1. Heˍbrehˇ liꞈ 12:1 hkʼaw kʼoˆ taˍ ve hkʼe, ngaˬ hui ve a shaꞈ gʼa tuˬ awˬ leh hkʼa gaˬ gʼuiˇ ve hkʼaˬ hkʼe gʼa te cawˇ ve le?

 Liꞈ hpu hkʼaw chaw yaˇ ve a shaꞈ teꞈ hkʼaˇ lehˬ gʼuiˇ enˍ daꞈ ve htaꞈ shuˍ ve yoˬ. Awˬ leh hkʼa gaˬ gʼuiˇ gʼa leh laꞈ shawnˍ gʼa tuˬ ve chaw lehˬ co co taiˍ taiˍ ve a shaꞈ gʼa tuˬ yoˬ. (2 Tiˆmoˉseˍ 4:7, 8) Chi teˇ hkui ngaˬ hui awˬ leh meuˇ lo gʼuiˇ gaˬ la yoˬ ve pa taw, ngaˬ hui caˉ leh gʼuiˇ kʼai tuˬ gʼa coˇ caˇ cawˇ ve yoˬ. Tcuh yaˇ Pawˇluꞈ yawˇ awˬ leh hkʼa gaˬ gʼuiˇ gaˬ˗oˬ leh ngaˬ hui kaꞈ yawˇ hkʼa shuˍ te tuˬ ga laˇ ve yoˬ. Yawˇ kʼoˆ ve, ‘tawˍ taˍ ve awˬ ceuˬ hkʼa peu˗eˬ htaꞈ yuˬ baˬ sheˬ leh a shu yawˇ awˬ pon gu taˍ laˇ ve awˬ hkʼaˇ htaꞈ nyi ma yeˬ ve awˬ hkʼaw lo gʼuiˇ kʼai˗a veuˬ.’—Heˍbrehˇ liꞈ 12:1 gʼaw sheˍ.

2. “Tawˍ taˍ ve awˬ ceuˬ hkʼa peu˗eˬ htaꞈ yuˬ baˬ sheˬ” chi aˬ htoꞈ ma htaꞈ kʼoˆ gaˇ ve le?

² Pawˇluꞈ ngaˬ hui htaꞈ “tawˍ taˍ ve awˬ ceuˬ hkʼa peu˗eˬ htaꞈ yuˬ baˬ sheˬ” tehꞈ kʼoˆ laˇ ve yoˬ. Hkriꞈ yaˇ teˇ ceuˬ˗ehˬ kaꞈ maˇ gʼa taˆ˗o ve htaꞈ yawˇ kʼoˆ gaˇ ve laˇ? Maˇ heˆ. Chi hkʼe te ve aꞈ kehˉ maˇ loˍ ve hehnˇ ve awˬ ceuˬ taˆ taˍ ve htaꞈ gʼa yuˬ baˬ cawˇ ve tehꞈ yawˇ kʼoˆ gaˇ ve yoˬ. Chi ve teˇ hpaˍ ngaˬ hui gʼuiˇ naiˇ leh heuˬ jaˇ tuˬ te laˇ ve yoˬ. Chi htaꞈ pa taw, a shaꞈ gʼa tuˬ yeunˇ hkanˍ ve hkʼaw leuˉ leh gʼuiˇ kʼai tuˬ, ngaˬ hui gʼuiˇ naiˇ tuˬ te laˇ ve maˇ loˍ ve hehnˇ ve awˬ ceuˬ aˬ htoꞈ ma cawˬ ve htaꞈ gʼa yuˬ baˬ cawˇ ve yoˬ. Ngaˬ hui shiˍ˗oˬ htaˇ haˆ gʼa yuˬ baˬ cawˇ ve yoˬ. Yaꞈ hkʼaˇ, ngaˬ hui taˆ taˍ ve awˬ ceuˬ htaꞈ maˇ yuˬ baˬ gaˇ ve yoˬ. Maˇ yuˬ baˬ ve kʼo, ngaˬ hui co co taiˍ taiˍ a shaꞈ gʼa tuˬ yaꞈ kʼaw hkʼoˆ lo maˇ gʼa chehˇ. (2 Tiˆmoˉseˍ 2:5) Hkʼe kʼo, ngaˬ hui gʼa taˆ cawˇ ve awˬ ceuˬ aˬ htoꞈ ma cawˬ ve le?

3. (a) Gaˍlaˍtiˆ liꞈ 6:5 hkʼaw kʼoˆ taˍ ve hkʼe, ngaˬ hui gʼa taˆ cawˇ ve awˬ ceuˬ aˬ htoꞈ ma le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le? Leh aˬ htoꞈ ma pa taw awˬ lawn chi htaꞈ henˇ cawˇ ve le?

³ Gaˍlaˍtiˆ liꞈ 6:5 gʼaw sheˍ. Pawˇluꞈ kʼoˆ ve, “chaw teˇ gʼaˇ le le lehˬ,  a shu yawˇ ve awˬ vuiˬ htaꞈ gʼa pfuhˇ tuˬ yoˬ.” Chi ve teˇ tawn Pawˇluꞈ kʼoˆ gaˇ ve lehˬ, awˬ vuiˬ htaꞈ a yeˇ gʼa yuˬ cawˇ ve, maˇ heˆ leh shu ngaˬ hui awˬ tan te laˇ maˇ gʼa ve, Gʼuiˬ sha dawˇ law taˍ ve awˬ ceuˬ ngaˬ hui te ve htaꞈ kʼoˆ gaˇ ve yoˬ. Ngaˬ hui ve “awˬ vuiˬ” te tuˬ aˬ htoꞈ ma cawˬ ve leh awˬ vuiˬ chi teˇ hpaˍ hkʼaˬ hkʼe te gʼa tuˬ awˬ lawn chi ve hkʼaw teˇ geh henˇ tuˬ yoˬ. Chi hkʼoˆ kaꞈ, ngaˬ hui maˇ loˍ ve hehnˇ ve awˬ ceuˬ aˬ htoꞈ ma cawˬ ve le leh ngaˬ hui hkʼaˬ hkʼe yuˬ baˬ gʼa ve le, chi ve teˇ lawn hkʼaw teˇ geh henˇ tuˬ yoˬ. Ngaˬ hui ve awˬ vuiˬ htaꞈ pfuhˇ leh a shaꞈ gʼa tuˬ awˬ pon awˬ leh hkʼa gaˬ gʼuiˇ gʼa tuˬ maˇ loˍ ve awˬ ceuˬ htaꞈ yuˬ baˬ cawˇ ve yoˬ.

4. Yaˬhoˉvaˬ ve kanˉ hkʼaˬ htaˆ kaꞈ te tuˬ yoˬ tehꞈ ka tiꞈ te taˍ ve htaꞈ gʼaꞈ te ve lehˬ, aˬ htoꞈ ma te awˬ vuiˬ htaꞈ te ve ceh maˇ hpehꞈ cawˇ ve le? (Awˬ han htaꞈ nyi sheˍ.)

⁴ Yaˬhoˉvaˬ ve kanˉ hkʼaˬ htaˆ kaꞈ te tuˬ yoˬ tehꞈ ka tiꞈ te taˍ ve htaꞈ gʼaꞈ te ve. Ngaˬ hui Yaˬhoˉvaˬ htaꞈ awˬ to chiˇ aꞈ piˇ htaˇ, yawˇ ve kanˉ te leh yawˇ loˍ ve awˬ ceuˬ htaꞈ gʼaꞈ te tuˬ yoˬ tehꞈ ka tiꞈ te ve yoˬ. Leh ka tiꞈ chi ve htaꞈ ngaˬ hui hkʼaˬ htaˆ kaꞈ gʼaꞈ te cawˇ ve yoˬ. Chi lehˬ a yeˇ uiˍ jaˇ ve awˬ vuiˬ hpehꞈ ve yoˬ. Yaꞈ hkʼaˇ, ngaˬ hui awˬ pon kʼo awˬ vuiˬ hehnˇ leh te haˍ ve awˬ ceuˬ hpehꞈ ve maˇ heˆ. Yaˬhoˉvaˬ ngaˬ hui htaꞈ hpanˍ laˇ ve lehˬ yawˇ ve a loˍ htaꞈ gʼaꞈ te tcuh gaˇ ve yoˬ. (Hpeuꞈ maˍ  ve 4:11) Chi hkʼoˆ kaꞈ, Yaˬhoˉvaˬ ngaˬ hui htaꞈ yawˇ ve awˬ hoꞈ awˬ han hkʼa shuˍ hpanˍ leh yawˇ htaꞈ shiˍ gaˇ leh yawˇ ve kanˉ te tuˬ hpanˍ laˇ taˍ ve yoˬ. Chi ve htaꞈ pa taw, ngaˬ hui yawˇ geh meuˆ daꞈ gaˇ leh yawˇ loˍ ve awˬ ceuˬ htaꞈ gʼaꞈ te ve ha lehˬ gʼa ve yoˬ. (Chiˇ mvuh ve 40:8) Chi hkʼe ceh tiˉ maˇ heˆ. Ngaˬ hui Yaˬhoˉvaˬ loˍ ve awˬ ceuˬ htaꞈ gʼaꞈ te leh, yawˇ ve Yaˇ paˍ htaꞈ henˇ yuˬ ve kʼo, ngaˬ hui ha lehˬ tuˬ yoˬ.—Maꞈhtehˍ 11:28-30.

5. Nawˬ Yaˬhoˉvaˬ ve kanˉ hkʼaˬ htaˆ kaꞈ te tuˬ yoˬ tehꞈ ka tiꞈ te taˍ ve htaꞈ te gʼa tuˬ aˬ htoꞈ ma ga laˇ ve le? (1 Yoˇhanˬ 5:3)

⁵ Nawˬ ve awˬ vuiˬ htaꞈ hkʼaˬ hkʼe te pfuhˇ gʼa tuˬ le? Nawˬ htaꞈ ga laˇ gʼa ve 2 ceuˬ cawˬ ve yoˬ. Awˉ lawˉ teˇ ceuˬ lehˬ, Yaˬhoˉvaˬ htaꞈ leuˉ leh haꞈ sheˍ. Nawˬ chi hkʼe te gʼa tuˬ Gʼuiˬ sha nawˬ awˬ pon te laˇ ve daꞈ ve awˬ ceuˬ htaꞈ dawˇ nyi sheˍ. Leh awˬ gʼuˇ suhˍ hpawˇ Gʼuiˬ sha nawˬ awˬ pon gu teh taˍ laˇ ve gʼa tuˬ ve awˬ bon htaꞈ kaꞈ dawˇ nyi sheˍ. Nawˬ Yaˬhoˉvaˬ htaꞈ leuˉ leh haꞈ ve kʼo, nawˬ yawˇ ve hkawˇ na yuˬ tuˬ sha ve yoˬ. (1 Yoˇhanˬ 5:3 gʼaw sheˍ.) Nyiˇ ceuˬ teˇ ceuˬ lehˬ, Yeˍsuˆ htaꞈ henˇ yuˬ sheˍ. Yeˍsuˆ Gʼuiˬ sha ga laˇ tuˬ bon lawˬ leh awˬ gʼuˇ suhˍ hpawˇ gʼa tuˬ ve laꞈ shawnˍ htaꞈ dawˇ nyi ve pa taw, Yeˍsuˆ Yaˬhoˉvaˬ loˍ ve awˬ ceuˬ htaꞈ gʼaꞈ te gʼa ve yoˬ. (Heˍbrehˇ 5:7; 12:2) Chi htaꞈ pa taw, Yeˍsuˆ hkʼa shuˍ te sheˍ. Awˬ gʼaˇ gʼa tuˬ Yaˬhoˉvaˬ geh bon lawˬ leh co co taiˍ taiˍ a shaꞈ gʼa tuˬ ve dawˇ law kuiˬ htaꞈ hkʼaˬ htaˆ kaꞈ dawˇ nyi sheˍ. Nawˬ Yaˬhoˉvaˬ htaꞈ haꞈ leh Yeˍsuˆ htaꞈ leuˉ leh henˇ yuˬ ve kʼo, yawˇ ve kanˉ hkʼaˬ htaˆ kaꞈ te tuˬ yoˬ tehꞈ ka tiꞈ te taˍ ve htaꞈ nawˬ gʼaꞈ te gʼa tuˬ yoˬ.

6. Yehˬ kʼa hkʼaw ve awˬ vuiˬ htaꞈ ngaˬ hui aˬ htoꞈ ma pa taw te cawˇ ve le? (Awˬ han htaꞈ nyi sheˍ.)

⁶ Yehˬ kʼa hkʼaw ngaˬ hui ve awˬ vuiˬ. A shaꞈ gʼa tuˬ awˬ pon gʼuiˇ enˍ daꞈ ve lehˬ, awˬ viˉ awˬ nyi leh yehˬ kʼa hkʼaw ve chaw htaꞈ haꞈ ve aꞈ kehˉ, ngaˬ hui Yaˬhoˉvaˬ leh Yeˍsuˆ htaꞈ gʼa haꞈ cawˇ ve yoˬ. (Maꞈhtehˍ 10:37) Yaꞈ hkʼaˇ, chi ve lehˬ ngaˬ hui yehˬ kʼa hkʼaw ve awˬ vuiˬ htaꞈ maˇ te cawˇ ve tehꞈ kʼoˆ gaˇ ve maˇ heˆ. Yaˬhoˉvaˬ leh Yeˍsuˆ ngaˬ hui htaꞈ haꞈ yuˬ laˇ tuˬ yehˬ kʼa hkʼaw ve awˬ vuiˬ htaꞈ ngaˬ hui hkʼa dehꞈ te cawˇ ve yoˬ. (1 Tiˆmoˉseˍ 5:4, 8) Ngaˬ hui chi hkʼe te ve kʼo, ha lehˬ jaˇ tuˬ yoˬ. Awˬ hpawˇ awˬ miˇ ma haꞈ daꞈ leh yawˆ yan daꞈ ve, awˬ pa awˬ e yaˇ htaꞈ haꞈ leh maˍ piˇ ve kʼo, yawˇ hui awˬ pa awˬ e ve hkawˇ na yuˬ tuˬ yoˬ. Leh yehˬ kʼa hkʼaw ve chaw teˇ gʼaˇ le le kaꞈ ha lehˬ jaˇ tuˬ yoˬ. Awˬ lawn kʼo, Yaˬhoˉvaˬ ngaˬ hui htaꞈ chi hkʼe hpehꞈ tcuh gaˇ ve yoˬ.—Eˇfeˇsuꞈ 5:33; 6:1, 4.

7. Yehˬ kʼa hkʼaw ve awˬ vuiˬ htaꞈ hkʼa dehꞈ te gʼa tuˬ nawˬ hkʼaˬ hkʼe te cawˇ ve le?

⁷ Nawˬ ve awˬ vuiˬ htaꞈ hkʼaˬ hkʼe te pfuhˇ gʼa tuˬ le? Awˬ hpawˇ awˬ miˇ ma, awˬ pa awˬ e, maˇ heˆ leh yaˇ hpehꞈ ve htawˇ, Liꞈ hpu hkʼaw beˆ maˍ laˇ taˍ ve htaꞈ gʼaˇ va sheˍ. Hkʼaˬ hkʼe te tuˬ a shu yawˇ hkʼaˇ yawˇ taˇ dawˇ cheˆ. Awˬ liˇ awˬ hkʼaˇ leh chaw liˇ vaˇ liˇ maˇ˗awˍ ve chaw te ve hkʼe taˇ te. Maˇ heˆ leh cuˇ yiˍ cawˬ paˍ kʼoˆ laˇ ve htaꞈ na ve ceh kaꞈ taˇ te. (Tawˇ naˉ ve 24:3, 4) Chi hkʼoˆ kaꞈ, Liꞈ hpu hkʼaw ve awˬ liˇ awˬ hkʼaˇ htaꞈ hkʼaˬ hkʼe yuˬ yehˇ tuˬ, Gʼuiˬ sha ve kanˉ hkʼaˇ hkʼaw ve liꞈ teˇ hpaˍ htaꞈ gʼaw gʼa ve yoˬ. Tawˇ pa haˉ te kʼo, laiˉ tawn cawˬ ve awˬ lawn “Yehˬ kʼa hkʼaw ga piˇ ve” b chi ve hkʼaw awˬ hpawˇ awˬ miˇ ma, awˬ pa awˬ e leh yaˇ nehˬ yawˇ hui gʼa hpuˇ chehˇ ve htaꞈ gu gʼa tuˬ ga piˇ gʼa ve awˬ lawn cawˬ maˇ jaˇ ve yoˬ. Nawˬ ve yehˬ kʼa hkʼaw ve chaw Liꞈ hpu hkʼaw beˆ maˍ laˇ ve htaꞈ maˇ gʼaꞈ te ve htawˇ, beˆ maˍ laˇ ve oˇ ve hkʼaw ve nawˬ caˉ leh yuˬ yehˇ sheˍ. Nawˬ yuˬ yehˇ ve kʼo, nawˬ ve yehˬ kʼa hkʼaw ve chaw awˬ bon gʼa leh Yaˬhoˉvaˬ nawˬ htaꞈ awˬ bon naꞈ laˇ tuˬ yoˬ.—1 Peˍtruˆ 3:1, 2.

8. Ngaˬ hui dawˇ cheˆ ve lehˬ ngaˬ hui htaꞈ heuˆ la kuiˬ hkʼaˬ hkʼe cawˬ ve le?

⁸ Ngaˬ hui dawˇ cheˆ ve htaꞈ heuˆ la kuiˬ cawˬ ve. Yaˬhoˉvaˬ lehˬ ngaˬ hui htaꞈ a shu yawˇ hkʼaˇ yawˇ dawˇ cheˆ tcuh laˇ leh ngaˬ hui cawˇ ve hkʼaw dawˇ cheˆ ve kʼo ha lehˬ gʼa ve yoˬ. Yaꞈ hkʼaˇ, ngaˬ hui dawˇ cheˆ ve maˇ cawˇ ve kʼo, ngaˬ hui htaꞈ heuˆ la kuiˬ maˇ cawˬ tuˬ Yaˬhoˉvaˬ haꞈ shaˉ laˇ ve maˇ heˆ. (Gaˍlaˍtiˆ 6:7, 8) Chi htaꞈ pa taw, ngaˬ hui leuˆ yuˬ  ve, kʼoˆ ve, leh te maˇ cawˇ ve kʼo, ngaˬ hui htaꞈ heuˆ la kuiˬ cawˬ ve yoˬ. Chi ve ngaˬ hui nyi ma luˬ tuˬ kaꞈ te laˇ ve yoˬ. Ngaˬ hui dawˇ cheˆ ve htaꞈ gʼa haꞈ yuˬ ve tehꞈ shiˍ ve kʼo, ngaˬ hui te yaꞈ ve awˬ ceuˬ htaꞈ kʼoˆ tuˬ yoˬ. Te yaꞈ ve awˬ ceuˬ htaꞈ gu leh maˇ kʼawꞈ te yaꞈ. Chi hkʼe te ve lehˬ a shaꞈ gʼa tuˬ awˬ pon caˉ leh gʼuiˇ enˍ daꞈ gʼa tuˬ ga laˇ ve yoˬ.

9. Nawˬ dawˇ cheˆ ve maˇ cawˇ ve kʼo hkʼaˬ hkʼe te cawˇ ve le? (Awˬ han htaꞈ nyi sheˍ.)

⁹ Nawˬ ve awˬ vuiˬ htaꞈ hkʼaˬ hkʼe te pfuhˇ gʼa tuˬ le? Nawˬ dawˇ cheˆ ve maˇ cawˇ ve kʼo, hkʼaˬ hkʼe te cawˇ ve le? Ponˬ laˬ ve awˬ yanˇ htaꞈ nawˬ kʼawꞈ pa maˇ gʼa ve yoˬ. Chi htaꞈ pa taw, nawˬ awˬ to htaꞈ venˇ baˆ taˍ leh awˬ yanˇ taˇ shonˇ chehˇ. A shu yawˇ awˬ to maˇ yaꞈ leh shu htaꞈ venˇ baˆ maˇ taˍ ve tehꞈ hpeuꞈ maw piˇ sheˍ. Nawˬ te yaꞈ˗oˬ ve tehꞈ haꞈ yuˬ sheˍ. Leh chi teˇ hkui nawˬ te gʼa ve hkʼe hkʼa dehꞈ te sheˍ. Nawˬ yaꞈ ve tehꞈ dawˇ ve kʼo, nyi ma nuˇ nehˬ ve hkʼaw Yaˬhoˉvaˬ geh bon lawˬ ve, nawˬ te yaꞈ ve htaꞈ haꞈ yuˬ ve, leh yawˇ nawˬ htaꞈ venˇ baˆ hpehˇ laˇ tuˬ lawˬ sheˍ. (Chiˇ mvuh ve 25:11; 51:3, 4) Chi hkʼoˆ kaꞈ, nawˬ yawˇ geh kʼoˆ ve maˇ heˆ leh maˇ daꞈ ve te ve awˬ ceuˬ htaꞈ lawˬ hkawˉ piˇ sheˍ. Leh nyi haꞈ shaˉ paˍ ga laˇ tuˬ kaꞈ lawˬ cawˇ ve yoˬ. (Yaˍkoˆ 5:14, 15) Nawˬ te yaꞈ ve awˬ ceuˬ htaꞈ maˇ kʼawꞈ te tuˬ te sheˍ. Nawˬ chi hkʼe te ve kʼo, Yaˬhoˉvaˬ nawˬ htaꞈ ha kʼaˉ leh ga laˇ tuˬ yoˬ tehꞈ yonˍ gʼa ve yoˬ.—Chiˇ mvuh ve 103:8-13.

10. Aˬ htoꞈ ma te a shu yawˇ awˬ to htaꞈ dawˇ law jaˇ ve lehˬ awˬ vuiˬ hehnˇ jaˇ ve htaꞈ shuˍ ve le? (Gaˍlaˍtiˆ 6:4)

¹⁰ A shu yawˇ awˬ to htaꞈ dawˇ law jaˇ ve. Ngaˬ hui lehˬ awˬ nu ve chaw htaꞈ tehˆ daꞈ ve kʼo, a shu yawˇ awˬ to htaꞈ dawˇ law jaˇ leh, chi ve lehˬ ngaˬ hui awˬ pon hehnˇ jaˇ ve awˬ ceuˬ hpehꞈ la ve yoˬ. (Gaˍlaˍtiˆ 6:4 gʼaw sheˍ.) A shu yawˇ awˬ to shu htaꞈ tehˆ daꞈ puiˉ ve chaw lehˬ, hkawehˉ leh enˍ daꞈ gaˇ la ve yoˬ. (Gaˍlaˍtiˆ 5:26) A shu yawˇ awˬ to te maˇ gʼa ve kaꞈ awˬ nu ve chaw htaꞈ tehˆ daꞈ leh te gʼa tuˬ nyiˉ te ve yoˬ. Chi ve a shu yawˇ awˬ to htaꞈ heuˆ la kuiˬ cawˬ ve yoˬ. Liꞈ hpu hkʼaw kʼoˆ ve, “dawˇ law tuˬ mehˉ kʼai ve kʼo, nyi ma htawˇ luˬ kʼai ve yoˬ.” A shu yawˇ awˬ to te maˇ gʼa ve htaꞈ te gʼa tuˬ dawˇ law jaˇ ve kʼo, leuˉ leh nyi ma htawˇ luˬ kʼai tuˬ yoˬ. (Tawˇ naˉ ve 13:12) Chi ve ngaˬ hui awˬ gʼaˇ nuˇ tuˬ te laˇ leh a shaꞈ gʼa tuˬ awˬ pon hkʼa dehꞈ gʼuiˇ maˇ gʼa.—Tawˇ naˉ ve 24:10.

11. Nawˬ a shu yawˇ awˬ to htaꞈ maˇ dawˇ law jaˇ tuˬ aˬ htoꞈ ma ga laˇ ve le?

¹¹ Nawˬ hkʼaˬ hkʼe te yuˬ baˬ gʼa tuˬ le? Yaˬhoˉvaˬ loˍ ve aꞈ kehˉ a shu yawˇ awˬ to htaꞈ taˇ dawˇ law jaˇ. Nawˬ te maˇ gʼa ve awˬ leuˉ Yaˬhoˉvaˬ maˇ dawˇ law. (2 Kawˇrenˍhtuˆ 8:12) Nawˬ awˬ to awˬ nu ve chaw htaꞈ Yaˬhoˉvaˬ maˇ tehˆ daꞈ ve tehꞈ yonˍ sheˍ. (Maꞈhtehˍ 25:20-23) Nawˬ nyi ma awˬ tawˬ hkʼa gaˬ yawˇ ve kanˉ te ve, nawˬ ka tiꞈ yeˬ ve, leh nawˬ yeunˇ hkanˍ ve htaꞈ Gʼuiˬ sha awˬ hpfuhˇ shiˍ ve yoˬ. Nawˬ a shaꞈ maˇ ve, maˇ chehˇ sha ve, leh awˬ tcuhˉ awˬ yanˇ pa kʼai ve htaꞈ pa taw, oˇ htaˇ hkʼe leˇ te maˇ gʼa ve tehꞈ nyi ma nuˇ nehˬ ve hkʼaw haꞈ yuˬ sheˍ. Chi hkʼe hpehꞈ ve kʼo, nawˬ maˇ chehˇ sha ve maˇ heˆ leh a shaꞈ maˇ˗oˬ ve pa taw te maˇ gʼa ve kʼo, Baˍziˆlehˇ awˬ vuiˬ teˇ ceuˬ ceuˬ htaꞈ maˇ haꞈ yuˬ ve hkʼe nawˬ kaꞈ te sheˍ. (2 Saˍmo˗eˍlaˆ 19:35, 36) Moˉseˍ awˬ nu ve chaw ga laˇ tuˬ lawˬ ve hkʼe nawˬ kaꞈ te leh keunˍ daꞈ ve chaw htaꞈ mawˬ htaˇ awˬ vuiˬ teˇ ceuˬ ceuˬ te tcuh sheˍ. (Tawˆ kʼai ve 18:21, 22) Nawˬ nyi ma nuˇ nehˬ ve chaw hpehꞈ ve kʼo, nawˬ a shu yawˇ awˬ to htaꞈ maˇ dawˇ law jaˇ. Nawˬ chi hkʼe maˇ te ve kʼo, a shaꞈ gʼa tuˬ awˬ pon coˇ caˇ leh gʼuiˇ htaˇ awˬ gʼaˇ peuˬ˗e tuˬ yoˬ.

12. Awˬ nu ve chaw dawˇ cheˆ ve maˇ cawˇ ve ngaˬ hui ve awˬ vuiˬ hpehꞈ ve laˇ? Tawˇ pa haˉ kʼoˆ maˍ laˇ sheˍ.

¹² Awˬ nu ve chaw dawˇ cheˆ ve maˇ cawˇ ve htaꞈ ngaˬ hui ve awˬ vuiˬ hpehꞈ ve tehꞈ dawˇ ve. Awˬ nu ve chaw awˬ pon ngaˬ hui dawˇ cheˆ piˇ maˇ gʼa leh, yawˇ hui dawˇ cheˆ ve awˬ ceuˬ maˇ cawˇ ve yawˇ hui htaꞈ heuˆ la kuiˬ maˇ cawˬ tuˬ, ngaˬ hui haꞈ shaˉ piˇ maˇ gʼa. Tawˇ pa haˉ te kʼo, yaˇ Yaˬhoˉvaˬ ve kanˉ maˇ te tuˬ dawˇ cheˆ ve yoˬ. Chi hkʼe dawˇ cheˆ ve lehˬ awˬ pa awˬ e nyi ma luˬ jaˇ tuˬ te piˇ ve yoˬ. Yaꞈ hkʼaˇ, awˬ pa awˬ e a shu yawˇ awˬ to htaꞈ venˇ baˆ maˇ taˍ cawˇ. Chi ve lehˬ awˬ pa awˬ e htaꞈ Yaˬhoˉvaˬ awˬ vuiˬ pfuhˇ tcuh gaˇ ve maˇ heˆ.—Roˉmaꞈ 14:12.

13. Yaˇ dawˇ cheˆ ve maˇ cawˇ ve kʼo, awˬ pa awˬ e hkʼaˬ hkʼe te tuˬ le?

 ¹³ Nawˬ hkʼaˬ hkʼe te yuˬ baˬ gʼa tuˬ le? Yaˬhoˉvaˬ lehˬ teˇ gʼaˇ le le a shu yawˇ hkʼaˇ yawˇ dawˇ cheˆ tcuh laˇ ve tehꞈ tawnˇ taˍ sheˍ. Chi ve lehˬ Yaˬhoˉvaˬ ve kanˉ te tuˬ ve laˇ, maˇ te tuˬ ve laˇ htaꞈ kaꞈ kʼoˆ ve yoˬ. Nawˬ biˇ ve awˬ pa awˬ e maˇ hpehꞈ ve tehꞈ Yaˬhoˉvaˬ shiˍ ve htawˇ, yawˇ lehˬ nawˬ te gʼa ve hkʼe nawˬ ve yaˇ htaꞈ hkʼa dehꞈ nyi haꞈ shaˉ tcuh gaˇ ve yoˬ. Yaˇ dawˇ cheˆ ve lehˬ yawˇ ve awˬ vuiˬ hpehꞈ ve yoˬ. Nawˬ ve awˬ vuiˬ hpehꞈ ve maˇ heˆ. (Tawˇ naˉ ve 20:11) Nawˬ awˬ pa awˬ e hpehꞈ ve awˬ vuiˬ te ve htaꞈ yaꞈ ve tehꞈ tiˉ dawˇ nyi la ve yoˬ. Chi hkʼe hpehꞈ ve kʼo, nawˬ hkʼaˬ hkʼe dawˇ ve Yaˬhoˉvaˬ htaꞈ kʼoˆ maˍ piˇ leh, Yaˬhoˉvaˬ venˇ baˆ hpehˇ laˇ tuˬ lawˬ sheˍ. Peuˬ laˬ htaˇ nawˬ te yaꞈ ve awˬ lawn htaꞈ kʼawꞈ gu maˇ gʼa ve tehꞈ, Gʼuiˬ sha shiˍ leh yaˇ dawˇ cheˆ ve maˇ cawˇ ve yaˇ htaꞈ heuˆ la kuiˬ maˇ cawˬ tuˬ, nawˬ haꞈ shaˉ piˇ gʼa ve tehꞈ Gʼuiˬ sha maˇ dawˇ law. Yaˇ Yaˬhoˉvaˬ geh kʼawꞈ la gaˇ ve kʼo, Yaˬhoˉvaˬ yawˇ htaꞈ shiˍ hkʼawꞈ veu laˇ tuˬ yoˬ tehꞈ nawˬ tawnˇ taˍ sheˍ.—Luˉkaꞈ 15:18-20.

14. Ngaˬ hui hkʼaˬ htaˆ kaꞈ nyi ma naˬ ve lehˬ mawˇ hehnˇ ve awˬ ceuˬ htaꞈ yuˬ baˬ ve hkʼe, hkʼaˬ hkʼe te yuˬ baˬ cawˇ ve le?

¹⁴ Hkʼaˬ htaˆ kaꞈ nyi ma naˬ ve. Ngaˬ hui te yaꞈ htaˇ nyi ma naˬ ve lehˬ a hkʼe leˇ hpehꞈ ve tehꞈ dawˇ ve yoˬ. Yaꞈ hkʼaˇ, ngaˬ hui hkʼaˬ htaˆ kaꞈ nyi ma luˬ ve maˇ te cawˇ. Hkʼaˬ htaˆ kaꞈ nyi ma naˬ chehˇ ve lehˬ mawˇ hehnˇ ve maˇ taˆ cawˇ ve htaꞈ taˆ taˍ ve htaꞈ shuˍ leh yuˬ baˬ cawˇ ve yoˬ. Ngaˬ hui te yaꞈ ve awˬ ceuˬ kʼoˆ maˍ piˇ ve, venˇ baˆ dawˇ hpfuhˆ ve leh maˇ kʼawꞈ te yaꞈ tuˬ awˬ hkʼaˇ ca ve kʼo, Yaˬhoˉvaˬ venˇ baˆ hpehˇ laˇ tuˬ yoˬ tehꞈ ngaˬ hui yonˍ gʼa ve yoˬ. (Tcuh yaˇ 3:19) Yaˬhoˉvaˬ lehˬ ngaˬ hui htaꞈ hkʼaˬ htaˆ kaꞈ yaꞈ ve tehꞈ maˇ dawˇ tcuh gaˇ. Chi hkʼe ve dawˇ hkʼaˇ lehˬ ngaˬ hui nyi ma naˬ tuˬ te laˇ leh ngaˬ hui htaꞈ heuˆ la kuiˬ hkʼaˬ hkʼe taw cawˬ ve yawˇ shiˍ ve yoˬ. (Chiˇ mvuh ve 31:10) Ngaˬ hui nyi ma luˬ ve htaꞈ ceh tiˉ dawˇ nyi chehˇ ve kʼo, a shaꞈ gʼa tuˬ awˬ pon gʼuiˇ tuˬ haˍ ve yoˬ.—2 Kawˇrenˍhtuˆ 2:7.

15. Nawˬ hkʼaˬ htaˆ kaꞈ nyi ma naˬ ve kʼo, aˬ htoꞈ ma ga laˇ gʼa tuˬ le? (1 Yoˇhanˬ 3:19, 20) (Awˬ han htaꞈ nyi sheˍ.)

¹⁵ Nawˬ hkʼaˬ hkʼe te yuˬ baˬ gʼa tuˬ le? Nawˬ hkʼaˬ htaˆ kaꞈ nyi ma luˬ chehˇ ve kʼo, Yaˬhoˉvaˬ nawˬ htaꞈ ‘venˇ baˆ hpehˇ laˇ tuˬ yoˬ’ tehꞈ tawnˇ taˍ sheˍ. (Chiˇ mvuh ve 130:4) Venˇ baˆ dawˇ hpfuhˇ ve chaw htaꞈ Yaˬhoˉvaˬ venˇ baˆ hpehˇ piˇ ve yoˬ. “Yawˇ hui te yaꞈ taˍ ve htaꞈ ngaˬ tawnˇ taˍ tuˬ ve maˇ heˆ” tehꞈ  Yaˬhoˉvaˬ ka tiꞈ te taˍ laˇ ve yoˬ. (Yeˍraˍmiˆ 31:34) Yaˬhoˉvaˬ venˇ baˆ hpehˇ piˇ˗oˬ ve htaꞈ yawˇ maˇ kʼawꞈ dawˇ nyi˗o ve, maˇ heˆ leh nawˬ te yaꞈ taˍ ve oˇ ve htaꞈ kʼawꞈ dawˇ cheˆ laˇ tuˬ ve maˇ heˆ tehꞈ kʼoˆ gaˇ ve yoˬ. Chi htaꞈ pa taw, peuˬ taˉ ve awˬ yanˇ nawˬ te taˍ ve awˬ ceuˬ nawˬ htaꞈ heuˆ la kuiˬ cawˬ ve kʼo, Gʼuiˬ sha nawˬ htaꞈ venˇ baˆ maˇ hpehˇ laˇ taˍ tehꞈ taˇ dawˇ. Nawˬ te yaꞈ taˍ ve awˬ ceuˬ htaꞈ pa taw Hkriꞈ yaˇ awˬ moˍ hkʼaw awˬ vuiˬ teˇ ceuˬ ceuˬ maˇ gʼa te ve kʼo, a shu yawˇ awˬ to htaꞈ venˇ baˆ taˇ taˍ. Yaˬhoˉvaˬ lehˬ nawˬ te yaꞈ taˍ ve awˬ ceuˬ htaꞈ ceh tiˉ maˇ dawˇ nyi ve yoˬ. Nawˬ kaꞈ chi hkʼe maˇ dawˇ nyi cawˇ.—1 Yoˇhanˬ liꞈ 3:19, 20 gʼaw sheˍ.

16. Ngaˬ hui a shaꞈ awˬ pon gʼuiˇ htaˇ aˬ htoꞈ ma htaꞈ gʼa tawnˇ taˍ cawˇ ve le?

¹⁶ Ngaˬ hui a shaꞈ gʼa tuˬ awˬ pon gʼuiˇ enˍ daꞈ htaˇ ngaˬ hui “laꞈ shawnˍ htaꞈ gʼa tuˬ gʼuiˇ” ve yoˬ. (1 Kawˇrenˍhtuˆ 9:24) Chi hkʼe te gʼa tuˬ ngaˬ hui ve awˬ vuiˬ aˬ htoꞈ ma cawˬ ve leh ngaˬ hui taˆ taˍ ve gʼa yuˬ baˬ cawˇ ve aˬ htoꞈ ma cawˬ ve htaꞈ kaꞈ gʼa shiˍ cawˇ ve yoˬ. Awˬ lawn chi ve hkʼaw ngaˬ hui taˆ taˍ ve gʼa yuˬ baˬ cawˇ ve teˇ ceuˬ ceuˬ htaꞈ gʼa henˇ˗oˬ. Yaꞈ hkʼaˇ, awˬ nu ve awˬ ceuˬ kaꞈ cawˬ sheˍ ve yoˬ. Tawˇ pa haˉ te kʼo, Yeˍsuˆ kʼoˆ ve ngaˬ hui lehˬ, ‘caˇ leuˉ dawˬ leuˉ ve, tzuhˬ dawˬ bvuhˆ ve maˇ heˆ leh a shaꞈ teꞈ kuiˬ hkʼaw dawˇ haˍ dawˇ hkiˉ chehˇ ve yoˬ.’ (Luˉkaꞈ 21:34) A shaꞈ gʼa tuˬ awˬ pon caˉ leh gʼuiˇ kʼai gʼa tuˬ nawˬ aˬ htoꞈ ma gʼa pa cawˇ ve, Liꞈ hpu chi ve teˇ tawn leh awˬ nu ve Liꞈ hpu awˬ tawn nawˬ htaꞈ ga laˇ gʼa ve yoˬ.

17. Ngaˬ hui awˬ leh hkʼa gaˬ gʼuiˇ gʼa leh laꞈ shawnˍ gʼa tuˬ tehꞈ yonˍ gʼa tuˬ aˬ htoꞈ ma ga laˇ gʼa ve le?

¹⁷ Yaˬhoˉvaˬ ngaˬ hui htaꞈ ga laˇ ve pa taw, ngaˬ hui awˬ leh hkʼa gaˬ gʼuiˇ gʼa leh laꞈ shawnˍ gʼa tuˬ yoˬ tehꞈ yonˍ gʼa ve yoˬ. (Iˉsaˍyaˆ 40:29-31) Haˆ haˆ gʼuiˇ sheˍ. Tcuh yaˇ Pawˇluꞈ awˬ leh hkʼa gaˬ gʼuiˇ gʼa leh laꞈ shawnˍ gʼa tuˬ coˇ caˇ jaˇ ve hkʼa shuˍ, ngaˬ hui kaꞈ yawˇ htaꞈ henˇ yuˬ sheˍ. (Hpiˇliˇpiˆ 3:13, 14) Nawˬ a shaꞈ gʼa tuˬ nawˬ awˬ tan awˬ nu ve chaw gʼuiˇ laˇ maˇ gʼa. Yaꞈ hkʼaˇ, Yaˬhoˉvaˬ nawˬ htaꞈ ga laˇ tuˬ yoˬ. Nawˬ ve awˬ vuiˬ htaꞈ nawˬ gʼa pfuhˇ leh, maˇ loˍ ve awˬ ceuˬ htaꞈ yuˬ baˬ tuˬ, Yaˬhoˉvaˬ nawˬ htaꞈ ga laˇ tuˬ yoˬ. (Chiˇ mvuh ve 68:19) Yaˬhoˉvaˬ nawˬ geh chehˇ ve kʼo, nawˬ yeunˇ hkanˍ ve hkʼaw awˬ leh hkʼa gaˬ gʼuiˇ gaˬ leh laꞈ shawnˍ gʼa tuˬ yoˬ.