Moˉseˍ ve awˬ liˇ awˬ hkʼaˇ hkʼaw kʼoˆ ve, Iˉsaˍreˍlaˆ chaw lehˬ aˉ pui kʼaˍ, maˇ heˆ kʼo guˇ Yaˬhoˉvaˬ htaꞈ tuˉ tanˇ piˇ gʼa ve yoˬ. Tuˉ tanˇ kuiˬ hkʼaw awˬ liˇ awˬ hkʼaˇ chi ve 2 maˬ htaꞈ kʼoˆ taˍ ve yoˬ. Yaꞈ hkʼaˇ, chi ve teˇ ceuˬ maˇ heˆ kʼoˆ teˇ ceuˬ tuˉ tanˇ piˇ kaꞈ gʼa ve yoˬ. (Oˉ kʼoˍ pui ve 1:14; 12:8; 14:30) Aˬ htoꞈ ma te awˬ lawn chi awˬ bon cawˬ ve le? Teˇ pawˆ pawˆ aˉ pui kʼaˍ ca maˇ gʼa ve pa taw yoˬ.

Mvuhˇ goˇ ve awˬ yanˇ htaˇ, Iˉsaˍreˍlaˆ mvuhˇ miˬ hkʼaw aˉ pui kʼaˍ lehˬ, teˇ kaˬ le le lo chehˇ ve yoˬ. Peuˬ hkʼawꞈ nawˉ, awˬ kaˍ awˬ nu teˇ kaˬ lo hpaw˗e ve yoˬ. Teˇ hkʼawꞈ le le Ha pa 10 maˬ gaˬ kʼo, awˬ hawˉ hpawˇ haw ve mvuhˇ miˬ lo hpaw˗e ve yoˬ. Leh Iˉsaˍreˍlaˆ mvuhˇ miˬ hkʼaw mvuhˇ goˇ ve awˬ yanˇ htaˇ, kʼawꞈ poˬ kʼawꞈ la tuˬ yoˬ. (Sawˉlaꞈmonˍ ve kʼa muiˬ hkawˇ 2:11, 12; Yeˍraˍmiˆ 8:7) Mvuhˇ hkʼaˆ ve awˬ yanˇ htaˇ, Iˉsaˍreˍlaˆ chaw aˉ pui kʼaˍ ca leh tuˉ tanˇ piˇ tuˬ haˍ jaˇ.

Guˇ lehˬ teˇ kaˬ˗ehˬ kaꞈ maˇ hpaw˗e ve pa taw, Iˉsaˍreˍlaˆ chaw guˇ hkʼaˬ htaˆ kaꞈ ca gʼa ve yoˬ. Chi hkʼoˆ kaꞈ, guˇ lehˬ chaw awˬ paˇ lo chehˇ ve yoˬ. (Yoˇhanˬ 2:14, 16 htaꞈ tehˆ daꞈ sheˍ.) Liꞈ hpu htaꞈ caˉ daꞈ ve liꞈ kʼoˆ teˇ kʼoˆ hkʼaw suhˆ paꞈ hawˆ paꞈ leh to nuˇ to shaˆ ve awˬ lawn kʼoˆ ve, “Paˍliˇsaˍtaiˇ mvuhˇ miˬ hkʼaw teˇ venˇ le le leh teˇ hkʼaˆ le le guˇ meuˇ jaˇ leh cawˬ maˇ jaˇ ve yoˬ. Teˇ yehˬ le le guˇ hpui ca hpui la leh guˇ chehˇ taˍ ve yoˬ.”—Iˉsaˍyaˆ 60:8 htaꞈ tehˆ daꞈ sheˍ.

Chi lehˬ Yaˬhoˉvaˬ Gʼuiˬ sha awˬ hkʼaˇ ca leh yawˇ ve chaw htaꞈ haꞈ ve tehꞈ hpeuꞈ maw laˇ ve yoˬ. Iˉsaˍreˍlaˆ chaw ca gʼa ve tuˉ tanˇ tuˬ htaꞈ Gʼuiˬ sha haꞈ yuˬ ve yoˬ.