Maꞈhtehˍ 13:24-26 hkʼaw Yeˍsuˆ kʼoˆ ve, “mvuhˇ naw ma mvuhˇ miˬ lehˬ, yawˇ ve heh hkʼaw lo daꞈ ve awˬ yawˇ sheˍ ve chaw teˇ gʼaˇ htaꞈ shuˍ ve yoˬ. Chaw yaˇ hui zuhꞈ muiˉ kʼa chehˇ ve teˇ yanˇ, yawˇ ve canˇ paˍ laˬ leh, caˬ sheˍ taˍ kuiˬ lo veˬ kʼawˍ yawˇ sheˍ keu taˉ leh kʼoꞈ˗e ve yoˬ. Awˬ yeˬ yeˬ la leh awˬ shiˍ awˬ nu tawˆ la ve teˇ yanˇ, veˬ kʼawˍ htawˇ hkʼa tawˍ lehˆ tawˆ la ve htaꞈ gʼa mawˬ ve yoˬ.” Chaw teˇ hpaˍ dawˇ ve uˉ paˍ maˬ chi hpehꞈ kʼai maˇ gʼa. Yaꞈ hkʼaˇ, Roˉmaꞈ ve liꞈ kʼoˆ awˬ piˍ hkʼaw awˬ lawn chi ve hpehꞈ kʼai gʼa ve tehꞈ bvuhꞈ taˍ ve yoˬ.

Liꞈ hpu awˬ pon diˆ shaˍ naˍ liˍ teˇ kʼuˉ hkʼaw kʼoˆ ve, Roˉmaꞈ ve awˬ liˇ tawˇ hkawˇ hkʼaw kʼoˆ ve shu htaꞈ te hkʼawꞈ tuˬ, shu ve heh hkʼaw lo veˬ kʼawˍ yawˇ sheˍ keu ve lehˬ yaꞈ ve yoˬ. Awˬ liˇ tawˇ hkawˇ chi hkʼe cawˬ ve lehˬ awˬ tehˬ hpehꞈ jaw ve yoˬ. Awˬ liˇ awˬ piˍ htaꞈ shiˍ leh maˍ ve chaw Aˬlaˆsaꞈtaˍ Hkeuˍ yawˇ kʼoˆ maˍ laˇ ve, 533 hkʼawꞈ htaˇ jawˇ mawˇ Roˉmaꞈ Jaˆsaꞈhtiˆniꞈanˇ (Justinian) Daiˍjeˆ liꞈ (Digest) bvuhꞈ ve yoˬ. 100-250 hkʼawꞈ chehˇ ve awˬ liˇ tawˇ hkawˇ kanˉ te paˍ Roˉmaꞈ ve awˬ liˇ caˉ daꞈ ve hkʼa peu˗eˬ bvuhꞈ taˍ ve, liꞈ kʼoˆ chi ve hkʼaw shaw hpoˆ taˍ ve yoˬ. Oˇ ve teˇ maˬ hkʼaw 200 hkʼawꞈ htaˇ, chaw teˇ gʼaˇ shu ve heh hkʼaw lo veˬ kʼawˍ yawˇ ca sheˍ leh ti taˍ ve mawˇ hkʼa peu˗eˬ htawˇ luˬ kʼai ve yoˬ. Yaꞈ ve chaw geh heh shehˍ hpaˇ hkʼaˬ ma kuˬ yuˬ gaˇ ve htawˇ, Daiˍjeˆ liꞈ hkʼaw kʼoˆ maˍ laˇ taˍ ve yoˬ.

Awˬ lawn chi hkʼe ve Roˉmaꞈ uˉ peunˍ ve awˬ co˗e htaˇ awˬ tehˬ hpehꞈ jaw ve yoˬ. Chi htaꞈ pa taw, Yeˍsuˆ ve uˉ paˍ maˬ hkʼaw kaꞈ awˬ tehˬ hpehꞈ gʼa ve yoˬ.