Teˇ chaw ceuˬ geh Gʼuiˬ sha ve kanˉ ca te kʼo, nawˬ ve co ha hpawˇ haꞈ shaˉ˗oˆ
“Nawˬ ve awˬ liˇ tawˇ hkawˇ htaꞈ ngaˬ ve nyi ma hkʼaw lo haꞈ shaˉ taˍ ve yoˬ.” —Chiˇ mvuh ve 119:11.
Kʼa muiˬ liꞈ: 142, 47
1-3. (a) Ngaˬ hui awˬ pon hkʼaˬ htaˆ kaꞈ aˬ htoꞈ ma teˇ ceuˬ awˉ lawˉ peuˇ gʼa te cawˇ ve le? (b) Tawˇ hkawˇ awˬ suhˉ henˇ ve chaw aˬ htoꞈ ma gʼa hpuˇ ve le? Leh aˬ htoꞈ ma ve na hkawˇ htaꞈ yawˇ hui dawˇ nyi cawˇ ve le? (Awˬ lawn tanˬ htaˇ ve awˬ han htaꞈ nyi sheˍ.)
Chi beuꞈ teˇ co˗e, tcuh kaˍ paˍ ve tawˇ hkawˇ ‘mvuhˇ miˬ teˇ peˆ le le, awˬ ceuˬ awˬ hkʼaˇ teˇ ceuˬ le le, tawˇ hkawˇ teˇ ceuˬ le le, leh chaw ceuˬ teˇ ceuˬ le le htaꞈ’ hto toˇ ve ga leh biˇ la tuˬ, Yaˬhoˉvaˬ ve Shaˉhkiˆhkanˍ ve chaw laiˉ gʼaˇ coˇ caˇ leh kanˉ te chehˇ ve yoˬ. (Hpeuꞈ maˍ ve 14:6) Nawˬ kaꞈ awˬ nu ve chaw ceuˬ maˇ heˆ leh awˬ nu ve mvuhˇ miˬ ve tawˇ hkawˇ awˬ suhˉ henˇ chehˇ˗aw laˇ? Teˇ hpaˍ hpaˍ miˍshenˍnaˍliˍ te ve leh, awˬ nu ve chaw yawˇ hkʼaˇ yawˇ shu mvuhˇ miˬ lo kʼai leh Gʼuiˬ sha kanˉ te chehˇ ve yoˬ. Awˬ kaˍ awˬ nu chaw yawˇ ve mvuhˇ miˬ hkʼaw chehˇ leh tawˇ hkawˇ awˬ suhˉ geh ca hpawnˬ daꞈ˗e ve yoˬ.
2 Gʼuiˬ sha kanˉ te ve chaw teˇ gʼaˇ le le yawˇ leh yawˇ ve yehˬ kʼa co ha hpawˇ haꞈ shaˉ gʼa tuˬ, awˉ lawˉ peuˇ gʼa te ve yoˬ. (Maꞈhtehˍ 5:3) Yaꞈ hkʼaˇ, teˇ pawˆ pawˆ ngaˬ hui kanˉ maˇ jaˇ leh, a shu yawˇ hkʼaˇ yawˇ Liꞈ hpu henˇ ve awˬ hpfuhˇ hkʼaˆ jaˇ ve, chi ve te tuˬ awˬ yanˇ ca ve lehˬ haˍ jaˇ ve yoˬ. Leh ngaˬ hui awˬ nu ve tawˇ hkawˇ Hkriꞈ yaˇ awˬ moˍ hkʼaw chehˇ ve kʼo, leuˉ leh haˍ jaˇ ve yoˬ.
3 Chaw chi teˇ hpaˍ lehˬ tawˇ hkawˇ awˬ suhˉ gʼa henˇ leh Gʼuiˬ sha ve naˉ jaˇ ve awˬ ceuˬ teˇ hpaˍ kaꞈ yawˇ hui hkʼaˬ htaˆ kaꞈ gʼa henˇ ve yoˬ. (1 Kawˇrenˍhtuˆ 2:10) Hpawnˬ daꞈ ve hkʼaw yawˇ maˇ na gʼa ve kʼo, chi hkʼe leˇ hkʼaˬ hkʼe te gʼa tuˬ le? Leh awˬ nu ve tawˇ hkawˇ Hkriꞈ yaˇ awˬ moˍ geh Gʼuiˬ sha kanˉ ca te ve kʼo, yaˇ awˬ tehˬ ve awˬ lawn nyi ma hkʼaw gaˬ˗aw laˇ, aˬ htoꞈ ma te awˬ pa awˬ e chaˬ nyi cawˇ ve le?
Yaˬhoˉvaˬ geh meuˆ daꞈ ve awˬ pon kawˆ tuˬ hpehꞈ gʼa ve
4. Aˬ htoꞈ ma teˇ ceuˬ Yaˬhoˉvaˬ geh meuˆ daꞈ ve awˬ pon kawˆ tuˬ hpehꞈ gʼa ve le? Tawˇ pa haˉ kʼoˆ maˍ laˇ sheˍ.
4 Liꞈ hpu hkʼaw maˍ ve awˬ lawn awˬ nu ve chaw ceuˬ tawˇ hkawˇ ngaˬ hui maˇ na gʼa ve kʼo, Yaˬhoˉvaˬ geh meuˆ daꞈ ve awˬ pon kawˆ tuˬ uiˍ jaˇ ve hpehꞈ la gʼa ve yoˬ. Neˍhaˍmiˆ Yeˍruˆsaˍlehnˍ venˇ lo kʼawꞈ gaˬ la htaˇ, yaˇ nehˬ teˇ hpaˍ Heˍbrehˇ hkawˇ maˇ yaw gʼa ve yawˇ gʼa mawˬ ve yoˬ. (Neˍhaˍmiˆ 13:23, 24 gʼaw ve.) Yaˇ chi teˇ hpaˍ Gʼuiˬ sha ve tawˇ hkawˇ maˇ na gʼa ve pa taw, Yaˬhoˉvaˬ htaꞈ meuˆ daꞈ ve i kʼai ve yoˬ.—Neˍhaˍmiˆ 8:2, 8.
5, 6. Awˬ nu ve tawˇ hkawˇ Hkriꞈ yaˇ awˬ moˍ hkʼaw chehˇ ve awˬ pa awˬ e teˇ hpaˍ hpaˍ aˬ htoꞈ ma gʼa mawˬ ve le? Leh aˬ htoꞈ ma pa taw le?
5 Awˬ nu ve tawˇ hkawˇ Hkriꞈ yaˇ awˬ moˍ hkʼaw chehˇ ve awˬ pa awˬ e teˇ hpaˍ hpaˍ yawˇ ve yaˇ Yaˬhoˉvaˬ geh meuˆ daꞈ ve i kʼai ve gʼa mawˬ ve yoˬ. Hpawnˬ daꞈ ve hkʼaw maˍ ve awˬ lawn yawˇ hui ve yaˇ hkʼa dehꞈ maˇ na gʼa ve pa taw, awˬ lawn oˇ ve yaˇ ve nyi ma pfuhˇ tuˬ maˇ te piˇ. Peˍtruˆ ve yehˬ kʼa Awˆsaˍteˇriˇaˇ mvuhˇ miˬ chehˇ ve leh Aˍmeˬriˆkaꞈ Awˬ hawˉ hpawˇ lo ca kʼawꞈ chehˇ la ve, yawˇ kʼoˆ ve “co ha hpawˇ ve awˬ lawn ngaˬ hui yaw daꞈ htaˇ, nyi ma leh dawˇ hkʼaˇ htaꞈ gʼa yehˇ ve yoˬ.” [1] (Awˬ maiˉ hkʼawꞈ nawˉ lo cawˬ ve.)—Luˉkaꞈ 24:32.
6 Awˬ nu ve chaw tawˇ hkawˇ liꞈ gʼaw htaˇ, a shu yawˇ ve tawˇ hkawˇ gʼaw ve hkʼe leˇ nyi ma maˇ pfuhˇ. Leh awˬ nu ve tawˇ hkawˇ yaw daꞈ ve haˍ jaˇ ve pa taw, ngaˬ hui Yaˬhoˉvaˬ htaꞈ oˉ kʼoˍ pui ve htawˇ oˇ htaˇ hkʼe leˇ maˇ daꞈ ve yoˬ. Awˬ tehˬ yoˬ, awˬ nu ve tawˇ hkawˇ Hkriꞈ yaˇ awˬ moˍ hkʼaw Gʼuiˬ sha ve kanˉ ngaˬ hui te gaˇ ve yoˬ. Yaꞈ hkʼaˇ, ngaˬ hui Yaˬhoˉvaˬ geh meuˆ daꞈ ve haꞈ shaˉ ve kaꞈ a yeˇ uiˍ jaˇ ve yoˬ.—Maꞈhtehˍ 4:4.
Yaˬhoˉvaˬ geh meuˆ daꞈ ve yawˇ hui haꞈ shaˉ ve
7. Baˍbuˍlonˍ chaw ve chaw liˇ vaˇ liˇ leh bon liˇ bon hkʼaˇ yawˇ hui Daˍyeˍlaˆ htaꞈ hkʼaˬ hkʼe nyiˉ te piˇ ve le?
7 Daˍyeˍlaˆ leh yawˇ ve awˬ chawˇ teˇ hpaˍ Baˍbuˍlonˍ mvuhˇ miˬ lo shu shiˍ kʼai htaˇ, oˇ kaˬ lo ve chaw liˇ vaˇ liˇ leh bon liˇ bon hkʼaˇ yawˇ hui htaꞈ nyiˉ te piˇ ve yo. Yawˇ hui lehˬ yaˇ nehˬ chi teˇ hpaˍ htaꞈ “Baˍbuˍlonˍ chaw hui ve liꞈ maˍ piˇ” leh, Baˍbuˍlonˍ ve awˬ meh awˬ suhˉ meh piˇ ve yoˬ. (Daˍyeˍlaˆ 1:3-7) Daˍyeˍlaˆ ve awˬ meh awˬ suhˉ hkʼaw Baˍbuˍlonˍ hui ve gʼuiˬ sha lonˉ ve awˬ meh Beˍlaˆ kaꞈ cawˬ ve yoˬ. Chi htaꞈ pa taw, Baˍbuˍlonˍ ve gʼuiˬ sha Daˍyeˍlaˆ ve Gʼuiˬ sha Yaˬhoˉvaˬ aꞈ kehˉ kanˇ paˆ uiˍ jaˇ ve tehꞈ, Jawˇ mawˇ Neˍbuˍhkaˍneˍzaˍ Daˍyeˍlaˆ htaꞈ yonˍ tcuh gaˇ ve yoˬ hehˉ.—Daˍyeˍlaˆ 4:8.
8. Yaˬhoˉvaˬ geh meuˆ daꞈ ve haꞈ shaˉ gʼa tuˬ, Daˍyeˍlaˆ hkʼaˬ hkʼe te ve le?
8 Baˍbuˍlonˍ mvuhˇ miˬ chehˇ htaˇ, mehˬ jaˇ ve jawˇ mawˇ caˇ tuˬ Daˍyeˍlaˆ htaꞈ caˬ piˇ ve yoˬ. Yaꞈ hkʼaˇ, Gʼuiˬ sha ve awˬ liˇ awˬ hkʼaˇ htaꞈ na yuˬ tuˬ, ‘yawˇ nyi ma hkʼaw dawˇ cheˆ taˍ’ ve yoˬ. (Daˍyeˍlaˆ 1:8) “Daꞈ kehˬ ve liꞈ daw teˇ hpaˍ” Heˍbrehˇ liꞈ bvuhꞈ keu taˍ ve yawˇ hkʼaˬ htaˆ kaꞈ henˇ ve pa taw, shu mvuhˇ miˬ lo chehˇ ve htawˇ, yawˇ Yaˬhoˉvaˬ geh meuˆ daꞈ ve htaꞈ haꞈ shaˉ gʼa ve yoˬ. (Daˍyeˍlaˆ 9:2) Awˬ tehˬ kʼo, Baˍbuˍlonˍ mvuhˇ miˬ 70 hkʼawꞈ chehˇ gaˬ ve htawˇ, shu yawˇ htaꞈ Heˍbrehˇ ve awˬ meh Daˍyeˍlaˆ tehꞈ kuˬ chehˇ sheˍ ve yoˬ.—Daˍyeˍlaˆ 5:13.
9. Chiˇ mvuh ve liꞈ 119 bvuhꞈ paˍ Gʼuiˬ sha ve tawˇ hkawˇ htaꞈ hkʼaˬ hkʼe dawˇ ve le?
9 Uˉ peunˍ shehˍ hpaˇ teˇ hpaˍ Chiˇ mvuh ve liꞈ 119 bvuhꞈ paˍ htaꞈ te luˬ tuˬ hkʼawˇ jehˬ daꞈ chehˇ htaˇ, yawˇ gʼa yeunˇ hkanˍ jaˇ ve yoˬ. Yaꞈ hkʼaˇ, Gʼuiˬ sha ve tawˇ hkawˇ gʼaw htaˇ, yawˇ awˬ gʼaˇ gʼa leh, awˬ nu ve chaw htaꞈ peun daꞈ tuˬ yawˇ htaꞈ ga piˇ ve yoˬ. (Chiˇ mvuh ve 119:23, 61) Yawˇ ve dawˇ hkʼaˇ hkʼa peu˗eˬ htaꞈ Gʼuiˬ sha ve tawˇ hkawˇ nyi haꞈ shaˉ tcuh ve yoˬ.—Chiˇ mvuh ve 119:11, 46 gʼaw ve.
Yaˬhoˉvaˬ geh meuˆ daꞈ ve nawˬ haꞈ shaˉ˗oˆ
10, 11. (a) Ngaˬ hui Gʼuiˬ sha ve tawˇ hkawˇ henˇ htaˇ, hkʼaˬ hkʼe hpehꞈ tcuh gaˇ ve le? (b) Chi hkʼe te gʼa tuˬ, hkʼaˬ hkʼe te cawˇ ve le? Tawˇ pa haˉ kʼoˆ maˍ laˇ sheˍ.
10 Ngaˬ hui ve kanˉ leh Hkriꞈ yaˇ awˬ moˍ hkʼaw ve kanˉ ngaˬ hui cawˬ maˇ jaˇ ve htawˇ, ngaˬ hui teˇ gʼaˇ le le a shu yawˇ hkʼaˇ yawˇ Liꞈ hpu henˇ ve leh yehˬ kʼa hkʼaw oˉ kʼoˍ pui ve awˬ yanˇ gʼa gu teh ve yoˬ. (Eˇfeˇsuꞈ 5:15, 16) Ngaˬ hui liꞈ mehˆ hpfuhˇ laiˉ kʼuˉ gʼaw ve maˇ heˆ leh, hpawnˬ daꞈ ve hkʼaw hkʼawꞈ tuˬ gu ve ceh maˇ te gaˇ. Gʼuiˬ sha ve tawˇ hkawˇ ngaˬ hui htaꞈ nyi haꞈ shaˉ leh ngaˬ hui ve yonˍ hkʼaˇ maˇ la tcuh gaˇ ve yoˬ.
11 Ngaˬ hui chi hkʼe te gʼa tuˬ, hkʼa dehꞈ gʼa dawˇ nyi ve yoˬ. Liꞈ hpu henˇ htaˇ, shu loˍ ve awˬ ceuˬ ceh tiˉ maˇ dawˇ nyi, ngaˬ hui loˍ ve awˬ ceuˬ kaꞈ dawˇ nyi cawˇ ve yoˬ. (Hpiˇliˇpiˆ 1:9, 10) Ngaˬ hui hto toˇ ve, hpawnˬ daꞈ ve, leh bon maˍ hkawˇ gu htaˇ, gʼaw ve awˬ ceuˬ teˇ ceuˬ le le ngaˬ hui awˬ pon awˬ bon cawˬ ve maˇ heˆ taˇ leunˇ sheˍ. Tawˇ pa haˉ te kʼo, awˬ chiˇ te ve chaw hkehˉ chaw htaꞈ maˇ yuˬ piˇ sheˍ htaˇ, yawˇ awˉ lawˉ caˇ nyi ve yoˬ. Yaꞈ hkʼaˇ, oˇ hkʼe ceh chehˇ maˇ gʼa, yawˇ awˬ pon daꞈ ve awˬ chiˇ kaꞈ gʼa te ve yoˬ. Chi hkʼa shuˍ shuˍ, ngaˬ hui Yaˬhoˉvaˬ geh meuˆ daꞈ ve haꞈ shaˉ gaˇ ve kʼo, hkʼaˬ htaˆ kaꞈ Liꞈ hpu gʼa henˇ ve yoˬ. Naˉ jaˇ ve awˬ lawn henˇ ve kʼo, ngaˬ hui awˬ pon awˬ bon cawˬ maˇ jaˇ ve yoˬ.
12, 13. A shu yawˇ ve chaw ceuˬ tawˇ hkawˇ Liꞈ hpu henˇ ve a yeˇ uiˍ jaˇ ve tehꞈ, aˬ htoꞈ ma pa taw chaw laiˉ gʼaˇ dawˇ ve le?
12 Awˬ nu ve tawˇ hkawˇ Hkriꞈ yaˇ awˬ moˍ hkʼaw chehˇ ve chaw laiˉ gʼaˇ dawˇ ve, Liꞈ hpu “a shu yawˇ paw la kuiˬ mvuhˇ miˬ ve tawˇ hkawˇ” hkʼaˬ htaˆ kaꞈ henˇ ve a yeˇ uiˍ jaˇ ve yoˬ. (Tcuh yaˇ 2:8) Miˍshenˍnaˍliˍ awˬ nu ve mvuhˇ miˬ hkʼaw chi maw maw chehˇ gaˇ ve kʼo, hpawnˬ daꞈ ve hkʼaw gʼa kaˇ ve awˬ ceuˬ ceh tiˉ chehˇ maˇ gʼa ve tehꞈ, yawˇ kaꞈ na gʼa ve yoˬ.
13 Aˬlenˍ yawˇ Paˇshaˇ chaw ceuˬ tawˇ hkawˇ henˇ ve 8 hkʼawꞈ gaˬ peuˬ yawˇ kʼoˆ ve, “Paˇshaˇ tawˇ hkawˇ hpawnˬ daꞈ ve gu htaˇ, tawˇ hkawˇ chi yehˇ tuˬ ve awˬ hkʼaˇ ngaˬ hkʼa dehꞈ gʼa dawˇ nyi ve yoˬ. Ngaˬ co ha hpawˇ ve awˬ lawn gʼaw chehˇ ve nyi ma hkʼaw hkʼa dehꞈ maˇ gaˬ. Chi htaꞈ pa taw, ngaˬ paw la kuiˬ mvuhˇ miˬ ve tawˇ hkawˇ ve Liꞈ hpu leh awˬ nu ve liꞈ kʼoˆ teˇ hpaˍ henˇ tuˬ awˬ yanˇ gʼa gu teh ve yoˬ.”
Nawˬ ve yaˇ nyi ma hkʼaw gaˬ piˇ sheˍ
14. Awˬ pa awˬ e aˬ htoꞈ ma chaˬ nyi cawˇ ve le? Leh aˬ htoꞈ ma pa taw le?
14 Hkriꞈ yaˇ awˬ pa awˬ e awˬ tehˬ ve awˬ lawn yaˇ ve nyi ma hkʼaw gaˬ˗aw laˇ tehꞈ, chaˬ nyi cawˇ ve yoˬ. Seuˉkeˬ ve yehˬ kʼa awˬ lawn htaꞈ dawˇ nyi sheˍ. Yawˇ hui awˬ nu ve tawˇ hkawˇ Hkriꞈ yaˇ awˬ moˍ hkʼaw 3 hkʼawꞈ hpaˆ chehˇ gaˬ htaˇ, yawˇ hui ve yaˇ pa a shaꞈ 17 hkʼawꞈ gaˬ ve hpawnˬ daꞈ ve leh hto toˇ ve ha lehˬ kuiˬ maˇ cawˬ ve htaꞈ gʼa mawˬ ve yoˬ. Yawˇ ve awˬ miˇ ma Muˆriˬ kʼoˆ ve, “awˬ nu ve tawˇ hkawˇ hto toˇ kuiˬ lo kʼai htaˇ, yawˇ dawˇ hkiˉ jaˇ ve yoˬ. Yaꞈ hkʼaˇ, oˇ htaˇ yawˇ ve tawˇ hkawˇ hto toˇ kuiˬ lo kʼai ve dawˇ cawˇ jaˇ ve yoˬ.” Seuˉkeˬ kʼoˆ ve, “caˉ leh choˬ kaˬ lo kʼawꞈ chehˇ ve kʼo, ngaˬ hui ve yaˇ co ha hpawˇ hkʼa dehꞈ uiˍ la mvuh la maˇ gʼa ve, ngaˬ hui na gʼa htaˇ, yawˇ chehˇ jaw kuiˬ Hkriꞈ yaˇ awˬ moˍ geh kʼawꞈ kʼoꞈ˗e tuˬ dawˇ ve yoˬ.”
Awˬ tehˬ ve awˬ lawn yaˇ ve nyi ma hkʼaw gaˬ˗aw laˇ tehꞈ, chaˬ nyi sheˍ (Awˬ tawn 14, 15 nyi sheˍ)
15. (a) Yawˇ hui ve yehˬ kʼa Hkriꞈ yaˇ awˬ moˍ awˬ suhˉ geh kʼai ve awˬ pa awˬ e dawˇ cheˆ tuˬ, aˬ htoꞈ ma ga piˇ gʼa ve le? (b) Bon maˍ ve 6:5-7 hkʼaw awˬ pa awˬ e htaꞈ hkʼaˬ hkʼe beˆ maˍ laˇ ve le?
15 Yaˇ hkʼa dehꞈ na gʼa ve tawˇ hkawˇ Hkriꞈ yaˇ awˬ moˍ geh yawˇ hui ca kʼawꞈ chehˇ ve awˬ pa awˬ e dawˇ cheˆ tuˬ, aˬ htoꞈ ma ga piˇ gʼa ve le? Awˉ lawˉ teˇ ceuˬ, yaˇ Yaˬhoˉvaˬ htaꞈ haꞈ ve maˍ piˇ leh awˬ nu ve tawˇ hkawˇ awˬ suhˉ kaꞈ maˍ piˇ tuˬ, yawˇ hui awˬ yanˇ lawꞈ˗aw laˇ tehꞈ dawˇ nyi cawˇ ve yoˬ. Nyiˇ ceuˬ teˇ ceuˬ, yaˇ hpawnˬ daꞈ ve leh hto toˇ ve maˇ kʼai gaˇ, maˇ heˆ leh yaˇ awˬ nu ve tawˇ hkawˇ geh Gʼuiˬ sha kanˉ maˇ te gaˇ ve, yawˇ hui gʼa mawˬ ve yoˬ. Awˬ lawn chi ve htaꞈ dawˇ nyi htaˇ, yaˇ hkʼa dehꞈ na gʼa ve tawˇ hkawˇ Hkriꞈ yaˇ awˬ moˍ geh kʼawꞈ kʼoꞈ˗e cawˇ ve, awˬ pa awˬ e dawˇ cheˆ ve yoˬ hehˉ. Leh yaˇ Yaˬhoˉvaˬ geh meuˆ daꞈ˗o htaˇ, awˬ pa awˬ e awˬ nu ve tawˇ hkawˇ Hkriꞈ yaˇ awˬ moˍ geh teˇ pawˆ kʼawꞈ kʼoꞈ˗e tuˬ dawˇ cheˆ gʼa ve yoˬ.—Bon maˍ ve 6:5-7 gʼaw ve.
16, 17. Awˬ pa awˬ e teˇ hpaˍ yaˇ htaꞈ Yaˬhoˉvaˬ ve awˬ lawn hkʼaˬ hkʼe maˍ ve le?
16 Awˬ kaˍ awˬ nu ve awˬ pa awˬ e yaˇ htaꞈ Yaˬhoˉvaˬ ve awˬ lawn maˍ tuˬ laiˉ hkʼaˇ yehˇ ve leh, awˬ nu ve tawˇ hkawˇ Hkriꞈ yaˇ awˬ moˍ geh chehˇ gʼa ve yoˬ. Chaˍliˍ yawˇ ve yaˇ miˇ a shaꞈ 9 te leh 13 hkʼawꞈ gaˬ ve 3 gʼaˇ cawˬ ve yoˬ. Yawˇ hui Linˍgaꞈlaˍ tawˇ hkawˇ Hkriꞈ yaˇ awˬ moˍ geh chehˇ ve yoˬ. Yawˇ kʼoˆ ve, “ngaˬ hui yaˇ geh teˇ geh Liꞈ hpu henˇ leh yehˬ kʼa oˉ kʼoˍ pui htaˇ, ngaˬ hui ve chaw ceuˬ tawˇ hkawˇ yehˇ ve yoˬ. Yaꞈ hkʼaˇ, yaˇ tawˇ hkawˇ awˬ suhˉ henˇ ve dawˇ cawˇ tuˬ, Linˍgaꞈlaˍ chaw ceuˬ tawˇ hkawˇ yehˇ leh, hto toˇ tuˬ gu ve leh leˍ guiˇ ve yoˬ.”
Coˇ caˇ leh yawˇ ve tawˇ hkawˇ htaꞈ henˇ leh hpawnˬ daꞈ htaˇ hkʼawꞈ laˇ sheˍ (Awˬ tawn 16, 17 nyi sheˍ)
17 Hkehˆvin yaˇ miˇ a shaꞈ 5 leh 8 hkʼawꞈ gaˬ ve 2 gʼaˇ cawˬ ve yoˬ. Awˬ nu ve tawˇ hkawˇ hpawnˬ daꞈ htaˇ, yaˇ teˇ hpaˍ hkʼa dehꞈ maˇ na gʼa ve pa taw, yawˇ awˬ tehˬ ve htaꞈ maˍ tuˬ gʼa coˇ caˇ ve yoˬ. Yawˇ kʼoˆ ve, “ngaˬ leh ngaˬ miˇ ma yaˇ geh Liꞈ hpu henˇ htaˇ, yawˇ paw la kuiˬ mvuhˇ miˬ Hpaˉlanˍ ve tawˇ hkawˇ yehˇ ve yoˬ. Ngaˬ hui coˇ caˇ leh Hpaˉlanˍ ve tawˇ hkawˇ hpawnˬ daꞈ ve teˇ ha pa teˇ pawˆ kʼai leh guiˇ˗e htaˇ, ngaˬ hui ve tawˇ hkawˇ hpawnˬ daꞈ lonˉ kaꞈ kʼai ve yoˬ.”
18. (a) Yaˇ htaꞈ hkʼa dehꞈ ga piˇ tuˬ, Roˉmaꞈ 15:1, 2 hkʼaw nawˬ cuˇ yiˍ cawˬ ve hkʼaw dawˇ cheˆ tuˬ hkʼaˬ hkʼe ga laˇ ve le? (b) Awˬ nu ve awˬ pa awˬ e teˇ hpaˍ hkʼaˬ hkʼe beˆ maˍ laˇ ve le? (Awˬ maiˉ hkʼawꞈ nawˉ lo cawˬ ve.)
18 Yaˇ awˬ pon leh, yawˇ Yaˬhoˉvaˬ geh meuˆ daꞈ ve haꞈ shaˉ gʼa tuˬ aˬ htoꞈ ma teˇ ceuˬ daꞈ jaˇ ve le, teˇ yehˬ kʼa le le a shu yawˇ hkʼaˇ yawˇ gʼa dawˇ cheˆ ve yoˬ. [2] (Awˬ maiˉ hkʼawꞈ nawˉ lo cawˬ ve.) (Gaˍlaˍtiˆ 6:5) Muˆriˬ kʼoˆ ve, yawˇ leh yawˇ ve awˬ hpawˇ awˬ nu ve tawˇ hkawˇ Hkriꞈ yaˇ awˬ moˍ geh Gʼuiˬ sha ve kanˉ te gaˇ ve htawˇ, yawˇ hui ve yaˇ paˍ Yaˬhoˉvaˬ htaꞈ haꞈ maˇ la tuˬ, yawˇ hui awˬ nu ve Hkriꞈ yaˇ awˬ moˍ geh kʼai tuˬ dawˇ cheˆ ve yoˬ. (Roˉmaꞈ 15:1, 2 gʼaw ve.) Yawˇ hui dawˇ cheˆ ve cawˇ ve yoˬ tehꞈ Seuˉkeˬ chi teˇ hkui yawˇ gʼa shiˍ ve yoˬ. Yawˇ kʼoˆ ve, “ngaˬ hui Hpaˉlanˍ tawˇ hkawˇ Hkriꞈ yaˇ awˬ moˍ geh tanˬ chehˇ la htaˇ, ngaˬ hui ve yaˇ paˍ co ha hpawˇ uiˍ la mvuh la jaˇ leh Baˆtiˆsaˬ haꞈ yuˬ ve yoˬ. Chi teˇ hkuiˬ hkʼaˬ htaˆ kaꞈ gʼuˇ suhˍ peuˍ ve chaw te chehˇ ve yoˬ. Leh awˬ nu ve tawˇ hkawˇ Hkriꞈ yaˇ awˬ moˍ geh Gʼuiˬ sha kanˉ ca kʼawꞈ te tuˬ kaꞈ, yawˇ dawˇ chehˇ ve yoˬ!”
Gʼuiˬ sha ve tawˇ hkawˇ nawˬ ve nyi ma hkʼaw gaˬ piˇ sheˍ
19, 20. Gʼuiˬ sha ve tawˇ hkawˇ htaꞈ haꞈ ve tehꞈ ngaˬ hui hkʼaˬ hkʼe te hpeuꞈ maw piˇ gʼa tuˬ le?
19 Yaˬhoˉvaˬ teˇ gʼaˇ le le htaꞈ haꞈ ve yoˬ. “Chaw hkʼa peu˗eˬ . . . hteˇ ve cawˇ ve htaꞈ shiˍ la tuˬ” yawˇ laiˉ ha chaw ceuˬ ve Liꞈ hpu cawˬ tcuh laˇ ve yoˬ. (1 Tiˆmoˉseˍ 2:4) Ngaˬ hui na gʼa ve tawˇ hkawˇ Liꞈ hpu gʼaw htaˇ, ngaˬ hui yawˇ geh meuˆ daꞈ maˇ la tuˬ yawˇ shiˍ ve yoˬ.
20 Yaˬhoˉvaˬ geh meuˆ daꞈ ve haꞈ shaˉ tuˬ, ngaˬ hui teˇ gʼaˇ le le gʼa coˇ caˇ ve yoˬ. Chi hkʼe te gʼa tuˬ, ngaˬ hui na gʼa ve tawˇ hkawˇ hkʼaˬ htaˆ kaꞈ Liꞈ hpu gʼa henˇ ve yoˬ. Ngaˬ hui ve yehˬ kʼa co ha hpawˇ haꞈ shaˉ gʼa tuˬ, gʼa ga piˇ leh Gʼuiˬ sha ve tawˇ hkawˇ htaꞈ haꞈ ve ngaˬ hui gʼa hpeuꞈ maw piˇ ve yoˬ.—Chiˇ mvuh ve 119:11.
