1. Yaˬhoˉvaˬ ve chaw hkʼaˬ hkʼe hpehꞈ ve le?

 Yaˬhoˉvaˬ ve chaw lehˬ Yeˍsuˆ beˆ maˍ laˇ ve awˬ hkʼaˇ suh ‘te gaˇ ve’ tehꞈ Liꞈ hpu hkʼaw kʼoˆ taˍ ve maw jaˇ˗oˬ. (Chiˇ mvuh ve 110:3) Tcuh kaˍ paˍ ve tawˇ hkawˇ chi awˬ tehˬ hpehꞈ ve yoˬ. Teˇ hkʼawꞈ le le Yaˬhoˉvaˬ ve Shaˉhkiˆhkanˍ ve chaw hto toˇ tuˬ awˬ pon laiˉ hinˉ naˍ riˍ yehˇ ve yoˬ. Yawˇ hui ha lehˬ ha kʼa chi hkʼe te leh a shu yawˇ ve hpu yehˇ ve yoˬ. Chi hkʼoˆ kaꞈ, yawˇ hui awˬ viˉ awˬ nyi htaꞈ awˬ gʼaˇ piˇ tuˬ, awˬ yanˇ yuˬ tanˇ ve, awˬ viˉ awˬ nyi yonˍ hkʼaˇ yonˍ yeˬ maˇ la tuˬ, leh loˍ ve awˬ ceuˬ cawˬ tuˬ kaꞈ ga piˇ ve yoˬ. Nyi haꞈ shaˉ paˍ leh ga piˇ shehˍ hpaˇ hpawnˬ daꞈ ve hkʼaw awˬ vuiˬ te tuˬ, leh Hkriꞈ yaˇ awˬ moˍ hkʼaw awˬ gʼaˇ piˇ tuˬ, awˬ yanˇ yuˬ tanˇ jaˇ ve yoˬ. Aˬ htoꞈ ma pa taw Yaˬhoˉvaˬ ve Shaˉhkiˆhkanˍ ve chaw chi hkʼe te ve le? Yawˇ hui Yaˬhoˉvaˬ leh shu htaꞈ haꞈ ve pa taw yoˬ.—Maꞈhtehˍ 22:37-39.

2. Roˉmaꞈ liꞈ 15:1-3 hkʼaw kʼoˆ taˍ ve hkʼe, Yeˍsuˆ lehˬ daꞈ ve henˇ yuˬ tuˬ hkʼaˬ hkʼe hpehꞈ ve le?

² Yeˍsuˆ lehˬ yawˇ awˬ to aꞈ kehˉ hkʼaˬ htaˆ kaꞈ shu htaꞈ dawˇ nyi piˇ ve yoˬ. Ngaˬ hui kaꞈ te gʼa ve hkʼe Yeˍsuˆ htaꞈ henˇ yuˬ cawˇ ve yoˬ. (Roˉmaꞈ 15:1-3 gʼaw sheˍ.) Ngaˬ hui chi hkʼe te ve kʼo, awˬ bon maˇ maˇ gʼa tuˬ yoˬ. Awˬ lawn kʼo, Yeˍsuˆ kʼoˆ ve, “piˇ ve lehˬ gʼa ve aꞈ kehˉ awˬ bon uiˍ ve yoˬ.”—Tcuh yaˇ 20:35.

3. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

³ Yeˍsuˆ shu htaꞈ ga piˇ tuˬ aˬ htoꞈ ma gʼa yuˬ tanˇ ve, leh ngaˬ hui hkʼaˬ hkʼe te yawˇ htaꞈ henˇ yuˬ gʼa tuˬ, awˬ lawn chi ve hkʼaw teˇ geh henˇ tuˬ yoˬ. Chi hkʼoˆ kaꞈ, ngaˬ hui hkʼaˬ hkʼe te leh shu htaꞈ maˇ maˇ ga piˇ gʼa tuˬ chi ve kaꞈ teˇ geh henˇ tuˬ yoˬ.

4. Yeˍsuˆ lehˬ yawˇ awˬ to aꞈ kehˉ hkʼaˬ hkʼe te shu htaꞈ dawˇ nyi piˇ ve le?

⁴ Yeˍsuˆ heuˬ jaˇ ve htawˇ yawˇ shu htaꞈ ga piˇ ve. Kaˍpeˍneˍonˍ venˇ hkʼaw paˇ lo chaw laiˉ gʼaˇ Yeˍsuˆ geh laˬ htaˇ, yawˇ te ve awˬ ceuˬ htaꞈ dawˇ nyi sheˍ. Awˬ gʼuˇ suhˍ teˇ haˉ htaˇ, Yeˍsuˆ mvuhˇ hkʼa htiˇ bon lawˬ ve pa taw heuˬ jaˇ ve htawˇ, chaw laiˉ gʼaˇ yawˇ geh laˬ ve yoˬ. Yaꞈ hkʼaˇ, haˍ ve gʼawˇ ve leh naˬ ve gawˬ ve chaw htaꞈ yawˇ ha kʼaˉ jaˇ ve yoˬ. Yeˍsuˆ lehˬ yawˇ hui htaꞈ naˬ ve gawˬ ve ceh gu na˗e piˇ ve maˇ heˆ. Leh yawˇ yawˇ hui htaꞈ bon kaꞈ maˍ piˇ ve yoˬ. Bon maˍ hkawˇ chi lehˬ hkʼaw pui hkʼo lo bon maˍ ve tehꞈ kʼoˆ ve yoˬ. Leh bon maˍ hkawˇ chi ve miˬ guiˬ hkʼoˆ lo maˍ jaw ve daꞈ jaˇ ve teˇ lawn hpehꞈ ve yoˬ.—Luˉkaꞈ 6:12-20.

5. Yehˬ shehˍ hpaˇ yawˇ heuˬ jaˇ htaˇ, hkʼaˬ hkʼe te Yeˍsuˆ htaꞈ henˇ yuˬ gʼa tuˬ le?

⁵ Yehˬ shehˍ hpaˇ hkʼaˬ hkʼe te Yeˍsuˆ htaꞈ henˇ yuˬ gʼa tuˬ le? Yehˬ kʼa teˇ yehˬ kʼa gʼa hpuˇ ve awˬ ceuˬ htaꞈ dawˇ nyi sheˍ. Awˬ pa teˇ nyi mvuhˇ hkʼa hpeuꞈ kanˉ te ve pa taw, heuˬ jaˇ leh yehˬ kʼa hkʼaw oˉ kʼoˍ pui ve maˇ te gaˇ˗oˬ ve htawˇ, yehˬ kʼa hkʼaw oˉ kʼoˍ puiˍ ve te gʼa tuˬ Yaˬhoˉvaˬ ga laˇ tuˬ bon lawˬ ve yoˬ. Yaˬhoˉvaˬ yawˇ ve bon lawˬ hkawˇ htaꞈ hkʼawꞈ piˇ ve yoˬ. Leh oˇ ve teˇ haˉ yawˇ hui Yaˬhoˉvaˬ htaꞈ oˉ kʼoˍ pui ve teˇ geh te gʼa ve yoˬ. Awˬ pa awˬ e awˬ pon Yaˬhoˉvaˬ htaꞈ oˉ kʼoˍ pui ve aꞈ kehˉ awˬ nu ve awˬ ceuˬ a yeˇ uiˍ ve maˇ cawˬ tehꞈ yaˇ teˇ hpaˍ gʼa shiˍ ve yoˬ.

6. Yeˍsuˆ awˬ yanˇ yuˬ tanˇ leh shu htaꞈ hkʼaˬ hkʼe ga piˇ ve le?

⁶ Yeˍsuˆ teˇ gʼaˇ tiˉ chehˇ gaˇ ve htawˇ, yawˇ shu htaꞈ awˬ yanˇ piˇ sheˍ ve. Yeˍsuˆ ve awˬ chawˇ Baˆtiˆsaˬ piˇ paˍ Yoˇhanˬ htaꞈ shu oˉ kʼoˍ tawˆ htaˇ, Yeˍsuˆ hkʼaˬ hkʼe dawˇ ve htaꞈ dawˇ nyi sheˍ. Yeˍsuˆ nyi ma luˬ jaˇ ve yoˬ. Liꞈ hpu hkʼaw kʼoˆ ve, “[Yoˇhanˬ suh ve awˬ lawn htaꞈ] Yeˍsuˆ gʼa kaˇ htaˇ, yawˇ haw loꞈ kʼoˍ ciˇ leh oˇ kaˬ lo tawˆ˗e leh, chaw gawˬ kuiˬ teˇ kaˬ lo kʼai ve yoˬ.” (Maꞈhtehˍ 14:10-13) Aˬ htoꞈ ma te Yeˍsuˆ chi hkʼe te ve ngaˬ hui na gʼa tuˬ yoˬ. Ngaˬ hui dawˇ haˍ leh nyi ma luˬ jaˇ htaˇ, ngaˬ hui teˇ gʼaˇ tiˉ chehˇ gaˇ ve yoˬ. Yaꞈ hkʼaˇ, Yeˍsuˆ chi hkʼe maˇ te. Yeˍsuˆ vuiˇ kuiˬ lo kʼai chehˇ ve htaꞈ chaw awˬ moˍ lonˉ gʼa shiˍ htaˇ, yawˇ hui Yeˍsuˆ awˬ gʼuˇ suhˍ lo law taˍ piˇ ve yoˬ. Yeˍsuˆ hkʼaˬ hkʼe te ve le? Yawˇ “yawˇ hui htaꞈ ha kʼaˉ” leh yawˇ hui Gʼuiˬ sha geh awˬ gʼaˇ gʼa gaˇ ve tehꞈ Yeˍsuˆ shiˍ ve pa taw, yawˇ hui htaꞈ laꞈ haˉ ga piˇ ve yoˬ. Hkʼe te leh, Yeˍsuˆ yawˇ hui htaꞈ “awˬ lawn laiˉ ceuˬ maˍ piˇ ve yoˬ.”—Maˍkuˆ 6:31-34; Luˉkaꞈ 9:10, 11.

7-8. Hkriꞈ yaˇ awˬ moˍ hkʼaw ve awˬ viˉ awˬ nyi ga laˇ tuˬ loˍ htaˇ, awˬ viˉ awˬ nyi htaꞈ haꞈ ve nyi haꞈ shaˉ paˍ lehˬ Yeˍsuˆ htaꞈ henˇ yuˬ leh aˬ htoꞈ ma te tuˬ le?

 ⁷ Awˬ viˉ awˬ nyi htaꞈ haꞈ ve nyi haꞈ shaˉ paˍ lehˬ Yeˍsuˆ htaꞈ hkʼaˬ hkʼe henˇ yuˬ gʼa tuˬ le? Nyi haꞈ shaˉ paˍ ngaˬ hui awˬ pon kanˉ te hkeuꞈ ve ngaˬ hui awˬ hpfuhˇ shiˍ jaˇ. Leh yawˇ hui kanˉ te ve maˇ˗awˍ ve kʼo, awˬ viˉ awˬ nyi lehˬ nyi maˇ mawˬ. Tawˇ pa haˉ te kʼo, awˬ viˉ awˬ nyi maˇ dawˇ maˇ gaˇ ve awˬ ceuˬ hpehꞈ la leh naˆ tsuhˇ yehˬ lo laꞈ tcuh laꞈ haˉ gʼa kʼai htaˇ, naˆ tsuhˇ yehˬ lo caˉ daꞈ paˍ nyi haꞈ shaˉ paˍ awˬ moˍ hkʼaw ve teˇ hpaˍ, awˬ viˉ awˬ nyi htaꞈ haˆ gʼa ca ga piˇ ve yoˬ. Teˇ pawˆ pawˆ kʼo, yawˇ hui naˆ tsuhˇ yehˬ lo tanˇ hkuinˇ htaˇ kaꞈ gʼa kʼai ve yoˬ. Nyi haꞈ shaˉ paˍ chi teˇ hpaˍ lehˬ, awˬ viˉ awˬ nyi dawˇ haˍ chehˇ ve htaꞈ haꞈ leh ha kʼaˉ ve yoˬ. Yawˇ hui leh yawˇ hui ve yehˬ kʼa hkʼaw ve chaw lehˬ, awˬ viˉ awˬ nyi awˬ pon awˉ lawˉ dawˇ nyi ve yoˬ.

⁸ Chi hkʼoˆ kaꞈ, nyi haꞈ shaˉ paˍ teˇ hpaˍ lehˬ hpawnˬ daꞈ kuiˬ yehˬ te ve, Gʼuiˬ sha ve kanˉ hkʼaˇ ve yehˬ te ve, leh tuꞈ ve hkanˍ ve hpawˇ kaꞈ ga piˇ ve yoˬ. Chi hkʼe ceh tiˉ maˇ heˆ. Nyi haꞈ shaˉ paˍ lehˬ Hkriꞈ yaˇ awˬ moˍ hkʼaw ve kanˉ te tuˬ cawˬ maˇ jaˇ. Tawˇ pa haˉ te kʼo, Liꞈ hpu maˍ ve, awˬ gʼaˇ piˇ ve, leh awˬ viˉ awˬ nyi htaꞈ ga piˇ ve, chi teˇ hpaˍ hpehꞈ ve yoˬ. Ngaˬ hui teˇ gʼaˇ le le nyi haꞈ shaˉ paˍ leh yawˇ hui ve yehˬ kʼa hkʼaw ve chaw htaꞈ chiˇ mvuh piˇ cawˇ ve, leh yawˇ hui awˬ yanˇ yuˬ tanˇ ve htaꞈ ngaˬ hui Yaˬhoˉvaˬ geh bon kaꞈ lawˬ piˇ cawˇ ve yoˬ. Ngaˬ hui teˇ gʼaˇ le le te cawˇ ve hkʼe nyi haꞈ shaˉ paˍ kaꞈ keunˍ daꞈ cawˇ daꞈ ve hkʼaw gʼa te cawˇ ve yoˬ. Yawˇ hui Hkriꞈ yaˇ awˬ moˍ hkʼaw ve kanˉ tiˉ te leh yehˬ kʼa hkʼaw ve chaw htaꞈ a yeˇ maˇ yuˬ ve maˇ gʼa te.

9. Hpiˇliˇpiˆ liꞈ 2:4, 5 hkʼaw kʼoˆ taˍ ve hkʼe, Hkriꞈ yaˇ teˇ gʼaˇ le le hkʼaˬ hkʼe ve dawˇ hkʼaˇ cawˬ cawˇ ve le?

⁹ Hpiˇliˇpiˆ liꞈ 2:4, 5 gʼaw sheˍ. Ngaˬ hui teˇ gʼaˇ le le nyi haꞈ shaˉ paˍ maˇ hpehꞈ ve htawˇ, Yeˍsuˆ shu  awˬ pon awˬ yanˇ yuˬ tanˇ ve htaꞈ ngaˬ hui teˇ gʼaˇ le le kaꞈ henˇ yuˬ cawˇ ve yoˬ. Yeˍsuˆ lehˬ “awˬ ceˬ ve awˬ hoꞈ awˬ han htaꞈ deh” ve tehꞈ Liꞈ hpu hkʼaw kʼoˆ taˍ ve yoˬ. (Hpiˇliˇpiˆ 2:7) Liꞈ hpu awˬ tawn chi ve tcuhˉ kuiˬ htaꞈ ngaˬ hui teˇ geh dawˇ nyi sheˍ. Awˬ ceˬ lehˬ awˬ shehˍ hpaˇ nyi hkʼaˇ suh tuˬ teˇ ceuˬ le le te ve yoˬ. Nawˬ kaꞈ Yaˬhoˉvaˬ ve awˬ ceˬ hpehꞈ leh awˬ viˉ awˬ nyi htaꞈ ga piˇ ve yoˬ. Yaˬhoˉvaˬ nawˬ htaꞈ yehˇ tcuh gaˇ leh nawˬ awˬ viˉ awˬ nyi htaꞈ kaꞈ ga piˇ gaˇ ve yoˬ. Leh chi ve nawˬ hkʼaˬ hkʼe te gʼa tuˬ le? Awˬ hawˉ lo beˆ maˍ laˇ taˍ ve htaꞈ teˇ geh nyi sheˍ.

10. Ngaˬ hui a shu yawˇ awˬ to htaꞈ hkʼaˬ hkʼe na nyi cawˇ ve le?

¹⁰ Nawˬ shu awˬ pon awˬ yanˇ yuˬ tanˇ piˇ ve awˬ lawn htaꞈ dawˇ nyi sheˍ. ‘Ngaˬ shu htaꞈ ga piˇ tuˬ ha lehˬ ha kʼa ve hkʼaw awˬ yanˇ yuˬ tanˇ˗aw laˇ? Tawˇ pa haˉ te kʼo, chaw teˇ gʼaˇ gʼaˇ ngaˬ awˬ viˉ awˬ nyi chaw mawˇ geh ca guiˇ˗e tuˬ lawˬ laˇ ve, maˇ heˆ leh yawˇ hui htaꞈ hpawnˬ daꞈ kuiˬ lo shiˍ laˬ tuˬ lawˬ laˇ ve kʼo, ngaˬ hkʼaˬ hkʼe te tuˬ le? Maˇ˗awˍ ve kʼo, ngaˬ hpawnˬ daꞈ kuiˬ yehˬ hkʼaw maˇ heˆ leh hpawnˬ daꞈ kuiˬ yehˬ lonˉ hkʼaw daꞈ kehˬ tuˬ haˆ te tuˬ kʼoˆ piˇ˗aw laˇ?’ Ngaˬ hui teˇ gʼaˇ le le Yaˬhoˉvaˬ htaꞈ awˬ to chiˇ aꞈ piˇ htaˇ, ngaˬ hui Yaˬhoˉvaˬ ve kanˉ teˇ ceuˬ le le te tuˬ yawˇ geh ka tiꞈ te˗oˬ ve yoˬ. Ngaˬ hui ve awˬ yanˇ, awˬ gʼaˇ, leh awˬ viˉ awˬ nyi htaꞈ ga piˇ tuˬ ngaˬ hui ve hpu shi mawˇ jeˬ yehˇ ve kʼo, Yaˬhoˉvaˬ ha lehˬ jaˇ tuˬ yoˬ. Yaꞈ hkʼaˇ, ngaˬ hui ve te hkʼaˇ dawˇ hkʼaˇ teˇ ceuˬ ceuˬ pa cawˇ ve kʼo, hkʼaˬ hkʼe te tuˬ le?

11. Bon lawˬ ve lehˬ ngaˬ hui awˬ yanˇ yuˬ tanˇ leh shu htaꞈ ga piˇ tuˬ hkʼaˬ hkʼe ga laˇ ve le?

¹¹ Yaˬhoˉvaˬ geh bon hkʼa dehꞈ lawˬ sheˍ. Nawˬ teˇ ceuˬ ceuˬ pa cawˇ ve htaꞈ shiˍ ve htawˇ pa maˇ gʼa ve kʼo, awˬ lawn chi htaꞈ caˉ daꞈ ve Yaˬhoˉvaˬ geh bon hkʼa dehꞈ lawˬ sheˍ. Nawˬ hkʼaˬ hkʼe dawˇ ve yawˇ htaꞈ hteˇ˗ehˬ kʼoˆ piˇ leh “Gʼuiˬ sha nyi ma cawˇ ve htaꞈ nawˬ hui te gaˇ ve nyi ma cawˬ tuˬ” yawˇ ga laˇ tuˬ lawˬ sheˍ.—Hpiˇliˇpiˆ 2:13.

12. Awˬ viˉ awˬ nyi yaˇ nehˬ Baˆtiˆsaˬ haꞈ yuˬ˗oˬ ve chaw Yaˬhoˉvaˬ ve kanˉ hkʼaˇ hkʼaw hkʼaˬ hkʼe ga piˇ gʼa tuˬ le?

¹² Nawˬ awˬ viˉ awˬ nyi yaˇ nehˬ Baˆtiˆsaˬ haꞈ yuˬ˗oˬ ve chaw hpehꞈ ve kʼo, nawˬ Hkriꞈ yaˇ awˬ moˍ hkʼaw ve kanˉ maˇ maˇ ga piˇ gʼa tuˬ, Yaˬhoˉvaˬ ga laˇ tuˬ bon lawˬ sheˍ. Mvuhˇ miˬ teˇ hpaˍ hpaˍ hkʼaw kʼo, ga piˇ shehˍ hpaˇ aꞈ kehˉ nyi haꞈ shaˉ paˍ cawˬ maˇ jaˇ. Hkʼe te leh, ga piˇ shehˍ hpaˇ cawˬ ve htawˇ, a shaꞈ maˇ˗oˬ ve chaw hpehꞈ ve yoˬ. Chi teˇ hkui Yaˬhoˉvaˬ ve kanˉ hkʼaˇ awˬ viˉ awˬ nyi gʼaˇ hteꞈ maˇ la ve pa taw, yawˇ hui htaꞈ nyi haꞈ shaˉ tuˬ yaˇ nehˬ gʼa cawˬ cawˇ ve yoˬ. Kanˉ teˇ ceuˬ le le htaꞈ nawˬ ha lehˬ ha kʼa te ve kʼo, awˬ bon gʼa tuˬ yoˬ. Aˬ htoꞈ ma pa taw le? Nawˬ Yaˬhoˉvaˬ nyi hkʼaˇ suh tuˬ te piˇ gaˇ ve pa taw yoˬ. Chi nawˬ awˬ meh daꞈ tuˬ te laˇ ve leh nawˬ shu htaꞈ ga piˇ ve pa taw ha lehˬ ve yoˬ.

13-14. Ngaˬ hui awˬ viˉ awˬ nyi htaꞈ ga piˇ tuˬ hkʼaˬ hkʼe gʼa te cawˇ ve le? (Awˬ htaꞈ hpawˇ ve awˬ han htaꞈ nyi sheˍ.)

¹³ Awˬ viˉ awˬ nyi aˬ htoꞈ ma ga laˇ tuˬ loˍ ve ngaˬ hui chaˬ nyi sheˍ. Yuˇdaꞈ mvuhˇ miˬ hkʼaw chehˇ ve awˬ viˉ awˬ nyi htaꞈ Pawˇluꞈ kʼoˆ piˇ ve, “daꞈ ve htaꞈ te ve teˇ ceuˬ leh shu htaꞈ mawˇ jeˬ pehˬ piˇ ve teˇ ceuˬ htaꞈ taˇ leunˇ. Awˬ lawn kʼo, chi hkʼe ve tanˇ tuˬ teˇ hpaˍ htaꞈ Gʼuiˬ sha nyi ma cawˇ ve yoˬ.” (Heˍbrehˇ 13:16) Chi lehˬ beˆ maˍ piˇ hkawˇ daꞈ jaˇ ve yoˬ. Yawˇ hui Pawˇluꞈ geh liꞈ chi ve gʼa peuˬ hkʼawꞈ nawˉ maˇ maw, yawˇ hui ve yehˬ, tanˇ kaˬ hkʼaˇ, leh awˬ suhˍ awˬ shaˍ hpawˇ ve awˬ viˉ awˬ nyi htaꞈ baˬ taˉ leh “hkʼaw hkʼoˆ lawˬ hkʼoˆ lo hpaw˗e” ve yoˬ. (Maꞈhtehˍ 24:16) Yawˇ hui oˇ kaˬ lo gaˬ htaˇ, teˇ gʼaˇ leh teˇ gʼaˇ gʼa ga daꞈ ve yoˬ. Chi awˬ gʼaˇ suhˍ htaˇ, Yuˇdaꞈ mvuhˇmiˬ hkʼaw chehˇ ve awˬ viˉ awˬ nyi teˇ hpaˍ teˇ gʼaˇ leh teˇ gʼaˇ mawˇ laiˉ ceuˬ pehˬ daꞈ tuˬ Pawˇluꞈ beˆ maˍ piˇ ve htaꞈ maˇ yuˬ yehˇ ve kʼo, tuꞈ ve hkanˍ ve gʼa hpuˇ htaˇ a shaꞈ teꞈ hkʼaˇ maˇ sha ve yoˬ hehˉ.

¹⁴ Awˬ viˉ awˬ nyi lehˬ ngaˬ hui htaꞈ ga laˇ tcuh gaˇ ve teˇ pawˆ le le maˇ kʼoˆ laˇ ve yoˬ. Tawˇ pa haˉ te kʼo, awˬ viˉ awˬ nyi hawˉ hkʼaˆ teˇ gʼaˇ yawˇ ve awˬ miˇ ma suh˗e ve kʼo, yawˇ nyi ma luˬ jaˇ ve yoˬ. Yawˇ htaꞈ chaw teˇ gʼaˇ gʼaˇ awˬ chiˇ te caˍ laˇ tcuh gaˇ ve laˇ? Maˇ heˆ leh chaw teˇ gʼaˇ gʼaˇ yawˇ geh awˬ nu ve kanˉ leh yehˬ hkʼaw ve kanˉ gʼa ga te tcuh gaˇ ve laˇ? Yawˇ ngaˬ hui htaꞈ anˇ naˍ ve pa taw maˇ kʼoˆ laˇ gaˇ ve yoˬ. Yaꞈ hkʼaˇ, ngaˬ hui ga laˇ gaˇ ve tehꞈ kʼoˆ piˇ  ve kʼo, yawˇ ha lehˬ ve yoˬ. Awˬ viˉ awˬ nyi shoꞈ shaꞈ ve gʼa hpuˇ ve kʼo, awˬ nu ve chaw ga piˇ piˇ, maˇ heˆ leh yawˇ ngaˬ hui ga laˇ tuˬ lawˬ ve kʼo yawˇ ca kʼoˆ la piˇ tehꞈ ngaˬ hui maˇ dawˇ nyi cawˇ. Ngaˬ hui a shu yawˇ awˬ to htaꞈ na nyi cawˇ ve, ‘ngaˬ yawˇ hkʼe leˇ gʼa hpuˇ ve kʼo, ngaˬ htaꞈ awˬ nu ve chaw aˬ htoꞈ ma ga laˇ tcuh gaˇ ve le?’

15. Ngaˬ hui awˬ nu ve chaw awˬ pon awˬ yanˇ yuˬ tanˇ gaˇ ve kʼo, aˬ htoꞈ ma gʼa te cawˇ ve le?

¹⁵ Shu nawˬ geh ga laˇ tuˬ ca lawˬ la sha ve chaw hpehꞈ sheˍ. Ngaˬ hui Hkriꞈ yaˇ awˬ moˍ hkʼaw ve awˬ viˉ awˬ nyi teˇ hpaˍ lehˬ, shu htaꞈ ga piˇ puiˉ ve tehꞈ ngaˬ hui shiˍ ve yoˬ. Ngaˬ hui yawˇ hui htaꞈ shoꞈ shaꞈ laˇ ve tehꞈ yawˇ hui maˇ dawˇ jaw. Ngaˬ hui shoꞈ shaꞈ ve gʼa hpuˇ htaˇ, yawˇ hui ga laˇ tuˬ ngaˬ hui hkʼaˬ htaˆ kaꞈ lawˬ˗e gʼa ve yoˬ. Awˬ tehˬ kʼo, ngaˬ hui kaꞈ yawˇ hui hkʼe hpehꞈ gaˇ ve yoˬ. Nyi haꞈ shaˉ paˍ Aˬlanˬ meh ve 45 hkʼawꞈ gaˬ˗oˬ ve kaꞈ chi hkʼe hpehꞈ gaˇ ve yoˬ. Yawˇ Yeˍsuˆ ve awˬ lawn htaꞈ dawˇ nyi leh kʼoˆ ve, “Yeˍsuˆ kanˉ maˇ jaˇ ve htawˇ, yaˇ ehˉ leh chaw mawˇ teˇ gʼaˇ le le kaꞈ yawˇ awˬ paˇ lo chehˇ gaˇ ve yoˬ. Yeˍsuˆ yawˇ hui htaꞈ awˬ tehˬ awˬ na dawˇ haˍ ve tehꞈ yawˇ hui shiˍ ve pa taw, yawˇ hui Yeˍsuˆ ga laˇ tuˬ lawˬ haˆ ve yoˬ. Ngaˬ Yeˍsuˆ hkʼe hpehꞈ gaˇ ve yoˬ. Ngaˬ nyi ma nuˇ nehˬ ve chaw hpehꞈ leh awˬ viˉ awˬ nyi htaꞈ hkʼaˬ htaˆ kaꞈ dawˇ haˍ ve tehꞈ shiˍ tcuh gaˇ ve yoˬ. Shu ga laˇ tuˬ loˍ htaˇ ca lawˬ la sha ve chaw ngaˬ hpehꞈ gaˇ ve yoˬ.”

16. Chiˇ mvuh ve liꞈ 119:59, 60 hkʼaw beˆ maˍ laˇ taˍ ve htaꞈ gʼaꞈ te htaˇ, ngaˬ hui Yeˍsuˆ hkʼe leˇ te tuˬ hkʼaˬ hkʼe ga laˇ ve le?

¹⁶ Ngaˬ hui Yeˍsuˆ hkʼe leˇ te maˇ gʼa ve kʼo, awˬ gʼaˇ taˇ nuˇ sheˍ. (Yaˍkoˆ 3:2) Liꞈ henˇ yaˇ teˇ gʼaˇ awˬ han shawehˇ ve henˇ chehˇ ve htaꞈ dawˇ nyi sheˍ. Yawˇ lehˬ awˬ han shawehˇ paˍ saˍ laꞈ hkʼe leˇ shawehˇ maˇ gʼa sheˍ ve yoˬ. Yaꞈ hkʼaˇ, yaꞈ ve awˬ ceuˬ yawˇ htaꞈ maˍ laˇ tcuh leh awˬ han shawehˇ paˍ saˍ laꞈ hkʼe leˇ yawˇ gʼaꞈ te ve kʼo, yawˇ cheuˬ la tuˬ yoˬ. Chi ve hkʼa shuˍ shuˍ, a shu yawˇ hkʼaˇ yawˇ Liꞈ hpu henˇ leh yuˬ yehˇ ve kʼo, ngaˬ hui aˬ htoꞈ ma pa cawˇ ve htaꞈ chaˬ nyi cawˇ ve yoˬ. Chi hkʼe te ve kʼo ngaˬ hui Yeˍsuˆ htaꞈ shuˍ tuˬ yoˬ.—Chiˇ mvuh ve 119:59, 60 gʼaw sheˍ.

17-18. Ngaˬ hui awˬ yanˇ yuˬ tanˇ leh a shu yawˇ awˬ to aꞈ kehˉ shu htaꞈ dawˇ nyi ve kʼo, aˬ htoꞈ ma awˬ bon gʼa tuˬ le?

¹⁷ Ngaˬ hui shu awˬ pon awˬ yanˇ yuˬ tanˇ ve chaw hpehꞈ ve kʼo, awˬ viˉ awˬ nyi kaꞈ ngaˬ hui htaꞈ henˇ yuˬ tuˬ yoˬ. Nyi haꞈ shaˉ paˍ Htin meh ve kʼoˆ ve, “ngaˬ hui ve Hkriꞈ yaˇ awˬ moˍ hkʼaw awˬ viˉ awˬ nyi yaˇ nehˬ laiˉ gʼaˇ co ha hpawˇ uiˍ la mvuh la jaˇ leh ga piˇ shehˍ hpaˇ hpehꞈ ve yoˬ. Laiˉ gʼaˇ a shaꞈ nehˬ jaˇ sheˍ. Yawˇ hui co ha hpawˇ uiˍ la mvuh la tuˬ te piˇ ve teˇ ceuˬ lehˬ, Hkriꞈ yaˇ awˬ moˍ hkʼaw ve awˬ viˉ awˬ nyi teˇ hpaˍ shu awˬ pon awˬ yanˇ yuˬ tanˇ ve htaꞈ yawˇ hui mawˬ ve yoˬ. Hkʼe te leh, yawˇ hui kaꞈ awˬ viˉ awˬ nyi chi teˇ hpaˍ hkʼe leˇ hpehꞈ gaˇ ve yoˬ. Awˬ viˉ awˬ nyi yaˇ nehˬ chi teˇ hpaˍ lehˬ, Hkriꞈ yaˇ awˬ moˍ hkʼaw nyi haꞈ shaˉ paˍ leh awˬ nu ve awˬ viˉ awˬ nyi teˇ hpaˍ htaꞈ ga piˇ gʼa jaˇ.”

¹⁸ Ngaˬ hui lehˬ a shu yawˇ awˬ pon tiˉ dawˇ nyi ve awˬ yanˇ hkʼaw chehˇ ve htawˇ, Yaˬhoˉvaˬ ve chaw lehˬ chi hkʼe maˇ heˆ. Yeˍsuˆ lehˬ yawˇ awˬ to aꞈ kehˉ hkʼaˬ htaˆ kaꞈ shu htaꞈ dawˇ nyi piˇ leh ngaˬ hui kaꞈ yawˇ htaꞈ henˇ yuˬ gaˇ ve yoˬ. Ngaˬ hui Yeˍsuˆ hkʼe leˇ hkʼa dehꞈ te maˇ gʼa ve htawˇ, ngaˬ hui “yawˇ ve hkui ha awˬ hkʼaˇ suh gʼaꞈ kʼai” gʼa ve yoˬ. (1 Peˍtruˆ 2:21) Ngaˬ hui shu awˬ pon awˬ yanˇ yuˬ tanˇ leh Yeˍsuˆ hkʼa shuˍ a shu yawˇ awˬ to htaꞈ tiˉ maˇ dawˇ nyi leh shu htaꞈ dawˇ nyi piˇ ve kʼo, ngaˬ hui Yaˬhoˉvaˬ nyi hkʼaˇ suh tuˬ te piˇ ve pa taw ha lehˬ tuˬ yoˬ.