1. Aˬ htoꞈ ma te Yaˬhoˉvaˬ teˇ ceuˬ le le htaꞈ hpanˍ ve le?

Awˉ lawˉ htaˇ Yaˬhoˉvaˬ teˇ g’aˇ ceh tiˉ cawˬ ve yoˬ. Yaꞈ hk’aˇ, yawˇ teˇ g’aˇ tiˉ chehˇ ve tehꞈ maˇ dawˇ leh maˇ chehˇ bawˬ. Yaˬhoˉvaˬ ha lehˬ tuˬ te piˇ tuˬ awˬ nu ve chaw htaꞈ maˇ loˍ. Leh Yaˬhoˉvaˬ awˬ nu ve chaw ha lehˬ ve htaꞈ mawˬ gaˇ ve yoˬ. Haꞈ pehnˇ ve hk’aw yawˇ teˇ ceuˬ le le htaꞈ hpanˍ ve yoˬ.—Chiˇ mvuh ve 36:9; 1 Yoˇhanˬ 4:19.

2. Yaˬhoˉvaˬ hpanˍ ve teˇ ceuˬ le le htaꞈ Yeˍsuˆ leh mvuhˇ naw ma tcuh yaˇ g’a mawˬ htaˇ hk’aˬ hk’e dawˇ ve le?

² Awˉ lawˉ htaˇ Yaˬhoˉvaˬ yawˇ ve Yaˇ Yeˍsuˆ htaꞈ hpanˍ leh kanˉ teˇ geh te ve yoˬ. Yaˬhoˉvaˬ Yeˍsuˆ htaꞈ cuˇ leh “awˬ ceuˬ hk’a peu-eˬ yawˇ awˬ hk’aw lo te hpanˍ taˍ” leh mvuhˇ naw ma tcuh yaˇ laiˉ lanˬ g’aˇ htaꞈ kaꞈ hpanˍ taˍ ve yoˬ. (Kawˇlawˇsehˇ 1:16) Yeˍsuˆ yawˇ ve Awˬ pa geh kanˉ teˇ geh g’a te ve ha lehˬ jaˇ. (Tawˇ naˉ ve 8:30) Hk’e te leh, mvuhˇ naw ma tcuh yaˇ kaꞈ ha lehˬ ve yoˬ. Aˬ htoꞈ ma pa taw le? Yaˬhoˉvaˬ ve laꞈ shaˉ maˉ te paˍ Yeˍsuˆ awˬ ceuˬ hk’a peu-eˬ leh mvuhˇ naw ma leh miˬ guiˬ htaꞈ hpanˍ ve htaꞈ yawˇ hui g’a mawˬ ve pa taw yoˬ. Chi hk’e g’a mawˬ htaˇ mvuhˇ naw ma tcuh yaˇ hk’aˬ hk’e te ve le? Yaˬhoˉvaˬ miˬ guiˬ leh awˬ ceuˬ hk’a peu-eˬ hpanˍ ve awˬ hk’oˆ kaꞈ daꞈ jaˇ ve chaw yaˇ htaꞈ kaꞈ yawˇ hpanˍ taˍ ve, mvuhˇ naw ma tcuh yaˇ g’a mawˬ htaˇ, htawˇ dawˇ nawˬ dawˇ maˇ cawˬ leh “ha lehˬ ha k’a kuˬ chehˇ ve yoˬ.” (Yawˇbaˆ 38:7; Tawˇ naˉ ve 8:31) Yaˬhoˉvaˬ hpanˍ taˍ ve teˇ ceuˬ le le lehˬ, yawˇ haꞈ pehnˇ ve leh cuˇ yiˍ cawˬ ve tehꞈ ngaˬ hui g’a mawˬ ve yoˬ.—Chiˇ mvuh ve 104:24; Roˉmaꞈ 1:20.

3. 1 Kawˇrenˍhtuˆ liꞈ 15:21, 22 hk’aw k’oˆ taˍ ve hk’e, Yeˍsuˆ htaiˍ hk’awꞈ laˇ ve awˬ hpfuhˇ ngaˬ hui aˬ htoꞈ ma dawˇ law kuiˬ cawˬ ve le?

³ Yaˬhoˉvaˬ hpanˍ taˍ ve daꞈ jaˇ ve miˬ guiˬ hk’oˆ chaw yaˇ htaꞈ co co  taiˍ taiˍ a shaꞈ teꞈ chehˇ tcuh gaˇ ve yoˬ. Yaꞈ hk’aˇ, Aˍdanˍ leh Eˇvaꞈ G’uiˬ sha htaꞈ hpfuhˆ ve pa taw, miˬ guiˬ hk’oˆ lo venˇ baˆ cawˬ la ve yoˬ. (Roˉmaꞈ 5:12) Chi htaꞈ pa taw, Aˍdanˍ ve awˬ yaˇ awˬ duˬ hk’a peu-eˬ g’a suh-e ve yoˬ. (Awˬ hkuiˉ puiˍ 3:15) Yaˬhoˉvaˬ hk’aˬ hk’e te ve le? Chaw yaˇ teˇ g’aˇ le le g’a ponˬ tuˬ yawˇ laꞈ haˉ gu teh ve yoˬ. Chaw yaˇ venˇ baˆ leh suh ve htaꞈ g’a ponˬ tuˬ yawˇ htaiˍ hk’awꞈ ve awˬ hpfuhˇ gu teh laˇ ve yoˬ. Chaw yaˇ hk’a peu-eˬ G’uiˬ sha ve kanˉ te tuˬ leuˆ yuˬ g’a leh co co taiˍ taiˍ ve a shaꞈ g’a tuˬ yoˬ.—Yoˇhanˬ 3:16; Roˉmaꞈ 6:23; 1 Kawˇrenˍhtuˆ 15:21, 22 g’aw sheˍ.

4. Awˬ lawn chi ve hk’aw ngaˬ hui aˬ htoꞈ ma htaꞈ henˇ tuˬ le?

⁴ K’awꞈ teꞈ tu la ve awˬ lawn Yaˬhoˉvaˬ ka tiꞈ te taˍ laˇ ve na hkawˇ laiˉ maˬ cawˬ la ve yoˬ. Tawˇ pa haˉ te k’o, k’awꞈ teꞈ tu la ve hk’aˬ hk’e te hpehꞈ la g’a tuˬ le? K’awꞈ teꞈ tu la ve chaw htaꞈ ngaˬ hui tawnˇ g’a-aw laˇ? K’awꞈ teꞈ tu la ve awˬ lawn ka tiꞈ te taˍ laˇ ve ngaˬ hui ha lehˬ tuˬ hk’aˬ hk’e te laˇ g’a ve le? Awˬ lawn chi ve htaꞈ ngaˬ hui dawˇ nyi htaˇ, Yaˬhoˉvaˬ haꞈ pehnˇ ve, cuˇ yiˍ leh yeunˇ hkanˍ ve htaꞈ caˉ daꞈ ve ngaˬ hui htaꞈ hk’aˬ hk’e maˍ laˇ ve le? Teˇ lawn peuˬ teˇ lawn teˇ geh henˇ tuˬ yoˬ.

5. Awˬ yanˇ teˇ yanˇ tiˉ hk’aw k’awꞈ teꞈ tu la ve maˇ heˆ tehꞈ aˬ htoꞈ ma te ngaˬ hui dawˇ teh taˍ g’a ve le?

⁵ Yaˬhoˉvaˬ Yeˍsuˆ htaꞈ cuˇ leh laiˉ lanˬ g’aˇ htaꞈ k’awꞈ teꞈ tu la piˇ tcuh htaˇ, Yeˍsuˆ teˇ g’aˇ le le htaꞈ teˇ pawˆ tiˉ k’awꞈ teꞈ tu la piˇ tcuh ve maˇ heˆ tehꞈ ngaˬ hui dawˇ teh taˍ g’a ve yoˬ. Aˬ htoꞈ ma pa taw le? Suh-oˬ ve chaw teˇ pawˆ tiˉ k’awꞈ teꞈ tu la ve k’o, shoꞈ shaꞈ jaˇ tuˬ yoˬ. Yaˬhoˉvaˬ lehˬ, hteˇ hteˇ shawˇ shawˇ ve G’uiˬ sha hpehꞈ ve yoˬ. Chaw yaˇ awˬ pon dawˇ sha gawˬ lehˍ ve cawˬ g’a tuˬ yawˇ hteˇ hteˇ shawˇ shawˇ g’a gu piˇ ve tehꞈ shiˍ ve yoˬ. (1 Kawˇrenˍhtuˆ 14:33) Yaˬhoˉvaˬ Yeˍsuˆ geh kanˉ teˇ geh te leh chaw yaˇ awˬ pon chehˇ tuˬ miˬ gui gu piˇ htaˇ Yaˬhoˉvaˬ yeunˇ hkanˍ ve yoˬ. Yeˍsuˆ Aˍmaˍgeˍdonˍ hk’aw ponˬ ve chaw geh kanˉ teˇ geh te leh k’awꞈ teꞈ tu la tuˬ ve chaw htaꞈ haꞈ yuˬ piˇ htaˇ, teˇ hinˉ hk’awꞈ ve awˬ yanˇ awˬ hk’aw lo kaꞈ Yeˍsuˆ te hk’aˇ dawˇ hk’aˇ chi ve teˇ hpaˍ hpeuꞈ maw laˇ tuˬ yoˬ.

6. Tcuh yaˇ liꞈ 24:15 hk’aw k’oˆ taˍ ve hk’e, k’awꞈ teꞈ tu la ve awˬ moˍ hk’aw a shu kaꞈ chehˇ tuˬ ve le?

 ⁶ Aˍmaˍgeˍdonˍ hk’aw ponˬ ve chaw k’awꞈ teꞈ tu la ve chaw htaꞈ ga piˇ tuˬ ve a yeˇ uiˍ jaˇ ve awˬ hk’aˇ lehˬ, G’uiˬ sha ve mvuhˇ miˬ awˬ lawn leh G’uiˬ sha ve awˬ liˇ awˬ hk’aˇ yawˇ hui htaꞈ maˍ piˇ tuˬ yoˬ. Aˬ htoꞈ ma pa taw le? K’awꞈ teꞈ tu la ve chaw maˇ-awˍ ve lehˬ, “maˇ hteˇ ve chaw” awˬ moˍ hk’aw chehˇ ve pa taw yoˬ. (Tcuh yaˇ 24:15 g’aw sheˍ.) Chaw chi ve teˇ hpaˍ Yeˍsuˆ htaiˍ hk’awꞈ laˇ ve htaꞈ awˬ bon g’a tuˬ, yawˇ hui ve te hk’aˇ dawˇ hk’aˇ laiˉ ceuˬ g’a pa ve yoˬ. Yaˬhoˉvaˬ htaꞈ maˇ shiˍ ve laiˉ lanˬ g’aˇ htaꞈ g’a maˍ piˇ tuˬ ve kanˉ hk’aˬ hk’e ma cawˬ tuˬ ve htaꞈ dawˇ nyi sheˍ. Oˇ ve teˇ yanˇ, chi teˇ hkui ngaˬ hui teˇ g’aˇ taw teˇ g’aˇ Liꞈ hpu maˍ piˇ ve hk’e g’a maˍ piˇ tuˬ laˇ? K’awꞈ teꞈ tu la ve chaw chi teˇ hpaˍ Hkriꞈ yaˇ awˬ moˍ laiˉ kaˬ lo chehˇ tcuh leh, yawˇ hui teˇ caˉ k’awꞈ teꞈ tu la ve chaw htaꞈ maˍ piˇ tuˬ, yawˇ hui htaꞈ maˍ piˇ cawˇ-aw laˇ? Ngaˬ hui caˉ leh law nyi taˍ sheˍ. Teˇ hinˉ hk’awꞈ peuˬ hk’awꞈ nawˉ “mvuhˇ miˬ hk’aw lo G’uiˬ sha htaꞈ shiˍ ve cuˇ yiˍ biˇ chehˇ taˍ tuˬ yoˬ.” (Iˉsaˍyaˆ 11:9) Oˇ ve teˇ yanˇ ngaˬ hui ha lehˬ tuˬ ve kanˉ cawˬ maˇ jaˇ!

7. G’uiˬ sha ve chaw, k’awꞈ teꞈ tu la ve chaw htaꞈ ha k’aˉ ve tehꞈ aˬ htoꞈ ma te ngaˬ hui k’oˆ g’a ve le?

⁷ Teˇ hinˉ hk’awꞈ ve awˬ yanˇ awˬ hk’aw lo Yaˬhoˉvaˬ ve chaw lehˬ, yawˇ nyi hk’aˇ suh tuˬ yawˇ hui ve te hk’aˇ dawˇ hk’aˇ caˉ leh g’a pa cawˇ ve yoˬ. Chi htaꞈ pa taw, k’awꞈ teꞈ tu la ve chaw lehˬ, Yaˬhoˉvaˬ ve awˬ liˇ awˬ hk’aˇ htaꞈ g’aꞈ te tuˬ, yawˇ hui ve dawˇ hk’aˇ leh yawˇ hui yaꞈ ve hpawˇ te gaˇ ve teˇ hpaˍ htaꞈ g’a tawˍ daꞈ ve pa taw, G’uiˬ sha ve chaw yawˇ hui htaꞈ ha k’aˉ ve yoˬ. (1 Peˍtruˆ 3:8) Chi htaꞈ pa taw k’awꞈ teꞈ tu la ve chaw, Yaˬhoˉvaˬ ve chaw ‘htaiˍ hk’awꞈ ve htaꞈ g’a tuˬ g’aˇ hteꞈ te’ chehˇ ve htaꞈ g’a mawˬ tuˬ yoˬ. —Hpiˇliˇpiˆ 2:12.

8. Ngaˬ hui haꞈ ve chaw k’awꞈ teꞈ tu la ve htaꞈ tawnˇ g’a tuˬ yoˬ tehꞈ aˬ htoꞈ ma te ngaˬ hui dawˇ law taˍ g’a ve le?

⁸ Ngaˬ hui haꞈ ve chaw k’awꞈ teꞈ tu la ve htaꞈ tawnˇ g’a tuˬ, ngaˬ hui dawˇ teh taˍ g’a ve laiˉ hk’aˇ cawˬ ve yoˬ. Tawˇ pa haˉ te k’o, k’awꞈ teꞈ tu la ve cawˬ jaw peuˬ ve hk’a shuˍ, Yaˬhoˉvaˬ suh-oˬ ve chaw htaꞈ k’awꞈ teꞈ tu la tcuh htaˇ kaꞈ, yawˇ hui ve awˬ ho awˬ han leh dawˇ hk’aˇ hk’a shuˍ cawˬ tcuh tuˬ yoˬ. K’awꞈ teꞈ tu la ve chaw lehˬ zuhꞈ muiˉ k’a chehˇ ve htaꞈ nawˍ piˇ ve hk’e hpehꞈ ve tehꞈ Yeˍsuˆ tehˆ taˍ ve yoˬ. (Maꞈhtehˍ 9:18, 24; Yoˇhanˬ 11:11-13) Zuhꞈ muiˉ k’a chehˇ ve htaꞈ nawˍ piˇ leh nawˇ la ve chaw lehˬ, awˬ ho awˬ han, tawˇ yaw ve, leh tawnˇ g’a ve kaꞈ shuˍ daꞈ ve yoˬ. Laˍzaˍruˆ ve awˬ lawn htaꞈ dawˇ nyi sheˍ. Yawˇ suh ve 4 nyi gaˬ-oˬ leh kuiˇ nuˬ la peuˬ. Yeˍsuˆ yawˇ htaꞈ k’awꞈ teꞈ tu la piˇ htaˇ, awˬ viˉ ma teˇ hpaˍ kaꞈ Laˍzaˍruˆ htaꞈ tawnˇ g’a leh yawˇ kaꞈ yawˇ hui htaꞈ tawnˇ g’a sheˍ.—Yoˇhanˬ 11:38-44; 12:1, 2.

9. K’awꞈ teꞈ tu la ve chaw aˬ htoꞈ ma te laꞈ haˉ biˇ ve chaw maˇ hpehꞈ ve le?

⁹ Nyiˇ hk’aˇ teˇ hk’aˇ lehˬ, miˬ guiˬ awˬ suhˉ hk’aw “naˬ ve gawˬ ve” htaꞈ pa taw teˇ g’aˇ kaꞈ g’a k’awꞈ hk’anˇ tuˬ ve maˇ heˆ tehꞈ Yaˬhoˉvaˬ ka tiꞈ te taˍ laˇ ve yoˬ. (Iˉsaˍyaˆ 33:24; Roˉmaꞈ 6:7) Chi htaꞈ pa taw, Yaˬhoˉvaˬ k’awꞈ teꞈ tu la tcuh piˇ ve chaw hui kaꞈ awˬ g’aˇ awˬ shaˉ daꞈ tuˬ yoˬ. Yaꞈ hk’aˇ, yawˇ hui laꞈ haˉ biˇ ve chaw hpehꞈ ve maˇ heˆ. Aˬ htoꞈ ma pa taw le? Yawˇ hui biˇ ve chaw hpehꞈ ve k’o, yawˇ hui k’awꞈ teꞈ tu la htaˇ, awˬ nu ve chaw hui kaꞈ yawˇ hui htaꞈ tawnˇ maˇ g’a. Chi htaꞈ pa taw, chaw yaˇ hk’a peu-eˬ biˇ ve chaw hpehꞈ g’a tuˬ, teˇ hinˉ hk’awꞈ peuˬ hk’awꞈ nawˉ ve htaꞈ g’a law taˍ sheˍ ve yoˬ. Aˬ htoꞈ ma pa taw le? Teˇ hinˉ hk’awꞈ peuˬ hk’awꞈ nawˉ, Yeˍsuˆ yawˇ ve kanˇ paˆ Yaˬhoˉvaˬ htaꞈ hk’awꞈ piˇ tuˬ yoˬ. Chi k’oˆ gaˇ ve lehˬ, Yeˍsuˆ G’uiˬ sha ve mvuhˇ miˬ hk’aw uˉ peunˍ ve teˇ ceuˬ le le te biˇ peuˬ. Teˇ ceuˬ lehˬ chaw yaˇ teˇ g’aˇ le le biˇ ve chaw hpehꞈ la tcuh peuˬ.—1 Kawˇrenˍhtuˆ 15:25-28; Hpeuꞈ maˍ ve 20:1-3.

10. K’awꞈ teꞈ tu la ve nawˬ hk’aˬ hk’e dawˇ tuˬ te laˇ ve le?

¹⁰ Nawˬ haꞈ ve chaw k’awꞈ teꞈ tu la ve htaꞈ nawˬ g’a haꞈ yuˬ htaˇ, nawˬ hk’aˬ hk’e hpehꞈ tuˬ le, dawˇ nyi sheˍ. Nawˬ ha lehˬ jaˇ leh hawˬ tuˬ yoˬ. Nawˬ ha lehˬ jaˇ leh Yaˬhoˉvaˬ htaꞈ k’a muiˬ chiˇ mvuh tuˬ yoˬ hehˉ. Mvuhˇ naw ma hk’oˆ ve Awˬ pa G’uiˬ sha leh yawˇ ve  Yaˇ paˍ lehˬ, k’awꞈ teꞈ tu la ve htaꞈ awˬ tehˬ hpehꞈ la tcuh laˇ ve pa taw, yawˇ huiˉ maˬ nyiˇ g’aˇ htaꞈ nawˬ haꞈ jaˇ tuˬ yoˬ.

11. Yoˇhanˬ liꞈ 5:28, 29 hk’aw Yeˍsuˆ k’oˆ taˍ ve tawˇ hkawˇ, G’uiˬ sha ve awˬ liˇ awˬ hk’aˇ suh a shaꞈ teꞈ chehˇ ve chaw htaꞈ hk’aˬ hk’e hpehꞈ la tuˬ le?

¹¹ Yawˇ hui ve te hk’aˇ dawˇ hk’aˇ pa leh G’uiˬ sha ve awˬ liˇ awˬ hk’aˇ htaꞈ g’aꞈ te ve k’o, k’awꞈ teꞈ tu la ve chaw teˇ hpaˍ hk’aˬ hk’e dawˇ tuˬ le? A shu yawˇ ve te hk’aˇ dawˇ hk’aˇ pa ve chaw lehˬ, miˬ guiˬ awˬ suhˉ awˬ hk’aw lo co co taiˍ taiˍ g’a chehˇ tuˬ yoˬ. A shu yawˇ ve dawˇ hk’aˇ maˇ pa ve chaw lehˬ, miˬ guiˬ awˬ suhˉ awˬ hk’aw lo dawˇ sha gawˬ lehˍ ve hk’aw G’uiˬ sha maˇ chehˇ tcuh.—Iˉsaˍyaˆ 65:20; Yoˇhanˬ 5:28, 29 g’aw sheˍ.

12. Miˬ guiˬ hk’oˆ lo chehˇ ve chaw Yaˬhoˉvaˬ geh aˬ htoꞈ ma awˬ bon g’a tuˬ le?

¹² G’uiˬ sha uˉ peunˍ ve awˬ hawˉ lo chehˇ ve chaw teˇ g’aˇ le le Tawˇ naˉ ve liꞈ 10:22 hk’aw k’oˆ taˍ ve hk’e awˬ tehˬ hpehꞈ tuˬ yoˬ. Choˬ kaˬ lo k’oˆ ve, “nawˬ paw sha la ve lehˬ, G’uiˬ sha ve awˬ bon htaꞈ pa taw yoˬ. Kanˉ g’aˇ hteꞈ te ve pa taw nawˬ paw sha la ve maˇ heˆ.” G’uiˬ sha ve daꞈ kehˬ ve awˬ ha hpu yawˇ ve chaw htaꞈ ga piˇ leh yawˇ hui Yeˍsuˆ hk’e leˇ a yehˉ yehˉ hpehꞈ la leh awˬ leh meuˇ htaˇ yawˇ hui biˇ ve chaw hpehꞈ tuˬ yoˬ. (Yoˇhanˬ 13:15-17; Eˇfeˇsuꞈ 4:23, 24) Peuˬ k’ai ve teˇ nyi le le yawˇ hui ve awˬ g’aˇ awˬ shaˉ daꞈ la leh daꞈ ve chaw hpehꞈ la tuˬ yoˬ. Oˇ ve teˇ yanˇ ve a shaꞈ ngaˬ hui ha lehˬ jaˇ tuˬ te laˇ ve yoˬ! (Yawˇbaˆ 33:25) K’awꞈ teꞈ tu la ve awˬ lawn htaꞈ ngaˬ hui dawˇ nyi htaˇ, chi teˇ hkui kaꞈ hk’aˬ hk’e ga laˇ ve le?

13. Chiˇ mvuh ve liꞈ 139:1-4 hk’aw Yaˬhoˉvaˬ ngaˬ hui htaꞈ shiˍ ve tehꞈ hk’aˬ hk’e hpeuꞈ maw laˇ ve le? Leh k’awꞈ teꞈ tu la ve awˬ lawn kaꞈ hk’aˬ hk’e hpeuꞈ maw laˇ ve le?

¹³ Ngaˬ hui henˇ k’ai peuˬ ve hk’a shuˍ, Yaˬhoˉvaˬ lehˬ, suh-oˬ ve chaw htaꞈ k’awꞈ teꞈ tu la piˇ htaˇ, yawˇ hui ve te hk’aˇ dawˇ hk’aˇ leh awˬ hoˆ awˬ han hk’a shuˍ cawˬ tcuh tuˬ yoˬ. Chi ngaˬ hui na g’a tuˬ hk’aˬ hk’e ga laˇ ve le? Yaˬhoˉvaˬ ngaˬ hui htaꞈ haꞈ jaˇ leh ngaˬ hui tawˇ yaw ve, dawˇ ve, leh te ve awˬ ceuˬ htaꞈ yawˇ tawnˇ g’a ve yoˬ. Chi htaꞈ pa taw, yawˇ ngaˬ hui htaꞈ k’awꞈ teꞈ tu la tcuh laˇ htaˇ, awˉ lawˉ htaˇ hk’a shuˍ hpehꞈ tcuh laˇ tuˬ yoˬ. Yaˬhoˉvaˬ ngaˬ hui teˇ g’aˇ leh teˇ g’aˇ htaꞈ a yeˇ hk’aˬ hk’e taw yuˬ ve jawˇ mawˇ Daˍviˆ kaꞈ shiˍ ve yoˬ. (Chiˇ mvuh ve 139:1-4 g’aw sheˍ.) Yaˬhoˉvaˬ ngaˬ hui htaꞈ chi hk’e taw a yeˇ yuˬ ve tehꞈ shiˍ htaˇ, chi teˇ hkui kaꞈ ngaˬ hui awˬ bon hk’aˬ hk’e g’a tuˬ le?

14. Yaˬhoˉvaˬ ngaˬ hui htaꞈ hk’a dehꞈ shiˍ ve ngaˬ hui hk’aˬ hk’e dawˇ tuˬ te laˇ ve le?

¹⁴ Yaˬhoˉvaˬ ngaˬ hui htaꞈ chi hk’e taw taw shiˍ ve ngaˬ hui htawˇ dawˇ nawˬ dawˇ cawˬ tuˬ maˇ loˬ. Aˬ htoꞈ ma pa taw le? Yaˬhoˉvaˬ ngaˬ hui htaꞈ dawˇ haˍ jaˇ ve tehꞈ maˇ leuˉ cawˇ. Ngaˬ hui teˇ g’aˇ leh teˇ g’aˇ yawˇ awˬ pon awˬ hpfuhˇ hk’aˆ jaˇ tehꞈ shawˍ ve yoˬ. Ngaˬ hui a shaꞈ teꞈ kuiˬ hk’aw hk’aˬ hk’e g’a hpuˇ ve kaꞈ yawˇ shiˍ ve yoˬ. Chi ngaˬ hui htaꞈ awˬ g’aˇ peꞈ laˇ jaˇ! Teˇ nyi le le ngaˬ hui teˇ g’aˇ tiˉ chehˇ ve tehꞈ maˇ dawˇ. Yaˬhoˉvaˬ ngaˬ hui awˬ paˇ lo hk’aˬ htaˆ kaꞈ chehˇ leh ngaˬ hui loˍ ve teˇ pawˆ le le ga laˇ tuˬ yoˬ.—2 Raˍsaˍvanˍ 16:9.

15. K’awꞈ teꞈ tu la ve awˬ lawn Yaˬhoˉvaˬ ve cuˇ yiˍ htaꞈ hk’aˬ hk’e hpeuꞈ maw laˇ ve le?

¹⁵ Suh ve htaꞈ kawˆ ve teˇ ceuˬ lehˬ, kawˆ tuˬ uiˍ jaˇ ve laꞈ caˉ hpehꞈ ve yoˬ. Saˍtanˍ hpawˇ chehˇ ve chaw lehˬ laꞈ caˉ chi ve htaꞈ yehˇ leh chaw yaˇ teˇ hpaˍ a shu yawˇ ve awˬ chawˇ htaꞈ hpfuhˆ tuˬ te piˇ ve maˇ heˆ leh maˇ daꞈ ve awˬ ceuˬ te ve yoˬ. Yaꞈ hk’aˇ, laꞈ caˉ chi ve teˇ hpaˍ ngaˬ hui htaꞈ teꞈ chiˉ te maˇ g’a. Ngaˬ hui htaꞈ tiˇ pehˍ laˇ ve k’o, Yaˬhoˉvaˬ ngaˬ hui htaꞈ teˇ pawˆ k’awꞈ teꞈ tu la tcuh laˇ tuˬ yoˬ tehꞈ ngaˬ hui shiˍ ve yoˬ. (Hpeuꞈ maˍ ve 2:10) Ngaˬ hui Yaˬhoˉvaˬ ve kanˉ maˇ te tuˬ teˇ ceuˬ kaꞈ te laˇ maˇ g’a tehꞈ ngaˬ hui yonˍ ve yoˬ. (Roˉmaꞈ 8:35-39) K’awꞈ teꞈ tu la ve htaꞈ dawˇ law ve awˬ lawn lehˬ, Yaˬhoˉvaˬ ve cuˇ yiˍ htaꞈ teˇ ceuˬ kaꞈ tehˆ maˇ g’a ve tehꞈ hk’a tawˍ lehˆ hpeuꞈ maw laˇ ve yoˬ! Dawˇ law kuiˬ chi ve Saˍtanˍ hpawˇ chehˇ ve chaw ngaˬ hui htaꞈ tiˇ pehˍ laˇ tuˬ k’oˆ laˇ htaˇ, ngaˬ hui maˇ kawˆ leh Yaˬhoˉvaˬ htaꞈ ka tiꞈ yeˬ g’a tuˬ haꞈ shaˉ g’a ve yoˬ.

16. A shu yawˇ awˬ to htaꞈ na nyi cawˇ ve aˬ htoꞈ ma ve na hkawˇ le? Leh na hkawˇ chi ve teˇ hpaˍ nawˬ Yaˬhoˉvaˬ htaꞈ g’aˇ va ve tehꞈ hk’aˬ hk’e te shiˍ g’a tuˬ le?

 ¹⁶ Yaˬhoˉvaˬ ve canˇ paˍ nawˬ htaꞈ tiˇ pehˍ laˇ tuˬ k’oˆ laˇ htaˇ, Yaˬhoˉvaˬ nawˬ htaꞈ k’awꞈ teꞈ tu la tcuh laˇ tuˬ yoˬ tehꞈ nawˬ yawˇ htaꞈ g’aˇ va-aw laˇ? Leh awˬ lawn chi hk’e leˇ ve hpehꞈ la htaˇ, nawˬ Yaˬhoˉvaˬ htaꞈ g’aˇ va ve tehꞈ hk’aˬ hk’e te shiˍ la tuˬ le? Awˉ lawˉ teˇ hk’aˇ lehˬ a shu yawˇ awˬ to htaꞈ na nyi cawˇ ve, ‘teˇ nyi le le ngaˬ awˬ lawn uiˍ ve maˇ uiˍ ve dawˇ cheˆ htaˇ, Yaˬhoˉvaˬ htaꞈ g’aˇ va ve tehꞈ hpeuꞈ maw piˇ-aw laˇ?’ (Luˉkaꞈ 16:10) Leh nawˬ a shu yawˇ awˬ to htaꞈ k’awꞈ na nyi cawˇ ve, ‘ngaˬ Yaˬhoˉvaˬ htaꞈ awˉ lawˉ teh ve k’o, yawˇ ngaˬ htaꞈ nyi haꞈ shaˉ laˇ tuˬ yonˍ leh, ngaˬ ve awˬ yanˇ leh ngaˬ ve hpu yehˇ leh hpeuꞈ maw piˇ-aw laˇ?’ (Maꞈhtehˍ 6:31-33) Nawˬ ve na hkawˇ chi ve teˇ hpaˍ awˬ tehˬ hpehꞈ ve k’o, nawˬ Yaˬhoˉvaˬ htaꞈ g’aˇ va ve tehꞈ hpeuꞈ maw piˇ leh awˬ g’uˇ suhˍ hpawˇ beˬ ve lawˇ ve aˬ htoꞈ ma g’a hpuˇ ve htawˇ gu hehnˇ taˍ-oˬ ve yoˬ.—Tawˇ naˉ ve 3:5, 6.

17. (a) K’awꞈ teꞈ tu la ve awˬ lawn Yaˬhoˉvaˬ yeunˇ hkanˍ ve tehꞈ hk’aˬ hk’e hpeuꞈ maw laˇ ve le? (b) Yaˬhoˉvaˬ yeunˇ hkanˍ laˇ ve htaꞈ ngaˬ hui awˬ hpfuhˇ shiˍ ve tehꞈ hk’aˬ hk’e te hpeuꞈ maw piˇ g’a tuˬ le?

¹⁷ Yaˬhoˉvaˬ miˬ guiˬ chi haiˬ jaˇ ve htaꞈ hk’aˬ htaˆ te luˬ tuˬ awˬ yanˇ tinˍ taˍ-oꞈ. (Maꞈhtehˍ 24:36) Yaꞈ hk’aˇ, awˬ yanˇ tinˍ taˍ ve maˇ gaˬ sheˍ htaˇ, yawˇ maˇ yeunˇ hkanˍ leh teˇ ceuˬ ceuˬ te ve maˇ heˆ. Yaˬhoˉvaˬ suh-oˬ ve chaw htaꞈ k’awꞈ teꞈ tu la tcuh gaˇ jaˇ ve htawˇ, awˬ yanˇ maˇ gaˬ sheˍ ve pa taw yawˇ law taˍ ve yoˬ. (Yawˇbaˆ 14:14, 15) Yaˬhoˉvaˬ yeunˇ hkanˍ ve htaꞈ ngaˬ hui awˬ bon uiˍ jaˇ k’oˆ piˇ tuˬ laiˉ hk’aˇ cawˬ ve yoˬ. (Yoˇhanˬ 5:28) Awˬ lawn chi htaꞈ dawˇ nyi sheˍ. Chaw maˇ maˇ leh ngaˬ hui kaꞈ “venˇ baˆ htaꞈ dawˇ hpfuhˆ” tuˬ Yaˬhoˉvaˬ yeunˇ hkanˍ laˇ ve pa taw yoˬ. (2 Peˍtruˆ 3:9) Yaˬhoˉvaˬ chaw maˇ maˇ htaꞈ co co taiˍ taiˍ ve a shaꞈ g’a tcuh gaˇ ve pa taw, yawˇ yeunˇ hkanˍ ve htaꞈ ngaˬ hui awˬ hpfuhˇ shiˍ ve tehꞈ hpeuꞈ maw piˇ g’a ve teˇ hk’aˇ lehˬ, “co tiꞈ ha tiꞈ htaꞈ g’a tuˬ awˬ pon hk’a fuiˍ taˍ ve chaw hui” Yaˬhoˉvaˬ htaꞈ haꞈ leh yawˇ ve kanˉ te la tuˬ ngaˬ hui ga piˇ cawˇ ve yoˬ. (Tcuh yaˇ 13:48) Yaˬhoˉvaˬ yeunˇ hkanˍ laˇ ve awˬ bon htaꞈ yawˇ hui kaꞈ ngaˬ hui hk’a shuˍ g’a tuˬ yoˬ.

18. Aˬ htoꞈ ma te ngaˬ hui awˬ nu ve chaw htaꞈ yeunˇ hkanˍ cawˇ ve le?

¹⁸ Teˇ hinˉ hk’awꞈ peuˬ hk’awꞈ nawˉ, ngaˬ hui biˇ ve chaw hpehꞈ tuˬ tehꞈ Yaˬhoˉvaˬ shiˍ ve yoˬ. Leh oˇ ve teˇ nyi gaˬ tuˬ Yaˬhoˉvaˬ kaꞈ yeunˇ hkanˍ leh law taˍ ve yoˬ. Yaꞈ hk’aˇ, oˇ ve teˇ nyi maˇ gaˬ sheˍ htaˇ, Yaˬhoˉvaˬ ngaˬ hui ve venˇ baˆ htaꞈ hpehˇ laˇ ve yoˬ. Chi htaꞈ pa taw, ngaˬ hui Yaˬhoˉvaˬ htaꞈ henˇ yuˬ leh shu daꞈ ve htaꞈ nyi leh yeunˇ hkanˍ piˇ sheˬ. Awˬ viˉ awˬ nyi yaˇ miˇ yawˇ ve awˬ hpawˇ dawˇ maˇ jaˇ leh maˇ hpawnˬ daꞈ-e ve awˬ lawn htaꞈ dawˇ nyi sheˍ. Yawˇ k’oˆ ve, “yehˬ k’a hk’aw ngaˬ huiˉ maˬ teˇ geh  te tuˬ dawˇ teh taˍ ve te maˇ g’a-o leh ngaˬ nyi ma luˬ tuˬ te laˇ jaˇ.” Chi hk’e g’a hpuˇ ve htawˇ, yawˇ haꞈ lu diˬ ve awˬ miˇ ma hpehꞈ leh awˬ hpawˇ htaꞈ yeunˇ hkanˍ piˇ sheˍ. Yawˇ hk’aˬ htaˆ kaꞈ Yaˬhoˉvaˬ htaꞈ g’aˇ va leh te tcuhˉ taˍ ve yoˬ. Yawˇ Yaˬhoˉvaˬ htaꞈ henˇ yuˬ leh shoꞈ shaꞈ ve htaꞈ maˇ nyi leh awˬ hpawˇ htaꞈ daꞈ ve hpawˇ hk’aˬ htaˆ kaꞈ nyi ve yoˬ. Yawˇ k’oˆ ve, “awˬ tehˬ k’o ngaˬ awˬ hpawˇ daꞈ ve chaw hpehꞈ leh, yawˇ dawˇ haˍ ve leh shoꞈ shaꞈ ve htaꞈ tawˍ daꞈ chehˇ ve tehꞈ ngaˬ kaꞈ shiˍ ve yoˬ!” Ngaˬ hui yehˬ k’a hk’aw ve chaw leh awˬ viˉ awˬ nyi shoꞈ shaꞈ ve g’a hpuˇ leh tawˍ daꞈ chehˇ ve chaw htaꞈ g’a yeunˇ hkanˍ ve a yeˇ uiˍ jaˇ!

19. Ngaˬ hui aˬ htoꞈ ma te tuˬ dawˇ teh taˍ cawˇ ve le?

¹⁹ Miˬ guiˬ htaꞈ hpanˍ htaˇ, Yeˍsuˆ leh mvuhˇ naw ma tcuh yaˇ g’a mawˬ ve ha lehˬ jaˇ. Awˬ g’uˇ suhˍ hpawˇ Yeˍsuˆ leh mvuhˇ naw ma tcuh yaˇ miˬ guiˬ chi hk’oˆ lo biˇ ve chaw Yaˬhoˉvaˬ htaꞈ haꞈ leh yawˇ ve kanˉ te ve chaw htaꞈ ceh tiˉ yawˇ hui g’a mawˬ htaˇ, hk’aˬ hk’e taw ha lehˬ ve htaꞈ dawˇ nyi sheˍ. Chaw yaˇ yawˇ hui te ve htaꞈ awˬ bon g’a ve g’a mawˬ htaˇ, Yeˍsuˆ geh teˇ geh uˉ peunˍ ve chaw hk’aˬ hk’e taw ha lehˬ ve htaꞈ dawˇ nyi sheˍ. (Hpeuꞈ maˍ ve 4:4, 9-11; 5:9, 10) Dawˇ haˍ gaˇ haˍ leh naˬ ve gawˬ ve htaꞈ pa taw, nawˬ hawˬ leh mehˆ g’uiˬ yaꞈ ve k’awꞈ cawˬ tuˬ ve maˇ heˆ. Oˇ ve teˇ yanˇ naˬ ve gawˬ ve, nyi ma luˬ ve, leh suh ve kaꞈ maˇ k’awꞈ cawˬ leh ha lehˬ ve mehˆ g’uiˬ ceh tiˉ cawˬ tuˬ ve htaꞈ dawˇ nyi sheˍ. (Hpeuꞈ maˍ ve 21:4) Oˇ ve teˇ yanˇ maˇ gaˬ sheˍ htaˇ, Awˬ pa Yaˬhoˉvaˬ haꞈ pehnˇ ve, cuˇ yiˍ, yeunˇ hkanˍ ve, chi ve teˇ hpaˍ htaꞈ nawˬ henˇ yuˬ tuˬ dawˇ teh taˍ sheˍ. Nawˬ chi hk’e te ve k’o, hk’aˬ hk’e g’a hpuˇ ve htawˇ maˇ k’oˆ, ha lehˬ ve tiˉ cawˬ tuˬ yoˬ. (Yaˍkoˆ 1:2-4) “Hteˇ ve chaw kaꞈ maˇ hteˇ ve chaw kaꞈ k’awꞈ teꞈ tu la tuˬ yoˬ” tehꞈ Yaˬhoˉvaˬ ka tiꞈ te taˍ laˇ ve htaꞈ ngaˬ hui awˬ bon uiˍ jaˇ!—Tcuh yaˇ 24:15.