Awˬ lawn chi ve hkʼaw, chaw yaˇ leh mvuhˇ naw ma tcuh yaˇ hkʼa peu˗eˬ awˬ pon a yeˇ uiˍ jaˇ ve awˬ ceuˬ lehˬ, Yaˬhoˉvaˬ ve awˬ meh htaꞈ yawˆ yan te piˇ ve yoˬ. Yaˬhoˉvaˬ uˉ peunˍ keunˍ ve a hkaw˗anˬ cawˬ leh chaw yaˇ awˬ tehˬ awˬ na Gʼuiˬ sha htaꞈ ka tiꞈ yeˬ˗aw laˇ tehꞈ chi a yeˇ uiˍ jaˇ ve yoˬ.

Yaˬhoˉvaˬ leh yawˇ ve awˬ meh htaꞈ hkʼaˬ htaˆ kaꞈ yawˆ yan te piˇ lawˬ tuˬ, aˬ htoꞈ ma te chi teˇ hkui a yeˇ uiˍ jaˇ tehꞈ kʼoˆ gʼa ve le? 3 hkʼaˇ htaꞈ teˇ geh nyi sheˍ.

Awˉ lawˉ teˇ hkʼaˇ lehˬ, Saˍtanˍ Yaˬhoˉvaˬ ve awˬ meh luˬ tuˬ coˇ caˇ leh te piˇ gaˇ ve yoˬ. Eˍdehˍ hko hkʼaw chehˇ htaˇ Saˍtanˍ Aˍdanˍ leh Eˇvaꞈ htaꞈ na piˇ ve awˬ hkʼaˇ lehˬ, Yaˬhoˉvaˬ yawˇ huiˉ maˬ htaꞈ daꞈ ve awˬ ceuˬ maˇ piˇ gaˇ ve tehꞈ she pfuhˍ piˇ gaˇ ve hkʼe hpehꞈ ve yoˬ. Awˬ hkʼoˆ kaꞈ, yawˇ teh ve awˬ liˇ awˬ hkʼaˇ maˇ ca tehꞈ she pfuhˍ piˇ sheˍ ve yoˬ. Peuˬ hkʼawꞈ nawˉ, Yaˬhoˉvaˬ kʼoˆ taˍ ve hkʼe Saˍtanˍ kʼoˆ ve maˇ shuˍ daꞈ ve yoˬ. Saˍtanˍ lehˬ Gʼuiˬ sha heˍ ve tehꞈ kʼoˆ ve yoˬ. Saˍtanˍ te ve awˬ ceuˬ lehˬ Yaˬhoˉvaˬ ve awˬ meh luˬ tuˬ she pfuhˍ piˇ ve yoˬ. Saˍtanˍ lehˬ “neˇ haiˬ” hpehꞈ la leh chi ve “heˍ shehˍ hpaˇ” hpehꞈ ve htaꞈ kʼoˆ gaˇ ve yoˬ. (Yoˇhanˬ 8:44) Eˇvaꞈ Saˍtanˍ hkawˇ na yuˬ ve pa taw, yawˇ Yaˬhoˉvaˬ hkawˇ maˇ na yuˬ leh Yaˬhoˉvaˬ uˉ peunˍ ve a hkaw˗anˬ cawˬ ve tehꞈ yawˇ maˇ haꞈ yuˬ ve yoˬ. (Awˬ hkuiˉ puiˍ 3:1-6) Saˍtanˍ lehˬ chi beuꞈ teˇ co˗e hkʼa gaˬ, Yaˬhoˉvaˬ ve awˬ meh luˬ tuˬ she pfuhˍ piˇ chehˇ sheˍ ve yoˬ. Yawˇ heˍ ve pa taw, chaw yaˇ Yaˬhoˉvaˬ hkʼaˬ hkʼe ve Gʼuiˬ sha hpehꞈ ve htaꞈ maˇ shiˍ gaˇ tuˬ te piˇ ve yoˬ. Saˍtanˍ ve hkawˇ na yuˬ ve chaw lehˬ, Gʼuiˬ sha ve hkawˇ maˇ na yuˬ gaˇ ve yoˬ. Yaˬhoˉvaˬ ve kanˉ te ve chaw awˬ pon kʼo, Yaˬhoˉvaˬ ve awˬ meh daꞈ kehˬ ve htaꞈ she pfuhˍ piˇ ve lehˬ, maˇ hteˇ maˇ cawˇ tehꞈ dawˇ ve yoˬ. Leh miˬ guiˬ hkʼoˆ lo tuꞈ ve hkanˍ ve leh haiˬ ve teˇ ceuˬ le le tanˬ cawˬ la ve yoˬ.

2 hkʼaˇ teˇ hkʼaˇ lehˬ Yaˬhoˉvaˬ yawˇ hpanˍ taˍ ve awˬ ceuˬ hkʼa peu˗eˬ htaꞈ awˬ bon cawˬ tuˬ, Yaˬhoˉvaˬ yawˇ ve awˬ meh hkʼaˬ htaˆ kaꞈ yawˆ yan piˇ tuˬ dawˇ teh taˍ leh yawˇ ve awˬ meh she pfuhˍ piˇ ve hkʼa peu˗eˬ htaꞈ kaꞈ te luˬ tuˬ dawˇ teh taˍ ve yoˬ.  Chi ve lehˬ, Yaˬhoˉvaˬ awˬ pon a yeˇ uiˍ jaˇ ve awˬ ceuˬ hpehꞈ ve yoˬ. Hkʼa te leh yawˇ kʼoˆ ve, “ngaˬ ve daꞈ kehˬ ve awˬ meh htaꞈ awˬ nu ve chaw ceuˬ teˇ hpaˍ htaꞈ ngaˬ hpeuꞈ maˍ piˇ” ve yoˬ. (Yeˍsaˍkeˍlaˆ 36:23) Yaˬhoˉvaˬ ve kanˉ te ve chaw teˇ gʼaˇ le le awˬ pon bon lawˬ hkawˇ, chi ve a yeˇ uiˍ jaˇ ve tehꞈ Yeˍsuˆ kaꞈ kʼoˆ ve yoˬ. Yawˇ kʼoˆ ve, ‘Yaˬhoˉvaˬ ve awˬ meh htaꞈ yawˆ yan te piˇ lawˬ˗oꞈ.’ (Maꞈhtehˍ 6:9) Chi hkʼoˆ kaꞈ, Yaˬhoˉvaˬ ve awˬ meh htaꞈ chiˇ uiˍ chiˇ mvuh tuˬ a yeˇ uiˍ jaˇ ve awˬ ceuˬ hpehꞈ ve tehꞈ Liꞈ hpu hkʼaw laiˉ pawˆ kʼoˆ taˍ ve yoˬ. Tawˇ pa haˉ te kʼo, “Gʼuiˬ sha ve awˬ meꞈ awˬ hponˇ uiˍ jaˇ ve awˬ meh htaꞈ chiˇ mvuh˗o.” (1 Raˍsaˍvanˍ 16:29; Chiˇ mvuh ve 96:8) “Awˬ meꞈ awˬ hponˇ cawˬ ve yawˇ ve awˬ meh htaꞈ kʼa muiˬ hkawˇ kʼa leh chiˇ mvuh piˇ˗oˆ.” (Chiˇ mvuh ve 66:2) “Ngaˬ ve Jawˇ mawˇ Gʼuiˬ sha˗oˬ, nyi ma awˬ tawˬ hkʼa gaˬ ngaˬ nawˬ htaꞈ chiˇ mvuh tuˬ yoˬ.” (Chiˇ mvuh ve 86:12) Teˇ pawˆ htaˇ Yaˬhoˉvaˬ mvuhˇ naw ma hkʼoˆ awˬ hkawˇ bvuhˬ tawˆ la leh, yawˇ awˬ lawn chi ve htaꞈ kʼoˆ ve yoˬ. Oˇ ve teˇ yanˇ Yeˍsuˆ Yeˍruˆsaˍlehnˍ venˇ bon yehˬ lonˉ hkʼaw chehˇ taˍ ve yoˬ. Yawˇ kʼoˆ ve, “A pa˗oˬ, nawˬ ve awˬ meh htaꞈ awˬ meꞈ awˬ hponˇ tawˆ la piˇ˗oˆ.” Peuˬ leh Yaˬhoˉvaˬ kʼoˆ sheˍ ve, “ngaˬ ve awˬ meh htaꞈ awˬ meꞈ awˬ hponˇ cawˬ piˇ peuˬ. Ngaˬ teˇ pawˆ kʼawꞈ cawˬ piˇ tuˬ sheˍ ve yoˬ” tehꞈ kʼoˆ ve yoˬ.—Yoˇhanˬ 12:28. a

3 hkʼaˇ teˇ hkʼaˇ lehˬ, Yaˬhoˉvaˬ ve loˍ, yawˇ ve awˬ meh maˇ heˆ leh yawˇ ve awˬ meꞈ awˬ hponˇ htaꞈ yuˬ hpaˆ piˇ maˇ gʼa. 1,000 hkʼawꞈ peuˬ hkʼawꞈ nawˉ, awˬ leh meuˇ teˇ pawˆ lawˇ nyi piˇ ve htaꞈ aˬ htoꞈ ma hpehꞈ la tuˬ dawˇ  nyi sheˍ. Yaˬhoˉvaˬ ve awˬ meh htaꞈ caˉ daꞈ ve maˇ cawˇ maˇ hawˍ daꞈ ve cawˬ sheˍ ve laˇ? Chi htaꞈ hkʼawꞈ laˇ tuˬ, a yeˇ uiˍ ve awˬ hawˉ lo cawˬ ve 2 ceuˬ htaꞈ teˇ geh dawˇ sheˍ. Chi ve lehˬ, chaw yaˇ ka tiꞈ yeˬ ve awˬ lawn leh Yaˬhoˉvaˬ uˉ peunˍ keunˍ ve a hkaw˗anˬ cawˬ ve awˬ lawn hpehꞈ ve yoˬ. Awˬ leh meuˇ teˇ pawˆ lawˇ nyi piˇ ve peuˬ hkʼawꞈ nawˉ, chaw yaˇ Yaˬhoˉvaˬ htaꞈ ka tiꞈ yeˬ sheˍ ve tehꞈ hpehꞈ maw piˇ tuˬ loˍ sheˍ ve hehˉ laˇ? Maˇ loˍ. Oˇ ve teˇ yanˇ yawˇ hui biˇ ve chaw hpehꞈ˗oˬ ve yoˬ. Yawˇ hui htaꞈ lawˇ nyi piˇ peuˬ leh co co taiˍ taiˍ ve a shaꞈ gʼa˗oˬ. Chi hkʼoˆ kaꞈ, Yaˬhoˉvaˬ uˉ peunˍ ve awˬ tehˬ awˬ na daꞈ jaˇ ve tehꞈ hpeuꞈ maw piˇ tuˬ loˍ sheˍ ve hehˉ laˇ? Maˇ loˍ. Oˇ ve teˇ yanˇ mvuhˇ naw ma tcuh yaˇ leh chaw yaˇ teˇ moˍ tiˉ hpehꞈ leh Yaˬhoˉvaˬ uˉ peunˍ ve htaꞈ haꞈ yuˬ tuˬ yoˬ. Hkʼe kʼo Yaˬhoˉvaˬ ve awˬ meh htaꞈ hkʼaˬ hkʼe te tuˬ le?

Oˇ ve teˇ yanˇ Yaˬhoˉvaˬ ve awˬ meh yawˆ yan ve htaꞈ gʼa tuˬ yoˬ. Yawˇ ve awˬ meh htaꞈ chaw teˇ gʼaˇ kaꞈ she pfuhˍ piˇ maˇ gʼa˗o. Yaꞈ hkʼaˇ, Yaˬhoˉvaˬ ve awˬ meh htaꞈ mvuhˇ naw ma hkʼoˆ leh miˬ guiˬ hkʼoˆ ve chaw hkʼa peu˗eˬ a yeˇ uiˍ jaˇ tehꞈ shawˍ ve yoˬ. Aˬ htoꞈ ma pa taw le? Awˬ lawn kʼo, yawˇ hui Yaˬhoˉvaˬ anˇ tuˬ te ve htaꞈ gʼa kʼawꞈ mawˬ sheˍ ve yoˬ. Oˇ ve teˇ yanˇ htaꞈ dawˇ nyi sheˍ. Yeˍsuˆ uˉ peunˍ ve Yaˬhoˉvaˬ htaꞈ hkʼawꞈ piˇ ve pa taw, Yaˬhoˉvaˬ lehˬ “teˇ ceuˬ le le awˬ hkʼaw lo hkʼa peu˗eˬ hpehꞈ tuˬ ve htaꞈ pa taw yoˬ.” (1 Kawˇrenˍhtuˆ 15:28) Chi hkʼoˆ kaꞈ, miˬ guiˬ hkʼoˆ lo ve chaw yaˇ, “Gʼuiˬ sha ve awˬ yaˇ awˬ duˬ teˇ hpaˍ ve awˬ meꞈ awˬ hponˇ htaꞈ caˉ daꞈ ve ponˬ ve teˇ ceuˬ htaꞈ gʼa tuˬ” yoˬ. (Roˉmaꞈ 8:21) Leh Yaˬhoˉvaˬ kaꞈ yawˇ dawˇ teh taˍ ve maw jaˇ˗oˬ ve te biˇ tuˬ yoˬ. Chi ve lehˬ, yawˇ ve yehˬ kʼa mvuhˇ naw ma hkʼoˆ leh miˬ guiˬ hkʼoˆ lo ve teˇ moˍ tiˉ hpehꞈ tuˬ te tuˬ yoˬ.—Eˇfeˇsuꞈ 1:10.

Chi ve hkʼa peu˗eˬ hpehꞈ la htaˇ, Yaˬhoˉvaˬ ve yehˬ kʼa mvuhˇ naw ma hkʼoˆ leh miˬ guiˬ hkʼoˆ lo ve chaw hkʼaˬ hkʼe hpehꞈ tuˬ le? Oˇ ve teˇ yanˇ ngaˬ hui Yaˬhoˉvaˬ ve awˬ meh daꞈ kehˬ jaˇ ve htaꞈ caˉ leh chiˇ uiˍ chiˇ mvuhˇ tuˬ yoˬ. Chiˇ mvuh ve liꞈ bvuhꞈ paˍ Daˍviˆ htaꞈ dawˇ pawnˍ piˇ leh bvuhꞈ tcuh ve, ‘Jawˇ mawˇ Gʼuiˬ sha htaꞈ chiˇ mvuh˗o. Yawˇ ve awˬ meꞈ awˬ hponˇ cawˬ ve awˬ meh htaꞈ co co taiˍ taiˍ chiˇ mvuh piˇ˗oˆ.’ (Chiˇ mvuh ve 72:18, 19) Yaˬhoˉvaˬ htaꞈ co co taiˍ taiˍ chiˇ mvuh gaˇ tuˬ te laˇ ve awˬ hkʼaˇ laiˉ hkʼaˇ cawˬ sheˍ ve yoˬ.

Yaˬhoˉvaˬ ve awˬ meh lehˬ yawˇ htaꞈ caˉ daꞈ ve teˇ ceuˬ le le htaꞈ kʼoˆ gaˇ ve yoˬ. Leh yawˇ ve awˬ meh a yeˇ uiˍ jaˇ ve lehˬ yawˇ haꞈ pehnˇ ve htaꞈ ngaˬ hui dawˇ nyi gaˇ tuˬ te laˇ ve yoˬ. (1 Yoˇhanˬ 4:8) Ngaˬ hui hkʼaˬ htaˆ kaꞈ tawnˇ gʼa ve, Yaˬhoˉvaˬ ngaˬ hui htaꞈ haꞈ jaˇ ve pa taw, yawˇ ngaˬ hui htaꞈ hpanˍ laˇ leh Yeˍsuˆ ngaˬ hui htaꞈ htaiˍ hkʼawꞈ tcuh laˇ ve yoˬ. Leh Yaˬhoˉvaˬ hteˇ ve cawˇ ve leh haꞈ pehnˇ ve hkʼaw uˉ peunˍ ve yoˬ. Chi hkʼe ceh tiˉ maˇ heˆ. Yaˬhoˉvaˬ ngaˬ hui htaꞈ haꞈ pehnˇ ve hkʼaˬ hkʼe hpehꞈ maw laˇ sheˍ ve caˉ leh gʼa mawˬ tuˬ sheˍ ve yoˬ. Leh ngaˬ hui Awˬ pa Yaˬhoˉvaˬ geh meuˆ daꞈ leh Yaˬhoˉvaˬ ve awˬ meh uiˍ jaˇ mvuh jaˇ ve htaꞈ co co taiˍ taiˍ chiˇ uiˍ chiˇ mvuh tuˬ yoˬ.—Chiˇ mvuh ve 73:28.