1, 2. (a) Ngaˬ hui ve dawˇ law kuiˬ leh shu ve dawˇ law kuiˬ hkʼaˬ hkʼe peun daꞈ ve le? (b) Awˬ lawn chi hkʼaw ngaˬ hui aˬ htoꞈ ma henˇ tuˬ le?

 Yaˬhoˉvaˬ daꞈ jaˇ ve dawˇ law kuiˬ peꞈ laˇ ve yoˬ. Yawˇ ve awˬ meh htaꞈ yawˆ yan te piˇ leh mvuhˇ naw ma hkʼoˆ miˬ guiˬ hkʼoˆ yawˇ ve a loˍ biˇ la tuˬ, Yaˬhoˉvaˬ ka tiꞈ te taˍ laˇ ve yoˬ. (Maꞈhtehˍ 6:9, 10) Awˬ ceuˬ chi ve dawˇ law kuiˬ a yeˇ uiˍ jaˇ ve yoˬ. Mvuhˇ naw ma hkʼoˆ miˬ guiˬ hkʼoˆ maˇ kʼo, co co taiˍ taiˍ ve laꞈ shawnˍ peꞈ laˇ tuˬ, Yaˬhoˉvaˬ ka tiꞈ te taˍ laˇ ve yoˬ. Ngaˬ hui ha lehˬ jaˇ! (Yoˇhanˬ 10:16; 2 Peˍtruˆ 3:13) Leh awˬ leh meuˇ ve awˬ yanˇ chi, Yaˬhoˉvaˬ hkʼaˬ hkʼe beˆ maˍ laˇ tuˬ, ngaˬ hui shiˍ gaˇ jaˇ ve yoˬ.

² Liꞈ hpu hkʼaw bvuhꞈ taˍ ve, yonˍ ve teˇ ceuˬ lehˬ ngaˬ hui ve dawˇ law kuiˬ awˬ tehˬ hpehꞈ la tuˬ “hkʼa dehꞈ dehꞈ shiˍ taˍ ve” yoˬ. Chi kʼoˆ gaˇ ve lehˬ, Yaˬhoˉvaˬ ka tiꞈ te taˍ laˇ ve htaꞈ awˬ tehˬ hpehꞈ la ve tehꞈ yonˍ hkʼaˇ cawˬ ve chaw yawˇ hui hkʼa dehꞈ shiˍ ve yoˬ. (Heˍbrehˇ 11:1) Chi beuꞈ teˇ co˗e laiˉ gʼaˇ kaꞈ teˇ ceuˬ ceuˬ dawˇ law chehˇ ve yoˬ. Yaꞈ hkʼaˇ awˬ tehˬ hpehꞈ la gʼa ve laˇ, yawˇ hui maˇ shiˍ. Tawˇ pa haˉ te kʼo,  teˇ hpaˍ hpaˍ liꞈ mehˆ vuiˬ ve cawˇ tuˬ dawˇ law ve htawˇ, awˬ tehˬ cawˇ tuˬ, yawˇ hui maˇ shiˍ gʼa ve yoˬ. Gʼuiˬ sha ka tiꞈ te taˍ laˇ ve hkʼaw ngaˬ hui ve yonˍ hkʼaˇ hkʼaˬ hkʼe te uiˍ la mvuh la tuˬ leh, ngaˬ hui yonˍ hkʼaˇ hehnˇ ve kʼo chi beuꞈ teˇ co˗e hkʼaˬ hkʼe ga laˇ gʼa tuˬ, awˬ lawn chi hkʼaw ngaˬ hui gʼa henˇ tuˬ yoˬ.

3. Gʼuiˬ sha ka tiꞈ te taˍ ve biˇ la tuˬ aˬ htoꞈ ma te ngaˬ hui yonˍ gʼa ve le?

³ Paw la htaˇ yonˍ ve teˇ gʼaˇ kaꞈ maˇ cawˬ. Yonˍ ve cawˬ gʼa tuˬ, Gʼuiˬ sha ve awˬ ha hpu ngaˬ hui ve nyi ma shiˍ htaꞈ gʼa beˆ maˍ laˇ tcuh ve yoˬ. (Gaˍlaˍtiˆ 5:22) Awˬ ha hpu chi ngaˬ hui Yaˬhoˉvaˬ htaꞈ shiˍ daꞈ tuˬ, ga laˇ gʼa ve yoˬ. Gʼuiˬ sha kanˇ paˆ uiˍ leh cuˇ yiˍ cawˬ ve ngaˬ hui hkʼa dehꞈ na gʼa htaˇ, yawˇ ka tiꞈ te taˍ laˇ ve hkʼa peu˗eˬ awˬ tehˬ te gʼa ve ngaˬ hui yonˍ gʼa ve yoˬ. Yaˬhoˉvaˬ ka tiꞈ te htaˇ, hpehꞈ la˗o ve hkʼe yawˇ kʼoˆ jaw ve “peuˬ ve yoˬ!” (Hpeuꞈ maˍ ve 21:3-6 gʼaw ve.) Yaˬhoˉvaˬ ka tiꞈ te taˍ ve htaꞈ teˇ pawˆ le le te tuˬ ngaˬ hui shiˍ ve yoˬ. “Yawˇ lehˬ ka tiꞈ yeˬ jaˇ ve Gʼuiˬ sha hpehꞈ ve yoˬ.” Chi htaꞈ pa taw, awˬ gʼuˇ suhˍ hpawˇ kʼoˆ taˍ ve hkʼa peu˗eˬ htaꞈ, ngaˬ hui yonˍ gʼa ve yoˬ.—Bon maˍ ve 7:9.

4. Oˇ htaˇ teˇ co˗e Gʼuiˬ sha ve kanˉ te ve chaw aˬ htoꞈ ma htaꞈ yonˍ ve le?

⁴ Heˍbrehˇ kaˇ nanˉ uiˍ 11 hkʼaw Yaˬhoˉvaˬ ka tiꞈ te taˍ laˇ ve htaꞈ hkʼa dehꞈ yonˍ ve hawˉ hkʼaˆ yaˇ miˇ awˬ meh 16 gʼaˇ cawˬ ve yoˬ. Oˇ ve teˇ tawn hkʼaw “yawˇ hui yonˍ ve” pa taw, Yaˬhoˉvaˬ ha lehˬ ve te piˇ ve laiˉ gʼaˇ cawˬ ve kaꞈ kʼoˆ taˍ ve yoˬ. (Heˍbrehˇ 11:39) Yaˬhoˉvaˬ ka tiꞈ te taˍ laˇ ve “awˬ yaˇ awˬ duˬ” htaꞈ yawˇ hui teˇ gʼaˇ le le law taˍ ve yoˬ. “Awˬ yaˇ awˬ duˬ” lehˬ, Gʼuiˬ sha ve canˇ paˍ hkʼa peu˗eˬ htaꞈ te luˬ piˇ leh, miˬ guiˬ chi paˍraˍdiˇsuˆ kʼawꞈ hpehꞈ tcuh tuˬ, yawˇ hui shiˍ ve yoˬ. (Awˬ hkuiˉ puiˍ 3:15) Leh Yaˬhoˉvaˬ yawˇ hui htaꞈ teˇ pawˆ kʼawꞈ kuˬ tu piˇ tuˬ, Gʼuiˬ sha ve kanˉ te ve chaw chi teˇ hpaˍ hkʼa dehꞈ yonˍ ve yoˬ. Awˬ tehˬ yoˬ, mvuhˇ naw ma hkʼoˆ lo teꞈ tu la tuˬ ve, yawˇ hui law taˍ ve maˇ heˆ. Awˬ lawn kʼo, chi hkʼe hpehꞈ la tuˬ Yeˍsuˆ maˇ gʼa te sheˍ. (Gaˍlaˍtiˆ 3:16) Miˬ guiˬ hkʼoˆ lo daꞈ jaˇ ve paˍraˍdiˇsuˆ hkʼaw chehˇ tuˬ, yawˇ hui law taˍ ve yoˬ.—Chiˇ mvuh ve 37:11; Iˉsaˍyaˆ 26:19; Hawˇseˍ 13:14.

5, 6. Aˍbraˍhanˍ leh yawˇ ve yehˬ kʼa aˬ htoꞈ ma htaꞈ law taˍ ve le? Yawˇ hui yonˍ hkʼaˇ htaꞈ hkʼaˬ hkʼe te haꞈ shaˉ ve le? (Awˬ lawn tanˬ htaˇ ve awˬ han htaꞈ nyi sheˍ.)

⁵ Yaˬhoˉvaˬ ve kanˉ te ve chaw ka tiꞈ yeˬ ve htaꞈ kʼoˆ htaˇ, Heˍbrehˇ 11:13 hkʼaw kʼoˆ ve, “chaw chi teˇ hpaˍ hkʼa peu˗eˬ lehˬ, yonˍ ve awˬ hkʼaw lo suh˗e ve yoˬ. Gʼuiˬ sha yawˇ hui htaꞈ piˇ tuˬ yoˬ tehꞈ kʼoˆ taˍ ve awˬ ceuˬ teˇ hpaˍ htaꞈ yawˇ hui maˇ gʼa sheˍ htawˇ, awˬ ceuˬ oˇ ve teˇ hpaˍ htaꞈ vuiˇ kuiˬ lo yawˇ hui gʼa mawˬ leh ha lehˬ jaˇ ve yoˬ.” Yawˇ hui miˬ guiˬ awˬ suhˉ htaꞈ law taˍ leh, yawˇ hui oˇ kaˬ lo chehˇ ve tehˬ tehˬ dawˇ nyi ve yoˬ. Aˍbraˍhanˍ lehˬ, awˬ nyi oˇ ve teˇ nyi htaꞈ “gʼa mawˬ tuˬ ve htaꞈ pa taw ha lehˬ jaˇ ve yoˬ” tehꞈ, Yeˍsuˆ kʼoˆ ve yoˬ. (Yoˇhanˬ 8:56) Gʼuiˬ sha ve mvuhˇ miˬ miˬ guiˬ hkʼa peu˗eˬ hkʼoˆ uˉ peunˍ tuˬ ve awˬ yanˇ, Saˍraˆ, Iˉcaˆ, Yaˍkoˆ, laiˉ gʼaˇ htawˇ awˬ nyi chi htaꞈ law taˍ ve yoˬ.—Heˍbrehˇ 11:8-11.

⁶ Aˍbraˍhanˍ leh yawˇ ve yehˬ kʼa yonˍ hkʼaˇ htaꞈ hkʼaˬ hkʼe te haꞈ shaˉ ve le? Yawˇ hui hkʼaˬ htaˆ kaꞈ Yaˬhoˉvaˬ ve awˬ lawn henˇ ve yoˬ. Teˇ pawˆ pawˆ Gʼuiˬ sha mvuhˇ naw ma tcuh yaˇ leh zuhꞈ maˆ htaꞈ yehˇ leh, yawˇ hui geh tawˇ yaw piˇ ve yoˬ. Chaw mawˇ ka tiꞈ yeˬ ve leh liꞈ kʼoˆ awˬ piˍ geh yawˇ hui henˇ gʼa ve yoˬ hehˉ. Aˍbraˍhanˍ leh  yawˇ ve yehˬ kʼa Gʼuiˬ sha ka tiꞈ te taˍ laˇ ve htaꞈ maˇ leunˇ jaw leh, hkʼaˬ htaˆ kaꞈ hkʼa dehꞈ dehꞈ dawˇ nyi ve yoˬ. Chi htaꞈ pa taw, Yaˬhoˉvaˬ ka tiꞈ htaꞈ haꞈ shaˉ tuˬ yawˇ hui hkʼa dehꞈ yonˍ ve yoˬ. Yawˇ shoꞈ shaꞈ ve maˇ heˆ leh fawˉ mehˍ ve gʼa hpuˇ htawˇ, yawˇ hui ka tiꞈ htaꞈ haꞈ shaˉ gʼa ve yoˬ.

7. Ngaˬ hui ve yonˍ hkʼaˇ uiˍ la mvuh la tuˬ, Yaˬhoˉvaˬ aˬ htoꞈ ma peꞈ laˇ ve le? Leh ngaˬ hui aˬ htoꞈ ma gʼa te tuˬ le?

⁷ Ngaˬ hui yonˍ hkʼaˇ htaꞈ haꞈ shaˉ gʼa tuˬ, aˬ htoꞈ ma teˇ ceuˬ ga laˇ ve le? Yaˬhoˉvaˬ Liꞈ hpu peꞈ laˇ leh awˬ gʼuˇ suhˍ hpawˇ ve ka tiꞈ ngaˬ hui htaꞈ maˍ laˇ ve yoˬ. Liꞈ kʼoˆ chi ve hkʼaw, yawˇ ngaˬ hui ha lehˬ tuˬ ve awˬ hkʼaˇ kaꞈ maˍ laˇ ve yoˬ. Chi htaꞈ pa taw, teˇ nyi le le ngaˬ hui Liꞈ hpu gʼaw leh beˆ maˍ laˇ ve awˬ hkʼaˇ suh gʼaꞈ te cawˇ ve yoˬ. (Chiˇ mvuh ve 1:1-3; Tcuh yaˇ 17:11 gʼaw ve.) “Awˬ yanˇ cawˇ lehˍ caˇ tuˬ dawˬ tuˬ” peꞈ laˇ tuˬ, Yaˬhoˉvaˬ “ka tiꞈ yeˬ leh cuˇ yiˍ cawˬ ve awˬ ceˬ” htaꞈ yehˇ ve yoˬ. (Maꞈhtehˍ 24:45) Oˇ htaˇ Gʼuiˬ sha ve chaw hkʼa shuˍ, ngaˬ hui htawˇ Gʼuiˬ sha ka tiꞈ te taˍ laˇ ve awˬ ceuˬ htaꞈ hkʼaˬ htaˆ kaꞈ gʼa gʼaw leh hkʼa dehꞈ dehꞈ gʼa dawˇ nyi ve yoˬ. Gʼuiˬ sha htaꞈ ka tiꞈ yeˬ tuˬ leh Gʼuiˬ sha ve mvuhˇ miˬ miˬ guiˬ hkʼa peu˗eˬ hkʼoˆ uˉ peunˍ la tuˬ law taˍ ve, chi lehˬ ngaˬ hui htaꞈ ga laˇ gʼa ve yoˬ.

8. Ngaˬ hui ve yonˍ hkʼaˇ uiˍ la mvuh la tuˬ, bon lawˬ ve hkʼaˬ hkʼe ga laˇ gʼa ve le?

⁸ Oˇ htaˇ teˇ co˗e Yaˬhoˉvaˬ ve chaw yonˍ hkʼaˇ htaꞈ haꞈ shaˉ gʼa tuˬ, aˬ htoꞈ ma kaꞈ cawˬ sheˍ ve le? Yawˇ hui Yaˬhoˉvaˬ ga laˇ tuˬ bon lawˬ leh Yaˬhoˉvaˬ hkʼawꞈ laˇ ve htaꞈ gʼa mawˬ htaˇ, yawˇ hui ve yonˍ hkʼaˇ uiˍ la mvuh la ve yoˬ. (Neˍhaˍmiˆ 1:4, 11; Chiˇ mvuh ve 34:4, 15, 17; Daˍyeˍlaˆ 9:19-21) Chi hkʼa shuˍ shuˍ, ngaˬ hui ve bon lawˬ hkawˇ Yaˬhoˉvaˬ na leh ngaˬ hui loˍ ve awˬ ceuˬ teˇ hpaˍ awˬ yanˇ cawˇ ve hkʼaw yawˇ peꞈ laˇ ve htaꞈ mawˬ htaˇ, ngaˬ hui yonˍ hkʼaˇ kaꞈ uiˍ la mvuh la ve yoˬ. (1 Yoˇhanˬ 5:14, 15 gʼaw ve.) Ngaˬ hui ve yonˍ hkʼaˇ maˇ la tuˬ, Yaˬhoˉvaˬ geh daꞈ kehˬ ve awˬ ha hpu kaꞈ hkʼaˬ htaˆ kaꞈ gʼa lawˬ ve yoˬ.—Luˉkaꞈ 11:9, 13.

9. Aˬ htoꞈ ma ve awˬ lawn ngaˬ hui bon lawˬ cawˇ ve le?

⁹ Yaˬhoˉvaˬ geh bon lawˬ htaˇ, ngaˬ hui loˍ ve awˬ ceuˬ ceh tiˉ maˇ lawˬ cawˇ. Teˇ nyi le le yawˇ htaꞈ chiˇ mvuh ve leh awˬ bon uiˍ hkawˇ ngaˬ hui yaw piˇ ve yoˬ. Awˬ lawn kʼo, yawˇ anˇ tuˬ uiˍ ve kanˉ laiˉ ceuˬ te laˇ taˍ peuˬ ve yoˬ! (Chiˇ mvuh ve 40:5) Yaˬhoˉvaˬ ve chaw miˬ guiˬ chi hkʼoˆ awˬ viˉ awˬ nyi awˬ pon kaꞈ bon lawˬ piˇ ve yoˬ. Tawˇ pa haˉ te kʼo, “htawnˍ hkʼaw chehˇ ve chaw hui” htaꞈ kaꞈ dawˇ nawˇ ve yoˬ. “Awˬ hoˉ teˇ hpaˍ” awˬ pon htawˇ, ngaˬ hui bon lawˬ piˇ ve yoˬ. Ngaˬ hui bon lawˬ ve Yaˬhoˉvaˬ hkʼaˬ hkʼe hkʼawꞈ laˇ ve mawˬ htaˇ, ngaˬ hui ve yonˍ hkʼaˇ htawˇ uiˍ la mvuh la leh yawˇ htaꞈ meuˆ daꞈ maˇ la ve yoˬ.—Heˍbrehˇ 13:3, 7.

10. Laiˉ gʼaˇ haꞈ hanˉ leh Gʼuiˬ sha geh ka tiꞈ yeˬ ve haꞈ shaˉ gʼa tuˬ, aˬ htoꞈ ma ga piˇ ve le?

¹⁰ Heˍbrehˇ kaˇ nanˉ uiˍ 11 hkʼaw tcuh yaˇ Pawˇluꞈ kʼoˆ ve, “yaˇ miˇ teˇ hpaˍ lehˬ, suh kuiˬ lo a shu yawˇ ve chaw kʼawꞈ teꞈ tu la ve htaꞈ gʼa ve yoˬ. Chaw teˇ hpaˍ hpaˍ lehˬ, fawˉ mehˍ ve hehnˇ jaˇ ve htaꞈ gʼa hkanˍ ve yoˬ. Awˬ lawn kʼo, leuˉ leh daꞈ ve kʼawꞈ teꞈ tu la ve teˇ ceuˬ htaꞈ gʼa hpehꞈ tuˬ, shu ponˬ piˇ ve htaꞈ yawˇ hui maˇ hkanˍ yuˬ.” (Heˍbrehˇ 11:35) Kʼawꞈ teꞈ tu la tuˬ ve Gʼuiˬ sha ve ka tiꞈ htaꞈ yawˇ hui hkʼa dehꞈ yonˍ ve pa taw, laiˉ gʼaˇ beˬ ve lawˇ ve htaꞈ yeunˇ hkanˍ leh ka tiꞈ htaꞈ haꞈ shaˉ gʼa ve yoˬ. Yaˬhoˉvaˬ miˬ guiˬ chi hkʼoˆ lo co co taiˍ taiˍ teꞈ chehˇ tcuh tuˬ, yawˇ hui shiˍ ve yoˬ. Naˬboˆ leh Zaˍhkaˍriˆ ve awˬ lawn kaꞈ  dawˇ nyi sheˍ. Yawˇ hui Gʼuiˬ sha htaꞈ na yuˬ ve pa taw, haˉ pui baˬ pehˍ piˇ ve yoˬ. (1 Jawˇ mawˇ 21:3, 15; 2 Raˍsaˍvanˍ 24:20, 21) Daˍyeˍlaˆ laˇ caˬ shiˉ hkawˆ hkʼaw baˬ kuiˬ piˇ ve leh, yawˇ ve awˬ chawˇ teˇ hpaˍ aˬ miˍ hkʼaw baˬ kuiˬ piˇ ve yoˬ. Yawˇ hui dawˇ ve, suh˗e ve kaꞈ Yaˬhoˉvaˬ hkawˇ maˇ na yuˬ ve aꞈ kehˉ daꞈ ve yoˬ. Gʼa hpuˇ ve awˬ ceuˬ htaꞈ yeunˇ hkanˍ gʼa tuˬ, Yaˬhoˉvaˬ daꞈ kehˬ ve awˬ ha hpu ga piˇ ve, yawˇ hui hkʼa dehꞈ yonˍ ve yoˬ.—Daˍyeˍlaˆ 3:16-18, 20, 28; 6:13, 16, 21-23; Heˍbrehˇ 11:33, 34.

11. Yonˍ hkʼaˇ cawˬ ve tcuh kaˍ paˍ beˬ ve lawˇ ve aˬ htoꞈ ma gʼa hpuˇ ve le?

¹¹ Miˆkaˍ, Yeˍraˍmiˆ, leh awˬ nu ve tcuh kaˍ paˍ lehˬ shu kʼoˆ guiˇ gʼuiˬ guiˇ piˇ leh htawnˍ hkʼaw hpeh keu piˇ ve yoˬ. Eˇliˇyaꞈ hkʼa shuˍ awˬ nu ve chaw ‘heh puiˉ hkʼaw leh hkʼaw hkʼoˆ lawˬ hkʼoˆ lo, miˬ kʼoˍ haˉ kʼoˍ hkʼaw lo gʼa chehˇ toˇ ve yoˬ.’ Yawˇ hui teˇ gʼaˇ le le yeunˇ hkanˍ leh Gʼuiˬ sha geh ka tiꞈ yeˬ ve haꞈ shaˉ gʼa ve yoˬ. Awˬ lawn kʼo, yawˇ hui ‘dawˇ law taˍ ve teˇ hpaˍ htaꞈ awˬ tehˬ awˬ na gʼa tuˬ yawˇ hui hkʼa dehꞈ dehꞈ shiˍ taˍ ve yoˬ.’—Heˍbrehˇ 11:1, 36-38; 1 Jawˇ mawˇ 18:13; 22:24-27; Yeˍraˍmiˆ 20:1, 2; 28:10, 11; 32:2.

12. Ngaˬ hui henˇ yuˬ gʼa ve daꞈ jaˇ ve henˇ yuˬ tuˬ a shu hpehꞈ ve le? Yawˇ yeunˇ hkanˍ gʼa tuˬ aˬ htoꞈ ma ga piˇ ve le?

¹² Yeˍsuˆ beˬ ve lawˇ ve gʼa hpuˇ ve shu aꞈ kehˉ haˍ jaˇ ve yoˬ. Yaꞈ hkʼaˇ, yawˇ Yaˬhoˉvaˬ geh ka tiꞈ yeˬ ve haꞈ shaˉ gʼa ve yoˬ. Yawˇ yeunˇ hkanˍ gʼa tuˬ aˬ htoꞈ ma teˇ ceuˬ ga piˇ ve le? Pawˇluꞈ kʼoˆ ve, “yawˇ awˬ gʼuˇ suhˍ teh taˍ ve ha lehˬ tuˬ ve teˇ ceuˬ htaꞈ pa taw, yaꞈ taw ve teˇ ceuˬ htaꞈ maˇ dawˇ leh, laꞈ ka hkʼoˆ lo hkanˍ suh peuˬ ve yoˬ. Yawˇ lehˬ chi beuꞈ Gʼuiˬ sha ve kʼaw jaw laꞈ sha paˉ lo mui chehˇ taˍ peuˬ.” (Heˍbrehˇ 12:2) Yeˍsuˆ ve awˬ lawn hkʼa dehꞈ “dawˇ nyi˗o” tehꞈ, Pawˇluꞈ Hkriꞈ yaˇ hui htaꞈ beˆ maˍ piˇ ve yoˬ. (Heˍbrehˇ 12:3 gʼaw ve.) Yeˍsuˆ hkʼa shuˍ, awˉ lawˉ peuˇ ve Hkriꞈ yaˇ laiˉ gʼaˇ Yaˬhoˉvaˬ htaꞈ ka tiꞈ yeˬ ve pa taw, yawˇ hui gʼa suh˗e ve yoˬ. Anˍtiˇpaˆ kaꞈ hkʼa shuˍ yoˬ. (Hpeuꞈ maˍ ve 2:13) Hkriꞈ yaˇ chi teˇ hpaˍ laꞈ shawnˍ gʼa peuˬ. Yawˇ hui awˬ gʼuˇ suhˍ ve Gʼuiˬ sha ve kanˉ te ve chaw miˬ guiˬ chi hkʼoˆ lo chehˇ tuˬ dawˇ law kuiˬ cawˬ ve htaꞈ maˇ shu ve yoˬ. (Heˍbrehˇ 11:35) Yeˍsuˆ 1914 hkʼawꞈ Jawˇ mawˇ te ve maˇ maw maw hkʼawꞈ nawˉ, leuˆ yuˬ taˍ ve Hkriꞈ yaˇ suh peuˬ ve htawˇ, kuˬ tuˬ leh mvuhˇ naw ma hkʼoˆ taˆ˗e leh Yeˍsuˆ geh teˇ geh chaw yaˇ htaꞈ uˉ peunˍ chehˇ ve yoˬ.—Hpeuꞈ maˍ ve 20:4.

13, 14. Ruˍdawˆ Kaiˍchenˇ beˬ ve lawˇ ve aˬ htoꞈ ma gʼa hpuˇ ve le? Gʼuiˬ sha geh ka tiꞈ yeˬ gʼa tuˬ aˬ htoꞈ ma ga piˇ ve le?

¹³ Gʼuiˬ sha ve chaw laiˉ lanˬ gʼaˇ, Yeˍsuˆ hkʼaˇ suh gʼaꞈ te chehˇ ve yoˬ. Gʼuiˬ sha ka tiꞈ te taˍ laˇ ve htaꞈ yawˇ hui hkʼa dehꞈ dawˇ nyi leh beˬ ve lawˇ ve htaꞈ gʼa hpuˇ ve htawˇ, yawˇ hui Gʼuiˬ sha htaꞈ ka tiꞈ yeˬ ve yoˬ. Ruˍdawˆ Kaiˍchenˇ ve awˬ lawn htaꞈ dawˇ nyi sheˍ. Yawˇ 1925 hkʼawꞈ htaˇ Jaˬmaˬniˬ mvuhˇ miˬ lo paw ve yoˬ. Yawˇ yaˇ ehˉ htaˇ, yawˇ ve awˬ pa awˬ e Liꞈ hpu hkʼaw ve awˬ han teˇ hpaˍ yehˬ hkʼaw nehˉ ve htaꞈ dawˇ cawˇ ve yoˬ. Yawˇ kʼoˆ ve, “awˬ han teˇ kʼuˉ hkʼaw heh hpuiˇ leh yawˬ ehˉ, laˇ leh aˉ cheꞈ ehˉ, nuˇ yehˇ leh laˇ caˬ shiˉ cawˬ ve yoˬ. Teˇ hkeh le le teˇ geh chehˇ leh yaˇ ehˉ nyi haꞈ shaˉ piˇ chehˇ ve yoˬ.” (Iˉsaˍyaˆ 11:6-9) Awˬ han chi ve, Ruˍdawˆ hkʼaˬ htaˆ kaꞈ miˬ guiˬ awˬ suhˉ htaꞈ dawˇ nawˇ leh yonˍ tuˬ ga piˇ gʼa ve yoˬ. Chi htaꞈ pa taw, yawˇ Naˬseˬ (Nazi) geh fawˉ mehˍ ve laiˉ hkʼaw gʼa hpuˇ htawˇ, yawˇ  Yaˬhoˉvaˬ geh hkʼaˬ htaˆ kaꞈ ka tiꞈ yeˬ ve htaꞈ haꞈ shaˉ gʼa ve yoˬ.

¹⁴ Awˬ nu ve shoꞈ shaꞈ ve laiˉ ceuˬ kaꞈ Ruˍdawˆ gʼa hpuˇ ve yoˬ. Yawˇ ve awˬ e maꞈ yaˇ ve htawnˍ yehˬ hkʼaw naˬ leh suh˗e ve yoˬ. Yawˇ ve awˬ pa Yaˬhoˉvaˬ ve Shaˉhkiˆhkanˍ ve chaw maˇ kʼawꞈ te tuˬ, liꞈ bvuhꞈ cheˆ ve yoˬ. Yaꞈ hkʼaˇ, Ruˍdawˆ yonˍ hkʼaˇ htaꞈ haꞈ shaˉ gʼa ve yoˬ. Htawnˍ hkʼaw lo hpehˇ piˇ peuˬ hkʼawꞈ nawˉ, yawˇ toˇ nyi shehˍ hpaˇ hpehꞈ ve yoˬ. Yawˇ Giˇlaˆ liꞈ henˇ yehˬ lo kaꞈ gʼa henˇ leh Chiˬliˬ mvuhˇ miˬ lo toˇ nyi shehˍ hpaˇ ve kanˉ ca kʼawꞈ te ve yoˬ. Oˇ hkʼaˬ lo Miˍshenˍnaˍliˍ te chehˇ ve Hpehˆsiˬ htaꞈ yawˇ heuˆ daꞈ ve yoˬ. Yaꞈ hkʼaˇ, teˇ hkʼawꞈ peuˬ hkʼawꞈ nawˉ yawˇ ve yaˇ miˇ ehˉ suh˗e ve yoˬ. Maˇ maw maw Hpehˆsiˬ a shaꞈ 43 hkʼawꞈ gaˬ htaˇ suh˗e ve yoˬ. Ruˍdawˆ shoꞈ shaꞈ ve awˬ ceuˬ laiˉ ceuˬ gʼa hpuˇ ve htawˇ, Yaˬhoˉvaˬ ve kanˉ caˉ leh kʼawꞈ te gʼa ve yoˬ. A shaꞈ maˇ leh maˇ chehˇ sha puiˉ ve htawˇ, gʼuˇ suhˍ peuˍ ve leh chaw mawˇ chaw kehˉ te gʼa ve yoˬ. Yawˇ ve awˬ lawn Shaw nyi kuiˬ Taꞈ yehˬ Ha pa 8 maˬ 1 nyi 1997 liꞈ mehˆ hpfuhˇ 20-25  hkʼaw gʼaw hpehꞈ ve yoˬ. ^[1] (Awˬ maiˉ hkʼawꞈ nawˉ lo cawˬ ve.)

15. Awˬ viˉ awˬ nyi fawˉ mehˍ ve gʼa hpuˇ ve htawˇ, Yaˬhoˉvaˬ ve kanˉ ha lehˬ ve hkʼaw te gʼa ve, tawˇ pa haˉ kʼoˆ maˍ laˇ sheˍ.

¹⁵ Chi beuꞈ teˇ co˗e, fawˉ mehˍ ve htaꞈ gʼa hpuˇ maˇ jaˇ ve htawˇ, awˬ viˉ awˬ nyi laiˉ gʼaˇ ha lehˬ ve hkʼaw Yaˬhoˉvaˬ ve kanˉ te ve yoˬ. “Aˉ htaw” htaꞈ yawˇ hui maˇ yehˇ ve pa taw, laiˉ ha gʼaˇ Eˬriˬhteˇriˇ˗aˇ, Saˬgaˬpuˬ, leh Koˇriˇaˇ Awˬ hawˉ hpawˇ mvuhˇ miˬ lo htawnˍ hkʼaw lo gʼa chehˇ ve yoˬ. (Maꞈhtehˍ 26:52) Tawˇ pa haˉ te kʼo, Iˉcaˆ, Neˬkeˬdeˬ, leh Pawˇluꞈ Eˬriˬhteˇriˇ˗aˇ mvuhˇ miˬ htawnˍ hkʼaw 20 hkʼawꞈ hpaˆ gʼa chehˇ ve yoˬ! Yawˇ hui fawˉ mehˍ ve gʼa hpuˇ maˇ jaˇ. Awˬ yanˇ oˇ ve hkʼaw, yawˇ hui awˬ miˇ ma maˇ heuˆ gʼa leh awˬ pa awˬ e htaꞈ kaꞈ nyi haꞈ shaˉ maˇ gʼa ve yoˬ. Yaꞈ hkʼaˇ, yawˇ hui Yaˬhoˉvaˬ geh ka tiꞈ yeˬ leh yawˇ hui ve yonˍ hkʼaˇ hehnˇ ve yoˬ. Htawnˍ hkʼaw kanˉ te ve chaw teˇ hpaˍ htawˇ, yawˇ hui htaꞈ kaꞈ yawˆ yan piˇ ve yoˬ. Vehˆ saiˉ jw.org hkʼaw yawˇ hui ve awˬ han kaꞈ cawˬ ve yoˬ. Yawˇ hui shoꞈ shaꞈ ve awˬ lawn gʼa hpuˇ maˇ jaˇ ve htawˇ, awˬ han htaꞈ nyi ve kʼo, kʼehˉ suhˍ te leh ha lehˬ chehˇ ve yoˬ.

16. Yonˍ hkʼaˇ hehnˇ ve cawˬ kʼo, nawˬ hkʼaˬ hkʼe te gʼa ve le?

¹⁶ Yaꞈ sheh htaˇ ve awˬ viˉ awˬ nyi htaꞈ maˇ shuˍ, Yaˬhoˉvaˬ ve chaw maˇ˗o ve htawnˍ hkʼaw gʼa chehˇ ve maˇ heˆ, leh fawˉ mehˍ ve chi ma ma maˇ gʼa hpuˇ jaw ve yoˬ. Yaꞈ hkʼaˇ laiˉ gʼaˇ haˍ gʼawˇ ve, miˬ hiˆ ve leh mvuhˇ haw lonˉ, leh yawˇ ve mvuhˇ miˬ hkʼaw maꞈ hpehꞈ ve htaꞈ gʼa hpuˇ ve yoˬ. Awˬ nu ve chaw Aˍbraˍhan, Iˉcaˆ, Yaˍkoˆ, Moˉseˍ, ve awˬ lawn htaꞈ gʼaꞈ te leh Gʼuiˬ sha ve kanˉ te maˇ la tuˬ, awˬ meh bvuhˬ ve leh hpu shi mawˇ jeˬ baˬ taˉ ve yoˬ. Awˬ viˉ awˬ nyi Yaˬhoˉvaˬ ve kanˉ te ve ha lehˬ ve hkʼaw haꞈ shaˉ gʼa tuˬ, aˬ htoꞈ ma ga piˇ ve le? Yawˇ hui Yaˬhoˉvaˬ htaꞈ haꞈ leh yawˇ ve ka tiꞈ htaꞈ yonˍ ve yoˬ. Yawˇ ve kanˉ te ve ka tiꞈ yeˬ ve chaw, hteˇ ve cawˇ ve ceh tiˉ cawˬ ve miˬ guiˬ awˬ suhˉ hkʼaw co co taiˍ taiˍ a shaꞈ gʼa tuˬ, yawˇ hui shiˍ ve yoˬ.—Chiˇ mvuh ve 37:5, 7, 9, 29 gʼaw ve.

17. Nawˬ ve yonˍ hkʼaˇ hehnˇ ve htaꞈ hkʼaˬ hkʼe te haꞈ shaˉ gʼa tuˬ ve le? Awˬ gʼuˇ suhˍ teˇ lawn ngaˬ hui aˬ htoꞈ ma awˬ lawn gʼa henˇ tuˬ le?

¹⁷ Awˬ lawn chi ve hkʼaw yonˍ ve kʼoˆ gaˇ ve lehˬ ‘dawˇ law taˍ ve teˇ hpaˍ htaꞈ awˬ tehˬ awˬ na gʼa tuˬ hkʼa dehꞈ dehꞈ shiˍ taˍ ve’ ngaˬ hui gʼa henˇ ve yoˬ. Yonˍ hkʼaˇ chi hkʼe leˇ cawˬ gʼa tuˬ, ngaˬ hui Yaˬhoˉvaˬ geh bon lawˬ leh yawˇ ve ka tiꞈ htaꞈ hkʼa dehꞈ dawˇ nyi cawˇ ve yoˬ. Leh beˬ ve lawˇ ve teˇ pawˆ le le ngaˬ hui yeunˇ hkanˍ gʼaˇ tuˬ yoˬ. Awˬ gʼuˇ suhˍ teˇ lawn yonˍ hkʼaˇ hkʼaˬ hkʼe cawˬ ve kʼoˆ gaˇ ve lehˬ ngaˬ hui gʼa kʼawꞈ henˇ tuˬ yoˬ.