Liꞈ hpu chi teˇ tawn hkʼaw kʼoˆ ve, “mvuhˇ miˬ htaꞈ uˉ peunˍ chehˇ ve jawˇ mawˇ teˇ hpaˍ, haˍ yaˇ gʼawˇ yaˇ htaꞈ fawˉ mehˍ leh maˇ hteˇ maˇ cawˇ ve hkʼaw suhˉ jehˬ piˇ ve htaꞈ nawˬ gʼa mawˬ ve kʼo taˇ anˇ. Awˬ lawn kʼo, yawˇ hui lehˬ yawˇ hui aꞈ kehˉ uiˍ ve jawˇ mawˇ awˬ hawˉ lo kanˉ te chehˇ leh, yawˇ hui hkʼa peu˗eˬ aꞈ kehˉ uiˍ ve jawˇ mawˇ htawˇ cawˬ sheˍ ve yoˬ.”—Cuˇ yiˍ piˇ ve 5:8.

Chaw yaˇ dawˇ ve kʼo, Liꞈ hpu chi ve teˇ tawn tcuhˉ kuiˬ lehˬ, chaw yaˇ uˉ peunˍ ve kanˇ paˆ cawˬ ve chaw htaꞈ ceh tiˉ kʼoˆ gaˇ ve tehꞈ dawˇ ve yoˬ hehˉ. Yaꞈ hkʼaˇ, ngaˬ hui hkʼa dehꞈ dawˇ nyi ve kʼo, Liꞈ hpu chi ve teˇ tawn Yaˬhoˉvaˬ htaꞈ caˉ daꞈ ve awˬ tehˬ ve htaꞈ kʼoˆ taˍ ve pa taw, ngaˬ hui htaꞈ awˬ gʼaˇ peꞈ laˇ ve yoˬ.

Cuˇ yiˍ piˇ ve liꞈ 5:8 hkʼaw kanˇ paˆ cawˬ ve chaw teˇ hpaˍ, maˇ hteˇ maˇ cawˇ ve hkʼaw haˍ yaˇ gʼawˇ yaˇ htaꞈ fawˉ mehˍ piˇ ve htaꞈ kʼoˆ taˍ ve yoˬ. Chi hkʼe ve chaw lehˬ yawˇ aꞈ kehˉ kanˇ paˆ cawˬ ve teˇ gʼaˇ yawˇ htaꞈ nyi chehˇ ve tehꞈ gʼa tawnˇ taˍ cawˇ ve yoˬ. Leh chi hkʼe ceh maˇ heˆ, chi aꞈ kehˉ aˉ yaˇ cawˬ ve awˬ nu ve chaw cawˬ sheˍ ve yoˬ. Chi hkʼe hpehꞈ ve htawˇ, kanˇ paˆ cawˬ ve chaw teˇ hpaˍ lehˬ heˍ caˇ chehˇ sheˍ ve yoˬ. Leh chi chaw yaˇ maˇ hteˇ maˇ cawˇ ve gʼa hpuˇ leh kanˇ paˆ cawˬ ve chaw teˇ hpaˍ geh tuꞈ ve hkanˍ ve gʼa hpuˇ ve yoˬ.

Awˬ lawn chi nyi a˗kʼo, teꞈ chiˉ dawˇ law kuiˬ maˇ cawˬ ve htaꞈ shuˍ ve htawˇ, “mvuhˇ miˬ htaꞈ uˉ peunˍ chehˇ ve jawˇ mawˇ teˇ hpaˍ” htaꞈ Yaˬhoˉvaˬ nyi chehˇ ve tehꞈ ngaˬ hui shiˍ htaˇ awˬ gʼaˇ gʼa jaˇ. Ngaˬ hui ve dawˇ haˍ tuˬ teˇ hpaˍ Yaˬhoˉvaˬ geh teh taˉ leh yawˇ ga laˇ tuˬ bon lawˬ sheˍ. (Chiˇ mvuh ve 55:22; Hpiˇliˇpiˆ 4:6, 7) “Gʼuiˬ sha lehˬ, miˬ guiˬ chaw yaˇ hkʼa peu˗eˬ ve htaꞈ hkʼa dehꞈ nyi haꞈ shaˉ piˇ chehˇ ve yoˬ. Yawˇ htaꞈ ka tiꞈ yeˬ chehˇ ve chaw htaꞈ yawˇ awˬ gʼaˇ uiˍ la piˇ ve” tehꞈ ngaˬ hui shiˍ ve yoˬ.—2 Raˍsaˍvanˍ 16:9.

Chi htaꞈ pa taw Cuˇ yiˍ piˇ ve liꞈ 5:8 hkʼaw hkʼaˬ hkʼe hpehꞈ ve htawˇ, chaw teˇ gʼaˇ aꞈ kehˉ kanˇ paˆ uiˍ ve teˇ gʼaˇ cawˬ ve tehꞈ, miˬ guiˬ hkʼoˆ awˬ tehˬ hpehꞈ la ve awˬ ceuˬ htaꞈ ngaˬ hui shiˍ tuˬ te laˇ ve yoˬ. Yaˬhoˉvaˬ lehˬ uiˍ jaˇ mvuhˇ jaˇ ve aˉ yaˇ leh kanˇ paˆ uiˍ jaˇ ve tehꞈ, Liꞈ hpu chi teˇ tawn ngaˬ hui shiˍ tuˬ shaˍ tiꞈ peꞈ laˇ sheˍ ve yoˬ. Chi teˇ hkui Gʼuiˬ sha yawˇ ve Yaˇ paˍ Yeˍsuˆ Hkriꞈ htaꞈ kanˇ paˆ piˇ leh Gʼuiˬ sha ve mvuhˇ miˬ hkʼaw uˉ peunˍ tcuh˗oˬ ve yoˬ. Yaˬhoˉvaˬ lehˬ kanˇ paˆ uiˍ jaˇ ve pa taw, hpehꞈ la ve teˇ ceuˬ le le htaꞈ mawˬ leh yawˇ hteˇ cawˇ jaˇ tehˬ tehˬ yoˬ. Leh yawˇ ve Yaˇ paˍ Yeˍsuˆ kaꞈ hkʼa shuˍ yoˬ.