1. Ngaˬ hui daꞈ jaˇ ve awˬ vuiˬ aˬ htoꞈ ma cawˬ ve le?

Ngaˬ hui Yaˬhoˉvaˬ ve Hkriꞈ yaˇ awˬ moˍ hk’aw ve teˇ g’aˇ g’a hpehꞈ ve daꞈ jaˇ! Hkriꞈ yaˇ awˬ moˍ hk’aw ngaˬ hui ve awˬ viˉ awˬ nyi geh Yaˬhoˉvaˬ htaꞈ oˉ k’oˍ pui htaˇ, dawˇ sha ha lehˬ jaˇ ve cawˬ ve yoˬ. Nawˬ Hkriꞈ yaˇ awˬ moˍ hk’aw cawˬ ve aˬ htoꞈ ma ve kanˉ le?

2. Tcuh yaˇ Pawˇluꞈ yawˇ ve liꞈ laiˉ k’oˆ hk’aw aˬ htoꞈ ma awˬ lawn htaꞈ tehˆ taˍ ve le?

² Tcuh yaˇ Pawˇluꞈ tawˇ pa haˉ tehˆ maˍ laˇ ve liꞈ laiˉ k’oˆ hk’aw bvuhꞈ taˍ ve, awˬ lawn chi htaꞈ caˉ daꞈ ve ngaˬ hui henˇ g’a ve yoˬ. Liꞈ k’oˆ chi teˇ hpaˍ hk’aw Hkriꞈ yaˇ awˬ moˍ lehˬ chaw yaˇ ve awˬ to htaꞈ Pawˇluꞈ tehˆ taˍ ve yoˬ. Chi hk’oˆ kaꞈ, yawˇ Hkriꞈ yaˇ awˬ moˍ hk’aw teˇ g’aˇ leh teˇ g’aˇ lehˬ, awˬ to hk’aw ve awˬ hk’eun teˇ hpaˍ htaꞈ kaꞈ tehˆ taˍ ve yoˬ.—Roˉmaꞈ 12:4-8; 1 Kawˇrenˍhtuˆ 12:12-27; Eˇfeˇsuꞈ 4:16.

3. Awˬ lawn chi ve hk’aw ngaˬ hui henˇ tuˬ ve 3 hk’aˇ aˬ htoꞈ ma le?

³ Pawˇluꞈ tawˇ pa haˉ tehˆ maˍ laˇ ve a yeˇ uiˍ ve 3 hk’aˇ awˬ lawn chi ve hk’aw teˇ geh henˇ tuˬ yoˬ. Awˉ lawˉ teˇ hk’aˇ lehˬ, Yaˬhoˉvaˬ ve Hkriꞈ yaˇ awˬ moˍ hk’aw ngaˬ hui teˇ g’aˇ leh teˇ g’aˇ kanˉ * cawˬ ve yoˬ. Nyiˇ hk’aˇ lehˬ, Hkriꞈ yaˇ awˬ moˍ hk’aw ngaˬ hui aˬ htoꞈ ma te g’a ve na g’a tuˬ haˍ jaˇ ve k’o, ngaˬ hui hk’aˬ hk’e te g’a ve le? Shehˆ hk’aˇ lehˬ, Yaˬhoˉvaˬ Hkriꞈ yaˇ awˬ moˍ hk’aw teˇ g’aˇ leh teˇ g’aˇ htaꞈ kanˉ piˇ taˍ ve aˬ htoꞈ ma te ngaˬ hui hk’a dehꞈ te cawˇ ve le?

4. Roˉmaꞈ liꞈ 12:4, 5 hk’aw ngaˬ hui htaꞈ aˬ htoꞈ ma maˍ laˇ ve le?

⁴ Pawˇluꞈ tawˇ pa haˉ tehˆ maˍ laˇ ve henˇ tuˬ ve awˉ lawˉ teˇ hk’aˇ lehˬ, ngaˬ hui teˇ g’aˇ leh teˇ g’aˇ Yaˬhoˉvaˬ ve yehˬ k’a hk’aw a yeˇ uiˍ jaˇ ve  teˇ g’aˇ g’a hpehꞈ ve yoˬ. Pawˇluꞈ yawˇ ve tawˇ pa haˉ tehˆ maˍ ve hk’aw k’oˆ ve, “awˬ lawn k’o, awˬ to teˇ to tiˉ awˬ hk’aw lo, awˬ hk’eun maˇ maˇ cawˬ ve yoˬ. Awˬ hk’eun oˇ ve teˇ hpaˍ lehˬ, kanˉ te ve maˇ shuˍ daꞈ. Chi hk’a shuˍ shuˍ, ngaˬ hui chaw maˇ ve htawˇ, Hkriꞈ awˬ hk’aw lo awˬ to teˇ to tiˉ hpehꞈ leh, ngaˬ hui teˇ g’aˇ leh teˇ g’aˇ caˉ daꞈ taˍ ve awˬ hk’eun teˇ hpaˍ hpehꞈ ve yoˬ.” (Roˉmaꞈ 12:4, 5) Pawˇluꞈ hk’aˬ hk’e k’oˆ gaˇ ve le? Ngaˬ hui Hkriꞈ yaˇ awˬ moˍ hk’aw awˬ vuiˬ g’a ve peun daꞈ ve htawˇ, teˇ g’aˇ leh teˇ g’aˇ awˬ hpfuhˇ hk’aˆ jaˇ ve htaꞈ k’oˆ gaˇ ve yoˬ.

5. Yaˬhoˉvaˬ Hkriꞈ yaˇ awˬ moˍ htaꞈ aˬ htoꞈ ma ve “laꞈ shawnˍ” piˇ ve le?

⁵ Hkriꞈ yaˇ awˬ moˍ hk’aw a shu kanˉ te tcuh laˇ ve le? Nawˬ shehˍ k’ai paˍ teˇ hpaˍ htaꞈ dawˇ mawˬ tuˬ yoˬ hehˉ. (1 Hteˇsaˍlawˇniˆ 5:12; Heˍbrehˇ 13:17) Awˬ tehˬ yoˬ, Yaˬhoˉvaˬ Yeˍsuˆ Hkriꞈ htaꞈ cuˇ leh yawˇ ve Hkriꞈ yaˇ awˬ moˍ htaꞈ “laꞈ shawnˍ teˇ hpaˍ” piˇ ve yoˬ. (Eˇfeˇsuꞈ 4:8) “Laꞈ shawnˍ” chi lehˬ, Uˉ peunˍ ve Kawˍ miˍ tiˍ awˬ moˍ, Uˉ peunˍ ve Kawˍ miˍ tiˍ htaꞈ ga piˇ paˍ, awˬ tcuhˆ puiˍ lo ve kawˍ miˍ tiˍ, toˇ nyi shehˍ hpaˇ, G’uiˬ sha ve kanˉ hk’aˇ hk’aw awˬ viˉ awˬ nyi liꞈ maˍ paˍ, Hkriꞈ yaˇ awˬ moˍ hk’aw nyi haꞈ shaˉ paˍ leh ga piˇ shehˍ hpaˇ, chi teˇ hpaˍ htaꞈ kaꞈ k’oˆ gaˇ ve yoˬ. Yaˬhoˉvaˬ ve yawˬ awˬ hpfuhˇ hk’aˆ jaˇ ve htaꞈ haꞈ shaˉ tuˬ leh Hkriꞈ yaˇ awˬ moˍ hk’aw co ha hpawˇ awˬ g’aˇ piˇ tuˬ, awˬ viˉ awˬ nyi hawˉ hk’aˆ chi teˇ hpaˍ htaꞈ daꞈ kehˬ ve awˬ ha hpu leuˆ yuˬ taˍ ve yoˬ.—1 Peˍtruˆ 5:2, 3.

6. 1 Hteˇsaˍlawˇniˆ liꞈ 2:6-8 hk’aw k’oˆ taˍ ve hk’e, daꞈ kehˬ ve awˬ ha hpu leuˆ yuˬ taˍ ve awˬ viˉ awˬ nyi hawˉ hk’aˆ lehˬ, aˬ htoꞈ ma te tuˬ coˇ caˇ ve le?

⁶ Awˬ viˉ awˬ nyi hawˉ hk’aˆ awˬ vuiˬ laiˉ ceuˬ te tuˬ, daꞈ kehˬ ve awˬ ha hpu yawˇ hui htaꞈ leuˆ yuˬ taˍ ve yoˬ. Awˬ to hk’aw cawˬ ve awˬ hk’eun hk’a peu-eˬ lehˬ, laꞈ sheh leh hkuiˬ sheh awˬ to htaꞈ awˬ bon g’a tuˬ kanˉ te ve yoˬ. Chi hk’a shuˍ shuˍ, daꞈ kehˬ ve awˬ ha hpu leuˆ yuˬ taˍ ve awˬ viˉ awˬ nyi hawˉ hk’aˆ lehˬ, Hkriꞈ yaˇ awˬ moˍ hk’aw ve chaw hk’a peu-eˬ ve htaꞈ awˬ bon g’a tuˬ kanˉ te hkeuꞈ ve yoˬ. Yawˇ hui shu chiˇ mvuh laˇ tuˬ coˇ caˇ leh maˇ te. Chi hk’e te ve aꞈ kehˉ, yawˇ hui awˬ viˉ awˬ nyi htaꞈ co ha hpawˇ uiˍ la mvuh la tuˬ coˇ caˇ leh awˬ g’aˇ piˇ ve yoˬ. (1 Hteˇsaˍlawˇniˆ 2:6-8 g’aw sheˍ.) Awˬ viˉ awˬ nyi hawˉ hk’aˆ awˬ vuiˬ te keunˍ ve chi teˇ hpaˍ lehˬ, yawˇ hui loˍ ve aꞈ kehˉ shu loˍ ve htaꞈ awˉ lawˉ dawˇ nyi ve pa taw, ngaˬ hui Yaˬhoˉvaˬ htaꞈ awˬ bon uiˍ jaˇ!

7. Awˬ viˉ awˬ nyi laiˉ g’aˇ Yaˬhoˉvaˬ ve kanˉ awˬ yanˇ hk’a biˇ te ve chaw aˬ htoꞈ ma awˬ bon g’a ve le?

⁷ Hkriꞈ yaˇ awˍ moˍ hk’aw ve awˬ viˉ awˬ nyi teˇ hpaˍ lehˬ miˍshenˍnaˍliˍ, tcuh peu ve g’uˇ suhˍ peuˍ ve chaw, maˇ heˆ leh hk’aˬ htaˆ kaꞈ g’uˇ suhˍ peuˍ ve chaw te ve yoˬ. Awˬ tehˬ k’o, miˬ guiˬ chi hk’oˆ lo awˬ viˉ awˬ nyi laiˉ g’aˇ, G’uiˬ sha ve kanˉ hto toˇ ve awˬ yanˇ hk’a biˇ te tuˬ leh shu awˬ laꞈ g’awˇ hpehꞈ la tuˬ maˍ piˇ tuˬ dawˇ cheˆ ve yoˬ. Yawˇ hui chi hk’e dawˇ cheˆ ve pa taw, shu laiˉ g’aˇ Yeˍsuˆ Hkriꞈ ve awˬ laꞈ g’awˇ hpehꞈ la tuˬ yawˇ hui ga piˇ ve yoˬ. Awˬ viˉ awˬ nyi Yaˬhoˉvaˬ ve kanˉ awˬ yanˇ hk’a biˇ te ve chaw maˇ-awˍ ve hpu shi mawˇ jeˬ maˇ cawˬ maˇ ve htawˇ, Yaˬhoˉvaˬ yawˇ hui htaꞈ daꞈ ve awˬ ceuˬ laiˉ ceuˬ piˇ ve yoˬ. (Maˍkuˆ 10:29, 30) Awˬ viˉ awˬ nyi chi teˇ hpaˍ htaꞈ ngaˬ hui haꞈ leh yawˇ hui kaꞈ Hkriꞈ yaˇ awˬ moˍ hk’aw teˇ g’aˇ hpehꞈ ve ngaˬ hui ha lehˬ jaˇ!

8. Hto toˇ ve chaw teˇ g’aˇ le le aˬ htoꞈ ma te Yaˬhoˉvaˬ awˬ pon awˬ hpfuhˇ hk’aˆ jaˇ ve le?

⁸ Awˬ viˉ awˬ nyi hawˉ hk’aˆ awˬ vuiˬ cawˬ ve chaw leh Yaˬhoˉvaˬ ve kanˉ awˬ yanˇ hk’a biˇ te ve chaw ceh Hkriꞈ yaˇ awˬ moˍ hk’aw kanˉ g’a te ve laˇ? Maˇ heˆ! Daꞈ ve awˬ lawn sha tanˇ hto toˇ ve chaw teˇ g’aˇ le le lehˬ Yaˬhoˉvaˬ leh Hkriꞈ yaˇ awˬ moˍ awˬ pon a yeˇ uiˍ jaˇ. (Roˉmaꞈ 10:15; 1 Kawˇrenˍhtuˆ 3:6-9) Hkriꞈ yaˇ awˬ moˍ hk’aw dawˇ teh taˍ ve a yeˇ uiˍ jaˇ ve teˇ ceuˬ lehˬ, shu Yeˍsuˆ ve awˬ laꞈ g’awˇ hpehꞈ la tuˬ g’a te ve yoˬ. (Maꞈhtehˍ 28:19, 20; 1 Tiˆmoˉseˍ 2:4) Baˆtiˆsaˬ haꞈ yuˬ ve leh maˇ haꞈ yuˬ sheˍ ve chaw teˇ g’aˇ le le lehˬ, hto toˇ ve chi htaꞈ yawˇ hui a yeˇ uiˍ jaˇ tehꞈ shawˍ ve yoˬ.—Maꞈhtehˍ 24:14.

9. Aˬ htoꞈ ma te ngaˬ hui ve awˬ viˉ awˬ nyi yaˇ miˇ htaꞈ awˬ hpfuhˇ shiˍ ve le?

⁹ Yaˬhoˉvaˬ awˬ viˉ awˬ nyi yaˇ miˇ htaꞈ haꞈ leh Hkriꞈ yaˇ awˬ moˍ hk’aw a yeˇ uiˍ ve awˬ vuiˬ te tcuh ve yoˬ. Awˬ miˇ ma, awˬ e, mehˇ chawˇ ma, leh awˬ viˉ awˬ  nyi yaˇ miˇ awˬ hpawˇ maˇ heuˆ sheˍ ve, G’uiˬ sha ve kanˉ ka tiꞈ yeˬ ve hk’aw te ve chaw chi teˇ hpaˍ htaꞈ Yaˬhoˉvaˬ awˬ hpfuhˇ shiˍ ve yoˬ. Yaˇ miˇ laiˉ g’aˇ daꞈ ve henˇ yuˬ tuˬ hpehꞈ leh G’uiˬ sha nyi hk’aˇ suh tuˬ te piˇ ve chaw awˬ lawn Liꞈ hpu hk’aw k’oˆ taˍ ve yoˬ. Yaˇ miˇ chi ve teˇ hpaˍ lehˬ cuˇ yiˍ cawˬ ve, yonˍ yeˬ ve, nyi ma pfuhˇ ve, haꞈ hanˉ ve, piˇ gaˇ ve nyi ma cawˬ ve, leh daꞈ ve awˬ ceuˬ htaꞈ te ve yoˬ. (Luˉkaꞈ 8:2, 3; Tcuh yaˇ 16:14, 15; Roˉmaꞈ 16:3, 6; Hpiˇliˇpiˆ 4:3; Heˍbrehˇ 11:11, 31, 35) Ngaˬ hui ve Hkriꞈ yaˇ awˬ moˍ hk’aw ve awˬ viˉ awˬ nyi yaˇ miˇ daꞈ ve te hk’aˇ dawˇ hk’aˇ chi teˇ hpaˍ cawˬ ve ngaˬ hui Yaˬhoˉvaˬ htaꞈ awˬ bon uiˍ jaˇ!

10. Aˬ htoꞈ ma te awˬ viˉ awˬ nyi chaw mawˇ htaꞈ ngaˬ hui awˬ hpfuhˇ shiˍ cawˇ ve le?

¹⁰ Chi hk’oˆ kaꞈ, ngaˬ hui ve Hkriꞈ yaˇ awˬ moˍ hk’aw awˬ viˉ awˬ nyi chaw mawˇ laiˉ g’aˇ cawˬ ve ha lehˬ jaˇ. Hkriꞈ yaˇ awˬ moˍ teˇ kaˬ kaˬ k’o, awˬ viˉ awˬ nyi chaw mawˇ yawˇ hui a shaꞈ teꞈ ve teˇ co-e Yaˬhoˉvaˬ ve kanˉ ka tiꞈ yeˬ ve hk’aw te ve yoˬ. Awˬ viˉ awˬ nyi chaw mawˇ teˇ hpaˍ hpaˍ k’o, awˬ tehˬ ve g’a henˇ ve maˇ maw sheˍ. Awˬ viˉ awˬ nyi chaw mawˇ chi teˇ hpaˍ mawˇ la leh shoꞈ shaꞈ ve cawˬ maˇ jaˇ. Chi teˇ hpaˍ htaꞈ pa taw, yawˇ hui Hkriꞈ yaˇ awˬ moˍ hk’aw leh hto toˇ kuiˬ hk’aw ve kanˉ hk’a dehꞈ te maˇ g’a-o. Chi hk’e hpehꞈ ve htawˇ, awˬ viˉ awˬ nyi chaw mawˇ chi teˇ hpaˍ hto toˇ ve yawˇ hui te g’a ve hk’e te leh, yawˇ hui awˬ g’aˇ awˬ shaˉ cawˬ ve hk’e shu htaꞈ awˬ g’aˇ piˇ leh ga piˇ tuˬ te ve yoˬ! Yawˇ hui ve awˬ lawn ngaˬ hui awˬ g’aˇ g’a jaˇ. Yawˇ hui Yaˬhoˉvaˬ leh ngaˬ hui awˬ pon daꞈ jaˇ.—Tawˇ naˉ ve 16:31.

11-12. Nawˬ ve Hkriꞈ yaˇ awˬ moˍ hk’aw yaˇ teˇ hpaˍ geh nawˬ awˬ g’aˇ hk’aˬ hk’e g’a ve le?

¹¹ Ngaˬ hui ve yaˇ teˇ hpaˍ htaꞈ kaꞈ dawˇ nyi sheˍ. Miˬ guiˬ chi hk’oˆ lo Saˍtanˍ uˉ peunˍ ve hk’aw yawˇ hui uiˍ la leh maˇ daꞈ ve dawˇ hk’aˇ cawˬ maˇ ve pa taw, yawˇ hui shoꞈ shaꞈ ve laiˉ ceuˬ g’a hpuˇ ve yoˬ. (1 Yoˇhanˬ 5:19) Chi hk’e hpehꞈ ve htawˇ, ngaˬ hui ve yaˇ teˇ hpaˍ hpawnˬ daꞈ kuiˬ hk’aw hk’awꞈ ve, hto toˇ-e ve, leh yawˇ hui ve yonˍ hk’aˇ haꞈ hanˉ ve hk’aw haꞈ shaˉ ve ngaˬ hui mawˬ htaˇ awˬ g’aˇ g’a jaˇ. Yaˇ teˇ hpaˍ-oˬ, Yaˬhoˉvaˬ ve Hkriꞈ yaˇ awˬ moˍ hk’aw nawˬ awˬ hpfuhˇ hk’aˆ jaˇ!—Chiˇ mvuh ve 8:2.

¹² Awˬ viˉ awˬ nyi teˇ hpaˍ Hkriꞈ yaˇ awˬ moˍ hk’aw awˬ hpfuhˇ cawˬ ve tehꞈ yonˍ tuˬ yawˇ hui awˬ pon haˍ jaˇ. Ngaˬ hui teˇ g’aˇ leh teˇ g’aˇ Hkriꞈ yaˇ awˬ moˍ  hk’aw awˬ hpfuhˇ cawˬ ve tehꞈ yonˍ g’a tuˬ aˬ htoꞈ ma te laˇ ve le? Teˇ geh nyi sheˍ.

13-14. Aˬ htoꞈ ma te chaw teˇ hpaˍ Hkriꞈ yaˇ awˬ moˍ hk’aw awˬ hpfuhˇ maˇ cawˬ tehꞈ dawˇ ve hehˉ le?

¹³ Pawˇluꞈ tawˇ pa haˉ tehˆ maˍ laˇ ve henˇ tuˬ ve nyi hk’aˇ teˇ hk’aˇ htaꞈ teˇ geh nyi sheˍ. Chi beuꞈ teˇ co-e awˬ viˉ awˬ nyi laiˉ g’aˇ g’a hpuˇ ve htaꞈ Pawˇluꞈ k’oˆ ve yoˬ. Laiˉ g’aˇ yawˇ Hkriꞈ yaˇ awˬ moˍ hk’aw awˬ hpfuhˇ cawˬ ve tehꞈ yonˍ g’a tuˬ haˍ jaˇ. Pawˇluꞈ k’oˆ ve, “hkui sheh lehˬ, ngaˬ laꞈ sheh maˇ heˆ ve pa taw awˬ to htaꞈ maˇ caˉ daꞈ tehꞈ k’oˆ ve htawˇ, oˇ hk’e k’oˆ ve pa taw awˬ to htaꞈ maˇ caˉ daꞈ ve maˇ heˆ. Naˍ paw lehˬ, ngaˬ mehˆ shiˍ maˇ heˆ ve pa taw awˬ to htaꞈ maˇ caˉ daꞈ tehꞈ k’oˆ ve htawˇ, oˇ hk’e k’oˆ ve pa taw awˬ to htaꞈ maˇ caˉ daꞈ ve maˇ heˆ.” (1 Kawˇrenˍhtuˆ 12:15, 16) Pawˇluꞈ hk’aˬ hk’e k’oˆ gaˇ ve le?

¹⁴ Hkriꞈ yaˇ awˬ moˍ hk’aw ve chaw htaꞈ nawˬ tehˆ daꞈ ve k’o, nawˬ Hkriꞈ yaˇ awˬ moˍ hk’aw awˬ hpfuhˇ maˇ cawˬ tehꞈ dawˇ ve yoˬ hehˉ. Hkriꞈ yaˇ awˬ moˍ hk’aw ve chaw teˇ hpaˍ maˍ cheuˬ ve, awˬ lawn hk’a dehꞈ gu g’a ve, maˇ heˆ leh shu htaꞈ awˬ g’aˇ piˇ puiˉ ve yoˬ hehˉ. Nawˬ yawˇ hui hk’e leˇ te maˇ g’a tehꞈ dawˇ ve yoˬ hehˉ. Chi nawˬ nyi ma nuˇ nehˬ leh yawˆ yan puiˉ ve tehꞈ hpeuꞈ maw piˇ ve yoˬ. (Hpiˇliˇpiˆ 2:3) Awˬ yanˇ chi ve hk’aw yawˇ puiˉ ve hpehꞈ ve htaꞈ tiˉ nawˬ tehˆ ve k’o, awˬ g’aˇ nuˇ puiˉ la ve yoˬ. Pawˇluꞈ k’oˆ ve hk’a shuˍ nawˬ kaꞈ Hkriꞈ yaˇ awˬ moˍ hk’aw awˬ hpfuhˇ maˇ cawˬ tehꞈ dawˇ ve yoˬ hehˉ. Chi hk’e ve dawˇ hk’aˇ htaꞈ g’aˇ tuˬ nawˬ htaꞈ aˬ htoꞈ ma ga laˇ ve le?

15. 1 Kawˇrenˍhtuˆ liꞈ 12:4-11 hk’aw k’oˆ taˍ ve hk’e, ngaˬ hui puiˉ ve hpehꞈ ve htaꞈ hk’aˬ hk’e na g’a cawˇ ve le?

¹⁵ Awˬ lawn chi htaꞈ dawˇ nyi sheˍ. Awˉ lawˉ peuˇ ve Hkriꞈ yaˇ teˇ hpaˍ hpaˍ htaꞈ Yaˬhoˉvaˬ daꞈ kehˬ ve awˬ ha hpu htaꞈ cuˇ leh anˇ tuˬ ve te tuˬ kanˇ paˆ piˇ ve yoˬ. Yaꞈ hk’aˇ, Hkriꞈ yaˇ teˇ g’aˇ le le hk’a shuˍ g’a ve maˇ heˆ. (1 Kawˇrenˍhtuˆ 12:4-11 g’aw sheˍ.) Yaˬhoˉvaˬ teˇ g’aˇ leh teˇ g’aˇ htaꞈ puiˉ ve hpehꞈ ve piˇ ve maˇ shuˍ daꞈ ve htawˇ, Hkriꞈ yaˇ teˇ g’aˇ le le awˬ hpfuhˇ cawˬ ve yoˬ. Chi beuꞈ teˇ co-e ngaˬ hui daꞈ kehˬ ve awˬ ha hpu geh anˇ tuˬ ve te tuˬ kanˇ paˆ g’a ve maˇ heˆ. Yaꞈ hk’aˇ, awˬ liˇ awˬ hk’aˇ shuˍ daꞈ sheˍ ve yoˬ. Ngaˬ hui teˇ g’aˇ le le puiˉ ve hpehꞈ ve maˇ shuˍ daꞈ ve htawˇ, Yaˬhoˉvaˬ awˬ pon teˇ g’aˇ le le awˬ hpfuhˇ hk’aˆ jaˇ.

16. Tcuh yaˇ Pawˇluꞈ beˆ maˍ laˇ ve ngaˬ hui yuˬ yehˇ cawˇ ve aˬ htoꞈ ma le?

 ¹⁶ Ngaˬ hui leh awˬ nu ve Hkriꞈ yaˇ htaꞈ tehˆ daꞈ ve aꞈ kehˉ, tcuh yaˇ Pawˇluꞈ beˆ maˍ laˇ ve htaꞈ yuˬ yehˇ cawˇ ve yoˬ. Yawˇ k’oˆ ve, “chaw teˇ g’aˇ le le lehˬ, a shu yawˇ te taˍ ve kanˉ htaꞈ dawˇ nyi tehˆ nyi-o. Oˇ hk’e te ve k’o, shu te taˍ ve kanˉ awˬ hk’aw lo yawˇ g’a ha lehˬ tuˬ ve teˇ ceuˬ maˇ heˆ. Yawˇ awˬ to te taˍ ve kanˉ awˬ hk’aw lo ceh tiˉ yawˇ g’a ha lehˬ tuˬ yoˬ.”—Gaˍlaˍtiˆ 6:4.

17. Pawˇluꞈ beˆ maˍ laˇ ve htaꞈ ngaˬ hui g’aꞈ te ve k’o, aˬ htoꞈ ma awˬ bon g’a tuˬ le?

¹⁷ Pawˇluꞈ beˆ maˍ laˇ ve htaꞈ ngaˬ hui g’aꞈ te leh ngaˬ hui te ve htaꞈ chaˬ nyi ve k’o, puiˉ ve hpehꞈ ve awˬ nu ve chaw maˇ cawˬ ve ngaˬ hui cawˬ ve tehꞈ na g’a ve yoˬ hehˉ. Tawˇ pa haˉ te k’o, nyi haꞈ shaˉ paˍ teˇ g’aˇ bon maˍ ve hk’a dehꞈ maˇ cheuˬ ve htawˇ, yawˇ shu awˬ laꞈ g’awˇ hpehꞈ la tuˬ maˍ piˇ ve cheuˬ ve yoˬ hehˉ. Maˇ heˆ leh Hkriꞈ yaˇ awˬ moˍ hk’aw nyi haꞈ shaˉ paˍ awˬ nu ve chaw hk’e taw, yawˇ awˬ lawn maˇ gu puiˉ ve htawˇ, yawˇ ha k’aˉ puiˉ ve, haꞈ lu diˬ ve leh awˬ viˉ awˬ nyi Liꞈ hpu hk’aw ve awˬ lawn yawˇ beˆ maˍ laˇ tuˬ ca lawˬ la htaˇ nyi ma sha ve yoˬ hehˉ. Maˇ heˆ leh yawˇ hkehˉ chaw htaꞈ haꞈ yuˬ puiˉ ve yoˬ hehˉ. (Heˍbrehˇ 13:2, 16) Ngaˬ hui puiˉ ve hpehꞈ ve htaꞈ hk’a tawˍ lehˆ mawˬ htaˇ, Hkriꞈ yaˇ awˬ moˍ hk’aw ngaˬ hui te g’a ve htaꞈ ha lehˬ ve yoˬ. Awˬ viˉ awˬ nyi puiˉ ve hpehꞈ ve ngaˬ hui htaꞈ peun daꞈ ve ngaˬ hui maˇ hkawehˉ.

18. Ngaˬ hui puiˉ ve hpehꞈ ve htaꞈ cheuˬ la tuˬ hk’aˬ hk’e te g’a ve le?

¹⁸ Hkriꞈ yaˇ awˬ moˍ hk’aw ngaˬ hui aˬ htoꞈ ma awˬ vuiˬ cawˬ ve htawˇ, ngaˬ hui teˇ g’aˇ le le puiˉ ve hpehꞈ ve htaꞈ cheuˬ la tuˬ g’a te ve yoˬ. Ngaˬ hui awˬ lawn gu g’a tuˬ Yaˬhoˉvaˬ yawˇ ve kanˉ hk’aˇ htaꞈ cuˇ leh ngaˬ hui htaꞈ hk’a dehꞈ maˍ laˇ ve yoˬ. Tawˇ pa haˉ te k’o, mvuhˇ hpeuꞈ haˉ hpawnˬ daꞈ ve, ngaˬ hui G’uiˬ sha ve kanˉ te ve cheuˬ la tuˬ maˍ laˇ ve yoˬ. Nawˬ G’uiˬ sha ve kanˉ hk’aˇ hk’aw g’a henˇ taˍ ve htaꞈ coˇ caˇ leh yuˬ yehˇ-aw laˇ?

19. G’uiˬ sha ve Mvuhˇ miˬ Hto toˇ ve chaw liꞈ henˇ yehˬ hk’aw k’ai g’a tuˬ nawˬ aˬ htoꞈ ma te g’a ve le?

¹⁹ Maˍ laˇ ve awˬ nu ve teˇ hk’aˇ lehˬ, G’uiˬ sha ve Mvuhˇ miˬ Hto toˇ ve chaw liꞈ henˇ yehˬ hk’aw yoˬ. Awˬ viˉ awˬ nyi G’uiˬ sha ve kanˉ awˬ yanˇ hk’a biˇ te ve 23 te leh 65 hk’awꞈ hk’a gaˬ ve liꞈ henˇ yehˬ chi ve hk’aw henˇ g’a ve yoˬ. Nawˬ liꞈ henˇ yehˬ chi ve hk’aw k’ai maˇ g’a tehꞈ dawˇ ve yoˬ hehˉ. Aˬ htoꞈ ma te nawˬ liꞈ henˇ yehˬ chi ve hk’aw k’ai maˇ g’a tehꞈ dawˇ ve aꞈ kehˉ, aˬ htoꞈ ma te nawˬ k’ai gaˇ ve le tehꞈ coˇ caˇ leh dawˇ nyi sheˍ. Peuˬ hk’awꞈ nawˉ, liꞈ henˇ yehˬ chi ve hk’aw k’ai g’a tuˬ nawˬ ve teˇ hk’aˇ dawˇ hk’aˇ daꞈ ve cawˬ tuˬ aˬ htoꞈ ma te g’a ve awˬ hk’aˇ gu sheˍ. Yaˬhoˉvaˬ ga laˇ tcuh leh nawˬ kanˉ te hkeuꞈ ve htaꞈ pa taw, nawˬ te maˇ g’a tehꞈ dawˇ ve htawˇ te g’a tuˬ yoˬ.

20. Roˉmaꞈ liꞈ 12:6-8 hk’aw ngaˬ hui htaꞈ aˬ htoꞈ ma maˍ laˇ ve le?

²⁰ Pawˇluꞈ tawˇ pa haˉ tehˆ maˍ laˇ ve henˇ tuˬ ve shehˆ hk’aˇ teˇ hk’aˇ htaꞈ teˇ geh nyi sheˍ. Chi Roˉmaꞈ liꞈ 12:6-8 hk’aw cawˬ ve yoˬ. (G’aw sheˍ.) Pawˇluꞈ k’awꞈ k’oˆ sheˍ ve, Hkriꞈ yaˇ awˬ moˍ hk’aw ve chaw puiˉ ve hpehꞈ ve peun daꞈ ve yoˬ. Yaꞈ hk’aˇ, chi teˇ hkui ngaˬ hui puiˉ ve hpehꞈ ve htaꞈ yehˇ leh Hkriꞈ yaˇ awˬ moˍ hk’aw co ha hpawˇ uiˍ la mvuh la tuˬ awˬ g’aˇ piˇ daꞈ ve htaꞈ Pawˇluꞈ k’oˆ ve yoˬ.

21-22. Roˍbeuˍ leh Finˬleˆ htaꞈ ngaˬ hui hk’aˬ hk’e henˇ yuˬ g’a ve le?

²¹ Awˬ viˉ awˬ nyi Roˍbeuˍ aˬ htoꞈ ma g’a hpuˇ ve htaꞈ teˇ geh dawˇ nyi sheˍ. * Yawˇ shu mvuhˇ miˬ hk’aw G’uiˬ sha ve kanˉ te peuˬ hk’awꞈ nawˉ, yawˇ paw kuiˬ mvuhˇ miˬ Beˍteˍlaˆ hk’aw G’uiˬ sha ve kanˉ te tuˬ kuˬ piˇ ve yoˬ. Yawˇ hteꞈ chiˉ maˇ g’a te yaꞈ tehꞈ awˬ viˉ awˬ nyi k’oˆ piˇ ve htawˇ, Roˍbeuˍ k’oˆ ve, “G’uiˬ sha ve kanˉ ngaˬ g’a te ve awˬ vuiˬ yaꞈ ve tehꞈ dawˇ ve pa taw, laiˉ ha pa ve awˬ yanˇ awˬ hk’aw lo ngaˬ ha lehˬ kuiˬ maˇ cawˬ. Teˇ pawˆ pawˆ ngaˬ Beˍteˍlaˆ hk’aw kanˉ maˇ te gaˇ-oˬ tehꞈ dawˇ ve yoˬ.” Yawˇ hk’aˬ hk’e te teˇ pawˆ k’awꞈ ha lehˬ kuiˬ cawˬ g’a ve le? Oˇ htaˇ ngaˬ hui te jaw ve awˬ vuiˬ chi teˇ hkui ngaˬ hui cawˬ ve awˬ vuiˬ Yaˬhoˉvaˬ awˬ pon awˬ bon cawˬ tuˬ maˍ laˇ ve tehꞈ nyi haꞈ shaˉ paˍ  teˇ g’aˇ yawˇ htaꞈ shaˍ tiꞈ piˇ ve yoˬ. Oˇ htaˇ ve awˬ ceuˬ htaꞈ maˇ dawˇ nyi leh chi teˇ hkui yawˇ te g’a ve awˬ ceuˬ htaꞈ hk’a dehꞈ g’a dawˇ nyi ve tehꞈ Roˍbeuˍ na g’a ve yoˬ.

²² Awˬ viˉ awˬ nyi Finˬleˆ Eˬpeˆko-po kaꞈ awˬ lawn hk’a shuˍ g’a hpuˇ ve yoˬ. Yawˇ leh yawˇ ve awˬ miˇ ma 1956 hk’awꞈ htaˇ, Giˆ laˆ liꞈ henˇ yehˬ lo henˇ peuˬ leh Boˬliˇviˇ-aˇ mvuhˇ miˬ lo toˇ nyi shehˍ hpaˇ te tuˬ awˬ vuiˬ g’a ve yoˬ. 1964 hk’awꞈ htaˇ, yawˇ hui yaˇ teˇ g’aˇ cawˬ ve yoˬ. Finˬleˆ k’oˆ ve, “ngaˬ hui haꞈ ve awˬ vuiˬ htaꞈ maˇ g’a te-oˬ ve haˍ jaˇ. Peuˬ hk’awꞈ nawˉ, teˇ hk’awꞈ gaˬ-oˬ kaꞈ ngaˬ awˬ g’aˇ nuˇ jaˇ sheˍ. Yaꞈ hk’aˇ, Yaˬhoˉvaˬ ga laˇ ve pa taw, ngaˬ ve dawˇ hk’aˇ k’awꞈ pa leh awˬ pa g’a hpehꞈ ve awˬ vuiˬ awˬ suhˉ htaꞈ a yeˇ yuˬ ve yoˬ.” Nawˬ Roˍbeuˍ leh Finˬleˆ hk’a shuˍ dawˇ-aw laˇ? Oˇ htaˇ hk’a shuˍ, nawˬ chi teˇ hkui G’uiˬ sha ve kanˉ te ve hk’aw daꞈ ve awˬ vuiˬ maˇ g’a ve pa taw, awˬ g’aˇ nuˇ jaw-aw laˇ? Nawˬ chi hk’e dawˇ ve k’o, nawˬ ve dawˇ hk’aˇ htaꞈ pa leh Yaˬhoˉvaˬ ve kanˉ te tuˬ chi teˇ hkui g’a ve awˬ vuiˬ htaꞈ a yeˇ hk’a dehꞈ yuˬ leh nawˬ ve awˬ viˉ awˬ nyi htaꞈ ga piˇ ve ha lehˬ g’a ve yoˬ. Awˬ nu ve chaw htaꞈ ga piˇ tuˬ nawˬ puiˉ ve hpehꞈ ve htaꞈ hk’a dehꞈ yehˇ leh G’uiˬ sha ve kanˉ te sheˍ. Nawˬ chi hk’e te ve k’o, Hkriꞈ yaˇ awˬ moˍ hk’aw co ha hpawˇ uiˍ la mvuh la tuˬ awˬ g’aˇ piˇ htaˇ ha lehˬ g’a ve yoˬ.

23. Ngaˬ hui aˬ htoꞈ ma htaꞈ dawˇ nyi cawˇ ve le? Leh g’uˇ suhˍ teˇ lawn hk’aw ngaˬ hui aˬ htoꞈ ma htaꞈ henˇ tuˬ le?

²³ Ngaˬ hui teˇ g’aˇ le le Yaˬhoˉvaˬ awˬ pon awˬ hpfuhˇ hk’aˆ jaˇ. G’uiˬ sha lehˬ ngaˬ hui yawˇ ve yehˬ k’a hk’aw ve chaw teˇ g’aˇ hpehꞈ tcuh gaˇ ve yoˬ. Ngaˬ hui ve awˬ viˉ awˬ nyi co ha hpawˇ uiˍ la mvuh la leh awˬ g’aˇ piˇ tuˬ htaꞈ hk’a dehꞈ dawˇ nyi ve k’o, Hkriꞈ yaˇ awˬ moˍ hk’aw awˬ hpfuhˇ maˇ cawˬ tehꞈ maˇ dawˇ! Yaꞈ hk’aˇ, Hkriꞈ yaˇ awˬ moˍ hk’aw ve chaw htaꞈ ngaˬ hui hk’aˬ hk’e dawˇ nyi cawˇ ve le? Yawˇ hui awˬ hpfuhˇ hk’aˆ jaˇ ve tehꞈ ngaˬ hui hk’aˬ hk’e te hpeuꞈ maw piˇ g’a tuˬ le? G’uˇ suhˍ teˇ lawn hk’aw a yeˇ uiˍ ve chi teˇ geh henˇ tuˬ yoˬ.