1. Yaˬhoˉvaˬ yawˇ ve chaw ka tiꞈ yeˬ ve teˇ g’aˇ le le htaꞈ aˬ htoꞈ ma piˇ ve le?

Yaˬhoˉvaˬ yawˇ ve chaw ka tiꞈ yeˬ ve teˇ g’aˇ le le yawˇ ve Hkriꞈ yaˇ awˬ moˍ hk’aw chehˇ tcuh ve yoˬ. Ngaˬ hui awˬ vuiˬ peun daꞈ ve htawˇ, teˇ g’aˇ le le awˬ hpfuhˇ cawˬ leh teˇ g’aˇ leh teˇ g’aˇ g’a cuˇ daꞈ ve yoˬ. A yeˇ uiˍ jaˇ ve chi ngaˬ hui na g’a tuˬ tcuh yaˇ Pawˇluꞈ hk’aˬ hk’e ga laˇ ve le?

2. Eˇfeˇsuꞈ liꞈ 4:16 hk’aw k’oˆ taˍ ve hk’e, aˬ htoꞈ ma te ngaˬ hui awˬ hpfuhˇ shiˍ leh kanˉ teˇ geh te cawˇ ve le?

² Awˬ lawn chi ve hk’aw Liꞈ hpu awˬ tawn awˬ lawn lonˉ ma k’oˆ taˍ ve lehˬ, ngaˬ hui awˬ hk’aw lo teˇ g’aˇ kaꞈ G’uiˬ sha ve kanˉ te ve awˬ nu ve chaw htaꞈ “ngaˬ nawˬ htaꞈ maˇ loˍ tehꞈ” maˇ g’a k’oˆ tuˬ, tcuh yaˇ Pawˇluꞈ hk’a tawˍ lehˆ hpeuꞈ maw laˇ ve yoˬ. (1 Kawˇrenˍhtuˆ 12:21) Ngaˬ hui Hkriꞈ yaˇ awˬ moˍ hk’aw dawˇ sha gawˬ lehˍ ve cawˬ tcuh gaˇ ve k’o, teˇ g’aˇ leh teˇ g’aˇ awˬ hpfuhˇ g’a shiˍ daꞈ leh kanˉ teˇ geh g’a te ve yoˬ. (Eˇfeˇsuꞈ 4:16 g’aw sheˍ.) Ngaˬ hui teˇ moˍ tiˉ te leh kanˉ teˇ geh te htaˇ, Hkriꞈ yaˇ awˬ moˍ hk’aw kaꞈ uiˍ la mvuh la ve yoˬ.

3. Awˬ lawn chi ve hk’aw ngaˬ hui aˬ htoꞈ ma htaꞈ henˇ tuˬ le?

³ Hkriꞈ yaˇ awˬ moˍ hk’aw ve chaw htaꞈ yawˆ yan tuˬ aˬ htoꞈ ma awˬ hk’aˇ cawˬ ve le? Nyi haꞈ shaˉ paˍ awˬ nu ve nyi haꞈ shaˉ paˍ htaꞈ hk’aˬ hk’e te yawˆ yan piˇ g’a tuˬ le? Awˬ viˉ awˬ nyi awˬ hpawˇ awˬ miˇ ma maˇ heuˆ ve chaw htaꞈ hk’aˬ hk’e te yawˆ yan piˇ g’a tuˬ le? Leh awˬ viˉ awˬ nyi ngaˬ hui ve chaw ceuˬ tawˇ hkawˇ hk’a dehꞈ maˇ yaw g’a ve chaw htaꞈ kaꞈ hk’aˬ hk’e te yawˆ yan piˇ tuˬ awˬ lawn chi ve hk’aw teˇ geh henˇ tuˬ yoˬ.

4. Roˉmaꞈ liꞈ 12:10 hk’aw Pawˇluꞈ beˆ maˍ laˇ ve htaꞈ nyi haꞈ shaˉ paˍ g’aꞈ te cawˇ ve aˬ htoꞈ ma cawˬ ve le?

⁴ Hkriꞈ yaˇ awˬ moˍ hk’aw nyi haꞈ shaˉ paˍ teˇ g’aˇ le le Yaˬhoˉvaˬ ve awˬ ha hpu leuˆ yuˬ taˍ ve yoˬ. Yaꞈ hk’aˇ, teˇ g’aˇ leh teˇ g’aˇ puiˉ ve hpehꞈ  ve maˇ shuˍ daꞈ. (1 Kawˇrenˍhtuˆ 12:17, 18) Teˇ hpaˍ k’o nyi haꞈ shaˉ paˍ te tuˬ leuˆ yuˬ gehˇ sheˍ ve pa taw, awˬ nu ve nyi haꞈ shaˉ paˍ hk’e taw awˬ hk’aˇ hk’a dehꞈ maˇ shiˍ. Teˇ hpaˍ k’o a shaꞈ maˇ leh hk’a dehꞈ maˇ chehˇ sha ve pa taw, awˬ nu ve chaw hk’e hk’a dehꞈ te maˇ g’a. Hk’aˬ hk’e hpehꞈ ve htawˇ nyi haꞈ shaˉ paˍ awˬ nu ve nyi haꞈ shaˉ paˍ htaꞈ “ngaˬ nawˬ htaꞈ maˇ loˍ tehꞈ” k’oˆ maˇ hpehꞈ. Chi hk’e te ve aꞈ kehˉ nyi haꞈ shaˉ paˍ teˇ g’aˇ le le Roˉmaꞈ liꞈ 12:10 hk’aw Pawˇluꞈ beˆ maˍ laˇ ve htaꞈ g’aꞈ te cawˇ ve yoˬ.—Roˉmaꞈ 12:10 g’aw sheˍ.

5. Nyi haꞈ shaˉ paˍ, awˬ nu ve nyi haꞈ shaˉ paˍ htaꞈ yawˆ yan piˇ ve tehꞈ hk’aˬ hk’e te hpeuꞈ maw laˇ ve le? Leh yawˇ hui chi hk’e te tuˬ aˬ htoꞈ ma te a yeˇ uiˍ jaˇ ve le?

⁵ Nyi haꞈ shaˉ paˍ, awˬ nu ve nyi haꞈ shaˉ paˍ htaꞈ yawˆ yan piˇ ve tehꞈ hpeuꞈ maw piˇ g’a tuˬ yawˇ hui k’oˆ ve htaꞈ hk’a dehꞈ g’a na taˍ ve yoˬ. Nyi haꞈ shaˉ paˍ a yeˇ uiˍ ve awˬ lawn jehˬ daꞈ htaˇ chi a yeˇ uiˍ jaˇ. Shaw nyi kuiˬ Taꞈ yehˬ Ha pa 10 maˬ 1 nyi 1988 hk’awꞈ hk’aw k’oˆ taˍ ve, “Yeˍsuˆ daꞈ kehˬ ve awˬ ha hpu htaꞈ cuˇ leh nyi haꞈ shaˉ paˍ hk’aˬ ve teˇ g’aˇ htaꞈ beˆ maˍ piˇ kaꞈ g’a ve tehꞈ nyi haꞈ shaˉ paˍ teˇ g’aˇ le le g’a haꞈ yuˬ ve yoˬ. Yawˇ hui shoꞈ shaꞈ ve awˬ lawn gu leh a yeˇ uiˍ ve htaꞈ dawˇ cheˆ g’a tuˬ nyi haꞈ shaˉ paˍ hk’aˬ ve teˇ g’aˇ Liꞈ hpu hk’aw ve awˬ liˇ awˬ hk’aˇ htaꞈ cuˇ leh beˆ maˍ piˇ g’a tuˬ yoˬ. (Tcuh yaˇ 15:6-15) Daꞈ kehˬ ve awˬ ha hpu Hkriꞈ yaˇ awˬ moˍ hk’aw nyi haꞈ shaˉ paˍ teˇ g’aˇ le le htaꞈ ga piˇ ve yoˬ.”

6. Nyi haꞈ shaˉ paˍ cawˇ daꞈ hawˍ daꞈ ve hk’aw kanˉ teˇ geh te g’a tuˬ aˬ htoꞈ ma ga piˇ ve le? Yawˇ hui chi hk’e te htaˇ Hkriꞈ yaˇ awˬ moˍ hk’aw ve chaw awˬ bon hk’aˬ hk’e g’a ve le?

⁶ Nyi haꞈ shaˉ paˍ awˬ moˍ hpawnˬ daꞈ htaˇ teˇ g’aˇ lehˬ, awˬ nu ve nyi haꞈ shaˉ paˍ htaꞈ yawˆ yan piˇ ve k’o, yawˇ teˇ pawˆ le le awˉ lawˉ tawˇ maˇ yaw leh yawˇ ve dawˇ hk’aˇ hk’aˬ htaˆ kaꞈ cawˇ ve tehꞈ maˇ dawˇ. Yawˇ dawˇ ve awˬ ceuˬ nyi ma nuˇ nehˬ ve hk’aw k’oˆ piˇ ve yoˬ. Shu ve dawˇ hk’aˇ k’oˆ ve htaꞈ kaꞈ hk’a dehꞈ g’a na taˍ ve yoˬ. Chi aꞈ kehˉ a yeˇ uiˍ jaˇ ve lehˬ Liꞈ hpu hk’aw beˆ maˍ laˇ ve htaꞈ g’a chaˬ nyi leh “ka tiꞈ yeˬ leh cuˇ yiˍ cawˬ ve awˬ ceˬ” beˆ maˍ laˇ ve htaꞈ g’a g’aꞈ te ve yoˬ. (Maꞈhtehˍ 24:45-47) Awˬ lawn teˇ hpaˍ jehˬ daꞈ htaˇ, nyi haꞈ shaˉ paˍ teˇ g’aˇ leh teˇ g’aˇ haꞈ daꞈ leh yawˆ yan daꞈ ve k’o, Hkriꞈ yaˇ awˬ moˍ hk’aw uiˍ la mvuh la tuˬ ve awˬ lawn teˇ hpaˍ htaꞈ dawˇ cheˆ g’a tuˬ G’uiˬ sha ve daꞈ kehˬ ve awˬ ha hpu yawˇ hui geh chehˇ leh yawˇ hui htaꞈ beˆ maˍ piˇ ve yoˬ.—Yaˍkoˆ 3:17, 18.

7. Awˬ hpawˇ awˬ miˇ ma maˇ heuˆ ve chaw htaꞈ Yeˍsuˆ hk’aˬ hk’e dawˇ ve le?

⁷ Chi beuꞈ teˇ co-e Hkriꞈ yaˇ awˬ moˍ hk’aw awˬ viˉ awˬ nyi heuˆ daꞈ-oˬ ve chaw laiˉ g’aˇ cawˬ leh teˇ hpaˍ hpaˍ k’o yaˇ cawˬ ve yoˬ. Yaꞈ hk’aˇ, awˬ viˉ awˬ nyi hpawˇ awˬ miˇ ma maˇ heuˆ ve chaw kaꞈ laiˉ g’aˇ cawˬ ve yoˬ. Awˬ viˉ awˬ nyi chi teˇ hpaˍ htaꞈ ngaˬ hui hk’aˬ hk’e dawˇ nyi cawˇ ve le? Yeˍsuˆ yawˇ hui htaꞈ dawˇ ve hk’e ngaˬ hui henˇ yuˬ cawˇ ve yoˬ. Yeˍsuˆ miˬ guiˬ hk’oˆ chehˇ leh G’uiˬ sha ve kanˉ te htaˇ yawˇ awˬ miˇ ma maˇ heuˆ leh G’uiˬ sha ve kanˉ hk’a dehꞈ te g’a ve yoˬ. Yeˍsuˆ Hkriꞈ yaˇ awˬ hpawˇ awˬ miˇ ma g’a heuˆ ve maˇ heˆ leh maˇ heuˆ tuˬ kaꞈ maˇ g’a k’oˆ maˍ piˇ jaw. Yaꞈ hk’aˇ, Hkriꞈ yaˇ teˇ hpaˍ hpaˍ awˬ hpawˇ awˬ miˇ ma maˇ heuˆ tuˬ leuˆ yuˬ ve yoˬ tehꞈ yawˇ k’oˆ ve yoˬ. (Maꞈhtehˍ 19:11, 12) Awˬ hpawˇ awˬ miˇ ma maˇ heuˆ ve chaw htaꞈ Yeˍsuˆ yawˆ yan ve yoˬ. Maˇ heuˆ ve chaw aꞈ kehˉ heuˆ daꞈ-oˬ ve chaw daꞈ ve tehꞈ yawˇ maˇ dawˇ. Chi hk’oˆ kaꞈ, maˇ heuˆ ve chaw a shaꞈ teꞈ chehˇ kuiˬ hk’aw teˇ ceuˬ ceuˬ maˇ lawꞈ ve hk’e hpehꞈ ve tehꞈ Yeˍsuˆ maˇ dawˇ.

8. 1 Kawˇrenˍhtuˆ liꞈ 7:7-9 hk’aw k’oˆ taˍ ve hk’e, Hkriꞈ yaˇ aˬ htoꞈ ma ve awˬ lawn htaꞈ hk’a dehꞈ dawˇ nyi tuˬ Pawˇluꞈ shaˍ tiꞈ piˇ ve le?

⁸ Yeˍsuˆ hk’a shuˍ tcuh yaˇ Pawˇluꞈ kaꞈ awˬ miˇ ma maˇ cawˬ leh G’uiˬ sha ve kanˉ te ve yoˬ. Hkriꞈ yaˇ teˇ g’aˇ heuˆ daꞈ ve yaꞈ ve tehꞈ Pawˇluꞈ maˇ maˍ piˇ jaw. Chi a shu yawˇ ve awˬ lawn hpehꞈ ve tehꞈ yawˇ shiˍ ve yoˬ. Awˬ hpawˇ awˬ miˇ ma maˇ heuˆ leh Yaˬhoˉvaˬ ve kanˉ hk’a dehꞈ te g’a-aw laˇ tehꞈ Hkriꞈ yaˇ hk’a dehꞈ dawˇ nyi tuˬ Pawˇluꞈ awˬ g’aˇ piˇ ve yoˬ. (1 Kawˇrenˍhtuˆ 7:7-9 g’aw sheˍ.) Pawˇluꞈ awˬ hpawˇ awˬ miˇ ma maˇ heuˆ ve chaw htaꞈ maˇ g’a nyi cha ve tehꞈ hpeuꞈ maw laˇ ve yoˬ. Yaˬhoˉvaˬ ve kanˉ a yeˇ uiˍ jaˇ ve htaꞈ te tuˬ yawˇ yaˇ nehˬ Tiˆmoˉseˍ awˬ miˇ ma maˇ heuˆ ve htaꞈ leuˆ yuˬ ve yoˬ. * (Hpiˇliˇpiˆ 2:19-22) Awˬ viˉ awˬ nyi hawˉ hk’aˆ teˇ g’aˇ awˬ vuiˬ g’a te tuˬ ve awˬ miˇ ma heuˆ-oˬ ve leh maˇ heuˆ ve chaw htaꞈ cawˬ ve maˇ heˆ tehꞈ ngaˬ hui maˇ dawˇ ve hk’a tawˍ lehˆ g’a mawˬ ve yoˬ.—1 Kawˇrenˍhtuˆ 7:32-35, 38.

9. Awˬ hpawˇ awˬ miˇ ma heuˆ ve leh maˇ heuˆ ve chaw awˬ lawn ngaˬ hui hk’aˬ hk’e dawˇ nyi cawˇ ve le?

⁹ Hkriꞈ yaˇ awˬ hpawˇ awˬ miˇ ma g’a heuˆ cawˇ ve maˇ heˆ leh maˇ heuˆ cawˇ ve Yeˍsuˆ leh Pawˇluꞈ kaꞈ maˇ g’a maˍ. Chi htaꞈ pa taw awˬ hpawˇ awˬ miˇ ma heuˆ ve leh maˇ heuˆ ve chaw htaꞈ ngaˬ hui hk’aˬ hk’e dawˇ nyi cawˇ ve le? Shaw nyi kuiˬ Taꞈ yehˬ Ha pa 10 maˬ 1 nyi 2012 hk’awꞈ awˬ lawn chi ve htaꞈ hk’a tawˍ lehˆ k’oˆ maˍ laˇ taˍ ve yoˬ. Oˇ kaˬ lo k’oˆ ve, “awˬ hpawˇ awˬ miˇ ma maˇ heuˆ ve chaw leh heuˆ-oˬ ve chaw G’uiˬ sha peꞈ laˇ ve laꞈ shawnˍ hk’e hpehꞈ ve yoˬ. . . . Awˬ hpawˇ awˬ miˇ ma maˇ heuˆ ve chaw  yaꞈ tawˍ ve leh nyi ma luˬ ve tehꞈ Yaˬhoˉvaˬ maˇ dawˇ.” Chi htaꞈ pa taw, Hkriꞈ yaˇ awˬ moˍ hk’aw awˬ hpawˇ awˬ miˇ ma maˇ heuˆ ve chaw htaꞈ ngaˬ hui g’a yawˆ yan piˇ ve yoˬ.

10. Awˬ viˉ awˬ nyi awˬ hpawˇ awˬ miˇ ma maˇ heuˆ ve chaw htaꞈ ngaˬ hui yawˆ yan ve k’o, aˬ htoꞈ ma maˇ te cawˇ ve le?

¹⁰ Awˬ viˉ awˬ nyi awˬ hpawˇ awˬ miˇ ma maˇ heuˆ ve chaw dawˇ hk’aˇ htaꞈ ngaˬ hui hk’aˬ hk’e yawˆ yan piˇ cawˇ ve le? Awˬ viˉ awˬ nyi teˇ hpaˍ hpaˍ k’o awˬ hpawˇ awˬ miˇ ma maˇ heuˆ tuˬ dawˇ ve tehꞈ ngaˬ hui tawnˇ taˍ cawˇ ve yoˬ. Leh awˬ viˉ awˬ nyi teˇ hpaˍ k’o, heuˆ gaˇ ve htawˇ keunˍ daꞈ ve awˬ ca ca maˇ mawˬ sheˍ. Leh awˬ viˉ awˬ nyi teˇ hpaˍ k’o, yawˇ hui ve awˬ ca suh-e ve yoˬ. Hk’aˬ hk’e hpehꞈ ve htawˇ, Hkriꞈ yaˇ awˬ moˍ hk’aw ve chaw awˬ viˉ awˬ nyi awˬ hpawˇ awˬ miˇ ma maˇ heuˆ ve chaw htaꞈ aˬ htoꞈ ma te nawˬ maˇ heuˆ ve le, ga laˇ tuˬ loˍ ve laˇ tehꞈ maˇ na piˇ cawˇ. Awˬ tehˬ yoˬ, maˇ heuˆ sheˍ ve teˇ hpaˍ hpaˍ k’o chi hk’e ga laˇ tuˬ lawˬ ve yoˬ. Yaꞈ hk’aˇ, yawˇ hui ga laˇ tuˬ maˇ lawˬ ve htawˇ, ngaˬ hui ga laˇ-a mehˍ k’oˆ piˇ ve k’o, yawˇ hui hk’aˬ hk’e dawˇ tuˬ ve htaꞈ dawˇ nyi sheˍ. (1 Hteˇsaˍlawˇniˆ 4:11; 1 Tiˆmoˉseˍ 5:13) Awˬ viˉ awˬ nyi ka tiꞈ yeˬ leh maˇ heuˆ ve chaw teˇ hpaˍ hpaˍ k’oˆ ve htaꞈ teˇ geh nyi sheˍ.

11-12. Awˬ viˉ awˬ nyi awˬ hpawˇ awˬ miˇ ma maˇ heuˆ ve chaw htaꞈ awˬ g’aˇ nuˇ tuˬ ngaˬ hui hk’aˬ hk’e te piˇ la g’a ve le?

¹¹ Awˬ viˉ awˬ nyi toˇ nyi shehˍ hpaˇ teˇ g’aˇ awˬ miˇ ma maˇ heuˆ leh maˇ heuˆ ve lehˬ daꞈ jaˇ tehꞈ yawˇ k’oˆ ve yoˬ. Awˬ viˉ awˬ nyi “nawˬ aˬ htoꞈ ma te awˬ miˇ ma maˇ heuˆ ve le” na piˇ htaˇ yawˇ nyi ma maˇ sha ve yoˬ. Awˬ viˉ awˬ nyi awˬ miˇ ma maˇ heuˆ ve awˬ tcuhˆ puiˍ lo kanˉ te chehˇ ve teˇ g’aˇ k’oˆ ve, “awˬ ca cawˬ ve chaw awˬ ca maˇ cawˬ ve chaw htaꞈ ha k’aˉ ve tehꞈ ngaˬ chaˬ nyi mawˬ ve yoˬ. Awˬ hpawˇ awˬ miˇ ma maˇ heuˆ ve chaw lehˬ laꞈ shawnˍ hk’e hpehꞈ cawˇ ve htawˇ, nyi-a k’o awˬ vuiˬ hk’e hpehꞈ ve yoˬ.”

¹² Beˍteˍlaˆ hk’aw chehˇ ve awˬ viˉ awˬ nyi yaˇ miˇ awˬ hpawˇ maˇ heuˆ ve k’oˆ ve, “awˬ viˉ awˬ nyi awˬ hpawˇ awˬ miˇ ma maˇ heuˆ ve chaw teˇ g’aˇ le le lehˬ awˬ ca g’a tuˬ htaꞈ ca ve leh teˇ geh hti caˇ hti dawˬ htaˇ awˬ ca g’a tuˬ yoˬ tehꞈ awˬ viˉ awˬ nyi teˇ hpaˍ dawˇ ve yoˬ. Teˇ pawˆ htaˇ Beˍteˍlaˆ htaꞈ caˉ daꞈ ve kanˉ awˬ nu ve teˇ kaˬ lo ca te ve yoˬ. Ngaˬ oˇ kaˬ lo mvuhˇ hpeuꞈ la htaˇ gaˬ-e ve pa taw, mvuhˇ hpeuꞈ haˉ hpawnˬ daꞈ ve awˬ nyi htaꞈ cawˇ daꞈ ve yoˬ. Ngaˬ haˉ-e tuˬ ve awˬ viˉ awˬ nyi yaˇ miˇ yawˇ k’oˆ ve, a shaꞈ nawˬ hk’e taw ve hpawnˬ daꞈ kuiˬ hk’aw awˬ viˉ awˬ nyi hawˉ hk’aˆ nyiˇ g’aˇ cawˬ ve yoˬ. Ngaˬ nawˬ htaꞈ awˬ ca ca laˇ tuˬ k’oˆ laˇ ve maˇ heˆ mehˍ. Ngaˬ hpawnˬ daꞈ kuiˬ hk’aw loꞈ-e htaˇ awˬ viˉ awˬ nyi hawˉ hk’aˆ oˇ ve nyiˇ g’aˇ htaꞈ mawˬ daꞈ tuˬ shiˍ k’ai laˇ ve yoˬ. Awˬ tehˬ yoˬ, awˬ yanˇ oˇ ve teˇ yanˇ ngaˬ leh awˬ viˉ awˬ nyi oˇ ve nyiˇ g’aˇ awˬ pon aˇ naˍ leh yaꞈ tawˍ ve yoˬ.”

13. Awˬ viˉ awˬ nyi yaˇ miˇ haˉ teˇ g’aˇ, a shu ve awˬ lawn yawˇ htaꞈ awˬ g’aˇ piˇ ve le?

¹³ Beˍteˍlaˆ hk’aw kanˉ te chehˇ ve awˬ hpawˇ maˇ heuˆ ve yaˇ miˇ teˇ g’aˇ k’oˆ ve, “awˬ viˉ awˬ nyi yaˇ miˇ haˉ G’uiˬ sha ve kanˉ awˬ yanˇ hk’a biˇ te chehˇ ve ngaˬ aꞈ kehˉ a shaꞈ maˇ ve htaꞈ ngaˬ shiˍ daꞈ leh keunˍ daꞈ cawˇ daꞈ ve dawˇ hk’aˇ cawˬ ve, hk’a dehꞈ dawˇ teh taˍ ve cawˬ ve, shu htaꞈ ga piˇ puiˉ ve, leh ha lehˬ puiˉ ve yoˬ. Yawˇ hui Hkriꞈ yaˇ awˬ moˍ hk’aw ga piˇ g’a jaˇ. Yawˇ hui awˬ hpawˇ awˬ miˇ ma maˇ heuˆ ve hpawˇ daꞈ ve dawˇ hk’aˇ cawˬ ve yoˬ. Yawˇ hui awˬ hpawˇ maˇ heuˆ ve pa taw shu aꞈ kehˉ daꞈ ve tehꞈ maˇ dawˇ leh awˬ hpawˇ maˇ cawˬ ve leh yaˇ maˇ cawˬ ve pa taw ha lehˬ ve maˇ cawˬ g’a tehꞈ maˇ dawˇ.” Hkriꞈ yaˇ awˬ moˍ hk’aw chehˇ ve teˇ g’aˇ le le yawˆ yan ve leh teˇ g’aˇ leh teˇ g’aˇ awˬ hpfuhˇ shiˍ ve chi ngaˬ ha lehˬ tuˬ te laˇ ve yoˬ. Awˬ viˉ awˬ nyi nawˬ htaꞈ maˇ ha k’aˉ laˇ, maˇ hkawehˉ ve, maˇ nyi cha leh nawˬ yawˇ hui aꞈ kehˉ daꞈ ve tehꞈ maˇ dawˇ. Yawˇ hui nawˬ htaꞈ haꞈ ve tehꞈ nawˬ shiˍ ve yoˬ.

14. Awˬ viˉ awˬ nyi awˬ hpawˇ awˬ miˇ ma maˇ heuˆ ve chaw htaꞈ ngaˬ hui yawˆ yan ve tehꞈ hk’aˬ hk’e hpeuꞈ maw piˇ g’a ve le?

¹⁴ Yawˇ hui ve te hk’aˇ dawˇ hk’aˇ daꞈ ve ngaˬ hui yawˇ hui htaꞈ awˬ hpfuhˇ shiˍ htaˇ, yawˇ hui awˬ hpawˇ awˬ miˇ ma maˇ heuˆ leh ngaˬ hui ha k’aˉ ve tehꞈ maˇ dawˇ ve pa taw, awˬ viˉ awˬ nyi awˬ hpawˇ awˬ miˇ ma maˇ heuˆ ve chaw awˬ bon uiˍ jaˇ tehꞈ dawˇ ve yoˬ. Yawˇ hui htaꞈ ha k’aˉ ve aꞈ kehˉ yawˇ hui ka tiꞈ yeˬ ve pa taw ngaˬ hui awˬ hpfuhˇ shiˍ cawˇ ve yoˬ. Hk’e te leh, awˬ viˉ awˬ nyi awˬ hpawˇ awˬ miˇ ma maˇ heuˆ ve lehˬ, ngaˬ hui yawˇ hui htaꞈ “ngaˬ nawˬ htaꞈ maˇ loˍ tehꞈ” k’oˆ ve htaꞈ yawˇ hui maˇ  dawˇ. (1 Kawˇrenˍhtuˆ 12:21) Chi hk’e hpehꞈ cawˇ ve kaꞈ ngaˬ hui yawˇ hui htaꞈ yawˆ yan ve leh yawˇ hui Hkriꞈ yaˇ awˬ moˍ hk’aw chehˇ ve ha lehˬ ve tehꞈ shiˍ ve yoˬ.

15. Awˬ viˉ awˬ nyi teˇ hpaˍ hpaˍ yawˇ hui G’uiˬ sha ve kanˉ hk’a dehꞈ te g’a tuˬ aˬ htoꞈ ma yuˬ tanˇ ve le?

¹⁵ Peuˬ laˬ ve hk’aˬ nyiˇ hk’awꞈ maˇ gaˬ sheˍ htaˇ, G’uiˬ sha ve kanˉ hk’a dehꞈ te g’a tuˬ hto toˇ ve chaw, chaw ceuˬ tawˇ hkawˇ awˬ suhˉ henˇ tuˬ dawˇ cheˆ ve yoˬ. Yawˇ hui chi hk’e te g’a tuˬ a shaꞈ teꞈ kuiˬ hk’aw laiˉ ceuˬ g’a pa ve yoˬ. Awˬ viˉ awˬ nyi chi ve teˇ hpaˍ yawˇ hui ve chaw ceuˬ tawˇ hkawˇ Hkriꞈ yaˇ awˬ moˍ hk’aw tawˆ la leh awˬ nu ve chaw ceuˬ tawˇ hkawˇ hto toˇ ve loˍ jaˇ kuiˬ ca chehˇ-e ve yoˬ. (Tcuh yaˇ 16:9) G’uiˬ sha ve mvuhˇ miˬ daꞈ ve awˬ lawn sha tanˇ hto toˇ ve ga g’a tuˬ yawˇ hui chi hk’e te ve yoˬ. Shu ve chaw ceuˬ tawˇ hkawˇ yaw g’a tuˬ awˬ yanˇ laiˉ hk’awꞈ g’a yehˇ ve htawˇ, awˬ viˉ awˬ nyi chi ve teˇ hpaˍ Hkriꞈ yaˇ awˬ moˍ hk’aw laiˉ ceuˬ ga g’a ve yoˬ. Yawˇ hui ve te hk’aˇ dawˇ hk’aˇ daꞈ ve leh hpehꞈ laˬ jaw ve awˬ lawn Hkriꞈ yaˇ awˬ moˍ hk’aw uiˍ la mvuh la tuˬ ga piˇ ve yoˬ. Awˬ viˉ awˬ nyi chi ve teˇ hpaˍ awˬ yanˇ yuˬ tanˇ ve ngaˬ hui awˬ hpfuhˇ shiˍ jaˇ!

16. Awˬ viˉ awˬ nyi hawˉ hk’aˆ ga piˇ shehˍ hpaˇ leh nyi haꞈ shaˉ paˍ te tuˬ nyi haꞈ shaˉ paˍ aˬ htoꞈ ma htaꞈ cuˇ cawˇ ve le?

¹⁶ Hkriꞈ yaˇ awˬ moˍ hk’aw chaw ceuˬ tawˇ hkawˇ hk’a dehꞈ maˇ yaw g’a ve pa taw, awˬ viˉ awˬ nyi teˇ g’aˇ ga piˇ shehˍ hpaˇ leh nyi haꞈ shaˉ paˍ maˇ te keunˍ tehꞈ nyi haꞈ shaˉ paˍ maˇ dawˇ cheˆ cawˇ. Yawˇ hui lehˬ, Liꞈ hpu hk’aw ve awˬ liˇ awˬ hk’aˇ htaꞈ cuˇ leh ga piˇ shehˍ hpaˇ leh nyi haꞈ shaˉ paˍ hk’aˬ hk’e g’a hpehꞈ cawˇ ve tehꞈ g’a chaˬ nyi ve yoˬ. Yawˇ Hkriꞈ yaˇ awˬ moˍ hk’aw chaw ceuˬ tawˇ hkawˇ hk’aˬ hk’e taw yaw g’a ve htaꞈ maˇ caˉ daꞈ.—1 Tiˆmoˉseˍ 3:1-10, 12, 13; Tiˇtuˆ 1:5-9.

17. Shu mvuhˇ miˬ lo chehˇ-e htaˇ awˬ pa awˬ e aˬ htoꞈ ma htaꞈ g’a dawˇ cheˆ cawˇ ve le?

¹⁷ Mvuhˇ miˬ lo kanˉ g’a te tuˬ Hkriꞈ yaˇ ve yehˬ k’a teˇ hpaˍ hpaˍ shoꞈ shaꞈ jaˇ ve htaꞈ pa taw, shu ve mvuhˇ miˬ lo hpaw-e ve yoˬ. Chi hk’e hpehꞈ ve htawˇ yawˇ hui ve yaˇ teˇ hpaˍ yawˇ hui ca chehˇ-e kuiˬ lo ve mvuhˇ miˬ ve liꞈ henˇ yehˬ hk’aw chaw ceuˬ tawˇ hkawˇ awˬ suhˉ g’a henˇ ve yoˬ. Awˬ pa awˬ e kaꞈ kanˉ g’a te tuˬ oˇ kaˬ lo ve chaw ceuˬ tawˇ hkawˇ g’a henˇ ve yoˬ. Leh Hkriꞈ yaˇ awˬ moˍ hk’aw awˬ e ve chaw ceuˬ tawˇ hkawˇ cawˬ ve k’o, yawˇ hui hk’aˬ hk’e te tuˬ le? Yawˇ ve yehˬ k’a Hkriꞈ yaˇ awˬ moˍ hk’aˬ ve teˇ kaˬ lo hpawnˬ daꞈ-e tuˬ le? Yawˇ oˇ kaˬ lo ve Hkriꞈ yaˇ awˬ moˍ chaw ceuˬ tawˇ hkawˇ maˇ heˆ leh nawˬ e ve chaw ceuˬ tawˇ hkawˇ Hkriꞈ yaˇ awˬ moˍ hk’aw hpawnˬ daꞈ-e tuˬ laˇ?

18. Gaˍlaˍtiˆ liꞈ 6:5 hk’aw k’oˆ taˍ ve hk’e, yehˬ shehˍ hpaˇ dawˇ cheˆ ve htaꞈ ngaˬ hui haꞈ yuˬ ve tehꞈ hk’aˬ hk’e te hpeuꞈ maw piˇ g’a tuˬ le?

¹⁸ Yehˬ shehˍ hpaˇ lehˬ yawˇ ve yehˬ k’a Hkriꞈ yaˇ awˬ moˍ hk’aˬ ve teˇ kaˬ hpawnˬ daꞈ-e tuˬ leh yawˇ ve yehˬ k’a awˬ pon hk’aˬ ve teˇ kaˬ daꞈ jaˇ ve g’a dawˇ cheˆ ve yoˬ. Chi a shu yawˇ hk’aˇ yawˇ g’a dawˇ cheˆ ve pa taw, yehˬ shehˍ hpaˇ dawˇ cheˆ ve htaꞈ ngaˬ hui g’a yawˆ yan ve yoˬ. (Gaˍlaˍtiˆ 6:5 g’aw sheˍ.) Yawˇ hk’aˬ hk’e dawˇ cheˆ ve htawˇ, yawˇ dawˇ cheˆ ve htaꞈ ngaˬ hui g’a haꞈ yuˬ leh yawˇ ve yehˬ k’a htaꞈ g’a haꞈ yuˬ piˇ leh yawˇ hui htaꞈ haꞈ ve tehꞈ g’a hpeuꞈ maw piˇ ve yoˬ.—Roˉmaꞈ 15:7.

19. Yehˬ shehˍ hpaˇ aˬ htoꞈ ma htaꞈ hk’a dehꞈ dawˇ nyi leh bon lawˬ cawˇ ve le?

 ¹⁹ Yehˬ k’a teˇ hpaˍ hpaˍ k’o, yawˇ ve awˬ pa awˬ e ve chaw ceuˬ tawˇ hkawˇ Hkriꞈ yaˇ awˬ moˍ hk’aw G’uiˬ sha ve kanˉ te chehˇ ve htawˇ, yaˇ chaw ceuˬ tawˇ hkawˇ oˇ ve hk’a dehˬ maˇ na g’a ve yoˬ hehˉ. Hkriꞈ yaˇ awˬ moˍ oˇ ve lehˬ, mvuhˇ miˬ ve chaw ceuˬ tawˇ hkawˇ yaw ve hto toˇ kuiˬ cawˬ ve k’o, yaˇ teˇ hpaˍ awˬ pa awˬ e ve chaw ceuˬ tawˇ hkawˇ oˇ ve htaꞈ hk’a dehˬ maˇ na g’a ve yoˬ hehˉ. Aˬ htoꞈ ma pa taw le? Yaˇ oˇ kaˬ lo ve mvuhˇ miˬ ve chaw ceuˬ tawˇ hkawˇ liꞈ henˇ ve, yawˇ ve awˬ pa awˬ e ve chaw ceuˬ tawˇ hkawˇ liꞈ henˇ ve maˇ heˆ. Chi hk’e hpehꞈ htaˇ, yehˬ shehˍ hpaˇ hk’a dehꞈ g’a dawˇ cheˆ leh yawˇ hui ve yaˇ Yaˬhoˉvaˬ leh Hkriꞈ yaˇ awˬ moˍ hk’aw meuˆ daꞈ tuˬ cuˇ yiˍ g’a tuˬ bon g’a lawˬ ve yoˬ. Awˬ pa awˬ e yaˇ htaꞈ yawˇ hui ve chaw ceuˬ tawˇ hkawˇ yaw g’a tuˬ hk’a dehꞈ g’a maˍ piˇ ve maˇ heˆ leh yaˇ chaw ceuˬ tawˇ hkawˇ hk’a dehꞈ yaw g’a ve Hkriꞈ yaˇ awˬ moˍ hk’aw ca chehˇ-e cawˇ ve yoˬ. Yehˬ shehˍ hpaˇ hk’aˬ hk’e dawˇ cheˆ ve htawˇ maˇ k’oˆ, yawˇ chehˇ ve Hkriꞈ yaˇ awˬ moˍ awˬ viˉ awˬ nyi yawˇ leh yawˇ ve yehˬ k’a htaꞈ yawˆ yan leh awˬ hpfuhˇ shiˍ ve tehꞈ te piˇ cawˇ ve yoˬ.

20. Awˬ viˉ awˬ nyi chaw ceuˬ tawˇ hkawˇ awˬ suhˉ henˇ chehˇ ve htaꞈ ngaˬ hui yawˆ yan ve tehꞈ hk’aˬ hk’e te hpeuꞈ maw piˇ g’a tuˬ le?

²⁰ Ngaˬ hui g’a chaˬ nyi ve awˬ hk’aˇ teˇ hpaˍ lehˬ, Hkriꞈ yaˇ awˬ moˍ laiˉ kaˬ lo chaw ceuˬ tawˇ hkawˇ awˬ suhˉ henˇ tuˬ awˬ viˉ awˬ nyi laiˉ g’aˇ coˇ caˇ leh te chehˇ ve cawˬ maˇ jaˇ ve tehꞈ hpeuꞈ maw laˇ ve yoˬ. Yawˇ hui dawˇ ve awˬ ceuˬ k’oˆ tuˬ haˍ ve yoˬ hehˉ. Hk’aˬ hk’e hpehꞈ ve htawˇ, yawˇ chaw ceuˬ tawˇ hkawˇ awˬ suhˉ henˇ ve cheuˬ-aˬ laˇ ceh ngaˬ hui maˇ dawˇ nyi cawˇ. Yawˇ Yaˬhoˉvaˬ htaꞈ haꞈ ve leh yawˇ ve kanˉ te ve htaꞈ ngaˬ hui nyi cawˇ ve yoˬ. Te hk’aˇ dawˇ hk’aˇ daꞈ jaˇ ve chi htaꞈ ngaˬ hui nyi ve k’o, awˬ viˉ awˬ nyi chi ve teˇ hpaˍ htaꞈ awˬ hpfuhˇ shiˍ leh yawˆ yan tuˬ yoˬ. Yawˇ chaw ceuˬ tawˇ hkawˇ hk’a dehꞈ maˇ yaw puiˉ ve pa taw, “ngaˬ nawˬ htaꞈ maˇ loˍ tehꞈ” ngaˬ hui maˇ k’oˆ.

21-22. Aˬ htoꞈ ma pa taw ngaˬ hui Yaˬhoˉvaˬ htaꞈ awˬ bon uiˍ jaˇ k’oˆ piˇ cawˇ ve le?

²¹ Yaˬhoˉvaˬ lehˬ ngaˬ hui yawˇ ve Hkriꞈ yaˇ awˬ moˍ hk’aw teˇ g’aˇ leh teˇ g’aˇ htaꞈ awˬ hpfuhˇ hk’aˆ jaˇ ve kanˉ te tcuh laˇ ve pa taw, awˬ bon uiˍ jaˇ k’oˆ piˇ gaˇ ve yoˬ. Hawˉ hk’aˆ leh yaˇ miˇ maˇ k’oˆ, chaw haˉ yaˇ miˇ haˉ leh awˬ hpawˇ awˬ miˇ ma cawˬ ve maˇ k’oˆ, a shaꞈ maˇ leh a shaꞈ i ve maˇ k’oˆ, awˬ nu ve chaw ceuˬ tawˇ hkawˇ yaw cheuˬ ve leh a ciˉ ceh tiˉ yaw g’a ve maˇ k’oˆ, ngaˬ hui teˇ g’aˇ le le Yaˬhoˉvaˬ awˬ pon leh awˬ viˉ awˬ nyi awˬ pon awˬ hpfuhˇ hk’aˆ jaˇ.—Roˉmaꞈ 12:4, 5; Kawˇlawˇsehˇ 3:10, 11.

²² Pawˇluꞈ tehˆ maˍ laˇ ve chaw yaˇ ve awˬ to hk’aw ve awˬ hk’eun ngaˬ hui g’a henˇ k’ai peuˬ ve laiˉ ceuˬ htaꞈ yuˬ yehˇ g’a ve yoˬ. Ngaˬ hui awˬ viˉ awˬ nyi htaꞈ awˬ g’aˇ piˇ g’a tuˬ, dawˇ nyi sheˍ. Yawˇ hui htaꞈ haꞈ leh hk’aˬ htaˆ kaꞈ yawˆ yan piˇ sheˍ.