1-2. 1 Tiˆmoˉseˍ liꞈ 6:20 hkʼaw kʼoˆ taˍ ve hkʼe, Tiˆmoˉseˍ aˬ htoꞈ ma gʼa ve le?

 Ngaˬ hui awˬ hpfuhˇ hkʼaˆ ve mawˇ shu geh teh taˉ gaˇ ve yoˬ. Tawˇ pa haˉ te kʼo, hpu htawnˍ hkʼaw ngaˬ hui ve hpu ca keu ve yoˬ. Ngaˬ hui ve hpu hkʼa dehꞈ nyi haꞈ shaˉ laˇ tuˬ, maˇ mehˉ˗e tuˬ, leh shu maˇ gʼa hkawˇ kʼai tuˬ htaꞈ dawˇ law ve yoˬ. Awˬ hpfuhˇ hkʼaˆ ve mawˇ shu geh teh taˉ ve hkʼaˬ hkʼe kʼai ve ngaˬ hui na gʼa ve yoˬ.

² 1 Tiˆmoˉseˍ liꞈ 6:20 gʼaw sheˍ. Tiˆmoˉseˍ awˬ hpfuhˇ hkʼaˆ jaˇ ve laꞈ shawnˍ gʼa ve oˇ ve lehˬ, Gʼuiˬ sha ve a loˍ chaw yaˇ htaꞈ caˉ daꞈ ve hteˇ ve cawˇ ve htaꞈ gʼa tuˬ, tcuh yaˇ Pawˇluꞈ Tiˆmoˉseˍ htaꞈ kʼoˆ piˇ ve yoˬ. Tiˆmoˉseˍ lehˬ Gʼuiˬ sha ve tawˇ hkawˇ leh “ha lehˬ ve bon hkawˇ maˍ ve kanˉ” htaꞈ te tuˬ daꞈ jaˇ ve awˬ vuiˬ gʼa ve yoˬ. (2 Tiˆmoˉseˍ 4:2, 5) Tiˆmoˉseˍ gʼa taˍ ve awˬ vuiˬ htaꞈ hkʼa dehꞈ haꞈ shaˉ˗oˆ tehꞈ Pawˇluꞈ kʼoˆ piˇ ve yoˬ. Chi beuꞈ teˇ co˗e ngaˬ hui kaꞈ hkʼa shuˍ yoˬ. Yaˬhoˉvaˬ ngaˬ hui htaꞈ awˬ hpfuhˇ hkʼaˆ ve awˬ ceuˬ peꞈ laˇ ve chi aˬ htoꞈ ma le? Leh aˬ htoꞈ ma te ngaˬ hui hkʼa dehꞈ gʼa haꞈ shaˉ cawˇ ve le?

3-4. Aˬ htoꞈ ma te Liꞈ hpu hkʼaw awˬ tehˬ ve awˬ hpfuhˇ hkʼaˆ ve le?

³ Yaˬhoˉvaˬ ngaˬ hui htaꞈ haꞈ jaˇ. Hkʼe te leh Liꞈ hpu hkʼaw hteˇ ve cawˇ ve awˬ ceuˬ yawˇ ngaˬ hui htaꞈ peꞈ laˇ ve yoˬ. Liꞈ hpu hkʼaw awˬ tehˬ ve chi awˬ hpfuhˇ hkʼaˆ jaˇ. Ngaˬ hui Yaˬhoˉvaˬ geh meuˆ daꞈ tuˬ, aˬ htoꞈ ma gʼa te cawˇ ve htaꞈ shiˍ tuˬ, awˬ tehˬ ve chi teˇ hpaˍ ga laˇ ve yoˬ. Leh ngaˬ hui gʼa henˇ taˍ ve awˬ tehˬ ve htaꞈ yonˍ leh gʼaꞈ te htaˇ, ngaˬ hui ve a shaꞈ hkʼaˬ hkʼe te leh ha lehˬ ve cawˬ tuˬ kaꞈ ga laˇ ve yoˬ. Ngaˬ hui lehˬ maˇ heˆ heˆ maˍ ve awˬ ceˬ maˇ hpehꞈ leh pehꞈ ve tzuhˆ ve maˇ kʼawꞈ te˗o.—1 Kawˇrenˍhtuˆ 6:9-11.

⁴ Liꞈ hpu hkʼaw awˬ tehˬ ve awˬ hpfuhˇ hkʼaˆ jaˇ ve lehˬ, “Gʼuiˬ sha ve tawˇ hkawˇ htaꞈ chiˇ uiˍ chiˇ mvuh ve” nyi ma nuˇ nehˬ ve chaw htaꞈ  ceh tiˉ yawˇ hpeuꞈ maw piˇ ve yoˬ. (Tcuh yaˇ 13:48) Chi beuꞈ teˇ co˗e Liꞈ hpu hkʼaw awˬ tehˬ ve Yaˬhoˉvaˬ ve chaw hui htaꞈ maˍ laˇ tuˬ yawˇ ka tiꞈ yeˬ leh cuˇ yiˍ cawˬ ve awˬ ceˬ htaꞈ cuˇ ve tehꞈ nyi ma nuˇ nehˬ ve chaw haꞈ yuˬ ve yoˬ. (Maꞈhtehˍ 11:25; 24:45) Awˬ tehˬ ve chi teˇ hpaˍ ngaˬ hui ve dawˇ hkʼaˇ htaꞈ cuˇ ve kʼo, shiˍ gʼa tuˬ ve maˇ heˆ. Liꞈ hpu hkʼaw awˬ tehˬ ve aꞈ kehˉ awˬ hpfuhˇ hkʼaˆ ve teˇ ceuˬ kaꞈ maˇ cawˬ.—Tawˇ naˉ ve 3:13, 15.

5. Yaˬhoˉvaˬ ngaˬ hui htaꞈ aˬ htoꞈ ma peꞈ laˇ sheˍ ve le?

⁵ Yaˬhoˉvaˬ ngaˬ hui htaꞈ peꞈ laˇ ve teˇ ceuˬ lehˬ, yawˇ htaꞈ caˉ daꞈ ve awˬ tehˬ ve leh yawˇ ve a loˍ shu htaꞈ gʼa maˍ piˇ ve daꞈ jaˇ. (Maꞈhtehˍ 24:14) Ngaˬ hui maˍ ve awˬ ceuˬ awˬ hpfuhˇ hkʼaˆ jaˇ. Chi chaw yaˇ Yaˬhoˉvaˬ ve yehꞈ kʼa hkʼaw ve chaw teˇ gʼaˇ hpehꞈ la tuˬ ga piˇ leh yawˇ hui co co taiˍ taiˍ a shaꞈ gʼa tuˬ ga piˇ ve pa taw yoˬ. (1 Tiˆmoˉseˍ 4:16) Ngaˬ hui te gʼa maˇ ve maˇ heˆ leh te gʼa i ve htawˇ, chi teˇ hkui te chehˇ ve a yeˇ uiˍ jaˇ ve kanˉ htaꞈ gʼa ga chehˇ ve yoˬ. (1 Tiˆmoˉseˍ 2:3, 4) Ngaˬ hui Gʼuiˬ sha geh kanˉ teˇ geh gʼa te ve ha lehˬ jaˇ!—1 Kawˇrenˍhtuˆ 3:9.

6. Gʼuiˬ sha geh kanˉ teˇ geh te ve daꞈ jaˇ ve htaꞈ awˬ hpfuhˇ maˇ shiˍ ve chaw htaꞈ hkʼaˬ hkʼe hpehꞈ la ve le?

⁶ Tiˆmoˉseˍ ve awˬ co˗e htaˇ chaw teˇ hpaˍ Gʼuiˬ sha geh kanˉ teˇ geh te ve daꞈ jaˇ ve chi htaꞈ awˬ hpfuhˇ maˇ shiˍ. Tawˇ pa haˉ te kʼo, Deˍmaˆ lehˬ miˬ guiˬ htaꞈ haꞈ ve pa taw, Pawˇluꞈ geh kanˉ teˇ geh gʼa te ve daꞈ jaˇ ve htaꞈ yawˇ baˬ taˉ ve yoˬ. (2 Tiˆmoˉseˍ 4:10) Pawˇluꞈ fawˉ mehˍ ve gʼa hpuˇ ve hkʼa shuˍ Hpuˍgeˍluˆ leh Heˍraˆmoˆgenˍ kaꞈ gʼa hpuˇ la ve htaꞈ kawˆ ve pa taw, yawˇ hui Gʼuiˬ sha ve kanˉ htaꞈ baˬ taˉ ve yoˬ. (2 Tiˆmoˉseˍ 1:15) Huˍmeˍnehˇ, Aˍleˍsaˍduˆ, leh Hpiˇlehˆ Gʼuiˬ sha htaꞈ hpfuhˆ ve pa taw, awˬ tehˬ ve htaꞈ baˬ taˉ ve yoˬ. (1 Tiˆmoˉseˍ 1:19, 20; 2 Tiˆmoˉseˍ 2:16-18) Yawˇ hui yonˍ hkʼaˇ yonˍ yeˬ leh Yaˬhoˉvaˬ htaꞈ haꞈ ve chaw hpehꞈ jaw ve yoˬ. Yaꞈ hkʼaˇ, Yaˬhoˉvaˬ yawˇ hui htaꞈ piˇ taˍ ve daꞈ jaˇ ve htaꞈ awˬ hpfuhˇ maˇ shiˍ ve pa taw, awˬ tehˬ ve htaꞈ baˬ taˉ ve yoˬ.

7. Gʼuiˬ sha ngaˬ hui htaꞈ peꞈ laˇ ve awˬ hpfuhˇ hkʼaˆ jaˇ ve htaꞈ baˬ taˉ tuˬ, Saˍtanˍ awˬ hkʼaˇ hkʼaˬ hkʼe ve htaꞈ yehˇ ve le?

⁷ Yaˬhoˉvaˬ ngaˬ hui htaꞈ peꞈ laˇ ve awˬ hpfuhˇ hkʼaˆ jaˇ ve awˬ ceuˬ htaꞈ baˬ taˉ tuˬ, Saˍtanˍ coˇ caˇ leh hkʼaˬ hkʼe te laˇ ve le? Saˍtanˍ yehˇ ve awˬ hkʼaˇ teˇ hpaˍ htaꞈ teˇ geh nyi sheˍ. Ngaˬ hui Yaˬhoˉvaˬ htaꞈ awˬ meu˗eˇ awˬ meu˗eˇ maˇ haꞈ leh yawˇ hkawˇ hkʼa dehꞈ maˇ na tuˬ, TV, awˬ han, in˗teu˗neꞈ, leh liꞈ kʼoˆ, chi ve teˇ hpaˍ htaꞈ Saˍtanˍ yehˇ ve yoˬ. Ngaˬ hui kawˆ leh maˇ hto toˇ tuˬ Saˍtanˍ ngaˬ hui awˬ paˇ awˬ kui ve chaw htaꞈ cuˇ leh nyiˉ laˇ tcuh ve maˇ heˆ leh fawˉ mehˍ laˇ tcuh ve yoˬ. Chi hkʼoˆ kaꞈ, Gʼuiˬ sha htaꞈ hpfuhˆ ve chaw geh laˬ ve “maˇ heˆ heˆ ve cuˇ yiˍ” heˍ laˇ ve htaꞈ ngaˬ hui na leh awˬ tehˬ ve htaꞈ baˬ taˉ tuˬ Saˍtanˍ coˇ caˇ leh te laˇ chehˇ ve yoˬ.—1 Tiˆmoˉseˍ 6:20, 21.

8. Daˍyeˍlaˆ ve awˬ lawn nawˬ htaꞈ aˬ htoꞈ ma maˍ laˇ ve le?

⁸ Ngaˬ hui shaˍ tiꞈ maˇ te ve kʼo, ngaˬ hui kaꞈ awˬ tehˬ ve htaꞈ awˬ meu˗eˇ awˬ meu˗eˇ baˬ taˉ la gʼa ve yoˬ  hehˉ. Daˍyeˍlaˆ, * VDO kenˍ (game) leˍ guiˇ ve htaꞈ dawˇ cawˇ jaˇ ve teˇ geh nyi sheˍ. Yawˇ kʼoˆ ve, “ngaˬ 10 hkʼawꞈ htaˇ kenˍ tanˬ leˍ guiˇ ve yoˬ. Awˉ lawˉ htaˇ ngaˬ kenˍ leˍ guiˇ htaˇ maˇ daꞈ ve maˇ cawˬ. Yaꞈ hkʼaˇ, awˬ yanˇ maw la htaˇ hehnˇ ve, neˇ leh shaˉ te ve htaꞈ caˉ daꞈ ve kaꞈ tanˬ leˍ guiˇ ve yoˬ. Awˬ leh meuˇ htaˇ teˇ nyi ve hkʼaw 15 naˍ riˍ leˍ guiˇ ve yoˬ.” Yawˇ kʼawꞈ kʼoˆ ve, “ngaˬ kenˍ leˍ guiˇ ve awˬ yanˇ lehˬ, Yaˬhoˉvaˬ geh awˬ meu˗eˇ awˬ meu˗eˇ maˇ meuˆ daꞈ tuˬ te laˇ ve tehꞈ ngaˬ shiˍ ve yoˬ. Yaꞈ hkʼaˇ, oˇ ve teˇ yanˇ ngaˬ a yeˇ maˇ te. Awˬ lawn chi Liꞈ hpu hkʼaw beˆ maˍ laˇ ve ngaˬ yehˇ maˇ gʼa tehꞈ dawˇ ve yoˬ.” Ngaˬ hui pyawˍ ve awˬ ceuˬ htaꞈ shaˍ tiꞈ maˇ te ve kʼo, Yaˬhoˉvaˬ ngaˬ hui htaꞈ peꞈ laˇ ve awˬ hpfuhˇ hkʼaˆ jaˇ ve htaꞈ maˇ haꞈ shaˉ tuˬ te laˇ ve yoˬ. Awˬ leh meuˇ htaˇ chi ve teˇ hpaˍ ngaˬ hui awˬ tehˬ ve htaꞈ baˬ taˉ tuˬ te laˇ gʼa ve yoˬ.

9. 1 Tiˆmoˉseˍ liꞈ 1:18, 19 hkʼaw kʼoˆ taˍ ve hkʼe, Pawˇluꞈ Tiˆmoˉseˍ htaꞈ hkʼaˬ hkʼe kʼoˆ taˍ ve le?

⁹ 1 Tiˆmoˉseˍ liꞈ 1:18, 19 gʼaw sheˍ. Pawˇluꞈ Tiˆmoˉseˍ htaꞈ maꞈ yaˇ hkʼe hpehꞈ ve tehꞈ kʼoˆ taˍ ve yoˬ. Tiˆmoˉseˍ htaꞈ “daꞈ ve teˇ ceuˬ awˬ pon maꞈ bawˆ loˬ” tehꞈ Pawˇluꞈ kʼoˆ piˇ ve yoˬ. Pawˇluꞈ kʼoˆ chehˇ ve maꞈ lehˬ awˬ tehˬ ve maꞈ hpehꞈ ve maˇ heˆ. Hkriꞈ yaˇ lehˬ maꞈ yaˇ maꞈ bawˆ ve htaꞈ hkʼaˬ hkʼe te shuˍ ve le? Hkriꞈ ve maꞈ yaˇ hpehꞈ tuˬ ngaˬ hui hkʼaˬ hkʼe te cawˇ ve le? Pawˇluꞈ yehˇ ve 5 lawn htaꞈ teˇ geh nyi sheˍ. Chi ve ngaˬ hui hkʼaˬ htaˆ kaꞈ awˬ tehˬ ve htaꞈ vawˆ tiˍ gʼa tuˬ ga laˇ tuˬ yoˬ.

10. Gʼuiˬ sha htaꞈ yawˆ yan ve aˬ htoꞈ ma kʼoˆ gaˇ ve le? Leh aˬ htoꞈ ma te ngaˬ hui Gʼuiˬ sha htaꞈ yawˆ yan cawˇ ve le?

¹⁰ Gʼuiˬ sha htaꞈ yawˆ yan˗o. Maꞈ yaˇ kanˇ paˆ cawˬ ve chaw lehˬ yawˇ hui haꞈ ve chaw leh awˬ hpfuhˇ hkʼaˆ ve awˬ ceuˬ htaꞈ haꞈ shaˉ tuˬ yoˬ. Tiˆmoˉseˍ Gʼuiˬ sha hpawˇ chehˇ ve tehꞈ yawˆ yan leh ka tiꞈ yeˬ ve hkʼaw hpeuꞈ maw laˇ ve yoˬ. Tiˆmoˉseˍ Gʼuiˬ sha htaꞈ yawˆ yan tuˬ Pawˇluꞈ kʼoˆ piˇ ve yoˬ. Chi ve lehˬ Gʼuiˬ sha htaꞈ yawˆ yan leh ka tiꞈ yeˬ ve tehꞈ hpeuꞈ maw laˇ ve yoˬ. (1 Tiˆmoˉseˍ 4:7) Ngaˬ hui Gʼuiˬ sha htaꞈ haꞈ leh yawˆ yan ve kʼo, awˬ tehˬ ve htaꞈ gʼaˇ hteꞈ vawˆ tiˍ taˍ gaˇ ve yoˬ.—1 Tiˆmoˉseˍ 4:8-10; 6:6.

11. Aˬ htoꞈ ma te ngaˬ hui awˬ to htaꞈ awˬ liˇ teh leh gʼaˇ tcuh cawˇ ve le?

¹¹ A shu yawˇ awˬ to htaꞈ awˬ liˇ teh leh gʼaˇ tcuh ve. Maˇ daꞈ ve dawˇ hkʼaˇ htaꞈ tawˍ daꞈ tuˬ, Pawˇluꞈ Tiˆmoˉseˍ htaꞈ beˆ maˍ piˇ ve pa taw, Tiˆmoˉseˍ Saˍtanˍ ve maˇ daꞈ ve kanˇ paˆ htaꞈ tawˍ daꞈ tuˬ gu hehnˇ taˍ ve yoˬ. Yawˇ daꞈ ve te hkʼaˇ dawˇ hkʼaˇ cawˬ tcuh leh awˬ viˉ awˬ nyi geh awˬ yanˇ yehˇ ve yoˬ. Chi hkʼe te gʼa tuˬ, yawˇ awˬ to htaꞈ awˬ liˇ teh leh gʼaˇ tcuh ve yoˬ. (2 Tiˆmoˉseˍ 2:22) Chi teˇ hkui ngaˬ hui kaꞈ maꞈ te chehˇ ve yoˬ. Ngaˬ hui maˇ daꞈ ve dawˇ hkʼaˇ htaꞈ tawˍ daꞈ chehˇ ve yoˬ. Ngaˬ hui chi htaꞈ gʼaˇ gaˇ ve kʼo, a shu yawˇ awˬ to htaꞈ awˬ liˇ teh leh gʼaˇ tcuh ve yoˬ. (Roˉmaꞈ 7:21-25) Chi hkʼoˆ kaꞈ, ngaˬ hui te hkʼaˇ dawˇ hkʼaˇ awˬ piˍ htaꞈ baˬ taˉ leh te hkʼaˇ dawˇ hkʼaˇ awˬ suhˉ cawˬ tcuh htaˇ, a shu yawˇ awˬ to htaꞈ awˬ liˇ teh leh gʼaˇ tcuh ve yoˬ. (Eˇfeˇsuꞈ 4:22, 24) Teˇ nyi mvuhˇ hkʼa hpeuꞈ kanˉ gʼa te leh heuˬ jaˇ ve htawˇ, hpawnˬ daꞈ˗e ve kʼai gʼa tuˬ coˇ caˇ jaˇ.—Heˍbrehˇ 10:24, 25.

12. Liꞈ hpu htaꞈ yehˇ cheuˬ tuˬ ngaˬ hui hkʼaˬ hkʼe gʼa te cawˇ ve le?

¹² Maꞈ yaˇ lehˬ cheuˬ tuˬ yawˇ ve laꞈ caˉ htaꞈ gʼa yehˇ jawˬ ve yoˬ. Chi ve hkʼa shuˍ shuˍ ngaˬ hui kaꞈ cheuˬ tuˬ Liꞈ hpu gʼa yehˇ ve yoˬ. (2 Tiˆmoˉseˍ 2:15) Maꞈ yaˇ hkʼaˬ htaˆ kaꞈ laꞈ caˉ htaꞈ gʼa yehˇ ve yoˬ. Ngaˬ hui kaꞈ Liꞈ hpu hkʼa dehꞈ yehˇ cheuˬ tuˬ, hpawnˬ daꞈ kuiˬ hkʼaw gʼa henˇ ve yoˬ. Yaꞈ hkʼaˇ, Liꞈ hpu hkʼaw awˬ tehˬ ve shu awˬ pon awˬ bon cawˬ ve tehꞈ yonˍ tuˬ, ngaˬ hui gʼa ga piˇ ve yoˬ. Ngaˬ hui a shu yawˇ hkʼaˇ yawˇ Liꞈ hpu henˇ ve hkʼaˬ htaˆ kaꞈ gʼa te ve yoˬ. Ngaˬ hui ve yonˍ hkʼaˇ yonˍ yeˬ tuˬ Liꞈ hpu gʼa ga laˇ tcuh ve yoˬ. Yaꞈ hkʼaˇ, ngaˬ hui chi hkʼe te gʼa tuˬ Liꞈ hpu gʼaw ve ceh maˇ heˆ. Liꞈ hpu hkʼaw cawˇ ve htaꞈ na gʼa tuˬ, gʼaw taˍ ve htaꞈ hkʼa dehꞈ dawˇ nyi leh Hkriꞈ yaˇ ve liꞈ kʼoˆ teˇ hpaˍ hkʼaw hpfuhˆ nyi ve yoˬ. (1 Tiˆmoˉseˍ 4:13-15) Chi hkʼe te ve kʼo, ngaˬ hui Liꞈ hpu yehˇ leh shu htaꞈ maˍ piˇ gʼa tuˬ yoˬ. Shu htaꞈ Liꞈ hpu maˍ piˇ ve lehˬ gʼaw maˍ piˇ ve ceh maˇ heˆ. Liꞈ hpu awˬ tawn oˇ ve na gʼa tuˬ leh hkʼaˬ hkʼe  te yuˬ yehˇ tuˬ ngaˬ hui gʼa ga piˇ cawˇ ve yoˬ. A shu yawˇ hkʼaˇ yawˇ Liꞈ hpu henˇ leh bvuhꞈ keu kuiˬ liꞈ kʼoˆ cawˬ ve kʼo, chi ve htaꞈ ngaˬ hui hkʼaˬ htaˆ kaꞈ gʼaꞈ te ve lehˬ shu htaꞈ Liꞈ hpu maˍ piˇ ve cheuˬ tuˬ yoˬ.—2 Tiˆmoˉseˍ 3:16, 17.

13. Heˍbrehˇ liꞈ 5:14 hkʼaw kʼoˆ taˍ ve hkʼe, aˬ htoꞈ ma cawˇ maˇ cawˇ ve htaꞈ ngaˬ hui hkʼa dehꞈ gʼa chaˬ nyi cawˇ ve le?

¹³ Gʼa shiˍ cawˇ ve. Maꞈ yaˇ kawˆ tuˬ hkʼaˬ kaˬ lo cawˬ ve gʼa shiˍ cawˇ ve yoˬ. Yawˇ kawˆ ve maˇ gʼa heuˆ la tuˬ gʼa jaw hpaw˗e ve yoˬ. Ngaˬ hui htaꞈ maˇ gʼa heuˆ la tuˬ, cawˇ maˇ cawˇ ve htaꞈ shiˍ ve kʼo, gʼa jaw kʼai ve yoˬ. (Tawˇ naˉ ve 22:3; Heˍbrehˇ 5:14 gʼaw sheˍ.) Tawˇ pa haˉ te kʼo, pyawˍ ve awˬ ceuˬ leh ngaˬ hui gʼaˇ jehˇ htaˇ te ve awˬ ceuˬ cuˇ yiˍ cawˬ ve hkʼaw gʼa leuˆ cawˇ ve yoˬ. Awˬ han hkʼaw pehꞈ ve tzuhˆ ve teˇ hkui teˇ hkui tawˆ la ve yoˬ. Chi hkʼe ve ngaˬ hui Yaˬhoˉvaˬ htaꞈ awˬ meu˗eˇ awˬ meu˗eˇ maˇ haꞈ tuˬ te laˇ ve yoˬ. Pehꞈ ve tzuhˆ ve awˬ ceuˬ htaꞈ Yaˬhoˉvaˬ nyi bawˬ leh, chi hkʼe te ve chaw lehˬ yawˇ leh awˬ nu ve chaw htaꞈ luˬ tuˬ te piˇ ve tehꞈ ngaˬ hui shiˍ ve yoˬ.—Eˇfeˇsuꞈ 5:5, 6.

14. Daꞈ maˇ daꞈ ve Daˍyeˍlaˆ shiˍ la htaˇ, yawˇ htaꞈ hkʼaˬ hkʼe ga piˇ ve le?

¹⁴ Daˍyeˍlaˆ lehˬ kenˍ hehnˇ ve, neˇ, shaˉ te ve htaꞈ caˉ daꞈ ve leˍ guiˇ ve pa taw, yawˇ shoꞈ shaꞈ ve gʼa hpuˇ ve tehꞈ shiˍ la ve yoˬ. Yawˇ hkʼaˬ hkʼe gʼa te cawˇ ve htaꞈ shiˍ tuˬ Shaw nyi kuiˬ Taꞈ yehˬ Liꞈ teh kuiˬ pawehˇ hkʼaw hpfuhˆ nyi ve yoˬ. Awˬ bon hkʼaˬ hkʼe gʼa ve le? Yawˇ maˇ daꞈ ve kenˍ htaꞈ maˇ leˍ˗oˬ, awn˗laiˉ hkʼaw kenˍ maˇ leˍ tuˬ awˬ meh yuˬ tawˆ ve, kenˍ chi hkʼe leˍ guiˇ ve chaw geh kaꞈ yawˇ awˬ chawˇ maˇ te˗o. Daˍyeˍlaˆ kʼoˆ ve, “kenˍ leˍ ve aꞈ kehˉ ngaˬ awˬ yanˇ yehˇ leh awˬ baˬ lo laiˉ ceuˬ te leh, Hkriꞈ yaˇ awˬ moˍ hkʼaw awˬ chawˇ geh awˬ yanˇ yehˇ ve yoˬ.” Chi teˇ hkui yawˇ gʼuˇ suhˍ peuˍ ve te leh nyi haꞈ shaˉ paˍ kaꞈ te ve yoˬ.

15. Aˬ htoꞈ ma te heˍ ve lehˬ kawˆ tuˬ cawˬ ve le?

¹⁵ Tiˆmoˉseˍ hkʼa shuˍ, Gʼuiˬ sha htaꞈ hpfuhˆ ve chaw geh laˬ ve awˬ lawn kawˆ tuˬ cawˬ ve tehꞈ ngaˬ hui gʼa shiˍ cawˇ ve yoˬ. (1 Tiˆmoˉseˍ 4:1, 7; 2 Tiˆmoˉseˍ 2:16) Tawˇ pa haˉ te kʼo, yawˇ hui awˬ viˉ awˬ nyi htaꞈ caˉ daꞈ ve heˍ ve maˇ heˆ leh Yaˬhoˉvaˬ ve kanˉ hkʼaˇ htaꞈ ngaˬ hui htawˇ dawˇ nawˬ dawˇ cawˬ tuˬ kaꞈ te laˇ ve yoˬ hehˉ. Chi hkʼe heˍ laˇ ve lehˬ ngaˬ hui yonˍ hkʼaˇ awˬ gʼaˇ nuˇ tuˬ te laˇ gʼa ve yoˬ. Aˬ htoꞈ ma pa taw le? Awˬ lawn kʼo, chi hkʼe heˍ ve lehˬ “hteˇ ve cawˇ ve tawˇ hkawˇ a ciˉ kaꞈ maˇ cawˬ ve chaw” geh laˬ ve yoˬ. Yawˇ hui lehˬ maˇ hawˍ daꞈ leh deˇ daꞈ tcuh gaˇ ve yoˬ. (1 Tiˆmoˉseˍ 6:4, 5) Yawˇ hui heˍ laˇ ve htaꞈ ngaˬ hui yonˍ tcuh gaˇ leh awˬ viˉ awˬ nyi htaꞈ maˇ yonˍ tcuh gaˇ ve yoˬ.

16. Ngaˬ hui htawˇ dawˇ nawˬ dawˇ cawˬ tuˬ te laˇ ve htaꞈ aˬ htoꞈ ma te shaˍ tiꞈ te cawˇ ve le?

¹⁶ Htawˇ dawˇ nawˬ dawˇ taˇ te. Tiˆmoˉseˍ lehˬ  “Yeˍsuˆ Hkriꞈ ve daꞈ ve maꞈ yaˇ” hpehꞈ ve yoˬ. Kanˉ leh hpu shi mawˇ jeˬ htaꞈ yawˇ a yeˇ yuˬ ve aꞈ kehˉ Gʼuiˬ sha ve kanˉ htaꞈ a yeˇ yuˬ ve yoˬ. (2 Tiˆmoˉseˍ 2:3, 4) Ngaˬ hui kaꞈ hkʼa shuˍ shuˍ, “hpu shi mawˇ jeˬ htaꞈ ha lehˬ ve” pa taw, Gʼuiˬ sha ve kanˉ maˇ te laˇ tuˬ taˇ te laˇ tcuh. Hpu shi mawˇ jeˬ htaꞈ haꞈ ve kʼo, ngaˬ hui Yaˬhoˉvaˬ htaꞈ hkʼa dehꞈ maˇ haꞈ tuˬ te laˇ ve yoˬ. Liꞈ hpu htaꞈ awˬ hpfuhˇ maˇ shiˍ leh Liꞈ hpu hkʼaw ve awˬ lawn shu htaꞈ maˇ kʼoˆ maˍ piˇ gaˇ la ve yoˬ. (Maꞈhtehˍ 13:22) Ngaˬ hui ve a shaꞈ teꞈ hkʼaˇ caˇ lawꞈ dawˬ lawꞈ te leh ngaˬ hui ve awˬ gʼaˇ awˬ shaˉ htaꞈ yehˇ leh “Gʼuiˬ sha ve mvuhˇ miˬ leh yawˇ ve hteˇ ve cawˇ ve teˇ ceuˬ htaꞈ awˉ lawˉ ca” cawˇ ve yoˬ.—Maꞈhtehˍ 6:22-25, 33.

17-18. Yaˬhoˉvaˬ geh meuˆ daꞈ ve htaꞈ maˇ gʼa te luˬ laˇ tuˬ ngaˬ hui hkʼaˬ hkʼe gʼa te cawˇ ve le?

¹⁷ Laꞈ haˉ haꞈ yuˬ gʼa tuˬ gu hehnˇ taˍ˗oꞈ. Maꞈ yaˇ a shu yawˇ awˬ to htaꞈ gʼa faˍ taˍ tuˬ awˉ lawˉ htaˇ kaꞈ gʼa gu hehnˇ taˍ ve yoˬ. Yaˬhoˉvaˬ ngaˬ hui htaꞈ peꞈ laˇ ve awˬ hpfuhˇ hkʼaˆ jaˇ ve htaꞈ haꞈ shaˉ taˍ gaˇ ve kʼo, kawˆ ve maˇ gʼa heuˆ la tuˬ ngaˬ hui awˉ lawˉ htaˇ kaꞈ gʼa dawˇ teh taˍ ve yoˬ. Ngaˬ hui kawˆ ve htaꞈ gʼa hpuˇ htaˇ laꞈ haˉ jaw hpaw˗e gʼa ve yoˬ.

¹⁸ Awˬ lawn chi ve htaꞈ teˇ geh dawˇ nyi sheˍ. Ngaˬ hui caꞈ poˬ ciˇ htaˇ, kawˆ tuˬ cawˬ ve kʼo haˆ hpaw˗e gʼa tuˬ, yehˬ miˉ choˬ hpawˇ oˇ hpawˇ cawˬ ve tehꞈ haꞈ yuˬ ve chaw kʼoˆ laˇ ve yoˬ. Aˬ htoꞈ ma te yawˇ chi hkʼe kʼoˆ laˇ ve le? Maˇ dawˇ maˇ gaˇ ve awˬ ceuˬ hpehꞈ la htaˇ caꞈ poˬ hkʼaw ve chaw haˆ hpaw˗e gʼa tuˬ awˬ pon yoˬ. Chi ve hkʼa shuˍ shuˍ ngaˬ hui jaw hpaw˗e gʼa tuˬ awˉ lawˉ htaˇ kaꞈ gʼa dawˇ teh taˍ ve yoˬ. Tawˇ pa haˉ te kʼo, awˬ han, TV, maˇ heˆ leh in˗teu˗neꞈ hkʼaw nyi chehˇ htaˇ, awˬ ku nyi ve awˬ han, pehꞈ ve tzuhˆ ve, leh hehnˇ ve, chi teˇ hpaˍ tawˆ la ve yoˬ. Ngaˬ hui awˉ lawˉ htaˇ kaꞈ dawˇ teh taˍ ve kʼo, Yaˬhoˉvaˬ geh meuˆ daꞈ ve htaꞈ maˇ gʼa te luˬ laˇ tuˬ laꞈ haˉ jaw hpaw˗e gʼa ve yoˬ. Leh Gʼuiˬ sha mehˆ gʼuˇ suhˍ daꞈ kehˬ ve chaw hpehꞈ gʼa ve yoˬ.—Chiˇ mvuh ve 101:3; 1 Tiˆmoˉseˍ 4:12.

19. Yaˬhoˉvaˬ ngaˬ hui htaꞈ peꞈ laˇ ve awˬ hpfuhˇ hkʼaˆ ve htaꞈ haꞈ shaˉ ve kʼo, aˬ htoꞈ ma awˬ bon gʼa tuˬ le?

¹⁹ Yaˬhoˉvaˬ ngaˬ hui htaꞈ peꞈ laˇ taˍ ve awˬ hpfuhˇ hkʼaˆ jaˇ ve htaꞈ gʼa haꞈ shaˉ cawˇ ve yoˬ. Liꞈ hpu hkʼaw awˬ tehˬ ve shu htaꞈ gʼa maˍ piˇ ve chi daꞈ jaˇ ve awˬ ceuˬ hpehꞈ ve yoˬ. Chi hkʼe te ve kʼo, ngaˬ hui ve dawˇ shiˍ puiˉ ve nyi ma daꞈ kehˬ ve yoˬ. A shaꞈ teꞈ hkʼaˇ daꞈ leh shu Yaˬhoˉvaˬ htaꞈ shiˍ la tuˬ ga piˇ ve ha lehˬ jaˇ. Gʼuiˬ sha ga laˇ tcuh ve pa taw ngaˬ hui htaꞈ peꞈ laˇ taˍ ve awˬ ceuˬ htaꞈ haꞈ shaˉ gʼa ve yoˬ.—1 Tiˆmoˉseˍ 6:12, 19.