1. Hkʼaˬ hkʼe htaˇ ngaˬ hui Yaˬhoˉvaˬ ve kanˉ te tuˬ haˍ jaˇ ve le?

 Nawˬ dawˇ kʼo, hkʼaˬ hkʼe htaˇ Yaˬhoˉvaˬ ve kanˉ te ve haˍ ve le? Shoꞈ shaꞈ ve gʼa hpuˇ htaˇ maˇ heˆ leh hpehꞈ sha htaˇ laˇ? Ngaˬ hui shoꞈ shaꞈ ve gʼa hpuˇ htaˇ, Yaˬhoˉvaˬ htaꞈ dawˇ nawˇ leh yawˇ htaꞈ gʼaˇ va cawˇ ve yoˬ. Yaꞈ hkʼaˇ, ngaˬ hui ve a shaꞈ teꞈ hkʼaˇ hpehꞈ sha htaˇ leh shoꞈ shaꞈ ve maˇ cawˬ htaˇ, ngaˬ hui hkʼaˬ hkʼe te cawˇ ve le? Ngaˬ hui awˬ nu ve awˬ ceuˬ htaꞈ a yeˇ yuˬ leh Yaˬhoˉvaˬ ve kanˉ te ve hkʼa dehꞈ maˇ dawˇ nyi ve laˇ? Iˉsaˍreˍlaˆ chaw chi hkʼe hpehꞈ la tuˬ yoˬ hehˉ tehꞈ Yaˬhoˉvaˬ yawˇ hui htaꞈ shaˍ tiꞈ piˇ ve yoˬ.—Bon maˍ ve 6:10-12.

2. Jawˇmawˇ Aˍsaˍ lehˬ daꞈ ve henˇ tuˬ hkʼaˬ hkʼe hpehꞈ ve le?

² Jawˇmawˇ Aˍsaˍ lehˬ cuˇ yiˍ cawˬ ve hkʼaw Yaˬhoˉvaˬ htaꞈ gʼaˇ va ve yoˬ. Yawˇ haˍ ve gʼa hpuˇ htaˇ ceh Yaˬhoˉvaˬ ve kanˉ te ve maˇ heˆ. Gawˬ lehˍ ve awˬ yanˇ htaˇ kaꞈ Yaˬhoˉvaˬ ve kanˉ te ve yoˬ. “Yawˇ a shaꞈ teꞈ chehˇ ve teˇ co˗e, Gʼuiˬ sha htaꞈ ka tiꞈ yeˬ chehˇ ve yoˬ.” (1 Jawˇmawˇ 15:14) Aˍsaˍ nyi ma awˬ tawˬ hkʼa gaˬ Yaˬhoˉvaˬ ve kanˉ te ve hpeuꞈ maw laˇ ve teˇ hkʼaˇ lehˬ, Yuˇdaꞈ mvuhˇ miˬ hkʼaw maˇ heˆ heˆ ve oˉ kʼoˍ pui ve hkʼa peu˗eˬ htaꞈ te luˬ ve yoˬ. Liꞈ hpu hkʼaw kʼoˆ ve, “yawˇ lehˬ, buiˇ shaˆ aˉ naˆ chaw hui ve tuˉ tanˇ kuiˬ leh oˉ kʼoˍ pui kuiˬ teˇ hpaˍ htaꞈ yuˬ baˬ leh, daꞈ kehˬ ve suhˆ hkuiˉ daw teˇ hpaˍ leh, Aˍsheˍraˆ gʼuiˬ sha ma ve shaˉ hoꞈ teˇ hpaˍ htaꞈ te luˬ piˇ ve yoˬ.” (2 Raˍsaˍvanˍ 14:3, 5) Aˍsaˍ yawˇ ve awˬ pi Maˍhkaˍ htaꞈ Yuˇdaꞈ mvuhˇ miˬ hkʼaw jawˇ mawˇ ma lonˉ maˇ kʼawꞈ te tcuh. Aˬ htoꞈ ma pa taw le? Chaw yaˇ teˇ hpaˍ shaˉ hoꞈ htaꞈ oˉ kʼoˍ pui tuˬ awˬ gʼaˇ piˇ ve pa taw yoˬ.—1 Jawˇmawˇ 15:11-13.

3. Awˬ lawn chi ve hkʼaw ngaˬ hui teˇ geh henˇ tuˬ ve aˬ htoꞈ ma le?

³ Jawˇmawˇ Aˍsaˍ lehˬ maˇ heˆ heˆ ve oˉ kʼoˍ pui ve htaꞈ ceh te luˬ ve maˇ heˆ. Yuˇdaꞈ mvuhˇ miˬ hkʼaw ve chaw Yaˬhoˉvaˬ htaꞈ oˉ kʼoˍ kʼawꞈ pui  la tuˬ yawˇ ga piˇ ve yoˬ. Gʼuiˬ sha yawˇ htaꞈ awˬ bon naꞈ piˇ leh Iˉsaˍreˍlaˆ chaw gawˬ lehˍ ve cawˬ tuˬ ga piˇ ve yoˬ. * Aˍsaˍ uˉ peunˍ ve awˬ yanˇ htaˇ, “mvuhˇ miˬ htaꞈ gawˬ lehˍ cawˬ la piˇ ve” awˬ yanˇ 10 hkʼawꞈ yoˬ. (2 Raˍsaˍvanˍ 14:1, 4, 6) Aˍsaˍ gawˬ lehˍ ve awˬ yanˇ htaˇ hkʼaˬ hkʼe te ve le? Peuˬ leh awˉ lawˉ peuˇ ve Hkriꞈ yaˇ Aˍsaˍ htaꞈ henˇ yuˬ leh gawˬ lehˍ ve awˬ yanˇ htaˇ hkʼaˬ hkʼe te ve le? Leh nawˬ Yaˬhoˉvaˬ htaꞈ oˉ kʼoˍ pui gʼa ve mvuhˇ miˬ hkʼaw chehˇ ve kʼo, gawˬ lehˍ ve awˬ yanˇ nawˬ cuˇ yiˍ cawˬ ve hkʼaw hkʼaˬ hkʼe te tuˬ le? Awˬ lawn chi ve hkʼaw teˇ geh henˇ tuˬ yoˬ.

4. 2 Raˍsaˍvanˍ liꞈ 14:2, 6, 7 hkʼaw kʼoˆ taˍ ve hkʼe, Aˍsaˍ gawˬ lehˍ ve awˬ yanˇ chi htaꞈ hkʼaˬ hkʼe te ve le?

⁴ 2 Raˍsaˍvanˍ liꞈ 14:2, 6, 7 gʼaw sheˍ. Jawˇmawˇ Aˍsaˍ mvuhˇ miˬ yaˇ htaꞈ kʼoˆ piˇ ve, Yaˬhoˉvaˬ lehˬ “ngaˬ hui htaꞈ haꞈ shaˉ chehˇ leh, gawˬ lehˍ chehˇ tcuh taˍ laˇ peuˬ.” Gawˬ lehˍ ve awˬ yanˇ chi jehˇ ve awˬ yanˇ hpehꞈ ve tehꞈ Aˍsaˍ maˇ gʼa dawˇ. Yaꞈ hkʼaˇ, awˬ yanˇ chi htaꞈ yehˇ leh yawˇ taꞈ yehˬ te ve, lanˇ venˇ kawˍ ve, leh venˇ taˍ meuꞈ hpeꞈ te ve yoˬ. Yawˇ mvuhˇ miˬ yaˇ htaꞈ kʼoˆ piˇ ve, mvuhˇ miˬ chi ve ngaˬ hui ve hpehꞈ sheˍ. Aˍsaˍ hkʼaˬ hkʼe kʼoˆ gaˇ ve le? Gʼuiˬ sha yawˇ hui htaꞈ peꞈ laˇ taˍ ve mvuhˇ miˬ hkʼaw hkʼaˬ kaˬ lo kʼai kaꞈ gʼa ve htaꞈ kʼoˆ gaˇ ve yoˬ. Yawˇ hui laiˉ ceuˬ te gʼa leh canˇ paˍ htaꞈ kawˆ tuˬ kaꞈ maˇ loˍ. Aˍsaˍ gawˬ lehˍ ve awˬ yanˇ chi mvuhˇ miˬ yaˇ awˬ bon cawˬ ve htaꞈ te tuˬ awˬ gʼaˇ piˇ ve yoˬ.

5. Aˬ htoꞈ ma te jawˇ mawˇ Aˍsaˍ maꞈ moˍ awˬ gʼaˇ hehnˇ tuˬ awˬ gʼaˇ piˇ ve le?

⁵ Aˍsaˍ gawˬ lehˍ ve awˬ yanˇ chi maꞈ moˍ awˬ gʼaˇ hehnˇ tuˬ awˬ gʼaˇ piˇ ve yoˬ. (2 Raˍsaˍvanˍ 14:8) Chi yawˇ Yaˬhoˉvaˬ htaꞈ gʼaˇ maˇ va ve htaꞈ kʼoˆ gaˇ ve laˇ? Maˇ heˆ. Awˬ gʼuˇ suhˍ hpawˇ hkʼaˬ hkʼe hpehꞈ la tuˬ ve awˬ ceuˬ mvuhˇ miˬ yaˇ htaꞈ gu hehnˇ taˍ piˇ tuˬ jawˇ mawˇ ve awˬ vuiˬ hpehꞈ ve tehꞈ Aˍsaˍ shiˍ ve yoˬ. Yuˇdaꞈ mvuhˇ miˬ hkʼaw hkʼaˬ htaˆ kaꞈ gawˬ lehˍ ve tiˉ cawˬ tuˬ ve maˇ heˆ tehꞈ yawˇ shiˍ ve yoˬ. Chi awˬ tehˬ hpehꞈ la ve yoˬ.

6. Awˉ lawˉ peuˇ ve Hkriꞈ yaˇ gawˬ lehˍ ve awˬ yanˇ htaˇ hkʼaˬ hkʼe te ve le?

⁶ Awˉ lawˉ peuˇ ve Hkriꞈ yaˇ teˇ hkui teˇ hkui fawˉ mehˍ ve gʼa hpuˇ ve htawˇ, yawˇ hui gawˬ lehˍ ve awˬ yanˇ kaꞈ cawˬ ve yoˬ. Yawˇ hui awˬ yanˇ chi htaꞈ hkʼaˬ hkʼe te ve le? Ka tiꞈ yeˬ ve awˬ viˉ awˬ nyi daꞈ ve awˬ lawn sha tanˇ bon maˍ tcuhˉ taˍ ve yoˬ. Tcuh yaˇ liꞈ hkʼaw kʼoˆ ve, ‘[Yaˬhoˉvaˬ] awˬ hkʼaw lo yawˇ hui toˇ kʼai chehˇ ve yoˬ.’ Yawˇ hui daꞈ ve awˬ lawn sha tanˇ chi hkʼe bon maˍ ve pa taw, Hkriꞈ yaˇ awˬ moˍ hkʼaw chaw maˇ la ve yoˬ. Gawˬ lehˍ ve awˬ yanˇ chi yawˇ hui nyi ma pfuhˇ ve hkʼaw bon maˍ ve htaꞈ Yaˬhoˉvaˬ awˬ bon naꞈ piˇ ve tehꞈ ngaˬ hui gʼa mawˬ ve yoˬ.—Tcuh yaˇ 9:26-31.

7-8. Pawˇluꞈ leh awˬ nu ve Hkriꞈ yaˇ awˬ yanˇ cawˬ htaˇ hkʼaˬ hkʼe te ve le? Kʼoˆ maˍ laˇ sheˍ.

⁷ Awˉ lawˉ peuˇ ve Hkriꞈ yaˇ, teˇ yanˇ le le daꞈ ve awˬ lawn sha tanˇ bon maˍ ve yoˬ. Tawˇ pa haˉ te kʼo, Pawˇluꞈ Eˇfeˇsuꞈ venˇ hkʼaw chehˇ htaˇ, yawˇ bon maˍ tuˬ awˬ yanˇ cawˬ ve tehꞈ shiˍ ve yoˬ. Yawˇ oˇ kaˬ lo kʼawꞈ chehˇ leh venˇ yaˇ htaꞈ bon maˍ piˇ ve yoˬ.—1 Kawˇrenˍhtuˆ 16:8, 9.

⁸ Awˬ yanˇ teˇ yanˇ htaˇ Pawˇluꞈ leh awˬ nu ve Hkriꞈ yaˇ laiˉ gʼaˇ htaꞈ bon gʼa maˍ piˇ ve lehˬ, 49 hkʼawꞈ C.E. htaˇ awˬ guiˬ meuˇ shoˍ ve awˬ lawn jehˬ cheˆ htaˇ yoˬ. (Tcuh yaˇ 15:23-29) Awˬ lawn chi ve jehˬ cheˆ leh Hkriꞈ yaˇ awˬ moˍ teˇ kaˬ le le liꞈ bvuhꞈ feu piˇ peuˬ hkʼawꞈ nawˉ, yawˇ hui “Gʼuiˬ sha ve tawˇ hkawˇ maˍ piˇ leh bon maˍ ve” coˇ caˇ jaˇ. (Tcuh yaˇ 15:30-35) Awˬ bon hkʼaˬ hkʼe gʼa ve le? Liꞈ hpu hkʼaw kʼoˆ ve, “Hkriꞈ yaˇ awˬ moˍ teˇ hpaˍ yonˍ ve awˬ hkʼaw lo awˬ gʼaˇ uiˍ la leh, teˇ nyi le le chaw maˇ la ve yoˬ.”—Tcuh yaˇ 16:4, 5.

9. Chi teˇ hkui laiˉ mvuhˇ miˬ hkʼaw hkʼaˬ hkʼe hpehꞈ ve le? Leh ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le?

⁹ Chi beuꞈ teˇ co˗e Yaˬhoˉvaˬ ve Shaˉhkiˆhkanˍ ve chaw laiˉ mvuhˇ miˬ hkʼaw hto toˇ leh yawˇ htaꞈ oˉ kʼoˍ pui gʼa ve yoˬ. Nawˬ mvuhˇ miˬ chi hkʼe ve hkʼaw chehˇ ve laˇ? Chehˇ ve kʼo a shu yawˇ awˬ to htaꞈ na nyi cawˇ ve “ngaˬ hkʼaˬ hkʼe te ve le?” Awˬ leh meuˇ ve awˬ yanˇ Yaˬhoˉvaˬ ve chaw awˬ pon ha lehˬ jaˇ. Awˬ lawn kʼo, teˇ co˗e peuˬ teˇ co˗e miˬ guiˬ chi hkʼoˆ lo hto toˇ ve leh bon maˍ ve ngaˬ hui ve awˬ co˗e hkʼe taw maˇ te jaw sheˍ ve pa taw yoˬ. (Maˍkuˆ 13:10) Ngaˬ hui te tuˬ ve kanˉ cawˬ maˇ jaˇ.

10. 2 Tiˆmoˉseˍ liꞈ 4:2 hkʼaw ngaˬ hui aˬ htoꞈ ma te tuˬ kʼoˆ laˇ ve le?

¹⁰ Gawˬ lehˍ ve awˬ yanˇ chi nawˬ awˬ bon cawˬ tuˬ hkʼaˬ hkʼe te gʼa ve le? (2 Tiˆmoˉseˍ 4:2 gʼaw sheˍ.) Nawˬ leh nawˬ ve yehˬ kʼa hkʼaw ve chaw teˇ gʼaˇ Gʼuiˬ sha ve kanˉ maˇ maˇ te gʼa tuˬ, nawˬ awˬ to teˇ ceuˬ ceuˬ pa gʼa˗aw laˇ? Dawˇ nyi sheˍ. Tawˇ pa haˉ te kʼo, gʼuˇ suhˍ peuˍ ve chaw te ve yoˬ. Chi teˇ hkui hpu maˇ maˇ ca tuˬ awˬ yanˇ maˇ heˆ. Tuꞈ jaˇ hkanˍ jaˇ ve awˬ yanˇ gaˬ la htaˇ, hpu shi mawˇ jeꞈ ngaˬ hui yuˬ kʼai maˇ gʼa ve pa taw yoˬ.—Tawˇ naˉ ve 11:4; Maꞈhtehˍ 6:31-33; 1 Yoˇhanˬ 2:15-17.

11. Awˬ nu ve chaw daꞈ ve awˬ lawn sha tanˇ gʼa kaˇ tuˬ, awˬ viˉ awˬ nyi laiˉ gʼaˇ hkʼaˬ hkʼe te ve le?

¹¹ Awˬ viˉ awˬ nyi laiˉ gʼaˇ chaw ceuˬ tawˇ hkawˇ awˬ suhˉ henˇ leh shu Yaˬhoˉvaˬ htaꞈ shiˍ la tuˬ ga piˇ ve yoˬ. Hkriꞈ yaˇ ve liꞈ kʼoˆ teˇ hpaˍ leh laiˉ chaw ceuˬ ve tawˇ hkawˇ yuˬ tawˆ ve htaꞈ Gʼuiˬ sha ve kanˉ hkʼaˇ awˬ gʼaˇ piˇ ve yoˬ. Tawˇ pa haˉ te kʼo, 2010 hkʼawꞈ htaˇ, Hkriꞈ yaˇ ve liꞈ kʼoˆ teˇ hpaˍ aˬ laˬ hkʼe 500 chaw ceuˬ tawˇ hkawˇ cawˬ leh chi teˇ hkui 1,000 chaw ceuˬ tawˇ hkawˇ hpaˆ cawˬ ve yoˬ!

12. Chaw teˇ hpaˍ Gʼuiˬ sha ve mvuhˇ miˬ daꞈ ve awˬ lawn sha tanˇ yawˇ hui ve chaw ceuˬ tawˇ hkawˇ gʼa kaˇ htaˇ awˬ bon hkʼaˬ hkʼe gʼa ve le?

¹² Chaw yaˇ Yaˬhoˉvaˬ htaꞈ caˉ daꞈ ve awˬ tehˬ ve yawˇ hui ve chaw ceuˬ tawˇ hkawˇ gʼa kaˇ htaˇ, awˬ bon hkʼaˬ hkʼe gʼa ve le? Awˬ viˉ awˬ nyi yaˇ miˇ teˇ gʼaˇ ve awˬ lawn htaꞈ teˇ geh nyi sheˍ. Aˍmeˬriˆkaꞈ mvuhˇ miˬ, Lanˆhte˗ne˗siˇ awˬ hkʼaw lo Meˍfeˆ venˇ lo Hpawnˬ daꞈ lonˉ 3 nyi hkʼaw yawˇ awˬ bon gʼa ve yoˬ. Hpawnˬ daꞈ lonˉ chi teˇ pawˆ Keˬyaˬvaˬdaˬ tawˇ hkawˇ hpehꞈ ve yoˬ. Tawˇ hkawˇ chi lehˬ, Raˬwaˬdaˬ, Konˍgoˍ (Kinshasa), Yuˬganˬdaˬ mvuhˇ miˬ hkʼaw maˇ˗awˍ ve chaw na gʼa ve chaw ceuˬ tawˇ hkawˇ hpehꞈ ve yoˬ. Hpawnˬ daꞈ ve chi teˇ pawˆ peuˬ hkʼawꞈ nawˉ, awˬ viˉ awˬ nyi yaˇ miˇ kʼoˆ ve, “Aˍmeˬriˆkaꞈ mvuhˇ miˬ hkʼaw ngaˬ chehˇ ve 17  hkʼawꞈ gaˬ˗oˬ. Yaꞈ hkʼaˇ, chi teˇ pawˆ hpawnˬ ve hkʼaw ngaˬ hkʼa peu˗eˬ na gʼa ve awˉ lawˉ teˇ pawˆ hpehꞈ ve yoˬ.” Awˬ viˉ awˬ nyi yaˇ miˇ chi teˇ gʼaˇ hpawnˬ daꞈ ve hkʼaw yawˇ ve chaw ceuˬ tawˇ hkawˇ gʼa na htaˇ, nyi ma hkʼaw gaˬ jaˇ. Te gʼa ve kʼo, nawˬ chaw ceuˬ tawˇ hkawˇ kʼawꞈ henˇ leh nawˬ hto toˇ kuiˬ awˬ ti lo ve chaw htaꞈ ga piˇ gʼa˗aw laˇ? Nawˬ yawˇ hui ve hkawˇ yaw ve kʼo, yawˇ hui nawˬ ve hkawˇ na gaˇ tuˬ hpehꞈ kʼai gʼa˗aw laˇ? Nawˬ coˇ caˇ ve awˬ hpfuhˇ hkʼawꞈ jaˇ tuˬ yoˬ!

13. Ruˆsaˆ mvuhˇ miˬ hkʼaw awˬ viˉ awˬ nyi gawˬ lehˍ ve awˬ yanˇ htaˇ, hkʼaˬ hkʼe te ve le?

¹³ Laiˉ mvuhˇ miˬ hkʼaw uˉ peunˍ paˍ ngaˬ hui htaꞈ hto toˇ tuˬ a hkaw˗anˬ maˇ peꞈ laˇ ve pa taw, awˬ viˉ awˬ nyi hto toˇ maˇ gʼa ve maˇ heˆ. Tawˇ pa haˉ te kʼo, Ruˆsaˆ mvuhˇ miˬ hkʼaw ve awˬ viˉ awˬ nyi htaꞈ dawˇ nyi sheˍ. Yawˇ hui htaꞈ laiˉ chi hkʼawꞈ fawˉ mehˍ piˇ ve yoˬ. Yaꞈ hkʼaˇ, 1991 hkʼawꞈ ha pa 3 maˬ htaˇ, Ruˆsaˆ mvuhˇ miˬ hkʼaw uˉ peunˍ paˍ Yaˬhoˉvaˬ ve Shaˉhkiˆhkanˍ ve chaw te ve kanˉ hkʼa peu˗eˬ htaꞈ te tuˬ a hkaw˗anˬ piˇ ve yoˬ. Oˇ ve teˇ yanˇ Ruˆsaˆ mvuhˇ miˬ hkʼaw hto toˇ ve chaw 16,000 gʼaˇ cawˬ ve yoˬ. 20 hkʼawꞈ peuˬ hkʼawꞈ nawˉ, Ruˆsaˆ mvuhˇ miˬ hkʼaw hto toˇ ve chaw 160,000 gʼaˇ hpaˆ cawˬ ve yoˬ! Hto toˇ gʼa ve awˬ yanˇ yawˇ hui cuˇ yiˍ cawˬ ve hkʼaw te ve tehꞈ gʼa mawˬ ve yoˬ. Yaꞈ hkʼaˇ, gawˬ lehˍ ve awˬ yanˇ hkʼaˬ htaˆ kaꞈ cawˬ ve maˇ heˆ. Teˇ ceuˬ ceuˬ pa kʼai ve htawˇ, Ruˆsaˆ mvuhˇ miˬ hkʼaw awˬ viˉ awˬ nyi, nyi ma pfuhˇ ve hkʼaw Yaˬhoˉvaˬ htaꞈ oˉ kʼoˍ pui ve maˇ pa. Yawˇ hui Yaˬhoˉvaˬ ve kanˉ te gʼa ve hkʼe te ve yoˬ.

14-15. Yaˬhoˉvaˬ yawˇ ve kanˇ paˆ htaꞈ yehˇ leh jawˇ mawˇ Aˍsaˍ htaꞈ hkʼaˬ hkʼe ga piˇ ve le?

¹⁴ Awˬ leh meuˇ htaˇ jawˇ mawˇ Aˍsaˍ ve awˬ co˗e gawˬ lehˍ ve awˬ yanˇ peuˬ˗kʼai ve yoˬ. Yawˇ hui htaꞈ ca bawˆ la tuˬ, Ehˇtaˍyoˇpiˆ ve a maꞈ Zeˍraˆ maꞈ yaˇ 1,000,000 gʼaˇ shiˍ laˬ ve yoˬ. Yuˇdaꞈ mvuhˇ miˬ htaꞈ awˬ tehˬ gʼaˇ tuˬ yoˬ tehꞈ Zeˍraˆ yonˍ ve yoˬ. Jawˇmawˇ Aˍsaˍ lehˬ yawˇ ve maꞈ moˍ htaꞈ gʼaˇ maˇ va. Yawˇ Yaˬhoˉvaˬ htaꞈ gʼaˇ va ve yoˬ. Aˍsaˍ Gʼuiˬ sha geh bon lawˬ ve, “ngaˬ hui ve [Yaˬhoˉvaˬ] Gʼuiˬ sha˗oˬ, chi beuꞈ  ngaˬ hui htaꞈ a ciˉ ga laˇ˗oˆ. Ngaˬ hui lehˬ, nawˬ htaꞈ gʼaˇ va chehˇ ve yoˬ. Nawˬ ve awˬ meh hkʼaw maꞈ moˍ lonˉ chi htaꞈ ca bawˆ daꞈ la tuˬ ngaˬ hui tawˆ la taˍ ve yoˬ.”—2 Raˍsaˍvanˍ 14:11.

¹⁵ Ehˇtaˍyoˇpiˆ ve maꞈ moˍ lehˬ Aˍsaˍ ve maꞈ moˍ aꞈ kehˉ nyiˇ pun maˇ ve htawˇ, Yaˬhoˉvaˬ kanˇ paˆ cawˬ leh yawˇ ve chaw htaꞈ awˬ tehˬ ga laˇ ve tehꞈ Aˍsaˍ shiˍ ve yoˬ. Leh Yaˬhoˉvaˬ kaꞈ Aˍsaˍ nyi ma luˬ tuˬ maˇ te piˇ. Ehˇtaˍyoˇpiˆ ve maꞈ moˍ maˇ gʼaˇ.—2 Raˍsaˍvanˍ 14:8-13.

16. Gawˬ lehˍ ve awˬ yanˇ hkʼaˬ htaˆ kaꞈ cawˬ tuˬ ve maˇ heˆ tehꞈ ngaˬ hui hkʼaˬ hkʼe te shiˍ gʼa ve le?

¹⁶ Awˬ gʼuˇ suhˍ hpawˇ ngaˬ hui htaꞈ aˬ htoꞈ ma gʼa hpuˇ la tuˬ maˇ shiˍ ve htawˇ, Gʼuiˬ sha ve chaw gawˬ lehˍ ve awˬ yanˇ hkʼaˬ htaˆ kaꞈ chi hkʼe tiˉ cawˬ tuˬ ve maˇ heˆ tehꞈ ngaˬ hui shiˍ ve yoˬ. Awˬ leh meuˇ ve awˬ yanˇ yawˇ ve awˬ laꞈ gʼawˇ htaꞈ ‘chaw ceuˬ hkʼa peu˗eˬ canˇ tuˬ yoˬ’ tehꞈ Yeˍsuˆ kʼoˆ taˍ ve yoˬ. (Maꞈhtehˍ 24:9) Tcuh yaˇ Pawˇluꞈ kaꞈ kʼoˆ ve, “Yeˍsuˆ Hkriꞈ awˬ hkʼaw lo Gʼuiˬ sha htaꞈ yawˆ yan gaˇ ve chaw hkʼa peu˗eˬ lehˬ, fawˉ ve mehˍ ve htaꞈ gʼa hkanˍ tuˬ yoˬ.” (2 Tiˆmoˉseˍ 3:12) Saˍtanˍ “nyi ma zuhˆ jaˇ” leh a shu yawˇ awˬ to htaꞈ teꞈ chiˉ maˇ gʼa hpuˇ taˬ tehꞈ dawˇ ve kʼo, a shu yawˇ awˬ to htaꞈ heˍ chehˇ ve yoˬ.—Hpeuꞈ maˍ ve 12:12.

17. Ngaˬ hui ve yonˍ hkʼaˇ htaꞈ hkʼaˬ hkʼe lawˇ nyi laˇ tuˬ ve hehˉ le?

¹⁷ Awˬ gʼuˇ suhˍ hpawˇ ngaˬ hui ve yonˍ hkʼaˇ htaꞈ lawˇ nyi laˇ tuˬ yoˬ. Maˇ maw ve awˬ yanˇ ‘miˬ guiˬ htaꞈ te hpanˍ ve teˇ nyi tanˬ leh yaꞈ nyi hkʼa gaˬ maˇ hpehꞈ la jaw sheˍ ve tuꞈ jaˇ hkanˍ jaˇ ve teˇ ceuˬ lehˬ, oˇ htaˇ hpehꞈ la tuˬ yoˬ.’ (Maꞈhtehˍ 24:21) Oˇ ve teˇ yanˇ yehˬ kʼa hkʼaw ve chaw ngaˬ hui htaꞈ tawˍ laˇ leh Gʼuiˬ sha ve kanˉ maˇ te tcuh laˇ tuˬ yoˬ hehˉ. (Maꞈhtehˍ 10:35, 36) Aˍsaˍ Yaˬhoˉvaˬ htaꞈ gʼaˇ va ve hkʼe, ngaˬ hui kaꞈ Yaˬhoˉvaˬ htaꞈ gʼaˇ va leh nyi haꞈ shaˉ tcuh˗aw laˇ?

18. Heˍbrehˇ liꞈ 10:38, 39 hkʼaw kʼoˆ taˍ ve hkʼe, gawˬ lehˍ ve awˬ yanˇ peuˬ kʼai htaˇ, ngaˬ hui gu hehnˇ taˍ gʼa tuˬ aˬ htoꞈ ma ga laˇ ve le?

¹⁸ Awˬ gʼuˇ suhˍ hpawˇ hpehꞈ la tuˬ ve awˬ ceuˬ ngaˬ hui gu hehnˇ taˍ gʼa tuˬ awˬ pon, Yaˬhoˉvaˬ ga laˇ tuˬ laiˉ ceuˬ gu teh taˍ laˇ ve yoˬ. Ngaˬ hui ve yonˍ hkʼaˇ yonˍ yeˬ tuˬ, Gʼuiˬ sha lehˬ “ka tiꞈ yeˬ leh cuˇ yiˍ cawˬ ve awˬ ceˬ” htaꞈ cuˇ leh “awˬ yanˇ cawˇ lehˍ caˇ tuˬ dawˬ tuˬ pehˬ piˇ tuˬ awˬ pon” yoˬ. (Maꞈhtehˍ 24:45) Yaꞈ hkʼaˇ, ngaˬ hui ve awˬ vuiˬ ngaˬ hui gʼa te ve yoˬ. Ngaˬ hui ve yonˍ hkʼaˇ hkʼaˬ htaˆ kaꞈ yonˍ yeˬ tuˬ, ngaˬ hui te gʼa ve hkʼe gʼa te cawˇ ve yoˬ.—Heˍbrehˇ 10:38, 39 gʼaw sheˍ.

19-20. 1 Raˍsaˍvanˍ liꞈ 28:9 hkʼaw ngaˬ hui gʼaw htaˇ, a shu yawˇ awˬ to htaꞈ hkʼaˬ hkʼe na nyi cawˇ ve le? Leh aˬ htoꞈ ma pa taw le?

 ¹⁹ Jawˇmawˇ Aˍsaˍ hkʼa shuˍ ngaˬ hui kaꞈ “Gʼuiˬ sha ve a loˍ htaꞈ tiˉ te” cawˇ ve yoˬ. (2 Raˍsaˍvanˍ 14:4; 15:1, 2) Ngaˬ hui Yaˬhoˉvaˬ htaꞈ caˉ daꞈ ve Liꞈ hpu henˇ leh Baˆtiˆsaˬ haꞈ yuˬ htaˇ ngaˬ hui Yaˬhoˉvaˬ ve a loˍ htaꞈ tanˬ te ve yoˬ. Ngaˬ hui Yaˬhoˉvaˬ htaꞈ haꞈ maˇ la tuˬ, te gʼa ve hkʼe te ve yoˬ. A shu yawˇ awˬ to htaꞈ na nyi cawˇ ve, ‘ngaˬ hkʼaˬ htaˆ kaꞈ hpawnˬ daꞈ˗e ve laˇ?’ ngaˬ hui awˬ tehˬ chi hkʼe te˗aw laˇ dawˇ nyi sheˍ. Ngaˬ hui hpawnˬ daꞈ˗e htaˇ, Yaˬhoˉvaˬ ve kanˉ caˉ leh te tuˬ yawˇ ve daꞈ kehˬ ve awˬ ha hpu ga laˇ leh awˬ viˉ awˬ nyi geh awˬ gʼaˇ gʼa ve ngaˬ hui ha lehˬ tuˬ te laˇ gʼa ve yoˬ. (Maꞈhtehˍ 11:28) Leh a shu yawˇ awˬ to htaꞈ kʼawꞈ na nyi cawˇ ve, ‘ngaˬ hkʼaˬ htaˆ kaꞈ a shu yawˇ hkʼaˇ yawˇ Liꞈ hpu henˇ ve te chehˇ˗aw laˇ?’ Nawˬ yehˬ kʼa hkʼaw ve chaw geh chehˇ htaˇ, teˇ shinˉ le le yehˬ kʼa hkʼaw ve chaw geh teˇ geh oˉ kʼoˍ pui ve te˗aw laˇ? Maˇ heˆ leh nawˬ teˇ gʼaˇ tiˉ chehˇ htaˇ, yehˬ kʼa hkʼaw hkʼaˬ htaˆ kaꞈ oˉ kʼoˍ pui ve te chehˇ ve chaw hui hkʼe, teˇ shinˉ le le nawˬ awˬ yanˇ shawˍ teh leh a shu yawˇ hkʼaˇ yawˇ Liꞈ hpu henˇ ve te chehˇ˗aw laˇ? Yaˬhoˉvaˬ htaꞈ caˉ daꞈ ve nawˬ te gʼa ve hkʼe hto toˇ ve leh shu htaꞈ Liꞈ hpu maˍ piˇ ve te chehˇ˗aw laˇ?

²⁰ Aˬ htoꞈ ma te a shu yawˇ awˬ to htaꞈ chi hkʼe na nyi cawˇ ve le? Liꞈ hpu hkʼaw kʼoˆ ve Yaˬhoˉvaˬ lehˬ ngaˬ hui ve dawˇ hkʼaˇ leh nyi ma hkʼaw cawˬ ve awˬ ceuˬ htaꞈ chaˬ nyi chehˇ ve yoˬ. Ngaˬ hui kaꞈ chi hkʼe shuˍ shuˍ te cawˇ ve yoˬ. (1 Raˍsaˍvanˍ 28:9 gʼaw sheˍ.) Tawˇ pa haˉ te kʼo, ngaˬ hui dawˇ teh taˍ ve maˇ heˆ leh dawˇ hkʼaˇ gʼa pa cawˇ ve mawˬ htaˇ pa gʼa tuˬ Yaˬhoˉvaˬ ga laˇ tuˬ lawˬ sheˍ. Chi teˇ hkui lehˬ awˬ gʼuˇ suhˍ hpawˇ beˬ ve lawˇ ve htaꞈ gʼa hpuˇ tuˬ gu hehnˇ taˍ gʼa tuˬ ve awˬ yanˇ hpehꞈ ve yoˬ. Nawˬ gawˬ lehˍ ve awˬ yanˇ chi cuˇ yiˍ cawˬ ve hkʼaw te ve teˇ ceuˬ kaꞈ taˇ tawˍ laˇ tcuh!