1, 2. (a) Chi beuꞈ ve awˬ yanˇ, shu mvuhˇ miˬ ve chaw aˬ htoꞈ ma gʼa hpuˇ ve le? (Awˬ lawn tanˬ htaˇ ve awˬ han htaꞈ nyi sheˍ.) (b) Pawˇluꞈ aˬ htoꞈ ma ve awˬ lawn tawˇ taˍ tcuh laˇ ve le? Aˬ htoꞈ ma ve na hkawˇ jehˬ daꞈ tuˬ le?

 Ponˬ laˬ ve 30 hkʼawꞈ hpaˆ ve awˬ yanˇ, Oˇseˍ Yaˬhoˉvaˬ ve Shaˉhkiˆhkanˍ ve chaw maˇ hpehꞈ sheˍ htaˇ, Gaˬnaˬ mvuhˇ miˬ lo hpaw˗e leh Yuˇloꞈ teˇ mvuhˇ miˬ lo ca kʼawꞈ chehˇ ve yoˬ. ^[1] (Awˬ maiˉ hkʼawꞈ nawˉ lo cawˬ ve.) Yawˇ kʼoˆ ve, “maˇ maw maw yawˇ gʼa shiˍ ve maˇ˗o ve chaw a yeˇ maˇ te laˇ. Mvuhˇ haw awˬ shaˉ chi hkʼe ve kaꞈ maˇ gʼa hpuˇ jaw. Ngaˬ caꞈ poˬ yaꞈ kuiˬ juˇ tawˆ˗e htaˇ, kaˆ jaˇ ve awˉ lawˉ puiˉ hpehꞈ ve pa taw ngaˬ hawˬ ve yoˬ.” Oˇseˍ tawˇ hkawˇ awˬ suhˉ kʼawꞈ henˇ ve haˍ jaˇ ve pa taw, yawˇ kanˉ daꞈ ve gʼa tuˬ 1 hkʼawꞈ hpaˆ gʼa yehˇ ve yoˬ. Awˬ lawn kʼo yawˇ chehˇ kuiˬ htaꞈ vuiˇ daꞈ jaˇ, yehˬ kʼa ve chaw htaꞈ dawˇ nawˇ leh chehˇ bawˬ ve yoˬ.

² Nawˬ yawˇ hkʼe leˇ shuˍ ve kʼo, shu nawˬ htaꞈ hkʼaˬ hkʼe te laˇ tcuh gaˇ ve dawˇ nyi sheˍ. Nawˬ hpawnˬ daꞈ kuiˬ lo kʼai htaˇ, hkʼaˬ kaꞈ lo la ve maˇ kʼoˆ, chaw awˬ sheuˉ hkʼaˬ hkʼe ve htawˇ, yawˇ hui hkʼa dehꞈ haꞈ yuˬ laˇ htaˇ, nawˬ ha lehˬ jaˇ ve maˇ heˆ laˇ. Awˬ tehˬ kʼo, Liꞈ hpu  hkʼaw awˬ tehˬ awˬ na Hkriꞈ yaˇ htaꞈ kʼoˆ piˇ ve, “hkehˉ chaw teˇ hpaˍ htaꞈ haꞈ yuˬ tuˬ taˇ leunˇ.” (Heˍbrehˇ 13:2) Chi htaꞈ pa taw, na hkawˇ chi teˇ geh chaˬ nyi kʼai sheˍ. Maˇ shiˍ daꞈ ve chaw htaꞈ Yaˬhoˉvaˬ hkʼaˬ hkʼe dawˇ ve le? Maˇ shiˍ daꞈ ve chaw htaꞈ ngaˬ hui dawˇ ve awˬ hkʼaˇ pa cawˇ ve laˇ? Leh teˇ mvuhˇ miˬ ve chaw Hkriꞈ yaˇ awˬ moˍ geh laˬ htaˇ, hkʼaˬ hkʼe te haꞈ yuˬ piˇ tuˬ ve le?

3, 4. Tawˆ kʼai ve 23:9 hkʼaw, Iˉsaˍreˍlaˆ chaw shu mvuhˇ miˬ ve chaw htaꞈ Gʼui sha hkʼaˬ hkʼe te tcuh gaˇ ve le? Aˬ htoꞈ ma pa taw le?

³ Yaˬhoˉvaˬ yawˇ ve chaw Eˇjiˇtuꞈ mvuhˇ miˬ shu ceˬ te ve hpehˇ piˇ hkʼawꞈ nawˉ, shu mvuhˇ miˬ ve chaw htaꞈ yawˇ hui daꞈ ve te piˇ tuˬ yawˇ awˬ liˇ tawˇ hkawˇ piˇ ve yoˬ. (Tawˆ kʼai ve 12:38, 49; 22:21) Shu mvuhˇ miˬ ve chaw a shaꞈ teꞈ hkʼaˇ maˇ sha ve pa taw, Yaˬhoˉvaˬ yawˇ hui htaꞈ nyi haꞈ shaˉ piˇ ve yoˬ. Tawˇ pa haˉ te kʼo, shu mvuhˇ miˬ ve chaw caˬ nu leuˉ taˍ ve gʼawˆ hpehꞈ ve yoˬ.—Oˉ kʼoˍ pui ve 19:9, 10.

⁴ Iˉsaˍreˍlaˆ chaw shu mvuhˇ miˬ ve chaw htaꞈ yawˆ yan piˇ tuˬ, Yaˬhoˉvaˬ chi hkʼe ceh maˇ gʼa kʼoˆ piˇ. Shu mvuhˇ miˬ ve chaw hpehꞈ htaˇ hkʼaˬ hkʼe kʼai ve le, Yaˬhoˉvaˬ Iˉsaˍreˍlaˆ chaw htaꞈ tawnˇ taˍ tcuh gaˇ ve yoˬ. (Tawˆ kʼai ve 23:9 gʼaw ve.) Iˉsaˍreˍlaˆ chaw shu ceˬ maˇ te sheˍ htaˇ, maˇ shuˍ daꞈ ve pa taw Eˇjiˇtuꞈ chaw yawˇ hui htaꞈ maˇ dawˇ cawˇ ve yoˬ. (Awˬ hkuiˉ puiˍ 43:32; 46:34; Tawˆ kʼai ve 1:11-14) Iˉsaˍreˍlaˆ chaw shu mvuhˇ miˬ ve chaw hpehꞈ htaˇ, a shaꞈ teꞈ hkʼaˇ tuꞈ hkanˍ jaˇ ve yoˬ. Awˬ lawn chi ve yawˇ hui htaꞈ tawnˇ taˍ leh, awˬ paˇ lo chehˇ ve shu mvuhˇ miˬ ve chaw htaꞈ daꞈ ve te piˇ tuˬ, Yaˬhoˉvaˬ te tcuh gaˇ ve yoˬ.—Oˉ kʼoˍ pui ve 19:33, 34.

5. Yaˬhoˉvaˬ hkʼa shuˍ shuˍ, shu mvuhˇ miˬ ve chaw htaꞈ daꞈ ve te piˇ tuˬ, aˬ htoꞈ ma ngaˬ hui htaꞈ ga laˇ gʼa ve le?

⁵ Yaˬhoˉvaˬ maˇ pa jaw. Chi htaꞈ pa taw shu mvuhˇ miˬ ve chaw Hkriꞈ yaˇ awˬ moˍ geh laˬ htaˇ, Yaˬhoˉvaˬ oˇ hkʼe ve chaw htaꞈ hkʼaˬ htaˆ kaꞈ daꞈ ve te piˇ ve ngaˬ hui maˇ leunˇ cawˇ ve yoˬ. (Bon maˍ ve 10:17-19; Maˍlaˍhkiˆ 3:5, 6) Shu mvuhˇ miˬ ve chaw aˬ htoꞈ ma gʼa hpuˇ ve dawˇ nyi sheˍ. Tawˇ pa haˉ te kʼo, tawˇ hkawˇ awˬ suhˉ maˇ na gʼa ve pa taw, maˇ hteˇ maˇ cawˇ ve htaꞈ gʼa hpuˇ ve yoˬ. Ngaˬ hui coˇ caˇ leh yawˇ hui htaꞈ ga piˇ leh daꞈ ve te piˇ sheˍ.—1 Peˍtruˆ 3:8.

6, 7. Yuˇdaꞈ chaw Hkriꞈ yaˇ shu htaꞈ nyi cha ve gʼaˇ hpehꞈ ve hkʼaˬ hkʼe hpeuꞈ maw laˇ ve le?

⁶ Oˇ htaˇ teˇ co˗e ve Yuˇdaꞈ chaw shu htaꞈ nyi cha puiˉ jaˇ ve yoˬ. Chi htaꞈ pa taw, Hkriꞈ yaˇ hui dawˇ hkʼaˇ chi hkʼe ve htaꞈ gʼaˇ tuˬ, gʼa tawˍ daꞈ jaˇ ve yoˬ. Peˍteˍkoˆteˍ 33 hkʼawꞈ htaˇ, Yeˍruˆsaˍlehnˍ venˇ lo chehˇ ve Yuˇdaꞈ chaw Hkriꞈ yaˇ lehˬ shu mvuhˇ miˬ laˬ ve chaw awˬ suhˉ htaꞈ haꞈ yuˬ piˇ leh dawˇ haˍ piˇ puiˉ ve yoˬ. (Tcuh yaˇ 2:5, 44-47) “Haꞈ yuˬ ve” kʼoˆ gaˇ ve lehˬ “maˇ shiˍ daꞈ ve chaw htaꞈ daꞈ ve te piˇ ve” awˬ lawn chi, Yuˇdaꞈ chaw Hkriꞈ yaˇ na gʼa ve hpeuꞈ maw laˇ ve yoˬ.

⁷ Yaꞈ hkʼaˇ oˇ htaˇ ve awˬ yanˇ, Heˍlaˍsaˆ tawˇ hkawˇ yaw ve Yuˇdaꞈ chaw yawˇ hui ve mehˇ chawˇ ma maˇ hteˇ maˇ cawˇ ve gʼa hpuˇ ve htaꞈ deˇ ve yoˬ. (Tcuh yaˇ 6:1) Chi htaꞈ pa taw, tcuh yaˇ teˇ hpaˍ hawˉ hkʼaˆ paˍ 7 gʼaˇ htaꞈ leuˆ yuˬ leh, hteˇ ve cawˇ ve te gʼa tuˬ yawˇ hui htaꞈ kʼai tcuh ve yoˬ. Mehˇ chawˇ ma nyi ma sha tuˬ, Heˍlaˍsaˆ awˬ meh cawˬ ve chaw htaꞈ leuˆ yuˬ ve yoˬ.—Tcuh yaˇ 6:2-6.

8, 9. (a) Ngaˬ hui awˬ to nyi cha kuiˬ cawˬ ve tehꞈ shiˍ tuˬ, na hkawˇ aˬ htoꞈ ma na nyi cawˇ ve le? (b) Ngaˬ hui aˬ htoꞈ ma htaꞈ yuˬ baˬ cawˇ ve le? (1 Peˍtruˆ 1:22)

 ⁸ Ngaˬ hui maˇ shiˍ awˬ tehˬ kʼo, ngaˬ hui teˇ gʼaˇ le le htawˇ chaw liˇ vaˇ liˇ ve teˇ hkʼaˇ heuˆ la ve yoˬ. (Roˉmaꞈ 12:2) Leh chehˇ laˬ kuiˬ, chaw ceuˬ, leh awˬ sheuˉ maˇ shu daꞈ ve chaw maˇ daꞈ ve awˬ lawn awˬ chawˇ awˬ paˆ, kanˉ teˇ geh te ve chaw, leh liꞈ henˇ yehˬ lo ve awˬ chawˇ yaw daꞈ ve ngaˬ hui kaꞈ gʼa kaˇ ve yoˬ. Awˬ lawn chi teˇ hpaˍ ngaˬ hui htaꞈ hkʼaˬ hkʼe taw heuˆ la kuiˬ cawˬ ve le? Ngaˬ hui ve chaw ceuˬ leh chaw liˇ vaˇ liˇ htaꞈ shu kʼoˆ guiˇ gʼuiˬ guiˇ laˇ ve kʼo, hkʼaˬ hkʼe dawˇ ve le?

⁹ Tcuh yaˇ Peˍtruˆ kaꞈ Yuˇdaꞈ chaw maˇ hpehꞈ ve htaꞈ nyi cha jaw ve yoˬ. Yaꞈ hkʼaˇ, dawˇ hkʼaˇ maˇ daꞈ ve chi htaꞈ awˬ meuˇ awˬ meuˇ yuˬ baˬ gʼa ve yoˬ. (Tcuh yaˇ 10:28, 34, 35; Gaˍlaˍtiˆ 2:11-14) Chi hkʼa shuˍ shuˍ, ngaˬ hui kaꞈ nyi cha kuiˬ leh a shu yawˇ chaw ceuˬ htaꞈ haꞈ ve chi hiˉ˗eh cawˬ kʼo, coˇ caˇ leh hkʼa peu˗eˬ yuˬ baˬ cawˇ ve yoˬ. (1 Peˍtruˆ 1:22 gʼaw ve.) Aˬ htoꞈ ma teˇ ceuˬ ngaˬ hui htaꞈ ga laˇ gʼa ve le? Hkʼaˬ teˇ mvuhˇ miˬ laˬ ve maˇ kʼo, ngaˬ hui teˇ gʼaˇ le le maˇ beˇ ve chaw hpehꞈ ve leh ponˬ ve htaꞈ gʼa kuiˬ ve maˇ heˆ, taˇ leunˇ sheˍ. (Roˉmaꞈ 3:9, 10, 21-24) Chi htaꞈ pa taw, ngaˬ hui shu aꞈ kehˉ daꞈ ve maˇ dawˇ cawˇ! (1 Kawˇrenˍhtuˆ 4:7) Tcuh yaˇ Pawˇluꞈ hkʼa shuˍ ngaˬ hui dawˇ cawˇ ve yoˬ. Yawˇ awˬ viˉ awˬ nyi htaꞈ kʼoˆ piˇ ve, “nawˬ hui lehˬ shu mvuhˇ miˬ ve chaw maˇ kʼawꞈ hpehꞈ. Hkehˉ chaw kaꞈ maˇ kʼawꞈ hpehꞈ. . . . Gʼuiˬ sha ve yehˬ awˬ hkʼaw lo yehˬ yaˇ kʼa yaˇ teˇ hpaˍ hpehꞈ ve yoˬ.” (Eˇfeˇsuꞈ 2:19) Shu htaꞈ nyi cha ve dawˇ hkʼaˇ baˬ taˉ leh awˬ hoꞈ awˬ han awˬ suhˉ veuꞈ deh tuˬ, ngaˬ hui teˇ gʼaˇ le le gʼa coˇ caˇ ve yoˬ.—Kawˇlawˇsehˇ 3:10, 11.

10, 11. Maˇ shiˍ daꞈ ve chaw htaꞈ Yaˬhoˉvaˬ dawˇ ve awˬ hkʼaˇ, Bawˇzaˆ hkʼaˬ hkʼe henˇ yuˬ ve le?

¹⁰ Maˇ shiˍ daꞈ ve chaw htaꞈ Yaˬhoˉvaˬ dawˇ ve awˬ hkʼaˇ, ka tiꞈ yeˬ ve Bawˇzaˆ henˇ yuˬ ve yoˬ. Bawˇzaˆ yawˇ ve ti mi hkʼaw ca nyi htaˇ, Mawˇbaˆ mvuh miˬ lo laˬ ve yaˇ miˇ Ruˉhtaˆ htaꞈ gʼa mawˬ ve yoˬ. Sheˆ taˍ ve caˬ nu teˇ hpaˍ htaꞈ gʼawˆ yuˬ tuˬ, yawˇ kanˉ hkeuꞈ jaˇ ve yoˬ. Moˇseˍ ve awˬ liˇ tawˇ hkawˇ hkʼaw awˬ tehˬ kʼo, Ruˉhtaˆ lehˬ gʼawˆ hpehꞈ ve yoˬ. Yaꞈ hkʼaˇ, yawˇ a hkaw˗anˬ lawˬ ve Bawˇzaˆ gʼa kaˇ htaˇ, dawˇ cawˇ jaˇ leh caˬ kʼaꞈ hkʼaw ve caˬ nu teˇ hpaˍ htawˇ gʼawˆ tcuh ve yoˬ.—Ruˉhtaˆ 2:5-7, 15, 16 gʼaw ve.

¹¹ Ruˉhtaˆ shu mvuhˇ miˬ ve chaw hpehꞈ leh haˍ gʼawˇ jaˇ ve pa taw Bawˇzaˆ dawˇ haˍ ve yoˬ. Chi htaꞈ pa taw, kanˉ teˇ gehˇ te ve chaw yawˇ htaꞈ hkʼa mvuhˇ hkʼa na maˇ gʼa te tuˬ, Ruˉhtaˆ htaꞈ kuˬ leh yawˇ ve ti mi hkʼaw kanˉ te chehˇ ve yaˇ miˇ teˇ hpaˍ geh chehˇ tcuh ve yoˬ. Leh yawˇ ve kanˉ te ve chaw hkʼa shuˍ, Ruˉhtaˆ htaꞈ caˇ tuˬ leh iˉ kaˆ piˇ ve yoˬ. Shu mvuhˇ miˬ ve yaˇ miˇ chi teˇ gʼaˇ htaꞈ Bawˇzaˆ yawˆ yan leh awˬ gʼaˇ piˇ ve yoˬ.—Ruˉhtaˆ 2:8-10, 13, 14.

12. Maˇ shiˍ daꞈ ve chaw htaꞈ ngaˬ hui daꞈ ve te piˇ htaˇ, hkʼaˬ hkʼe kʼai tuˬ le?

¹² Bawˇzaˆ Ruˉhtaˆ htaꞈ daꞈ ve te piˇ ve awˬ lawn kʼo, awˬ hpawˇ mawˇ ve awˬ e Nawˉmiꞈ htaꞈ yawˇ haꞈ leh ka tiꞈ yeˬ ve chi hkʼe ceh tiˉ maˇ heˆ. Yaˬhoˉvaˬ htaꞈ oˉ kʼoˍ tanˬ pui leh Yaˬhoˉvaˬ yawˇ htaꞈ haꞈ shaˉ laˇ tuˬ lawˬ ve pa taw yoˬ. Bawˇzaˆ yawˇ htaꞈ daꞈ ve te piˇ htaˇ, awˬ tehˬ kʼo, Yaˬhoˉvaˬ haꞈ pehnˇ ve ka tiꞈ yeˬ ve Bawˇzaˆ henˇ yuˬ chehˇ ve yoˬ. (Ruˉhtaˆ 2:12, 20; Tawˇ naˉ ve 19:17) Chi beuꞈ teˇ co˗e htawˇ hkʼa shuˍ yoˬ. Ngaˬ hui shu  htaꞈ daꞈ ve te piˇ htaˇ, “chaw hkʼa peu˗eˬ” awˬ tehˬ ve henˇ leh Yaˬhoˉvaˬ yawˇ htaꞈ haꞈ jaˇ ve shiˍ tuˬ, ngaˬ hui ga piˇ gʼa ve yoˬ.—1 Tiˆmoˉseˍ 2:3, 4.

13, 14. (a) Hpawnˬ daꞈ kuiˬ lo maˇ shiˍ daꞈ ve chaw htaꞈ aˬ htoꞈ ma te haꞈ yuˬ piˇ cawˇ ve le? (b) Shu mvuhˇ miˬ laˬ ve chaw htaꞈ nawˬ tawˇ maˇ yaw haˆ kʼo, aˬ htoꞈ ma te cawˇ ve le?

¹³ Maˇ shiˍ daꞈ ve chaw htaꞈ ngaˬ hui daꞈ ve te piˇ tuˬ, hpawnˬ daꞈ kuiˬ lo haꞈ pehnˇ ve hkʼaw haꞈ yuˬ piˇ gʼa ve yoˬ. Shu mvuhˇ miˬ laˬ guiˇ sheˍ ve chaw lehˬ yaꞈ taw leh yawˇ hui hkʼaˇ yawˇ hui ve chaw geh ceh tiˉ chehˇ gaˇ ve yoˬ. Maˇ˗o ve chaw dawˇ hkʼaˇ htaꞈ pa taw, yawˇ shu mvuhˇ miˬ ve chaw hkʼe taw maˇ daꞈ tehꞈ dawˇ ve yoˬ. Chi htaꞈ pa taw, ngaˬ hui yawˇ htaꞈ awˉ lawˉ haꞈ yuˬ leh a yeˇ hkʼa dehꞈ yuˬ piˇ cawˇ ve yoˬ. JW Language ehˆ yehˇ kʼo, haꞈ yuˬ piˇ tuˬ awˬ hkʼaˇ yawˇ ve chaw ceuˬ tawˇ hkawˇ nawˬ henˇ gʼa ve yoˬ.—Hpiˇliˇpiˆ 2:3, 4 gʼaw ve.

¹⁴ Shu mvuhˇ miˬ laˬ ve chaw htaꞈ nawˬ tawˇ maˇ yaw haˆ ve yoˬ hehˉ. Tawˇ yaw haˆ tuˬ, yawˇ htaꞈ nawˬ ve awˬ lawn awˉ lawˉ kʼoˆ piˇ cawˇ ve yoˬ. Chi hkʼe te kʼo, nawˬ hui laiˉ ceuˬ shu daꞈ ve cawˬ ve htaꞈ gʼa mawˬ tuˬ yoˬ. Maˇ leunˇ cawˇ ve chaw liˇ vaˇ liˇ awˬ hkʼaˇ daꞈ ve maˇ daꞈ ve cawˬ ve yoˬ.

15. Chehˇ kuiˬ aw suhˉ htaꞈ gu pa chehˇ ve chaw htaꞈ na gʼa tuˬ, hkʼaˬ hkʼe te cawˇ ve le?

¹⁵ Awˬ nu ve chaw yawˇ ngaˬ hui ve Hkriꞈ yaˇ awˬ moˍ hkʼaw teˇ gʼaˇ hpehꞈ ve tehꞈ dawˇ tcuh tuˬ, ngaˬ hui a shu yawˇ awˬ to htaꞈ na nyi cawˇ ve, ‘shu mvuhˇ miˬ lo chehˇ ve kʼo, ngaˬ htaꞈ hkʼaˬ hkʼe te laˇ tcuh gaˇ ve le?’ (Maꞈhtehˍ 7:12) Yawˇ hui chehˇ la kuiˬ aw suhˉ htaꞈ gu pa chehˇ ve, ngaˬ hui gʼa yeunˇ hkanˍ ve yoˬ. Awˉ lawˉ htaˇ, yawˇ hkʼaˬ hkʼe dawˇ leh te ve teˇ hpaˍ, ngaˬ hui  hkʼa dehꞈ maˇ na gʼa ve yoˬ. Yaꞈ hkʼaˇ, yawˇ ngaˬ hui hkʼa shuˍ dawˇ leh te tuˬ taˇ dawˇ. Yawˇ hkʼaˬ hkʼe hpehꞈ ve htawˇ, haꞈ yuˬ gʼa˗aw laˇ?—Roˉmaꞈ 15:7 gʼaw ve.

16, 17. (a) Shu mvuhˇ miˬ laˬ ve chaw htaꞈ meuˆ daꞈ maˇ la tuˬ, ngaˬ hui hkʼaˬ hkʼe te gʼa ve le? (b) Teˇ mvuhˇ miˬ lo laˬ ve awˬ viˉ awˬ nyi htaꞈ ngaˬ hui hkʼaˬ hkʼe ga piˇ gʼa tuˬ le?

¹⁶ Ngaˬ hui awˬ yanˇ yehˇ leh yawˇ hui ve mvuhˇ miˬ leh chaw liˇ vaˇ liˇ htaꞈ henˇ ve kʼo, yawˇ hui htaꞈ hkʼa dehꞈ shiˍ daꞈ gʼa tuˬ yoˬ. Ngaˬ hui ve yehˬ kʼa hkʼaw oˉ kʼoˍ pui htaˇ, Hkriꞈ yaˇ awˬ moˍ geh chehˇ la ve leh hto toˇ kuiˬ lo mawˬ daꞈ ve chaw ve chaw liˇ vaˇ liˇ htaꞈ, ngaˬ hui henˇ gʼa ve yoˬ. Awˬ hkʼaˇ teˇ hkʼaˇ cawˬ sheˍ ve, yawˇ ngaˬ hui aˉ hkʼaw lo awˬ caˇ la tuˬ kuˬ piˇ gʼa ve yoˬ. ‘Buiˇ shaˆ aˉ naˆ chaw hui yonˍ hpehꞈ tuˬ, Yaˬhoˉvaˬ yehˬ miˉ hpaw piˇ ve yoˬ.’ Chi htaꞈ pa taw, ngaˬ hui Yaˬhoˉvaˬ htaꞈ henˇ yuˬ leh, shu mvuhˇ miˬ lo laˬ ve “yehˬ yaˇ kʼa yaˇ tehꞈ kʼoˆ ve yonˍ ve chaw teˇ hpaˍ” htaꞈ yehˬ miˉ hpaw piˇ cawˇ ve yoˬ.—Tcuh yaˇ 14:27; Gaˍlaˍtiˆ 6:10; Yawˇbaˆ 31:32.

¹⁷ Shu mvuhˇ miˬ laˬ ve yehˬ kʼa geh chehˇ htaˇ, yawˇ hui coˇ caˇ leh pa ve htaꞈ ngaˬ hui awˬ hpuˇ shiˍ ve yoˬ. Yawˇ hui tawˇ hkawˇ awˬ suhˉ henˇ gaˇ ve htaꞈ ngaˬ hui chaˬ nyi gʼa ve yoˬ hehˉ. Yehˬ awˬ suhˉ, kanˉ awˬ suhˉ ca gʼa tuˬ awˬ hkʼaˇ, ngaˬ hui beˆ maˍ piˇ gʼa ve yoˬ. Awˬ ceuˬ chi hkʼa peu˗eˬ awˬ viˉ awˬ nyi htaꞈ ga piˇ gʼa maˇ jaˇ ve yoˬ.—Tawˇ naˉ ve 3:27.

18. Shu mvuhˇ miˬ laˬ ve chaw lehˬ yawˆ yan ve leh awˬ bon uiˍ hkawˇ daꞈ ve henˇ yuˬ tuˬ aˬ htoꞈ ma cawˬ ve le?

¹⁸ Shu mvuhˇ miˬ laˬ ve chaw, chaw liˇ vaˇ liˇ awˬ suhˉ htaꞈ gʼaꞈ te tuˬ, yawˇ hui coˇ caˇ jaˇ ve yoˬ.  Awˬ lawn chi Ruˉhtaˆ daꞈ ve henˇ yuˬ tuˬ hpehꞈ ve yoˬ. Awˉ lawˉ teˇ lawn, chaw liˇ vaˇ liˇ awˬ suhˉ htaꞈ yawˆ yan tuˬ, sheˆ taˍ ve caˬ nu gʼawˆ yuˬ tuˬ yawˇ a hkaw˗anˬ awˉ lawˉ lawˬ ve yoˬ. (Ruˉhtaˆ 2:7) Chi hkʼe ve teˇ gʼaˇ le le kaꞈ te hpehꞈ ve yawˇ maˇ dawˇ leh, shu yawˇ htaꞈ teꞈ chiˉ peꞈ laˇ tuˬ kaꞈ maˇ dawˇ. Nyiˇ lawn teˇ lawn, shu yawˇ htaꞈ daꞈ ve te piˇ htaˇ, yawˇ awˬ bon uiˍ hkawˇ awˬ nu ve chaw htaꞈ haˆ kʼoˆ piˇ ve yoˬ. (Ruˉhtaˆ 2:13) Chi hkʼe ve daꞈ ve awˬ liˇ awˬ hkʼaˇ shu mvuhˇ miˬ laˬ ve chaw cawˬ htaˇ, awˬ viˉ awˬ nyi leh oˇ kaˬ lo ve chaw yawˇ htaꞈ yawˆ yan piˇ tuˬ sha ve yoˬ.

19. Aˬ htoꞈ ma te maˇ shiˍ daꞈ ve chaw htaꞈ ngaˬ hui haꞈ yuˬ cawˇ ve le?

¹⁹ Yaˬhoˉvaˬ nyi ma daꞈ jaˇ leh teˇ gʼaˇ le le htaꞈ, daꞈ ve awˬ lawn sha tanˇ kaˇ tcuh ve pa taw, ngaˬ hui awˬ bon uiˍ jaˇ ve yoˬ. Teˇ hpaˍ hpaˍ kʼo yawˇ ve mvuhˇ miˬ lo chehˇ htaˇ, Yaˬhoˉvaˬ ve chaw geh Liꞈ hpu henˇ ve leh hpawnˬ daꞈ ve kʼai maˇ hpehꞈ ve yoˬ. Yaꞈ hkʼaˇ, chi teˇ hkui yawˇ hui ngaˬ hui htaꞈ mawˬ daꞈ hpehꞈ˗o. Chi htaꞈ pa taw, yawˇ hui ngaˬ hui htaꞈ peun daꞈ ve maˇ gʼa dawˇ tuˬ ga piˇ cawˇ ve yoˬ. Ngaˬ hui hpu maˇ cawˬ maˇ leh yawˇ htaꞈ hkʼa dehꞈ ga piˇ maˇ gʼa ve yoˬ. Yaꞈ hkʼaˇ, ngaˬ hui shu mvuhˇ miˬ ve chaw htaꞈ daꞈ ve te piˇ htaˇ, Yaˬhoˉvaˬ yawˇ hui htaꞈ haꞈ ve ngaˬ hui henˇ yuˬ gʼa ve yoˬ. ‘Gʼuiˬ sha te ve hkʼa shuˍ shuˍ te’ tuˬ, coˇ caˇ leh maˇ shiˍ daꞈ ve chaw htaꞈ hkʼaˬ htaˆ kaꞈ haꞈ yuˬ sheˍ!—Eˇfeˇsuꞈ 5:1, 2.