ. Eˍgaˍlanˍ hkawˇ Hkriꞈ yaˇ awˬ moˍ hkʼaw yawˇ hkʼaˬ htaˆ kaꞈ hpawnˬ daꞈ˗e chehˇ ve maˇ cawˬ tcuh˗o ve pa taw, nyi ma luˬ jaˇ ve yoˬ. Chi hkʼe hpehꞈ ve htawˇ yawˇ oˇ ve htaꞈ ceh tiˉ maˇ dawˇ nyi chehˇ. Yawˇ Jaˬpanˍ ve Hkriꞈ yaˇ awˬ moˍ hkʼaw kʼai tuˬ dawˇ cheˆ leh yawˇ Jaˬpanˍ ve tawˇ hkawˇ yehˇ leh hto toˇ tuˬ coˇ caˇ ve yoˬ. Hkriˆ˗tin˗naˇ lehˬ yawˇ kanˉ teˇ geh te jaw ve yaˇ miˇ yawˇ htaꞈ Jaˬpanˍ ve tawˇ hkawˇ maˍ laˇ tuˬ, Liꞈ hpu leh Nawˬ ve a shaꞈ co co taiˍ taiˍ ha lehˬ gʼa ve! Liꞈ kʼoˆ yehˇ leh maˍ laˇ tcuh gaˇ ve yoˬ. Leh oˇ ve teˇ gʼaˇ kaꞈ maˍ laˇ˗a tehꞈ kʼoˆ piˇ ve yoˬ. Chi hkʼe te ve lehˬ Hkriˆ˗tin˗naˇ Jaˬpanˍ ve tawˇ hkawˇ yaw gʼa leh yaˇ miˇ oˇ ve teˇ gʼaˇ Liꞈ hpu henˇ gaˇ tuˬ kaꞈ te piˇ ve yoˬ. Chi htaꞈ pa taw, ngaˬ hui awˬ gʼuˇ suhˍ hpawˇ dawˇ nyi leh daꞈ ve hpawˇ nyi ve kʼo, pa ve awˬ ceuˬ lehˬ ngaˬ hui maˇ dawˇ gaˬ ve daꞈ ve awˬ ceuˬ hpehꞈ la tuˬ yoˬ hehˉ.

11. Awˬ viˉ awˬ nyi teˇ ca teˇ ceuˬ le le hpawˇ hkʼaˬ hkʼe te haꞈ yuˬ gʼa ve le?

¹¹ Awˬ nu ve chaw awˬ pon daꞈ ve awˬ ceuˬ te piˇ ve. Awˬ viˉ awˬ nyi teˇ ca Gʼuiˬ sha ve kanˉ maˇ te tcuh laˇ kuiˬ mvuhˇ miˬ lo chehˇ ve yoˬ. Mvuhˇ miˬ oˇ ve hkʼaw kanˉ te kuiˬ maˇ cawˬ ve pa taw, hpu maˇ yehˇ lawꞈ ve yoˬ. Leh yawˇ hui hkʼaˬ hkʼe te ve le? Awˉ lawˉ teˇ ceuˬ lehˬ, yawˇ hui a shaꞈ teꞈ kuiˬ hkʼaw teˇ ceuˬ le le hpawˇ pehˇ yehˇ ve yoˬ. Peuˬ hkʼawꞈ nawˉ yawˇ hui shoꞈ shaꞈ ve gʼa hpuˇ chehˇ ve awˬ ceuˬ htaꞈ a yeˇ yuˬ ve aꞈ kehˉ, awˬ nu ve chaw htaꞈ ga piˇ tuˬ daꞈ ve awˬ lawn sha tanˇ kʼoˆ maˍ piˇ ve yoˬ. (Tcuh yaˇ 20:35) Awˬ hpawˇ kʼoˆ ve, “ngaˬ hui Gʼuiˬ sha ve kanˉ leuˉ leh te chehˇ ve pa taw, gʼa hpuˇ chehˇ ve awˬ ceuˬ htaꞈ hkʼe taw maˇ dawˇ nyi tuˬ te laˇ ve yoˬ. Leh ngaˬ hui Yaˬhoˉvaˬ te tcuh laˇ ve awˬ ceuˬ htaꞈ leuˉ leh te tuˬ awˬ yanˇ cawˬ ve yoˬ.” Chi htaꞈ pa taw, ngaˬ hui a shaꞈ teꞈ kuiˬ hkʼaw pa ve awˬ ceuˬ cawˬ htaˇ, awˬ nu ve chaw htaꞈ ga piˇ ve lehˬ daꞈ ve awˬ lawn sha tanˇ gʼa hto maˍ piˇ ve tehꞈ tawnˇ taˍ cawˇ ve yoˬ.

12. Tcuh yaˇ Pawˇluꞈ ve awˬ lawn ngaˬ hui hto toˇ ve awˬ hkʼaˇ pa ve htaꞈ gu hehnˇ taˍ gʼa tuˬ hkʼaˬ hkʼe ga laˇ gʼa ve le?

¹² Ngaˬ hui Gʼuiˬ sha ve kanˉ te htaˇ, teˇ ceuˬ htaꞈ ceh tiˉ maˇ vawˆ tiˍ taˍ ve kʼo, pa tuˬ sha ve yoˬ. Yonˍ hkʼaˇ, dawˇ hkʼaˇ, hpehꞈ laˬ jaw ve leh chaw liˇ vaˇ liˇ maˇ shuˍ daꞈ ve chaw htaꞈ gʼa mawˬ daꞈ ve yoˬ. Tcuh yaˇ Pawˇluꞈ hkʼaˬ htaˆ kaꞈ pa tuˬ gu hehnˇ taˍ ve yoˬ. Leh ngaˬ hui kaꞈ yawˇ ve awˬ lawn htaꞈ henˇ yuˬ gʼa ve yoˬ. Yeˍsuˆ Pawˇluꞈ htaꞈ leuˆ yuˬ leh “buiˇ shaˆ aˉ naˆ chaw hui awˬ pon tcuh yaˇ hpehꞈ” tuˬ kʼai tcuh ve yoˬ. (Roˉmaꞈ 11:13) Hkʼe te leh, Yuˇdaꞈ chaw, Heˍlaˍsaˆ chaw, cuˇ yiˍ cawˬ ve chaw, mvuhˇ miˬ yaˇ, mvuhˇ miˬ hpawˇ kanˉ te paˍ, leh jawˇ mawˇ htaꞈ Pawˇluꞈ bon maˍ piˇ ve yoˬ. Pawˇluꞈ lehˬ chaw chi teˇ hpaˍ htaꞈ bon maˍ piˇ leh nyi ma hkʼaw gaˬ tuˬ te gʼa ve yoˬ. Yawˇ lehˬ ‘chaw hkʼa peu˗eˬ awˬ pon teˇ ceuˬ le le hpehꞈ la peuˬ.’ (1 Kawˇrenˍhtuˆ 9:19-23) Pawˇluꞈ yawˇ mawˬ daꞈ ve chaw htaꞈ yonˍ hkʼaˇ, hpehꞈ laˬ jaw ve awˬ lawn leh chaw liˇ vaˇ liˇ maˇ shuˍ daꞈ ve chaw awˬ pon dawˇ nyi piˇ ve yoˬ. Chi ve htaꞈ pa taw, yawˇ pa tuˬ ga piˇ leh yawˇ hui Yaˬhoˉvaˬ ve awˬ lawn htaꞈ nyi ma pfuhˇ tuˬ, Pawˇluꞈ awˬ hkʼaˇ ca leh teˇ gʼaˇ le le htaꞈ yaw daꞈ ve yoˬ. Ngaˬ hui kaꞈ chi hkʼa shuˍ gʼa te cawˇ ve yoˬ. Ngaˬ hui Gʼuiˬ sha ve kanˉ te cheuˬ la tuˬ, pa tuˬ gʼa gu hehnˇ taˍ leh na ve chaw teˇ gʼaˇ leh teˇ gʼaˇ htaꞈ keunˍ daꞈ ve hkʼe, hto maˍ piˇ tuˬ daꞈ jaˇ ve awˬ hkʼaˇ gʼa ca ve yoˬ.

13. Ngaˬ hui awˬ nu ve chaw dawˇ ve leh dawˇ cheˆ ve htaꞈ yawˆ yan piˇ ve kʼo, 1 Kawˇrenˍhtuˆ liꞈ 8:9 hkʼaw kʼoˆ taˍ ve hkʼe, aˬ htoꞈ ma maˇ hpehꞈ la gʼa tuˬ le?

¹³ Awˬ hkʼaˇ ca ve chaw lehˬ, awˬ nu ve chaw dawˇ ve leh dawˇ cheˆ ve htaꞈ yawˆ yan tuˬ ga laˇ ve yoˬ. Tawˇ pa haˉ te kʼo, awˬ viˉ awˬ nyi yaˇ miˇ teˇ hpaˍ kʼo awˬ hkiˇ shawˍ gaˇ ve, teˇ hpaˍ kʼo awˬ hkiˇ maˇ shawˍ gaˇ ve, awˬ viˉ awˬ nyi teˇ hpaˍ kʼo tzuhˬ a ciˉ dawˬ gaˇ ve, leh teˇ hpaˍ kʼo maˇ dawˬ tuˬ dawˇ cheˆ ve yoˬ. Chi hkʼoˆ kaꞈ, ngaˬ hui teˇ gʼaˇ le le chehˇ sha cawˬ sha gaˇ ve yoˬ. Yaꞈ hkʼaˇ, ngaˬ hui chehˇ sha cawˬ sha hpawˇ nyi haꞈ shaˉ ve kaꞈ maˇ shuˍ daꞈ. Ngaˬ hui ve dawˇ hkʼaˇ daꞈ jaˇ tehꞈ dawˇ leh Hkriꞈ yaˇ awˬ moˍ hkʼaw ve  chaw ngaˬ hui te ve hkʼe gʼaꞈ te tcuh gaˇ ve kʼo, chaw teˇ hpaˍ nyi ma maˇ sha tuˬ te piˇ leh Hkriꞈ yaˇ awˬ moˍ hkʼaw kaꞈ maˇ cawˇ maˇ hawˍ daꞈ tuˬ te piˇ la ve yoˬ. (1 Kawˇrenˍhtuˆ 8:9 gʼaw sheˍ; 10:23, 24) Liꞈ hpu hkʼaw ve awˬ liˇ awˬ hkʼaˇ htaꞈ yuˬ yehˇ htaˇ, ngaˬ hui keunˍ daꞈ cawˇ daꞈ ve chaw hpehꞈ leh dawˇ sha gawˬ lehˍ ve cawˬ tuˬ hkʼaˬ hkʼe ga laˇ gʼa ve 2 lawn htaꞈ teˇ geh nyi sheˍ.

14. Liꞈ hpu hkʼaw ve awˬ liˇ awˬ hkʼaˇ awˬ hkiˇ shawˍ ve leh oˉ kʼoˍ mvuh nuˆ ve htaꞈ dawˇ cheˆ gʼa tuˬ hkʼaˬ ve teˇ tawn ga laˇ gʼa ve le?

¹⁴ Awˬ hkiˇ shawˍ ve leh oˉ kʼoˍ mvuh nuˆ ve. Chi ve Yaˬhoˉvaˬ awˬ liˇ maˇ teh taˍ laˇ ve yoˬ. Yaꞈ hkʼaˇ, yawˇ ngaˬ hui gʼaꞈ te tuˬ awˬ liˇ awˬ hkʼaˇ beˆ maˍ laˇ ve yoˬ. Ngaˬ hui awˬ hkiˇ shawˍ htaˇ Gʼuiˬ sha ve kanˉ te ve chaw htaꞈ gʼa keunˍ daꞈ piˇ ve yoˬ. Ngaˬ hui awˬ hkʼaˇ ca puiˉ ve chaw hpehꞈ ve tehꞈ awˬ hkiˇ shawˍ ve htaꞈ shu mawˬ tuˬ te piˇ ve yoˬ. Ngaˬ hui awˬ hkiˇ shawˍ htaˇ, “nyi ma taˍ puiˉ ve” chaw hkʼe gʼa hpehꞈ cawˇ ve yoˬ. (1 Tiˆmoˉseˍ 2:9, 10; 1 Peˍtruˆ 3:3) Ngaˬ hui awˬ hkiˇ shawˍ jaˇ leh awˬ nu ve chaw a yeˇ yuˬ jaˇ tuˬ maˇ te piˇ gaˇ. Chi hkʼoˆ kaꞈ, awˬ viˉ awˬ nyi awˬ hkiˇ hkʼaˬ hkʼe te shawˍ tuˬ ve leh oˉ kʼoˍ mvuh hkʼaˬ hkʼe te nuˆ tuˬ, Liꞈ hpu hkʼaw ve awˬ liˇ awˬ hkʼaˇ lehˬ nyi haꞈ shaˉ paˍ a shu yawˇ ve awˬ liˇ awˬ hkʼaˇ maˇ gʼa teh tuˬ ga piˇ ve yoˬ. Tawˇ pa haˉ te kʼo, Hkriꞈ yaˇ awˬ moˍ teˇ moˍ hkʼaw awˬ viˉ awˬ nyi yaˇ nehˬ hawˉ hkʼaˆ laiˉ gʼaˇ shu dawˇ cawˇ jaˇ ve hkʼe oˉ kʼoˍ mvuh nuˆ ve, oˉ kʼoˍ mvuh maˇ zuhˬ leh hkʼa dehꞈ maˇ nyi sha ve htawˇ, nyi haꞈ shaˉ paˍ hui yawˇ hui htaꞈ ga piˇ gaˇ ve yoˬ. Yaꞈ hkʼaˇ, nyi haꞈ shaˉ paˍ awˬ liˇ maˇ gʼa teh tuˬ hkʼaˬ hkʼe gʼa te cawˇ ve le? Toˇ nyi shehˍ hpaˇ nyi haꞈ shaˉ paˍ htaꞈ “nawˬ hpawnˬ daꞈ kuiˬ hkʼaw awˬ vuiˬ te htaˇ, nawˬ kʼoˆ ve htaꞈ ceh tiˉ a yeˇ yuˬ cawˇ ve aꞈ kehˉ nawˬ awˬ hkiˇ shawˍ ve leh oˉ kʼoˍ mvuh nuˆ taˍ ve htaꞈ ceh tiˉ awˬ viˉ awˬ nyi, nyi ve kʼo nawˬ shu htaꞈ maˇ shuˍ ve pa taw yoˬ.” Chi ve awˬ lawn yaˇ nehˬ geh ca yaw daꞈ˗e tehꞈ kʼoˆ piˇ ve yoˬ. Hkʼa sha sha˗ehˬ chi hkʼe yaw daꞈ ve lehˬ awˬ viˉ awˬ nyi yaˇ nehˬ hkʼaˬ hkʼe te cawˇ ve htaꞈ shiˍ leh nyi haꞈ shaˉ paˍ kaꞈ awˬ liˇ teh tuˬ maˇ loˍ. d

15. Liꞈ hpu hkʼaw ve awˬ liˇ awˬ hkʼaˇ ngaˬ hui chehˇ sha cawˬ sha hpawˇ nyi haꞈ shaˉ tuˬ dawˇ cheˆ ve hkʼaˬ ve teˇ tawn ga laˇ ve le? (Roˉmaꞈ 14:5)

 ¹⁵ Chehˇ sha cawˬ sha hpawˇ nyi haꞈ shaˉ ve. Hkriꞈ yaˇ lehˬ chehˇ sha cawˬ sha hpawˇ nyi haꞈ shaˉ tuˬ teˇ gʼaˇ leh teˇ gʼaˇ gʼa dawˇ cheˆ ve yoˬ. (Gaˍlaˍtiˆ 6:5) Liꞈ hpu hkʼaw awˬ liˇ awˬ hkʼaˇ awˬ suhˍ ve awˬ lawn leh neˇ htaꞈ kaꞈ maˇ gʼa caˉ daꞈ ve hkʼaˬ nyiˇ tawn maˇ teh taˍ laˇ ve yoˬ. (Tcuh yaˇ 15:20; Gaˍlaˍtiˆ 5:19, 20) Awˬ lawn chi ve teˇ hpaˍ awˬ hkʼoˆ kaꞈ, ngaˬ hui chehˇ sha cawˬ sha hpawˇ hkʼaˬ hkʼe te nyi haꞈ shaˉ tuˬ gʼa dawˇ cheˆ cawˇ ve yoˬ. Awˬ viˉ awˬ nyi teˇ hpaˍ kʼo, hkʼaw hkʼoˆ ve naˆ tsuhˇ yehˇ leh haꞈ shaˉ gaˇ ve, awˬ nu ve awˬ viˉ awˬ nyi kʼo naˆ tsuhˇ yehˬ lo haꞈ shaˉ gaˇ ve, ngaˬ hui chi ve 2 ceuˬ htaꞈ teˇ ceuˬ maˇ heˆ kʼo, teˇ ceuˬ haꞈ shaˉ ve awˬ hkʼaˇ htaꞈ dawˇ cawˇ tuˬ yoˬ. Yaꞈ hkʼaˇ, awˬ viˉ awˬ nyi hkʼaˬ hkʼe te haꞈ shaˉ ve leuˆ yuˬ ve htaꞈ gʼa yawˆ yan piˇ ve yoˬ. (1) Gʼuiˬ sha ve mvuhˇ miˬ ceh tiˉ naˬ ve gawˬ ve teˇ ceuˬ le le htaꞈ gu gʼa ve yoˬ. (Iˉsaˍyaˆ 33:24) (2) Hkriꞈ yaˇ teˇ gʼaˇ leh teˇ gʼaˇ yawˇ awˬ pon haꞈ shaˉ tuˬ daꞈ jaˇ ve leuˆ yuˬ tuˬ “dawˇ cheˆ loˬ.” (Roˉmaꞈ 14:5 gʼaw sheˍ.) (3) Ngaˬ hui awˬ nu ve chaw htaꞈ maˇ dawˇ cheˆ piˇ leh awˬ viˉ awˬ nyi, nyi ma maˇ sha tuˬ kaꞈ maˇ te piˇ. (Roˉmaꞈ 14:13) (4) Hkriꞈ yaˇ lehˬ awˬ viˉ awˬ nyi htaꞈ haꞈ ve tehꞈ hpeuꞈ maw piˇ ve yoˬ. Ngaˬ hui chehˇ sha cawˬ sha hpawˇ nyi haꞈ shaˉ tuˬ leuˆ gʼa ve htawˇ, awˬ lawn chi ve lehˬ Hkriꞈ yaˇ awˬ moˍ hkʼaw teˇ moˍ tiˉ hpehꞈ tuˬ hkʼe taw a yeˇ maˇ uiˍ. (Roˉmaꞈ 14:15, 19, 20) Ngaˬ hui chi ve htaꞈ a yeˇ uiˍ ve tehꞈ tawnˇ taˍ ve kʼo, ngaˬ hui awˬ viˉ awˬ nyi geh meuˆ daꞈ leh Hkriꞈ yaˇ awˬ moˍ hkʼaw dawˇ sha gawˬ lehˍ ve cawˬ tuˬ te ve yoˬ.

16. Nyi haꞈ shaˉ paˍ awˬ nu ve nyi haꞈ shaˉ paˍ geh kanˉ teˇ geh te htaˇ, yawˇ awˬ hkʼaˇ ca puiˉ ve chaw hpehꞈ ve tehꞈ hkʼaˬ hkʼe hpeuꞈ maw piˇ gʼa ve le? (Awˬ han htaꞈ nyi sheˍ.)

¹⁶ Nyi haꞈ shaˉ paˍ lehˬ awˬ hkʼaˇ ca puiˉ ve daꞈ ve henˇ yuˬ tuˬ gʼa hpehꞈ ve yoˬ. (1 Tiˆmoˉseˍ 3:2, 3) Tawˇ pa haˉ te kʼo, yawˇ a ciˉ a shaꞈ maˇ ve pa taw, awˬ nu ve nyi haꞈ shaˉ paˍ yawˇ dawˇ ve hkʼe dawˇ tuˬ maˇ te piˇ cawˇ. Yaˬhoˉvaˬ daꞈ kehˬ ve awˬ ha hpu htaꞈ cuˇ leh nyi haꞈ shaˉ paˍ awˬ moˍ hkʼaw hpawnˬ daꞈ htaˇ cuˇ yiˍ cawˬ ve hkʼaw dawˇ cheˆ gʼa tuˬ, nyi haꞈ shaˉ paˍ hkʼaˬ ve teˇ gʼaˇ htaꞈ cuˇ leh daꞈ ve tawˇ kʼoˆ tcuh kaꞈ gʼa ve tehꞈ ngaˬ hui tawnˇ taˍ cawˇ ve yoˬ. Nyi haꞈ shaˉ paˍ awˬ moˍ hkʼaw awˬ lawn teˇ lawn htaꞈ dawˇ cheˆ htaˇ, Liꞈ hpu hkʼaw ve awˬ liˇ awˬ hkʼaˇ htaꞈ maˇ yaꞈ ve kʼo haꞈ yuˬ ve yoˬ. Dawˇ cheˆ ve chi htaꞈ yawˇ hkʼa dehꞈ maˇ dawˇ cawˇ ve htawˇ, nyi haꞈ shaˉ paˍ awˬ hkʼaˇ ca puiˉ ve kʼo, dawˇ cheˆ ve oˇ ve htaꞈ haꞈ yuˬ ve yoˬ.

17. Ngaˬ hui awˬ hkʼaˇ ca puiˉ ve chaw hpehꞈ ve kʼo, aˬ htoꞈ ma awˬ bon gʼa ve le?

¹⁷ Ngaˬ hui awˬ hkʼaˇ ca puiˉ ve chaw hpehꞈ ve kʼo awˬ bon laiˉ ceuˬ gʼa tuˬ yoˬ. Ngaˬ hui awˬ viˉ awˬ nyi geh hkʼa dehꞈ meuˆ daꞈ ve kʼo, Hkriꞈ yaˇ awˬ moˍ hkʼaw dawˇ sha gawˬ lehˍ ve cawˬ tuˬ yoˬ. Chi hkʼoˆ kaꞈ, ngaˬ hui lehˬ awˬ viˉ awˬ nyi chaw liˇ vaˇ liˇ leh te hkʼaˇ dawˇ hkʼaˇ maˇ shuˍ daꞈ ve chaw geh Yaˬhoˉvaˬ htaꞈ oˉ kʼoˍ teˇ geh gʼa pui ve ha lehˬ jaˇ. A yeˇ uiˍ jaˇ ve lehˬ ngaˬ hui Yaˬhoˉvaˬ awˬ hkʼaˇ ca puiˉ ve Gʼuiˬ sha htaꞈ henˇ yuˬ chehˇ ve tehꞈ gʼa shiˍ ve ha lehˬ jaˇ.