1-2. (a) Aˬ htoꞈ ma te chi beuꞈ teˇ co˗e laiˉ gʼaˇ kanˇ paˆ cawˬ ve chaw htaꞈ maˇ yonˍ gʼa ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

 Chi beuꞈ teˇ co˗e laiˉ gʼaˇ kanˇ paˆ cawˬ ve chaw htaꞈ gʼaˇ maˇ va. Awˬ lawn kʼo, mvuhˇ miˬ ve awˬ liˇ awˬ hkʼaˇ leh mvuhˇ miˬ hpawˇ ve kanˉ te ve chaw lehˬ, paw sha ve chaw leh kanˇ paˆ cawˬ ve chaw htaꞈ ceh awˬ bon cawˬ tuˬ te piˇ ve tehꞈ yawˇ hui mawˬ ve pa taw yoˬ. Yaꞈ hkʼaˇ, haˍ gʼawˇ ve chaw kʼo, hteˇ ve cawˇ ve htaꞈ maˇ gʼa. Liꞈ hpu hkʼaw hteˇ lehˍ kʼoˆ ve, “chaw teˇ hpaˍ hpaˍ kanˇ paˆ cawˬ leh teˇ hpaˍ hpaˍ yawˇ hui awˬ hawˉ lo gʼa hkanˍ chehˇ taˍ ve yoˬ.” (Cuˇ yiˍ piˇ ve 8:9) Chi hkʼoˆ kaꞈ, bon awˬ hoˉ te hkʼaˇ dawˇ hkʼaˇ maˇ daꞈ leh laiˉ gʼaˇ kaꞈ Gʼuiˬ sha htaꞈ maˇ yonˍ tuˬ te piˇ ve yoˬ. Chi htaꞈ pa taw, ngaˬ hui geh Liꞈ hpu henˇ ve chaw htaꞈ Liꞈ hpu maˍ piˇ htaˇ, yawˇ hui Yaˬhoˉvaˬ leh yawˇ ve awˬ tan te shehˍ hpaˇ htaꞈ gʼaˇ va tuˬ ngaˬ hui gʼa ga piˇ cawˇ ve yoˬ.

² Ngaˬ hui geh Liꞈ hpu henˇ chehˇ ve chaw Yaˬhoˉvaˬ leh yawˇ ve kanˉ hkʼaˇ htaꞈ gʼaˇ va tuˬ ceh te jaw ve maˇ heˆ. Ngaˬ hui Yaˬhoˉvaˬ ve kanˉ te laˬ maw jaˇ˗oˬ ve htawˇ, yawˇ te ve teˇ ceuˬ le le hkʼaˬ htaˆ kaꞈ daꞈ jaˇ ve tehꞈ ngaˬ hui gʼa yonˍ cawˇ ve yoˬ. Yaꞈ hkʼaˇ, ngaˬ hui ve yonˍ hkʼaˇ htaꞈ lawˇ nyi laˇ tuˬ teˇ ceuˬ ceuˬ cawˬ ve yoˬ hehˉ. (1) Teˇ lawn lawn htaꞈ caˉ daꞈ ve Liꞈ hpu hkʼaw gʼaw htaˇ, (2) Gʼuiˬ sha ve kanˉ hkʼaˇ hkʼaw beˆ maˍ laˇ htaˇ, (3) awˬ gʼuˇ suhˍ hpawˇ lawˇ nyi laˇ ve htaꞈ gʼa hpuˇ htaˇ, chi ve 3 lawn htaꞈ teˇ geh henˇ tuˬ yoˬ.

3. Liꞈ hpu hkʼaw ngaˬ hui teˇ lawn lawn htaꞈ gʼaw htaˇ, Yaˬhoˉvaˬ htaꞈ caˉ daꞈ ve htawˇ dawˇ nawˬ dawˇ cawˬ tuˬ te laˇ ve aˬ htoꞈ ma cawˬ ve le?

 ³ Ngaˬ hui Liꞈ hpu gʼaw htaˇ, aˬ htoꞈ ma te Yaˬhoˉvaˬ chi hkʼe dawˇ cheˆ ve, maˇ heˆ leh chaw teˇ hpaˍ htaꞈ chi hkʼe te piˇ ve, teˇ pawˆ pawˆ ngaˬ hui maˇ na gʼa ve yoˬ hehˉ. Tawˇ pa haˉ te kʼo, ngaˬ hui Heh puiˉ hkʼaw ve liꞈ gʼaw htaˇ, hawˉ hkʼaˆ teˇ gʼaˇ shinˉ nyi htaˇ suhˆ gʼawˆ ve htaꞈ Yaˬhoˉvaˬ ciˍ yanˍ piˇ ve htaꞈ ngaˬ hui gʼa mawˬ ve yoˬ. Yaꞈ  hkʼaˇ, 2 Saˍmo˗eˍlaˆ liꞈ gʼaw htaˇ, jawˇ mawˇ Daˍviˆ haˉ chawˇ haˉ paˆ te leh chaw htaꞈ kaꞈ tiˇ pehˍ ve htaꞈ Yaˬhoˉvaˬ venˇ baˆ hpehˇ piˇ ve ngaˬ hui gʼa mawˬ ve yoˬ. (Heh puiˉ hkʼaw 15:32, 35; 2 Saˍmo˗eˍlaˆ 12:9, 13) Ngaˬ hui htawˇ dawˇ nawˬ dawˇ cawˬ ve, ‘Daˍviˆ haˉ chawˇ haˉ paˆ te leh chaw htaꞈ tiˇ pehˍ ve htawˇ, aˬ hto ma te Yaˬhoˉvaˬ venˇ baˆ hpehˇ piˇ ve le? Yaꞈ hkʼaˇ, hawˉ hkʼaˆ chi ve teˇ gʼaˇ Daˍviˆ hkʼe taw maˇ te yaꞈ ve htawˇ, aˬ htoꞈ ma te tiˇ pehˍ piˇ ve le?’ Awˬ lawn chi htaꞈ shiˍ tuˬ awˬ tehˬ ve 3 ceuˬ htaꞈ teˇ geh henˇ tuˬ yoˬ. Leh teˇ pawˆ le le ngaˬ hui Liꞈ hpu gʼaw htaˇ, awˬ tehˬ ve 3 ceuˬ htaꞈ dawˇ nyi sheˍ.

4. Awˬ hkuiˉ puiˍ liꞈ 18:20, 21 leh Bon maˍ ve liꞈ 10:17 hkʼaw kʼoˆ taˍ ve Yaˬhoˉvaˬ dawˇ cheˆ ve htaꞈ ngaˬ hui yonˍ gʼa tuˬ hkʼaˬ hkʼe ga laˇ ve le?

⁴ Liꞈ hpu hkʼaw teˇ ceuˬ le le hkʼa peu˗eˬ maˇ kʼoˆ taˍ laˇ ve. Jawˇ mawˇ Daˍviˆ awˬ tehˬ awˬ na venˇ baˆ dawˇ hpfuhˆ ve tehꞈ ngaˬ hui shiˍ ve yoˬ. (Chiˇ mvuh ve 51:2-4) Yaꞈ hkʼaˇ, hawˉ hkʼaˆ oˇ ve teˇ gʼaˇ shinˉ nyi ve awˬ liˇ awˬ hkʼaˇ htaꞈ maˇ na yuˬ ve, yawˇ hkʼaˬ hkʼe ve chaw hpehꞈ ve le? Yawˇ awˬ tehˬ awˬ na nyi ma luˬ˗aw laˇ? Maˇ heˆ leh yawˇ Gʼuiˬ sha ve awˬ liˇ awˬ hkʼaˇ htaꞈ maˇ na yuˬ jaw ve laˇ? Chi awˬ gʼuˇ suhˍ htaˇ, shaˍ tiꞈ piˇ ve htaꞈ yawˇ maˇ na yuˬ ve laˇ? Chi ve htaꞈ caˉ daꞈ ve Liꞈ hpu hkʼaw maˇ gʼa kʼoˆ laˇ taˍ. Yaꞈ hkʼaˇ, ngaˬ hui yonˍ gʼa ve lehˬ, Yaˬhoˉvaˬ “ka tiꞈ yeˬ jaˇ.” (Bon maˍ ve 32:4) Yawˇ aˬ htoꞈ ma ve awˬ lawn dawˇ cheˆ ve htawˇ maˇ kʼoˆ, yawˇ awˬ lawn awˬ tanˇ hkʼa dehꞈ shiˍ ve pa taw, yawˇ hteˇ ve cawˇ ve hkʼaw dawˇ cheˆ gʼa ve yoˬ. Yaˬhoˉvaˬ lehˬ chaw yaˇ htaꞈ maˇ shuˍ ve, shu htaꞈ maˇ nyi cha puiˉ ve, yawˇ maˇ na gʼa ve teˇ ceuˬ kaꞈ maˇ cawˬ leh, yawˇ awˬ nu ve chaw kʼoˆ ve awˬ ceuˬ htaꞈ maˇ dawˇ cheˆ piˇ. (Awˬ hkuiˉ puiˍ 18:20, 21; Bon maˍ ve 10:17 gʼaw sheˍ.) Ngaˬ hui Yaˬhoˉvaˬ leh yawˇ ve awˬ liˇ awˬ hkʼaˇ htaꞈ hkʼa dehꞈ shiˍ ve kʼo, yawˇ dawˇ cheˆ ve cawˇ ve tehꞈ awˬ tehˬ awˬ na ngaˬ hui yonˍ gʼa ve yoˬ. Ngaˬ hui Liꞈ hpu gʼaw htaˇ, teˇ lawn lawn htaꞈ htawˇ dawˇ nawˬ dawˇ cawˬ leh chi teˇ hkui hkʼawꞈ laˇ hkawˇ maˇ gʼa sheˍ ve kʼo, ‘Gʼuiˬ sha te taˍ ve awˬ ceuˬ hkʼa peu˗eˬ hkʼaˬ htaˆ kaꞈ hteˇ jaˇ cawˇ jaˇ’ ve tehꞈ ngaˬ hui kaꞈ yonˍ gʼa ve yoˬ.—Chiˇ mvuh ve 145:17.

5. Maˇ biˇ ve awˬ ceuˬ htaꞈ pa taw ngaˬ hui htaꞈ heuˆ la kuiˬ aˬ htoꞈ ma cawˬ ve le? (Awˇ ceˍ awˇ fa “ Maˇ biˇ ve htaꞈ pa taw ngaˬ hui maˇ cawˇ ve hpawˇ dawˇ tuˬ te laˇ ve” htaꞈ nyi sheˍ.)

⁵ Ngaˬ hui lehˬ maˇ biˇ ve chaw hpehꞈ ve. Yaˬhoˉvaˬ ngaˬ hui htaꞈ yawˇ ve awˬ hoꞈ awˬ han hkʼa shuˍ hpanˍ laˇ ve pa taw, ngaˬ hui kaꞈ awˬ nu ve chaw hteˇ ve cawˇ ve gʼa ve htaꞈ mawˬ gaˇ ve yoˬ. (Awˬ hkuiˉ puiˍ 1:26) Ngaˬ hui awˬ lawn awˬ tanˇ htaꞈ hkʼa dehꞈ shiˍ˗oˬ ve tehꞈ dawˇ ve htawˇ, ngaˬ hui maˇ biˇ ve chaw hpehꞈ ve pa taw, teˇ pawˆ le le awˬ lawn teˇ hpaˍ htaꞈ cawˇ ve hkʼaw dawˇ cheˆ gʼa tuˬ hpehꞈ kʼai maˇ gʼa. Yoˇnaˆ gʼa  hpuˇ ve awˬ ceuˬ htaꞈ dawˇ nyi sheˍ. Yaˬhoˉvaˬ Niˇnaˍveˍ chaw htaꞈ ha kʼaˉ piˇ ve yawˇ nyi ma maˇ cawˇ. (Yoˇnaˆ 3:10–4:1) Niˇnaˍveˍ chaw htaꞈ Yaˬhoˉvaˬ ha kʼaˉ piˇ ve pa taw, 120,000 gʼaˇ hpaˆ venˇ baˆ dawˇ hpfuhˆ leh gʼa ponˬ ve yoˬ. Chi a shu cawˇ ve maˇ cawˇ ve mawˬ ve maˇ heˆ laˇ?

6. Yaˬhoˉvaˬ yawˇ dawˇ cheˆ ve awˬ ceuˬ aˬ htoꞈ ma te kʼoˆ maˍ laˇ tuˬ maˇ loˍ ve le?

⁶ Yaˬhoˉvaˬ ngaˬ hui htaꞈ teˇ ceuˬ le le kʼoˆ maˍ laˇ tuˬ maˇ loˍ ve. Oˇ htaˇ teˇ co˗e Yaˬhoˉvaˬ ve kanˉ te ve chaw htaꞈ yawˇ awˬ yanˇ piˇ ve yoˬ. Leh Yaˬhoˉvaˬ dawˇ cheˆ ve teˇ lawn lawn htaꞈ yawˇ hui nyi ma maˇ cawˇ ve tehꞈ kʼoˆ ve yoˬ. (Awˬ hkuiˉ puiˍ 18:25; Yoˇnaˆ 4:2, 3) Teˇ pawˆ pawˆ kʼo, aˬ htoꞈ ma te Yaˬhoˉvaˬ teˇ ceuˬ ceuˬ htaꞈ dawˇ cheˆ ve awˬ hkʼaˇ ca leh kʼoˆ maˍ piˇ ve yoˬ. (Yoˇnaˆ 4:10, 11) Yaꞈ hkʼaˇ, Gʼuiˬ sha lehˬ ngaˬ hui htaꞈ teˇ ceuˬ le le kʼoˆ maˍ laˇ tuˬ maˇ loˍ. Gʼuiˬ sha lehˬ hpanˍ shehˍ hpaˇ hpehꞈ ve pa taw, yawˇ teˇ ceuˬ ceuˬ htaꞈ maˇ te sheˍ htaˇ leh yawˇ teˇ ceuˬ ceuˬ te peuˬ hkʼawꞈ nawˉ, yawˇ ngaˬ hui ga laˇ tuˬ maˇ loˍ.—Iˉsaˍyaˆ 40:13, 14; 55:9.

7. Ngaˬ hui awˬ pon haˍ jaˇ ve aˬ htoꞈ ma awˬ lawn le? Leh aˬ htoꞈ ma pa taw haˍ ve le?

⁷ Yaˬhoˉvaˬ te ve teˇ ceuˬ le le hkʼaˬ htaˆ kaꞈ hteˇ cawˇ ve tehꞈ ngaˬ hui mawˬ ve yoˬ. Yaꞈ hkʼaˇ, ngaˬ hui yawˇ ve awˬ tan te shehˍ hpaˇ htaꞈ gʼaˇ va gʼa tuˬ haˍ ve awˬ lawn hpehꞈ ve yoˬ. Gʼuiˬ sha ve kanˉ hkʼaˇ hkʼaw kanˇ paˆ cawˬ ve chaw Gʼuiˬ sha beˆ maˍ piˇ ve htaꞈ gʼaꞈ te ve laˇ, maˇ heˆ leh yawˇ ve dawˇ hkʼaˇ htaꞈ gʼaꞈ te ve laˇ, tehꞈ ngaˬ hui htawˇ dawˇ nawˬ dawˇ cawˬ ve yoˬ. Oˇ htaˇ teˇ co˗e Liꞈ hpu hkʼaw ve chaw teˇ hpaˍ hpaˍ kaꞈ chi hkʼe dawˇ jaw ve yoˬ.  Awˬ tawn 3 hkʼaw ve awˬ lawn htaꞈ dawˇ nyi sheˍ. Shinˉ nyi ve awˬ liˇ awˬ hkʼaˇ htaꞈ te yaꞈ ve hawˉ hkʼaˆ oˇ ve teˇ gʼaˇ Moˉseˍ dawˇ cheˆ leh maˇ tiˇ pehˍ piˇ sheˍ htaˇ, Yaˬhoˉvaˬ htaꞈ na nyi˗oˬ laˇ tehꞈ hawˉ hkʼaˆ oˇ ve teˇ gʼaˇ ve awˬ viˉ awˬ nyi htawˇ dawˇ nawˬ dawˇ cawˬ ve yoˬ. Hiˇtiˆ chaw Uˇriˇyaꞈ ve awˬ miˇ ma htaꞈ Daˍviˆ haˉ chawˇ te ve awˬ lawn yawˇ jawˇ mawˇ ve aˉ yaˇ htaꞈ cuˇ leh yawˇ htaꞈ maˇ gʼa tiˇ pehˍ tuˬ awˬ hkʼaˇ ca ve tehꞈ Uˇriˇyaꞈ ve awˬ chawˇ dawˇ˗aw laˇ? Ngaˬ hui teˇ gʼaˇ le le gʼa tawnˇ taˍ cawˇ ve a yeˇ uiˍ jaˇ ve lehˬ, Yaˬhoˉvaˬ yawˇ ve kanˉ hkʼaˇ hkʼaw sheh kʼai paˍ htaꞈ yonˍ ve yoˬ. Ngaˬ hui yawˇ hui htaꞈ gʼaˇ maˇ va ve kʼo, Yaˬhoˉvaˬ htaꞈ gʼaˇ maˇ va ve hkʼe hpehꞈ ve yoˬ.

8. Tcuh yaˇ liꞈ 16:4, 5 hkʼaw kʼoˆ ve, awˉ lawˉ peuˇ ve Hkriꞈ yaˇ awˬ moˍ hkʼaw beˆ maˍ piˇ ve hkʼe, chi beuꞈ teˇ co˗e Hkriꞈ yaˇ awˬ moˍ hkʼaw kaꞈ beˆ maˍ laˇ chehˇ ve tehꞈ ngaˬ hui mawˬ tuˬ hkʼaˬ hkʼe te laˇ ve le?

⁸ Chi beuꞈ teˇ co˗e Yaˬhoˉvaˬ “ka tiꞈ yeˬ leh cuˇ yiˍ cawˬ ve awˬ ceˬ” htaꞈ cuˇ leh yawˇ ve kanˉ hkʼaˇ htaꞈ beˆ maˍ piˇ chehˇ ve yoˬ. (Maꞈhtehˍ 24:45) Ka tiꞈ yeˬ leh cuˇ yiˍ cawˬ ve awˬ ceˬ kaꞈ awˉ lawˉ peuˇ ve Uˉ peunˍ ve Kawˍmiˍtiˍ hkʼa shuˍ kanˉ te chehˇ ve yoˬ. Yawˇ hui miˬ guiˬ chi hkʼoˆ lo Yaˬhoˉvaˬ ve chaw htaꞈ nyi haꞈ shaˉ piˇ leh Hkriꞈ yaˇ awˬ moˍ hkʼaw nyi haꞈ shaˉ paˍ htaꞈ beˆ maˍ piˇ ve yoˬ. (Tcuh yaˇ 16:4, 5 gʼaw sheˍ.) Leh nyi haꞈ shaˉ paˍ kaꞈ beˆ maˍ laˇ hkawˇ chi teˇ hpaˍ htaꞈ Hkriꞈ yaˇ awˬ moˍ hkʼaw yuˬ yehˇ ve yoˬ. Ngaˬ hui Gʼuiˬ sha ve kanˉ hkʼaˇ hkʼaw beˆ maˍ laˇ ve leh nyi haꞈ shaˉ paˍ hkawˇ na yuˬ ve kʼo, ngaˬ hui Yaˬhoˉvaˬ htaꞈ gʼaˇ va chehˇ ve hkʼe hpehꞈ ve yoˬ.

9. Aˬ htoꞈ ma te ngaˬ hui teˇ pawˆ pawˆ nyi haꞈ shaˉ paˍ hkawˇ na yuˬ tuˬ haˍ ve le?

⁹ Nyi haꞈ shaˉ paˍ dawˇ cheˆ ve htaꞈ haꞈ yuˬ tuˬ sha ve maˇ heˆ. Tawˇ pa haˉ te kʼo, peuˬ laˬ ve hkʼaˬ nyiˇ hkʼawꞈ maˇ gaˬ sheˍ htaˇ, hpawnˬ daꞈ kuiˬ yehˬ awˬ hpfuhˇ hkʼa hkʼawꞈ yehˇ gʼa tuˬ, Hkriꞈ yaˇ awˬ moˍ hpawnˬ daꞈ htaˇ mui kuiˬ lawꞈ tuˬ awˬ pon yoˬ. Leh nyi haꞈ shaˉ paˍ awˬ viˉ awˬ nyi htaꞈ awˬ nu ve Hkriꞈ yaˇ awˬ moˍ hkʼaw jiˆ kʼai tuˬ kʼoˆ piˇ ve yoˬ. Nyi haꞈ shaˉ paˍ ngaˬ hui htaꞈ awˬ nu ve Hkriꞈ yaˇ awˬ moˍ hkʼaw jiˆ kʼai tuˬ kʼoˆ laˇ htaˇ, ngaˬ hui ve awˬ chawˇ maˇ heˆ leh yehˬ kʼa hkʼaw ve chaw htaꞈ maˇ hpaˆ daꞈ gaˇ ve yoˬ hehˉ. Awˬ tehˬ kʼo, awˬ viˉ awˬ nyi Hkriꞈ yaˇ awˬ moˍ hkʼaˬ kaˬ lo jiˆ kʼai tuˬ Yaˬhoˉvaˬ nyi haꞈ shaˉ paˍ htaꞈ kʼoˆ piˇ˗aw laˇ? Maˇ gʼa kʼoˆ piˇ. Chi htaꞈ pa taw, ngaˬ hui nyi haꞈ shaˉ paˍ kʼoˆ laˇ ve htaꞈ maˇ gʼaꞈ te gaˇ ve yoˬ hehˉ. Yaꞈ hkʼaˇ, Yaˬhoˉvaˬ nyi haꞈ shaˉ  paˍ htaꞈ yonˍ gʼa ve kʼo, ngaˬ hui kaꞈ yawˇ hui htaꞈ yonˍ cawˇ ve yoˬ. *

10. Heˍbrehˇ liꞈ 13:17 hkʼaw kʼoˆ taˍ ve hkʼe, aˬ htoꞈ ma te ngaˬ hui nyi haꞈ shaˉ paˍ hkawˇ na yuˬ cawˇ ve le?

¹⁰ Nyi haꞈ shaˉ paˍ dawˇ cheˆ ve htaꞈ ngaˬ hui hkʼa dehꞈ maˇ dawˇ cawˇ ve htawˇ, aˬ htoꞈ ma te yawˇ hui hkawˇ na leh gʼa ga piˇ cawˇ ve le? Awˬ lawn kʼo, chi hkʼe te ve lehˬ Yaˬhoˉvaˬ ve chaw teˇ moˍ tiˉ hpehꞈ tuˬ te ve yoˬ. (Eˇfeˇsuꞈ 4:2, 3) Hkriꞈ yaˇ awˬ moˍ hkʼaw ve awˬ viˉ awˬ nyi teˇ gʼaˇ le le nyi haꞈ shaˉ paˍ awˬ moˍ dawˇ cheˆ ve htaꞈ nyi ma nuˇ nehˬ ve hkʼaw haꞈ yuˬ ve kʼo, Hkriꞈ yaˇ awˬ moˍ kaꞈ uiˍ la mvuh la tuˬ yoˬ. (Heˍbrehˇ 13:17 gʼaw sheˍ.) A yeˇ uiˍ jaˇ ve lehˬ, ngaˬ hui htaꞈ nyi haꞈ shaˉ laˇ tcuh taˍ ve Yaˬhoˉvaˬ yonˍ gʼa ve chaw kʼoˆ ve htaꞈ ngaˬ hui na yuˬ ve kʼo, ngaˬ hui Yaˬhoˉvaˬ htaꞈ gʼaˇ va ve tehꞈ hpehꞈ maw piˇ chehˇ ve yoˬ.—Tcuh yaˇ 20:28.

11. Nyi haꞈ shaˉ paˍ beˆ maˍ laˇ ve htaꞈ ngaˬ hui hkʼa dehꞈ na yuˬ tuˬ aˬ htoꞈ ma ga laˇ ve le?

¹¹ Nyi haꞈ shaˉ paˍ Hkriꞈ yaˇ awˬ moˍ hkʼaw teˇ ceuˬ ceuˬ dawˇ cheˆ˗a te htaˇ, yawˇ hui Gʼuiˬ sha geh daꞈ kehˬ ve awˬ ha hpu lawˬ ve tehꞈ ngaˬ hui tawnˇ taˍ ve kʼo, ngaˬ hui kaꞈ yawˇ hui beˆ maˍ laˇ ve hkawˇ na yuˬ tuˬ sha ve yoˬ. Chi hkʼoˆ kaꞈ, nyi haꞈ shaˉ paˍ Liꞈ hpu hkʼaw ve awˬ liˇ awˬ hkʼaˇ leh, Gʼuiˬ sha ve kanˉ hkʼaˇ hkʼaw beˆ maˍ laˇ taˍ ve htaꞈ kaꞈ hkʼa dehꞈ chaˬ nyi ve yoˬ. Nyi haꞈ shaˉ paˍ awˬ pon a yeˇ uiˍ jaˇ ve lehˬ, yawˇ hui Yaˬhoˉvaˬ nyi hkʼaˇ suh tuˬ te piˇ gaˇ leh awˬ viˉ awˬ nyi htaꞈ hkʼa dehꞈ nyi haꞈ shaˉ piˇ gaˇ ve yoˬ. Yawˇ hui Gʼuiˬ sha ve chaw htaꞈ hkʼaˬ hkʼe te nyi haꞈ shaˉ tuˬ, yawˇ hui ve awˬ vuiˬ htaꞈ hkʼa dehꞈ te gʼa tuˬ, Yaˬhoˉvaˬ a yeˇ yuˬ jaˇ ve tehꞈ yawˇ hui shiˍ ve yoˬ. (1 Peˍtruˆ 5:2, 3) Chi beuꞈ teˇ co˗e miˬ guiˬ chi hkʼoˆ lo, chaw ceuˬ, bon liˇ, leh mvuhˇ miˬ hpawˇ fuiˍ daꞈ pehˬ daꞈ ve htaꞈ dawˇ nyi sheˍ. Yaꞈ hkʼaˇ, Yaˬhoˉvaˬ ve chaw miˬ guiˬ chi hkʼoˆ lo teˇ moˍ tiˉ te leh yawˇ htaꞈ oˉ kʼoˍ pui ve yoˬ. Yaˬhoˉvaˬ yawˇ ve kanˉ hkʼaˇ htaꞈ awˬ bon maˇ naꞈ piˇ ve kʼo, awˬ lawn chi hpehꞈ kʼai maˇ gʼa taˬ.

12. Te yaꞈ ve chaw awˬ tehˬ awˬ na venˇ baˆ dawˇ hpfuhˆ ve tehꞈ nyi haꞈ shaˉ paˍ hkʼaˬ hkʼe te shiˍ gʼa tuˬ le?

¹² Yaˬhoˉvaˬ nyi haꞈ shaˉ paˍ htaꞈ a yeˇ uiˍ ve awˬ vuiˬ piˇ ve lehˬ, Hkriꞈ yaˇ awˬ moˍ hkʼaw awˬ liˇ awˬ hkʼaˇ htaꞈ nyi haꞈ shaˉ tcuh ve yoˬ. Awˬ viˉ awˬ nyi venˇ baˆ uiˍ jaˇ ve htaꞈ te yaꞈ ve kʼo, oˇ ve teˇ gʼaˇ Hkriꞈ yaˇ awˬ moˍ hkʼaw caˉ leh kʼawꞈ chehˇ kʼai gʼa tuˬ, nyi haꞈ shaˉ paˍ chaˬ nyi tuˬ ve awˬ vuiˬ cawˬ ve yoˬ. Leh yawˇ te yaꞈ taˍ ve htaꞈ awˬ tehˬ awˬ na nyi ma luˬ˗aw laˇ? Oˇ ve teˇ gʼaˇ yawˇ te yaꞈ ve awˬ ceuˬ htaꞈ awˬ tehˬ awˬ na venˇ baˆ dawˇ hpfuhˆ˗oˬ ve tehꞈ kʼoˆ ve htawˇ, yawˇ te yaꞈ ve awˬ ceuˬ htaꞈ awˬ tehˬ awˬ na maˇ kʼawꞈ te˗o ve laˇ? Yawˇ maˇ kʼawꞈ te yaꞈ tuˬ coˇ caˇ leh dawˇ teh taˍ ve laˇ? Yawˇ maˇ daꞈ ve chaw htaꞈ awˬ chawˇ te leh te yaꞈ tuˬ jehˬ piˇ ve kʼo, yawˇ oˇ ve teˇ gʼaˇ htaꞈ awˬ chawˇ maˇ te tuˬ ve laˇ? Te yaꞈ ve chaw yawˇ te ve awˬ ceuˬ htaꞈ hkʼaˬ hkʼe dawˇ ve, nyi haꞈ shaˉ paˍ lehˬ Yaˬhoˉvaˬ geh bon awˉ lawˉ gʼa lawˬ cawˇ ve, awˬ tehˬ ve teˇ hpaˍ htaꞈ gʼa dawˇ nyi cawˇ ve, leh Liꞈ hpu hkʼaw ve awˬ liˇ awˬ hkʼaˇ htaꞈ kaꞈ gʼa chaˬ nyi cawˇ ve yoˬ. Oˇ ve teˇ gʼaˇ Hkriꞈ yaˇ awˬ moˍ hkʼaw caˉ leh kʼawꞈ chehˇ kʼai gʼa tuˬ, maˇ heˆ leh tawˆ cheˆ piˇ cawˇ ve le naˍ nyi haꞈ shaˉ paˍ dawˇ cheˆ gʼa ve yoˬ.—1 Kawˇrenˍhtuˆ 5:11-13.

13. Ngaˬ hui ve awˬ viˉ awˬ nyi maˇ heˆ leh awˬ chawˇ htaꞈ Hkriꞈ yaˇ awˬ moˍ hkʼaw tawˆ cheˆ piˇ ve kʼo, ngaˬ hui hkʼaˬ hkʼe dawˇ tuˬ ve hehˉ le?

¹³ Ngaˬ hui nyi haꞈ shaˉ paˍ htaꞈ maˇ yonˍ gʼa tuˬ hkʼaˬ hkʼe htaˇ lawˇ nyi laˇ ve le? Hkriꞈ yaˇ awˬ moˍ hkʼaw tawˆ cheˆ piˇ ve chaw ngaˬ hui ve awˬ viˉ awˬ nyi maˇ heˆ leh ngaˬ hui meuˆ daꞈ jaˇ ve awˬ chawˇ maˇ heˆ ve kʼo, nyi haꞈ shaˉ paˍ dawˇ cheˆ piˇ ve htaꞈ haꞈ yuˬ sha ve yoˬ. Yaꞈ hkʼaˇ, tawˆ cheˆ piˇ ve chaw ngaˬ hui meuˆ daꞈ jaˇ ve awˬ chawˇ hpehꞈ ve kʼo, nyi haꞈ shaˉ paˍ hkʼa dehꞈ dawˇ nyi˗oˬ ve laˇ tehꞈ ngaˬ hui htawˇ dawˇ nawˬ dawˇ cawˬ ve yoˬ. Maˇ heˆ leh nyi haꞈ shaˉ paˍ Yaˬhoˉvaˬ dawˇ ve hkʼe dawˇ˗oˬ ve laˇ tehꞈ, ngaˬ hui htawˇ dawˇ nawˬ dawˇ cawˬ ve yoˬ hehˉ. Chi htaꞈ pa taw, nyi haꞈ shaˉ paˍ dawˇ cheˆ piˇ ve htaꞈ ngaˬ hui cawˇ ve hpawˇ dawˇ tuˬ aˬ htoꞈ ma ga laˇ ve le?

14. Ngaˬ hui ve awˬ viˉ awˬ nyi maˇ heˆ leh awˬ chawˇ htaꞈ tawˆ cheˆ piˇ ve kʼo, nyi haꞈ shaˉ paˍ dawˇ cheˆ piˇ ve htaꞈ haꞈ yuˬ gʼa tuˬ aˬ htoꞈ ma ga laˇ ve le?

 ¹⁴ Tawˆ cheˆ piˇ ve lehˬ Hkriꞈ yaˇ awˬ moˍ hkʼaw ve awˬ viˉ awˬ nyi awˬ pon awˬ bon cawˬ tuˬ leh te yaꞈ ve chaw htaꞈ kaꞈ ga piˇ tuˬ, Yaˬhoˉvaˬ gu teh taˍ laˇ ve tehꞈ ngaˬ hui tawnˇ taˍ cawˇ ve yoˬ. Te yaꞈ ve chaw venˇ baˆ maˇ dawˇ hpfuhˆ leh Hkriꞈ yaˇ awˬ moˍ hkʼaw chehˇ sheˍ ve kʼo, yawˇ ve te hkʼaˇ dawˇ hkʼaˇ awˬ viˉ awˬ nyi htaꞈ heuˆ la kuiˬ cawˬ ve yoˬ. (Gaˍlaˍtiˆ 5:9) Yawˇ te yaꞈ ve awˬ ceuˬ htaꞈ venˇ baˆ maˇ uiˍ tehꞈ dawˇ ve yoˬ hehˉ. Yawˇ Gʼuiˬ sha htaꞈ nyi hkʼaˇ suh tuˬ teˇ pawˆ kʼawꞈ te piˇ tuˬ, yawˇ ve te hkʼaˇ dawˇ hkʼaˇ pa tuˬ, a yeˇ maˇ uiˍ tehꞈ dawˇ ve yoˬ. (Cuˇ yiˍ piˇ ve 8:11) Nyi haꞈ shaˉ paˍ a shu htaꞈ tawˆ cheˆ piˇ cawˇ ve, maˇ tawˆ cheˆ piˇ cawˇ ve, dawˇ cheˆ ve htaꞈ ngaˬ hui yonˍ gʼa ve yoˬ. Yawˇ hui hkʼa dehꞈ dawˇ nyi˗oˬ leh chi a yeˇ uiˍ jaˇ ve awˬ vuiˬ hpehꞈ ve tehꞈ yawˇ hui shawˍ ve yoˬ. Nyi haꞈ shaˉ paˍ lehˬ, oˇ htaˇ Iˉsaˍreˍlaˆ chaw suhˉ jehˬ paˍ htaꞈ shuˍ ve tehꞈ yawˇ hui shiˍ ve yoˬ. Oˇ kaˬ lo kʼoˆ ve, “shu htaꞈ suhˉ taˆ piˇ chehˇ ve teˇ yanˇ, yawˇ nawˬ hui geh chehˇ taˍ ve yoˬ.”—2 Raˍsaˍvanˍ 19:6, 7.

15. Aˬ htoꞈ ma te chi teˇ hkui kaꞈ ngaˬ hui Yaˬhoˉvaˬ beˆ maˍ laˇ hkawˇ htaꞈ hkʼa dehꞈ na yuˬ cawˇ ve le?

¹⁵ Haiˬ ve miˬ guiˬ chi awˬ leh meuˇ gaˬ la paˇ neˇ ve kʼo, ngaˬ hui kaꞈ Yaˬhoˉvaˬ htaꞈ gʼaˇ hkʼa dehꞈ va cawˇ ve yoˬ. Aˬ htoꞈ ma pa taw le? Awˬ lawn kʼo, tuꞈ jaˇ hkanˍ jaˇ ve awˬ yanˇ htaˇ beˆ maˍ laˇ hkawˇ ngaˬ hui maˇ kaˇ jaw ve htaꞈ gʼa kaˇ tuˬ ve pa taw, gʼaꞈ te gʼa tuˬ haˍ jaˇ ve yoˬ hehˉ. Leh nyi˗a kʼo awˬ hkʼaˇ hkʼa dehꞈ maˇ ca ve htaꞈ shuˍ ve yoˬ hehˉ. Awˬ tehˬ yoˬ, Yaˬhoˉvaˬ ngaˬ hui htaꞈ hteˇ˗ehˍ maˇ kʼoˆ laˇ ve htawˇ, yawˇ ve awˬ tan te shehˍ hpaˇ htaꞈ cuˇ leh beˆ maˍ laˇ tuˬ yoˬ. Oˇ ve teˇ yanˇ, ngaˬ hui gʼaꞈ te tuˬ laˇ, maˇ gʼaꞈ te tuˬ laˇ, htawˇ dawˇ nawˬ dawˇ cawˬ ve awˬ yanˇ hpehꞈ ve maˇ heˆ. Leh ‘Yaˬhoˉvaˬ awˬ tehˬ awˬ na chi hkʼe beˆ maˍ laˇ ve laˇ, maˇ heˆ leh nyi haꞈ shaˉ paˍ yawˇ hui hkʼaˇ yawˇ hui dawˇ yuˬ ve laˇ, ngaˬ hui htawˇ dawˇ nawˬ dawˇ cawˬ tuˬ yoˬ. Awˬ yanˇ oˇ ve hkʼaw nawˬ Yaˬhoˉvaˬ leh yawˇ ve kanˉ hkʼaˇ htaꞈ gʼaˇ va tuˬ laˇ?’ Maˇ heˆ leh chi teˇ hkui Gʼuiˬ sha ve awˬ tan te shehˍ hpaˇ beˆ maˍ piˇ ve htaꞈ nawˬ hkʼaˬ hkʼe dawˇ ve htaꞈ cawˬ ve yoˬ. Nawˬ chi teˇ hkui kaꞈ tanˬ leh beˆ maˍ laˇ ve htaꞈ gʼaˇ va leh na yuˬ ve kʼo, tuꞈ jaˇ hkanˍ jaˇ ve awˬ yanˇ htaˇ nawˬ chi hkʼe te gʼa tuˬ yoˬ.—Luˉkaꞈ 16:10.

16. Awˬ gʼuˇ suhˍ hpawˇ Yaˬhoˉvaˬ dawˇ cheˆ ve, ngaˬ hui yonˍ ve htaꞈ hkʼaˬ hkʼe lawˇ nyi laˇ tuˬ ve le?

¹⁶ Chi hkʼoˆ kaꞈ, Yaˬhoˉvaˬ lehˬ miˬ guiˬ chi hkʼoˆ lo chaw yaˇ teˇ gʼaˇ le le htaꞈ Aˍmaˍgeˍdonˍ hkʼaw suhˉ jehˬ piˇ tuˬ ve awˬ lawn htaꞈ ngaˬ hui dawˇ nyi sheˍ. Awˬ leh meuˇ ve awˬ yanˇ maˇ gaˬ sheˍ htaˇ, Shaˉhkiˆhkanˍ ve chaw maˇ hpehꞈ sheˍ ve leh ngaˬ hui ve awˬ viˉ awˬ nyi kaꞈ Yaˬhoˉvaˬ htaꞈ yonˍ la tuˬ ngaˬ hui dawˇ law chehˇ ve yoˬ. Aˍmaˍgeˍdonˍ gaˬ la htaˇ, awˬ gʼuˇ suhˍ hpawˇ yawˇ hui ve a shaꞈ teꞈ hkʼaˇ htaꞈ Yaˬhoˉvaˬ leh Yeˍsuˆ awˬ leh meuˇ teˇ pawˆ dawˇ cheˆ piˇ tuˬ yoˬ. (Maꞈhtehˍ 25:31-33; 2 Hteˇsaˍlawˇniˆ 1:7-9) Chi Yaˬhoˉvaˬ yawˇ hui htaꞈ  ha kʼaˉ piˇ tuˬ laˇ, ngaˬ hui htaꞈ maˇ caˉ daꞈ˗o ve yoˬ. (Maꞈhtehˍ 25:34, 41, 46) Oˇ ve teˇ yanˇ Yaˬhoˉvaˬ dawˇ cheˆ piˇ ve ngaˬ hui dawˇ taˍ ve hkʼe maˇ hpehꞈ ve kʼo, ngaˬ hui Yaˬhoˉvaˬ htaꞈ yonˍ tuˬ laˇ, maˇ heˆ leh yawˇ htaꞈ baˬ taˉ tuˬ laˇ? Ngaˬ hui awˬ gʼuˇ suhˍ hpawˇ Yaˬhoˉvaˬ htaꞈ gʼaˇ va tuˬ chi teˇ hkui kaꞈ te jawˬ sheˍ.

17. Yaˬhoˉvaˬ suhˉ jehˬ ve ngaˬ hui awˬ bon gʼa tuˬ aˬ htoꞈ ma te laˇ ve le?

¹⁷ Yaˬhoˉvaˬ suhˉ jehˬ piˇ htaˇ, aˬ htoꞈ ma hpehꞈ la tuˬ ve htaꞈ ngaˬ hui dawˇ nyi sheˍ. Maˇ heˆ heˆ ve bon liˇ htaꞈ te luˬ tuˬ ve, a shu yawˇ awˬ pon tiˉ dawˇ nyi ve tanˇ kaˬ hkʼaˇ leh teˇ co˗e peuˬ teˇ co˗e mvuhˇ miˬ uˉ peunˍ ve chaw yaˇ htaꞈ fawˉ mehˍ ve chi ve kaꞈ maˇ kʼawꞈ cawˬ˗o. Naˬ ve gawˬ ve leh mawˇ ve, ngaˬ hui haꞈ ve chaw suh˗e ve pa taw, nyi ma luˬ ve kaꞈ maˇ kʼawꞈ cawˬ˗o. Saˍtanˍ leh yawˇ hpawˇ chehˇ ve maˇ daꞈ ve mvuhˇ naw ma tcuh yaˇ htaꞈ naˉ jaˇ ve miˬ kʼoˍ hkʼaw teˇ hinˉ hkʼawꞈ haw tiˍ piˇ tuˬ yoˬ. Leh yawˇ hui te luˬ te sheˆ taˍ ve awˬ ceuˬ maˇ kʼawꞈ cawˬ˗o. (Hpeuꞈ maˍ ve 20:2, 3) Yaˬhoˉvaˬ te ve teˇ ceuˬ le le htaꞈ ngaˬ hui hkʼaˬ htaˆ kaꞈ gʼaˇ va ve pa taw, ngaˬ hui ha lehˬ jaˇ tuˬ yoˬ!

18. Heh puiˉ hkʼaw liꞈ 11:4-6 leh 21:5 hkʼaw Iˉsaˍreˍlaˆ chaw ve awˬ lawn ngaˬ hui htaꞈ aˬ htoꞈ ma maˍ laˇ ve le?

¹⁸ Miˬ guiˬ awˬ suhˉ hkʼaw Yaˬhoˉvaˬ te ve teˇ ceuˬ le le hkʼaˬ htaˆ kaꞈ cawˇ ve tehꞈ ngaˬ hui yonˍ ve awˬ ceuˬ htaꞈ lawˇ nyi laˇ ve cawˬ sheˍ ve hehˉ laˇ? Iˉsaˍreˍlaˆ chaw Eˇjiˇtuꞈ mvuhˇ miˬ hkʼaw tawˆ la peuˬ hkʼawꞈ nawˉ maˇ maw sheˍ htaˇ ve awˬ lawn htaꞈ dawˇ nyi sheˍ. Laiˉ gʼaˇ Eˇjiˇtuꞈ mvuhˇ miˬ hkʼaw ve caˇ tuˬ htaꞈ dawˇ nawˇ ve pa taw, Yaˬhoˉvaˬ yawˇ hui htaꞈ maˍnaˆ shiˍ piˇ ve htaꞈ hkʼanˇ ve yoˬ. (Heh puiˉ hkʼaw 11:4-6; 21:5 gʼaw sheˍ.) Aˍmaˍgeˍdonˍ peuˬ hkʼawꞈ nawˉ, ngaˬ hui kaꞈ chi hkʼe hkʼanˇ tuˬ ve laˇ? Miˬ guiˬ hkʼoˆ luˬ taˍ sheˆ taˍ ve awˬ ceuˬ htaꞈ ngaˬ hui kʼawꞈ gu te htaˇ, kanˉ hkʼaˬ hkʼe taw maˇ ve ngaˬ hui maˇ shiˍ leh, miˬ guiˬ hkʼoˆ Paˍraˍdiˇsuˆ hko hpehꞈ la tuˬ gʼa ga daꞈ ve yoˬ. Yaꞈ hkʼaˇ, ngaˬ hui kanˉ cawˬ maˇ jaˇ ve pa taw, awˉ lawˉ htaˇ lehˬ hkeuꞈ ve yoˬ. Teˇ ceuˬ le le ngaˬ hui awˬ pon hkʼa dehꞈ maˇ sha ve yoˬ hehˉ. Yaꞈ hkʼaˇ, ngaˬ hui hkʼanˇ tuˬ laˇ? Chi teˇ hkui kaꞈ Yaˬhoˉvaˬ ngaˬ hui htaꞈ te laˇ ve awˬ ceuˬ htaꞈ awˬ hpfuhˇ shiˍ leh awˬ bon uiˍ ve kʼo, oˇ ve teˇ yanˇ Yaˬhoˉvaˬ ngaˬ hui htaꞈ te laˇ ve awˬ ceuˬ htaꞈ awˬ hpfuhˇ shiˍ leh awˬ bon uiˍ tuˬ yoˬ.

19. Awˬ lawn chi ve hkʼaw a yeˇ uiˍ jaˇ ve lehˬ aˬ htoꞈ ma ve awˬ lawn le?

¹⁹ Yaˬhoˉvaˬ te ve teˇ ceuˬ le le hkʼaˬ htaˆ kaꞈ cawˇ ve tehꞈ ngaˬ hui yonˍ ve kʼo, ngaˬ hui htaꞈ nyi haꞈ shaˉ laˇ tcuh taˍ ve Yaˬhoˉvaˬ yonˍ gʼa ve chaw htaꞈ ngaˬ hui kaꞈ gʼa yonˍ cawˇ ve yoˬ. Yaˬhoˉvaˬ tcuh kaˍ paˍ Iˉsaˍyaˆ htaꞈ kʼoˆ piˇ ve awˬ ceuˬ ngaˬ hui maˇ leunˇ cawˇ. Oˇ kaˬ lo kʼoˆ ve, “ngaˬ htaꞈ gʼaˇ ca kʼawꞈ va la˗o. Oˇ hkʼe te ve kʼo, nawˬ hui awˬ gʼaˇ kʼawꞈ cawˬ la leh, gawˬ lehˍ gʼa chehˇ tuˬ yoˬ.”—Iˉsaˍyaˆ 30:15.