• “Ngaˬ ve awˬ hpawˇ haˉ chawˇ te peuˬ kaꞈ te ve tehꞈ dawˇ leh Yaˬhoˉvaˬ kaꞈ ngaˬ htaꞈ maˇ haꞈ˗oˬ ve tehꞈ dawˇ ve yoˬ.”

• “Yaꞈ taw jaˇ leh ngaˬ awˬ to awˬ hpfuhˇ maˇ cawˬ ve tehꞈ dawˇ leh ngaˬ maˇ daꞈ leh maˇ dawˇ cawˇ ve tehꞈ kaꞈ dawˇ ve yoˬ.”

• “Ngaˬ chaw teˇ gʼaˇ htaꞈ kaꞈ maˇ kʼoˆ piˇ haˆ leh gʼaˇ va kuiˬ kaꞈ maˇ cawˬ tehꞈ dawˇ ve yoˬ.”

• “Yaˬhoˉvaˬ ngaˬ htaꞈ maˇ haꞈ˗o ve tehꞈ dawˇ ve yoˬ.”

Tawˇ hkawˇ chi ve teˇ hpaˍ lehˬ awˬ hpawˇ awˬ ku nyi ve awˬ han htaꞈ nyi ve awˬ miˇ ma hkʼaˬ hkʼe taw nyi ma luˬ jaˇ ve htaꞈ dawˇ nyi sheˍ. Awˬ hpawˇ awˬ ku nyi ve awˬ han htaꞈ laiˉ ha pa laiˉ hkʼawꞈ nyi ve kʼo, yawˇ awˬ hpawˇ htaꞈ gʼaˇ va maˇ gʼa˗o ve tehꞈ dawˇ ve yoˬ hehˉ. Awˬ miˇ ma teˇ gʼaˇ kʼoˆ ve, “ngaˬ yawˇ htaꞈ hkʼa dehꞈ maˇ shiˍ daꞈ ve tehꞈ dawˇ ve yoˬ. Ngaˬ maˇ shiˍ ve yawˇ awˬ nu ve awˬ ceuˬ hkʼawˇ te chehˇ sheˍ ve laˇ tehꞈ kaꞈ dawˇ ve yoˬ.”

Awˬ lawn chi ve awˬ hpawˇ awˬ ku nyi ve awˬ han nyi ve awˬ miˇ ma awˬ pon te taˍ ve yoˬ. a Leh awˬ lawn chi ve Liꞈ hpu hkʼaw ve awˬ liˇ awˬ hkʼaˇ awˬ gʼaˇ peꞈ laˇ taˍ ve kaꞈ cawˬ ve yoˬ. Yaˬhoˉvaˬ yawˇ htaꞈ haꞈ leh ga laˇ gaˇ jaˇ ve tehꞈ yonˍ gʼa tuˬ kaꞈ te piˇ ve yoˬ. Awˬ lawn chi ve yawˇ nyi ma gawˬ lehˍ cawˬ leh Yaˬhoˉvaˬ geh leuˉ leh meuˆ daꞈ tuˬ kaꞈ ga piˇ ve yoˬ. b

Awˬ hpawˇ te ve teˇ ceuˬ le le htaꞈ nawˬ maˇ uˉ peunˍ gʼa ve htawˇ, nawˬ hkʼa dehꞈ maˇ dawˇ haˍ leh nyi ma gawˬ lehˍ cawˬ gʼa tuˬ te gʼa ve laiˉ hkʼaˇ cawˬ ve yoˬ. Awˬ hawˉ lo ve beˆ maˍ laˇ hkawˇ awˬ bon cawˬ ve htaꞈ teˇ geh nyi sheˍ.

A shu yawˇ awˬ to htaꞈ venˇ baˆ taˇ taˍ. Awˬ miˇ ma lehˬ awˬ hpawˇ awˬ ku nyi ve awˬ han htaꞈ nyi ve yawˇ yaꞈ kuiˬ hpehꞈ ve tehꞈ dawˇ la ve yoˬ. A˗riˆ c yawˇ ve awˬ hpawˇ chi hkʼe hpehꞈ ve lehˬ yawˇ hkʼa dehꞈ maˇ daꞈ ve tehꞈ dawˇ ve yoˬ. Yawˇ maˇ daꞈ leh a yeˇ maˇ yuˬ laˇ ve tehꞈ kaꞈ dawˇ ve yoˬ. Yawˇ htawˇ dawˇ nawˬ dawˇ cawˬ ve, “ngaˬ hpawˇ ngaˬ htaꞈ nyi cawˇ ve htawˇ, aˬ htoꞈ ma te awˬ nu ve yaˇ miˇ htaꞈ nyi ve le?” Awˬ miˇ ma teˇ hpaˍ lehˬ, yawˇ ve teˇ hkʼaˇ dawˇ hkʼaˇ maˇ daꞈ ve leh maˇ cawˇ maˇ haw daꞈ tuˬ ve tehꞈ dawˇ ve pa taw, yawˇ awˬ to htaꞈ nyi cha ve yo. Deh˗ni kʼoˆ ve, “ngaˬ lehˬ beuꞈ jaˇ leh kʼawꞈ te hkʼawꞈ gaˇ ve yaˇ miˇ hpehꞈ ve tehꞈ dawˇ ve yoˬ. Oˇ ve teˇ yanˇ Hkriꞈ yaˇ maˇ te cawˇ ve ngaˬ te tawˆ la ve yoˬ. Ngaˬ ve awˬ ca htaꞈ te luˬ leh daꞈ ve awˬ ceuˬ maˇ te ve tehꞈ dawˇ ve yoˬ.”

Nawˬ awˬ to htaꞈ venˇ baˆ taˍ chehˇ ve kʼo, nawˬ hpawˇ chi hkʼe hpehꞈ ve nawˬ a yeˇ gʼa yuˬ piˇ cawˇ ve tehꞈ Yaˬhoˉvaˬ maˇ dawˇ ve htaꞈ tawnˇ taˍ sheˍ. Yaˍkoˆ liꞈ 1:14 hkʼaw kʼoˆ ve, “hkʼaˬ ve chaw teˇ gʼaˇ maˇ kʼoˆ, a shu yawˇ sheˉ lai puiˉ ve  nyi ma lehˬ, venˇ baˆ te tuˬ yawˇ htaꞈ heˍ yuˬ beˬ yuˬ chehˇ ve yoˬ.” (Roˉmaꞈ 14:12; Hpiˇliˇpiˆ 2:12) Chi htaꞈ pa taw, nawˬ a shu yawˇ awˬ to htaꞈ venˇ baˆ taˇ taˍ. Nawˬ Yaˬhoˉvaˬ htaꞈ ka tiꞈ yeˬ ve yawˇ nawˬ htaꞈ awˬ hpfuhˇ shiˍ ve yoˬ.—2 Raˍsaˍvanˍ 16:9.

Chi hkʼoˆ kaꞈ, awˬ hpawˇ awˬ ku nyi ve awˬ han nyi ve lehˬ awˬ miˇ ma hkʼa dehꞈ maˇ daꞈ ve maˇ heˆ leh a yeˇ maˇ yuˬ piˇ ve htaꞈ kʼoˆ gaˇ ve maˇ heˆ. Cuˇ yiˍ cawˬ paˍ teˇ gʼaˇ kʼoˆ ve, awˬ ku nyi ve awˬ han nyi ve hawˉ hkʼaˆ lehˬ yaˇ miˇ teˇ gʼaˇ kaꞈ yawˇ nyi hkʼaˇ suh tuˬ te piˇ maˇ gʼa ve awˬ ceuˬ htaꞈ yawˇ loˍ ve yoˬ.

Taˇ dawˇ haˍ dawˇ hkiˉ jaˇ. Hkeˆhte˗ri kʼoˆ ve, yawˇ awˬ hpawˇ awˬ ku nyi ve awˬ han htaꞈ nyi ve ceh tiˉ dawˇ leh hkʼaˬ htaˆ kaꞈ maˇ leunˇ gʼa ve yoˬ. Fa˗seˆ kʼoˆ ve, “ngaˬ hpawˇ hkʼaˬ kaˬ lo chehˇ ve maˇ shiˍ htaˇ, ngaˬ gʼaꞈ ca leh teˇ nyi mvuhˇ hkʼa hpeuꞈ dawˇ maˇ jaˇ ve yoˬ.” Hkriꞈ yaˇ awˬ moˍ hkʼaw ve awˬ viˉ awˬ nyi yawˇ awˬ hpawˇ ve awˬ lawn gʼa shiˍ htaˇ, yawˇ huiˉ maˬ yaꞈ taw jaˇ leh awˬ viˉ awˬ nyi htaꞈ mehˆ hpfuhˇ tawˍ daꞈ maˇ haˆ. Leh laiˉ gʼaˇ kʼoˆ ve, yawˇ hui aˬ htoꞈ ma gʼa hpuˇ chehˇ ve htaꞈ awˬ nu ve chaw maˇ na gʼa laˇ ve tehꞈ dawˇ ve pa taw, teˇ gʼaˇ tiˉ chehˇ ve tehꞈ dawˇ ve yoˬ.

Chi hkʼe dawˇ ve lehˬ maˇ yaꞈ. Yaꞈ hkʼaˇ, chi hkʼe tiˉ dawˇ chehˇ ve kʼo, gʼaˇ hteꞈ dawˇ maˇ tuˬ te laˇ ve yoˬ. Nawˬ Yaˬhoˉvaˬ geh meuˆ daꞈ ve htaꞈ coˇ caˇ leh a yeˇ yuˬ sheˍ. Chi hkʼe te ve lehˬ, nawˬ co ha hpawˇ leuˉ leh yonˍ yeˬ tuˬ te laˇ ve yoˬ.—Chiˇ mvuh ve 62:2; Eˇfeˇsuꞈ 6:10.

Chi hkʼoˆ kaꞈ, Liꞈ hpu hkʼaw yaˇ miˇ, nyi ma luˬ ve awˬ lawn nawˬ gʼaw leh hkʼa dehꞈ dawˇ nyi htaˇ, nawˬ htaꞈ ga laˇ gʼa jaˇ ve yoˬ. Yawˇ hui Yaˬhoˉvaˬ geh bon lawˬ peuˬ hkʼawꞈ nawˉ awˬ gʼaˇ gʼa jaˇ ve yoˬ. Shoꞈ shaꞈ ve awˬ lawn Yaˬhoˉvaˬ laꞈ haˉ maˇ gu piˇ ve htawˇ, yawˇ hui nyi ma gawˬ lehˍ ve cawˬ tuˬ ga piˇ gʼa ve yoˬ. Haˍnaˆ “dawˇ haˍ jaˇ ve” awˬ lawn htaꞈ teˇ geh nyi sheˍ. Yawˇ “Gʼuiˬ sha geh awˬ yanˇ maw chaweh bon lawˬ chehˇ” htaˇ yawˇ gʼa hpuˇ chehˇ ve awˬ ceuˬ daꞈ la tuˬ maˇ shiˍ ve htawˇ, yawˇ nyi ma sha la ve yoˬ.—1 Saˍmo˗eˍlaˆ 1:10, 12, 18; 2 Kawˇrenˍhtuˆ 1:3, 4.

Nawˬ Hkriꞈ yaˇ awˬ moˍ hkʼaw nyi haꞈ shaˉ paˍ ga laˇ tuˬ lawˬ gʼa ve yoˬ. Yawˇ hui lehˬ, “mvuhˇ haw mvuhˇ yeˬ lonˉ laˬ htaˇ ca hpfuh taˍ kuiˬ haˉ hpawˇ hkʼa shuˍ hpehꞈ tuˬ yoˬ.” (Iˉsaˍyaˆ 32:2) Leh nawˬ awˬ viˉ awˬ nyi yaˇ miˇ teˇ gʼaˇ geh tawˇ yaw daꞈ gaˇ ve kʼo, nawˬ yonˍ gʼa leh awˬ gʼaˇ peꞈ laˇ gʼa ve awˬ viˉ awˬ nyi yaˇ miˇ htaꞈ, nawˬ tawˇ yaw daꞈ gʼa tuˬ nyi haꞈ shaˉ paˍ nawˬ htaꞈ ga laˇ gʼa ve yoˬ.—Tawˇ naˉ ve 17:17.

Nawˬ ve awˬ hpawˇ awˬ ku nyi ve awˬ han nyi gaˇ ve htaꞈ maˇ nyi tuˬ nawˬ ga piˇ gʼa˗aw laˇ? Ga piˇ gʼa ve yoˬ. Liꞈ hpu hkʼaw shoꞈ shaꞈ ve htaꞈ gʼaˇ tuˬ maˇ heˆ leh canˇ paˍ awˬ gʼaˇ hehnˇ jaˇ ve htaꞈ tawˍ daꞈ gʼaˇ tuˬ ‘chaw 2 gʼaˇ teˇ geh chehˇ ve lehˬ teˇ gʼaˇ tiˉ chehˇ ve aꞈ kehˉ daꞈ ve yoˬ.’ (Cuˇ yiˍ piˇ ve 4:9-12) Chaˬ nyi tehˆ nyi mawˬ ve teˇ hpaˍ hkʼaw kʼoˆ ve, awˬ ku nyi ve awˬ han nyi ve htaꞈ tawˍ daꞈ gʼaˇ tuˬ awˬ hpawˇ  awˬ miˇ ma ga daꞈ ve kʼo, yawˇ hui dawˇ taˍ ve hkʼe te gʼa leh teˇ pawˆ kʼawꞈ yonˍ gʼa daꞈ ve yoˬ.

Nawˬ ve awˬ hpawˇ coˇ caˇ leh maˇ nyi tuˬ te˗aw laˇ? Yawˇ Yaˬhoˉvaˬ ga laˇ tuˬ leh nyi haꞈ shaˉ paˍ ga laˇ tuˬ lawˬ˗aw laˇ? (2 Kawˇrenˍhtuˆ 4:7; Yaˍkoˆ 5:14, 15) Yawˇ awˬ ku nyi ve awˬ han htaꞈ kʼawꞈ nyi tuˬ maˇ beˬ laˇ tcuh tuˬ awˬ hkʼaˇ gu teh˗aw laˇ? Tawˇ pa haˉ te kʼo, hkaw hpi˗u teuˇ maˇ heˆ leh tawˇ yaw tuˬ awˬ hkʼeun hkʼaw nawˬ maˇ hpaw nyi tuˬ te˗aw laˇ? Awˬ ku nyi ve awˬ han htaꞈ nyi tuˬ beˬ laˇ ve teˇ ceuˬ le le htaꞈ jaw kʼai˗aw laˇ? (Tawˇ naˉ ve 27:12) Yawˇ nawˬ ga laˇ tuˬ lawˬ˗aw laˇ? Yawˇ kʼoˆ ve leh te ve teˇ ceuˬ le le nawˬ htaꞈ ka tiꞈ yeˬ˗aw laˇ? Yeˬ ve kʼo, nawˬ yawˇ htaꞈ ga piˇ gʼa ve yoˬ.

Nawˬ yawˇ htaꞈ hkʼaˬ hkʼe ga piˇ gʼa tuˬ le? Fe˗ri˗cha leh E˗hta chi teˇ ca ve awˬ lawn htaꞈ teˇ geh nyi sheˍ. E˗hta yaˇ nehˬ htaˇ, awˬ ku nyi ve awˬ han htaꞈ hkʼaˬ htaˆ kaꞈ nyi ve yoˬ. E˗hta awˬ ku nyi ve awˬ han htaꞈ kʼawꞈ nyi gaˇ ve tehꞈ dawˇ htaˇ, Fe˗ri˗cha geh tawˇ hkʼaˬ htaˆ kaꞈ yaw daꞈ gʼa ve tehꞈ E˗hta htaꞈ kʼoˆ piˇ ve yoˬ. E˗hta kʼoˆ ve, “awˬ lawn chi ve ngaˬ miˇ ma geh yaw daꞈ htaˇ, ngaˬ maˇ kʼawꞈ nyi tuˬ yawˇ hkʼa dehꞈ ga laˇ leh nawˬ hkʼaˬ hkʼe kʼai le tehꞈ teˇ hkui teˇ hkui kʼawꞈ na nyi laˇ ve yoˬ. Ngaˬ miˇ ma in˗teu˗neꞈ yehˇ tuˬ ve awˬ hkʼaˇ kaꞈ hkʼa dehꞈ gu laˇ ve yoˬ.” E˗hta awˬ ku nyi ve awˬ han nyi ve htaꞈ Fe˗ri˗cha gʼa shiˍ htaˇ, nyi ma luˬ jaˇ ve yoˬ. Yaꞈ hkʼaˇ, yawˇ kʼoˆ ve, “ngaˬ beuꞈ jaˇ leh nyi ma luˬ jaˇ ve htawˇ, yawˇ awˬ ku nyi ve awˬ han maˇ nyi tuˬ ga piˇ maˇ gʼa. Hkʼe te leh, ngaˬ huiˉ maˬ yawˇ ve awˬ lawn tawˇ yaw daꞈ ve yoˬ. Leh ngaˬ hkʼaˬ hkʼe dawˇ ve kaꞈ yawˇ htaꞈ kʼoˆ maˍ piˇ ve yoˬ. Yawˇ maˇ nyi tuˬ dawˇ teh leh awˬ lawn chi ve htaꞈ ponˬ kʼai gʼa tuˬ ga daꞈ˗a tehꞈ kʼoˆ ve yoˬ.”

Chi hkʼe yaw daꞈ ve lehˬ awˬ hpawˇ awˬ ku nyi ve awˬ han htaꞈ maˇ nyi tuˬ ceh tiˉ ga piˇ ve maˇ heˆ. Yawˇ htaꞈ awˬ miˇ ma kʼawꞈ yonˍ gʼa tuˬ kaꞈ ga piˇ ve yoˬ. Yawˇ gʼaˇ nuˇ kuiˬ hkʼaˬ hkʼe cawˬ ve, yawˇ hkʼaˬ kaˬ lo kʼai ve, maˇ heˆ leh yawˇ aˬ htoꞈ ma te chehˇ ve, awˬ miˇ ma htaꞈ kʼoˆ piˇ htaˇ, yawˇ awˬ miˇ htaꞈ teˇ ceuˬ kaꞈ maˇ faˉ ve pa taw, awˬ miˇ ma yawˇ htaꞈ kʼawꞈ yonˍ gʼa tuˬ te piˇ ve yoˬ.

Nawˬ awˬ hpawˇ htaꞈ ga piˇ gʼa ve tehꞈ yonˍ˗aw laˇ? Nawˬ awˬ hpawˇ htaꞈ ga piˇ gʼa ve tehꞈ yonˍ ve kʼo, awˬ lawn chi ve nawˬ huiˉ maˬ teˇ geh gʼaw nyi sheˍ. Awˬ hpawˇ dawˇ teh taˍ ve lehˬ awˬ ku nyi ve awˬ han maˇ nyi tuˬ, awˬ miˇ ma nawˬ htaꞈ kʼawꞈ yonˍ gʼa tuˬ, te gʼa ve yoˬ. Awˬ lawn chi ve nawˬ yawˇ geh yaw daꞈ htaˇ, yawˇ maˇ beuꞈ cawˇ ve yoˬ. Awˬ lawn chi ve nawˬ hkʼaˬ hkʼe dawˇ ve tehꞈ yawˇ dawˇ nyi cawˇ ve yoˬ. Nawˬ dawˇ teh taˍ ve awˬ ceuˬ lehˬ yawˇ awˬ ku nyi ve awˬ han maˇ nyi tuˬ nawˬ coˇ caˇ leh awˬ gʼaˇ piˇ cawˇ ve yoˬ. Leh yawˇ htaꞈ nawˬ kʼawꞈ yonˍ gʼa tuˬ kaꞈ awˬ yanˇ piˇ cawˇ ve yoˬ. Awˬ ku nyi ve awˬ han htaꞈ nyi tuˬ aˬ htoꞈ ma te laˇ ve leh chi ve htaꞈ gʼaˇ tuˬ nawˬ huiˉ maˬ gʼa shiˍ cawˇ ve yoˬ. d

Nawˬ tawˇ leuˉ leh yaw daꞈ htaˇ deˇ daꞈ la ve htaꞈ kawˆ ve kʼo, awˬ lawn chi ve htaꞈ caˉ daꞈ ve nawˬ huiˉ maˬ yaw daꞈ  htaˇ, yonˍ gʼa ve leh nyi ma sha ve hkʼaw tawˇ yaw daꞈ tuˬ, nyi haꞈ shaˉ paˍ gaˇ laˇ tuˬ lawˬ gʼa ve yoˬ. Nawˬ ve awˬ ca awˬ ku nyi ve awˬ han maˇ nyi˗o ve htawˇ, nawˬ yawˇ htaꞈ kʼawꞈ yonˍ gʼa tuˬ awˬ yanˇ gʼa yanˇ ve yoˬ. Awˬ gʼaˇ taˇ nuˇ sheˍ. Nawˬ huiˉ maˬ meuˆ daꞈ ve daꞈ la chehˇ ve tehꞈ teˇ ceuˬ ceuˬ hpeuꞈ maw daꞈ sheˍ. Awˬ yanˇ ponˬ kʼai htaˇ nawˬ yeunˇ hkanˍ ve hkʼaw coˇ caˇ leh te ve htaꞈ nawˬ huiˉ maˬ teˇ pawˆ kʼawꞈ haꞈ daꞈ la tuˬ tehꞈ dawˇ law taˍ sheˍ.—Cuˇ yiˍ piˇ ve 7:8; 1 Kawˇrenˍhtuˆ 13:4.

Nawˬ ve awˬ hpawˇ awˬ ku nyi ve awˬ han htaꞈ maˇ nyi ve teˇ tcuhˉ teˇ yanˇ gaˬ˗oˬ ve htawˇ kʼawꞈ nyi chehˇ sheˍ ve kʼo, yawˇ venˇ baˆ maˇ dawˇ hpfuhˆ leh a shu yawˇ awˬ to maˇ pa ve tehꞈ kʼoˆ gaˇ ve laˇ? Maˇ heˆ. Nawˬ ve awˬ hpawˇ awˬ ku nyi ve awˬ han hkʼaˬ htaˆ kaꞈ nyi jaw ve kʼo, chi ve htaꞈ yawˇ hkʼaˬ htaˆ kaꞈ gʼa tawˍ daꞈ ve yoˬ hehˉ. Chaw teˇ hpaˍ laiˉ hkʼawꞈ maˇ nyi˗oˬ ve htawˇ, teˇ pawˆ kʼawꞈ nyi ve yoˬ. Chi htaꞈ pa taw, yawˇ awˬ ku nyi ve awˬ han htaꞈ maˇ kʼawꞈ nyi tuˬ yawˇ te gʼa˗oˬ ve htawˇ, yawˇ awˬ to yawˇ awˬ liˇ hehnˇ chaweh gʼa teh ve yoˬ. (Tawˇ naˉ ve 28:14; Maꞈhtehˍ 5:29; 1 Kawˇrenˍhtuˆ 10:12) Yawˇ ve “nyi ma awˬ hkʼaw lo dawˇ hkʼaˇ awˬ suhˉ cawˬ la piˇ” leh “haiˬ ve awˬ ceuˬ htaꞈ canˇ” tuˬ tawˍ daꞈ tuˬ kaꞈ gʼa henˇ ve yoˬ. Chi lehˬ awˬ ku nyi ve awˬ han, awˬ nu ve maˇ daꞈ kehˬ ve awˬ ceuˬ teˇ hpaˍ leh a shu yawˇ awˬ to yawˇ ga ve htaꞈ kaꞈ kʼoˆ gaˇ ve yoˬ. (Eˇfeˇsuꞈ 4:23; Chiˇ mvuh ve 97:10; Roˉmaꞈ 12:9) Yawˇ chi ve teˇ hpaˍ htaꞈ pa tuˬ te˗aw laˇ? Pa tuˬ te ve kʼo, yawˇ a shu yawˇ ve te hkʼaˇ dawˇ hkʼaˇ htaꞈ pa tuˬ dawˇ law gʼa sheˍ ve yoˬ. e

Nawˬ ve awˬ hpawˇ awˬ ku nyi ve awˬ han maˇ nyi tuˬ te ve maˇ hpeuꞈ maw laˇ ve htawˇ, nawˬ nyi ma luˬ ve, beuꞈ ve, leh nawˬ htaꞈ hpfuhˆ laˇ ve tehꞈ dawˇ ve laˇ? Nawˬ ve dawˇ haˍ dawˇ hkiˉ ve Yaˬhoˉvaˬ htaꞈ teh taˍ piˇ leh chi hkʼe te ve lehˬ nawˬ nyi ma gawˬ lehˍ cawˬ tuˬ ga laˇ gʼa ve yoˬ. (1 Peˍtruˆ 5:7) Yaˬhoˉvaˬ geh leuˉ leh meuˆ daꞈ tuˬ, a shu yawˇ hkʼaˇ yawˇ Liꞈ hpu henˇ ve, bon lawˬ ve, leh hkʼa dehꞈ dawˇ nyi ve yoˬ. Nawˬ chi hkʼe te ve kʼo, Yaˬhoˉvaˬ kaꞈ leuˉ leh nawˬ geh meuˆ daꞈ tuˬ yoˬ tehꞈ yonˍ gʼa ve yoˬ. Chiˇ mvuh ve liꞈ 34:18 hkʼaw kʼoˆ taˍ ve hkʼe, Gʼuiˬ sha lehˬ “nyi ma luˬ chehˇ ve chaw hui awˬ paˇ neˇ lo chehˇ taˍ ve yoˬ.” Yawˇ hui ha lehˬ ve teˇ pawˆ kʼawꞈ cawˬ tuˬ Yaˬhoˉvaˬ ga piˇ gaˇ ve yoˬ. Nawˬ Gʼuiˬ sha ve kanˉ te ve daꞈ jaˇ ve chaw hpehꞈ tuˬ coˇ caˇ leh Gʼuiˬ sha htaꞈ leuˉ leh ka tiꞈ yeˬ sheˍ. Nyi haꞈ shaˉ paˍ ga laˇ tcuh sheˍ. Leh teˇ nyi kʼo, nawˬ ve awˬ hpawˇ yawˇ ve te hkʼaˇ dawˇ hkʼaˇ pa tuˬ yoˬ tehꞈ dawˇ law taˍ sheˍ.—Roˉmaꞈ 2:4; 2 Peˍtruˆ 3:9.