1-2. Cuˇ yiˍ piˇ ve liꞈ 11:6 hkʼaw Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ ve htaꞈ hkʼaˬ hkʼe te caˉ daꞈ ve le?

 Mvuhˇ miˬ teˇ hpaˍ hpaˍ hkʼaw nyi ma pfuhˇ ve chaw awˬ viˉ awˬ nyi hto toˇ˗e htaˇ Liꞈ hpu henˇ gaˇ ve yoˬ. Chi yawˇ hui law mawˬ jaˇ˗oˬ ve htaꞈ shuˍ ve yoˬ. Yaꞈ hkʼaˇ, mvuhˇ miˬ teˇ hpaˍ hpaˍ hkʼaw Gʼuiˬ sha ve awˬ lawn maˇ heˆ leh Liꞈ hpu htaꞈ a yeˇ hkʼa dehꞈ maˇ yuˬ. Hkʼe kʼo nawˬ hto toˇ kuiˬ awˬ ti hkʼaˬ hkʼe kʼai ve le? Chaw yaˇ nyi ma pfuhˇ ve maˇ pfuhˇ ve htawˇ, Yaˬhoˉvaˬ kanˉ chi ve peuˬ˗oˬ kʼoˆ laˇ htaˇ hkʼa gaˬ, ngaˬ hui htaꞈ caˉ leh hto toˇ tcuh gaˇ ve yoˬ.

² Hto toˇ ve kanˉ chi hkʼaˬ hkʼe htaˇ peuˬ˗e tuˬ Yaˬhoˉvaˬ dawˇ teh˗oˬ leh kanˉ chi peuˬ˗oˬ htaˇ “awˬ leh meuˇ gaˬ la tuˬ yoˬ.” (Maꞈhtehˍ 24:14, 36) Yaꞈ hkʼaˇ, oˇ ve teˇ nyi maˇ gaˬ sheˍ htaˇ “gʼaˇ hteꞈ te˗o” tehꞈ kʼoˆ ve htaꞈ ngaˬ hui hkʼaˬ hkʼe gʼaꞈ te gʼa tuˬ le? *—Cuˇ yiˍ piˇ ve 11:6 *, awˬ maiˉ htaꞈ gʼaw sheˍ.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Hto toˇ ve maˇ heˆ leh “chaw ca shehˍ hpaˇ” hkʼa dehꞈ te gʼa tuˬ, peuˬ taˉ ve teˇ lawn hkʼaw ngaˬ hui gʼa te cawˇ ve 4 ceuˬ cawˬ ve htaꞈ gʼa henˇ˗oˬ. (Maꞈhtehˍ 4:19) Ngaˬ hui hkʼaˬ hkʼe gʼa hpuˇ ve htawˇ caˉ leh hto toˇ gʼa tuˬ ga laˇ ve, awˬ lawn chi ve hkʼaw 3 ceuˬ htaꞈ teˇ geh henˇ tuˬ yoˬ. (1) A shaꞈ teꞈ kuiˬ hkʼaw hto toˇ ve kanˉ hkʼaˬ htaˆ kaꞈ a yeˇ uiˍ jaˇ ve tehꞈ shawˍ ve, (2) yeunˇ hkanˍ ve, (3) yonˍ hkʼaˇ yonˍ yeˬ tuˬ haꞈ shaˉ ve, chi ve teˇ hpaˍ aˬ htoꞈ ma te a yeˇ uiˍ jaˇ ve teˇ geh henˇ tuˬ yoˬ.

4. Yaˬhoˉvaˬ ngaˬ hui htaꞈ hto toˇ ve kanˉ te tcuh laˇ ve a shaꞈ teꞈ kuiˬ hkʼaw aˬ htoꞈ ma te hkʼaˬ htaˆ kaꞈ a yeˇ uiˍ jaˇ ve tehꞈ shawˍ cawˇ ve le?

⁴ Awˬ leh meuˇ ve awˬ yanˇ lehˬ chaw yaˇ htaꞈ hkʼaˬ hkʼe hpehꞈ la tuˬ ve Yeˍsuˆ kʼoˆ taˍ peuˬ ve yoˬ. Chi ve yawˇ ve awˬ laꞈ gʼawˇ nyi ma pfuhˇ  tuˬ te piˇ leh yawˇ hui bon maˍ ve kanˉ a shaꞈ teꞈ kuiˬ hkʼaw a yeˇ uiˍ jaˇ ve maˇ shawˍ tuˬ te piˇ ve yoˬ. Hkʼe te leh Yeˍsuˆ awˬ laꞈ gʼawˇ htaꞈ “shaw taˍ˗oꞈ” tehꞈ kʼoˆ ve yoˬ. (Maꞈhtehˍ 24:42) Noˉaꞈ ve awˬ co˗e htaˇ, chaw yaˇ yawˇ shaˍ tiꞈ piˇ ve htaꞈ maˇ na gaˇ tuˬ laiˉ ceuˬ te piˇ ve yoˬ. Chi ve hkʼa shuˍ shuˍ ngaˬ hui kaꞈ awˬ nu ve htaꞈ nyi ma pfuhˇ tuˬ te laˇ ve yoˬ. (Maꞈhtehˍ 24:37-39; 2 Peˍtruˆ 2:5) Hkʼe te leh, Yaˬhoˉvaˬ ngaˬ hui htaꞈ hto toˇ ve kanˉ te tcuh laˇ ve, a shaꞈ teꞈ kuiˬ hkʼaw hkʼaˬ htaˆ kaꞈ a yeˇ uiˍ jaˇ ve tehꞈ shawˍ cawˇ ve yoˬ.

5. Tcuh yaˇ liꞈ 1:6-8 hkʼawꞈ kʼoˆ ve, ha lehˬ ve bon hkawˇ hto toˇ ve hkʼaˬ hkʼe taw taw zuhˇ kʼai tuˬ le?

⁵ Chi teˇ hkui Gʼuiˬ sha ve mvuhˇ miˬ awˬ lawn hto toˇ ve, a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ cawˇ ve yoˬ. Yeˍsuˆ kʼoˆ taˍ ve, awˬ laꞈ gʼawˇ yawˇ suh peuˬ hkʼawꞈ nawˉ kaꞈ bon maˍ sheˍ leh kanˉ chi ve yawˇ aꞈ kehˉ te maˇ tuˬ yoˬ. (Yoˇhanˬ 14:12) Yeˍsuˆ suh peuˬ hkʼawꞈ nawˉ awˬ laꞈ gʼawˇ teˇ hpaˍ ngaˇ ca ve kanˉ kʼawꞈ te ve yoˬ. Yeˍsuˆ kʼawꞈ teꞈ tu la peuˬ hkʼawꞈ nawˉ anˇ tuˬ te leh yawˇ hui ngaˇ ca ve gʼa maˇ jaˇ tuˬ te piˇ leh “chaw ca shehˍ hpaˇ” te ve kanˉ teˇ ceuˬ le aꞈ kehˉ a yeˇ uiˍ jaˇ ve shawˍ tuˬ yawˇ kʼoˆ maˍ piˇ ve yoˬ. (Yoˇhanˬ 21:15-17) Yawˇ mvuhˇ naw ma hkʼoˆ maˇ teˆ˗e sheˍ htaˇ, yawˇ hui htaꞈ kʼoˆ piˇ ve yawˇ tanˬ˗aˉ ve kanˉ chi Iˉsaˍreˍlaˆ mvuhˇ miˬ ceh maˇ heˆ awˬ nu ve mvuhˇ miˬ lo htawˇ gʼa gaˬ˗e tuˬ yoˬ. (Tcuh yaˇ 1:6-8 gʼaw sheˍ.) Laiˉ hkʼawꞈ peuˬ hkʼawꞈ nawˉ, “[Gʼuiˬ sha] ve awˬ nyi teˇ nyi” * htaˇ hpehꞈ la tuˬ ve awˬ ceuˬ Yeˍsuˆ lehˬ tcuh yaˇ Yoˇhanˬ htaꞈ zuhꞈ maˆ mawˬ tcuh ve yoˬ. Chi ve hkʼaw “co co taiˍ taiˍ yeˬ ve ha lehˬ ve bon hkawˇ” leh ‘miˬ guiˬ hkʼoˆ lo chehˇ ve chaw hkʼa peu˗eˬ, mvuhˇ miˬ teˇ peˆ le le, awˬ ceuˬ awˬ hkʼaˇ teˇ ceuˬ le le, tawˇ hkawˇ teˇ ceuˬ le le’ hto toˇ ve kanˉ chi mvuhˇ naw ma tcuh yaˇ beˆ maˍ chehˇ ve tehꞈ Yoˇhanˬ mawˬ ve yoˬ. (Hpeuꞈ maˍ ve 1:10; 14:6) Chi teˇ hkui Yaˬhoˉvaˬ ngaˬ hui htaꞈ miˬ guiˬ chi hkʼoˆ teˇ kaˬ le le lo daꞈ ve awˬ lawn sha tanˇ hto toˇ tcuh gaˇ leh kanˉ chi ve peuˬ htaˇ hkʼa gaˬ te tcuh gaˇ ve tehꞈ hkʼa tawˍ lehˆ gʼa mawˬ ve yoˬ.

6. Hto toˇ ve kanˉ ngaˬ hui a shaꞈ teꞈ kuiˬ hkʼaw a yeˇ uiˍ jaˇ tehꞈ shawˍ tuˬ aˬ htoꞈ ma ga laˇ ve le?

 ⁶ Yaˬhoˉvaˬ ngaˬ hui awˬ pon te laˇ ve teˇ ceuˬ le le dawˇ nyi htaˇ, hto toˇ ve kanˉ a shaꞈ teꞈ kuiˬ hkʼaw a yeˇ uiˍ jaˇ ve tehꞈ shawˍ ve yoˬ. Tawˇ pa haˉ te kʼo, liꞈ kʼoˆ, awˬ hkʼeun hkʼaw yehˇ tuˬ ve liꞈ, awˬ hkawˇ leh VDO, JW awˬ han tawˆ kuiˬ chi ve teˇ hpaˍ kaꞈ Yaˬhoˉvaˬ ngaˬ hui htaꞈ peꞈ laˇ ve yoˬ. Chi teˇ hkui ngaˬ hui ve vehˆsaiˉ hkʼaw 1,000 chaw ceuˬ tawˇ hkawˇ hpaˆ cawˬ ve yoˬ! (Maꞈhtehˍ 24:45-47) Miˬ guiˬ chi hkʼoˆ lo mvuhˇ miˬ hpawˇ leh bon hpawˇ maˇ cawˇ maˇ hawˍ daꞈ. Chaw yaˇ paw sha ve leh haˍ ve gʼawˇ ve kaꞈ fuiˍ daꞈ pehˬ daꞈ ve yoˬ. Yaꞈ hkʼaˇ, miˬ guiˬ chi hkʼoˆ lo Gʼuiˬ sha ve kanˉ te ve chaw 8 lanˬ gʼaˇ hpaˆ teˇ moˍ tiˉ hpehꞈ ve yoˬ. Tawˇ pa haˉ te kʼo, shinˉ peuˬ 5 nyi Ha pa 4 maˬ 2019 hkʼawꞈ, miˬ guiˬ chi hkʼoˆ lo Teˇ nyi le le Liꞈ hpu chaˬ nyi tuˬ VDO hkʼaw hkʼa shuˍ nyi ve pa taw, Yaˬhoˉvaˬ ve Shaˉhkiˆhkanˍ ve chaw teˇ moˍ tiˉ hpehꞈ ve yoˬ. Leh oˇ ve teˇ nyi mvuhˇ hpeuꞈ htaˇ, Yeˍsuˆ suh ve dawˇ nawˇ tuˬ hpawnˬ daꞈ ve laˬ ve chaw 20,919,041 gʼaˇ cawˬ ve yoˬ. Daꞈ jaˇ ve awˬ ceuˬ chi htaꞈ ngaˬ hui mawˬ leh dawˇ nyi htaˇ, awˬ moˍ chi ve hkʼaw teˇ gʼaˇ gʼa hpehꞈ ve anˇ tuˬ hkʼe hpehꞈ ve yoˬ. Hkʼe te leh Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ ve a yeˇ uiˍ jaˇ tehꞈ shawˍ ve yoˬ.

7. Hto toˇ ve kanˉ ngaˬ hui a shaꞈ teꞈ kuiˬ hkʼaw a yeˇ uiˍ jaˇ ve tehꞈ shawˍ tuˬ Yeˍsuˆ ve awˬ lawn hkʼaˬ hkʼe ga laˇ ve le?

⁷ Hto toˇ ve kanˉ a shaꞈ teꞈ kuiˬ hkʼaw a yeˇ uiˍ jaˇ tehꞈ te gʼa ve teˇ hkʼaˇ lehˬ, Yeˍsuˆ htaꞈ henˇ yuˬ ve yoˬ. Yeˍsuˆ bon maˍ htaˇ teˇ ceuˬ kaꞈ yawˇ nyi ma pfuhˇ tuˬ maˇ te laˇ tcuh. (Yoˇhanˬ 18:37) Tawˇ pa haˉ te kʼo, Saˍtanˍ Yeˍsuˆ htaꞈ ca beˬ la htaˇ, ‘miˬ guiˬ hkʼoˆ hkʼa cawˬ ve hkʼa peu˗eˬ’ yawˇ htaꞈ peꞈ laˇ˗a tehꞈ kʼoˆ piˇ htaˇ maˇ haꞈ yuˬ. Chaw yaˇ Yeˍsuˆ htaꞈ hkunˉ hawˉ hkanˇ nyiˉ te tcuh˗a te htaˇ kaꞈ yawˇ hpaw˗e ve yoˬ. (Maꞈhtehˍ 4:8, 9; Yoˇhanˬ 6:15) Yawˇ paw sha ve htaꞈ a yeˇ maˇ yuˬ. Yeˍsuˆ fawˉ ve mehˍ ve gʼa hpuˇ jaˇ ve htawˇ, yawˇ bon maˍ ve kanˉ htaꞈ a yeˇ uiˍ jaˇ tehꞈ shawˍ ve yoˬ. (Luˉkaꞈ 9:58; Yoˇhanˬ 8:59) Ngaˬ hui ve yonˍ hkʼaˇ htaꞈ lawˇ nyi laˇ htaˇ, hto toˇ ve kanˉ ngaˬ hui kaꞈ a yeˇ uiˍ jaˇ tehꞈ shawˍ gʼa ve yoˬ. Tcuh yaˇ Pawˇluꞈ Hkriꞈ yaˇ htaꞈ Yeˍsuˆ awˬ hkʼaˇ suh gʼaꞈ te tuˬ beˆ maˍ piˇ ve htaꞈ ngaˬ hui tawnˇ gʼa ve kʼo, “awˬ gʼaˇ maˇ gʼa nuˇ leh, nyi ma maˇ gʼa luˬ tuˬ” yoˬ!—Heˍbrehˇ 12:3.

8. Yeunˇ hkanˍ ve lehˬ aˬ htoꞈ ma le? Leh aˬ htoꞈ ma te chi teˇ hkui yeunˇ hkanˍ ve a yeˇ uiˍ jaˇ ve le?

⁸ Yeunˇ hkanˍ ve lehˬ awˬ tcuhˉ awˬ yanˇ pa kʼai htaˇ hkʼa gaˬ nyi ma gawˬ lehˍ te leh gʼa lawˬ taˍ ve yoˬ. Daꞈ ve teˇ ceuˬ ceuˬ ngaˬ hui law maw jaˇ˗oˬ ve maˇ heˆ leh shoꞈ shaꞈ ve teˇ hpaˍ peuˬ kʼai tuˬ ngaˬ hui law chehˇ taˍ ve yoˬ hehˉ. Hkʼaˬ hkʼe hpehꞈ ve htawˇ, gʼa yeunˇ hkanˍ cawˇ ve yoˬ. Tcuh kaˍ paˍ Haˍbaˍkuˆ kaꞈ Yuˇdaꞈ mvuhˇ miˬ hkʼaw luˬ ve sheˆ ve peuˬ kʼai tuˬ ve awˬ nyi htaꞈ law chehˇ ve yoˬ. (Haˍbaˍkuˆ 1:2) Yeˍsuˆ ve awˬ laꞈ gʼawˇ kaꞈ “Gʼuiˬ sha ve mvuhˇ miˬ teˇ cawˬ haˉ tawˆ la” leh chi yawˇ hui htaꞈ Roˉmaꞈ uˉ peunˍ ve awˬ hawˉ lo hpehˇ laˇ tuˬ yoˬ tehꞈ dawˇ law ve yoˬ. (Luˉkaꞈ 19:11) Gʼuiˬ sha ve mvuhˇ miˬ haiˬ ve awˬ ceuˬ htaꞈ te luˬ tuˬ awˬ nyi leh miˬ guiˬ awˬ suhˉ hkʼaw Gʼuiˬ sha ve hkawˇ na yuˬ ve chaw ceh tiˉ cawˬ tuˬ htaꞈ ngaˬ hui kaꞈ law chehˇ ve yoˬ. (2 Peˍtruˆ 3:13) Yaꞈ hkʼaˇ, Yaˬhoˉvaˬ tinˍ taˍ ve htaꞈ law chehˇ htaˇ, gʼa yeunˇ hkanˍ ve yoˬ. Yaˬhoˉvaˬ ngaˬ hui yeunˇ hkanˍ puiˉ ve chaw hpehꞈ tuˬ maˍ laˇ ve teˇ geh nyi sheˍ.

9. Yaˬhoˉvaˬ yeunˇ hkanˍ puiˉ ve tehꞈ ngaˬ hui htaꞈ aˬ htoꞈ ma maˍ laˇ ve le?

⁹ Yaˬhoˉvaˬ lehˬ yeunˇ hkanˍ ve daꞈ jaˇ ve henˇ tuˬ hpehꞈ ve yoˬ. Yaˬhoˉvaˬ lehˬ Noˉaꞈ haw loꞈ kʼoˍ te peuˬ tuˬ awˬ yanˇ piˇ leh “hteˇ ve cawˇ ve awˬ lawn htaꞈ bon maˍ” tcuh ve yoˬ. (2 Peˍtruˆ 2:5; 1 Peˍtruˆ 3:20) Sawˉdonˍ leh Gawˇmawˇraꞈ venˇ hkʼaw haiˬ ve chaw htaꞈ te luˬ tuˬ awˬ lawn Aˍbraˍhanˍ Yaˬhoˉvaˬ htaꞈ laiˉ pawˆ na piˇ ve htawˇ, yawˇ yeunˇ hkanˍ leh na taˍ piˇ ve yoˬ. (Awˬ hkuiˉ puiˍ 18:20-33) Iˉsaˍreˍlaˆ chaw Yaˬhoˉvaˬ htaꞈ ka tiꞈ maˇ yeˬ ve laiˉ ha hkʼawꞈ gaˬ ve kaꞈ yawˇ yeunˇ hkanˍ piˇ ve yoˬ. (Neˍhaˍmiˆ 9:30, 31) Chi teˇ hkui kaꞈ chaw yaˇ teˇ hpaˍ “venˇ baˆ htaꞈ dawˇ hpfuhˆ leh” Yaˬhoˉvaˬ geh kʼawꞈ la tuˬ yawˇ yeunˇ hkanˍ leh law  taˍ piˇ ve tehꞈ ngaˬ hui gʼa mawˬ ve yoˬ. (2 Peˍtruˆ 3:9; Yoˇhanˬ 6:44; 1 Tiˆmoˉseˍ 2:3, 4) Ngaˬ hui hto toˇ leh shu htaꞈ Liꞈ hpu maˍ piˇ htaˇ, Yaˬhoˉvaˬ ve awˬ lawn ngaˬ hui yeunˇ hkanˍ gʼaˇ tuˬ maˍ laˇ ve yoˬ. Chi hkʼoˆ kaꞈ ngaˬ hui yeunˇ hkanˍ puiˉ ve chaw hpehꞈ tuˬ kaꞈ Liꞈ hpu hkʼaw ve awˬ lawn maˍ laˇ sheˍ.

10. Yaˍkoˆ liꞈ 5:7, 8 hkʼaw muiˬ caˇ paˍ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹⁰ Yaˍkoˆ liꞈ 5:7, 8 gʼaw sheˍ. Muiˬ caˇ paˍ ve awˬ lawn ngaˬ hui yeunˇ hkanˍ puiˉ ve chaw hpehꞈ tuˬ maˍ laˇ ve yoˬ. Awˬ yawˇ teˇ hpaˍ uiˍ la vaiˇ jaˇ ve htawˇ, teˇ hpaˍ kʼo haˆ maˇ uiˍ la leh awˬ shiˍ awˬ nu gʼa gʼeuꞈ tuˬ awˬ yanˇ gʼa yehˇ maw ve yoˬ. Iˉsaˍreˍlaˆ chaw muiˬ caˇ paˍ lehˬ ha pa 10 maˬ mvuhˇ yeˬ tanˬ laˬ htaˇ awˬ yawˇ sheˍ ve yoˬ. Yawˇ hui ha pa 4 maˬ htaˇ awˬ shiˍ awˬ nu gʼeuꞈ ve yoˬ. Chi htaꞈ pa taw awˬ yawˇ sheˍ ve awˬ yanˇ leh gʼeuꞈ ve awˬ yanˇ aˬ laˬ hkʼe 6 ha pa gʼa yehˇ ve yoˬ. (Maˍkuˆ 4:28) Muiˬ caˇ paˍ yeunˇ hkanˍ ve htaꞈ ngaˬ hui henˇ yuˬ sheˍ. Yaꞈ hkʼaˇ, chi sha ve maˇ heˆ.

11. Yeunˇ hkanˍ ve lehˬ ngaˬ hui Gʼuiˬ sha ve kanˉ te ve hkʼaw hkʼaˬ hkʼe ga laˇ ve le?

¹¹ Maˇ biˇ ve chaw yaˇ lehˬ, aˬ htoꞈ ma te ve htawˇ haˆ haˆ mawˬ gaˇ ve yoˬ. Yaꞈ hkʼaˇ, ngaˬ hui aˬ htoꞈ ma te ve htawˇ haˆ uiˍ la tcuh gaˇ ve kʼo, awˬ yanˇ yehˇ leh hkʼa dehꞈ gʼa nyi haꞈ shaˉ ve yoˬ. Iˉ kaˆ gʼa pfuhˍ ve, jeꞈ gʼa duˇ hpfuhˆ piˇ ve, leh mvuhꞈ gʼa gʼawˬ baˬ piˇ ve yoˬ. Shu awˬ laꞈ gʼawˇ hpehꞈ la tuˬ maˍ piˇ ve kaꞈ hkʼa shuˍ yoˬ. Liꞈ hpu henˇ ve chaw maˇ daꞈ ve dawˇ hkʼaˇ nyi ma hkʼaw mvuhꞈ hkʼa shuˍ cawˬ ve htaꞈ yuˬ baˬ tuˬ awˬ yanˇ gʼa yehˇ ve yoˬ. Yeunˇ hkanˍ ve lehˬ shu ngaˬ hui ve hkawˇ maˇ na laˇ htaˇ awˬ gʼaˇ maˇ nuˇ tuˬ ga laˇ ve yoˬ. Yaꞈ hkʼaˇ, ngaˬ hui ve hkawˇ na leh Liꞈ hpu henˇ gaˇ ve chaw cawˬ ve htawˇ, gʼa yeunˇ hkanˍ sheˍ. Liꞈ hpu henˇ ve chaw co ha hpawˇ uiˍ la mvuh la leh yonˍ ve cawˬ tuˬ ngaˬ hui nyiˉ piˇ maˇ gʼa. Yeˍsuˆ ve awˬ laꞈ gʼawˇ yawˇ maˍ ve htaꞈ na gʼa tuˬ teˇ pawˆ pawˆ awˬ yanˇ gʼa yehˇ maw ve hkʼa shuˍ yoˬ. (Yoˇhanˬ 14:9) Ngaˬ hui lehˬ awˬ yawˇ sheˍ leh iˉ kaˆ pfuhˍ ve chaw hpehꞈ ve yoˬ. Yaꞈ hkʼaˇ, uiˍ la yeˬ la piˇ shehˍ hpaˇ lehˬ Gʼuiˬ sha yoˬ.—1 Kawˇrenˍhtuˆ 3:6.

12. Yonˍ hkʼaˇ maˇ shuˍ daꞈ ve chaw geh hto maˍ piˇ htaˇ hkʼaˬ hkʼe te yeunˇ hkanˍ gʼa tuˬ le?

 ¹² Yeunˇ hkanˍ gʼaˇ tuˬ haˍ jaˇ ve teˇ ceuˬ lehˬ, awˬ viˉ awˬ nyi yonˍ hkʼaˇ maˇ shuˍ daꞈ ve geh hto maˍ piˇ htaˇ yoˬ. Cuˇ yiˍ piˇ ve liꞈ 3:1, 7 hkʼaw ve awˬ liˇ awˬ hkʼaˇ ngaˬ hui htaꞈ ga laˇ gʼa ve yoˬ. Oˇ kaˬ lo kʼoˆ ve, “taꞈ iˉ gawˬ lehˍ chehˇ tuˬ ve awˬ yanˇ, leh tawˇ yaw tuˬ ve awˬ yanˇ” cawˬ ve yoˬ. Ngaˬ hui ve te hkʼaˇ dawˇ hkʼaˇ daꞈ ve lehˬ, awˬ viˉ awˬ nyi ngaˬ hui ve hkawˇ na gaˇ tuˬ te piˇ ve yoˬ hehˉ. Yaꞈ hkʼaˇ, awˬ yanˇ cawˬ htaˇ Yaˬhoˉvaˬ ve awˬ lawn yawˇ hui htaꞈ kʼoˆ maˍ piˇ cawˇ ve yoˬ. (1 Peˍtruˆ 3:1, 2) Ngaˬ hui hto toˇ ve leh Liꞈ hpu maˍ ve kaiˬ ve hkʼaw te leh teˇ gʼaˇ le le htaꞈ yeunˇ hkanˍ piˇ cawˇ ve yoˬ.

13-14. Yeunˇ hkanˍ ve awˬ lawn ngaˬ hui henˇ yuˬ gʼa ve a shu ve awˬ lawn cawˬ ve le?

¹³ Oˇ htaˇ teˇ co˗e leh chi beuꞈ teˇ co˗e Gʼuiˬ sha ve kanˉ te ve ka tiꞈ yeˬ ve chaw awˬ lawn ngaˬ hui yeunˇ hkanˍ gʼaˇ tuˬ maˍ laˇ ve yoˬ. Haˍbaˍkuˆ lehˬ luˬ ve sheˆ ve awˬ ceuˬ haˆ haˆ peuˬ tcuh gaˇ ve yoˬ. Yaꞈ hkʼaˇ, yawˇ yeunˇ hkanˍ leh kʼoˆ ve, “[ngaˬ] law na taˍ tuˬ yoˬ.” (Haˍbaˍkuˆ 2:1) Tcuh yaˇ Pawˇluꞈ mvuhˇ naw ma hkʼoˆ laꞈ shawnˍ gʼa gaˇ ve pa taw, yawˇ ve awˬ vuiˬ hkʼa dehꞈ te peuˬ ve yoˬ. Yaꞈ hkʼaˇ, yawˇ “Gʼuiˬ sha ve awˬ bon htaꞈ caˉ daꞈ ve ha lehˬ ve bon hkawˇ awˬ lawn shaˉ hkiˆ gʼa hkanˍ peuˬ” tuˬ caˉ leh yeunˇ hkanˍ ve yoˬ.—Tcuh yaˇ 20:24.

¹⁴ Awˬ hpawˇ awˬ miˇ ma teˇ ca Giˉlaˆ Liꞈ henˇ yehˬ lo henˇ peuˬ ve awˬ lawn htaꞈ teˇ geh nyi sheˍ. Shaˉhkiˆhkanˍ ve chaw hkʼa dehꞈ maˇ cawˬ ve mvuhˇ miˬ lo yawˇ hui awˬ vuiˬ te tuˬ kʼai tcuh ve yoˬ. Oˇ kaˬ lo ve chaw maˇ˗awˍ ve lehˬ bon htaꞈ maˇ yonˍ leh Liꞈ hpu kaꞈ maˇ henˇ gaˇ. Giˉlaˆ Liꞈ henˇ yehˬ hkʼaw teˇ geh henˇ peuˬ ve chaw, shu mvuhˇ miˬ lo Gʼuiˬ sha ve kanˉ te chehˇ ve, Liꞈ hpu henˇ chehˇ ve chaw uiˍ la mvuh la chehˇ ve cawˬ ve tehꞈ, kʼoˆ maˍ piˇ ve yoˬ. Hkʼaˬ hkʼe hpehꞈ ve htawˇ, yawˇ huiˉ maˬ hto toˇ kuiˬ awˬ ti lo shu maˇ na gaˇ ve kaꞈ yeunˇ hkanˍ leh Gʼuiˬ sha ve kanˉ te chehˇ sheˍ. Oˇ kaˬ lo yawˇ hui hto toˇ ve 8 hkʼawꞈ gaˬ˗oˬ ve htawˇ uiˍ la mvuh la ve chaw hkʼa dehꞈ maˇ cawˬ leh, yawˇ hui geh Liꞈ hpu henˇ ve chaw teˇ gʼaˇ Baˆtiˆsaˬ haꞈ yuˬ ve htaꞈ gʼa mawˬ htaˇ ha lehˬ jaˇ. Oˇ htaˇ leh chi teˇ hkui Gʼuiˬ sha ve kanˉ te ve ka tiꞈ yeˬ ve chaw awˬ lawn hkʼaˬ hkʼe maˍ laˇ ve le? Yawˇ hui kaiˬ ve hkʼaw Gʼuiˬ sha ve kanˉ te ve yoˬ. Leh Yaˬhoˉvaˬ kaꞈ yawˇ hui yeunˇ hkanˍ ve htaꞈ laꞈ shawnˍ piˇ ve yoˬ. “Yonˍ ve leh yeunˇ hkanˍ ve htaꞈ pa taw, Gʼuiˬ sha kʼoˆ taˍ ve teˇ hpaˍ htaꞈ gʼa taˍ ve chaw teˇ hpaˍ hkʼa shuˍ shuˍ” ngaˬ hui kaꞈ te sheˍ.—Heˍbrehˇ 6:10-12.

15. Yonˍ hkʼaˇ ngaˬ hui caˉ leh hto toˇ tuˬ gaˇ tuˬ aˬ htoꞈ ma ga laˇ ve le?

¹⁵ Ngaˬ hui hto toˇ ve awˬ lawn htaꞈ yonˍ gʼa ve yoˬ. Hkʼe te leh, awˬ lawn chi ve ngaˬ hui te gʼa ve hkʼe shu htaꞈ maˇ maˇ hto piˇ gaˇ ve yoˬ. Liꞈ hpu hkʼaw Yaˬhoˉvaˬ ka tiꞈ te taˍ laˇ ve htaꞈ ngaˬ hui yonˍ ve yoˬ. (Chiˇ mvuh ve 119:42; Iˉsaˍyaˆ 40:8) Leh Liꞈ hpu hkʼaw tcuh kaˍ paˍ ve tawˇ hkawˇ ngaˬ hui ve awˬ co˗e awˬ tehˬ hpehꞈ la ve htaꞈ mawˬ ve yoˬ. Chi hkʼoˆ kaꞈ, chaw yaˇ Liꞈ hpu hkʼaw beˆ maˍ piˇ ve htaꞈ gʼaꞈ te htaˇ a shaꞈ teꞈ hkʼaˇ daꞈ la ve htaꞈ ngaˬ hui gʼa mawˬ ve yoˬ. Chi ve hkʼa peu˗eˬ ngaˬ hui yonˍ hkʼaˇ uiˍ la mvuh la tuˬ te laˇ leh Gʼuiˬ sha ve mvuhˇ miˬ daꞈ ve awˬ lawn sha tanˇ shu htaꞈ hto piˇ gaˇ ve yoˬ.

16. Ngaˬ hui Yaˬhoˉvaˬ leh Yeˍsuˆ htaꞈ yonˍ leh hto toˇ gʼa tuˬ Chiˇ mvuh ve liꞈ 46:1-3 hkʼaw ngaˬ hui na gʼa tuˬ hkʼaˬ hkʼe ga laˇ ve le?

¹⁶ Ngaˬ hui Yaˬhoˉvaˬ htaꞈ yonˍ ve yoˬ. Ngaˬ hui hto toˇ ve awˬ ceuˬ yawˇ geh laˬ ve yoˬ. Gʼuiˬ sha ve mvuhˇ miˬ hkʼaw Jawˇmawˇ te tuˬ yawˇ leuˆ yuˬ taˍ ve Yeˍsuˆ htaꞈ ngaˬ hui yonˍ ve yoˬ. (Yoˇhanˬ 14:1) Ngaˬ hui hkʼaˬ hkʼe gʼa hpuˇ ve htawˇ, Yaˬhoˉvaˬ ngaˬ hui ve gʼaˇ va kuiˬ hpehꞈ leh awˬ gʼaˇ peꞈ laˇ shehˍ hpaˇ hpehꞈ ve yoˬ. (Chiˇ mvuh ve 46:1-3 gʼaw sheˍ.) Chi hkʼoˆ kaꞈ, Yeˍsuˆ Yaˬhoˉvaˬ geh awˬ gʼaˇ leh kanˇ paˆ gʼa leh chi beuꞈ teˇ co˗e, hto toˇ ve kanˉ htaꞈ beˆ maˍ chehˇ ve tehꞈ ngaˬ hui hkʼa dehꞈ yonˍ gʼa ve yoˬ.—Maꞈhtehˍ 28:18-20.

17. Ngaˬ hui hto toˇ gaˇ tuˬ aˬ htoꞈ ma te laˇ ve le? Tawˇ pa haˉ kʼoˆ maˍ laˇ sheˍ.

¹⁷ Yonˍ hkʼaˇ ngaˬ hui coˇ caˇ ve htaꞈ Gʼuiˬ sha awˬ bon naꞈ laˇ tuˬ tehꞈ yonˍ gʼa tuˬ ga laˇ ve yoˬ. Leh teˇ pawˆ pawˆ ngaˬ hui maˇ dawˇ maˇ gaˇ ve hkʼaw Gʼuiˬ  sha awˬ bon naꞈ laˇ ve yoˬ. (Cuˇ yiˍ piˇ ve 11:6) Tawˇ pa haˉ te kʼo, ngaˬ hui ve liꞈ kʼoˆ keu leh caꞈ tuˬ maˇ heˆ leh hpui lawˇ hkʼoˆ liꞈ kʼoˆ teh taˍ ve gʼuˇ suhˍ lo laiˉ hinˉ gʼaˇ juˇ hpanˍ ve yoˬ. Chi hkʼe hto toˇ ve awˬ bon gʼa˗aw laˇ? Gʼa ve yoˬ. Ha pa 11 maˬ 2014 hkʼawꞈ Gʼuiˬ sha ve mvuhˇ miˬ kanˉ te ve liꞈ kʼoˆ hkʼaw kʼoˆ ve, liꞈ tanˇ mvuh ve teˇ gʼaˇ Yaˬhoˉvaˬ ve Shaˉhkiˆhkanˍ ve chaw htaꞈ caˉ daꞈ ve awˬ lawn bvuhꞈ piˇ gaˇ ve htawˇ, hpawnˬ daꞈ kuiˬ yehˬ ca maˇ mawˬ. Yaꞈ hkʼaˇ, yawˇ liꞈ henˇ yehˬ hkʼaw hpui lawˇ hkʼoˆ Shaˉhkiˆhkanˍ ve chaw ve liꞈ kʼoˆ mawˬ ve pa taw, awˬ lawn awˬ tanˇ bvuhꞈ gʼa ve yoˬ. Awˬ leh meuˇ htaˇ yawˇ Baˆtiˆsaˬ haꞈ yuˬ leh chi teˇ hkui hkʼaˬ htaˆ kaꞈ gʼuˇ suhˍ peuˍ ve te ve yoˬ. Chi htaꞈ nyi kʼo, Gʼuiˬ sha ve mvuhˇ miˬ awˬ lawn shu gʼa kaˇ gʼa mawˬ cawˇ ve pa taw, ngaˬ hui hto toˇ gaˇ ve yoˬ.

18. Yaˬhoˉvaˬ loˍ ve hkʼe leˇ, yawˇ ve mvuhˇ miˬ daꞈ ve awˬ lawn sha tanˇ awˬ yanˇ tinˍ taˍ ve gaˬ kʼo awˬ tehˬ peuˬ˗e tuˬ yoˬ tehꞈ, hkʼaˬ hkʼe te ngaˬ hui yonˍ gʼa ve le?

¹⁸ Gʼuiˬ sha ve mvuhˇ miˬ daꞈ ve awˬ lawn sha tanˇ awˬ yanˇ tinˍ taˍ ve gaˬ kʼo awˬ tehˬ peuˬ˗e tuˬ yoˬ tehꞈ, ngaˬ hui yonˍ gʼa ve yoˬ. Noˉaꞈ awˬ co˗e htaˇ ve htaꞈ dawˇ nyi sheˍ. Yaˬhoˉvaˬ lehˬ ka tiꞈ te taˍ ve htaꞈ haꞈ shaˉ ve Gʼuiˬ sha hpehꞈ leh teˇ ceuˬ ceuˬ le le htaꞈ hkʼaˬ htaˆ kaꞈ awˬ yanˇ cawˇ cawˇ te ve tehꞈ ngaˬ hui gʼa mawˬ ve yoˬ. Miˬ guiˬ htaꞈ iˉ kaˆ maˇ htonˍ sheˍ awˬ gʼuˇ suhˍ 120 hkʼawꞈ htaˇ kaꞈ, iˉ kaˆ htonˍ tuˬ yoˬ tehꞈ Yaˬhoˉvaˬ ka tiꞈ te taˍ˗oꞈ. Laiˉ hkʼawꞈ gaˬ leh Gʼuiˬ sha Noˉaꞈ htaꞈ haw loꞈ kʼoˍ te tcuh leh miˬ guiˬ htaꞈ iˉ kaˆ maˇ htonˍ sheˍ htaˇ awˬ yanˇ 40-50 hkʼawꞈ yawˇ kanˉ gʼa te hkeuꞈ jaˇ. Noˉaꞈ kʼoˆ piˇ ve hkawˇ shu maˇ na ve htawˇ, Yaˬhoˉvaˬ yawˇ htaꞈ haw loꞈ kʼoˍ hkʼaw to nuˇ to shaˆ yuˬ keu kʼoˆ piˇ htaˇ hkʼa gaˬ, Noˉaꞈ shaˍ tiꞈ piˇ chehˇ sheˍ ve yoˬ. Awˬ yanˇ gaˬ htaˇ, “Gʼuiˬ sha yehˬ miˉ htaꞈ hoˆ piˇ ve yoˬ.”—Awˬ hkuiˉ puiˍ 6:3; 7:1, 2, 16.

19. Ngaˬ hui caˉ leh hto toˇ ve kʼo, aˬ htoꞈ ma htaꞈ mawˬ tuˬ le?

¹⁹ Maˇ maw ve awˬ yanˇ Gʼuiˬ sha ve mvuhˇ miˬ daꞈ ve awˬ lawn sha tanˇ hto toˇ ve peuˬ˗oˬ tehꞈ Gʼuiˬ sha kʼoˆ laˇ tuˬ yoˬ. “Gʼuiˬ sha yehˬ miˉ htaꞈ hoˆ” leh Saˍtanˍ ve miˬ guiˬ htaꞈ te luˬ tuˬ yoˬ. Gʼuiˬ sha ve hkawˇ na ve chaw ceh tiˉ cawˬ ve miˬ guiˬ awˬ suhˉ hkʼaw yawˇ ngaˬ hui htaꞈ shiˍ kʼai laˇ tuˬ yoˬ. Oˇ ve teˇ nyi maˇ gaˬ sheˍ htaˇ, Noˉaꞈ, Haˍbaˍkuˆ leh awˬ nu ve chaw Gʼuiˬ sha ve kanˉ caˉ leh te ve htaꞈ henˇ yuˬ sheˍ. Ngaˬ hui a shaꞈ teꞈ kuiˬ hkʼaw hto toˇ ve kanˉ a yeˇ uiˍ jaˇ ve tehꞈ shawˍ sheˍ. Yeunˇ hkanˍ ve, Yaˬhoˉvaˬ htaꞈ yonˍ ve, leh yawˇ ve ka tiꞈ htaꞈ hkʼaˬ htaˆ kaꞈ haꞈ shaˉ ve yoˬ.