1. Yeˍsuˆ ngaˇ ca paˍ 4 gʼaˇ htaꞈ aˬ htoꞈ ma te tuˬ kuˬ piˇ ve le? Leh yawˇ hui hkʼaˬ hkʼe te ve le?

 Peˍtruˆ, Anˍdrehˍ, Yaˍkoˆ, leh Yoˇhanˬ ngaˇ ca paˍ hpehꞈ ve yoˬ. Yawˇ hui htaꞈ Yeˍsuˆ kuˬ piˇ htaˇ hkʼaˬ hkʼe taw anˇ ve htaꞈ dawˇ nyi sheˍ. Yeˍsuˆ kʼoˆ ve, ‘ngaˬ hkʼaˇ suh laˬ˗oꞈ. Ngaˬ nawˬ hui htaꞈ chaw ca shehˍ hpaˇ te tcuh laˇ tuˬ yoˬ.’ * Yawˇ hui gʼa kaˇ htaˇ hkʼaˬ hkʼe te ve le? Liꞈ hpu hkʼaw kʼoˆ ve, yawˇ hui “teˇ cawˬ haˉ geuꞈ htaꞈ teh taˉ leh yawˇ awˬ hkʼaˇ suh kʼai ve yoˬ.” (Maꞈhtehˍ 4:18-22) Dawˇ cheˆ ve chi teˇ pawˆ yawˇ hui ve a shaꞈ teꞈ hkʼaˇ pa ve yoˬ. Yawˇ hui ngaˇ ca cawˇ ve kaꞈ, oˇ teˇ yanˇ “chaw ca shehˍ hpaˇ hpehꞈ tuˬ yoˬ.” (Luˉkaꞈ 5:10) Chi beuꞈ teˇ co˗e kaꞈ te gaˇ leh awˬ tehˬ ve htaꞈ haꞈ ve chaw htaꞈ Yeˍsuˆ kuˬ piˇ chehˇ sheˍ. (Maꞈhtehˍ 28:19, 20) Hkʼe kʼo nawˬ˗ehꞈ, Yeˍsuˆ kuˬ laˇ ve htaꞈ haꞈ yuˬ˗oˬ laˇ?

2. Hto toˇ ve chaw hpehꞈ tuˬ a shu hkʼa dehꞈ dawˇ nyi cawˇ ve le? Leh yawˇ chi hkʼe dawˇ cheˆ gʼa tuˬ aˬ htoꞈ ma te cawˇ sheˍ ve le?

² Nawˬ Liꞈ hpu henˇ ve teˇ tcuhˉ teˇ yanˇ gaˬ˗oˬ leh nawˬ ve a shaꞈ teꞈ kuiˬ hkʼaw laiˉ ceuˬ pa gʼa˗oˬ. Chi teˇ hkui nawˬ hto toˇ ve chaw hpehꞈ tuˬ dawˇ nyi chehˇ ve yoˬ hehˉ. Nawˬ Yeˍsuˆ kuˬ laˇ ve htaꞈ haꞈ yuˬ tuˬ maˇ yonˍ gʼa ve kʼo, awˬ gʼaˇ taˇ nuˇ. Dawˇ cheˆ ve chi a yeˇ uiˍ jaˇ ve tehꞈ nawˬ shiˍ ve pa taw, maˇ yonˍ gʼa ve yoˬ hehˉ. Liꞈ hpu hkʼaw kʼoˆ ve, Peˍtruˆ leh awˬ chawˇ teˇ hpaˍ “teˇ cawˬ haˉ” geuꞈ htaꞈ teh taˉ ve lehˬ yawˇ hui teꞈ chiˉ maˇ dawˇ nyi leh laꞈ haˉ dawˇ cheˆ ve htaꞈ kʼoˆ gaˇ ve maˇ heˆ. Awˬ tehˬ kʼo, yawˇ hui Yeˍsuˆ htaꞈ shiˍ leh haꞈ yuˬ ve 6 ha pa hpaˆ gaˬ˗oˬ. (Yoˇhanˬ 1:35-42) Chi ve hkʼa shuˍ shuˍ nawˬ kaꞈ Yaˬhoˉvaˬ leh Yeˍsuˆ htaꞈ caˉ daꞈ ve laiˉ ceuˬ gʼa henˇ˗oˬ leh co ha hpawˇ uiˍ la mvuh la gaˇ ve yoˬ hehˉ. Yaꞈ hkʼaˇ, hkʼa dehꞈ maˇ dawˇ nyi  sheˍ htaˇ, nawˬ hto toˇ ve chaw hpehꞈ tuˬ laꞈ haˉ maˇ dawˇ cheˆ cawˇ. Peˍtruˆ, Anˍdrehˍ, leh awˬ nu ve chaw dawˇ cheˆ gʼa tuˬ aˬ htoꞈ ma ga piˇ gʼa ve teˇ geh nyi sheˍ.

3. Yeˍsuˆ kuˬ laˇ ve htaꞈ nawˬ haꞈ yuˬ gaˇ tuˬ aˬ htoꞈ ma te laˇ ve le?

³ Yeˍsuˆ ve awˬ laꞈ gʼawˇ awˉ lawˉ teˇ moˍ lehˬ awˬ gʼaˇ piˇ daꞈ ve, cuˇ yiˍ cawˬ ve, haꞈ hanˉ ve cawˬ leh a shu yawˇ awˬ to yawˇ awˬ liˇ teh ve cawˬ ve yoˬ. Chi ve teˇ hpaˍ yawˇ hui “chaw ca shehˍ hpaˇ” te gʼa tuˬ ga piˇ ve yoˬ. Nawˬ daꞈ ve awˬ lawn sha tanˇ hto toˇ leh shu Yeˍsuˆ ve awˬ laꞈ gʼawˇ hpehꞈ la tuˬ hkʼa dehꞈ maˍ piˇ tuˬ, nawˬ chi ve teˇ hpaˍ hkʼaˬ hkʼe te cawˬ gʼa tuˬ, awˬ lawn chi ve hkʼaw teˇ geh henˇ tuˬ yoˬ.

4. Peˍtruˆ ngaˇ ca ve aˬ htoꞈ ma awˬ pon le?

⁴ Peˍtruˆ ngaˇ ca ve lehˬ yehˬ kʼa htaꞈ hu gʼa tuˬ awˬ pon yoˬ. Yaꞈ hkʼaˇ, yawˇ ngaˇ ca ve lehˬ yawˇ ve kanˉ ceh maˇ heˆ. Nyi˗a kʼo, yawˇ kanˉ chi htaꞈ haꞈ jaˇ. (Yoˇhanˬ 21:3, 9-15) Peˍtruˆ chaw ca tuˬ ve awˬ hkʼaˇ kaꞈ gʼa henˇ ve yoˬ. Yawˇ Yaˬhoˉvaˬ htaꞈ ga laˇ tcuh ve pa taw, kanˉ chi ve hkʼa dehꞈ te gʼa ve yoˬ.—Tcuh yaˇ 2:14, 41.

5. Luˉkaꞈ liꞈ 5:8-11 hkʼaw kʼoˆ taˍ ve hkʼe, aˬ htoꞈ ma te Peˍtruˆ kawˆ ve le? Ngaˬ hui kawˆ ve htaꞈ gʼaˇ tuˬ aˬ htoꞈ ma ga laˇ ve le?

⁵ Ngaˬ hui hto toˇ˗e gaˇ ve awˬ hkʼaˇ teˇ hkʼaˇ lehˬ, Yaˬhoˉvaˬ htaꞈ haꞈ ve pa taw yoˬ. Haꞈ ve chi lehˬ, ngaˬ hui a shu yawˇ hkʼaˇ yawˇ maˇ daꞈ tehꞈ dawˇ ve htaꞈ gʼaˇ tuˬ ga laˇ ve, maˇ heˆ leh kanˉ chi ve htaꞈ te maˇ gʼa tehꞈ dawˇ ve htaꞈ kaꞈ ga laˇ ve yoˬ. Peˍtruˆ “chaw ca shehˍ hpaˇ” te la tuˬ Yeˍsuˆ kuˬ piˇ htaˇ, “taˇ kawˆ” tehꞈ Yeˍsuˆ Peˍtruˆ htaꞈ kʼoˆ piˇ ve yoˬ. (Luˉkaꞈ 5:8-11 gʼaw sheˍ.) Peˍtruˆ Yeˍsuˆ ve awˬ laꞈ gʼawˇ hpehꞈ ve kʼo aˬ htoꞈ ma gʼa hpuˇ tuˬ, maˇ gʼa kawˆ. Yaꞈ hkʼaˇ, Peˍtruˆ leh awˬ chawˇ teˇ hpaˍ ngaˇ gʼa jaˇ tuˬ Yeˍsuˆ anˇ tuˬ te leh ga piˇ ve yoˬ. Peˍtruˆ anˇ jaˇ leh chi yawˇ Yeˍsuˆ geh kanˉ teˇ geh te maˇ keunˍ tehꞈ dawˇ ve yoˬ. Chi hkʼa shuˍ shuˍ, nawˬ kaꞈ Yeˍsuˆ ve awˬ laꞈ gʼawˇ hpehꞈ la htaˇ, teˇ ceuˬ ceuˬ gʼa te la ve htaꞈ kawˆ ve yoˬ hehˉ. Chi hkʼe hpehꞈ  ve kʼo, Yaˬhoˉvaˬ, Yeˍsuˆ leh awˬ nu ve chaw htaꞈ maˇ maˇ haꞈ sheˍ. Chi lehˬ chaw ca shehˍ hpaˇ te tuˬ Yeˍsuˆ kuˬ laˇ ve htaꞈ nawˬ haꞈ yuˬ gaˇ tuˬ te laˇ ve yoˬ.—Maꞈhtehˍ 22:37, 39; Yoˇhanˬ 14:15.

6. Ngaˬ hui hto toˇ˗e gaˇ tuˬ aˬ htoꞈ ma awˬ hkʼaˇ cawˬ sheˍ ve le?

⁶ Ngaˬ hui hto toˇ˗e gaˇ tuˬ awˬ nu ve awˬ hkʼaˇ htaꞈ kaꞈ teˇ geh nyi sheˍ. Yeˍsuˆ kʼoˆ ve, “nawˬ hui kʼai leh, . . . ngaˬ ve awˬ laꞈ gʼawˇ hpehꞈ la tuˬ ca te˗o” tehꞈ yawˇ ve tawˇ hkawˇ htaꞈ ngaˬ hui na yuˬ gaˇ tuˬ te laˇ ve yoˬ. (Maꞈhtehˍ 28:19, 20) “Yawˇ hui lehˬ yawˬ hawˉ paˍ maˇ cawˬ ve yawˬ hkʼe nyi ma shoꞈ shaꞈ jaˇ leh awˬ gʼaˇ nuˇ jaˇ chehˇ ve” htaꞈ ngaˬ hui mawˬ ve pa taw, hto toˇ˗e gaˇ ve yoˬ. Yawˇ hui Gʼuiˬ sha ve mvuhˇ miˬ htaꞈ caˉ daꞈ ve henˇ tuˬ a yeˇ uiˍ jaˇ. (Maꞈhtehˍ 9:36) Chi hkʼoˆ kaꞈ, awˬ tehˬ ve cuˇ yiˍ htaꞈ shiˍ leh gʼa ponˬ tuˬ, Yaˬhoˉvaˬ teˇ chaw ceuˬ le le htaꞈ ga tcuh gaˇ ve yoˬ.—1 Tiˆmoˉseˍ 2:4.

7. Roˉmaꞈ liꞈ 10:13-15 hkʼaw hto toˇ ve kanˉ a yeˇ uiˍ jaˇ ve tehꞈ ngaˬ hui mawˬ tuˬ hkʼaˬ hkʼe ga laˇ ve le?

⁷ Hto toˇ ve kanˉ shu ve a shaꞈ htaꞈ ga piˇ gʼa ve tehꞈ ngaˬ hui dawˇ ve kʼo, hkʼa dehꞈ hto toˇ gaˇ tuˬ yoˬ. Ngaˇ ca paˍ ngaˇ ca hawˇ ve maˇ heˆ leh a shu yawˇ hkʼaˇ yawˇ ca caˇ ve htaꞈ ngaˬ hui maˇ shuˍ. Ngaˬ hui chaw ca shehˍ hpaˇ te ve lehˬ shu ve a shaꞈ htaꞈ ga piˇ tuˬ awˬ pon yoˬ.—Roˉmaꞈ 10:13-15 gʼaw sheˍ; 1 Tiˆmoˉseˍ 4:16.

8-9. Ngaˇ ca paˍ aˬ htoꞈ ma htaꞈ gʼa shiˍ cawˇ ve le? Leh aˬ htoꞈ ma pa taw le?

⁸ Yeˍsuˆ ve awˬ co˗e htaˇ ngaˇ ca paˍ lehˬ, ngaˇ hkʼaˬ hkʼe ve caˇ gʼa ve, hkʼaˬ hkʼe ve maˇ caˇ gʼa ve, yawˇ hui gʼa shiˍ cawˇ ve yoˬ. (Oˉ kʼoˍ pui ve 11:9-12) Yawˇ hui ca tuˬ ve ngaˇ hkʼaˬ kaˬ lo chehˇ ve kaꞈ gʼa shiˍ cawˇ ve yoˬ. Maˇ˗awˍ ve kʼo ngaˇ lehˬ iˉ kaˆ daꞈ leh ngaˇ awˍ cawˬ maˇ jaˇ kuiˬ lo chehˇ ve yoˬ. Chi hkʼoˆ kaꞈ, ngaˇ ca paˍ hkʼaˬ hkʼe htaˇ, ngaˇ ca cawˇ ve kaꞈ a yeˇ uiˍ jaˇ. Paˬciˬfeˆ laˇ tsuhˇ laˇ shaˆ gʼuiˬ conˇ hkʼaw chehˇ ve awˬ viˉ awˬ nyi teˇ gʼaˇ miˍshenˍnaˍliˍ htaꞈ ngaˇ teˇ geh ca˗e tuˬ jehˬ piˇ ve yoˬ. Miˍshenˍnaˍliˍ kʼoˆ ve, “shawˉ pawˍ mvuhˇ shawˉ 9 naˍ riˍ htaˇ mawˬ daꞈ˗a mehˍ.” Yaꞈ hkʼaˇ, awˬ viˉ awˬ nyi oˇ ve teˇ gʼaˇ kʼoˆ ve, “nawˬ maˇ shiˍ ve laˇ? Ngaˬ hui tanˇ htaˇ kʼai ve maˇ heˆ, ngaˇ kʼaˆ ve awˬ yanˇ gʼa kʼai ve yoˬ.” Ngaˇ gʼa gaˇ ve kʼo hkʼaˬ hkʼe htaˇ kʼai gaˇ kaꞈ gʼa ve maˇ heˆ tehꞈ, miˍshenˍnaˍliˍ shiˍ la ve yoˬ. Yaꞈ hkʼaˇ, ngaˇ kʼaˆ ve awˬ yanˇ ceh gʼa kʼai ve yoˬ.

⁹ Chi ve hkʼa shuˍ shuˍ, Yeˍsuˆ ve awˬ laꞈ gʼawˇ ve awˬ co˗e htaˇ, chaw htaꞈ mawˬ daꞈ tuˬ awˬ yanˇ leh chaw maˇ maˇ gʼa mawˬ daꞈ tuˬ awˬ ti htaꞈ yawˇ hui shiˍ ve yoˬ. Tawˇ pa haˉ te kʼo, bon yehˬ lonˉ hkʼaw, Yuˇdaꞈ chaw ve hpawnˬ daꞈ kuiˬ lo, teˇ yehˬ peuˬ teˇ yehˬ leh tcuh hkʼaw lo kaꞈ yawˇ hui bon maˍ˗e ve yoˬ. (Tcuh yaˇ 5:42; 17:17; 18:4) Ngaˬ hui kaꞈ hkʼa shuˍ shuˍ ngaˬ hui hto toˇ kuiˬ lo ve chaw hkʼaˬ hkʼe hpehꞈ ve gʼa shiˍ cawˇ ve yoˬ. Ngaˬ hui hto toˇ tuˬ ve awˬ yanˇ leh chaw maˇ maˇ htaꞈ gʼa mawˬ daꞈ tuˬ, pa tuˬ awˬ yanˇ gʼa gu hehnˇ taˍ cawˇ ve yoˬ.—1 Kawˇrenˍhtuˆ 9:19-23.

10. Yaˬhoˉvaˬ ve kanˉ hkʼaˇ ngaˬ hui htaꞈ aˬ htoꞈ ma ve laꞈ caˉ peꞈ laˇ ve le?

¹⁰ Ngaˇ ca paˍ lehˬ ngaˇ ca tuˬ ve awˬ hkʼeun awˬ hkʼaˇ keunˍ daꞈ ve mawˇ gʼa cawˬ leh yehˇ puiˉ tuˬ awˬ hkʼaˇ gʼa shiˍ ve yoˬ. Ngaˬ hui kaꞈ hkʼa shuˍ shuˍ, hto toˇ htaˇ yehˇ tuˬ ve laꞈ caˉ keunˍ daꞈ ve gʼa cawˬ leh yehˇ tuˬ ve awˬ hkʼaˇ kaꞈ gʼa shiˍ cawˇ ve yoˬ. Yeˍsuˆ yawˇ ve awˬ laꞈ gʼawˇ htaꞈ chaw ca tuˬ ve awˬ hkʼaˇ hkʼa tawˍ lehˆ kʼoˆ maˍ piˇ ve yoˬ. Aˬ htoꞈ ma gʼa yuˬ kʼai cawˇ ve, hkʼaˬ kaˬ lo bon maˍ˗e cawˇ ve, leh hkʼaˬ hkʼe gʼa yaw cawˇ ve yawˇ yawˇ hui htaꞈ kʼoˆ maˍ piˇ ve yoˬ. (Maꞈhtehˍ 10:5-7; Luˉkaꞈ 10:1-11) Chi beuꞈ teˇ co˗e Yaˬhoˉvaˬ ve kanˉ hkʼaˇ, “maˍ piˇ tuˬ ve laꞈ caˉ” peꞈ laˇ ve yoˬ. Laꞈ caˉ chi ve teˇ hpaˍ daꞈ jaˇ. * Chi ve teˇ hpaˍ hkʼaˬ hkʼe te yehˇ tuˬ kaꞈ Gʼuiˬ sha ve kanˉ hkʼaˇ maˍ laˇ ve yoˬ. Ngaˬ hui hto toˇ htaˇ, yonˍ gʼa tuˬ leh hkʼa dehꞈ maˍ puiˉ tuˬ chi ga laˇ ve yoˬ.—2 Tiˆmoˉseˍ 2:15.

11. Ngaˬ hui “chaw ca shehˍ hpaˇ” te htaˇ aˬ htoꞈ ma te haꞈ hanˉ cawˇ ve le?

¹¹ Ngaˇ ca paˍ lehˬ ngaˇ ca˗e htaˇ, hkʼaˬ hkʼe gʼa hpuˇ tuˬ maˇ shiˍ ve pa taw gʼa haꞈ hanˉ ve yoˬ. Maˇ˗awˍ ve lehˬ yawˇ mvuhˇ hpeuꞈ htaˇ ngaˇ ca˗e ve  yoˬ. Teˇ pawˆ pawˆ kʼo, yawˇ mvuhˇ haw lonˉ gʼa hpuˇ ve yoˬ. Ngaˬ hui “chaw ca shehˍ hpaˇ” te htaˇ kaꞈ haꞈ hanˉ ve gʼa cawˬ ve yoˬ. Ngaˬ hui hto toˇ˗e leh Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ kʼoˆ piˇ htaˇ, ngaˬ hui kaꞈ mvuhˇ yeˬ mvuhˇ haw lonˉ hkʼe gʼa hpuˇ tuˬ yoˬ hehˉ. Tawˇ pa haˉ te kʼo, shu ngaˬ hui hkawˇ maˇ na ve, yehˬ kʼa hkʼaw ve chaw tawˍ laˇ ve, leh awˬ chawˇ kʼoˆ guiˇ gʼuiˬ guiˇ laˇ tuˬ yoˬ hehˉ. Chi hkʼe hpehꞈ ve anˇ tuˬ maˇ loˍ. Yeˍsuˆ yawˇ ve awˬ laꞈ gʼawˇ htaꞈ tawˍ piˇ ve chaw geh kaꞈ bon maˍ˗e tehꞈ kʼoˆ piˇ ve yoˬ.—Maꞈhtehˍ 10:16.

12. Yawˇsuˆ liꞈ 1:7-9 hkʼaw kʼoˆ taˍ ve hkʼe, ngaˬ hui haꞈ hanˉ ve cawˬ tuˬ aˬ htoꞈ ma ga laˇ ve le?

¹² Nawˬ hkʼaˬ hkʼe te haꞈ hanˉ ve cawˬ gʼa tuˬ le? Awˉ lawˉ teˇ ceuˬ lehˬ, Yeˍsuˆ mvuhˇ naw ma hkʼoˆ chehˇ leh chi teˇ hkui hto toˇ ve htaꞈ beˆ maˍ laˇ chehˇ ve tehꞈ nawˬ gʼa yonˍ cawˇ ve yoˬ. (Yoˇhanˬ 16:33; Hpeuꞈ maˍ ve 14:14-16) Nyiˇ ceuˬ lehˬ, Yaˬhoˉvaˬ ka tiꞈ te taˍ ve hkʼe nyi haꞈ shaˉ laˇ tuˬ nawˬ teˇ ceuˬ le le gʼa te cawˇ ve yoˬ. (Maꞈhtehˍ 6:32-34) Nawˬ yonˍ ve kʼo, haꞈ hanˉ ve kaꞈ cawˬ tuˬ yoˬ. Peˍtruˆ leh awˬ chawˇ teˇ hpaˍ Yeˍsuˆ awˬ hkʼaˇ suh gʼaꞈ kʼai tuˬ, yawˇ hui ngaˇ ca ve kanˉ baˬ taˉ ve chi yonˍ ve cawˬ ve tehꞈ ngaˬ hui gʼa mawˬ ve yoˬ. Chi ve hkʼa shuˍ nawˬ ve awˬ chawˇ, yehˬ kʼa hkʼaw ve chaw htaꞈ nawˬ Liꞈ hpu tanˬ henˇ leh Yaˬhoˉvaˬ ve Shaˉhkiˆhkanˍ ve chaw geh hpawnˬ daꞈ˗e ve kʼoˆ piˇ htaˇ, nawˬ kaꞈ yonˍ ve cawˬ ve yoˬ. Nawˬ Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te tuˬ, nawˬ ve a shaꞈ teꞈ hkʼaˇ laiˉ ceuˬ pa˗oˬ ve yoˬ hehˉ. Chi lehˬ nawˬ yonˍ leh haꞈ hanˉ jaˇ ve tehꞈ hpeuꞈ maw laˇ ve yoˬ. Nawˬ haꞈ hanˉ ve cawˬ ve kʼo, “[Yaˬhoˉvaˬ] lehˬ, nawˬ kʼai kuiˬ teˇ kaˬ le le awˬ hkʼaw lo nawˬ geh chehˇ taˍ ve yoˬ” tehꞈ yonˍ gʼa ve yoˬ.—Yawˇsuˆ 1:7-9 gʼaw sheˍ.

13. Hkʼa dehꞈ dawˇ nyi ve leh bon lawˬ ve nawˬ haꞈ hanˉ ve cawˬ tuˬ aˬ htoꞈ ma ga laˇ ve le?

 ¹³ Nawˬ haꞈ hanˉ ve cawˬ tuˬ aˬ htoꞈ ma gʼa te cawˇ ve le? Yaˬhoˉvaˬ geh bon gʼa lawˬ ve yoˬ. (Tcuh yaˇ 4:29, 31) Nawˬ ve bon lawˬ hkawˇ htaꞈ Yaˬhoˉvaˬ hkʼawꞈ laˇ leh nawˬ htaꞈ maˇ chiˇ baˬ laˇ taˬ. Yawˇ nawˬ awˬ paˇ lo chehˇ leh nyi haꞈ shaˉ laˇ tuˬ yoˬ. Chi hkʼoˆ kaꞈ, oˇ htaˇ teˇ co˗e Yaˬhoˉvaˬ yawˇ ve chaw htaꞈ hkʼaˬ hkʼe ga piˇ jaw ve htaꞈ nawˬ dawˇ nyi sheˍ. Leh chi teˇ hkui hkʼa gaˬ Yaˬhoˉvaˬ nawˬ htaꞈ hkʼaˬ hkʼe ga laˇ˗oˬ ve htaꞈ kaꞈ dawˇ nyi sheˍ. Nawˬ shoꞈ shaꞈ ve gʼa hpuˇ htaˇ tawˍ daꞈ gʼaˇ tuˬ Gʼuiˬ sha ga laˇ leh, nawˬ a shaꞈ teꞈ kuiˬ hkʼaw laiˉ ceuˬ pa tuˬ awˬ gʼaˇ peꞈ laˇ sheˍ ve yoˬ. Gʼuiˬ sha yawˇ ve chaw htaꞈ laˇ tcuhˇ gʼuiˬ nyi hkʼaw ponˬ piˇ ve hkʼe, nawˬ Yeˍsuˆ ve awˬ laꞈ gʼawˇ hpehꞈ la tuˬ yawˇ ga laˇ gʼa ve yoˬ. (Tawˆ kʼai ve 14:13) Chiˇ mvuh ve liꞈ bvuhꞈ paˍ kʼoˆ ve hkʼe nawˬ kaꞈ yonˍ gʼa ve yoˬ. Oˇ kaˬ lo kʼoˆ ve, “[Yaˬhoˉvaˬ] ngaˬ geh chehˇ taˍ ve pa taw ngaˬ kawˆ tuˬ ve maˇ heˆ. Chaw yaˇ ngaˬ htaꞈ aˬ htoꞈ ma te laˇ gʼa tuˬ le?”—Chiˇ mvuh ve 118:6.

14. Mon˗shaw˗e leh To˗mo˗yo ve awˬ lawn nawˬ htaꞈ aˬ htoꞈ ma maˍ laˇ ve le?

¹⁴ Ngaˬ hui haꞈ hanˉ ve cawˬ tuˬ ga laˇ gʼa ve teˇ hkʼaˇ lehˬ, yaꞈ tawˍ puiˉ ve chaw htaꞈ haꞈ hanˉ ve cawˬ tuˬ Yaˬhoˉvaˬ hkʼaˬ hkʼe ga piˇ ve teˇ geh nyi sheˍ. Awˬ viˉ awˬ nyi yaˇ miˇ Mon˗shaw˗e ve awˬ lawn htaꞈ teˇ geh nyi sheˍ. Yawˇ yaꞈ taw puiˉ jaˇ leh hto toˇ ve haˍ jaˇ. Chi yawˇ te maˇ gʼa taˬ tehꞈ dawˇ ve yoˬ. Yawˇ maˇ shiˍ daꞈ ve chaw geh tawˇ yaw daꞈ ve lehˬ, laˇ venˇ lonˉ tawˍ laˇ ve htaꞈ shuˍ ve yoˬ. Yawˇ Gʼuiˬ sha leh awˬ nu ve chaw htaꞈ haꞈ tuˬ, yawˇ te gʼa ve hkʼe te ve yoˬ. Chi teˇ hkui hto toˇ ve kanˉ haˆ haˆ gʼa te ve tehꞈ yawˇ shiˍ ve yoˬ. Leh yawˇ hto toˇ gaˇ tuˬ bon lawˬ ve yoˬ. Awˬ leh meuˇ htaˇ, yawˇ maˇ kawˆ˗o leh hkʼaˬ htaˆ kaꞈ gʼuˇ suhˍ peuˍ ve te ve yoˬ. Awˬ viˉ awˬ nyi To˗mo˗yo haꞈ hanˉ ve cawˬ tuˬ Yaˬhoˉvaˬ ga piˇ ve teˇ geh nyi sheˍ. Yawˇ teˇ yehˬ peuˬ teˇ yehˬ hto toˇ˗e ve yoˬ. Awˉ lawˉ teˇ pawˆ htaˇ, yawˇ yaˇ miˇ teˇ gʼaˇ htaꞈ mawˬ daꞈ leh “ngaˬ Yaˬhoˉvaˬ ve Shaˉhkiˆhkanˍ ve chaw!” htaꞈ maˇ caˉ daꞈ gaˇ kʼoˆ deˇ laˇ leh yehˬ miˉ haˆ hoˆ ve yoˬ. Chi yawˇ hto toˇ ve awˉ lawˉ teˇ yehˬ hpehꞈ ve htawˇ, yawˇ maˇ kawˆ leh awˬ viˉ awˬ nyi teˇ geh kʼai ve htaꞈ kʼoˆ piˇ ve, “nawˬ kaˇ aw˗laˇ ngaˬ teꞈ chiˉ maˇ gʼa kʼoˆ sheˍ kaꞈ, yawˇ ngaˬ Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ shiˍ ve ngaˬ ha lehˬ jaˇ.” Chi teˇ hkui To˗mo˗yo hkʼaˬ htaˆ kaꞈ gʼuˇ suhˍ peuˍ ve te chehˇ ve yoˬ.

15. A shu yawˇ awˬ to awˬ liˇ teh ve hkʼaˬ hkʼe kʼoˆ gaˇ ve le? Leh aˬ htoꞈ ma te a shu yawˇ awˬ to awˬ liˇ teh ve Hkriꞈ yaˇ awˬ pon a yeˇ uiˍ jaˇ ve le?

¹⁵ Ngaˇ ca paˍ cheuˬ ve chaw hpehꞈ gaˇ ve kʼo, yawˇ awˬ to awˬ liˇ gʼa teh ve yoˬ. Yawˇ awˬ to awˬ liˇ teh ve tcuhˉ kuiˬ lehˬ “te cawˇ ve awˬ ceuˬ htaꞈ hkʼa dehꞈ te gʼa tuˬ, a shu yawˇ ve nyi ma htaꞈ gʼa gʼaˇ tcuh ve yoˬ.” Ngaˇ ca paˍ lehˬ awˬ liˇ teh ve chaw gʼa hpehꞈ leh teˇ naꞈ gʼa tu ve yoˬ. Mvuhˇ naˆ mvuhˇ hoꞈ hpehꞈ ve htawˇ, yawˇ ngaˇ gʼa htaˇ hkʼa gaˬ gʼa yeunˇ hkanˍ ve yoˬ. Ngaˬ hui kaꞈ hkʼa shuˍ shuˍ, a shu yawˇ awˬ to awˬ liˇ teh leh Gʼuiˬ sha ve kanˉ te peuˬ htaˇ hkʼa gaˬ gʼa yeunˇ hkanˍ ve yoˬ.—Maꞈhtehˍ 10:22.

16. Ngaˬ hui te gʼa tuˬ haˍ jaˇ tehꞈ dawˇ ve awˬ ceuˬ te gʼa tuˬ aˬ htoꞈ ma ga laˇ ve le?

¹⁶ Ngaˬ hui paw la htaˇ kaꞈ a shu yawˇ awˬ to awˬ liˇ teh ve maˇ heˆ. Sha ve awˬ lawn hpehꞈ ve kʼo ngaˬ hui te gaˇ ve yoˬ. Yaꞈ hkʼaˇ, laiˉ pawˆ a yeˇ uiˍ ve awˬ lawn a shaꞈ teꞈ kuiˬ hkʼaw te tuˬ sha ve maˇ heˆ. Chi htaꞈ pa taw a shu yawˇ awˬ to awˬ liˇ teh ve chaw hpehꞈ tuˬ, ngaˬ hui a shu yawˇ ve nyi ma htaꞈ gʼa gʼaˇ puiˉ ve yoˬ. Ngaˬ hui te gʼa tuˬ haˍ jaˇ tehꞈ dawˇ ve awˬ ceuˬ htaꞈ Yaˬhoˉvaˬ gʼa ga laˇ tcuh cawˇ ve yoˬ. Yaˬhoˉvaˬ daꞈ kehˬ ve awˬ ha hpu htaꞈ cuˇ leh ngaˬ hui htaꞈ ga laˇ tcuh tuˬ yoˬ.—Gaˍlaˍtiˆ 5:22, 23.

17. 1 Kawˇrenˍhtuˆ liꞈ 9:25-27 hkʼaw kʼoˆ taˍ ve hkʼe, Pawˇluꞈ a shu yawˇ awˬ to awˬ liˇ teh tuˬ yawˇ hkʼaˬ hkʼe gʼa te cawˇ ve le?

¹⁷ Tcuh yaˇ Pawˇluꞈ lehˬ a shu yawˇ awˬ to awˬ liˇ teh ve chaw hpehꞈ ve yoˬ. Yaꞈ hkʼaˇ, yawˇ kaꞈ yawˇ awˬ to htaꞈ “chu˗iˬ” leh cawˇ ve awˬ ceuˬ htaꞈ te gʼa tuˬ yawˇ awˬ to yawˇ gʼa yuˬ tiˍ ve yoˬ. (1 Kawˇrenˍhtuˆ 9:25-27 gʼaw sheˍ.) Shu kaꞈ awˬ liˇ teh ve chaw hpehꞈ tuˬ yawˇ awˬ gʼaˇ piˇ leh “hkʼa peu˗eˬ ve htaꞈ keunˍ daꞈ cawˇ daꞈ ve hkʼe, nyi sha ve awˬ hkʼaw lo te˗o.” (1 Kawˇrenˍhtuˆ 14:40) Ngaˬ hui caˉ leh Yaˬhoˉvaˬ htaꞈ oˉ kʼoˍ pui tuˬ a shu yawˇ awˬ to awˬ liˇ gʼa teh cawˇ  ve yoˬ. Leh ngaˬ hui hkʼaˬ htaˆ kaꞈ hto toˇ leh Liꞈ hpu gʼa maˍ˗e ve yoˬ.—Tcuh yaˇ 2:46.

18. Ngaˬ hui hto toˇ ve hkʼaw hkʼa dehꞈ te gʼa ve tehꞈ Yaˬhoˉvaˬ shawˍ laˇ tcuh gaˇ ve kʼo aˬ htoꞈ ma gʼa te cawˇ ve le?

¹⁸ Nyi˗a kʼo, ngaˇ ca paˍ lehˬ ngaˇ gʼa maˇ ve maˇ heˆ leh ngaˇ hkʼaˬ hkʼe ma gʼa ve htaꞈ gʼa nyi cawˇ ve yoˬ. Yaꞈ hkʼaˇ, hto toˇ ve lehˬ Yaˬhoˉvaˬ htaꞈ oˉ kʼoˍ pui la tuˬ chaw maˇ maˇ htaꞈ gaˇ piˇ gʼa ve htaꞈ cawˬ ve maˇ heˆ. (Luˉkaꞈ 8:11-15) Daꞈ ve awˬ lawn sha tanˇ hto toˇ leh shu htaꞈ Liꞈ hpu maˍ piˇ ve caˉ leh yeunˇ hkanˍ ve kʼo, ngaˬ hui te chehˇ ve kanˉ hkʼa dehꞈ te gʼa˗oˬ ve tehꞈ Yaˬhoˉvaˬ shawˍ laˇ ve yoˬ. Aˬ htoꞈ ma pa taw le? Ngaˬ hui Yaˬhoˉvaˬ leh Yeˍsuˆ ve hkawˇ na yuˬ ve pa taw yoˬ.—Maˍkuˆ 13:10; Tcuh yaˇ 5:28, 29.

19-20. Chi teˇ hkui ngaˬ hui hto toˇ˗e gaˇ tuˬ daꞈ jaˇ ve awˬ hkʼaˇ aˬ htoꞈ ma cawˬ ve le?

¹⁹ Mvuhˇ miˬ teˇ hpaˍ hpaˍ kʼo teˇ ha pa le le ngaˇ ca tuˬ a hkaw˗anˬ maˇ piˇ. Ngaˇ ca ve awˬ yanˇ peuˬ˗e la yoˬ htaˇ, ngaˇ ca paˍ lehˬ ngaˇ haˆ haˆ ca cawˇ ve tehꞈ dawˇ ve yoˬ. Ngaˬ hui “chaw ca shehˍ hpaˇ” te chehˇ ve lehˬ miˬ guiˬ chi awˬ yanˇ leh la paˇ neˇ ve tehꞈ ngaˬ hui shiˍ ve yoˬ. Ngaˬ hui shu ve a shaꞈ htaꞈ ga piˇ tuˬ hto toˇ ve awˬ yanˇ a ciˉ ceh tiˉ cawˬ ve yoˬ. Chi teˇ hkui ngaˬ hui ve kanˉ haˆ haˆ te cawˇ ve yoˬ. Law chehˇ ve ceh taˇ te. Ngaˬ hui ve a shaꞈ teꞈ hkʼaˇ teˇ ceuˬ le le daꞈ la htaˇ hehꞈ, a yeˇ uiˍ ve kanˉ chi te˗a tehꞈ taˇ dawˇ.—Cuˇ yiˍ piˇ ve 11:4.

²⁰ Chi teˇ hkui kaꞈ tanˬ leh nawˬ te gaˇ ve nyi ma cawˬ tuˬ, Liꞈ hpu hkʼaw ve cuˇ yiˍ hkʼa dehꞈ shiˍ tuˬ, haꞈ hanˉ ve leh a shu yawˇ awˬ to htaꞈ awˬ liˇ teh ve cawˬ maˇ la tuˬ te sheˍ. Miˬ guiˬ chi hkʼoˆ lo teˇ kaˬ le le hto toˇ chehˇ ve chaw 8 lanˬ gʼaˇ hpaˆ hkʼaw nawˬ kaꞈ teˇ gʼaˇ kanˉ te la sheˍ. Yaˬhoˉvaˬ geh laˬ ve dawˇ sha gawˬ lehˍ ve htaꞈ nawˬ kaꞈ gʼa tuˬ yoˬ. (Neˍhaˍmiˆ 8:10) Hto toˇ ve kanˉ nawˬ te gʼa ve hkʼe te sheˍ. Kanˉ chi Yaˬhoˉvaˬ peuˬ˗oˬ kʼoˆ laˇ htaˇ hkʼa gaˬ caˉ leh te sheˍ. Gʼuˇ suhˍ teˇ lawn hkʼaw Gʼuiˬ sha ve mvuhˇ miˬ daꞈ ve awˬ lawn caˉ leh hto toˇ tuˬ, ngaˬ hui dawˇ teh taˍ ve hkʼe te gʼa tuˬ ga laˇ ve 3 lawn htaꞈ teˇ geh henˇ tuˬ yoˬ.